الاثنين، 26 أبريل 2010

العيب ( لامؤاخذة)



كل شىء فى الدنيا دى مهما كانت كفاءة صنعه ومهما كان تاريخ إكتشافنا ليه أو صنعنا ليه
بيحتوى على عيب ( لا مؤاخذه يعنى ) متأصل جواه لا يتغير مهما تطور الشىء دا
مهما كان الشىء دا
أحيانا بنحاول دايما نلاقى حل للعيب دا
والعيب بالتالى بيكون ذكى جدا وبيتطور مع الحل
نفهم ببساطة
يعنى مثلا بالنسبة للمشاعر الإنسانية
على قدر ما هى شىء جميل وبيخلى الإنسان يعمل المستحيل
إلا إنها بتحمل أحيانا الكثير من العيوب
يعنى مثلا نأخد الأمل كمثال
لو حاولنا نعرف الأمل هنلاقى كل الناس بتقول الأمل هوا الأمل فى بكره
مطلعناش بحاجة برده
الأمل ببساطة هوا إحساس إنسانى ورغبة وتطلع نحو شىء قد لا يحمل الكثير من النجاح لكن الإنسان مقتنع تماما إن الشىء دا ناجح بنسبة مليون فى المية بل الأكثر من ذلك محاولته المستميته لتحقيق الهدف من الشىء دا
مش شايفين بعض الخلل والعيوب فى الأمل
فى عيب واحد بس أنا ملاحظه بشده هوا التهور
إن الأمل بيدفعك للتهور وإنك تمشى فى سكة غير مضمونة ممكن تطلع منها بخساير كتير جدا جدا
والمخاطرة اللامعقوله اللى بيحاول الأمل يزينها فى نظرك
بلاش المشاعر الإنسانية
إنتقل لأى شىء تانى
هتلاقى فيه عيب رهيب متأصل لا يتغير
إذا وصلت للعيب دا اللى هوا بإختصار السبب للخلل أو الثغرة أو المشكلة اللى بتخليك دايما مش واثق فى الشىء إنه يقوم بالوظيفة المطلوبة منه
كل شىء فى الحياة فى عيب وكل إنسان نفسه تحمل جزء من العيوب الرهيبة التى لا تتعالج أبدا
يمكن نقدر تعالجها بس دايما هيتبقى نقطة صغيرة جدا مش هنقدر نعالجها
يعنى مثلا البشر
كل إنسان فيه عيب شكل ونقطة ضعف شكل
فى واحد العيب بتاعه البخل أو الضعف أو إنعدام الثقة فى الآخرين
فى واحد ملزق وواحد بيحب الهزار الكتير وواحد ملزق ورخم
فى طويل أوى وقصير خالص وبكرش ونحيل
فى طيب والطيبة مخلياه عبيط وفى أهبل وفى المجنون اللى بيعمل كل حاجة تيجى على باله وقت ما يحب
المشكلة فينا كبشر مش العيب والخلل اللى فينا
لأن أحيانا بيكون العيب دا مع خلقة الإنسان وملوش ذنب فيه أو بيكون مكتسب من خلال الوظيفة أو التربية اللى بتستمر سنين
