الثلاثاء، 23 فبراير 2010

حلم الطيران



هذه التدوينة تحمل أحلام طفولية وتحمل تأملات عقلية ومجرد مناقشة بين شخص ونفسه عن أحلام الطفولة وعن الغد
وكيف يحقق هذه الأحلام ؟؟؟
ومشكلة أحلامنا المستحيلة
وتعارضها مع الواقع
وهل حقا يوجد أحلام مستحيلة ؟
أم نحن من نقرر أن نجعلها مستحيلة أو سهلة المنال ؟
وهل سهولة الحلم تجعلنا ننسى أن نحققه
فيتحول مع الأيام إلى حلم مستحيل لفوات أوان تحقيقه ؟

قبل أن تقرأ
عليك أن تغمض عينيك
تتذكر طفولتك
وكل أحلام الطفولة
وتتذكر كيف كنت تفكر فى أحلامك وتتمناها ؟
إن لم تستطع
فبرجاء أغلق هذه الصفحة
شاب فقرى
***

سبحان الله
نفس الفكرة
لما كنت بسمع زمان فى الافلام والمسلسلات البطل بيقول نفسى أبقى بحار أو طيار كنت بقول الواد دا عبيط ؟؟؟
ليه عايز يبقى كدا ؟
هوا احساس الطيران حلو
وكذلك ان الواحد يبقى فى البحر
أصل البحر دا عامل زى السما بالظبط
بتحس إن ملوش نهاية وإن إنته فيه ولا أى حاجة عايش فيه زى السمكة
انته مش اكبر ولا احسن منها بالعكس هى أحسن منك :D
هى عالاقل متأقلمة مع الكيان الكبير دا
بس برده مكانش الغرض من اللى بيقول كدا هوا إنه يبقى بيطير أو بيعوم
أنا مفهمتش الغرض دا غير لما زهقت وقعدت لوحدى كتير كتير لدرجة انى مش بشوف حد خالص فى حياتى
حابس نفسى بين أربع حيطان
قد إيه بحسد أى حد بيعرف يعزف على أى آله موسيقية
زمان كان نفسى يبقى عندى كمنجه مش عارف ليه
وكان نفسى أعرف أعزف عليها
بس موصلتش لحاجة لأنه مكانش ينفع
حتى أساتذة الموسيقى كانوا بيفرجونا على طول على الآلات دى من بعيد لأنها عهدة ومينفعش نبوظها
هوا الصراحة مدرسة الابتدائى كان فيها أبلة موسيقى
وكنت شاطر أوى فى الخناق معاها
بس الفكرة من السفر أو العزف هوا إن الواحد ينتقل بين أكتر من ميت عالم مختلفين
يمكن لما بسافر جوا مصر هنا فى اى مواصلة بحس بالملل احيانا من فكرة السفر دى
لأن السفر على طول مصاحبه ليه فكرة إن جسمك هيتكسر فى الآخر
لكن لما يبقى فى مركب أو طيارة
هيبقى فى كلام تانى
هيبقى فى إحساس بالتنقل بين مليون مكان فى لحظة واحدة
حتى بيتهيألى ميه البحر بتتلون بشكل تانى كل شوية
إحساسك بيها ومنظرها بيتغير
يعنى أنا كل أما أسافر فى حته وأشوف البحر بحس إن لون الميه بيختلف
مرة أزرق ومرة أخضر ومرة سماوى ومرة أسود بليل ومتشوفش فيه أى حاجة
الغموض دا كله
هيخليك تحس بمليون إحساس
يمكن حتى أما ببص للسما فى الشتا وبشوف هى قد إيه مليانة غيوم وعاملة أشكال
زمان لما كنت عايش فى أكتر مكان بحبه كنت بعرف أبص للسما وأشوف فيها أشكال حلوة أوى
أحيانا كنت بشوف أسد وأحيان تانية كنت بشوف تنين زى اللى بيطلع فى الأفلام
وأحيان تانية بشوف طيور
كل دا فى السحاب
مكنتش ساعتها قادر أتخيل منظرى لو أنا طاير وقدامى منظر من دول وهوا إنى شايف قدامى تنين أو راس أسد أو حتى راس بطة
ياترى لو طاير فى وسط الأشكال دى ياترى اللى تحت هيشوفنى عامل إزاى ؟
ياترى الناس هتحس بإيه لما تشوفنى طاير بعدى أميال فى ثوانى وهما واقفين فى مكانهم بيصوروا منظر الطيارة فى الذاكرة عندهم وعاجبهم أوى الخط اللى بتعمله الطيارة فى السحاب
ومبسوطين لمجرد أنهم شايفينها
عارفين نفسس فى إيه بجد ؟؟؟
نفسى أبقى طيار :D

