الاثنين، 20 سبتمبر 2010

ماشى لوحدى فى سكتى



وظللت أبحث عنك بين الناس تنهرنى خطايا

وسنون عمري في زحام الحزن تتركني شظايا

في كل درب من دروب الأرض من عمري.. بقايا

وعلى جدار الحزن صاح اليأس فارتعدت دمايا


ودفنت في أنقاض عمري أجمل الأحلام يبكيها صبايا

حتى رأيتك بين أعماقي وجودا.. في الحنايا

من كان يا عمري يصدق أنني

يوما أضعت العمر أبحث عن هوايا

قد كان في قلبي يعيش

وكان يسخر من خطايا؟


* * *

لا تعجبي إن قلت إني قد رأيتك

قبل أن تأتي الحياة

وبأنني يوما عشقتك في ضمير الغيب

سرا.. لا أراه

كم تاه عقلي في دروب الحب

وانتحرت.. خطاه

كم عاش ينبش في بقايا اليأس

يسأل عن هواه

لكن قلبي كان يصمت

كان يدرك منتهاه

فلقد أحبك قبل أن تأتي الحياة


* * *

عاتبت قلبي كيف يتركني وحيدا في الدروب

كم ظل يخدعني فيحملني الضلال إلى الذنوب

قد كنت في قلبي

ولم أعرف سراديب القلوب

إني أضعت العمر معصية

وجئت الآن عندك كي أتوب

وأمام بابك جئت أحمل توبتي

لا حب غيرك.. لا ضلال.. ولا ذنوب!!
فاروق جويدة
***
الواحد مش عارف ليه نفسه مفتوحة للشعر والمشى اليومين دول
مع إن الشعر دوما لا يحمل واقع الحياة والحب
يعنى الحب اللى بنتعلمه من الشعر بنلاقى حاجات تانية خالص غيره فى الحياة
بنلاقى أساليب وأفكار وتعامل مختلف
وطبعا مش بلجأ للمشى عشان خاطر أخس
لأن خلاص بقيت عصاية ومبقاش في حاجة أخسها يعنى لو ربنا كرمنى وخسيت أكتر هختفى
المشى هوا بيخرج الطاقة السلبية وبيخلى العقل يدرك حقايق كتير
زمان كنت بمشى تقريبا خط المترو كله (( خط المترو التالت )) أو شارع الهرم كله أو الكورنيش كله برده عشان بحاول ءأكد لنفسى شىء
مهما كانت بدايتك ... فطالما عندك صبر وقوة وتحمل هتوصل للهدف
دايما فى آخر كل مرة بلاقى نفسى أول ما أقرب من البيت بشارعين بحس بتعب وإرهاق شديد جدا وكأنى هنهار وأقع مكانى ومحدش هيشيلنى وهفضل مكانى كدا
ودا بيثبت وجهة نظرى التانية فى الحياة وهى (( إن اللحظات الأكثر ظلمة هى التى تسبق الفجر ))
يعنى أكتر وقت تحس فيه إن الدنيا قفلت وإنك نحس وفقر بجد وكل الطرق مقفولة ومتسددة بمليون حيطه ومليون ميدان أو اللحظات اللى هتحس فيها بالظلم وإنك مش واخد مكانك ولا عارف إنته هتوصل ولا لاء
بيكون بعدها الخلاص
بيكون بعدها الوصول
فى ناس معندهاش صبر وبتنهاروبتقول إن دى هى النهاية وبتطوى الصفحة وتحاول متفتكرهاش وتتبع روشتة النسيان عشان تنسى
لكن الناس اللى عارفة هى رايحة فين بجد وعايزة إيه ؟ بيتحملوا لآخر لحظة فى الطريق وبيمشوا للنهاية ومش بيهمهم وبيكملوا عادى جدا وكأن آلامهم مش موجودة وكأن اللحظات السودا اللى بتمر عليهم هى آخر خطوة هيخطوها
دايما فى قبل نهاية الطريق بحس بتعب وإنى هموت ومستحيل أوصل سليم بس لازم تكمل الطريق وتوصل لهدفك مهما كلفك الأمر
دى وجهة نظرى فى المشى الكتير
وحاليا مفيش أماكن أمشى فيها كتير
يعنى لفيت فى القاهرة كتير أوى لحد ما بقيت عارف كل شارع كام خطوة
يعنى مثلا إمبارح مشيت طلعت حرب مرتين وبعدين إستلمت الكورنيش لحد شبرا من أول التحرير
فقررت أعمل تغيير واشوف مكان تانى أمشى فيه
لأن المشى عالكورنيش والنيل نسايمه بتهف عليه مبقاش كفايه
من كام يوم قابلت سايح فى كنتاكى إسمه دانياال ومن الكاريبى
وقعدت أوصف له يخرج فين فى مصر وقلت له إقعد عالنيل
لو قعدت عالنيل هتلاقى روحك وهتعرف إنته مين لان النيل مش مجرد ميه ونهر وخلاص
حاجة اكبر بكتير
النيل يعرف عنى أكتر ما أعرف عن نفسى وياما مشيت عالكورنيش وكلمته وحكيت له وقعدت فى مكان عالجمب وحكيت له كتير اوى
النيل والكورنيش فيهم حاجات كتير أوى متتنسيش
عشان كدا قررت أنزل مكان تانى ليه فيه ذكريات ومشيت فيه
إسكندرية
أنا ياما مشيت فى إسكندرية ولفيت فيها
بس المرة دى غير كل مرة
المرة دى فى حاجات كتير هتختلف
ياما وقفت عند المكتبه ومشيت عالبحر وفى شارع أبو قير
المرة دى هتختلف لأنى عايزها مختلفة بجد
وهتختلف إن شاء الله

