الثلاثاء، 30 مارس، 2010

وزير أنتى فيرس

أعجبنى جدا اللى حصل من يومين بالظبط من زيارة مفاجئة لوزير التربية والتعليم ( أحمد زكى بدر )
زمان لما كنا بنسمع إسم زيارة مفاجئة كانت المدرسة بتخطط لها شهرين وتنضف المدرسة ويدهنوها ويبيضوها
دلوقتى ما شاء الله عليه الوزير بينزل فعلا مفاجئة للمدارس
لدرجة إن المدير وصل بعد ما الوزير وصل بنص ساعة بحالها
يا نهار أبيض يا جدعان
أنا الصراحة مصدقتش اللى اتقال ولا اللى اتعمل فى وسائل الإعلام والبرامج الإخبارية
مكنتش مصدق لأنها حاجة لا تصدق ببساطة
وزير التعليم إكتشف إن النجاح لأى مؤسسة بيقوم على أصغر وحدة فيها
وأصغر وحدة فى العملية التعليمية فى مصر
هوا المدرس والتلميذ
المدرس هوا الوحيد اللى يقدر يقوم بالتربية والتعليم للطلبة
يقدر يربيهم ويقدر يعلمهم ويطلع جيل واعى وفاهم يفيد البلد بجد ويرفع من شأنها
أنا سعيد بالحمى اللى أكيد إنتابت مدارس كتير وبقوا مرعوبين من زيارة السيد الوزير
رفد 13 مدرس بعقود ونقل 89 مدرس ونقل إدارة المدرستين بالكامل
شىء لا يصدق
ولكن يستحقوا هذا حقا
المشكلة فى العملية التعليمية
إن القائمين عليها أصبح الإهمال والتسيب والتربح من الوظيفة صفات مميزة لعملهم
وبالتالى أصبح دا العادى بتاعهم
فخلاص
بقى المدرس بيدخل كل همه إزاى يزود مرتبه أضعاف عشان يقدر يعيش حياة كريمة
والطالب بيروح المدرسة عشان الغياب
والأهل بيفكروا إزاى يحوشوا عشان الدروس والواد يروح المدرسة يتعلم إيه مش يهمهم
بقى حتى التعليم عبارة عن حضور وإنصراف
الكلام دا أنا شفته بعينى لما كنت طالب فى مدرسة مصرية
دا خلاصة كل سنين التعليم اللى درستها
الوزير ربنا يكرمه بقيت حاسس إنه زى الأنتى فيرس اللى بيطحن السيستم
ويكشف الأكواد الخبيئة ويطهره
أنا مقتنع بالوزير دا من أول يوم
مش خوف والله من غنى أكتب رأيى فى المدونة
ولكن دى الحقيقة
اللى سمعته إن الوزير دا كان رئيس جامعة عين شمس
وشايف طلبة الجامعات عاملين إزاى
أكيد هيحاول يصلح المراحل اللى خلتهم بالمنظر اللى هما فيه دا
تحياتى للوزير اللى أصاب كل المدارس بحمى الإنضباط شكلا وموضعا
تحياتى لأى أنتى فيرس فى مصر
شاب فقرى

هناك 15 تعليقًا:

انسان عادي يقول...

اتمني الحكاية دي تجيب نتيجة
واتمني اشوف التعليم في مصر له قيمة
المشكلة ان احنا عارفين حل القضية ومش عايزين نعمله
كل الناس قالت اي دولة بتتقدم لما التعليم يبقي كويس ومظبوط
اخنا بقي مش عايزين نعمل ده للاسف

عموما ربنا معاك يا سيادة الوزير
يمكن تكون احسن من اللي قبلك

emymony يقول...

حاسه بباب امل فى التصرف ده
وفرحانه بيه
لانه بكده ادى خطاب انذار لجميع مدارس مصر
ان عصر الفوضى انتهى
وانه ممكن يتابع ويزور فى وقت
وكله يشتغل بامانه
اتمنى ان ظنى مش يخيب
ونتغير للافضل
تحياتى

ستيتة حسب الله الحمش يقول...

