الأحد، 12 سبتمبر 2010

الزيارة الأولى للجراح

جلست بكل هدوء فى غرفة الإنتظار بين المرضى موحيا لنفسى أن كل ما يحدث من حولى لا علاقة لى به وأن ما أمر به هوا أمر نفسى بحت ولا يحتاج للجراحة وألتفت حولى فى هدوء ناظرا فى عيون المرضى وكأنهم يحسدوننى على هذا الشكل الرائع الذى خلقنى الله به وهذى الصحة والجسد القوى الذى لا يبدو عليه أى مرض أو أى نوع من أنواع الألم وبعض العجائز تنظر لوالدتى فى هدوء قائلة : (( ربنا يخليهولك يا حاجة .. هوا ماله بعد الشر ))
تكتفى أمى بإبتسامة حزينة وتقول : الحمد لله على كل حال هوا كدا بقى كويس عن الأول
ينادى الممرض فى العيادة على إسمى وبإبتسامة تحمل شيئا من الطمع فى بعض من البقشيش : (( الباشمهندس كريم ))
أقوم فى لا مبالاة متجها نحوه وواضعا بين يديه ورقة من فئة العشرين جنيه
فيبتسم الرجل لتلك الثروة الصغيرة ويحاول إظهارها أمام المرضى وكأنما يقول لهم : (( شوفوا الناس اللى بتفهم ))
ويفتح باب حجرة الكشف لى قائلا : (( بالشفاء يا باشمهندس ))
أدخل حجرة الجراح وألاحظ أنها لا تختلف عن أى حجرة كشف عادية ...فقط مكتب وبعض المقاعد المتناثرة هنا وهناك ورجل فى أوائل الخمسينات مشغولا بكتابة شيئا ما وساعة دقاقة على الحائط من الطراز القديم الذى إختفى منذ دهر وشهادة تخرج من جامعة عين شمس وغرفة ملحقة على الجانب ... أجلس فى هدوء وأمى على المقعد المقابل لى وأقول للطبيب (( مساء الخير يا دكتور ..أنا كريم اللى إتصل بيك دكتور محمود بخصوص حالته وآدى الإشعة والتحاليل يا دك...)
يرد الرجل فى إقتضاب وكأنما مل من كلماتى القليلة : أيوا فاكر ورينى التحاليل كدا
يرمق التحاليل بنظرة غير مهتمة وكأنما يعلم ما كتب بها ويقول فى هدوء : (( اللى عندك يا كريم هوا مرض بسيط لكن جسمك مكونش ناحيته أى مناعة لأن حالتك النفسية من الواضح من التحليل الظاهر قدامى إنها شيئة جدا والدكتور النفسى اللى إنته زرته قبل كدا من خلال كلامه معايه فهمنى حالتك كويس وعرفنى إنك مش بتتواصل مع حد ولا بتتكلم ... المشكلة اللى ظهرت دى حلها هوا عملية هتتكلف حوالى **** هتدفع نص المبلغ المرة الجايه لما تجيلى إن شاء الله وأنا هحجز لك فى مستشفى **** وإن شاء الله فى خلال خمس أيام هعملك العملية و ياريت بس ..))
تقاطعه أمى فى قلق وخوف مما يقوله : (( هوا يا دكتور فى أمل يحصل تقدم من غير العملية ؟؟ ))
يرد الطبيب فى ملل وكأنما مل من شكوك الناس فى تشخيصه وقراره بالجراحة للمرة المليون قائلا : (( لو كان ينفع يا حاجة مكناش قلنا يعمل عمليه ))
ثم ينظر إلى وجهى فى قلق : (( من الواضح إن فى حاجة تعباك والدكتور النفسى مقدرش يلاقى لها حل ووحدتك زودت الموضوع وأثرت عليك بزيادة فى الموقف دا ... هوا الدكتور النفسى مقاليش حاجة عن المشكلة اللى تعباك فى الحياة غير الوحده .. لكن إن شاء الله لما تتم العمليه ...أتمنى تغير وجهة نظرك من الحياة وتحاول تكمل وتخرج ... زى حسن كدا فى آسف عالإزعاج ... (( ويضحك فى وقار )) وبعدين إنته كمان مهندس ... حاول بقى تلاقى بنت لطيفة تهون عليك كل دا أو حتى تحببك فى الحياة بأى شكل ... وأتمنى عقلك ونفسيتك تتغير بعد العملية عشان تقدر تخف بشكل أسرع لأن لو فضلت كدا هيبقى كأننا معملناش حاجة ))
أبتسم فى هدوء قائلا الجملة الشهيرة : (( ربنا يسهل يا دكتور ...إعمل اللى عليك والباقى على ربنا ))
يرد مبتسما : (( أيوا كدا يا بطل ... هشوفك يوم الأربع الجاى بعد العيد ... تكون جهزت المبلغ عشان أقدر أحجز لك قبل يوم الجمعة قبل ما حالتك تسوء أكتر .. إتفضلوا دلوقتى وإلتزم بالأدوية اللى كتبها لك دكتور محمود لحد يوم الأربع وقبل العملية هديك علاج تانى ))
ترد أمى :
(( إن شاء الله يا دكتور ))
ونخرج فى حزن سويا من حجرة الكشف ويقابلنا الممرض بنفس الإبتسامة :
(( بالشفاء إن شاء الله يا باشمهندس ))
نتجاهله متجهين لخارج العيادة فى حزن ...
ترقبوا الحلقة الثانية أو الزيارة الثانية ........
شاب فقرى

هناك 9 تعليقات:

الوردة السوداء يقول...