أو من الوظيفة أو من المجتمع وزى ما لاحظنا العيب دا أقسام وأنواع وأشكال مختلفة جدا وكتير جدا على قدر الحاجات اللى فى الدنيا كلها
لكن المشكلة هنا
إننا مش بنقدر نتقبل عيوب الآخرين
دايما بنفكر فى إتجاه واحد بس
إزاى نقدر نعالج عيوب الطرف الآخر
مثلا واحد جاى يخطب بنت وهى ليها علاقات كتير تلاقيه بيقولها :
1- إقفلى الفيس بوك
2- متكلميش حد فى الكلية
3- إلبسى لبس طويل
4- إمسحى الولاد من عالميل والمسنجر
5- لو قابلتى صاحبتك مع حبيبها أو خطيبها مش تسلمى عليه
6- إقفلى المدونة
وهكذا دواليك
والبنت أحيانا بتقابل دا بطاعة على حسب عمق العلاقة اللى بينها وبينه وعلى حسب حبها ليه وحبها للعالم الخاص بيها
لكن
هل فكر الشاب دا فى إنه يصلح عيوبه هوا
إنه يخليها مش شايفه قدامها لأنها بتحبه بجنون
لدرجة إنها تنسى الفيس بوك وتكسر شريحة الموبايل وتبطل تعرف أى حد
وتبطل تعمل أى حاجة هوا مش موجود فيها ومن غير ما يطلب منها ؟
هل فكر فى أنه يعمل اللى هوا بيأمرها بيه ؟؟؟
هل فكر فى إنها ممكن تبيع عمرها عشانه لو حبته بجد ؟؟
ودا مش فى العلاقات الخطوبة والصداقة وبس
بل فى كل علاقة تانية حتى الجواز
*متلبسيش كذا
* مش بطيق صاحبتك ولا بنت خالتك وجوزها مش عايزهم يزورونا تانى
* أنا بحب الست الرفيعه حافظى على رشاقتك
* العيال بتجيب مجموع قليل مش بتذاكرى لهم ليه ؟
وكمان فى علاقة الأب بإينه والأم ببنتها وكل العلاقات فى الدنيا
دايما بنفكر فى إتجاه واحد محاولين إصلاح الآخر
بنحاول نطالب بحقوقنا الأول قبل ما نفكر عملنا اللى علينا ولا لاء
هل كبتنا الضعف والعيب المتأصل جوانا ولا لاء ؟؟؟
هل حاولنا نتغير بجد ؟
السؤال هنا قد يكون
أنا هتغير ليه ؟
إيه العيب اللى جوايا ؟
إيه مشكلتى فى الحياة اللى مجننه كل اللى يعرفنى ومخليه الكل مش قادر يقرب منى ؟
إيييييييييييييييييييييييه ؟
هل هقدر أفكر فى إتجاهين ؟؟؟
وأحقق النجاح فى حياتى وألغى العيب اللى جوايا دا ؟؟؟
أو على الأقل أقلله أو أقلل تعب الطرف التانى منه ؟؟؟
؟؟؟
هل قدرت تعرف إيه العيب اللى جواك ؟؟؟
عن نفسى من قبل ما أكتب السطور دى بسنين عرفته وبحاول أعالجه حتى لحظة كتابتى للسطور دى
وإنته وإنتى هتعرفوا إمتى ؟
وهل هتقدر تتقبل عيوب غيرك وتتعايش معاها بشكل ميجرحوش ؟؟

