الاثنين، 12 يوليو، 2010

إذا أردت شيئا بشدة


كنت بسمع زمان نكته عن إن فى واحد بيحب ( يجرى ) بس ( يجرى ) مبيحبوش
كنت بضحك قوى كانت بالنسبة لى نكتة لطيفة مع إنى حاسس إنها دلوقتى تستاهل الحرق
لكن لما حبيت يجرى ويجرى محبنيش بدأت أفكر فى نقطة إن مش كل حاجة بتختارها ومستعد تعيش عشانها ممكن تكون مش عايزاك أو مش مفكرة فى كل دا أو مش مستعدة لتقبل كل التضحيات اللى إنته بتقدمها دى
وبصراحة أنا فكرت كتير فى رغبة الإنسان فى تملك الشىء
وفكرت أكتر فى طرق التملك
طبعا الطرق دى شرعية أو غير شرعية
لأن الحب جنون ومش كل واحد بيفكر بطريقة تحترم حريات الآخرين

أولا :
لاقيت إنك ممكن تفضل تجرى لحد ما يطلع عينك وقلبك يقف من كتر الجرى
لكن المشكلة إن برده يجرى مادام شايف إنه مش بيحبك فعمره ما هيحبك
لان ممكن يكون فى اختلاف فى وجهات النظر فى الحياة أو فى التفكير بيشوف فيها ( يجرى ) إن الحياة لا تحتمل
زى ما تكون فى واحدة شايفة ان فلان مينفعلهاش لأنه زى أخوها ( حاجة سخيفة )
أو فى واحد مش قابل فلانه لأنها ببساطة عقلها صغير
وفى الحالة دى لو صاحبنا فضل يجرى
قلبه هيقف من كتر الجرى ومش هيعرف يجرى تانى ولا يحب تانى


ثانيا :
إنك تفضل تجرى ورا ( يجرى ) لحد ما تموت من الجرى
ولا هتطوله ولا عمره هيغير رأيه
تنتحر أو تحرق نفسك كشمعه
عشان خاطر بتحب يجرى
ويجرى مبيحبكش

ثالثا :
خليك غامض ومحير وسر كبير
فى ناس بتعشق الأسرار وبتحب تكشفها وبس
فعشان كدا عمرك ما تقول السر لأى حد أبداااااا
خليك فى حالك يابن الناس
حتى لو بتحب ( يجرى ) خليك معاه غامض أحسن ما تخسره

رابعا :
الأسلوب المفضل عندى بقى
إذا أحببت شيئا بشدة ...طلع عين أمه
وهوا بيشرح نفسه مش محتاج منى شرح
تحياتى
شاب فقرى
الصورة اللى فوق من تصويرى لما كنت مسافر فى مرة من المرات
و.... مش مهم

هناك 14 تعليقًا:

دموع القمر يقول...

انا هنا من ساعة ما البوست نزل بس النت بقى

انت اكيد فى مصر :):):)
باب النجار مخلع

دموع القمر يقول...

لازمن اكون ازووول تعليق
:):)

دموع القمر يقول...

انا بحب جدا
اذا اردت شىء بشده فاطلق سراحة .............................

وجربتها كتييير مع يجرى :):)

دموع القمر يقول...

لا فيه بقى
محدش ضرب مجدش مجدش راح للبوليس قاله مين ضربك قاله محدش

فاتيما يقول...

لأ كمل ...هوه ايه
اللى مش مهم ؟!!!


قووووول يا بنى
احنا سامعين اهو



الصورة حلوة جدا
الله ينور


و بعدين اذا اردت شيئاً
متطلعش عين مامته سيادتك
الا اذا كان ف الإتجاه الإيجابى
لو سمحت


يعنى تطلع عين مامته
م الحنية و الحب و الاصرار
على ان تطاله
لحد ما يجيلك طواعية
و قبل نفسك
ما يقرب ينقطع


انما مش تطلع عين مامته
و تكرهه ف عيشته
هتخليه يبعد عنك
و يبقى الجرى ع الفاضى


و بعدين ماله الجرى ؟؟
او بمعنى تانى
السعى
الرغبة ف الحصول على شىء ما
مش حاجة وحشة ان يكونلك هدف
و لو هدف مجنون
و بيتملك عليك حياتك احيانا
زى الحب او حاجة ما



و يؤسفنى اقولك يا عزيزى
انك طول ما بتحب حد
او حاجة
لازم تجرى طول عمرك
عشانها



ما هو لازم تجرى
اولاااا
عشان تحصلها
و عشان توصلها
و عشان تحصل عليها
و عشان تحتفظ بيها
و عشان تكبرها
و عشان تغيرها للأفضل
و عشان تعيش معاك علطول


التوقف عن الجرى
معناه الموت يا كريم


كمان الجرى مش مهانة
و حب الجرى مش مهانة
و عدم حب الجرى ليك
برضو مش مهانة


و دايما احسها حقيقة
المكان اللى هنوصله
مش هوه الغاية


الغاية الحقيقية ف الرحلة
الطريق اللى بينمشى فيه دا
هوه الاهم
بنعمل فيه ايه
و بنقابل فيه مين
و بنختار ايه
و بناء على كل ذلك
هنكون شكلنا ايه
و هنطلع مين ف الآخر



انا بتفسلف حبتين ؟!!
و ماله
اختك الكبيرة بقى
و ارغى براحتى


المهم بقى
انا كنت سعيدة جدا
انى شوفتك يوم حفلة
محمد غالية الغالى
و عقبالك يا رب



خلى بالك من نفسك
تحياتى و خالص ودى

sun of free dom يقول...

