الأربعاء، 10 مارس 2010

خبر عاجل : إرتفاع أسعار الحشيش


يا مهيصنا يا مشخلعنا

ليه دايما غاوى تفقعنا

يوم ما تزيد وتقرر تغلى

زيد خمسايه ... مش خمسين :@

راكب ميكروباص إمبارح لقيت مواطن بيسب ويلعن فى العيشة واللى عايشينها

قلت له مالك يابنى آدم ... مالك ؟

قالى الحشيش غلى يا فقرى ... يخرب بيت فقرك ... هشرب إيه أنا دلوقتى

صراحة ملقتش رد أرد بيه عليه

غير إنى تعايشت فى الموقف وحسيت بالفقر اللى هوا واقع فيه وقلت الكلام اللى فوق دا

عزيزى المواطن : أنتخ جمبى



وبقيت بسأل نفسى

للدرجة دى وصل الغلاء ؟؟؟

بقى صباع الحشيش بميت جنيه

وأنا أقول ليه تجار المخدرات مليونيرات ؟؟؟؟

وليه ياترى الناس ماشية تكلم نفسها ؟؟؟

أتارررررررررررررررررررى

أنا مش بشرب .... بس مستغرب أوى

حتى الكيف غلى ؟


طيب ياترى الناس هتعمل إيه ؟؟؟؟؟؟؟

هتطلع من هدومها ؟؟؟

ولو طلعوا من هدومهم ؟؟

ياترى هدومهم مش هتتسرق وهيلاقوا حاجة تانية يلبسوها ؟؟؟

ومازال السؤال يطرح نفسه ؟؟

خالص التحية

محلل إقتصادى
شاب فقرى
ملحوظة : كل شىء بكتبه بيكون ليه معنى
يعنى بوست زى دا مش هدفه السخرية والتريقة
على راي المثل ... هم يبكى وهم يضحك
قصدى ان كل حاجة كل حاجة حتى الكيف
لان الحشيش دا بقى فى ثقافة بعض الناس زى الزيت والسكر والشاى فى البيت
الناس بتشربه وكأنها بتبلبع ملبس بالظبط
الموضوع يبكى
ولا يدعو للضحك
ملحوظة تانية :مش هقدر ارد عالتعليقات لان جدتى احتمال تعمل عملية بكره ولازم اكون جمبها
ما بصدق الاقى اى وقت ادخل فيه المدونة
دعواتكم
خالص التحية والاحترام والتقدير
شاب فقرى

هناك 27 تعليقًا:

غير معرف يقول...

Trust words
طيب اهم حاجه يوفروا البديل لحسان الناس اتعودت على (الكيف؟) لأنها الحاجه الوحيده اللى يعرفوا إجابتها


لكن هو الحشيش ده اللى هو النجيله وبينشفوه ?

غير معرف يقول...

هههههههههه

طيب مانستورد حشيش صيني :))

تحياتي

فكرة من الزمن ده يقول...

يعني اللي رفع اسعار الحشيش
مش حاسس بالام الناس واوجاعهم
يعمل فيهم ازاي كده اكيد حد معدوم الضمير اللي قرر يغلي الاسعار كده
مساكين هيبقى لا اكل ولا كيف
ليا سؤال ملح موش ملح الطعام ولكن مولح
مين اللي في الصورة نايم اصل الصورة لفتت نظري جدا وتنحت فيها كتير واستخرجت منها معاني اكتر
تحياتي

غير معرف يقول...

هههههههههههههههه
ياعينى الحشيش هيغلى امال الحمار هياكل ايه تانى
يلا نبقى نزرعله حاجه تانيه كوسه مثلا

قلم رصاص يقول...

حشيش فايدة فيك خالص

lostlove يقول...

الحشيش بقي غالي الحاجه الوحيده الي بتخلي الناس متفكرش سعره ارتفع

احسن بردو يارب الناس تجرب تفوق

بس بردو تفتكر هيبطلو

انا بلاقي ناس بتسرق عشان الكيف

ربنا يهدي الجميع


والف سلامه لجدتك ويارب تقوم بالف سلامه

تحياتي

اتمني التوفيق

حنين الذكريات يقول...

حتى الحشيش مسلمش من موجة الغلا حرام عليهم هيقل عدد المدمنين فى البلد هما هيلاقوها منين ولا منين
ربنايسترها على الغلابه

VÖltaa يقول...

الحشيش !!

هو انا كل ماجى انوى اشرب حاجة تغلى كده :-))

ريمان يقول...

هههههههههههههههههههههه


كل حاجه سعرها ارتفع اشمعنى ده يعنى

خواطر شابة يقول...

سأقول ماقالته ماري انطوانيت ابان الثورة الفرنسية ""إذا لم يكن هناك خبزاً للفقراء.. دعهم يأكلون كعك" لكن من فضلك بلاش المقصلة
دعواتي بالشفاء ان شاء الله لجدتك
مع تحياتي

romansy يقول...

طول يا فقرى ما فيه جشع وقله ضمير هيفضل دا حالنا
غلاء اسعار فى كل شئ غاز وسولار مش لاقينه
زيت وخضار غالى علينا
طب نعمل ايه
هم يضحك وهم يبكى

morgana يقول...

يعني هيا جت ع الحشيش
من نفسه هو كمان اشمعني هو ميغلاش

Haytham Alsayes يقول...

