الخميس، 10 يونيو 2010

تاج زى الهوا

السلام عليكم ورحمة الله وبركاته
إزيكم
يارب تكونوا بخير
يارب يكون الكل بخير
مدونين أو أى حد بيقرا
الواحد مش بيتمنى الشر لأى حد (( ناس معينين بس بنتمنى تحقيق العدالة الإلهية فيهم ))
بقالى فترة مش قادر أكتب ولما بكتب مش بنشر
لأنى بمر بظروف مش تمام
بتتعلق بالمستقبل و فى إختيارات كتير أوى
معلش إذا كنت بطلت أتابع أو أرد عالتعليقات
بس غصب عنى
مش هقول الظروف
لكن يكفى أقول إنى بحاول أحقق أهم حلم فى حياتى
يعنى مشغول حتى عن الشغل والمدونة والصحاب
ولو حد بعتلى مسج مش بقدر ارد ولو حتى عالميل أو الفيس
بقيت بحس إنى لما بطمن حد وأقوله الحمد لله إنى بكدب
وانا بكره الكدب والكدابين ومستحيل أكدب
فمش بقدر أرد لأن مينفعش أقول تمام وخلاص عالفاضى للناس
ونفسى أخرج من البيت أروح أقابل نفسى وأقعد معاها فى مكان مهم وأعزمها عالغدا
لأن فى مكان نفسى أروح أتغدى فيه بجد
بس مفيش وقت
ونفسى زعلانة وأنا مش قادر أراضيها
ولا قادر أرضى حد
لأن لما الواحد بيحاول يحقق حلم بيفكر فى الحلم وبس وبيبعد عن أى متع أو أى حاجة هتشوش عليه
والنهارده بعون الله لما لقيت إن مفيش أى حاجة تخلينى أستنى لما ألاقى حد يخرج معايه
لأنى طبعا معرفش حد ومليش صحاب ولا غيره
فقررت إنى أكتب المهم هنا الاول وبعدين أفكر فى الخروج والعزومة الرهيبة
بس يارب نفسى مش تدبسنا فى عزومة تدفعنى اللى ورايه واللى قدامى
أنا بجد كنت مأجل رغبتى فى الخروج والغدا فى المكان دا لحد ما ألاقى حد يستاهل إنى أقعد أتغدى معاه
بس مش لاقى
وحاسس إن مش قادر لا أكل ولا أشرب
فلازم أروح
صحيح
جالى تاج من ( زى الهوا )
اللى بدعى ربنا من يوم ما بدأت تدوين إنى كل ما أزورها ألاقيها تفتح التعليقات
لكن بيخيب ظنى وكل اما أروح مش بعرف أعلق
نرد عالتاج ونزود عليه شوية كلام من عندى وشوية أسئلة ويارب نقدر نرد
شكرا ليكى جدا جدا جدا جدا
إفتكرتينى فى وقت مفيش حد بيقول صباح الخير حتى
ربنا يحفظك ويعزك يارب
نبتدى


السؤال الاول
:
رتب الاتى حسب اهميتها بالنسبه لك
الصداقه _ الحب _ العائله_ المستقبل _ المال

الإجابة من شاب فقرى :
العائلة __ المستقبل __الصداقة __ الحب __ المال

السؤال التانى
:
اجب عما يلى
:
1_ عرف الحب فى جمله صغيره ( حب الحبيب و الحبيبه) ,

الحب إحساس جميل جدا وكل اللى أعرفه عنه إنه مش منطقى وغير متوقع وغير آمن البتة وعشان يعيش محتاج إنسان بجد


وهل يمكن ان نعيش بدون حب (الحبيبه او الحبيب برده ) ؟؟؟

الحياة مبتقفش على حد
يعنى من وجهة نظرى وتجربتى شايف إنى كل أما بشوف حد وأسيبه وأمشى بودعه وداع الموت عشان مش ضامن هشوفه تانى ولا لاء
وشايف إن الحب بيمنح القوة للحياة حتى لو مشى وسابنا

2_ ما الرساله التى تريد ان تبعثها لحبيبك او حبيبتك ( زوج /ة المستقبل ) إن وجد أو لسه ماوجدش ؟

فى رساله مهمة بجد

(( ياريت متبقيش زى كل البنات عشان مولعش فيكى ))


3- ياترى إيه أكتر حاجة بتكرهها فى الحياة ؟؟؟
حكم النفس عالنفس
الظلم
القهر
قدرة بعض البنات إنهم يطيروا كل لحظة حلوة ويحولوها لكابوس
الإنتقادات الدائمة
التعنت والتسلط

4- لو هتتمنى أمنية قبل ما تموت هتبقى إيه (( ملهاش علاقة بالدين )) ؟؟؟
أتمنى إنى أدفن لوحدى زى ما حبيت العيشة لوحدى

5- مين أكتر حد محتاج تشوفه وترتاح فى حضنه أو تبص فى عنيه ؟؟
البنت اللى هتجوزها فى يوم من الأيام
أو
بنتى الصغيرة لما إتجوز ويبقى عندى عيال

6- مين أكتر حد نفسك تخسره ؟؟؟
أكتر حد بيحبنى
عشان مينجرحش لما يشوف إنى إنسان هوائى ومتقلب ويكرهنى
وساعتها هندم على اللى بعمله واكره نفسى
فنجيب من الآخر

7- من وجهة نظرك ... إيه هى الحياة ؟؟؟
بحر كبير وفى اللى بيعرف يعوم وفى اللى بيغرق وفى اللى لابس مايوه وفى اللى بيكافح عشان المايوه ميتسرقش
وفى اللى راكب سفينه وماشى فى البحر تايه مش لاقى بر ولا مرسى

