الأربعاء، 3 مارس 2010

كلام كتير



السلام عليكم جميعا

إزيكم

الحمد لله على كل حال

لازم الواحد يرضى بالحال حتى لو الحال مش راضى بيه :D

النهارده بقى فى مجموعة من الأخبار وبس

مفيش لا بوست ولا بتنجان

أنا قلتها أهوه

يعنى هوفر عليكم تقروا تلات صفح فلوسكاب وانا على فكرة مش بسيب سطر :P
الجزء الاول :
لقاء التبرع بالدم

أول حاجة :



ربنا يحفظك يا خيخة

مجرد الدعوة للخير

تستاهلى عليها كل الدعاء اللى فى الدنيا كلها

عشان كدا أنا قررت أنزل اللقاء دا للتبرع بالدم

يوم الجمعة

يوم الجمعة الجاى على طول دا

التفاصيل كلها عند خيخا

وانا هبقى أحط رقم موبايل هفتحه يوم الجمعة مخصوص للقاء

هحطه يوم الخميس عالجمب هنا مكان المود وفوق الصور فوق خالص

عشان أى حد هيتوه

هجيبه

لأن الدقى دى منطقتى لا مؤاخذه رايح جاى فيها حافظها ملليمتر ملليمتر

ولما نلتقى كلنا يوم الجمعة بدرى قدام المترو

هنسأل برده واللى يسأل ميتوهش :D

هههههههههههههههههههههههههههههههههههههههههههه

وبالمناسبة أنا ليه عند خيخة عشرة جنيه

ولن أتنازل عنها :P

جائزة للعبد لله :)

------------
الجزء التانى :
مناسبات خاصة جدا

تانى حاجة :

ألف مليون مبروك ل ( شيما )


شيما إتخطبت يا أخواتى الأعزاء

ألف ألف ألف مبروكايه من الفقرى

وأنا عشان طيب واتمنى لك الخير

هحاول أن لا أتواجد فى أى مكان تتواجدى فيه

حتى لا يصيبك من الفقر اللى عندى دا وتحصل أى مشاكل :$

:)

ألف ألف ألف ألف مليون مبروك يا شيما

أفتكر لما كنا فى اللقاء فى نادى الزراعيين

وكنت بفكر مع الكل نغير المكان

وعادل قال ناخد الاصوات

شيما قالت :

لا أصوات ولا كلام فاضى ...هى كلمة واحدة وقرار واحد محناش ماشيين وهنعمل اللى عايزينه غصب عنهم


بتعرفى تشكمى الكل يا شيما

ألف مبروك

وربنا معاكى :)

--------------

تالت حاجة :


سكرة يا سكرة

My Best Friends

أطيب الناس اللى عرفتهم

والناس اللى إستحملونى وأنا متعصب وبتفلسف وبنيل كل حاجة

بقولها شكرااااااااااااااااااااااااااااااا

وبقولها معلش معرفتش أعيد عليكى فى عيد ميلادك

وكل سنة وإنتى طيبة

وكمان

مبروك يا عروسة

سكوكرة هتتجوز قريب

وطبعا لازم أبارك لك وأحضر الفرح

بس صدقينى إنتى عارفة الفقر اللى بيشع منى

فأنتى تقولى لى الفرح إمتى وأنا هشغل شعبى وراب عالكمبيوتر وأقعد أحتفل لوحدى

وربنا يستر عالكمبيوتر بقى

وألف مبروك يا طيبة يا هادية يا مجنونة :D

-------------
الجزء التالت :

رابع حاجة :

أنا بتأسف للناس الطيبين اللى ذكرتهم دول

لأنى إتأخرت فى التهانى

بس الظروف ربنا اللى يعلم بيها

جدتى فى المستشفى بقالها عشر تيام تقريبا

والحياة متشقلبة والدنيا ماشية بالعكس

والله أنا فاكر من فترة قررت أقول

(( الدنيا بتضحك ليه ))