هههههههههههههههههه
الحشيش غلي الله يخرب بيت اللي بيدمرونا ياخي
الف سلامة علي جدتك وشفاها الله وعفاها
تقبل مرورى وتحياتي

أبو العريف يقول...

ازيك يا فقري

دعواتي لجدتك




حشيش غالي

ودماغنا خلاص مبقتش ف العالي

ما تزق يا معلم

وتجيلي طوالي


ايه الهبل ده

مش عارف هم يبكي وهم يبكي فعلا

غير معرف يقول...

لما حاجة زادت والمرتب الحاجة الوحيدة اللى قلت الناس بقيت تزود فى اى حاجة تقدر تزود فيها عشان تقدر تغطى الزيادة فى باقى الحاجات
يعنى الناس اللى بتبتع حشيش بتزود عشان تغطى الزيادة فى الهدوم وفى الاكل وحتى المواصلات
يارب تكون فهمت اقصد ايه


وربنا يشفى جدتك ياااارب والعملية تنجح

ابقى طمنى عليها

ويارب انت كمان تبقى بخير وتمام
سلاموز

sony2000 يقول...

ياعم سيبك بدال انت موش بتقرب منه ملكش دعوا بيه
دا ليه ناسه ويارب يبعد الجميع عنه
ويارب يشفي جدتك
يااااااااااااااارب
اللهم امين
تقبل مروري وتحياتي

رحلتنا في الحياة يقول...

انت بتقول فيها الحشيش فى بعض الطبقات من الاساسيات والطبقات دى للاسف الفقرا ممكن يجوعوا لكن ميقدروش يعيشوا من غير كيف
بس احسن انه بيغلى يمكن يبطلوه ويجربوا حاجة جديدة اصلهم مش هيغلبوا

صوت من مصر يقول...

انت قديم مش كريم

سمع هوص (Abo 3li) يقول...

الله يخرب بيوتهم حتي الحشيش.. غلووه...
وانا ال كنت ناوي اتجه ليه...خلاص يسيدي مش عاوز اعمل دماغ... كده كده .. الواحد من الهم وطحنة الحياة بقي عامل زي المساطيل...


الف سلامة علي جدتك... وربنا يقومها بالسلامة ان شاء الله

سمع هوص (Abo 3li) يقول...

الله يخرب بيوتهم حتي الحشيش.. غلووه...
وانا ال كنت ناوي اتجه ليه...خلاص يسيدي مش عاوز اعمل دماغ... كده كده .. الواحد من الهم وطحنة الحياة بقي عامل زي المساطيل...


الف سلامة علي جدتك... وربنا يقومها بالسلامة ان شاء الله

ghada mOhsen يقول...

اول شى .. ربنا يقوم جدتك
على خير وبألف سلامه يارب ...
ابقا طمنا ...

نيجى للبوست بقى ...
اللى انت سمعته ده بجد انا سمعت زيو برضو بودانى

وفعلا انا يوميها احترت ابصلهم بنظره اشمئزاز لانهم بيشربوه ولا أرحمهم عشان فعلا الحشيش بالنسبه لكتير من الناس " التصبيره " عشان يكملوا يومهم ...


ماهو اشمعنا الحشيش بقى .. ماكل شى بيغلى ... ربنا يستر والله ...

بس بجد " مصر " فى نعمه شوى بالنسبه للاسعار فى الاكل .. لان فى بلاد بجد اسعارها خياليه زى بلادى " اليمن " بجد فى ناس مش بتعرف تاكل ...

ربنا يلطف بعبيده يارب ...

سلمت كريم ..
... ;) ,,, ;) ...

riri يقول...

انا بش هعلق على الموضوع عشان تعبت رغى :p
بس اللى خلنى اعلق هو خبر عمليه جدتك
ربنا يقومها بسلامه يارب ^_^

غير معرف يقول...

الف سلامة عل جدتك اللهم اشفيها وعافيها ومرضى المسلمين

-_- يقول...

يا جماعة متقلقوش
اكيد الحكومة مش هتسبنا كده
احنا اتعودنا على الانتخة !
معقولة نفوق بعد العمر ده كله ؟؟؟

R-H-S يقول...

طيب بالنسبه للسمسون ايه النظام هههههه
كل الناس مشغولين بزياده الاسعار حتي الحشاشين انا كنت فاكرهم مش في وعيهم بس يظهر انهم بدأوا يفوقو
اهم حاجه ربنا يقوم جدتك بالسلامه ان شاء الله

Ana keda يقول...

سلامة جدتك يا كريم ربنا يقومها بالسلامة
بس كده غلوا الحشيش يعنى الى كان مصبر الناس غلى
انا لاى منرفزنى ان فى ناس بتقطع من قوتها مثلا عشان تجيب الحشيش
الناس بقت غريبة والى فوق اغرب
وكله بياخد من دم الناس وخلاص

z!zOoOo يقول...

السلام عليكم

ازيك يا فقري

يارب تكون بخير

ربنا يشفي جدتك وبإذن الله ربنا يطمنكوا عليها وتقوم بالسلامه

اما عن الموضوع

فأنا شايف دايما إن الناس هي الي بتصنع الوهم وتجري وراه

زي ما صنعوا الصنم وعبدوه

تحياتي