الجمعة، 17 سبتمبر، 2010

كلنا وراك يا مبارك... والحدق يفهم


كل ما الواحد بيمشى فى الشارع بيتنقط ويتنقط ويتنقط ويتنقط
كل ما أروح فى مكان ألاقى فى يافطة
(( كلنا وراك يا مبارك ))
(( كلنا بنحبك ياريس ... مع تحيات ولود أبو سماعين))
(( عائلات التحش تقف بجانب الريس فى الإنتخابات المقبلة ))
وهكذا
يعنى لا شفت دعاية للبرادعى ولا لأى مرشح بيفكر يتقدم للرياسة
ولا حتى هما قدروا يحطوا دعاية
والتلفزيون عمال يغنى علينا ليل ونهار وكذلك الجرايد الرسمية
زى الأهرام اللى زوروا الصورة وخلوا الريس ماشى فى المقدمة فى المباحثات الأخيرة
لكن أسعدنى جدا إمبارح لقيت صورة عالنت والناس فيها بشجع حد تانى غير الريس
مع إنها ساخرة ولا علاقة لها بالسياسة
ولكن .... مسير الناس تتجمع فى مرة ورا حد تانى غير مصيلحى
(( كلنا وراك يا مصيلحى ))
أنا مكنتش أعرف إن مصيلحى هيصعب عالناس كدا أكتر من أوطانهم
كل سنة وإنتوا طيبين
شاب فقرى

هناك 11 تعليقًا:

عمرو يسرى يقول...

بوست جميل
فعلا الواحد زهق من صور مبارك اللى فى الشوارع ديه مش عارف شكله من صغره شوارعى

dr.lecter يقول...

'طبعا كلناه وراه

مش احسن ماهو يبقي ورانا ويعمل حاجه وحشه فينا

البنفسج الحزين يقول...

اعتقد ان اليافطه دي عاملاها الشركه المنتجه كنوع من الدعايه والترويج للمنتج الجديد بتاعها....

ديالا يقول...

بص انا مش مستفيده منه حاجه ولا هيديني حاجه في جيبي ولا حتي ليا في السياسه بس انا كبرت لقيت الراجل ده في البلد دي معرفتش حد غيره مشفتش منه حاجه وحشه
ماشي خلينا بقي نفضل نقول وراك يابرادعي ولما يجي البرادعي ويطلع انسان مش مسئول وبدل مايعلي بالبلد دي يحطمها اكتر ماهيا وقتها بس هنقول الله يرحمك يامبارك

عايزه اقول انه مش وحش اوي ممكن يكون الي معاه هما الي وحشين بس هوا مش وحش اوي

الراجل ده لو راح بكره هنندم عليه

كل واحد له وجهه نظره ودي وجهه نظري لا انا هكسب لو قلت كده ولا هخسر لو قلت العكس بس معلش راي dr.lecterاستفزني اوي

Story pain يقول...

ورا مصليحى ..ورا البرادعى
المهم مش ورا مبارك
مش مهم ولود ابو سماعين وعائلات التحش هما بأه شايفين انهم يستاهلوا مبارك...

فعلا والله الناس صعب عليها مصليحى ومش صعبان عليهم بلدهم

ديالا..انت مش عايشه معانا فى مصر ولا ايه..متهيألى انت الوحيدة في80 مليون اللى ماشفتيش حاجه وحشة..لكن الشعب كله شايف فقر وجوع ومذلة وبطالة ونهب
و...

اسلوبك الساخر فى اخر بوستين عجبنى جدا

تسلم ايدك

شاب فقرى يقول...

عمرو يسرى
نورت
هوا عالمدارس والشوارع وعواميد النور والميادين والمستشفيات
وعيد مبارك عليك :)

شاب فقرى يقول...

دكتور ليكتر
هوا احنا لسه هنحس باللى بيحصل دلوقتى
ولا ايه ؟

شاب فقرى يقول...

البنفسج
الفكرة مش فى اليافطة
الفكرة فى التجمع
وان الناس تتوحد على فكرة
حتى لو كانت تافهة
المهم يتجمعوا

شاب فقرى يقول...

قصة الالم وألم القصة وبالا

مش هتفرق مين ورا مين
لكن هتفرق ان يحصل تغيير
لان لو فى تغيير
معناها ان الحكم مش هيبقى ميراث فى ظل دستور يقول اننا جمهورية
وفى ظل وطن بيشكى آلام أبناؤه العلماء والعاملين والفقراء
دبالا
انزلى العتبه
بس الجمب التانى
عند شارع عبد العزيز وميدان الاوبرا
وقولى لى شايفة ايه
كل واحد من البياعين دول فى اللى معاه كلية محترمة وفى اللى دبلوم
وقدام كل واحد فى عشرة مش بيشتغلوا
وقدام كل شاب عاطل
فى سبع بنات عوانس
طيب هتقولى لى احنا اللى عملنا فى نفسنا كدا
هقولك لاء
الدولة دى مش دولة مؤسسات بتحكمها
دى دولة قائد
بمعنى حضرتك ان القائد هوا المسيطر
يحل المجلس او يلغيه او حتى يجيب وزير حرامى او ابن تيت او حتى يعتقلنى انا وانتى عشرين سنة بدون اى سبب او محاكمة
او حتى اى قلق او حد يقول بم او تلت التلاتة كام
ببساطة ومن الاخر
لا رأيى ولا رأيك
اللى هيقول رأيه الشعب او الناس الكتير اللى حاسين وشايفين
ولا حتى انا وقصة الألم
كل واحد له رايه وكل واحد رايه يحترم
لو ربنا كرمنا بانتخابات نزيهة
فالكلام للشعب
مش مجرد اتنين او عشرين عاملين حزب او بيتناقشوا فى مدونة او عالفيس او على تويتر
احنا قليلين جدا بالنسبة للناس اللى مش بتلاقى تاكل او تنام او تشتغل
نظرتى مش سوداوية ولا منحازة ولا بتجرى ورا تغيير عالفاضى
فى الاول والاخر اى مرشح قدامنا هوا سمك فى ميه
يعنى منعرفش هيعمل ايه اما يمسكها
لكن ممكن نقبل المخاطرة لما يبقى فى تغيير وراى للشعب بجد
تحياتى لمروركم ورايكم اللى احترمه جدا
خالص التحية والتقدير والإحترام
شاب فقرى

فتاه من الصعيد يقول...

إخترناه ... وهنمشي وراه :)

تحياتي

شاب فقرى يقول...

فتاة من الصعيد
كلنا وراه