الأحد، 23 مايو 2010

برسم غصبن عنك

(( مفيش صورة ))

إزيكم
يارب تكونوا بخير
حاجة غريبة جدا إنى بحس دايما إن الناس بتعشق إنها ترسم حدود لنفسها
ترسم لنفسها حبل يربطها
وترسم لنفسها قيود تمنعها
وترسم لنفسها ألف حاجة تمنعها من عمل أى شىء
فى بعض الناس بيعشق القيود الدينية
وفى البعض الاخر بيعشق قيود المجتمع والاعراف والتقاليد
وفى البعض الآخر بيعشق قيود بقى بيحطها لنفسه وخلاص
طبعا لما بتكلم عن القيود الدينيه بتكلم عن قيود وقواعد إحنا بنحطها ملهاش علاقة بالدين وممكن يكون الدين بيسمح بيها وإحنا برده بنحاول نبقى متشددين ونزنق على نفسنا على قد ما نقدر عشان نقول بقى إننا خلاص مسلمين أو مسيحيين آخر حاجة
مع إن الدين مش بيدعو للتشدد
ولما بتكلم عن الأعراف والتقاليد بتكلم عن الغلط منها
وهكذا نيتى إتفهمت أظن
نكمل كلامى بقى
الغريب إن البعض بيرسم لنفسه حدود ملهاش معنى
يعنى مثلا يقول إنه مستحيل يقبل المخاطرة أو المغامرة وإنه هدفه فى الحياة إنه يمشى جمب الحيط وإنه هيعيش ويموت معفن وفقير وملوش فى الحياة لا جاه ولا مال ولا حتى كفن وناوى ياخد الكفن شحاته
وقيود كتير تانية
بس الناس مش عارف ليه بتعشق الصنف اللى ذكرته دا
العشق لإحساس إنك مظلوم
طبعا اللى أعرفه ومتأكد منه إن فى مصر ناس كتير جدا كانوا زبالة وكانوا حثالة المجتمع لكن مع التعب بقوا هما على قمة المجتمع واللى هيفكر هيلاقى أمثلة كتير بدون ذكر أسماء يا حبايبى لأن المدونة مش مرخصة ومش ناقصة مشاكل
وتلاقى اللى مؤمن بمبادىء الزهد مع انى مينفعش أسميها الزهد لأنها فى الحقيقة عشق للفقر لذات الفقر
عشق إننا نبقى الناس المستضعفين اللى بيمشوا جمب الحيط وبيصحوا الصبح يجروا عالشغل أو بيسافروا برا يقعدوا تلاتين سنة يحاربوا فيها مليون حاجة عشان لقمة العيش ويرجعوا بشوية فلوس ويبطلوا شغل وبرده يفضل حاسس غنه مجرد ترس تافه فى عجلة المجتمع الأهطل
الناس بتنسى إن العمر أقصر من إننا نقضيها بين حدود من مخاوفنا وأوهامنا وشعوذاتنا وتفاهاتنا
الناس بتنسى إن لازم فى العمر دا تعيش بنفسك لأن مينفعش تمشى بدماغ حد تانى لأنه مش هيتحاسب عنك
مش عارف ليه الناس بتعشق الحدود
أنا عن نفسى بكره الحدود
لأن اللحظة اللى هتمنع تفكيرك فيها عن تجاوز نقطة محدده فإنته بتبطل تستعمل نعمة ربنا وهى العقل
فى اللحظة اللى بتمنع نفسك عن الشغل والعمل تحت شعار إننا كلنا شحاتين ومجبرين ومضطهدين ساعتها بس بتبقى من المستضعفين فى الأرض
وهكذا
طبعا فى قيود كتير غير اللى قلتها دى
يعنى مثلا فى لاحظت إنى كل ما بتعرف على بنت وبكلمها
ألاقيها دايما بتقولى (( ولا يهمك يا كيمو أنا زى أختك ))
أنا مش معترض على علاقة الأخوة اللى ممكن تربطنى بأى شخص فى الدنيا سواء ولد أو بنت
ودى مش عقدة نفسية ولا شوية جنان ولسعان من دماغى ورغبة فى الإستحواذ على حاجة مش بتاعتى
دا مجرد كره للقيود
أنا مبحبش حد يرسم لى حدود
أنا برسم للآخرين حدود
برسم للغير حدود فى التعامل
برسم للغير كل أنواع الحدود
لكن مينفعش حد يحددنى جوا إطار معين
ولا ينفع حد يخلينى فى خانة معينه لأنى بإختصار بقرف من دا
بحس إن اللى قدامى بيحرجنى بالذوق لأنى لو مش حاسس إنى حر ساعتها بس بقوله بناقص معرفتك
إيه يجبرنى على الحياة أو التعامل مع فرد لا يحترم حريتى ولا يحترم جنونى وطيشى
لو الحدود اللى برسمها للآخر مش جايه على هواه يقدر ينطق ويقولى (( فكك منى ))
لكن ..
أنا حر
ينفع طبعا البعض يقول على دا هطل وإنته لو مش عاجبك الناس , بتكلم الناس ليه
أنا حر
وهفضل حر
هفضل أكتب و أرسم وأشخبط وأخاطر وأغامر متقبلا كل إحتمالات الخسارة ومتقبل كل الخسائر فى حالة حدوثها
لأننى قط لم أعتد على ان أكون مجرد ( ذيل أو ترس ) لكيان عملاق
لقد خلقت لأكون إنسان
أنا
نفسى
ذاتى
شاب فقرى
كان نفسى أتناقش فى موضوع
بس معلش هفكر وإن شاء الله مرة تانية