السؤال اللي عاوزاك تجاوب معايا عليه

1- هل طلبة حلوان يستحقوا ادارة جديدة مشدودة وادارة اطفيح عيالها ولاد البطة السودة؟
2- المدير اللي انتقل للمنيا ها يقدم ايه لطلبة الصعيد ولا دول اقل مرتبة من عيال القاهرة
3- هل لو اشتغل صح على الكادر الخاص وحسن معيشة المدرسين ثم ابتدى يحاسب مش احسن كتير من اللي عمله اللي هو مجرد شو اعلامي؟
4- تفتكر في مخلوق ادامي يا كريم يقدر يشتغل صبح وليل زي المدرسين؟ وبعد كده نقول بيناموا في المدارس؟

انا مش ضد الإصلاح ابدا
بالعكس
ياريت يكون راعي اصلاح فعلا
بس ده دخل الوزارة يوم 3 يناير
من ساعتها عامل شو غير طبيعي
وكأنها وزارة داخلية
وساعات تصريحات ومضادها تاني يوم الصبح
عاجبني ان حد يصلح
مزعجني انه بيدير وزارة التربية والتعليم بفكر وزير الداخلية

تحياتي

saragebaly يقول...

بداية جيدة جدا جداا

ولكن الصعوبة مش في البداية .. الصعوبة في الاستمرار

ربنا يقوي الانتي فيرس دة

وينتشر في كل الوزارات

أكيد الحال هيكون أصلح

تحياتي لكـ

سارة

شاب فقرى يقول...

دكتورة ستيته

أسئلتك إجابتها بسيطة خالص من وجهة نظرى وهرد عليها مع حضرتك واحدة واحدة

بسم الله

- هل طلبة حلوان يستحقوا ادارة جديدة مشدودة وادارة اطفيح عيالها ولاد البطة السودة؟
- المدير اللي انتقل للمنيا ها يقدم ايه لطلبة الصعيد ولا دول اقل مرتبة من عيال القاهرة


طبعا الإدارة الجديدة هتكون شديدة
لكن الوزير دلوقتى قدامه موظف فاشل ببساطة

هل هيطرده ؟
يعنى لو إبنى غلط هضربه وأعاقبه ولا أقتله ؟؟؟
دا اللى عمله الوزير لما نقله لإدارة بعيدة
المدير دا هيفضل عليه العين وهيلتزم بقيت عمره او يسيب التعليم احسن
تقدرى تقولى إنه إجبار على الإستقالة والله وحده اعلى واعلم
وكمان لو المدير قرر يشتغل فى اطفيح فدا ساعتها هيلتزم ويراعى ربنا

- هل لو اشتغل صح على الكادر الخاص وحسن معيشة المدرسين ثم ابتدى يحاسب مش احسن كتير من اللي عمله اللي هو مجرد شو اعلامي؟

فى اسلوب اسمه
سيف المعز ودهبه
أسلوب العصا والجزرة
فى الف إسم لكن الطريقة واحدة
هوا ببساطة بيستخدم الترهيب والترعيب والعقاب دلوقتى
منعرفش بقى فلسفة الذهب او العطاء هتيجى امتى

- تفتكر في مخلوق ادامي يا كريم يقدر يشتغل صبح وليل زي المدرسين؟ وبعد كده نقول بيناموا في المدارس؟

الطمع يا دكتورة هوا اللى بيخليهم يشتغلوا ليل ونهار
انا مش معترض
يدوا دروس خصوصية
لكن يراعوا ربنا فى شغلهم الاساسى
ولا احنا هنجيب موظفين ونديهم فلوس عالفاضى لاننا بنهدر فلوس البلد اللى هى اساسا مش مكفية اى حاجة ؟
لو مش محتاج المرتب يقعد فى بيتهم

انا معاكى موافق عالاصلاح ونفسى يتم
وعشان كدا شايف انه بيطهر الوزارة
ويارب يعرف يعمل كدا

انا لو متاكد ان اللى هيظبط وزارة التربية والتعليم هوا وزير الحربية
هرشح وزير الحربية نو بروبلم
مش مهم اسلوب مين
المهم النتيجة تكون تمام والبلد تنهض
ومفيش نهضة بدون تعب ومجهود وتضحية
ولا ايه يا دكتور :)؟؟

نورتى جدا
خالص التحية والتقدير والاحترام
شاب فقرى

عاوز اصحي يقول...

