الثلاثاء، 12 أكتوبر 2010

عالطريق ..

ماشيين فى أمان الله عادى جدا وهوا ماشى جمبى فى هدوء عمال يفكر زى ما يكون دماغه فيها ماتش كورة فى الجزاير والجمهور بيتنطط والحكم ملوش كلمة واللاعيبة بيلطشوا فى بعض وصوت الهتاف واصلى وأنا ماشى جمبه .. مقدرتش على تمييز اللى بيتقال لكن حاسس إن فى فوضى وهمجية وغضب شديد وأسف من اللى محضروش الماتش وقاعدين فى البيت بيفكروا ياترى الملعب عامل إزاى دلوقتى والهوا اللى بيحرك الأعلام قدامهم بيجننهم .. تشتيت رهيب وقلة تركيز تكاد تصل إلى العدم ..واصلنى إحساس إنه نفسه ينط فى الميه ويغطس تحت أوى أوى أوى فى قلب البحر ويمسح كل همومه وكل قلة تركيز ويتقبل الموضوع زى ما الميه على طول بتعلمه ...لكن فين البحر ؟؟
بيحاول يهدى أعصابه وبيطلع علبة سجاير وبيناولنى سجارة مع إنه عارف إنى مبدخنش وبيولع سجارته ويسيب سجارتى ولا كأنه ناولنى حاجة وبيبتدى يدخن ويحاول يسحب أكبر كمية من الهوا من كل سيجارة زى ما يكون آخر نفس له فى الدنيا
بيبص حواليه زى ما يكون تايه ومش عارف الطريق وبيفضل ماشى جمبى لكن فى الشارع وأنا عالرصيف وبيسيبنى ويروح يمشى فى وسط الشارع عادى جدا زى ما يكون مش واخد باله إن دا طريق سريع وبيكمل مشى فى شكل زجزاج وهوا بيغنى بصوت عالى وفى كل مرة بيسكت ثانية ويهمس لنفسه بصوت مش قادر أسمعه وبعدها يبصلى زى ما يكون بيسألنى مش هتنزل تمشى معايه ولا إيه
وفجأة بتقف جمبى عربية ملاكى بحركة أمريكانى وبسمع صوت السواق بيقول : ( ممكن تولعلى يا كابتن )
ببص له وبقوله هات سيجارتك وبديها للسواق والسواق بيستغرب منى زى ما أكون مجنون وقبل ما يطلع عالرابع بيبصلى ويقول :
(( إطلع عالرصيف يا كابتن عشان مفيش عربية تخبطك ومتمشيش متأخر كدا لوحدك ))
ببص لصاحبى اللى ماشى معايه بلاقيه بينطق بجملة واحدة بس من أول ما مشينا سوا :
( هاتلى سجارة ياض )
تمت
شاب فقرى

هناك 7 تعليقات:

Tears يقول...

اسلوبك فى السرد دمه خفيف


تحياتي

عمرو يسرى يقول...

رائع
اسلوبك رائع فى السرد
بوست فى منتهى الجمال

صوت من مصر يقول...

هات سجارة ياض

الغاردينيا يقول...

جميل عندي ملحوظات :

ماتش كورة فى الجزاير بالطبع استعمال الجزاير هنا جميل جداااا وهو ان تصارع افكاره شبيه بالصراع الذي سمع به الكل اايام المباريات مع ذلك قد يراه اي قارئ اخر فيثار و بذات لو جزائري هههه

وفجأة بتقف جمبى عربية ملاكى بحركة

السطر هذا فيه شئ ما مثقل الجمله و برأيي هو حرف الباء في كلمه بتقف لو ازلته و قلت وفجاة وقفت جمبي .... سيكون اسلس و افضل

ببص لصاحبى اللى ماشى معايه بلاقيه بينطق بجملة واحدة بس من أول ما مشينا سوا :

لو عدلتها هكذا

ببص لصاحبى اللى ماشى معايه بلاقيه بينطق اخيرا بجملة واحدة لكان افضل
لانا نعرف مسبقا بحسب ماحكيت لنا من الاول انه منطقش من اول ما مشيتم

تحية واحترام و بالتوفيق لك

Hamdy يقول...

وانا كمان يا كيمو هات سيجارة

واحشني يا ريس

قلم رصاص يقول...

متجيبش سيجاره ياض
مش قايلك مبدخنش قبل كدا
هههههههههههههههههه

أبو العريف يقول...

حلوه يا كريم

طبعا كالعاده اسلوبك متكميز وافكارك مختلفه

بصرف النظر عن ماتش الجزاير اللي ف دماغك

واحشني يا ريس