هناك 18 تعليقًا:

احاسيس آيوشه يقول...

اممممممم عارف انا عكسك تماما انا واحدة بتعشق رسم الحدود ليا ولغيرى ههههه
ودا طبع فيا للاسف ومش بيقدر اغيره
بس الناس اتعودت عليا كدا وتقبلت شخصيتى بالشكل دا
وانت اكيد لازم الناس تتقبلك زى ماانت لو انت مش بتحب ان حد يرسملك حدودك وبالتالى يرسملك حياتك يبقى خليك زى ماانت
مهو استحالة ترضى كل الناس واستحالة الناس كلها بردو ترضى عنك God bless them

شاب فقرى يقول...

أيوشة
جبتى المفيد :D
بس الواحد مينفعش يفضل طول الوقت حابس نفسه جوا أسوار التشدد والتعصب فى الدين وشوية تانيين جوا أسوار العادات والتقاليد
وشوية كمان جوا أسوار الاحساس بالفقر والظلم واننا غلابة وهنفضل كدا
بس وصلتى للمقصود :)
نورتى جدا :)
شاب فقرى

سمو الأميرة سارة يقول...

بالنسبة للي بيقول انا بمشي جنب الحيط وبعيش في حالي دي ما بتبقاش عيشة بجد والله

انا على فكرة زي ايوشة بحب ارسم حدود لعلاقتي بالناس بدل ما يفوق الوقت ونضطر نخسر بعض لأن العلاقة " فرطت " مننا

وع فكرة انا فيا خصلة انا زي اختك دي :D

بصراحة يا كريم البنات بتقلق من ان الولد يرسم طموحات رومانتيكية وحاجات من دي فبتعرفه مكانه عندها م الأول بس

انت مش ضارب ولا حاجة على فكرة :)

شاب فقرى يقول...

يا سارة
إسمحى لى أندهلك بدون سمو الأميرة والكلام دا

بصى
أنا برسم حدود للغير
لكن حريتى بتخلينى أكره أى حدود
ما أنا من الأساس مثلا شاب قافل الباب ولا بصاحب ولا بحب وبتعرف ولا اى حاجة
يقوم يوم ما ارد على حد ألاقى اللى قدامى بتقولى أنا زى أختك
حاجة تفرس وتغيظ وتظهر إنها فاهمة علاقتى بيها غلط او مش فاهمة انا عارفها ليه
الموضوع دا إتكرر بشكل سخيف دايقنى
على فكرة مفهمتيش الغرض من البوست
لأن مش دا اللى بتكلم فيه :P
نورتى
شاب فقرى

Psycho Hanem يقول...

