أكتر حاجة بتبهرنى خلقها ربنا
هى الإنسان
بنبهر بالتفكير والتصرف وحتى الجنون
كل المشاعر
منها الحب والكره وحتى الألم الشديد اللى لا يحتمل
والأجمل توقع الأفعال والتصرفات
لكن من وجهة نظرى
إن أكتر حاجة عجبانى فى الإنسان بجانب عقله
إنه فانى
مش هيعيش للأبد
كل لحظة مميزة
مهما حملت اللحظة دى من ألم ووجع وتعب وإنهيار وصدمة وكارثة
مهما حصل للواحد من خيانه وتخلف من الآخرين
كل لحظة فى حياته مميزة
عمرنا ما هنبقى فى نفس الموقف
ولا فى نفس المكان بنفس الشكل والظروف
عشان كدا الناس بتعشق الصدف
لأنها بتخلى دنيتهم تحتمل عالأقل
بتخليها مناسبة وليها معنى
بتخلى ليها شكل مميز
بتظهر الجزء الخاص والجميل فى إننا فانيين
بتطلع الجزء اللى بيقول إن حتى لحظات الألم ممتعه
لأنها مميزة
مش هتحصل ولا حصلت قبل كدا
ولو حتى إتكرر الموقف
فبيختلف تصرف الإنسان فيه
وبيختلف إحساسه
سواء بإن (( جتته نحست )) على رأى الواد خليفه اللى كان معايه فى تانية عدادى :D
أو بقى أقوى ... على رأى البت سكوكرة
والأجمل فى إننا فانيين
إننا لازم ناخد قرار فى وقت ونتحمل تبعاته
ناخد قرار مش عارفين هيودينا فين
ولا هيمشى بينا فين
المستقبل غامض ومجهول
بيسبب الرعب للبعض والحب للحياة للبعض الآخر
أحب أحكى لكم حاجة حلوة إفتكرتها
لما كنت فى أليكس من مدة مع صحابى
روحنا نجيب واحد من محطة سيدى جابر
ونزلنا عند خالد إبن الوليد
الشارع من ناحية مؤمن كدا
ومشينا بقى مشى جبار
كنا واحدة بليل
مشينا لحد الساعة تلاتة
تايهين ومبسوطين بوجودنا فى الشوارع بليل فى الهدوء فى عز الشتا
وعمالين نقول الشارع دا شبه دا
ودا شبه دا
ومدينه فيصل منين ياولاد
والعيال إنهارت منى فى أول نص ساعة مشى بس :D
ياريتهم جربونى فى أول تلات ساعات توهان
ببقى مذهل :D
اللى نطلع بيه من الموقف دا
إن الموقف دا عمره ما هيتكرر
ولا عمرنا هنحس بمتعه زى دى تانى
يمكن نتقابل ونتمشى بس مش هيبقى نفس الإحساس
هنحس بمتعه يمكن لما نتوه تانى ونمشى بليل
بس مش هتبقى هى هى
أظن فهمتوا
بيس بقى :D
شاب فقرى
الصورة اللى فوق تصويرى
وهى هدية لفاتيما وبس
ومن أليكس
وأنا رديت فى التعليق اللى فات وقلت الموقف والمناسبه
والموقف اللى حكيته المرة دى بيثبت إنى بيبقى معايه فلوس وبحب أمشى من المهندسين لحد البيت :P
يعنى مستورة والحمد لله يا فاتميا
تحياتى :)
هناك 5 تعليقات:
ههههههههههههه
بجد جربتها قبل كدا
بس مع اخويا
احساس
اكتر من ممتع:))
بس ياريت تتكر تاني
ياريييييت:))
كلامك بيفكرني بحاجه
مع انها جايز ملهاش علاقه باللي بتتكلم فيه
بس حسيتها قوي هنا
هي اننا دايما بنفتكر ايام زمان وزكرياتنا والمواقف الجميله اللي حصلتلنا
ونقول كانت ايام حلوه
ومش بنفكر ان الايام اللي عايشينها
والمواقف اللي بنعيشها ممكن ييجي الوقت اللي نقول عليها ايام حلوه مش هتتعوض
انا ايه اللي جابني هنا
ازيك يا كريم
يارب دايما تبقى بخير
وتفتكر وتفكرنا معاك بإن فعلا كل لحظة في حياتنا حلوة وفريدة ولن تتكرر
ويارب اللي جاي منها أحلى من اللي فات
انا عندي ذكرى تكاد تتطابق مع روعتها في ما حكيت
كنت صغيرة في اعدادي وفاتني وفات زمايلي باص المدرسة ومعناش اساسا فلوس الا حاجة بسيطة متكفيش تاكسي
المدرسة في لعجوزة وبيوتنا في الدقي
وقد افتت لنا واحدة ان البيت طريقه سهل خالص وانها تعرف توصلنا
جبنا لب ومشينا فعلا ما يقرب من 3 ساعات
اللي بيقولوا عليه مشي للركب
بس الضحك واحنا تايهين اللي في اليوم ده لا ينسى
شكرا انك فكرتني
هههههههههههههههههههههههه
بجد احساس ممتع كدا مش عارفة ساعات بتلذذ بالخوف
فعلا تهت مرة بس كنت انا واختي
كان شعور كدا بالخوف وبعده فرحة اول ما وصلنا
احساس حلو فعلا
انا جربت التوهان قبل كده
خاصه لما تبقى مع حد تحبه
وناس تستمتع بالمشى معاها
بتبقى ذكريات جميله اوى
تصويرك حلو اوى
اجمل مافيه اظهار جمال ماخلق ربنا
تحياتى
إرسال تعليق