قام حصل اللى حصل

وبقت الحياة مش حياة

مش عارف أركز ولا أكتب ولا أرد عالتعليقات حتى

معلش إتأخرت عليكم بس غضب عنى

والغلط مردود

وألف مبروك لكم جميعا

دعواتكم بقى ربنا يكرمنى كدا

وأتجوز بقى

مش هفضل أبارك للناس كدا

وأوعدكم لو الدعوة ربنا إستجابها وحصل

فى أقرب وقت

هعمل الفرح للعريس فى قاعة

والعروسة والمعازيم فى قاعة

عشان الفقر بتاعى ميسببش حريقة

وآسف عشان مرديتش على كل التعليقات فى البوست اللى فات

-------
الجزء الرابع :
كلمتين فى السر ل سمسمة
سمسمة

إكتبى وأنا فى الإنتظار

ولما ربنا يكرمك وتعملى الكتاب التالت

إبقى خصصى لى فيه فصل :)

لأن مينفعش أنحس لك أول كتاب

ليكى مستقبل باهر إن شاء الله

وإن شاء الله ترجعى بالسلامة وتبقى حد مهم

زى يسرى فودة

اللى كنت بتمنى أكون صحفى أو أعمل تحقيقات زيه
بس سيبت كلية الإعلام بعد تالتة لأن إنتى فاهمة بقى

:)

فقرى

---------------------

إدعولى ميحصلش مصايب ولا مشاكل
لأن ممكن موضوع حضورى للقاء يتهد فى حالة تعب جدتى أو أى مشاكل تظهر
دعواتكم لها بالشفاء
وليه بالقوة والصبر
إنتهى الكلام

شاب فقرى

هناك 35 تعليقًا:

Baskouta يقول...

الف سلامة على تيتة
ان شاء الله تبقا بخير
وانت ربنا يقويك
وان شاء الله تحضر اليوم ومفيش حاجة تعطلك

عاوزة كمان اقولك ميرسي على الكلمتين اللى انت سيبتهوملي لما انا كنت في مود مش كويس
عاوزة اقولك انك قولتلي كلمة اثرت فيا .. مش لاني اول مرة اسمعها بس لاني انا فعلا بعملها بس كنت بدأت افقد الثقة فيها
وهي اني لازم انا اكون اول واحدة اقف جنب نفسي ... اسندها واساعدها لان محدش هيهتم بيها زي انا
ميرسي ليك على كلامك اللى خلاني ارجع تاني اثق في اني لازم اقف جنب نفسي وابقا كويسة ... علشان نفسي وعلشان مش هقضيها في نكد وزعل ... مش هقول اني قوية وطول الوقت بقدر بس صدقني بحاول ... والحمد لله على كل حال
ربنا يطمنك على تيتة ويطمنا عليك
ربنا يرزقك ببنت الحلال قريب علشان احنا اللى نباركلك ونعملك فرح تدويني محصلش
كمان ايه حكاية انت قاعة وهي والمعازيم قاعة ... نووووووو انت وهي والمعازيم في قاعة واحدة لان اعتقد لما ربنا يبعتلك فتاة احلامك اللى هتنور قلبك مش هيتفضل حاجة فقرية فيك وهتبقا اسعد واحد في الدنيا
ربنا يوفقك
تحياتي البسكوتية الشوكولاتية البندقية .

شاب فقرى يقول...

بسكوته
نورتى والله
والحمد لله انها فترة وعدت
دى حاجة تسعدنى وتفرحنى والله انى اقدرت اغير اى شىء فى حد للاحسن
او اسعد حد
دى فى حد ذاتها حاجة تسعدنى وتفرجنى وتطلعنى من اللى انا فيه
والله بفوت على مدونتك كتير
بس انا معنديش صبر للاسف انى اقرا انجلش
باخد وقت
لانه مش لغتى الام
فمش بلحق اخلص البوست
فبمشى على طول
:(

حاولى تعبرى عن نفسك فى مدونة تانية بالعربى :)

حكاية القاعة دى انا بتكلم عنها بقالى كام شهر من اول ما فتحت المدونة
تقريبا فى التاج قلت كدا
مش فاكر بالظبط
نورتى يا بسكوتة
وسعيد بانك بقيتى تمام والحمد لله
يارب ييسر الحال ويقرب البعيد ويحقق لنا السعادة
:)
تحياتى الى البسكوتية الشوكولاتية البندقية .
فقرى

sony2000 يقول...