؟؟؟؟؟؟؟؟؟؟؟

خالص التحية
شاب فقرى

هناك 25 تعليقًا:

صيدلانيه طالعه نازله يقول...

انت عارف انا قابلت بنات كتير من المدونات و كان السبب الحقيقى لتأخر جوازهم هو تمسكهم ببعضض حقوقهم و رفضهم طلبات العرسان زى موضوع الفيس بوك و الميل و قفل المدونه
طب قبل ما يقولها كده ليه مجربش يدخل معاها عالمها و يشوفه الاول ليه
مش ممكن يعجبه فعلا و يدخله باقتناع
ليه تبدأ بالتحكمات الخنيقه لمجرد اثبات رجولتك

البنت لو حبت بجد و الولد لو حب بجد حيقدروا يتجاوزوا عن عيوب بعض بل بالعكس حيقدروا مع بعض يقلبوا العيوب دى مميزات

الموضوع كله يعتمد على الحب و الاقتناع بالطرف الاخر

ستيتة يقول...

بس انا الحقيقة ليا فكر مختلف خالص يا كريم

انا مؤكد مش ها اعرف اغير نفسي
فقررت انها عجباني كده وأخر ألاجه
وبالمقابل احترم حرية اللي بحبهم كلهم وبقبلهم زي ما هم كده
وخاصة لو كانت عيوب مش قاتلة ليهم هم شخصيا علشان بخاف عليهم

يعني مش بحب حد يفتش في حاجتي ولا يتلصص عليا
بالمقابل عيني وايدي ملهاش علاقة بحاجة الناس
مش بحب اكل شيء غصب عني
عمري ما غصبت ولادي
مزجانجية في المذاكرة
بسيب برضه للعيال فرصه علشان هم زيي للأسف
ليلية النشاط
يبقى اللي منهم شبهي ما اطلعش عينه واخليه يعمل شغله الصبح

انا حد يقول لي شيلي اللي على الفيس بوك
أشك
بس انت فكرتني
انا معنديش فيس بوك :)


المشكلة مش في تقبل عيوب الأخرين
ولا في ان كل واحد ينشغل بعيوبه
المشكلة ان كل واحد راضي بنفسه ومش بيبص لها وتاعب اللي معاه وعايش في الدور

الحياة اسهل من كده بس يا مين ياخدها ببساطة على قد حجمها الحقيقي

تحياتي

SHAPE YOUR LIFE (ABOALI) يقول...

كل انسان فينا به عيوب سواء قلت او كثرت وهذه العيوب من سنه الحياه واختلاف البشر وطبائعهم وقد تكون سبب فى انجذابهم لبعض واحساسهم بالتكامل ...ولكن هناك عيوب مزعجه للاخرين ودائما ما تكون مكتسبه وطالما انها مكتسبه اذن يمكن التخلص منها ومحاوله معالجتها وكل فرد فينا يعرف عيوبه او على الاقل بعضها والبعض الاخر قد يغيب عن نظره ولكنه لا يغيب عن من حوله من الناس الذين يتعاملون معه ..ف على كل فرد فينا ان يحاول ان يستخلص ويعرف عيوبه ليس من نفسه فقط بل ينظر لمن حوله ويسالهم عن الاشياء التى تضايقهم فى شخصيته ..اما عن تقبل عيوب الاخرين فهذا الشىء ايضا نسبى ..فاى انسان مهما كان مثالى لا يمكن ان يتقبل كل العيوب قد يتقبل بعضها والبعض الاخر لا تستطيع نفسه ان تتحملها وهنا ياتى دور الطرف الاخر ان يحاول ان يغير من هذه العيوب المزعجه وهذا الامر بالتاكيد سيريحه هو قبل اى شخص اخر ...والحب يستلزم التضحيه والعطاء ..ومعالجه العيوب لا تعنى اطلاقا تنازل او تقليل شخصيته وخضوعه لشخصيه من يحب بالعكس ارى ان هذا من اكبر الاشياء التى تساعد على استمرار هذا الحب واستمرار جميع العلاقات الانسانيه فى صفاء واندماج .

بوست مميز لك جزيل الشكر على كتابته .

تحياتى لك

غير معرف يقول...

على فكره التدوينه دي هايله ..

فعلا فكره تقبل عيب الاخر وعلى اي اساس بنقبله

في مشكله اكبر وهي تقبل العيب ده لفتره ... ثم التذمر منه لفتره تانيه وده بيحصل لما نطيع اوامر من غير مانكون مقتنعين بيها لمجرد الطاعه ... وبعدين بنبتدي نحس انه تنازل ونطالب برد الجميل

ولما الطرف التاني مايردش الجميل ده نبتدي نحس اننا خسرنا كتير ونبتدي نتذمر او نتضايق او نتعب

عيوبي كتير اه ... وعيوب الاخرين كمان ... ولكل منها عيوب يستطيع ان يتحملها واخرى لا يتحملها

ولازم في اي علاقه صداقه او ارتباط لازم نوضح لبعض عيوبنا لانه موش عيب يكون عندك عيوب ...وموش عيب اننا ننفر من عيوب ومنتحملهاش من البدايه...كل واحد وطاقته

العيب اننا نكدب على بعض

تحياتي

ريمان يقول...

والله المفروض الواحد يصلح عيوب نفسه ويجتهد فى اصلاحها قبل ما يبص لعيوب غيره ويحاول يصلحها

riri يقول...