بص يافقري باشا

كلامك صح جدا جدا .. وجامد أخر حاجة بالنسبة لنص الموضوع اللي اتكلمت فيه
وهو إن الناس تحط قيود وحدود لنفسها في حياتها ولطموحاتها وبعد ماترسمها بإيديها تقنع نفسها إنها كده أصلا من الأول ومتقدرش هي ياعيني تغير فيها .. وبعد ماتصدق .. خلاص تبدأ تأقلم نفسها تعيش جواها لأنها "حبيسة" ليها .. ومظلومة ومقهورة والحوار ده كله

ده ... أنا مش بقرف منه وبسس ... ده حاجات كتييير مينفعش أقولها بس كده علنا يعني...

أنا بحب المخاطرة .. المغامرة .. التغيير ... بحب أكون النهاردة فوق وبعده تحت وبعده في الوسط وبعده في السما وبعده أرجع تاني للأرض .. مش مهم .. المهم أني أعمل إللي عاوزاه .. دي حياتنا واحدة بسسسس ... بس لو عملنا فيها كل إللي عاوزينه ونتمناه طالما مبنغضبش ربنا .. يبقى خلاااااااص .. حياة واحدة كفاية أوي ...

وتبع النص اللي متفقة معاك عليه ده هو التشدد الديني طبعاااا ... لأن فيه ناس بتتشدد في الدين لدرجة إني من أول كلمتين منهم مش ببقى عاوزة أكمل كلام خالص ... وبحس غصبن عني إني مبقتش سامعة بقية الكلام اللي بيتقال ...
بحب أشغل عقلي .. أفهم ربنا عاوز مننا إيه وأعمله .. بحب أعيش حياتي ..


أما بقى النص التاني ...
هو حكاية الحدود في المعاملة ده ...
أصل الموضوع ده نسبي جدااااا فوق ماتتصور

الناس المتشددة زي ماقلتلك من شوية عليهم دول .. ممكن يقولولك إنت كافر ..ممكن يبصولك بصة تفهم منها إنك حقيير ...

وفيه ناس فعلا مالهاش حدود في المعاملة .. وهاي شلة بقى وإزيك ياواد .. والحوارات الخايبانة دي ...

دول بنات أنا مش بخوض معاهم في أي حوار كان .. لأن الاستايل ده .. مش بقرف منه .. لأ حاجات تانية برضه مينفعش أقولها ....

أنا بعشق الوسطية في الحوارات دي ... من غير إخوات بقى ولا غيره... طبيعي إننا إخوات من غير مانقولها ...

بس ياسيدي .. كفاية كده عشان عندي صيدلية دلوقت هتأخر عليها ...

ومستنية تعليقاتك على مدونتي
سايكو كافيه .. يافقري باشا :) :)

سلااااااام

شاب فقرى يقول...

Psycho Hanem

:)

فهمتى المقصود
وهوا ان مينفعش نرسم لنفسنا حدود ونندب حظنا بسببها

نورتى ورايك اسعدنى
انا شكلى هرجع اكتب تانى لما الاقى فى ناس بتفهم المقصود وبتتناقش

نورتى يا دكتورة :)


اخوكى فقرى :P

Sharm يقول...

انت هو غيرك !
--------------
أنا مبحبش حد يرسم لى حدود
أنا برسم للآخرين حدود
برسم للغير حدود فى التعامل
برسم للغير كل أنواع الحدود
لكن مينفعش حد يحددنى جوا إطار معين
--------------

غيرك كمان مش بيحب انك ترسمله حدود لكن بيحب انه يرسملك انت حدود و معنى انه قدر يقنعك انه رسملك حد معين و انت مقدرتش ترسمله حد .. يبقى شخصيته اقوى من شخصيتك .. و هي دي موازنة القوى .. البقاء للاقوى

شاب فقرى يقول...

عزيزى sharm
أولا البقاش مش دايما للأقوى
وإلا كان الديناصور لسه وسطينا :)
لأن القوى فيه الاقوى منه :)
نيجى بقى لفكرة اللخبطة انه رسملى وانا مقدرتش ارسمله
انا مش قصدى على كدا
انا قصدى عاللى بيرسم لنفسه حدود
ويحبس نفسه جواها
ويعذب نفسه بيها
فهمتنى طبعا كدا :)
نورت يا جميل
شاب فقرى

فراشة يقول...

