الخميس، 15 يوليو 2010

ست أيام






لسه بنحلم
بكره وبيت وولاد وألف العالم وأعيش مرتاح
يمكن فى البلد فى بيت فلاحى بالطين
أو فى أى مكان فى الدنيا
يمكن فى حاجات بتمناها
وفاكر إن مستحيل أوصلها
وفاكر إنها المستحيل بعينه
فاكر إن الفراق خلاص نهاية الكون
التعب النفسى بيتحول لألم جسدى وبيحصل هلوسة وضيق تنفس وخنقة وسهر وإرهاق
لسه صابر عاللى بيحصل لسه بفكر فى بكره
يمكن بتعب يمكن بنهار كتير
يمكن بموت كتير
يمكن بخسر كتير أوى
بس مش بخسر فرص .... بسيبها تمشى بس ... لأنى مش عايزها ...أو مش هتكمل حلمى بالشكل اللى محتاجه
يمكن الحلم هيكمل لما الفرص دى تضيع ويتبقى لى الفرصة المستحيلة
الله أعلم عن الحياة وعن المستقبل
وعن اللى بيحصلى
يمكن فى خسارتى مكسب كبير
يمكن فى ألمى قوة بتعلمها إن بكره مش سهل وإن اللى فات مجرد حاجة بسيطة للى حصل
يمكن فى كل مرة بتألم فيها وبخسر حاجات كتير
والألم النفسى والجسدى بيزيد
يمكن فى كل مرة
بشوف حاجة مختلفة
فى كل ألم
فى كل موقف
فى كل خسارة
برجع أحلم تانى
يمكن فى خلق الدنيا والإنسان حاجة بتلهمنى إنى الصبر حلو وإن الصبر مهما كان مر وصعب إن الواحد يتحمله
لكن حلمى بينقلنى
لعالم تانى وأحلام بلاقيها بتتحول لحقايق
شوية شوية وشوية شوية بنلاقى جزء من حلمنا عالواقع
يمكن فات خمس سنين
فات وقت جبار
فات كتير
بس يمكن اللى جاى أكتر من اللى فات
يمكن أحلام بدأ يتحقق منها جزء
يمكن اللى حصلى وكسرنى هوا جزء من حلمى
لازم أدفع
وأتألم وأخسر كتيررررررررر
بس المهم إن الحلم هيبقى قدامى فى الآخر
سبع شهور من ناو 15 -2- 2011
مش مدة كبيرة ... دا ربنا خلق الدنيا فى ست أيام
وأنا مش إله .... أنا هجرب فى السبع شهور وأعمل اللى عليه
سواء نجحت أو فشلت ... فالفشل مش نتيجى حتمية
ولو فشلت فدا أكبر إثبات إن ينفع الواحد يجرب ويحلم عشان يعرف يعيش
وحلمى يطلع للنور
يطلع منه جزء
تطلع عليه الشمس ويظهر للكل
كل اللى قال إن اللى بقوله غلط وغباء وكل حاجة خسرت فيها هيشوف حلمى
يمكن ....
بس حتى لو موصلتش لحاجة وخسرت فرص وخسرت أكتر
هرجع أحلم تانى
لأن مفيش حاجة تانية قدامى
ولو حصل ومش إتحقق الحلم
يمكن يكون فى ألم
هيحققلى حاجات كتير أوى أوى أوى
هيوصلنى إنى أشوف حاجات حقيقية أكتر
مهما كانت النتيجة
مستنى سبع شهور
عشان أحلم من تانى

تحياتى يا قلبى
شاب فقرى
ملحوظة : صورتى أنا وصحابى من ست أو سبع شهور ... مش مهم حلمى ساعتها مش كمل أو إنهار أو ضاع منى ... بس اللى واثق منه
إنى هحاول تانى ... على فكرة ... الفقرى أقصى اليسار

هناك 17 تعليقًا:

فاتيما يقول...

يا أقصى اليسار انتا

صباح الخير الاول

مش قادرة استوعب قوى
الحلم اللى انهار
و لا حدوده و تفاصيله
اذ ربما انهياره دا خير عشان يتبنى من اول جديد حلم احسن منه و اقوى و اكثر صموداً
الواحد مبيعرفش الخير فين
حتى يأتيه بين يديه
و قليل قوى لما نحسه بالقلوب
ربنا صحيح محدش شافه
لكن حتى الأنبياء قالوا يا رب
كى يطمئن قلبى
و دول انبيا
فما بالك احنا البشر الضعفاء
؟!؟؟

انا بحب الجدارية دى قوى
مريحة للعين و النفس
بتمنى لو تكون ف كل حى ف مصر من شرقها لغربها لشمالها لجنوبها
بس كالعادة اسكنكرية الماريا لازم تتميز

ربنا يروق ايامك يا كريم

و يا عم موشكرين ع الصورة
ف البوست اللى فات
اسفة ملحقتش عالق هناك لما نزل


و تعالى هنا قولى
لازم يعنى تسيحلى ؟!!!

يعنى اكمنى توغوشت عليك و افتكرتك مفلس زى حالاتى ..فحبيت اعمل معاك واجب و اقولك مسعود انا عاوز فلوس و كدا ...
انتا زى ماجد اخويا و عادى
خلاص ياعم آخر مرة اسالك
و عارفة طبعا ان المشى متعة
بس الجو اصله كان بشع يا بنى
مش طالبة معاه مشى خالص
الحمدلله انك بخير
دا اهم شىء

و الحالة العامة الحالية
هتمر يا كريم
زى ما كل حزن بيمر
انتا لها
و قدها
و بكرة تشوف
بكرة تبص ع البوستات دى
و الأيام دى
و تحس انها بعيييييدة قوى
و مش راجعة تانى
إن شاء الله

ربنا معاك
و يثبتك

اختك الكبيرة
اللى مش هتعرض عليك
تسلفك حق المواصلات
تانى ابداااااا

غير معرف يقول...