هههههههههههههههههههههههه
ايه ياعم دا
لالالالالالالالالالالالالا كدا هذعل بجد
متقولش علي نفسك كدا هو يعني علشان حجات حلصت تقول كدا
دي حجات بتاعه ربنا اولا واخيرا وكاتب انها هتحصل
فقول الحمد لله علي كل شيء واحمد ربنا انك احسن من ناس كتير وشوف اللي حوليك هتلاقيك فنعمه انت موش شايفها
صح كلامي ولااااااااااااااااااااا
ههههههههههه
ويارب بأذن الله يكون يوم الجمعه حلو ان شاء الله ومبروك للي اتجوذو واتخطبو وعقبالك ياااااااعم
عهد عليا بأذن الله لما يحصل هخلي البلوج بتاعك كله ذغاريط بس ادعيلي وقتها اكون موجوده بقي
وربنا يشفي جدتك ويارب يشفي جميع المرضي
اللهم امين
تقبل مروري وتحياتي

Sarah Sobhi يقول...

الف سلامة على جدتك ..ربنا يقومها بالسلامة ان شاء الله

ان شاء الله كل حاجة تبقى تمام و الفقر مسيرو يزهق منك او يتطاير لوحده

D:D:D:

الشعب لابد له من حكومه تشكمه يقول...

الف سلامه على جدتك ياكريم وان شاء الله تقوم بالسلامه وتطمن عليها....

وبعدين متقولش على نفسك كده انت اى مكان تروحه تباركه ياكريم بجد..

وميرسى اوىىى اوى بجد على مباركتك الغاليه عليا بجد انت متعرفش اد ايه انت اصلا حد عزيز عليا اوى...
وربنا يريح قلبك وبالك ويسعدك وتحقق كل احلامك يارب,
وتعزمنى فى فرحك سااااااامع ان شاء الله..

**ارجع تانى واقولك بجد بجد اكتر حاجه زعلتنى فى يوم اللقاء انى معرفتش اتلم معاك براحتى ,كان نفسى اوى نرغى ونتكلم مع بعض ..بس متعوضه ان شاء الله..

ربنا يكرمك ياكرمله وميرسى اوى على ذوقك:)

واباه طمنى على جدتك.

شاب فقرى يقول...

sony
منورة
كله على الله
محدش عارف هيشوف ايه بكره
ربنا يستر
الله يبارك لهم جميعا
تنورى ساعتها يا سونى
دا لو كنت لسه بدون :)

نورتى :)
فقرى

شاب فقرى يقول...

سارة
منورة والله
الله اعلم هيزهق ولا انا اللى هزهق منه
المهم اى حد فينا يسيب التانى :)
سألتك فى التعليقات
إبقى ردى عالسؤال :)
تحياتى
فقرى

شاب فقرى يقول...

شيما
كان لازم ابارك لك اول واحد والله
بس الظروف مسمحتش
ومكنتش اعرف
والله اللى قالى حد قرا تعليقك فى مدونة وبعتلى اللينك
شخصية ملهاش علاقة بالتدوين بعتتلى اللينك
مصدقتش
وبعدين قلت عشان كدا كانت مختفية
وبعدين لقيتك مش بتعلقى
وبعدين انا بطلت اكتب كام يوم
لحد اليوم
قلت لازم اكتب بقى واخد موقف
:)
لازم ابارك بقى
:)
ألف ألف ألف ألف مليون مبروك :)
ويارب دايما فى رضا ربنا وفى سعادة وفرح وحب وهنا ورضا

اكيد هتتعوض

وقريب اوى اوى كمان :)
بس المهم متبقيش تسكتى ساعتها
هبقى اعزمك
لو اتجوزت فى مصر او من مصر :P
لو كنت برا
اكيد بقى هبقى احط صور الفرح هنا :P
نورتى يا شيما
مش عارف اتكلم
بحس انى فى مواقف المباركات دى عامل زى عم باخ واللمبى :$
شاب فقرى

Ana keda يقول...