بداية موفقه ربنا يقويه ويكتر امثاله
ع الله ينصلح الحال

Bent Men ElZaman Da !! يقول...

انا ماكنتش متشجعاله بصراحه نهائى
لان الجامعه فى وقته كانت مش كويسه
بالعكس ده بقى فيها حاجات اسوء كمان
واللى عمله امبارح حسيته استعراض يمكن فى الاول
مانكرش ان القائمين على المدرسه بكل درجاتهم يستحقوا عقاب
بس صعب لما يجازيهم او اللى اترفد منهم لانهم وراهم عيله
يعنى فكرتنى بـ مش قادر على الحمار
التعليم بايظ من زمان
ومش السبب اداره المدرسه دى تحديدا
لكن النظام كله من الاساس
ودول كانوا زى كبش فداء
انا لا مع اللى عمله ولا كمان ضده
بس ممكن نعتبرها قرصه ودن بس
فى سبيل ان التعليم كله يتصلح
ويا مسهل

تحياتى

sony2000 يقول...

بص...انا موش بقتنع بحد فعلا
الا لما اشوف عمل ايه فالاخر
ياتري اثر فعلا ولا ذي اللي قبله؟؟
ياريت لو كان جي يجصل
ياريييييييت
علي الاقل ممكن الشده والحذم يعملو حاجه
بدال مهي سيبه
ياريت.........

Wanda يقول...

العقاب مش من جنس العمل
الوزير حسيته بيتلكك
بس ادينى حصبر و نشوف اذا كان فيه مردود ايجابى للكلام ده

اصل المصريين شطار فى التحايل على التشددات ديه
و ممكن يزوقوا العملية من بره و من جوه :-(((

و بعدين مش مقتنعه انه احق بالى وصله
بس ديه الدنيا تدى الحلق للى ..

ghorBty يقول...

أكيد هيحاول يصلح المراحل اللى خلتهم بالمنظر اللى هما فيه دا

نأمل من الله ذلك

بجد احنا محتاجين أنتي فيرس في كل شئ لان الفيروسات بقت في كل شئ في التعليم وضمائر الناس وربنا يرحمنا برحمته ..

موفق ..

Romancia يقول...

يارب دايما اى تطوير فى البلد دى

بسنت يقول...

تحيه طيبه ايها الشاب الغنى
انا شايفاك ماسك دولارات دلارات فى الصوره- ربنا يزيد

وبعد
يعنى الواحد متفاءل شويه بالوزير
بس الوزراء بالذات لازم تتفاءل معاهم بحذر
لغايه ما يعدى عليه سنه كدا يكون بان المستخبى
بس فعلا مبادرته دى ممتازه لان زى ما انت عارف كتير من المصريين يخاف ما يختشيش
يعنى مش مسأله ضمير مسأله خوف
زى ما قلت تمام

ان شاء الله يكون القادم متعلم دا المهم
دمت بخير

حنين الذكريات يقول...

للأسف مفيش موظف فى البلد بيعمل المطلوب منه غير بالترهيب وشده من رئيسه فى العمل وحتى لو شو بيتعمل ف بيخوف باقى المدرسين والمسئولين عن التربيه والتعليم
المدرس الان لايعطى الا للى يدفع وبيروح المدرسة للراحه مش للعمل
هو بيحاول يرجع التربية والتعليم لأمجادها زمان ويارب يقدر
زمانا معدش زمن الشريف الذى يعمل بهمه ونشاط وبيكون له أعداء نجاح كتير
ربنا يوفقه للأصلاح

الدرويش المرووش يقول...

ربنا يجعل قدمه فى الوزاره أخف من قدمه فى جامعة عين شمس

Tarkieb يقول...

والله ماينفع في مصر غير كدة ...الله يرحمه احمد رشدي ظبط مرور القاهرة في يوم المشكلة مش منظومة مشكلة افراد