بص ياكرملله اولا نمسك حاجه حاجه
العيب مفيش انسان مفهوش عيوب عشان مفيش حد كامل ملاك بمعنى اصح بس عيب عن عيوب بتفرق
نيجى للنقطه التانيه الانسان بقى اللى عندوا العيوب بيبقى شايفها بسيطه عن عيوب اى حد فعشان كده على طول بيفكر فى عيوب غيروا انوا يغيرها عشان طول الوقتت حاسس ان عيبوا هيا بسيطه لكن بقيت العيوب اللى عند الناس بش بسيطه حتى لو هو فى نفس العيوب بيحس ان اللى قداموا دى التجربه بتاعتوا بيشتغل عليها بيغير فيها
زى مثلا الولد والبنت والامثله اللى انت قولتها
الولد رغم انوا هو بيعمل زى البنت دى عندوا فيس بوك ومدونه ولى اصحاب بنات بس هو شايف ان ده بش عيب لكن عند غيروا عيب ولازم يصلحوا عند غيروا لكن بش بيفكر يغيروا فى نفسوا هو الاول
بش عارفه فهمت الحته دى ولا لاء بس دى انا بسميها تحكمات وحب تمللك بس فى حاجات وحاجات لاء عشان نبقى مع الحق
بس قبل ماانا ارضى بيها واعملها مع انى انا بش هعملها عشان دى تحكمات منوا لاء عشان مفيش حد بيعمل حاجه غصب عنه انا هعملها عشان انا بحب الانسان ده وبحب ارضيه يبقى هو كمان يعمل زى
نرجع تانى للعيوب
المشكله ياكرملله ان كل انسان عارف ايه عيوبه بس زى ماتقول اتعود عليها بيصعب عليه يغيرها
زى كده اللى بيشرب الشاى بلبن الصبح اتعود على كده لو عدى اليوم من غير الشاى يبقى فى حاجه بش تمام
نفس الحكايه كده العيب انا شايفه ان الانسان بيبقى ماشى بعيبوا وبميزتوا ولا بيقدر يتخلى عن دى ولا دى وصعب تغير حاجه فيهم عشان نبقى واقعيين بس ممكن تقدر تتحكم فى عيوبك لكن تغيرها اهى دى بقى معتقدتش
وعلى ان حد يستحمل عيوبك بقى
فديه بترجع لكل انسان يعنى انا ااقدر استحمل عيب معين من شخص ما ممكن انت بش تستحمل العيب ده ممكن انا مقدرش استحمل العيب ده من شخص تانى
انا بشوف انك تستحمل عيب حد دى بترجع لحبك للانسان ده
زى بالضبط المثل اللى بيقولوا ضرب الحبيب زى اكل الزبيب ((مع انى بش بحب الزبيب :p ))
ممكن تقول كلام تشاؤم بس واقعى
بش تبعد بقى تانى عن مواضيعك ده واظنى راغيت بميه بوست فات ^_^

أنا - الريس يقول...

انتوا ممكن تشوفني متعصب شوية .. انا متفق في نقطه ومختلف في نقطة ,, متفق في اصلاح عيوبنا قبل اصلاح عيوب الآخر ومختلف ولنفترض ان واحد بيغير علي مراته وده حقه الطبيعي ، فيه ايه لما يطلب منها بعض الأشياء وعلي فكرة انا لسه مخطبتش ، بس احنا مسلمين وعايز اعرف ايه اللي هتستفيده واحدة متجوز او بني ادم متجوز لما يشيت مع بنات وهيا تشيت مع ولاد ، ارجو تقبل رأي المدونة اعتقد شيء مختلف شوية مدام مش بتكتب فيها خصوصيات جداً لأنه أو لانها كده بتنهك خصوصية غيرها .... المواضيع كلها ممكن تتحل بسهولة بمحاولة ايجاد ارض مشتركة بين الإثنين // محاولة فهم طبيعة الآخر وايجاد افضل السبل للتواصل معه

كيكى عوووووو يقول...

