الأربعاء، 18 أغسطس، 2010

شارياك




أنا : إيه اللى يثبت بقى إنك مش هتبيعينى تانى زى ما عملتى وتبعدى سنتين
هى : أنا بحبك وشارياك .... حتى لو مسألتش وسيبتنى كام سنة لوحدى
أنا : ..... :)
أحلى كلمة ممكن بنت تقولها على مدار التاريخ
ياااااااااااااااااااااه
ويا سلام لما تبقى قصداها مش يبقى كلام حلو بيتقال بيقوى العلاقة او بنقضى وقت وخلاص

***

اليومين دول
وقت إنتخابات مجلس الشعب
بتفكرنى بأيام ما والدى الله يرحمه إترشح لمجلس الشعب من اربعتاشر سنة تقريبا
ياااااااااااااااااااه
مش عايز أقولكم كنت ببقى مبسوط إزاى والكل بيقول
الواد كريم أهوه ... أبوه مرشح نفسه فى مجلس الشعب
كانت أيام حلوة أوى :)
وفى المدرسة وفى الفصل والشارع وفى كل حته
يلاااااااا
إقلب
***

العقول العبيطة

المشكلة العظمى
اللى بلاقيها اليومين دول
إنى إكتشفت إن فى نسبة كبيرة جدا من اللى أعرفهم عقولهم زوغيرة جدا
يا اما سنهم صغير ولسه مكونوش لا فكرة ولا رأى فى أى حاجة
ياإما بيعاندوا على أتفه الأسباب لمجرد العناد
او الدخول فى مجادلات عقيمة ملهاش أى قيمة ولا تغير من الواقع شىء وبتحرق الأعصاب عالفاضى
ياما محاولة التعمق فى نفسيتى أنا ومحاولة تحليلى ومحاولة فهم أسلوبى فى الحياة والصراحة دى حاجة بتفقعنى
لأنى بلاقى أسئلة مباشرة وبحس إنى ماشى فى موضوع عبارة عن إمتحان كيميا بتاع تانية ثانوى
او طرق من العقول الصغيره دى فى انها تعملى قلق فى حياتى بمجرد كلام أو تصرفات عبيطة
الصراحة مش عارف
بس متأكد إن كل شىء واضح دلوقتى
***

الخيبة التقيلة
انا كنت نشرت انى هنزل ببوست أتكلم فيه عن حاجات كتير مهمة
لكن بصراحة كل حاجة طارت من دماغى تماما لما سمعت الخبر اللى الحكومة والمجلس الاعلى للجامعات قرروه
إن مصاريف طلبة الإنتساب
هتبقى خمس تلاف جنيه بدلا من ربعميه وخمسين جنيه
يعنى حداشر ضعف
منعرفش بقى دا فيه اكتر من احتمال ليه
1- احتمال ان دا يخلى الناس بدل ما تدخل عيالها انتساب بخمس تلاف يدخلوهم كلية خاصة او معهد خاص
2 - يقللوا العبء عن الدولة شوية
3- يحرقوا فى دمنا ويخلوا الشعب جاهل ...خصوصا وإن طلبة إنتساب كتير جدا جدا جدا
أنا أفتكر إنى كنت مرة فى محاضرة كان فيها الفين طالب... ودا مدرج واحد بس فى تجارة القاهرة
يعنى فى مدرجات تانية ومجموعات تانية غيرنا حوالى تلاتة تانيين
تخيل بقى
انا عن نفسى اعرف ناس بشكل شخصى لو المصاريف عليت كدا
هيسيبوا الجامعة... وهيبطلوا دراسة
4- مخطط كبير لجعل التعليم بفلوس وغير مجانى
ويبقى اللى قاله رئيس الجمهورية لسه زى ما هوا التعليم مجانى
بس المصاريف مش مجانية ولا عادية ولا معقولة
عالعموم
إنتهى الكلام
إلى لقاء آخر
شاب فقرى


هناك 15 تعليقًا:

re7ab.sale7 يقول...

مساء الورووود
انا لسة جاية من صلاة التراويح
مش عارفة بقي ارد ازاي ....الحب واني اقول شارياك...تعرف ان كلمة شاريك دي معناها كبير اوو يبس مش كل حد يقولها تبقي حقيقية ...سواء بنت او ولد
العقول العبيطة والخيبة التقيلة مش هقول حاجة اصلهم كتييييير ف حياتنا...التعليم ...الله يخرب بيت الحكومة مش عارفة هيودونا فين بعد كدة ..انتساب والا خاص والا تعليم مفتوح واكادميات وجامعات مستقبلة وكندية وبلاوي مستخبية ...والله العظيم انا لو بس يدوني فرصة واحدة امسك انا التعليم اخليه عشرة علي عشرة بدال الهم والقرف اللي حاطينا فيه ده ...بجد بوست جميل احييك علية ...وميرسي لزيارتك مدونتي المتواضعة

شاب فقرى يقول...

