السبت، 11 سبتمبر، 2010

زهرة سليمان غانم


من ساعة ما رجعت من البلد إمبارح مخرجتش
صدرى واجعنى اوى وكمان معدتى
لدرجة انى مش بتحرك ولا برد عالفون ( سامحنى يا للى اتصلت--شاب عشان فى ناس نيتها وحشة -- لانى صوتى مش طالع فى الكلام فمش رديت وكنسلت )
رفضت خمس طلبات من صحاب وقرايب انى اخرج او اسافر اليكس او اى بلد
ومحضرتش اتنين كتب كتاب لإتنين من أكتر الناس القريبين منى
تقريبا صوتى رايح ومقضيها كدا اشارات واللى بيخلينى اعلى صوتى بحدفه بحاجة وهوا ونصيبه بقى
لأنى فى الأساس مش بتحرك من عالسرير
الحمد لك يارب على كل حال
فى أخبار كتير فرحتنى فى العيد
دا بخلاف حاجات اكتر
المفروض ان النهارده هوا يوم الفرصة الأخيرة لبعض الناس لتصحيح كل حاجة
لكن الناس مبتفهمش
دعكم من الهراء أعلاه
أنا كل شوية بنام وبصحى
يعنى بخطف حلم وانا فى عز التفكير فيتصبغ الحلم بلون الفكرة ويكون عالم حلو اوى
وكانى مش موجود فى مكان معين لكن قلبى بيقولى ايه اللى بيحصل
زى ما ابن عمى كان بيقولى على طول بطل تفكر وانته هترتاح
كنت بفكر فى التغيير اللى بيحصل للبنى ادم بيخليه شخص تانى غير اللى عرفناه
ونمت
حلمت بنفس القصة
فاكرين مسلسل ليالى الحلمية وآثار الحكيم فى دور زهرة سليمان غانم
أنا اكتر حاجة خنقتنى بجد وخلتنى مش أشوف المسلسل دا هوا إنهم فى جزء من الآجزاء غيروها
جابوا واحدة تانية غيرها فى المسلسل كانت تقريبا الهام شاهين
وطبعا لانى بكره الهام دى عمى وبدون سبب
ولانى كان عاجبنى شخصية على البدرى اللى كرهتها بعد كدا
لانى كنت صغير حبتين وقلت ازاى يفضل واحدة تانية زى دى بعد الملاك الطاهر زهرة اللى هى آثار الحكيم اللى غيروها
يارب تكونوا فهمت حاجة او انا عرفت اتكلم
انا طبعا الحلم بتاعى كان فيه حاجات كتير اوى
لكن الحمد لله لحقت اكتب البوست قبل ما دا كله يطير
عن إذنكم بقى
سأعود إلى مملكتى عالسرير أرتاح وأريح دماغى
وطبعا مش قدرت ارد على تعليقات البوست اللى فات لانى بكتب بالعافية
ومش بقيت بستعمل الفيس ولا الميل وبدون سبب
واى حاجة بتتنشر عالفيس بتتم بشكل اوتوماتيك من التويتر او النتورك بلوج
فاتح التعليقات بس الى ان نغلقها قريبا بعون الله
دمتم بكل خير دوما يارب
شاب فقرى

هناك 3 تعليقات:

wella يقول...

والله لما قولت زهرة افتكرت هتقولى زهرة غادة عبد الرازق
طلعت قصدك على زهرة حاجة تانية خالص
سبحان الله
فرق بين السما والارض بين زهرة دى ودى


الف سلامة عليك ياكريم اية يابنى لسة طالع من عية تدخل فى عية تانى هوة انتة لحقت تخف من الاول
يلا خير ربنا يعجل بشفاك

نفسى يابنى اسمعك بتقول انا بمب وبشيل حديد

انا مافهمتاش حاجة صحيح بس اذا كان كدة ماشى

عيد سعيد ينعاد ةعليك السنة الجاية وانتة باتم صحة

بسنت يقول...

ألف سلامه يا فقرى
وعلى الله النوم والاحلام تخليك تبطل تفكر لان التفكير دا زى كل حاجه لو زادت عن حدها انقلبت لضدها

وبالنمسبه لزهره واضح انها هلوسات ما بين النومين

كل سنه وانت طيب

Story pain يقول...

كنت بفكر فى التغيير اللى بيحصل للبنى ادم بيخليه شخص تانى غير اللى عرفناه

اسمع كلام ابن عمك..وماتفكرش..انت كمان بتفكر في موضوع ماينفعش خالص تفكر فيه في العيد..اصعب احساس ممكن نحس بيه..اننا نفقد شخص رغم انه موجود ..صوته وشكله ويمكن اسلوب كلامه لكن مش هو...اتغير..بنحس اننا تايهيين لاننا مش عارفين نتعامل مع الشخص الجديد ولا عارفين نرجع الشخص القديم اللي عارفينه..والاصعب اننا مانكوش من الناس اللي بتتغير..انا بعانى جدا من المشكلة دى مع اصحابي لاني مابتغيرش وهما دايما بيتغيروا..بجد احساس صعب جدا

كويس انك قررت في الاخر تتجه الى مملكتك عالسرير وتنام وتريح دماغك