الأربعاء، 24 مارس 2010

وسطى بيوجعنى

فاكرين زمان كان فى أغنية كدا بتيجى فى مسرحية
شوية بنات بيقولوا : وسطى بيوجعنى
وشباب يردوا عليهم : من إيه
ويقولوا تانى : وسطى بيوجعنى
الشباب يردوا : من إيه ؟
يقوم البنات يقولوا : من كتر النوم ليلة إمبارح ... وياللى عالترعة حود عالمالح :D

فاكرين
أنا بقى كمان وسطى بيوجعنى
بس مش من كتر النوم
النوم بقى سلعة غالية لا يمكن الوصول إليها
وعلى رأى المثل : النوم أحلى من اللحمة الضانى
المهم إنى وسطى بيوجعنى
والسبب هوا الأتوبيس
ربنا كرمنى بمشوار كل يومين لمكان
أحلى مواصلة وأسرع مواصلة هى الأتوبيس
طبعا أول يومين كنت بنزل بدرى وألحق الأتوبيس فاضى
وأهيص بقى عالكرسى لوحدى
ولما أخلص أروح للموقف الرئيسى وأخد الأتوبيس من أول الخط فاضى
لحد اللى جرى لى إمبارح
غلطت ونزلت فى رمسيس
:(
وكانت المشكلة
الأول : الطلوع من المترو
كام مطلع من هنا وهناك ووجع دماغ وبلا توشيح ولا خريطة عالجمب للناس الغلابة
ومفيش غير عساكر المرور اللى ميعرفوش أساميهم أساسا
وبعد ما طلعت ربنا كرمنى بإنى طلعت قدام جامع الفتح
ولمن لا يعرف ولمن ليسوا من أهل القاهرة
عندنا فى القاهرة عشان يمنعوا الناس تمشى فى الشارع وتعطل العربيات
بيعملوا سور عالرصيف
أنا طبعا طلعت من سلم المترو لقيت السور اللطيف دا والعساكر ممنوع انك تقف تستنى الاتوبيس غير من ورا السور
طبعا مر من قدامى اربع اتوبيسات بالصلاة عالنبى وأنا واقف زى الباشا بسمع كلام الحكومة وواقف ورا السور
ولا عارف أركب ولا عارف أتشعبط
ولا عارف أعمل أى حاجة
فقط قاعد أشتم عساكر المرور فى سرى وادعى عليهم وعلى اللى جابوهم (( عينوهم يعنى مش خلفوهم ))
المهم قررت انى انط من عالسور
نطيت والحمد لله ووقفت استنى الاتوبيس
إن أتوبيس فيهم يقف ويراعى ضميره فى الناس الغلبانة اللى واقفة فى الشارع دى
أبدااااااااااااااا
فقلت أتمشى
عرفت إن ممنوع تمشى من وسط الشارع ولازم تخش تانى جوا السور
يعنى لو قدامك طريق وعايزو توصل لمكان
فانته لازم تلف حوالين افريقيا
قصدى حوالين السور
نفسى أعرف مين المهندس الغبى اللى عمل الأسوار وبدل ما يعمل جناين عمل أماكن كلها سراميك وقرف
أدعى عليه بإيه
ربنا كرمنى ووصلت لمكان الاتوبيس بيمر فيه
وقفت فى تحفز
لقيت الاتوبيس المقصود
فى وسط الطريق
معدى بسرعة
قررت أعيش دور المواطن المصرى الكحيان الغلبان وأتشعبط
ولأنها أول مرة أتشعبط
فكانت النتيجة السودا
إنى مسكت بإيدى ووقعت عالسلم
الاتوبيس الله يحفظه كان هيجرنى
وعشان كدا وسطى بيوجعنى
من الرغى دا كله بقى نطلع بالتالى

ليه الحكومة بتعاملنا زى البقر وبتعملنا أسوار عشان نقعد نلف حواليها :( على ما نطلع منها ؟؟
ليه ميدان رمسيس واقف فيه عساكر تمنع الناس تمشى فى الشارع ؟
ليه سواقين الاتوبيس معنجهمش ضمير ومش بيقفوا للناس الغلابة ويسيبوهم لإستغلال وخطر الميكروباصات ؟
إنتهى الكلام
شاب فقرى

هناك 24 تعليقًا:

الجواز و سنينه يقول...

هاقولك ايه بس يا راجل
و لا اقلولك مش هاقول
بس احنا اللى نستاهل

sony2000 يقول...