ازيك يا كيمو

ايوه فعلا الناس بتحب تعمل لنفسها قيود وحدود لحياتها وعلاقاتها ممكن يكون دا كويس بس القيود والحدود الهبلة واللي ملهاش معنى بتبقى اعذار واهيه بيسقط عليها قله حيلته وضعفه

ولو حتى واحد متحرر من القيود بيلاقي قيود تانيه حددت ليه برواز ميخرجش عنه

الدنيا هنعيشها مره واحده المفروض نعيشها صح ..المشكله محدش بقى عارف ايه هو معيار الصح او الغلط

انا صحيح ليا حدود مبحبش اتخطاها لكن مش مجبره على دا ومش بندب حظي عليها او عاملاها شماعه

وزي ما انت قلت لو الحدود اللي انت رسمتها لحد مجاتش على هواه (وغالبا لانها بتبقى اكبر من حدوده ومش بيحب يغامر او يجرب) يقولك , زي ما لو حدوده مجاتش على هواك انت هتبعد

riri يقول...

عارف يافقرى انت عندك حق
يعنى انا مثلا بحط نفسى جوه حاجات انا حاطها لنفسى وبقول هيا دى المبادىء بتاعتى حتى لو هيا بش موجوده عند كل الناس بس انا برسمها لنفسى وبفضل حاطه نفسى جواها
ومع اول حاجه تحصل بالاقى نفسى مخنوقه فى الاطار اللى انا رسمتوا لنفسى لانى ساعتها هاعاتب نفسى على مبادىء حطتها وبش قادره امشى عليها
بس برضو لازم فى حدود انت اللى بترسمها لنفسك بش اللى حواليك عشان دى دماغك انت
يارب اكون فهمت الموضوع بس حتى لو مفهمتش الغرض من الموضوع زى مانت قصدوا انا فهمت حاجه عجبتنى حسب فهمى انا

فتاه من الصعيد يقول...

انا أعيش داخل حدود ممنوع الاقتراب :)

في حدود لازم نحطها في التعامل... وده موش عيب على فكره بس المهم ما نتعبش حد معانا

بس انا مافهمتش حكايه زي اختك دي... يعني هي كده شالت ولا حطت حدود ؟؟

تحياتي

غير معرف يقول...

نظريتك دية نسبية فى الحياة ممكن اللى شايفة قيود غيرك مبيشوفهوش قيود لة ممكن يشوفة راحة وحرية لية يعنى مثلا واحد لية قيمتة ومعاة شهادة وراح اشتغل فى مكان الناس مش بيقدورة فيها وبيشتغل باجتهاد عن اى تانى ومع ذللك مش لاقى تقدير ومعاملة حسنة لية من صاحب العمل فلو ساب الشغل علشان يلاقى حريتة وراحتة الجسمانية والنفسية فدة حرية وارتياح وكرامة لية لانة مش عبد لكن انسان ربنا كرمة وادالة مواهب وعقل بيفكر بيةودة مش معناةذهد لكن بيشوف عمل يتقدر فية

ساعات القيود هيا اللى بتتفرض علينا مش احنا اللى بنفرضها هى اللى بتحبسنا جوة نفسنا ذى واحد رايح يحضر حفلة كبيرة الكل لازم يكون لابس فيها بدل ومعندهوش بدلة يروح بيها ومعندهوش حد يسلفة بدلة او يجيبلة بدلة يروح يسرق ويبقا حرامى ولايروح الحفلة بلبس عادى ويقول محدش يفرض عليا قيود ولا يرسملى حدود ويلاقى الناس بتضحك علية ولا احسنلة يقعد فى بيتة فى اليوم دة بحريتة وكرامتة وبعد كدة لما يعرف يجيب بدلة يبقا يروح حفلة تانية؟

كل واحد على اد امكانياتة فى رسم حدودة وازاى يقدر يتعامل مع القيود الاجتماعية والدينية وعلاقاتة مع الاخرين


مش عارفة ان عايزة اكمل بكلام كتير بس حاسة ان كل حاجة هتسيح على بعضيها بس دية وجهة نظرى البسيطة

خواطر شابة يقول...

"أنا مبحبش حد يرسم لى حدود
أنا برسم للآخرين حدود
برسم للغير حدود فى التعامل
برسم للغير كل أنواع الحدود
لكن مينفعش حد يحددنى جوا إطار معين"
انا هنا أرى نوعا من التناقض انت تكره ان يرسم لك الاخرون حدودا لكنك تعطي لنفسك الحق ان تفعل هذا معهم
تصادر من الاخرين حقا منحته انت لنفسك.