رحاب
نورتى
ياريت كلامنا يقدر يغير الواقع
بس اهى مجرد محاولة
:(
مدونتك انا هبقى ضيف فيها على طول اجى اقرا
بس اكتبى انتى بس
نورتى
فقرى :)

شهد الكلمات يقول...

شارياك زي ماهي وقعها حلو على الولد وقعها احلي على البنت بس لو كانت صادقة

اما بقي بخصوص الانتساب انا على ايامي كان ب300باين و ده من سنتين تلاتة كدة كمان بقي ب400 و عايزين يبقي ب4000 جنية 4000عفريت ينططهم يا رب الله يخرب بيت الظالم و المفتري و ابن الحرام

حسبي الله و نعم الوكيل

wella يقول...

ياصباح الخير
تعرف انا قبل مااقرى انتة كاتب اية بشوف اية التغيرات اللى بتبقى كاتبها على جنب دى

مفتقدك
مش شايف نفسى فقرى من غيرك :(
وحشتنى كلماتك ... بس اكيد سبب خلق ربنا لينا ...مش إننا نفتقد حاجات ضاعت مننا ونبكى عليها... وتستمر الحياة :)


عندى سؤال هوة لية المستشار ابليس رجع مع توته ؟؟؟


أنا بحبك وشارياك .... حتى لو مسألتش وسيبتنى كام سنة لوحدى

صح الجمله دى بالعالم كله لو اتقالت من القلب بجد
حافظ على اللى اديتك قلبها مافيش اغلى من كدة
________________

الله يرحم والدك ويغفره يارب

الواد كريم أهوه ... أبوه مرشح نفسه فى مجلس الشعب

الواد كريم اهوة اهوة
دة وباباك الله يرحم مش نجح اماااااااااااال لو كان نجح كان اية اللى حصل
_________________
العقول العبيطة
ياسيدى عدى لاتجادل السفهاء
ههههههههه اللى زى انا كدة ماتردش عليهم اوعى تجادلهم الا اذا كنت فاضى باه

_____________________-

حكومة معفنة ودوله معفنة وكل حاجة معفنة
دة كل سنة اصلا تغلى المصاريف مافيش تعليم مجانى
فين المجانى دة
___________

سلام ياكيمو خليك مبسوط كدة على طووووووووووول
وسلميللى على توتة السلام امانة ودكرين البط بيسلموا عليكم :)

R-H-S يقول...

لا بدل ما احبك وشارياك تقول انا بشتري راجل هههههههه
بجد الكلمه دي لو طلعت من بنت تبقي واقعه واقعه يعني هههههههه

وبعدين عادي العقول اللي لسه منضجتش دي فيها منها كتير حتي بعد الجواز مثلا في ستات بتبقي عقلهم صغير اصل انا مجرب الحاجات دي

خمس الاف جنيه لا ياعم معتقدش هو احنا في المانيا القمح ؟؟ مستحيل اصلا وانا بقولك اهوه حط ف بطنك بطيخه صيفي بس انجز بقي واخلص من الكليه علشان تشق طريقك

تحياتي يابوالشباب

اقصوصه يقول...

مبارك عليك الشهر

وكل عام وانتم بخير :)

دعاء العطار يقول...

فعلاً كلمة بحبك وشارياك دى لو كانت من القلب اكيد هتخلى الواحد طاااااااااااير من السعاده

وع فكره بقى الكلام المزوق بيبان واللى خارج من القلب بيبان

لان اللى بيخرج من القلب اكيييد بيرشق فى القلب

:::::::::::

العقول العبيطه دى بقى

فسيبك منها وماتدخلش معاها فى نقاش اساسا لان كده كده مش هتوصل لحاجه معاها

هى بتبقى ماشيه بمبدا " خالف تعرف "

:::::::

اماالحكومه والتعليم

فحسبىىىىىىى الله ونعم الوكيل بجد

الواحد خلاص بقى يحس ان البلد مش بلدنا

دموع القمر يقول...

ينهار ملون
انا مسبتش تعليق هنا

دموع القمر يقول...