***
تكملة عقلية (( تقريبا فصلت فى النص ))

يمكن كل اللى قلته دا بيتعارض مع فكرة الجواز وبينفى فكرة الإستقرار والعيلة
إزاى أسرة هتعيش مشتته
ويا سلام بقى عالستات المصريين هتشك فيه كل أما أرجع البيت
هتشم القميص وتقولى إيه البرفان الحريمى دا
متناسية تماما إنى بقابل بنات برا وبنتكلم
وتدايق أوى لو شافت شعرة على كتفى مع إن دا عادى وطبيعى ومحدش يقولى ليه عادى وطبيعى ؟
طيب وهتقعد مع أسرتك دى قد إيه وتسافر قد إيه ؟؟؟
دى مشكلة

****

عودة مرة أخرى للخيال
عارفين فكرة العيش جوا عربية متنقلة ؟
اللى بنشوفها فى الأفلام الأمريكانية
واحد وواحدة عايشين جوا عربية وبيترحلوا من مكان للتانى
عارفين الفكرة دى ؟
أهوه أنا بفكر يكون عندى نفس النظام دا بس فى مركب أو طيارة :D
تخيلوا معايه واحد عايش جوا طيارة ومعاه المدام والأولاد
المنظر بحاول أرسمه صعب أوى
يعنى الطيارة مش هعرف أركنها فى أى حته
ومن هنا بنادى بوجود مطارات جوية الواحد يركن فيها الطيارة
بحيث يكون فى مطار مثلا فوق مصر
الواحد يركن طيارته فى المطار اللى فوق مصر وينزل بطيارة أصغر جوا مصر يلف بقى مثلا يروح يقعد فى العشوائيات شوية
أو ينزل يروح فيصل
أو يروح يقعد قدام وزارة الداخلية
غلاسة مش أكتر مش حبا فيها
أو يروح يلف فى وسط البلد ويركن الطيارة فوق أى عمارة
ونرجع تانى بقى للمطار اللى فوق والطيارة اللى فيها المدام والأولاد
ونرجع بقى نلف العالم
أنا عن نفسى تانى بلد هروحها هتبقى هولندا
وبعدين لندن
وبعدين عايز أروح الهند أشوف تاج محل
ومنها هطلع على جبالل الهيمالايا
ليه
عشان إسمها عاجبنى
ويمكن أروح التبت
أو روسيا
عشان أحس بمعنى البرودة على حق ربنا
وبعدها أطلع على لوس أنجلوس
آه صحيح نسيت
أنا نفسى أروح واحة سيوة :D
بس برده نفسى أروح جبال أطلس فى المغرب
مش عارف ليه كل أما أتخيل منظرها بفشل
مش عايز أجيب لها صورة من عالنت عشان الصورة اللى فى خيالى مش تتحطم
ونفسى بعد كل دا أروح البلد اللى بيلعب فيها مانشيستر يونايتد
ليه مش عارف
يمكن عشان أشوف ماتش كورة وأنا أساس مبحبش الكورة وأروح هناك أقعد ألف وأشوف الأطفال الحلوين بيجروا ورا بيكهام عشان يمضى لهم عالتيشرت
مع إن بيكهام مش بيلعب فى مانشيستر وكمان لما بيشوف أى أطفال مش بيجرى وبيمضى لهم عادى
:D
وبرده نفسى أروح مكان بعيد كدا بعيد عن كل الناس مفيهوش حد
يمكن صحراء أبو ظبى
وبرده نفسى بجد أطير فوق دبى ويمكن أقضى فيها أسبوعين حلوين كدا
بس مش عارف ليه اللسته دى كلها مفيهاش لوس أنجلوس
يمكن عشان بسمع إن الأمريكان بيحبوها أوى وأنا مش بحب كدا
مبحبش أروح مكان الناس كلها بتتهافت عليه لسبب واحد بس
إنه هيبقى زحمة وحاجة تخنق ودى حاجة تشل
بس كدا
ياترى فى أماكن فى دماغى تانى
؟؟؟؟
مش عارف
***
تكملة عقلية (( فصلت وفقت تانى )) ...
طيب اللى هيسافر السفريات دى كلها هيجيب فلوس منين عشان بنزين الطيارة ؟ ؟؟؟
وأكل العيال والمدام اللى هتبقى بتشترى من كل بلد حاجة
أنا عندى فكرة أحسن
أنا متجوزش خالص
وأعيش فى الطيارة دى لوحدى
يكون أحسن :D