معلشي ياابني
كان الله فعونك
والله ماعرفه اقولك ايه
بس يارب ايامك اللي جايه تكون احسن من اللي بتعيشها
تقبل مروري وتحياتي

Lady E يقول...

اولا الف سلامة عليك لأني مجربة وقوع المواصلات

ثانيا الاسوار انا مشوفتهاش بس اكيد لحماية المواطنين الغلابة الرخمين اللي بيمشوا في نص الطريق وكإنهم بيغيظوا الغلابة اللي بيسوقوا عربيات برضه وبقول غلابة لأن 95% من المصريين عربياتهم مستعملة وتقسيط كمان

والمواطنين الحلوين مش عارفين ان لو حد فيهم داسوه ومات ديته 51 جنيه

يا شاب البني ادم ارخص حاجه في البلد دي

رحلتنا في الحياة يقول...

ههههههه ايه المعاناة دى بس
بس هى الحكومة كده غاوية تقرف الشعب وتخنقه :(

Baskouta يقول...

تجربة مريرة
بس انا عندي ملاحظة
انا مش من سكان القاهرة ولكن انا باجي القاهرة بمعدل مرتين في الاسبوع علشان كورساتي واوقات اكتر
ومش عارفة ازاي بتقول ان مفيش ارشادات تحت في المترو ...لا في وخصوصا في رمسيس ولما بوصل رمسيس واكون عاوزة اطلع مباشرة امام محطة القطر بلاقي ارشادات ولما ابقى عاوزة اطلع قصاد الفجالة بعرف اطلع وعند جامع الفتح..انا بشوف الارشادات وبمشي معاها ...ازاي انت ماشوفتهاش

اما عن العساكر فدول اصلا غلابة ومايعرفوش حاجة ولا تسالهم انت لو في يوم من الايام قررت اسال حد بدور على اعلى رتبة في الشارع واروح اساله ...العساكر بجد غلابة جدا

اما عن الاوتوبيس نفسه فده كارثة ...طيب انت شاب وقدرت تتشعبط وقدرت تلحق نفسك ... تخيل لما بيبقا واصل للمحطة بتاعته ومدام معاها بيبي او ست كبيرة او راجل مسن يبقوا عاوزين يركبوا .. بجد بتبقا بهدلة وبحمد ربنا وقتها انى لسة لحد دلوقت مافيش حاجة اتضطرتني اركب اوتوبيس

حمدالله على سلامتك
واوتوبيس يفوت ولا حد يموت
تحياتي البسكوتية المرورية

صيدلانيه طالعه نازله يقول...

بص يا كيمو انا اما باروح القاهره و انزل رمسيس ببقى خلاص حعيط

لانى مش ببقى عارفه امشى ازاى و فين و كل ما امشى فى حته اتحبس و معرفش اطلع و ارجع تااااااانى كل اللى مشيته
و برضه بتوه تااااااانى

حاجه مقرفه بجد

الف سلامه عليك من الوقعه و الحمد لله انها جت على قد كده

خواطر شابة يقول...

هل تعرف ما سبب وجود هذه الاسوار انه انعدام التربية الطرقية عندنا نحن تربينا على ان نعبر الطريق متى ما شئنا وحيثما شئنا دون اعتبار لا للاخطار التي نعرض انفسنا لها ولا للمشاكل التي نسببها للسائقين
انعدام التربية الطرقية هذا جعل حكوماتنا تتصرف معنا كقصر فتبني لنا الاسوار لتحمينا من أنفسنا
دمت بكل الود

غير معرف يقول...

حمد الله على السلامة عود احمد احمد اتخدت غياب 3 ايام

غير معرف يقول...

الف سلااااااااامة

بنت قلبى يقول...

يااااااااااااااااه
الكلمه \ى مش بتاعه البوست الا فات لاء
دى منى انا
بمعنى ان وحشنى الردود عندك فى مدونتك
واول كلامى
ازيك يا كريم
ويارب يارب يارب تكون تمام يارب
وكمان انا معرفشى ولا عمرى ركبت مواصلات
احنا اخرنا هنا الكرو
ولو سفرت السويس ولا حاجه يبقا
بمكروباص
وطبعا 4 ساعات متنحه فى افجا السواق لعند ما خلاص بنشل بظهرى
فا هنا عاوزه اقولك
دا اساس شعب مصر البهدله والتتعب
لان فى حته بتقول
محدش بيكولها بالساهل
وابقا قابلنى لو اكلتها اساسا

بنت قلبى يقول...

