السبت، 11 سبتمبر، 2010

قولى آه


بعد البوست السابق اللى حسيت بعد ما كتبته إنى كتبت فيلم قبيح
فكرت فى حاجة واحدة كنت بقولها زمان
ان قراراتنا قايمة على اختياراتنا واختياراتنا قايمة على خبرتنا من التجارب السابقة
طيب لو فى كل التجارب السابقة كنا فكرنا
فى كل مرة قلنا فيها آه وكل مرة قلنا فيها لاء
فى كل مرة قررنا ننسحب بهدوء وفى كل مرة قررنا نكمل مهما حصل
فى كل مرة قولنا اه والمرة دى حسينا باحساس رائع ووافقنا وكملنا المشوار
يحصل إيه لو كنا قلنا آه وسمعنا الكلام فى الفرص اللى قلنا فيها لاء
او قولنا لاء فى المرات اللى كنا إتجرحنا فيها
ياترى خط سير الأحداث كان هيبقى عامل ازاى
لو كنا بنسمع الكلام وبنفكر فى اللى بيتقالنا عشان نسمعه وننفذه
ياترى لو كانت مطيعة او كانت بتسمع الكلام او كانت بتعاند
ملايين الاحتمالات
فمثلا

لو كنت وافقت لما ماجى الجميلة الهادئة الرقيقة اللى مكملتش ست سنين قالت لى بحبك ومكنتش عملت فيها راجل تقيل وانا لسه معاها فى الحضانه وكنت حسيت احساس حب الطفولة اللى مبيتكررش ؟
ولا لو كنت وافقت انى انزل شغل انا مبحبوش فى مكان بكرهه وفى وسط ناس معرفهمش
او لو كنت قلت اه لما اتعرض عليه تلاتين مرة اخرج فى العيد واسافر اليكس او حتى كفر ابو عباس من صحابى الحلوين ورفضت لأنى مش عايز
ولا لما رفضت اكمل فى قصة حب حياتى من سنة ونص وقلت ان كل شىء نصيب وخلاص كل واحد يمشى من طريق
الله اعلم لو كانت قرارتى او قراراتكم اتغيرت فى المواقف دى كان زمان الاحداث والاحساس واللى بيحصلنا عامل إزاى

ياترى فى كل مرة قلنا فيها اه او لاء هل حسبنا وحسينا باللى ممكن يحصل وخط سير الأحداث
الموضوع عامل زى سلالم طالعة وسلالم نازلة وهتوصل لفين
تخيل إنك واقف فى وسط متين سلم
وكل سلم ليه اتجاه وطالع او نازل وفى قرراين بس ومينفعش تقف فى حياتك لانك هتوقف حاجات كتير اوى
وهتبقى فعلا انسان وحيد
ياترى ساعتها هتقرر تطلع فوق وتقول اه ولا تقرر تقول لاء وتنزل تحت
الله اعلم
القرار قرارك
فكر كويس
شاب فقرى

هناك 5 تعليقات:

طالبة مقهورة ..درجة أولى يقول...

كريم يا ابني..

الغلط ليه ميزات متقدرش تحكم عليه من منطلق انه غلط وبس

كفايا الايجابية الوحيدة انه بيعلمك
وكل ما بتعك اكتر وتتوجع اكتر
بتتعلم اكتر ومش بتخسر كتير بالنسبة للي كسبته

عشان كده عمري ما فكرت حتى اندم على قرار اخدته حتى لو غلط 100%
اصل اكيد انا عملته لسبب خفي

ولو مخدتوش القرار الغلط ده محدش يقدر يقول سير الاحداث كان ممكن يمشي ازاي ساعتها
كان يمكن الموضوع يتحول للأسوأ او ينتهي واخرج منه بدون ما اخد خبرة

ويمكن بكرة لو دخلت تجربة مدخلتهاش قبل كده..تكون العواقب اكبر

متفكرش ومتقولش ايه كان هيحصل لو...
عشان الاجابة هتكون احتمالات
والاحتمالات ممكن تكون غلط
فهتوصل لدايرة مفرغة

نايس بوست جو اوون
وحمد الله على السلامة :)

كيــــــــــــارا يقول...

تصدق قريت البوست وتنحت

مش عارفه هعلق بايه

هقولك ان كان بشكل او باخر هنوصل لنفس النتيجة

wella يقول...

اية اللى يحصل لو كنت قلت اه بدل لا
ولا بدل اه
اااااااااااااااه اكيد المواقف والحكاية اتغيرت ولا كدة كدة كنت هوصل لنفس النتيجة !!!!!!!!

بس عندى احساس بيقولى انها هتبقى نفس النتيجة سواء اه او لا
!!!!!!!!!!!! ازاى معرفش

الوردة السوداء يقول...

هقولك "لو" تفتح عمل الشيطان :)

بس عندك حق في قرارات بنندم عليها ونقول ياريتنا قلنا اه ومرات نقول ياريتنا قلنا لا...

في قرارات ممكن تأثر في حياتك...بس الغلط جاي من انك ماعملتش تحليل الموقف اللي انت قلت عليه ده...

يعني انت قلت "ان قراراتنا قايمة على اختياراتنا واختياراتنا قايمة على خبرتنا من التجارب السابقة"...لو فكرت كده عمرك ماتندم على قرار أخدته :)

تحياتي يا فندم :)

Story pain يقول...

ان قراراتنا قايمة على اختياراتنا واختياراتنا قايمة على خبرتنا من التجارب السابقة

بجد يا بختك بالجملة دى لو انت بتطبقها فى حياتك...لو احنا بنستفيد من تجاربنا السابقة وبناخد قرارات قايمة على الاستفادة دي ماكنش حد اخد قرار غلط...يعنى لا كنا هنطلع السلم في وقت المفروض ننزل فيه ولا كنا قولنا اه في اكتر وقت المفروض نقول فيه لا

أوقات بريح نفسى وأقول ان مافيش غلط وصح في ظروف لكل موقف وكل تجربه هي اللي بتخلينا ناخد قرار مناسب...بس اللى بيريح فعلا أن الواحد يسمع الكلام
ماقصدش كلام اللي حواليه او نفسه..لكن الاشارات او الطريق اللي ربنا بيباه عايزنا نمشى فيه وبيسره لينا..

أحييك على اختيارك للموضوع...موضوع فيه كلام كتير بس كفايه علشان انا طولت اوي