ممممممممممممممممممممممممم
موضوع كبير اوى بس مين يفهم فعلا ويقدر!!
مين الاول يصلح عيوبوا وبعد كدة يبص لغيروا واذا كان فى عيب صعب تصحيحوا مين يقدر يتعايش معاهم!!
مين فى الدنيا كدة!!!!!!

أنا - الريس يقول...

واحيانا بنحب حد ما عشان عيب ما هو اللي بيخلينا نحبه ومش بنحاول نغيره ,,,

sony2000 يقول...

كل واحد عارف مميزاتو وعيوبه
يمكن عارف مميزاتو اكتر وحاطط سبوت لايت عليها علطول
لكن العيب ده كتير اوي لاذن اللي حوليه ينبهوه ليه لو بيكرروا كتير
وانا عن نفسي اتبع قاعده:رحم الله امرأعرف قدر نفسه
والحمد لله عرفه عيوبي كيويس وبحاول اصلحها
موش علشان اللي حوليا
علشان ارضي ربي اولا واخيرا:)

فراشة يقول...

رحم الله امرىء انشغل بعيوبه عن عيوب الناس

الطبيعي إن يكون فينا عيوب وكلاكيع نفسيه كمان

أحيانا الواحد مش بيشوف عيوبه عشان محدش نقده ف الشيء دا او مش واخد باله انه عيب وشايف ان الناس كلها كدا عادي

الصعب ان الواحد يعرف عيوبه دي مرحله صعبه قوي بعد كدا يحاول يصححهاويقوّمها او يلغيها

وان الواحد يتعايش مع الآخرين بعيوبهم وانه يبقى عارف انه زي مافيه عيوب كل الناس كدا ..ياريت بس محدش بيعمل كدا الا قليلين بس

الانسان بقى طبعه أناني قوي بيفكر ف نفسه وبس يعني عيوبه مش تعباه وتاعبه بس الناس مش مهم بقى المهم نفسه

مش عارفه أقول ايه تاني..
كفاية كدا.. وحمدالله ع السلامة وياريت متغيبش كدا تاني :)

ويكا يقول...

شاب فقرى

مبدأياً انا فهمت انت عايز تقول ايه ، وان كنت تهت شويه لان انت جال فى خاطرك فكره وشوية مشاعر ، فجيت كاتبهم على طول .
فطلعين متادخلين شويه. بس علشان طلعين على طوووول من غير تنميق او تزيين ، فوصلوا على طول .

عموما الله ينور
وانت شكلك شاب فقرى فعلا

ههههه

من كل بستان زهرة يقول...

رحم الله إمرء انشغل بعيوبه عن عيوب الناس

كلنا فينا نواقص
لايوجد كامل غير الله تعالي
بس الواحد على قد ما يقدر بيحاول يصلح
بس المهم أنه يكتشف العيوب الي فيه
أما بقى الراجل الي بيتقدم لواحده وعايز يجردها من حياتها السابقه ويدخلها العالم بتاعه ده واحد معندوش ثقه في نفسه
بيتحكم لمجرد أنه يعمله مكانه في حياتها

شاب فقرى يقول...

صيدلانيه طالعة نازلة
آسف للتأخير فى الرد بس كنت على سفر فتشرت التعليق وملحقتش ارد
القصة مش حكاية حب وعرسان وجواز وطلبات بقفل الفيس بوك
الموضوع ملعبك
أنا بحاول أقول إنى بركز شوية على إن الواحد يشوف عيوبه ويقدر يصلحها ويحاول يفكر فى إتجاهين ( الواجب والحق ) مش يفكر فى الحقوق الخاصة بيه بس
وكمان عايز أقول إن كل شىء بالحب والتفاهم بيبقى تمام وبنتوصل لحل واحيانا احد الأطراف بيعمل حل ييجى على نفسه بدون مقابل وبدون ما حد يطلب منه
نورتى
خالص التحية
شاب فقرى

شاب فقرى يقول...