انتة لية بتعمل كدة لية ؟؟؟؟؟؟؟؟؟؟؟؟؟؟انتة مش فى الصورة دى خالص يبقى انا كنت بتكلم مع حد غلط

شاب فقرى يقول...

يا فاتيما يومها كان يوم حصل حاجات كتير اوى اوى اوى اوى
حسيت انه تلات شهور فى قلب ليله واحدة
الحمد لله انها مرت على خير
المهم ايه رايك فى فكرة الفناء دى ؟؟؟
:D


نورتى
تحياتى
الفقرى :)

شاب فقرى يقول...

غير معرف
انا ليه كام طلب لوجه الله
اولا : اعرف مين
ثانيا : ليه انا مش فى الصورة
دا الوش التانى بتاعى
بس انا فى الصورة طبعا
وليه سؤال : هوا انتى كنتى بتكلمى حد بيقول انه انا ولا ايه ؟
مستنى الرد
فقرى

R-H-S يقول...

دا اهم حاجه في الدنيا ان انت تحس بطعم سواء النجاح او الفشل
ربنا يعينك في تجربتك دي ويوفقك يارب وتحس بطعم النجاح اللي انت بتتمناه يارب

هنبدل امتي انا علي احر من الجمر اني اقف في البلكونه
ههههههههه

sony2000 يقول...

اذيك ياكريم
عامل ايه
يارب تكون كويس
ممكن ان حجات تضيع مننا
بس ربنا اراد كدا علشان ممكن تكون موش حلوه لينا
وافتكر ديمن
ان كل حاجه ربنا بيجبهالنا كويسه
سواء نجاح او فشل لينا
ومتنساش
الايه الكريمه:وعسا ان تكرهوا شيء وهو خير لكم
وعسي ان تحبوا شيء وهو شر لكم

شاب فقرى يقول...

غير معرف
سؤالى واضح
مين ؟

شاب فقرى يقول...

جهاد
تعالى ياعم واقعد فى البلكونة
انا بنام فيها والله
نورت يا صاحبى
ياترى إيه أحوالك ؟

شاب فقرى يقول...

سونى
شكرا لمواساتك وكلامك
بتنورى المدونة دايما
تحياتى
فقرى

سلمى يقول...

بدون مقدمات
ربما للتجربه متعه حلو ولو فشلت
كفايه انك تجرب
انا عارفه ان كلامى يمكن يكون تقليدى
بس عاوزه اقولك حاجه
انت احسن من غيرك
ربنا يعينك
تحياتى

همسات وبحــ الحياه ــر يقول...

برجع أحلم تانى
يمكن فى خلق الدنيا والإنسان حاجة بتلهمنى إنى الصبر حلو وإن الصبر مهما كان مر وصعب إن الواحد يتحمله

هو دا
احنا لازم ندوق طعم النجاح وطعم الفشل بس المهم هنقف عن كل محطة قد ايه

ربنا يوفقك ويجعل تحقق كل احلامك :) ودا مش بعيد عليك ومش كتير على ربنا

Unknown يقول...

عارف الخسارة كتير كنت بقول انها الم و بيخلص من ذنوبي ، و انها لحظة من حياتي أحسن حاجة فيها انها مرت و انتهت يعني مش هتحصل تاني ، بس قليل أوي لما كنت اتعلم من الخسارة و الألم...

أبو العريف يقول...

دوس ع جرحك

واوعي تخلي اليأس يدوسك

روح ورا حلمك

واوعي في يوم يقلب كابوسك

نور شمعه

لو بتطفي الدنيا شموسك

واضحك وافرح

ايه هيفيد حزنك وعبوسك

إيمان يقول...

اهم حاجه ان لسه الامل موجود
انك ممكن تحلم حتى لو هتفشل
فدى دليل انك بتنجح وقادر تواصل
ولو وقعنا واستسلمنا من اول مرة او تانى او رابع او عشرين محاوله
مش هنقدر نعيش
بس لازم نجرب ونحاول ننجح ونعيش
ويمكن الخير موجود لينا ورزق واضعه ربنا لينا
فى حاجه تانيه
اتمنى انك تكون بخير
وتفكر ف بكره انه احسن بكتير
تحياتى

علاء المصرى يقول...

الصبر دائما مفتاح الفرج

لو مش عارف تصبر يبق تيجى المدونة تعد عندى شوية هتلاقى أشعار تسليك وبالمرة تقولى رأيك
سلام يا صحبى

M.Nazem -popo- يقول...

اول مرة ازور مدونتك بس حاسس فيها روح حلوة جدااااا مع انها حزينه ياريت تعتبرنى صديق :)

مجرد حلم صغنتوت يقول...

انا في مرحلة مسح الاحلام القديمة ومحاولة اني احلم احلام جديدة
حالة مشابهة نوعاً ما
بس الفرق اني لسه مش لاقية حلمي ده.. معدتش عارفة ألاقي حلم.. بقيت صعبة عليا مش عارفة ليه كده
ربنا يعينك في اللي جاي
ويحققلك حلمك ده على خير