انا مش عارفة اللى بيحب حد ويسيبه عشان حد تانى ولما الحد تانى دا ينفض ترجع للحد الاولانى دا اسميه ايه هى بتكون مستمتعه ان الكل حواليها وحطاهم اسيبر
اكيد احلى كلمه البنت تقولها للولد انا بحبك
لكن الولد احلى كلمه يقولها انا بحبك وشاريكى مش البنت اللى تقولها

واد ياسيكا الحق يالا الواد كريم اهه ايوا يامعفن دا اللى ابوه كان مرشح نفسه مش زى خبيتك ماتجيى يالا نروح نخليه يمضى تذكار :)
ربنا يرحم والدك ويسكنه فسيح جناته

العقول العبيطة منها كتير فى كل مكان وفى كل مجال فنوكومنت عليها

بص ربنا على الظالم والمفترى
وكويس انى حولت انتظام :)
عايزين ايع غير فلوس اكتر وتخل وجهل اكتر واكتر
قلوب بلامرسى تنتظرك هلم اليها :)

ميس فلسطين يقول...

كل عام وانت بخير
مدونه رائعه تسلم على الوضوع الجميل

تحياتي....

احمد سعيد يقول...

اممممممممممممم
العقووووول العبيطه

هى مش مشكله غباء او سطحيه على فكرة

هى مشكله انغلاق
يعنى حد بيعجب بفكرة ويشوف انه هو بس اللى صح

اى حد بيناقش اخر بيحدد اسلوب نقاشه فى حاجه من اتنين

اما انه عاوز يبين انه هو اللى صح ويقيم الحجه على اللى قدامه
وعاوز يقنع اللى قدامه برايه

واما انه بجد بيفتح عقله وبيكون على استعداد انه يغير قناعاته لو اقتنع انها غلط


الفئه الاولى هى الاغلبيه الساحقه ودول اللى بتتكلم عنهم

والفئه التانيه نااااااااادرة قوى

قوى

قوى



:)
كل سنه وانت طيب

عمدة كفر المظاليم يقول...

ما شاء الله يابني والله
انت مش فقري قوي والله :-)
مدونتك جميلة ربنا يكرمك
تحياتي

قلم رصاص يقول...

ربنا يوفقكم ياكريم يارب وتتم الحكايه على خير للأخر ان شاء الله

انا متهيألي انت فهمت قرار وزير التعليم بخصوص مصاريف الانتساب غلط

اللي انا عرفته انه يقصد الناس اللي عاوزه تنتسب لكليه تانيه بعد ماخلصت جامعه .. يعني مثلا واحد مخلص حقوق وعاوز بعد ماخلصها ينتسب لتجاره او اداب ، دا اللي هينطبق عليه قرار الوزير برفع المصاريف الى 5000ج

باختصار المقصود بتوع الانتساب العادي وليس الانتساب الموجه يعني دا مينطبقش على طالب مخلص ثانويه عامه السنه دي ورايح الجامعه السنه الجايه

اعتقد دا اللي انا فهمته وياريت تتأكد انت بنفسك من الموضوع دا
لأن لو دا حقيقي وانطبق على كل الانتساب سواء العادي او الموجه هتبقى كارثه وناس كتير هتفضها ومتروحش

كل سنه وانت طيب ياكريم ورمضان كريم

راجية الرحمه يقول...

عجبانى اوى المدونه وبالذات الحاجات اللى فى الجنب ) لو مش عجباك المدونه دوس ctrl + w ( مقدرتش امنع فضولى انى اجربها واشوف اللى هيحصل ويارتنى ماجربت دوخت علشان اجيب المدونه تانى
__________________________________
أنا بحبك وشارياك .... حتى لو مسألتش وسيبتنى كام سنة لوحدى
اللى يلاقى الحب الصادق اليومين دول اكنه لاقه كنز على بابا
يارب كرمك
___________________________________
الواد كريم أهوه ... أبوه مرشح نفسه فى مجلس الشعب
كانت أيام حلوة أوى :)
الله يرحم والدك ويغفرله
اكيد طبعا كانت ايام حلوه
___________________________________
العقول العبيطه الساذجه الهبله المتخلفه ماشاء الله ربنا مكتر من امثالهم فى مصر كل ماتمشى خطوتين تتكعبل فى واحد ساذج وعبيط
___________________________________
المصيبه الكبيره او الخيبه التقيله حسب وصفك
هى التعليم المجانى
نفسى اشوفه والله طول عمرى اسمع عنه لكن عمرى ما فبتله مع انى الحمد لله بعرف اقرى واكتب
هو فين التعليم المجانى فى الدروس الخصوصيه
ولا فى الجامعات المفتوحه والكليات الخاصه
الانتساب اصلا اتلغى السنادى مافيش انتساب على الاطلاق
واللى يجيب شلل اكتر ان الجامعه الفتوحه بقت بتنسيق ثانويه عامه
يعنى هما عايزين يقولى كده بالعربى هتدفعوا يعنى هتدفعوا
والله انا سعيده انى جيت هنا (مع انى جيت قبل كده ) ومش هعمل ctrl + w

كيــــــــــــارا يقول...

امبارح كان يوم جميل اوي

ربنا يدمها علينا يارب