وبرده لو سألتنى نفسك تبقى إيه ؟

هقولك نفسى أبقى طيار :P

هناك 18 تعليقًا:

riri يقول...

اصحى اصحى عمو جاب موز :p
لن تتخيل انا كنت بجرى ورا النت دلوقتى ازاى كنت عامله زى اللى بتلاحق النت عشان احلق يبقى اول تعليق ودى فى حد ذاتها معجزه عشان فى المدونه بتاعتك
نرغى فى الموضوع
انا ااقولك انا بقى بش نفسى ابقى طيار مع صيغه المؤنث طبعا انا زمان ومن صغرى وانا نفسى كنت ابقى حمامه وليا جناحات وبطير زى الحمام اللى بيطير كنت بسرح زيك كده فى السما وكان شغلنى اووى الحمام والقمر وانوا بيجرى معايا لما بجرى ولما بمشى يمشى معايا ولما اسرح وانا زعلانه كنت بشوف القمر مبوز عيله بقى
ولما كبرت شويه عرفت ان بش ينفع نعيش فى السما اتمنيت ان انا اعيش فى البحر وان اجيب مركب صغيره مكونه من قطع خشب وانام فيها وابقى فى وسط البحر ويفضل برضو بصه للسما
وكان نفسى يبقى عندى جيتار ويبقى صوتى حلو بغنى يعنى انا صوتى حلو بس يطرش بس اللى يسمع لو غنيت عشان كنت على طول بحس اللى بيعرف يغنى ده اكتر حد بيعرف يعبر عن اللى جواه
بس بحمد ربنا ان انا عندى مواهبه برضو فى غيرى بش عارف يحب ايه
سيبك برضو من الرغى ده لو حصل وبقيت طيار اول رحله عليك :p
اول تعليق اهو اى خدمه مع انى مخاصمه النت كلوا

صيدلانيه طالعه نازله يقول...

باحب انا الافكار المجنونه
و باحب اكتر ان الانسان يفكر عشان يحققها
و على فكره حتى لو حقق منها جزء صغير حيبقى برضه مبسوط و راضى

انا نفسى قوى اروح الهند و هاواى و دبى
لانهم بجد بلاد جميله قوى و فيها مناظر حلوه
و يا سلام لو فضلت فى الطياره و فضلت تتفرج عليها من فوق كده

كنت حانسى
انا لغايه دلوقتى باحب ابص على السحاب و اتخيل الاشكال اللى بيعملها و برضه ببقى مبسوطه و انا باستخلص منها اشكال و افضل افرج ولادى عليها و هما كمان يورونى اشكال جديده و نفضل نضحك على الاشكال

لو طلعت انت طيار ياريت ابقى معاك فى اول لفه
و الصف اللى قدااااااااااااام


هههههههههههههههههههههههه

شاب فقرى يقول...

ازيك ياريم
كويس والله انك افتكرتى تسيبى لى تعليق اخيرا كل بوست
وكمان التعليق الاول
ايه الهنا اللى انا فيه دا يا ولاد
طبعا سمعتى نصيحتى اللى قلتها قبل كدا
لما سالتينى فى البوست اللى قبل قبل دا
قريتيها ؟
طويب

