الأحد، 7 نوفمبر 2010

لما الشتا يدق البيبان



الشتا هوا اللغز اللى لحد اليوم مش بقدر أحله ..يا هلترى هل اللى بيخلينى أعشق الشتا هوا البرد والإحساس اللى بيسببهولى وبيحسسنى فيه إنى لسه إنسان وبحس وقادر أعيش فى الدنيا وأقدر أحس من تانى بكل حاجة ؟؟؟ ولا ياترى هل اللى بيخلينى أعشق الشتا هوا المطر ؟؟؟ المطر اللى تحس إن الدنيا كلها بتغسل همومك وبتطهرك من كل حاجة وبتحس إن وإنته فى المطر وبتجرى إن كل شىء فى الدنيا ممكن ؟؟؟ ولا ياترى لما بتبقى واقف فى عز المطر وبتحاول تبص للسما وبتشوف حلمك بعيد فى آخر الشارع وصوت المطر عالأرض بيحرك إحساسك وبيلمس روحك كل قطرة مطر بتقع عليك ؟؟؟؟ ولا يا هلترى اللى بيخلينى أعشق الشتا هوا السحاب اللى بيرسم مليون حلم ليا كل يوم وبيرسم كل حاجة حبيتها فى الحياة ... أحلى حاجة فى السحاب أكيد إنه بيرسم حدود الحلم ومش بيرسم تفاصيل وبيسيبنى أتوه فى التفاصيل وأكمل كل نقطة ...هوا ممكن يرسم البنت اللى بحبها او هحبها بس أنا اللى بقول هى مين وبقدر أحدد هى عاملة إزاى وبتتصرف إزاى لكن هوا بيرسم خط عريض يمكن وبيرسم إيدها وهى بتطبطب على عصفور او بيرسم دبلة جميلة ملفوفة حوالين صوابعها ...مش عارف بس هوا السحاب ليه سحره فى الشتا وبالذات لما بيرسملى بيت وجنينه وبيرسم لى كرسى صغير فى الجنينه ... ولا ياترى اللى بعشقه فى الشتا هوا الهدوم التقيلة وإن كل ما تتعصب وتنفخ تحس إن بخار الميه أو الهوا اللى طالع منك راسم نفسه عالقزاز او طاير فى الهوا لفووووووق وتحس إن همومك بتمشى معاه وبتطير بعيد لأرض بعيييييييدة متعرفش مكانها فين ؟ ولا إن الهوا لما بيطير كدا ويبعد بيتوه عنك مع همومك وبيختفى ؟؟؟
تقدر تقول إنى مش بحس بنفسى بجد وبنطلق وبعيش غير فى الشتا
يمكن عشان كل حاجة فيه بتشجع إنى أعيش وأحب الحياة يمكن عشان الحب اللى بلاقيه فى كل حاجة حواليه
سيبك من المقدمة الطويلة دى
خلينا ندخل فى القصة على طول :
ولا خليها البوست الجاى

شاب فقرى

هناك 14 تعليقًا:

قلم رصاص يقول...

انت حسستني بمود جميل اوي ياكريم
زي مايكون عايش فيه بجد

رائع ياصديقي

همسات وبحــ الحياه ــر يقول...

الله ياكريم
انت خلتنى اسرح بخيالى ههههه
كلام ووصفك لحب الشتا جميييل
تحياتى

شمس النهار يقول...

انا كمان بحب الشتاء جدا

وخصوصا لما اليوم يكون مغيم والسحاب غامق
وياسلام لو الدنيا تخدمني وتمطر يبقا زي الفل
بحب ريحة الشوارع وهي بتمطر بحب شكل الشجر
وتحس ان الدنيا بتتغسل
زمان كنت اطلع الجنينه وهي بتمطر واتفرج علي السما وهي هااات ياعياط

كل شتاء وانت طيب
بس السنه دي الخريف بيستهبل والشتاء متخفي في ماسك الصيف
:))

reemaas يقول...

حلو اوى كل الاسباب دى يا فقرى وخصوصا وانت بتنفخ دى لانى بحبها جدا
بس ممكن اقولك اناليه بعشقه
علشان احساس الدفا لما تبقى الدنيا تلج وتدور على الدفا والاحتواء

ولد تحت الصفر يقول...