إذا أحببت شيئا بشدة ...طلع عين أمه

ايون علم وسينفذ

البوست جامد تسلم

just waiting يقول...

على فكرة الحب علاقة تبادلية بين قلبين
لو واحد بيحب يجري ويجري مابيحبوش زي ما قولت هيفضل يجري لحد ما قلبه يقف
الافضل يرتاح شوية لحد ما يلاقي اللي يحبه حتى لو كان يمشي
على فكرة كمان ساعات كتير بنكون مش فاهمين صح وساعات يمشي يكون بيحبنا واحنا مشغولين بيجري ومش واخدين بالنا

غير معرف يقول...

واضح ان (يجرى )ده مطلع عينك قوى...
بس اسهل طريقه انك تسيبه علشان يشوف هو خسر ايه ببعدك عنه وجايز هو اللى يجرى وراك بعد كده ...وساعتها هو اللى هيجرى وراك...ووقتها بس طلع عين امه......

sony2000 يقول...

ههههههههههههههههههههههههههه
اذا احببت شيء بششده
طلع عين امه
ففعلا دا المفروض اللي يحصل:)

emymony يقول...

اذا اردت شيئا بشده
فاعلم انه لك
بص مقتنعه برايك جدا
بس انا اقول طول مافى اراده هتحصل على اللى انت عايزة
وكمان مش متفقه معاك
فى مقوله اذا احببت شيئا طلع عين امه
مش فى كل الحالات كده هتعذب اى حاجه تحبها ولو شىء مادى هتستهلكه فتخسرة
اذا احببت شيئا فعامله بالحسنى حتى يدوم لك
تحياتى وتقديرى

dr.lecter يقول...

هطلع عين امه

دموع القمر يقول...

الناس اللى قولت هيكونوا اول تعليق دول :):)
عايزة رايك

حـــلـــم كــــان يقول...

لازم لما حد يحب يجرى يكون يجرى بيحبه

لانه لو بيحب يجرى ويجرى مبيحبوش

يبقا هو بيتعب نفسه ع الفاضى

شاب فقرى يقول...

دموع القمر
حمدا لله بالسلامة ومبروك اول تعليق :)
========
فاتيما الطيبة
عارفة أنا هقولك حاجة
مش الطبطبه بتنفع مع كل الناس للأسف
فى ناس كتير أوى مش بينفع معاها غير القسوة عشان تهتم
التقل صنعه لما بيقولوا

الصورة دى يا فاتيما
والكلام دا ليكى إنتى بس وسر بينى وبينك
ومش تقولى لحد
كانت فى أليكس لما كنت بحاول أصحى وأعيش من تانى
كنت مبسوط أوى وأنا بصورها :)


لو الغاية من الجرى هوا الرحلة ؟
يبقى ساعتها أنا مش يهمنى الهدف أو الهدف ملوش قيمة زى الرحلة
أينعم الواحد بيتعب
بس مش لدرجة إن الطرف التانى يشلنا ويقتلنا
ساعتها هنبقى فعلا وقعنا فى خيوط العنكبوت
لأن اللى يتمتع بعذاب غيره يبقى عنكبوت
أنا بقول كدا لأنى عارف حدود الجرى كويس أوى
عارف إن لازم نتعب على ما نوصل أى حته
ونتبهدل على ما نحقق الهدف ويطلع عنينا على ما نحافظ عليه للأبد يمكن حتى للحياة الأخرى عند ربنا
لكن
الشىء لما يزيد عن حده ينقلب ضده
أنا أسعد بمقابلتك بكتير
أسعد بمراحل
كان نفسى أكتب عن اليوم دا
بس من كتر ما بيتعبنى اللى جرالى فيه على كل الأصعده بحاول أنساه
مكانش فى حاجة حلوة غير إنى شفتكم بس والله وفرحت لمحمد
نورتى كتيرررررررر
===========
sun of freedom
تسلم
نورتنى
============
just waiting
للأسف النكته فيها يجرى بس مفيهاش يمشى :D
هوا يمشى ممكن يريحنا
بس لما يبقى موجود فى حياتنا بس
أنا عارف إن دى النهاية ولازم الواحد قلبه يقف فى الاخر
عشان كدا
يمكن بقول حاجة ومش بعملها
بس خلاص إبتديت أعملها
نورتى :)
==========
غير معرف

فعلا مطلع عينى ونفسى إنقطع
دمت بكل ود
=============
سونى
مبروك مقدما :)
نورتى
=============
emy
ياريت الحسنى بتنفع مع كل الناس
والله الواحد ما كان يتعامل غير بيها
بس للأسف الناس بتخاف من الوحش وبتحتمى فيه
وغير كدا وكدا بتحبه أحيانا لما يقسى
نورتينى
شاب فقرى
======
dr.lecter
بحب الإسم والشخصية فى الفيلم
نورت
نفذ بقسوة :)
=============
دموع
نورتى من تانى
وعلقت
بس مش الأول للأسف

===============
تحياتى لكم جميعا
شاب فقرى