انا عجبانى اوى فكرة الحمامة والقمر دى
انا كنت زمان برده بجرى
واقول لو جريت القمر هيفضل فى مكانه ولا هيتغير مكانه
فبلاقيه بيحرى هوا كمان
فببص له وبركز معاه لحد ما اتكعبل واقع
واقول انه اسرع منى :(
لما فكرت زيك كدا فى فكرة البحر خفت من الفك المفترس :D
اصل الافلام دى كانت كتير اوى وانا صغير
وانا اساسا مش بعرف اعوم
فكانت مشكلة بالنسبة لى :(
انا برده فكرت فى الجيتار وكنت هعمل سيرش عالنت عشان اشوف مراكز لتعليم العزف فى القاهرة
مش عشان حاجة
عشان اعزف لنفسى بس
يا ستى لو بقيت طيار تأكدى إنى هاخد ناس كتير اوى اوى فى اول رحلة
لدرجة ان الطيارة مش هتستحملنا وتقع بينا :D

ههههههههههههههه
نورتى
صحيح
تتمنى اول رحلة تبقى فين ؟
فقرى

شاب فقرى يقول...

صيدلانية
يا ولكم يا ولكم

انا حطيت الاماكن دى انى نفسى اشوفها من فوق ونفسى برده اركن فى المطار الجوى وانزل اشوفها من تحت بقى واتمشى فيها

انا اخر مرة اتخيلت عملاق كبير اوى
كنت فى اليكس وكنت قاعد فترة هناك
كانت ايام

ان شاء الله هبقى اعزمك انتى والعائلة على أول لفة بعون الله
نورتى جدا :)
فقرى

sony2000 يقول...

احلي حاجه فعلا الخيال والواحد يحقق الخيال دا واحلامه
وانا كان نفسي من وانا صغيره اني الف العالم واشوف كل الثقافات والناس فالعالم كله بيعملو ايه
نفسي احقق حلمي دا ان شاء الله
تقبل مروري وتحياتي

حبات التوت يقول...

امممممممممممممم
ياااااه فكرتنى بزماااااااان وباحلام الطفولة ام ضفرتين
انا باه كان نفسى اطلع عالمة فللك
اطلع الفضا اركب مركبة فضائية واروح القمر واروح المريخ وبلوتو
كنت بحب اوى بلوتو دة مش عارفة لية

كان نفسى اطير اطير وحتى لو مش طرت فوق فى الفضا مش جاذبية وهفضل طايرة

فضلت متمسكة بالحلم دة لحد 3 اعدادى هههههههههههه ولما دخلت ثانوى وعرفت انو عشان ابقى عالمة فضاء لازم كلية علوم اللى بيدخلها مليون واحد واجيب تقدير عاللى اوى وان الكلية دى صعبة واروح اكمل درسات برة اعد يجى عشر سنين
يالهوى يالهوى لقيت ان الحلم بيبعد مرة واحدة وبقى مستحيل وفى الاخر بقى حلم ..كان فعل ماضى مبنى على الفتح

بس بجد كان نفسى اطلع الفضا واشوف الكرة الارضية من شباك الكوك الفضائى

استكفيت انى ابص للقمر بس من شباك العربية واقول ياماما القمر بيمشى معايا يلا يابابا امشى بسرعة عشان مش يسبقنا
كان نفسى يبقى عندى بيانوا واعزف الحان واعيش فى الجو بس هنجيب بيانو منين ولية وهوة فى مكان فى البيت للدولاب عشان يبقى فى مكان للبيانو

حسستنى ياكريم ان الجواز بس هوة الممشكلة الوحيدة اللى عشانها مش عارف تبقى طيار ههههههه

يلا باى انا بقيت برغى كتير الايام دى

r يقول...

السلام عليكم يا كريم
واضح انك طاير فوق اوى ودا حلو عشانك لان الحلم اذا ماكنشى مستحيل وصعب يبقى اى حاجه تانيه عاديه بالنسبالى وحكايه عاقل مش عاقل مش هتفرق كتير -- انت فصلت كتير ودا اللى ماكنشى حلو لانك لو عايز تحلم احلام سعيده المفروض ما تفصلش وتفكر فى الى هيبوظها

الطياره لسه ما جربتها- بس جربت السفر داخل مصر محافظات تانيه كويسين
وبعاد عن بعض -- الفكره نفسها السفر
حاجه جميله جدا بصرف النظر عن التعب كله بيتنسى الا متعه السفر والاماكن
ما بتتنسيش

اما السفر بباخره انا بجرب المتوافر وهى الرحلات النيليه والمراكب فى النيل هوايتى وبنفذها كتير


------------------
اديلى فتره مش عارفه اكتب تعليق صفحتك دايما تعلق فى التعليق معايا
ان شاء الله تتكتب دى عشان مش هعيدها تانى الصراحه
دمت طيب

VÖltaa يقول...