أنا كل ماادخل هنا و احاول اكتب تعليق ماالاقيش حاجة أقولها..مش بلاقي إضافةو ولا ملحوظة حتى ..و لا اي حاجة ..هدوء بس كده و حبة خواطر زي :


بنت اختي قرعة قرعة .. مالهاش ولا شعرة !

بحب الشتاعلشان مش صيف ..


دخل الشتا و قفل البيبان ع البيوت


شاب فقري .. مش هتقدر ما تتابعش كلامه الجميل

كلمات من نور يقول...

وجعتلي عضامي يا شاب

انا بحب الخريف والربيع

مش بحب الصيف ولا الشتا

يارب الدنيا تفضل خريفية وتمطر بس برد لا لا لا

تحياتي

عمرو يسرى يقول...

تصدق حبيت الشتاء والمطر
الله عليك ياكريم

فراشة يقول...

ولا يمكن بحب الشتا عشان لما بكون وسط المطر محدش بيشوف دموعي :)

البوست دا جميييييل جدا مكانش ينفع امشى من غير تعليق

كل شتا وانت طيب :)

Antika يقول...

واخيرا رجع الشتا :) ! ..

غير معرف يقول...

بحب الشتا علشان صحتى بتكون احسن من الصيف وبيفكرنى بايام المدرسة اللى معظمها فى الشتا كانت ايام جميلة مفيهاش هموم بس بخاف من صوت الهوا والبرق اللى فى الشتا حصل مرة هوا شديد فى الشتا وانا كبيرة كدة نطيت على السرير ومسكت فى ماما وقعدت مرة تضحك ومرة تشتم فيا وتقولى رعبتى العيال الصغيرة...بطلى عبط والله كدة لحد دقلوتى..

Tears يقول...

حسيت كلامك بس عمرى ما عرفت احب الشتا

خواطر شابة يقول...

كلامك ووصفك جميل خلاني اعيش معاك اللحظة واتخيلها لكن عن نفسي لم استطع يوما ان احب الشتاء ولا السماء الملبدة بالغيوم احس بضيق شديد اعشق السماء الزرقاء الصافية والشمس المشرقة وكما يقول المثل للناس فيما يعشقون مذاهب
مع ودي

شاب فقرى يقول...

انا حاليا فصلت تماما
:)
إن شاء الله غدا هقوم بالرد على كل التعليقات
منورين
ومعلش الوقت مضغوط جدا
:)
دمتم بكل ود
الفقرى

شاب فقرى يقول...

قلم رصاص
يارب دايما يا صديقى
:)
------------
همسات
يارب تكونى اخدتى بالك من معنى الشتا
----------
شمس النهار
الحاجة اللى نسيت اقولها فعلا هى ريحة الشتا
هى اللى بتحسس الواحد بالشتا فعلا
:)
خلاص لا شتاء فى القاهرة خلاص ؟
يعوض علينا ربنا :(
==============
ريماس
دى من احلى الحاجات فى الشتا واوحشها
بيحسس الواحد قد ايه لوحده
والبرد بيفكر الواحد قد ايه هوا محتاج الدفا
=============
ولد تحت الصفر
:)
تسلم لى يا جميل
حلوة جملة بحب الشتا عشان مش صيف دى :D
=============
كلمات من نور
الشتا ليه مليون معنى مش مجرد برد وبس
:D
============
عمرو يسرى
:)
لازم تحب الشتا ياريس :)
منور جدا :)
=================
فراشة
انا بحب امشى فى الشارع فى الشتا والدنيا بتمطر
مش امشى وبس
أجرى كمان
:)
نورتى
==============
antika
اخيرا والحمد لله
دا احلى حاجة فى السنة :)
---------------------
غير معرف
البرق والرعد بيفكرنى بايام الطفولة
:)
ممتع
صوت الرعد ومنظر البرق
رهيب رهيب رهيب
بينقل لعالم تانى
يا اما خوف
يا اما امل وراحة ورغبة فى الغضب والثورة
=================
tears
حاولى عالاقل
الموضوع يستاهل محاولة
الشتا متعة بلا حدود
:)
==================
خواطر شابة
احلى حاجة فى الشتا السما
بترسم حاجات حلوة اوى
والصفاء دا لما بيبقى بليل فى الصيف مع نسايم بارده بيكون له طعم تانى
--------------------
سمسم
مش نشرت التعليق بس هرد وهسألك عاملة إيه ويارب تبقى بخير
وقولى لى آخر الأخبار
--------------------

تحياتى لكم جميعا :)
ونورتوا المدونة
شاب فقرى