هناك 12 تعليقًا:

be pleased يقول...

"ودا بيثبت وجهة نظرى التانية فى الحياة وهى (( إن اللحظات الأكثر ظلمة هى التى تسبق الفجر ))"

الجملة اللى فوق دى هى الخلاصة ..

تمنياتى لك برحلة سعيدة :)

Story pain يقول...

المشى هوا بيخرج الطاقة السلبية وبيخلى العقل يدرك حقايق كتير

فعلا أنا قرات فى كتاب تنمية بشريةالمعلومة دى..والافضل منه كمان الجرى...


دايما فى قبل نهاية الطريق بحس بتعب وإنى هموت ومستحيل أوصل سليم بس لازم تكمل الطريق وتوصل لهدفك مهما كلفك الأمر

أنا للأسف فقدت أحلام كتير لانى لما وصلت للتعب المميت ده حسيت ان دى النهاية وماستحملتش..

ان شاء الله المشى على البحر هيخلى حاجات كتير تختلف

توصل بالسلامة ان شاء الله

ديالا يقول...

لما اكون مضايقه اوي واخرج بحس ان في حاجات كتير اتغيرت فيا بحس ان روحي بتصفي وخصوصا بقي لو في نسمات هوا حلوه

فتاه من الصعيد يقول...

انا كمان بحب افكر لوحدي بس من غير مامشي ... بقعد بس :)

عموما ترجع بالسلامه .... وربنا يقويك على المشي وآلامه

تحياتي

donya يقول...

البحر من اجمل مخلوقات الله

ترجع بالسلامه

*تحياتي

richardCatheart يقول...

اولا الشعر روعه تسلم بجد احاس جميل

عجبنى كلامك عن الصبر والوصول للهدف

منطقى وواضح فيه التجربه

ثانيا هاتنور اسكندريه وياريتك كنت استنيت للاسبوع الجاى كنت حضرت تجمع المدونين فى اسكندريه وحبيبنا من القاهره جاين كتير

ياريت تستمع اليومين دول وخصوصا انها رايقه والجو تحفه فعلا

عروستى يقول...