الخلاصة من كل الحلم الجميل ده

انك متتجوزش :)

على فكرة
انا نفسى ابقى طيار
بس للأسف اما جيت طيران اقدم لأن اقصى حد للطول 170سم
وانا اطول من كده ب15سم
فالحل الوحيد
انى اشترى طيارة

معاكش كام مليون سلف اجيب بيهم طيارة ؟

ستيتة يقول...

وتدايق أوى لو شافت شعرة على كتفى مع إن دا عادى وطبيعى ومحدش يقولى ليه عادى وطبيعى ؟

طيب ازااااااااااااي مسألش
دي سنوفتي طولت سبعة متر علشان اعرف
قال محدش يسألك قال :)

جميل ان خيالك بيروح بعيد كده
خليتني اسئل نفسي فين الأحلام المستحيلة؟

بس انت فعلا متتجوزش
ولزيادة توفير نفقات الطيارة
ممكن نعمل جروب
وتبقى الطيارة لناس كتير
ويعملوا جمعية
ويجيبوا البنزين شركة

السفير يقول...

بقولك أية سيبك أنتا....
أنا نفسى أطلع متسول بيكسبو فلوس على قلبهم أد كدةوالطيار بيلف الدنيا والبحار برضة بيلف الدنيا لكن المتسول بيلف على كعوبة لما يجيلو أشف (وللأشف) أنا حلمى واضح
أترى أشف جيوبى بأشف كعوبى

فراشة يقول...

ياااااااه بجد كنت محتاجة حاجه تشيلني من الواقع وتخليني اسرح ف الأحلام الجميلة بتاع الطفولة دي ..دا انا غمضت واقعدت افتكر كنت هنام من كتر الأحلام :)

انا برضه كنت بتابع السما ولحد دلوقتى مع اننا نقلنا ومبقتش اشوف السما كتير,وبزعل جدا لما ببقى راكبه مواصله واشوف رسمه ف السما والعربيه تمشي بسرعه ملحقش استمتع بيها

كان نفسي اعيش ع القمر وانا لابسه بدله الفضاء ولوحدي وكنت متخيله انى هشوف الناس من فوق

وعن احساس الطيران جميييييل طول عمري نفسي اركب طياره لحد ما ربنا استجاب وركبتها كتيييييير ويارب اركبها تاني كتييييير احساسي انى شايفه السحاب تحتي مش فوقى وبدخل ف السحابه كأنها غزل البنات او قطن لونه ابييييض ناصع
بجد احساس جميل ..كنت هقدم ابقى مضيفه بس انا قصيره :) وكمان عايزين واسطه
واكتر شكل بشوفه ف السما جناح واحد نفسي الاقي جناحين مره

وانا صغيوره كنت نفسي عمي يعلمنى الكمنجه جدا وكان بيقولي صعبه
لحد ما دخلت الكليه واخترت تخصص "كمان" كمنجه يعني .. وطبعا بيانو وجيتار والات تانيه كمان " بغيظكم بس " :)

تعرف انا ساعات بنام ع السطح عشان احس انى نايمه ف حضن السما وسط القمر والنجوم

بس كفاية اكمل الباقي مع نفسي P:

غير معرف يقول...

هههههههههههههه
والله فوكيرة حلوة اوى

انا زماااااااااان كان نفسى فى حاجات كتير يعنى ايام ما كنت اقرا روايات خيال علمى اتخيلت ان نفسى اكون رائد فضاء او عالم جيولوجيى ينزل تحت الارض ومغامرات زى اللى بقراها او حتى عالم فى الهندسة الوراثية

بس تصدق حلوة اوووى فكرة الطيار دى

بس تصدق نفسى اووى اعيش حياتى بطريقة تانية بقى اصحى على سابعة كده واشغل الاب توب واخد شاور وافطر والبس وال mp3 فى ودانى وانزل واركب العربية و اروح الشغل وعاوزة الشغل يبقى ممتع ولذيذ وفيه مغامرات وتغير وسفر وفى النص البريك غدا وعلى المغرب كده ارجع البيت وانزل بالليل مع صحابى او اقعد فى البيت وبعدها اقعد ترفيه على اللاب ويكون فيه ويك اند
والبيت يكون باستيل عملى وحتى شغلى وطريقة لبسى وحياتى تكون عمليه
طبعا الحياة دى لا تنفع لبنت لوحدها ولا تبفع فى المجتمع ده ولا اى حاجة يعنى الحلم ده فشل بشكل ذريع ههههههههه