دكتور ستيته

الفكرة كلها يا دكتورة فى إكتشاف عيوب النفس قبل عيوب الآخرين والقدرة على التعايش معاها وفهم عيوب الاخرين واننا نعاملهم بأسلوب ميجرحهمش
يعنى انا وجهة نظرى فى نقطة العيب دى انها ثغرة ولا بد منها فى النفس البشرية
مستحيل واحد من غير عيوب
ومستحيل إنسان يوصل لمرحلة الكمال
لكن أدينا بنحاول
بنحاول نغطى عيوبنا بمعاملتنا الكويسة للاخرين وتفادى التصادم معاهم
بنحاول ننجح فى الحياة عشان نثبت لنفسنا إننا تغلبنا على العيب والمشكلة اللى مأرقة بالنا وإنها ممنعتناش من إننا نحقق هدفنا
بنحاول ننجح فى بعض العلاقات زى الحب والصداقة والجواز والامومة والابوة عشان إحنا ممكن منحتملش عيوب الطرف التانى فيا بنحاول نصلحه يا بنقتنع إنه كدا وخلاص ونعامله بشكل ميجرحوش لأن فى العلاقات دى الخسارة بتكون زى صعقة الكهربا محدش بيقدر عليها
نورتى يا دكتور وأسعدنى رد حضرتك ووجهة نظرك

شاب فقرى :)
ملحوظة : الفيس بوك وحش خالص من وجهة نظرى بس طريقة كويسة اوى للتواصل

شاب فقرى يقول...

أبو على
إنته نبهتنى لنقطة كانت تايهة عنى كالعادة وهوا إن العيوب دا بيختلف بإختلاف وجهات النظر بمعنى :
إن أنا ممكن أشوف فلان مشكلته كذا من وجهة نظرى وغيرى يشوفها بشكل تانى وفى ناس تشوفها ميزة وتقرب منه عشان خاطر الموضوع دا

هوا بالنسبة للتغيير فى العيوب دى فأنا مش مقتنع إن كل الناس قادرة على عمل دا لسبب واحد انا قلته
إن حتى لو العيب دا بيأذى الناس
ولكن العيب دا متكون بداخل الانسان من زمان جدا
من التربية مثلا
من علاقة مر بيها
من وظيفة اشتغلها سنين
فبيكون أحيانا مستحيل الوصول للتغيير
هنا بقى بييجى دور الطرف التانى ودرجة إحتماله
هيحتمل لحد فين
بس كدا :)

يسعدنى ردك ورأيك جدا
خالص التحية
شاب فقرى

شاب فقرى يقول...

فتاة من الصعيد
بيتهيألى فهمتك
يعنى مثلا نقتنع بأننا لازم نتقبل عيب الشخص لان اللى حوالينا بيقنعونا بكدا
وبعد فترة بنلاقى اننا مش قادرين لان مش احنا اللى عايزين نحتمله ولا احنا اللى عايزين نبقى معاه فبالتالى بنبطل نحتمل وبتحصل المشاكل
انا عن نفسى بشوف دا فى الجواز
لما الراجل بيكون مليان عيوب واهل البنت يقنعوا فيها إنه السوبر مان والملاك المنزل

العيب إننا نكدب على بعض
جميلة الجملة دى
شكرا لرأيك
ونورتى المدونة
شاب فقرى

شاب فقرى يقول...

ريمان
مش كل الناس بتفكر فى المفروض
فى ناس زى ما قلت بتفكر فى اتجاه واحد وهوا حقوقى وبسسسسسس
بعنى الكل مركز فى عيب التانى ومش شايف غيره
وبالتالى مش قادر يعيش
نورتى يا ريمان :)
شاب فقرى

شاب فقرى يقول...

riri
إنتى مكنتيش بتعلقى
جرالك إيه
مرة واحدة تعليق كدا مذكرة كبيرة
:))
يسعدنى ردك طبعا
هرد عليكى بعد الفاصل هواصل الرد عالتعليقات
شاب فقرى
:)

رنونة حكومة ميخو يقول...