حمدلله ع سلامتك يا كريم
طولت الغيبة بس يلا بقى معلش اخواتك ولازم نستحملك :)
الف سلامة ع جدتك ربنا يشفيها ويعفى عنها انا عارفة الدوشة دى وربنا يقومها ليك بالف سلامة
وربنا يديك الى تستاهلك وتقدرك والقاعة علينا يا سيدى كمان
خلى بالك منك بقى وربنا ييسرلك الحال

غير معرف يقول...

الاول وعليكم السلام ورحمة الله وبركاته

الحاجة التانية اللى بعد الاولى اخبااااااااااارك ايييييييييييه ؟؟؟ كنت هتاخد مخالفة على التاخير ده كله بس يلا المسامح كريم بقى

مفيش حاجة تانى اقولها

قلت ادخل اسلم واشوف اخبار الناس الغايبة ايه

يارب تكون بخير
وربنا يشفى جدتك وتبقى كويسة
وبخصوص فقرك لا ولايهمك كلنا نفس الفقر ده

شاب فقرى يقول...

سمسمة
بصى يا سمسم
واحد وواحد يبقوا اتنين

تمام ؟
اللى مش عاجبك غيريه او ارفضيه
الموضوع سهل وبسيط ومن غير عقد
نتكلم واحدة واحدة .؟
- الشغل :
لازم تفكرى فى بكره وعايزة تبقى إيه ؟
مينفعش ييجى يوم وتندمى انك مش بتشتغلى
انا مرة واحدة قالت لى انا بشتغل عشان لو الزمان جه عليه وحتى جوزى زعلنى ألاقى حاجة تسندنى
قلت لها وأهلك ؟
قالت لى : يمكن كل واحد فيهم يكون شايل حمل وحد لاعب له فى دماغه وانا مش عايزة احس بالضعف والذل لحد
يبقى الشغل لو بتحبيه
تكملى فيه
مهما كانت الخساير
طالما الشغل مش حرام
ولا بيخليكى تقصرى فى بيت
ولا بيخليكى تعملى حاجة غلط
؟؟؟؟
ليه الشغل مرفوض
سؤال يتوجه ببساطة كدا لاى حد بيقولك لاء
هوا انا بكلم حد بشكل مش كويس فى الشغل او بنزل وانا مش محترمة نفسى ؟
ولا انا بعمل حاجة غلط ؟
عايزة اشتغل عشان عايزة اشتغل
لا عشان فلوس ولا عشان اى حاجة تانية
تمام ؟
------
الطرف التانى :
لازم يكون فى تفاهم
وجعلنا بينكم مودة ورحمة
كل واحد بيضحى بشىء فى سبيل اسعاد الطرف التانى
فكرى كويس فى الموضوع دا
وشوفى تجارب غيرك
انا عن نفسى
شايف الموضوع الارتباط فى سن مبكر
بعتبره فاشل
لسبب بسيط قالتهولى والدتى لما قلت لها اخطب زمان :
قالت لى ما يمكن تشوف احسن منها ؟ وحالك يتغير او تفكيرك يتغير وتشوف انها ولا حاجة ؟ يمكن تكره نفسك لانك ارتبطت فيها فى يوم من الايام
لازم تفكر صح وتعرف تاخد قرار
وندمك او قلقك يختفى تماما بعد ما تاخد القرار
فى نفس اللحظة