انا وصغيرة كنت حاجة ودلوقتى حاجة لما كنت صغيرة كنت بتكلم براحتى وبهزر واقعد مع الناس عادى مكنتش اعرف يعنى ايه الواحد يتكسف او يتعامل بطريقة معينة عشان المفروض كده

بس سيبك انت الحياة لوحدى او مع الناس عايشها بالطريقة اللى بتمناها او بطريقة عادية المهم الواحد يكون مرتاح وراضى عن نفسه

صحيح
اخبارك ايه :D

Sarah .. يقول...

صباح الفل يا كريم

مش عارفة ليه اول ما قريت عنوان البوست .. روحت اتفرجت ع اسف على الازعاج :)

انت قولت نفسى ف حاجات كتير اوى ف البوست دا
يارب يجى اليوم اللى تحقق فيه اول حلم فيهم وان شاء الله قريب :)

احساس حلو اوى انك تفصل وتسرح بخيالك لاحلامك وتحاول ترسمها وتستمتع بيها .. حتى لو كان حلم طفولى طالما لسه قادر تحلم .

بالمناسبة
انا حلم من احلامى انى اروح لبنان
لو هتعدى عليها, ابقى خدنى معاك بليز :)

بجد بيعجبنى طريقة تفكيرك وافكارك جدا :)
تحياتى

خواطر شابة يقول...

لو بطلنا نحلم نموت فانت احلم براحتك عشان تقدر تعيش الواقع بما فيه

Ana keda يقول...

ههههههههه
حلو اوى كده ع فكرة انا فاكرة انى كتبت كومنت امبارح بس مش موجود مش مشكلة شكلى اتسطلت
موض1وع القمر ده فعلا كلنا مرينا به وبما انى انا الى كنت فى البيت بنزل اجيب الطلبات لكل اخواتى وانزل على اتفه طلب يعنى كنت باخد السكة جرى وانا باصة لفوق عشان اسبق القمر بس بعدها تعبت لانه كان بيكسب علطول

كان نفسى بقى ابقى رجلى طويلة زى الرجل بتاع السيرك ظنا منى يعنى انى كده هاخد الشموار فى ثانية هى خطوتين واروح الحتة الى انا عاوزاها بس كانت ايام والله حلوة اوى برغم سذاجتنا وبساطة مطالبنا جدا

وبرضو كنت بعمل المركب الورق واخليها فى المية وكل مرة كانت بتغرق :)

موضوع الكمنجة ده بجد لسه فى دماغى جدااااا وبفكر فيه بشكل جدى والله لانى بعشقها اوى وعندى ميوزك حلوة اوى ليها بس يا رب مطنش

كل سنة وانت طيب صحيح ومبسوطة انك جدع مش كلام وبس

فشكووول يقول...

ما توجعش دماغك يا فقرى
نافوخك كدا حيوجعك
ما تفكرش كتير
ام كلثوم بتقول
يا حبيبى كل شيئ بقضاه
لو كلنا حنطلع طيارين .. امال مين اللى يشتغل زبال وكناس

عارف انا كان نفسى اطلع ايه .. ما تضحكش .. كان نفسى اطلع نجار وحتى الآن احب النجاره .. ييجى قضاء ربنا واطلع محاسب .. شغله كلها ارقام وكلها وجع نافوخ ووجع دماغ ..

ربنا موزع الدنيا على كل البشر عشان التكامليه والتعادليه فى الحياه

تحياتى يا فقرى

Lady E يقول...

كل ده بوست بتهزر صح

هاجي تاني اكيد لما اقرأه

مش بمزاجى يقول...

خيالك جميل اوى
على فكرة كل حد فينا
جواها الانسان الخيال الحالم والاحلام البعيدة دى
احنا لو متخيلناش نموت
يمكن خيالنا يكون مستحيل
لكن كفاية اننا لسه بنتخيل
او قادرين نتخيل