يااااااااااااااااه
الكلمه \ى مش بتاعه البوست الا فات لاء
دى منى انا
بمعنى ان وحشنى الردود عندك فى مدونتك
واول كلامى
ازيك يا كريم
ويارب يارب يارب تكون تمام يارب
وكمان انا معرفشى ولا عمرى ركبت مواصلات
احنا اخرنا هنا الكرو
ولو سفرت السويس ولا حاجه يبقا
بمكروباص
وطبعا 4 ساعات متنحه فى افجا السواق لعند ما خلاص بنشل بظهرى
فا هنا عاوزه اقولك
دا اساس شعب مصر البهدله والتتعب
لان فى حته بتقول
محدش بيكولها بالساهل
وابقا قابلنى لو اكلتها اساسا

Asmaa mahaba يقول...

سلامتك يا فقرى :)) تعيش وتمشى جوا السور وتعي وتتشعبط وتعيش وتقع :))

ستيتة يقول...

ليه الحكومة بتعاملنا زى البقر وبتعملنا أسوار عشان نقعد نلف حواليها :( على ما نطلع منها ؟؟

علشان رمسيس المكان اللي الكبارات بيعدوا عليه ولازم يبقى منظم

طب ما تشوف البلاد اللي على الطريق الزراعي
فين وفين لما ينتبهوا للناس اللي بتموت كل يوم ويعملوا لهم كوبري مشاه
ولازم كوبري المشاة يبقى بعيد
علشان برضه الناس تغامر تاني وتجري وسط طريق الموت بتاع مصر اسكندرية الزراعي
اصل ده مش طريق الكبارات يا سيدي

ليه ميدان رمسيس واقف فيه عساكر تمنع الناس تمشى فى الشارع ؟

برضه تأمين للكبارات والرتب
لحسن حد يخرج من السور يعمل إرهاب وكباب فيهم
لكن بقية مصر بتتمنى عسكري مرور واحد يقف في وقت زروة

ليه سواقين الاتوبيس معنجهمش ضمير ومش بيقفوا للناس الغلابة ويسيبوهم لإستغلال وخطر الميكروباصات ؟

علشان احنا بلد بنت ستين تيت في بعض
وبعد ما رحت امبارح مشوار طويل جدا قطعت فيه محافظات مصر
اقدر اقول لك الله يخرب بيت كل واحد قاعد على كرسي وسايب مصر وسخة كده
مكسرة كده
مظلمة كده
بلا اي أمل في الإصلاح كده

تحياتي وفرحانة ان جدتك خفت الحمد لله وربنا ييسر لك كل عسير يا كريم

R-H-S يقول...

انا يوم مانزلت معرض الكتاب وانا راجع ركبت اوتوبيس فضلت واقف لحد ما وسطي اتقطم من كتر الوقفه

ناهيك بقي علي اوسخ ناس هما سواقين الميكروباصات والتباعين عالم اعوذ بالله

ابقى اركب من اول الخط واركب جمب الشباك علشان لو ست كبيره جت جمب اللي جمبك هو اللي يقوم مش انت ههههههههههه
فكره برضه

تحياتي

ريمان يقول...

لاسلامتك الف الف سلامه


معلش معلش


ومش تسال نفسك ليه الحكومه كده هى هتفضل كده بالمنظر ده ومش عارفه امته هيعاملوا المواطنين كبنىءادمين

معلش وسلامتك الف سلامه

سمع هوص (Abo 3li) يقول...

ازيك ياكيمو... سلامتك..
مبدئيا انا بصراحة مش شايف اننا نعترض علي التنظيم.. الاسور فعلا معمولة لحماية الناس اولا ... لان زي م انت عارف رمسيس مش ميدان... رمسيس شمبرلاح... ملوش معالم.. ولو الرصيف بطوله بقي مفتوح.. الناس هتعدي من اي حت في اي وقت.. وده فعلا بيعمل حاجتين.. ممكن ناس تتخبط... والمرور هيتعطل اكتر مهو متعطل..
بس انا متفق معاك بخصوص سواقين الاتوبيس...


تحياتي ياباشا

فشكووول يقول...

ازيك يا فقرى

الحكومه بتلاعبنا حاورينى يا طيطه .. على وزن وسطى بيوجعنى ..