--------
لازم تفكرى براحة وتاخدى وقت عشان تعرفى تقررى
مينفعش تعزلى نفسك وتقولى هبطل كل حاجة
لازم زى ما بنسمع كلام الناس عشان بنحبهم وبنيجى على نفسنا
لازم هما كمان يحترموا مشاعرنا ويحسوا بينا ويقدروا احتياجاتنا
واجبات وحقوق
ومادمتى بتعملى اللى عليكى
يبقى من حقك المطالبة بحقوقك

القاهرة
بلدنا هتنور يا ولاد
والله هتنور يا ولاد
:)
حللتى أهلا ونزلتى سهلا
وإن شاء الله تبقى زى ما بتحلمى واحسن كمان
نورتى يا سمسمة
شاب فقرى

شاب فقرى يقول...

انا كدا
منورة
امال مين يستحملنى غيركم بس :)
ربنا يسمع منك يارب
يارب الفترة دى تمر على خير
لانى بجد تعبت
:)
شاب فقرى

سلمى يقول...

السلام عليكم
الف سلامه على جدتك وربنا يقومها بالف سلامه
باركت لناس كتير واتكلمت عن ناس كتير
ونسيت تقول لو حتروح للدكتور
انا عارفه ان الوقت مش مناسب وان جدتك تعبانه وان وان
بس انت لازم تهتم بنفسك عشان خاطر تعرف تهتم باللى حواليك
انا بس جيت اسلم عليك لان بقالى فتره مجتش عندك وافكرك رغم انى عارفه انك فاكر
ربنا يحفظك ويديك كل حاجه حلوه
تحياتى

شاب فقرى يقول...

ستار
:)
اخبارى الحمد لله تمام وميه ميه :)
فى شوية مشاكل
بس بحاول اتخطى كل دا بالناس اللى بتقف جمبى وبنفسى :)
ستار
يارب يسمع منك ويسعدك :)
نورتى يا ستار
شاب فقرى

شاب فقرى يقول...

سلمى
فيكى الخير والله
:)
عارف انك فاكرة
الناس الطيبين مبينسوش ابدا :)
ربنا يحفظك ويعزك
شاب فقرى

Sarah Sobhi يقول...

i did once you've asked aslan :D
and here it is

شاب فقرى
نورتنى بحد :)
انا معاك ان دى طبيعة بشرية
بس زايده فى مصر حبتين

و على فكره موضوع الاخطبوطات ده حقيقى :D
و هى كائنات تستحق الدراسه بجد
و بعدين موضوع ال 8 أرجل ده مش الحاجه المبهرة ابدا لو شوفت قدرتها الرهيبة على التخفى :)

شكرا يا فندم :)

wana a3adt a3sor fe mo5y we afteker ya rabby so2aal eeh :D

wel 8 arms byt7akem feehom 3an taree2 gehaz 3saby motatwer zay ma7na bnet7akem fe swabe3 edeena el 10 fe wa2t wa7d :)

شاب فقرى يقول...

سمسم
نصيحة كدا
عشان تفيدك فى التحقيقات والحاجات الكتير دى
اتعلمى اسلوب
يسرى فودة
ادخلى اليوتيوب واكتبى سرى للغاية
وشوفى الحلقات اللى عاملها
والتحقيقات بتاعته
هتنبهرى
انا هفتح نمرة خاصة يوم الجمعة على فكرة
وهيبقى فى تبرع بالدم
فكرى
وانا مستنى رد طبعا :)

فقرى

شاب فقرى يقول...

سارة
بس انا مش بعرف اتحكم فى صوابعى العشرة كلهم بشكل كامل
مش زى الاخطبوط طبعا
والله انا نفسى اشوف له مثال
الا هوا انتى جبتى اللى بتشرحيه دا منين ؟
ها ؟
:D

حاجة غريبة اوى
انا بتمنى اشوف اخطبوط واحد
وفى غيرى بيشرحه عادى خالص كدا :))
دنيا
ههههههههههههههههههههه
بس انا اللى كسول مجيتش اشوف الرد :P

نورتى يا سارة
زورينا كتير بقى
شاب فقرى

Sarah Sobhi يقول...