كلامك مظبوط 100 % فعلا وخصوصا

(( هل فكر الشاب دا فى إنه يصلح عيوبه هوا
إنه يخليها مش شايفه قدامها لأنها بتحبه بجنون
لدرجة إنها تنسى الفيس بوك وتكسر شريحة الموبايل وتبطل تعرف أى حد ))

حلوة قوي الحتة ديه مثلا واحد شايف مراته متعلقة بحاجة معينه يحاول انه يحتويها اكتر لحد ما هيه تسيب كل حاجة ويبقى هوه كل حياتها

عيوب الناس خلتنا ننسى عيوبنا وبقى كل واحد عامل زى القاضي اللى عمال يحكم ع الناس ومحدش عارف يوقفه

ان الله لا يغير ما بقوم حتى يغيروا ما بأنفسهم

غير معرف يقول...

دايما بنكدب وننسى احنا ايه الف حاجه وحاجه فينا بس مين شايف كده
عيبك باينلك وساكت عليه كل واحد فينا شايف نفسه اجمل من كده

ادى الحكايه وادى احنا فيها كل واحد فينا ايده فوق عينيه
استغمايه وعشنا بيها طبعنا ولا احنا يعنى هنشتريه

عمر الحقيقه ما كانت عذاب بس نقبل مره واحده نشوف حقيقة نفسنا
دايما عيوبنا كدب وسراب مش هنبقى فى يوم ملايكه مهما هنخدع بعضنا

ادى الحكايه وادى احنا فيها كل واحد فينا ايده فوق عينيه
استغمايه وعشنا بيها طبعنا ولا احنا يعنى هنشتريه
دى كلمات اغنية بتعبر عن الحالة دى مفيش حد خالى من العيوب احنا بشر بنكدب احيانا ونصدق احيانا

أبو العريف يقول...

ازيك يا صديقي

كلامك جميل طبعا

لكن الحقيقه فيه عيوب نقدر نغيرها

وعيوب مهما حاولنا مبنقدرس

وفي مقوله بتقول الطبع يغلب التطبع

فبالتالي لازم نتقبل بعض عيوب الاخرين

واللي بنحبه بنتقبل عيوبه
وجايز كمان نبصلها علي انها مميزات

تقبل احتراماتي

غير معرف يقول...

مش عارفة لية كل لما تكتب حاجة حلوة تاكد انها مجرد كلام ولا تعبر عن راى كاتبها زى زكريات لاتنسى... كدة مفيش مشكلة انة مجرد كلام على فكرة مدونتى مفتوحة كنت فعلا قفلتها لكن فتحتها تانى اصلها بتريحنى وبعدين اختر لى اى اسم مش حتفرق معاك فى حاجة

Doba يقول...

أنت دمااااااااااااغ

ولك أن تفخر بذلك

تحياتى
هبة

Doba يقول...

انا بس حابة اضيف كلمة

بما ان النفس البشرية بشكل طبيعى دائما فيها عيب ما


ومن المفروض اننا نقدر عيوب بعض ونتعامل بشىء من الرقى محافظة على مشاعر الآخرين

احنا بقينا يا افندم ف غابة للأسف وكل واحد عنده عيب ف نفسه بيقعد يدور على العيوب ف اللى حواليه ويخليها وكأنها خنجر ف ضهورهم

وبدل ميمشى بمبدأ إذا بليتم باستتروا -لا - انا اقعد اضغط عليك واطلعك زفت قصاد الناس بعيوبك

ما علينا

المهم

انا شايفة ان منطق الحق والواجب معقول بس لما تحط أنانية وغرور الرجل المصرى وقلة حياء المرأة ومطابتها بحقوق ليها اكتسبتها عن طريق الفيس بووك ومش بشكل عقلانى وعلى أسس منطقية فهتلاقى ف الآخر الخلل الموجود دلوقتى ف العلاقات

بس خلاص

وبرده تحياتى لما تسطر
ولشكل ونهج تفكيرك

هبة