8- ياترى هتقع فى الحب تانى لو حبيبك/حبيبتك سابك أو لو كان سابك بالفعل ؟؟؟؟

أنا حبيت مرة ومن ساعتها مش حاسس إنى إنسان بيعرف يحب
لأنى خسرت حاجات كتير أوى وعمرى ما لقيت حد يعاملنى نفس المعاملة ولا يفهمنى بنفس الدرجة أو يقدرنى أوى كدا

9- ياترى تقول إيه للعالم كله ؟؟
....
أحتفظ لنفسى بإنى مش هرد عالسؤال دا

10- ياترى لو هتخسر كل اللى حواليك فى سبيل حلمك ؟؟؟ هتكمل وتحاول تحققه حتى لو كان مستحيل ؟؟؟
طبعا

11- ياترى إيه أكتر إحساس عشته الايام اللى فاتت ؟؟؟
عرفت بالظبط الانسان اللى بينتحر بيحس بإيه
لما قعدت مع نفسى شوية شفت الموضوع كويس وحسيت بنفس الإحساس كويس أوى
===============

إنتهى التاج
وشكرا للإهداء الرهيب دا :)
والتاج بهديه للناس الطيبة دى :
1- شيما والشعب اللى قفلت مدونتها
2- دموع القمر اللى برده قفلت مدونتها
3- زى الهوا
4- اختى
5- بيطرية
6- سكوكرة
7- مى رحيق الورد
6- أى حد ليه نفس يجاوب ورايق ومخنوق وعايز يتكلم زى حالاتى كدا

خالص التحية ولنا عودة
شاب فقرى

هناك 7 تعليقات:

هوبتي يقول...

والله يا جدع انا حسيتك قوي في التاج دا او عرفتك قوي وكان نفسي يتوجه ليا نفس التاج دا بس الحمد لله والحمد لله انك كويس وبخيررررررر

شاب فقرى يقول...

التاج مهدى ليكى طبعا :)

أول مرة تنورى المدونة

انا سعيد جدا بدا

والحمد لله ويارب تكونى عرفتينى بجد
لانى مفيش حد شفته عملها قبل كدا

نورتى جدا
شاب فقرى

زى الهوا يقول...

انا بجد فطست م الضحك عليك

اولا بخصوص التعليقات , فالمدونه بيبقى ليها طعم تانى وهيه صامته كده :)

وبعدين اشمعنى تبقى انتى لوحدك يعنى , مانا عايزة ابقى لوحدى ف مدونتى اجرى وألعب فيها :)


تعرف انى حاسه بنفس الحاله بتاعتك او مقاربه ليها , باحاول اعيد ترتيب حياتى من الاول , وباحدد حاجات مستقبليه كتير اليومين دول وزيك تمام باحاول احقق حلم ف حياتى كنت ركناه ومش عايزه اقرب منه , وانا اصلا شخصيه بتكره جدا اتخاذ اى قرارات , دا غير انى برده هاتجنن واعزم نفسى من غير اى بشر
هتقول فيها ؟ انا من كام يوم جهزت شنطتى وسلطاتى وبابا غنوجاتى , وقولت لماما انا محتاجة اروح بكره بحر لوحدى
طبعا لقيت الست بدون سبب بتصرخ فيا , وراحت قيلالى غورى من وشى ياسماح

روحت غورت , اومال هافضل واقفه :)

اجاباتك عسوله , وحلوه الاضافات اللى مزودها دى

:)

وبعدين انا بعتهولك علشان تبعتلى الاكبر منـــــــــــــــــــــه؟


ماشى ياسيدى هاحله من عنيا

يارب تعرف تحقق حلمك , والبوست الجاى تبقى تحكيلنا عنه :)

شاب فقرى يقول...

زى الهوا
منورة
:)

والله انا كان قدامى كمان شهر على ما انطق واتكلم واكتب فى المدونة
بجد شكرا ليكى

هوا انا بطبيعتى كدا فقرى :))
نفسى اشوف نفسى بعيون الناس عشان اضحك كتير زيهم كدا واحب نفسى
بس الموضوع صعب اوى
:)
أحلامى كتير ولا تعد ولا تحصى :)
انا والله ينفع ابقى مذيع من الاسئلة اللى بحطها
بس لو حرف الراء دا يتظبط ويبطل يطلع ياء على غين هبقى تمام :D

انا هروح البحر قريب
كلها اسبوعين :P
بس الشغل مش هيرحمنى
اكيد يعنى :)

نورتى ومستنى الرد
شاب فقرى :)

وحبي لك لن يموت يقول...

دمتَ بينَ الحاءِ والباء ×
:)

شاب فقرى يقول...

وحبى لك لن يموت
دمتى بين ال ع وال ش وال ق :)
وال و وال د :D
نورتى يا إيما
شاب فقرى

promise is promise يقول...

اولا حمدلله على السلامه
انا كنت مش بدخل الفتره اللى فاتت بس اول ما رجعت عديت عليك وشوفت الكام بوست اللى كانوا فاتونى

اما بالنسبه للاجاباتك على التاج فهى حلوه قوى وتحس ان فيها دماغ عاليه مش اى حد

بس هو ايه اللى بيعملوه كل البنات ؟

عجبنى اصرارك على تحقيق حلمك حتى لو هتخسر اللى وراك واللى قدامك

بس ما حبتيش انك تكون عايش لوحدك
اما فى حكايه الموت فاللى بيموت بيموت لوحده وبرضه بندفن لوحده مش فارقه كتير

ربنا يجعل كل امانيك خير محققه

وسلام عليكم