:))))))))

3lafekra lessa da5el el canah mn sanateen

we shaklo mosh mobher awy mosh zay elly bygy fe tom& Jery :D

we 3lafekra bttakel zay el sepia aw el ''sopeet'' 3shan law bt2ol 3aliha keda ya3ny bas ar5as mnha bekteer 3shan lessa ma7adesh 3arfo awi :) hab2a ageblak zeyara fe marra :P

lamma agy tany ;)

شاب فقرى يقول...

الاخطبوط فى القناة بيعمل إيه ؟؟؟
يالهوى
بيتباع فى السوق زى السبيط وانا معرفش
أهوه دا بقى الجهل البيولوجى اللى انا واقع فيه :((
بيتباع وانا معرفش :((
وكمان فى منه فى قناة السويس :(
ودا كله ومعرفش
:)
هستنى زيارتك القادمة
فقرى

جارة القمر يقول...

الف مبروك لشيما وربنا يتمم لها على خير يارب

كل سنة اونتى طيبة يا سكرة و مبروك مقدما

مبروك ليك على الجايزة بقى :)

ازيك يارب تكون بخير

Sarah .. يقول...

مساء الفل يا كريم :)
ازيك واخبارك ايه ؟؟
وايه الغيبة الطويلة دى .. كنت مستنية البوست الجديد

ربنا يشفى جدتك ان شاء الله وتقوم بالسلامة ويشفى جميع مرضى المسلمين .. امين
والف مليون سلامة عليها

بالنسبة للخطوبة والفرح وكدا .. ف بشرى خير شيما وسكرة اهو .. ان شاء الله انت وراهم قريب
بس متنساش تعزمنا :)

باذن الله مش هيحصل حاجة وهتحضر اللقاء .. ربنا يقويك ويكرمك يارب
ربنا معاك

ابقى طمنا ع اخبارك وع جدتك
سلامووز :)

Sarah .. يقول...

مساء الفل يا كريم :)
ازيك واخبارك ايه ؟؟
وايه الغيبة الطويلة دى .. كنت مستنية البوست الجديد

ربنا يشفى جدتك ان شاء الله وتقوم بالسلامة ويشفى جميع مرضى المسلمين .. امين
والف مليون سلامة عليها

بالنسبة للخطوبة والفرح وكدا .. ف بشرى خير شيما وسكرة اهو .. ان شاء الله انت وراهم قريب
بس متنساش تعزمنا :)

باذن الله مش هيحصل حاجة وهتحضر اللقاء .. ربنا يقويك ويكرمك يارب
ربنا معاك

ابقى طمنا ع اخبارك وع جدتك
سلامووز :)

Cute Kitty **sookra يقول...

كريم ربنا يكرم اصلك وانت متأكد انك بتوصفنى انا يعنى انا فيا الحاجات الحلوه دى
ياخراثى عليا وانا مكسوفه
ثم تعال هنا ايه فقرى وموش هاحضر الفرح والكلام دا
لالالالالالالالالالالالا انت عاوز تزوغ من الفرح دا بعينك يابابا فوق موش سكره اللى تسمح لاحد اصدقائها انه يزوغ كده
هتيجى يعنى هتيجى
وهى كلمه واحده وموش هاكررها

شفت اتعلمت الشكم انا كمان اهو
ههههههههههههه
وبعدين تعال هنا تانى عشان املص ودانك انتى يابنى اللى هترتبط بيك يبقى مامتها دعيالها ليله القدر وهى وانت والمعازيم واللى انا من اوهم هنكون فى قاعه واحده
ولاهى مصاريف وخلاص انت داخل على جواز يابنى ولازم تلم ايدك فى المصاريف شويه
يالهوى عليا لما برغى موش بتسد
كريم حاجه كمان الف سلامه على جدتك وربنا يطمنك عليها ويشفيها ويعافيها
هى وجدتى كمان
اتمسى بالخير

شفـقــة و إحســــان يقول...