شفاك الله وعافاك يا أستاذي...ده أولا

ومن غير ماتحس اني تطفلت على حضرتك واتدخلت في حياتك بس ايه اللي ممكن يخلي الواحد يوصل لدرجة الحزن دي ويتعب كده...حتى لو الدنيا فعلا بالصورة دي ربنا موجود ويقف جمبنا بس احنا نطلب بس :)

أتمنى حضرتك بجد تغير نظرتك للحياة...ألتمس بداخلك شيئا من الروعة...لا تجعل الأحزان تهزمك...

دمت بخير يا فندم :)

بوبو يقول...

الكلام دا بجد ولا قصة وخلاص؟ لو بجد فانا مخضوضة بصراحة.. وبعدين يعني ايه حالتك النفسية سيئة فهنعمل عملية يمكن تتحسن بعدها؟ ايه العلاقة يعني؟ عموما انا مش دكتورة بس الف سلامة عليك.. وبعدين هو المدونين اليومين دول ممكن يشتكوا من الوحدة؟ انا متاكدة ان فيه ناس كتيرة اوي يهمها تبقى جنبك وتتواصل معاك.. كل سنة وانت طيب يا كريم

سَارةٌ يقول...

السلآم عليـكم .. بشمهندس كريـم

بغض النـظر إني مفهمتش العلاقه بين العملية ومرض حضرتك .. ولإني مش دكتوره اكيد .. فلآ املك غير اني ادعي لحضرتك بالشفاء العاجل وإنك تقوم من العمليه بأسرع ما يمكن .. وحالتك تتحسن بعدها بإذن الله .. :)

لكن حضرتك عالأقل المفروض تحاول أو تكون عندك رغبه في التحسن عشان والدتك .. تحب تعيش عشانها ..
كفايا إن ربنا مخليهالك بعكس ناس كتيره بتتمنى لو تشوف والدتها ساعه ولا تكلمها دقيقه ..

بجد الإنسان بتكون حواليه نعم كتيره لكنه مش بيحس بيها ..

لما قريت البوست اللي فات .. لقيتك انت نفسك رافض الخروج والإختلاط بالناس .. حابب مجرد انك تكون منطوي ووحيد ..
طب ليه ؟

ربنا رازقك بأصحاب بيخافو عليك .. وناس بتحبك حواليك .. وانت رافض تكون معاهم تماماً ..

انا عارفه ومتأكده ان الكلام اسهل بكتير من الفعل .. وإن محدش هيحس بحضرتك غيرك انت .. لإنك انت اللي عايش حياتك دي مش حد غيرك ..

بس حاول عالأقل انك تغيير نفسيتك زي ما الدكتور قالك .. حاول بس وخليها على ربنا .. ده الوحيد اللي عمره ما هيخذلك في حياتك أبداً ..

بعتذر لو كنت اتدخلت زياده عن اللزوم .. و ربنا يشفي حضرتك وتقوم من العمليه بالسلامه .. وربنا يخليلك والدتك دايماً ..

Story pain يقول...

مافيش أسوأ من الطب النفسى في مصر
دلوقتى العلاج النفسى فى الدول الاوربية من غير أدوية...ومصر بأه العلاج النفسى فيها بالعمليات...!!!!!!

ماتصدقش الكلام اللي قاله الدكتور ده ولا اللي حولك ليه...تخيل انت ان فى ناس عندها كانسر واتعالجت نفسيا من غير ادوية ولا عمليات...يبأه منطقى ان مرض بسيط وسببه نفسى زي ما حضرة الدكتور المحترم قال يبأه محتاج عملية

فكر يا كريم وماتتسرعش

ربنا يشفيك ويعافيك

رحاب صالح يقول...

شفاك الله وعافاك
انا زعلانة كتير فعلا عشانك
يارب بجد تكون بخير وتقوم بالسلامة
تعرف الألم النفسي اقوي بكتير وهو ده الاساس ف امراض كتير
انا اساسا منعتي ضعفت بسبب حالتي النفسية من زمان عشان كدة بقيت اعرف كويس ان الحل مش عند اي طبيب
بتمني لك الشفاء العاجل بإذن الله وهدعيلك كتيييييييير
بس الاهم يكون عندك الارادة لأنك تتحسن وتكون بخير والامل والاردة هما الاساس هنا

Lady E يقول...

ربنا يبعد أي شر عنك ويحفظك من كل سوء

دكاترة مصر بتهييس ودي حاجة أكيدة

وفي دكاترة ميعرفوش الألف من كوز الدرة وواخدين العمليات تجارة

نصيحة انا مجرباها لو دكتور قالك على عملية شوف غيره وغيره وغيره واستفتي قلبك
وطالما الموضوع فيه جانب نفسي يبقى غير جو سافر مكان هادي اعمل اي تغيير يحسن نفسيتك لكن عمر الجراحه ما كانت حل لجراح النفس
مش هتداوي جرح بجرح

قلم رصاص يقول...

متقلقش ياكريم
ان شاء الله هتعديها يابطل
ربنا بيحبك والله انا حاسس كدا

وكل سنه وانت طيب

OlivE يقول...

هو انا مش عارفه اقولك حاجة

ربنا يشفيك يااااااااااارب
وان شاء الله الدكتور يكون بيبالغ
ويكون الموضوع ابسط من كدا بكتير


تحياتى

walaa tulip rose يقول...

كل سنة وحضرتك طيب يا باشمهندس
شفاك الله وعافاك

قرأت التعليقات وماشاء الله لقيت كل الناس بتحبك يعني اللي عنده كل الاحباب دول ومهتمين بيه كده مش معقول يكون وحيد للدرجة اللي تمرضه
ان شاء الله البوست الجديد نطمن علي حضرتك وتقولنا بقيت اخر تمام
تحياتي
كل سنة وحضرتك بخير وكل اسرتك بكل سعادة