غير معرف يقول...

برسم غصبن عنك؟؟؟؟؟؟؟؟؟عن مين عن اى حد بيحاول يحط لك حدود وانتة بتسح لحد من الاول يحط لك حدود لية وبعدين انتة بتتكلم عن الحرية العنوان دة ؟ يعن اية ولمين ؟؟؟؟الحرية مفيش حرية مطلقة دايما مقيدة بالمجتمع بالدين يعنى مكن تكون لك دقلوتى بعض الحرية لكن بعد كدة لالالالالاالحرية بالنسبة ليا ان الزمن يرجع تانى ومتجوزش علشان المسئولية اللى عندى اكبر من انى اتخلى عنها ودقلوتى لك الحرية كلها.....

Just waiting يقول...

اصعب من ان الانسان يتحط في سجن انه يحبس نفسه في سجن من نتاج عقله
ويخلق لنفسه قيود من التشدد الاعمى بلا اي اساس سواء دينيه او مجتمعيه فعلا دول المستضعفين في الارض وبعدين الانسان حر بس حريته دي كمان حدودها حرية الاخرين
ومن حرية الاخرين انهم يحطولي حدود للتعامل معاهم لأن انا كمان بحط خطوط حمرا كتير مش بسمح بتجاوزها
وطول ما الانسان مش بيغضب ربنا او بيأذي اي حد وأولهم نفسه يعمل مابداله ومش يهمه اي حاجه تانية

wella يقول...

مساء الخييييييييييير
اخبارك اية فى الاسبوع اللى قبل الامتحنات
برسم غصبن عنك ماترسم ياعم حد حايشك هههههههههه

فى حاجة
انتة بتقول بتحب ترسم حدود ليك وتشخبط وتعمل عالم لنفسك ومش بتحب حد يفرض عليك حدود اوك ماشى
بس الناس برضة بتعمل حدود لنفسها وبتفرضها على بعض
يعنى ازاى انتة عاوز تعمل حدود لتفسك وتفرضها على الناس ومش عاوز الناس تفرض عليك حودودها !!!!

اما فى حكاية الحدود اللى بيفرضها المجتمع والعيب والغلط والكلام اللى بخنق دة والتشدد اللى فى الدين اللى ملوش لزمة ايوة دة اللى بيخنق وبيدايق الواحد وبيحسوسوا انو قاعد جوة سجن
فى ناس بتحارب وترمى الحدود دى ورا وتبقى دى العيشة الصح
اما اللى يمشى جنب الحيط تبقى دى عيشة خنيقة اوى اوى وليها اكتر من سبب ان شخصيتهم ضعيفة
او خايف من المشاكل ووجع الدماغ وخايف لقمة عيشة ويلا عشان نعيش وخلاص

ماشى ياكيمو انا زى بنت خالتك برضة ههههههههههه
اية رايك فى بنت خالتك دى هههههههه

سلام بالتوفيق فى الامتحنات

وحبي لك لن يموت يقول...

انا احلق ما دمت
لا اتخلى عن مبادئي وقيمي
وما دمت شايفة ان اللي بعمله صح
انا مش بعمل غير اللي مقتنعة بيه
مبسمحش لحد يحددني
لاني عارفه حدودي لحد فين
مش بحب اقفل على نفسي
ومش بخاف من المخاطرة
لاني لو مش خاطرت عمري ما هتعلم
ولا هعرف ازاي اعتمد على نفسي
كنت بخاف من المحاولة زمان
بس ناو نو :$
كنت بحب اعيش (او اتعودت أعيش)
في دور المضطهدة المظلومة
بس ناو نو برده (:

انا عايشة على مبدأ
ان مفيش حد ليه عندي حاجة
واني قادرة على تغيير واقعي للافضل
:)

زى الهوا يقول...

انا على فكره متابعه كتباتك جدا

بس ما باعلقش

جايز لضيق الوقت

وجايز رخامه

(وش مطلع لسانه )

البوست دا عاجبنى

انطلق وماتخليش القيود تضيق عليك

علشان ياما القيود خنقت ناس لغاية ما موتتهم

:)

انا اصلا علقت ليه , انا مش باقول رخامه ؟

اه صح جايه علشان اقولك ليك تاج اجبارى عندى

روح خده زى الشاطر

:)