مبروك لكل الناس دى وطبعا ربنا يكرم خيخا ويجعله فى ميزان حسناتها
وربنا يشفى جدتك يارب ويقومها بالسلامة

ghada mOhsen يقول...

اول شى ... ربنا يقوم جدتك بالسلامه يااااارب وترجع للبيت ...

وربنا يصبرك ويقويك ان شاء الله ..

بجد بحييك على روحك الجميله دى ...
وطبعا ربنا يجازى نوران على الخير اللى ده ...
والف مبرووووك لشوشو ويارب يتمملها على خير ...
ومبروك لسكره برضو وعلى خير ان شاء الله ...


وعقبال ياسيدى لما نباركلك ان شاء الله بأحلى بنوته :)

بس المهم ماتقولش على نفسك كده ...
وانت كنت فى اعلام وسيبتها من سنه تالته ؟؟؟؟
مش هاعاتبك طبعا .. لانى معرفش ايه الظروف اللى خلتك تعمل كده ...
بس عموما ربنا يوفقك فى اللى اخترته ...

ربنا يسعدك ان شاء الله ... ويارب تقدر تروح يوم الجمعه ..

دمت دائما مخلصا محبا للحواليك ...

... ;) ,,, ;) ...

آيوشة يقول...

ازيك ياكريم
االف سلامة على جدتك ربنا يتتم شفاءها على خير
والف مبروووووك لكل اللى اتخطب واللى اتجوز وعقبالك يارب
واما بالنسبة للقاء ربنا يقدركم دايما على فعل الخير وجزاكم الله خيرا كلكم وربنا يتقبل يارب

غير معرف يقول...

كده ما جيبتش سيرتى ولا انى وقفت معاك وجيبتلك اتنين كيلو طماطم وبعتهملك على الميل :D

بهرج يا كيمو عامل ايه وحشنى والله

ألف سلامه على جدتك وربنا يقومهالك بالسلامه ان شاء الله

قيس بن الملووووح يقول...

نحن في حاجه الي رايك في مشاكل القراء علي مدونة "دقات قلب بعد الخمسين"

قلم رصاص يقول...

ألف سلامة على جدتك ياكريم
وربنا يقومها بالسلامة ان شاء الله

انت اخبارك ايه يابني
من زمان معرفش عنك حاجة
يارب تكون بخييييييييير

تقبل مروري وتحيتي

ليس فقيرا من يحب يقول...

ازيك ياكيمو

الف سلامه على تيته ربنا يقومها بالف سلامه

والف مبروك لشيما وعقبالك يااااااارب

وربنا يعينكم ويوفقكم فى اللقاء

وايه تانى

كفايه كده

ربنا يسعدك يااااااااااااارب

سمع هوص (Abo 3li) يقول...

سلامة جدتك يافقري,,
كان نفسي اروح اللقاء... علشان اشوفكم كلكم... بس للاسف انا يوم الجمعة خارج القاهرة ... سلامي للجميع...


وعقبالي انا كمان ياعم الحج...

تحياتي ياباشا

طلباوي يقول...

السلام عليكم ورحمة الله وبركاته

بجد مدونتك جميلة جداً

مجهوله يقول...

الف سلامه على جدتك ربنا يشفيها ان شاء الله ويطمنك عليها
اسعدنى جدا التواصل معاك
تحياتى
مجهوله

غير معرف يقول...

ألف سلامه على أنا يا جميل

و متشكرين اوي على نشرة الأخبار السريعه دي

عايز اقولك اني اول مره يمكن آجي مدونتك .. و بجد فرحت اني جيت هنا .. سمعت عنك كتير قبل ما آجي .. و أخيرا جيت .. و هقرأ البوستات اللي فاتت بعد اذنك

يا ريت تنورني و تشرفني هنا

http://ahmedabdulmohsin.blogspot.com/2010/01/blog-post_25.html

من غير تريقه .. لسه في كي جي تدوين