علشان احنا قللات الادب ومش بنعمل رياضه فالحكومه بتعلمنا نعمل رياضه غصب عننا ونلف الكره الارضيه عشان نعدى من عند جامع الفتح للعماره اللى قصاده .. امال ايه انت عايز بالساهل كدا ولا ايه

تحياتى

صدى الصمت - عاشقة الورد - يقول...

يا خبر !!!!
إية يا إبنى المأساة ال إنت عشتها دى ؟؟
معلش ربنا يهون عليك زحمة المواصلات وقرف المواصلات وتقوم بالسلامة
تحياتى

shoshta_ joker يقول...

السلام عليكم..........


ازيك يا لاسع

ايه يابنى والله عيب عليك انت ظالم الحكومة
بتسال ليه
لازم تعرف الاجابة لوحدك
عشان احنا اكيد اكيد فى مصر بببببببببببس



دومت بخير
فى رعاية الله
shemo

just waiting يقول...

اولا الحمد لله على سلامتك
ثانيا الحكومة شايفه ان المواطن المصري مالوش دية اساسا
طب تعرف في ميكروباص عمل حادثه اقل حد اتعور كانت واحده صحبتي كسر في الحوض كشفو على السواق لقوه كان شارب مخدرات وهو سايق كل الي حصل وقفوه عن السواقه شهر تقريبا وخلاص اصل محدش مات كلهم اصابات بالغه بس !!!!!!

حبات التوت يقول...

ازيك ياكيمو عااااااامل اية
اروح واجى الاقيك واقع من الاتوبيس


ههههههههههههههههه


مايقع الا الشاطر

سلامتك من الاه ياكيمو تعيش وتتشعلق كمان وكمان

كل جمعة هبقى اجى انورك كدة
;)الى اللقاء الا سبوع القادم ك

Bent Men ElZman Da !! يقول...

الف سلامه عليك من المواصلات ووقعتها
معلش كلنا لها ودى اخره اللى يفكر يركب اتوبيسات
رمسيس اسمها مقر التعذيب الرئيسى
وخصوصا خاصتا فى وقت الذروه
(اللى هو الزحمه يعنى)
منظر الناس مابيبقاش لطيف ابدا وهو العساكر محاصرينهم وموقفنهم كده
تقولش لو سابوهم هينزلوا ياكلوا الاتوبيس والا يعضوا فى كاوتشاته مثلا
اما عجايب والله

NaiRa يقول...

لانى اول مره امر فى مدونتك وان شاء الله مش الاخيره

اولا الف مليون سلامه عليك يا جميل
وده تعرف منه ان مواصلاتك الوحيده تبقى يا المترو او انك تاخد الاتوبيس من الموقف وانت ملقتش غير رمسيس ده انت تحس ان البلد كلها فضيت والناس كلهم اتجمعو فى رمسيس
وبعدين انت بتقولى اسألتك كلها وبتقول ليه؟
ليه دى؟
لان المخرج عايز كده :D
اقصد الحكومه عايزه كده
فاكرين ان ده النظام هما كده بينظمو المرور
والحمد لله انها جت سليمه وربنا قومك بالسلامه

تقبل مرورى

راء يقول...

ههههههههههه
هههههههههههههههه

فكرتني ف مرة من شهرين عملت فيها فلحوسة..وقلت اما اتلكك واخرج مخصوص قال ايه عشان اجيب كالكوليتر جديدة من الفجالة..

وظبطت نفسي ورحت المترو وطلعت عن السور اللي بيتقفل ده..والاقي العسكري بيقول مفيش مشي من هنا

انا الدم جري ف عروقي ازاي يعني هوا شارع حضرتك ده شارع الشعب..قلتله ليه يعني انا ماشية زي الناس عادي

قالي لا مينفعش حضرتك ممنوع..وانا اما حد بيقول حضرتك بغلي ..كيف تجرؤ ايها الفتى انا حضرتك..

المهم كرامتي نقحت عليا واضريت اسمع الكلام وادخل السور..والمهم اني برضه مجبتش الكالكوليتر :( :( :(

المهم نستفيد م الرغي ده بإيه..ان بلدنا منظمة
يعني فيها سور وممنوع تتمشى..قمة الحرية ..

حمدالله على سلامة جدتك والبقاء لله في جدتك التانية

اسفة على عدم السؤال بس والله انا كنت ف مليون مشكلة ووعكات صحية متتالية ولسه فايقة النهارده جيت أسأل

مقهورة