الصورة رووووعه

الحياة الطيبة يقول...

شعر قمة في الروعة ,إحساس أصيل وجميل .....لا مجاملة , تدل أبياته على روح نقية عرفت طريقها إلى الله أسعدك الله لقد استفدنا كثيرًا من كلماتك التي هونت ما كنا نراه أكبر من حجمه الطبيعي ....تقبل مروري بمدونتك وشكراً ثانية على (كلمات من نور) تلك هي كلماتك.

7akwena يقول...

الشعر والمشى واسكندريه
كده انت فنان فعلا
يلا تروح وتيجى بالسلامه

غير معرف يقول...

ثقافة الهزيمة.. أسكندرية ...ليه؟

متحف الأسكندرية القومى والمتحف اليونانى الرومانى و متحف المجوهرات الملكية و متحف الفنون الجميلة و متحف الأحياء المائية و متحف محمود سعيد ، و قلعة قيتباى و قصر المنتزة و مكتبة الأسكندرية الجديدة و الميناء الشرقى و حديقة أنطونيادس و نصب الجندى المجهول.

ومن الآثار الرومانية الموجودة بالإسكندرية المسرح الرومانى و عمود السوارى و معبد الرأس السوداء وحمام كوم الدكة الرومانى والذى أقيم على طراز الحمامات الرومانية القديمة ، و مسجد سيدى بشر ومسجد سيدى جابر ومسجد القائد إبراهيم ومسجد المرسى أبو العباس، وكاتدرائية الكرازة المرقسية وكاتدرائية اليونانيين الأرثوذكس و كنيسة سان مارك.

محطة الرمل وكامب شيزار وسان ستيفانو وسيدى بشر ، و طريق الجيش الممتد بمحاذاة الكورنيش ، و سى جل للأسماك فى أبوقير و بحرى، و جيلاتى عزة و جيلاتى النظامى و قدورة للأسماك فى بحرى ، و شارع سعد زغلول و شارع صفية زغلول وفول محمد أحمد و حلوانى طلعت وهريسة الحلبي و البن البرازيلى فى محطة الرمل، و حلواني صابر بالأبراهيمية، و مشويات أبن البلد بمصطفى كامل، و سان جيوفانى فى ستانلى ، و مول سان ستيفانو ، و مشويات حسنى بالمندرة ،و مشويات بلبع فى سيدى بشر قبلى، و حلواني شهد الملكة فى ميامى و فيكتوريا، وركوب الترام من غير محطة محددة فقط كى تتفرج على الأسكندرية من شباك الترام و أهل الأسكندرية الطيبين.

هذة بعض ما تحتويه مدينة الأسكندرية من معالم سياحية و مع ذلك لا تجد مدينة الأسكندرية على خريطة المدن السياحية الجديرة بالزيارة فى مصر فى مكاتب السياحة بالخارج و التى تنظم لها رحلات سياحية..

باقى المقال ضمن مقالات ثقافة الهزيمة بالرابط التالى www.ouregypt.us

شاب فقرى يقول...

سمسم
تقدرى تقولى فترة من الانغلاق على نفسى
مش بزور حد ولا بكلم حد
بحاول اعمل بكلامى وامشى فى السكه لوحدى
زى ما مشيت فيها قبل كدا ونجحت
لازم امشى فيها لوحدى وانجح
تقدرى تقولى برده نفسى مسدودة
مش بتهرب والله ولا بتخلى عن صحابى
بس فترة منيلة بنيلة بجد
وربنا اللى يعلم
نورتى جدا :)
فقرى

الغاردينيا يقول...

أحب فاروق جودة

و أحب المشي

و احب النيل مع اني ماشفتوش بس

بأذن الله هشوفه يوم ما ...

ودام انك قلت هتكون زيارة مختلفة اكيد

كانت مختلفة وعلى نياتكم ترزقون ..تحية