الخميس، 12 أغسطس 2010

بتاع بليلة





البوست التانى (( 2 رمضان ))

من سنين وسنين
كان ياما كان
كان فى بتاع بليلة فى آخر شارعنا
كنت كل رمضان أتحسر عالراجل
بيقفل العربية ويبطل يبيع
مع إن الواحد كان بيبقى مشتاق أوى للبليلة
لدرجة إن فى فترة من الفترات
لما كان حد يقولى نفسك تبقى إيه يا كريم
أو لو جالك ميت ألف جنيه هتعمل إيه
كان الرد الأول بتاعى : عايز أبقى بتاع بليلة أو أشترى عربية عشان أكل براحتى
ههههههههههههههه
يعنى كنت شايف ان الموضوع حلو وإن البليلة طعمها جميل وكنت بهزر واللى قدامى بيضحك وكانت دى امنية حلوة اوى عندى مستحيل تحقيقها
طبعا انا كنت متعود
ومتعود دى معناها كل كام سنة يعنى
كنت متعود إنى أنزل بليل فى الخباثة
وأروح بربع جنيه وأجيب شوية بليلة جاهزة فى كيس
باللبن والسكر والجوز هند والكنافة والسحر اللى معرفوش لحد دلوقتى اللى كان بيخلى طعمها حلو
وامشى فى عز الشتا كدا
وكل حاجة بترتعش
وادخل الشارع بتاعى
ملاحظة هامة (( انا بحب أمشى فى تلات شوارع بس ودا يعتبر أصغير شارع فيهم هوا تقريبا كيلو او يقرب من الكيلو ... والشارع دا الكلاب بليل بتخاف تمشى فيه .. لكن على مين .. أنا عندى مزاج أمشى فى الشارع دا بالذات وياما وقفت فيه وقالولى بطاقتك ... ههههههههههههههههههههههه ))
واخد الكيس اللى فيه البليلة وأمشى فى الشارع دا
محدش يقولى بقى بتاكلها ازاى
المهم والأهم إنها كانت بتتاكل وكنت أحيانا أخدها البيت
بس المهم إنى كنت بستمتع فى المشى بالشارع بليل وأنا وكيس البليلة أبو ربع جنيه
و فى رمضان بقى بالذات كانت توحشنى البليلة دى
بتوحى عندى بالدفء كدا والمشاعر الإنسانية النبيلة
إن ممكن مليون حاجة مختلفة وكل حاجة مستحيل تتشرب لوحدها او تتاكل لوحدها وبرده فى الاخر مع بعض
بتقدر تاكلهم وتبقى مبسوط
فى حين إنى مش بحب أسف سكر ولا اشرب لبن ولا بحب البليلة من غير كل دا
والكنافة مش بحبها وهى لوحدها كدا او حتى وهى فى الصينيه
بس ممكن حاجات كتير متكونش حلوة لوحدها لكن لما تتجمع
توصلنا لأجمل طعم ممكن فى التاريخ
فما بالكم بقى بمتناقضات تتجمع فى شخصية واحدة وتصنع أجمل إنسان خلقه ربنا
أو صفات مش بتبقى حلوة اوى .. لكن من شخص معين بيبقى ليها طعم تانى
تخيلوا
ورجاء شخصى من كل قارئى البوست البسيط دا
اللى يعرف أى بتاع بليلة فى القاهرة يبعتلى ويقولى عالمكان وانا على استعداد اعزمه بذات نفسى ومجانا بشرط يردلى العزومة لاحقا :))
أتمنى يكون المقصود وصل
تحياتى
شاب فقرى


هناك 8 تعليقات:

طوبه فضه وطوبه دهب يقول...

كل سنه وانت بالف خير وصحه وسعاده

غير معرف يقول...

:)

كل سنه وانت لسه فاكر ايامك الحلوه :)

انا موش من القاهره فمااعرفش حد بتاع بليله ... بس ممكن تخلي الحاجه او اختك يعملوها ... دي سهله اوي :)

تحياتي

شاب فقرى يقول...

دهب
وانتى بالصحة والسلامة والسعادة والهنا والرضا يارب
:)
نورتى

شاب فقرى يقول...

فتاة من الصعيد
بصى
هوا مينفعش
لان اللى الراجل بيعملها ليها سحر
ثانيا انا عايز اكلها والف فى االشارع :)
نورتى :)
خدى بالك من الكلام اللى باللون الاحمر
شاب فقرى

فتــافيت (رحاب الخضري) يقول...

الله بليلة .. بحبها اوووووووووي

بابا بيعمل بليلة زي مانت بتقول كده
بليلة على كنافة.. وساعات بسبوسة
صحيج قلبي ما بيطاوعنيش ادوقها حتى.. بش بيقولوا حلوة

انا اموت في البليلة السخنة بالبلن وجوز الهند مممممممممممممممممم.. اللهم اني صايمة بقى

كل سنة وانت طيب :)
وكنت بتجيب بليلة بربع جنيه؟؟
ليه كان بيحطلك كام حباية بليلة؟؟ :P

basees@bloggspot.com يقول...

بتفتح الشهية البليلة دي
ولو أني مش عارف هي أيه

Mano يقول...

كل سنةوانت طيب
رمضان كريم

قوس قزح يقول...

كما تعودنا منك على فعل الخير
ندعوك للمشاركة فى يوم خير جديد
التفاصيل هنا
http://kouskoza7.blogspot.com/2010/08/blog-post_12.html
و هنا
http://hams07.blogspot.com/2010/08/blog-post.html