الجمعة، 9 يوليو 2010

نايم



طبيعى إن لحظات النوم من أمتع اللحظات فى حياتنا
بتقضى على الملل والتعب والإرهاق
بتقضى كمان على أصعب شىء فى الدنيا الإنتظار
إنتظار النجاح أو الفشل أو تأجيل الشغل أو حتى القرف
لكن أكتر شىء ممتع بالنسبة للنوم هوا إن النوم بينقل الإنسان لعوالم تانية مستحيل يوصلها
يعنى زى ما هوا واضح إنى مستحيل أطير أو أبقى جراح أعصاب أو أبقى عند شلالات نياجرا
النوم بيسهل كل دا وبيخلى العقل الباطن وأحيانا أكتر المشكلات اللى شاغلانا نعيشها ونشوف أثرها علينا
أحيانا بنشوف فقدان حد غالى وعزيز علينا فبنعرف قيمته
أحيانا بنمر بمواقف فى الأحلام بتأهلنا ( من وجهة نظرى ) من كيفية التعامل معاها وإحنا فايقين
لكن لو بتتمنى تشوف حاجة فى فعلا فى الحلم أو حد
عادة وأحيانا بيحصل إن الواحد بيحاول يأثر على نفسه بإنه يكلم حد فى التليفون لحد ما ينام
لو كان قادر ماديا على كدا عشان ميشوفش نفسه فى كابوس مفلس
وأحيانا بنشغل أغنيه ونفتكر ذكريات جميلة
لكن الأفضل يبقى فى شاشة عليها صور لحد بتحبه أو بتطمن له
تقعد تدور فى مكانك على أى صورة تنفع تبقى فى المكان دا وتساعدك عالنوم
مبتلاقيش لا فى جهازك ولا موبايلك حد يستاهل ولا حتى اللى كانت صورهم قبل كدا موجودة بشكل دايم للأسف
بتحط الصورة عشان لما تفوق لحظة وإنته نايم تلمحه عشان يدخل لحظات النوم ويدخل أحلامك مرحبا بيه وتقدر تحلم معاه بكل حاجة حلوة وكل حلم سعيد او حتى كابوس
لوكن فى الآخر
بتضطر تحط صورة حد متعرفوش أو تطفى الشاشة أحسن لك
لكن المهم
إنك تنام.

هناك 14 تعليقًا:

غير معرف يقول...

موش بحلم للاسف :(

يمكن لان مفيش حد حاطه صورته :)

بوست جميل ورقيق

تحياتي

Unknown يقول...

عشان كده انا بحب انام كتير

همسات وبحــ الحياه ــر يقول...

احسن حاجة ان الواحد فى احلامه بيشوف ناس بيكون نفسه انه يشوفهم لكن الظروف مانعاهم بيشوفوا ويعيش معاهم وبيكون مبسوط لكن فى النهاية فهو مجرد حلم
الواحد فى نومه بيشوف حاجات لما بيصحى بيلاقيها بتتحقق وساعتها يكون عنده استعداد انه يتصرف ثح لانه كان عنده خلفية عن الموضوع فى حلمه
الواحد لو عايز ينام ومش عارف بيشغل موسيقى هادية وينام :)
تحياتى لك

شفـقــة و إحســــان يقول...

بصراحة النوم ده نعمة
وانا اكتر واحدة مستغلة النعمة دى وبحلم احلام حقيقية فظيعة مريعة

شفـقــة و إحســــان يقول...

بصراحة النوم ده نعمة
وانا اكتر واحدة مستغلة النعمة دى وبحلم احلام حقيقية فظيعة مريعة

زى الهوا يقول...

هههههههههههه

محرومه من نعمة الاحلام

مش باحلم خااااااااااااااااالص

بس لو هاحط صورة حد غريب وهاقفل الشاشه , يبقى الحمد لله انى مابحلمش

نسيت تقول اهم فايده انا شيفاها من النوم

انك تنسىىىىىىىىىىى وتهرب من الواقع

كتير بانام علشان اهرب من التفكير وانسى اى حاجة مديقانى

بس اقولك على معلومه حلوه جايز تفيدك ؟

واحدة صحبتى باباها بيدايق اوى لما بتنام , بيقولها ماتناميش , النوم بيقصر العمر . كل ماتنام كل ماتفوتك احداث

بس بالنسبالى انا يااااااااااااااريت كل الاحداث تخلص :)

مش هاوصيك بقى ,, اوعى تنام:)

أبو العريف يقول...

مش بحلم غير وانت معايا

بوست حلو قوي يا كريم

يمكن انا اكتر الناس هروبا بالنوم من المشاكل

صحيح بواجهها بعدين بس ف وقتها مش بقدر افكر فبنام

كمان الفضا وحشش

كل اما افضي انام

لحد ما بقيت مش فاضي من النوم

سلمى يقول...

احيانا كمان بنعد نفتكر حجات ونبكى عليها لحد ما نام
وساعتها مش عارفه سعتها ايه

تحياتى

إيمان يقول...

مش بنام بسهوله
لازم اعصر مخى
وعنيه كمان تتعصر دموع زى الاطفال
وبعدين انام
الا لو كنت هلكانه من الارهاق
بانام علطول
والاحلام نادر لما بحلم
ومش بحب احلم لان اغلب الاحلام كوابيس واصوات مالهاش معنى
احب اتخيل واعيش بقا واتأثر باللى تخيلته قبل ماانام
وعلى البركه بقا
تحياتى

sony2000 يقول...

مهي احلي حاجه النووووووووووووووووووووووووووووووووم
:)

Unknown يقول...

لاسف مفيش حد أحط صورته والموبيل قديم عادى 1200n

و مفيش حد اكلمه كمان

بس بجد النوم حلو
وبدا زحفه عليا

fL0weR-giRL يقول...

هههههههههه
موضوع خطير
بس في حجات نسيت تقولها سعات تحلم انك بتقع من جبل وتصحي تلاقي نفسك واقع من ع السرير هههه

وسعات ف حد بيكرهك وبيغير منك ومش بيحبلك الخير وبيسببلك الجرح وتحلم انه عمل فيك حاجه ويطلع فعلا بيكرهك
فعلا النوم دا حاجه غريبه والأحلام دي سبحان ربي لاالله الا الله فعلا حاجه بتحس انك عايش فيها بكل حواسك مع ان حواسك مش شاغلين لانك نايم

جميل الموضوع بصراحه

تقبل مروري أيها الشاب الفقري

^(^

حبات التوت يقول...

احلى حاجة فى الدنيا دى النووووووووم

الحمد الله على نعمة النوم بجد نعمة

رحلتنا في الحياة يقول...

النوم اممممممم
النوم جميل اوى وبحبه بس مش بحلم لانى بنام زى قالب الطوب :))