الجمعة، 19 فبراير 2010

خلاص توتة إتجوزت





السلام عليكم ورحمة الله وبركاته


قد إيه الواحد مش بيعرف قيمة الحاجة إلا لما تروح منه


تعرفوا


يعنى لسه النهارده عارف إن البنت اللى كتبت عنها البوست اللى فات دا


اللى البعض إفتكرها فافى ومتدلعة


وهى فى الأساس إنسان بيحس اللى حواليه وبيقدر الحياة أوى


خير هام جدا


الأنسة توتة


إتجوزت من تلات تيام


آه والله


شوفتوا الصدف


مش هقعد بقى أقول إنى بالصدفة مسكت الموبايل القديم وقعدت أشغل أغانى وأفتكر القديم


لأنى فى موضوع الحب دا ببقى أعيل من أعيل عيل تعرفوه


خيالات وأحلام ومشاعر وحاجات كتير كدا


خلطة مكلكعة معقدة


زى ما كنت دايما أنا وهى


كنا دايما بنشوف الحياة بشكل مختلف
كانت مجنونة زيى

كانت بتفهم بفكر فى ايه على طول من غير توضيح ولا رغى ولا أى حاجة


مجرد أنها تبقى جمبى بتعرف على طول مالى


ببساطة كنت بحبها


بحبها أوى


أوى أوى أوى


وهى كانت مش عارفة هى عايزة إيه ؟


مكانش فى حد بيقدر يقنعها غيرى ...ولا كان يمكن تسمع كلام إنسان غيرى

وفاكر اليوم اللى إتقدمت فيها وعرفت من أخواتها إنهم قبلوا واحد تانى من تلات تيام

مش عارف إيه حكاية التلات تيام دى

وعلى رأى المثل ( الزن عالودان أمر من السحر )


وافقت وإستمرت الخطوبة الجديدة والحمد لله ربنا كرمها وإتجوزت


اللى مزعلنى إنى كنت عارف إنها فى الآخر كانت واثقة أوى إنها بتحبنى

دى الشخصية الوحيدة اللى عارفها أكتر من نفسى و أكتر ما هى تعرف نفسها


خلاص يا رجاله

خلاص يا بنات

عايز أكتب وأوصف كنت بحبها قد إيه


بس مش هيفيد بحاجة
وعايز أقول قد إيه أنا عملت عشان أكون جمبها


إستمريت فى مجال أنا بكرهه عشان خاطرها وعشان أقدر أقف جمبها

ولما روحت عملت شركة وشغل كامل فى اقل من تلات شهور وبقيت مبرمج محترم



ولما كنت بقف جمبها وجمب أهلها أكتر من اى حد فى الحياة



أنا زعلان عالحب



بس زعلان عالعشرة اللى كانت بينا أكتر



على رأى المسلسلات والأفلام ( العشرة متهونش على ولاد الأصول )



الواحد مبيطلعش فى دماغه الكلام دا غير لما بيقع فى موقف تمام يظبطه ظبطه سودا



توتة إتجوزت يا ولاد



لحد دلوقتى مش متخيل إن هى باعتنى بعد كل اللى عملته



وإنها حتى تجاهلت كل حاجة هى وأهلها



أنا عرفت بالصدفة وأنا ماشى فى الشارع



صراحة



مش عارف أقول الخبر صدمنى ولا مصدمنيش



بقيت ماشى طول الليل كدا مش عارف



هى كانت حقيقة ؟



هى كانت فى حياتى فى يوم من الأيام ؟



هوا أنا قضيت جمبها تلات سنين ؟



هوا أنا هلتزم بكلامى لما قلت لها لو رجعتى حتى بعد الخطوبة هفضل جمبك وأحبك ؟
هوا أنا قصرت فى إيه ؟



لما أحنا كنا ننفع لبعض ليه مش إتخطبنا ؟



أنا إفتكرت كل حاجة



كل حاجة مرت عليه فى حياتى



يحصلى الموضوع دا لما بتصدم وبحس إنه لازم قلبى اللى حب وعاش يموت من جديد



بفتكر كل لحظة قضيتها معاها



بحس إن فجأة رجعتلى كل اللحظات دى



إننا كنا ماشيين هنا إمبارح
وكنا بنتكلم الصبح



وكنا وكنا وكنا



حاسس إن مفيش وقت مر وإن الموضوع كان إمبارح



ملوش لزمة الكلام



المهم إنى متاكد إنى عملت اللى عليه ومقصرتش فى أى حاجة نهائى

الأيام اللى فاتت كنت عامل زى اللى حاسس إن فى حاجة بتحصل لحد قريب منه
أنا على يقين إن الموضوع هيفوت وأن كل حاجة بتمر وإن الحياة مش هتقف عند حد
ولا يمكن إن حد يموت عشان فارق حد تانى
والموضوع أساسا فات عليه زمن
بس...
مش مهم

وفى الآخر :



وعلى قد ما غيرتى مجرى حياتى



على قد ما هقدر أمشى وأكمل




شاب فقرى

هناك 44 تعليقًا:

Sam Sh يقول...

اللي باعك بيعه يا كريم ...
وزى ما إنت قلت .. الدنيا مبتقفش علشان حد .....
حاول تنسى الأيام اللي فاتت دي .. أنا عارف إنه شئ صعب لأني مجرب قبلك .. بس صدقني هتلاقي في يوم من الأيام البنت اللي بتحبك بجد و مستعدة بجد تعمل أي حاجة علشانك ......
ربنا يوفقك .

سارة درويش يقول...

بص يا كريم
يمكن هي ما بقتش ليك بس خليتك تغير في حياتك
وخلتك - زي ما انت قولت - تصر تكون مبرمج محترم في خلال 3 شهور بس

صدقني دا نصيب وهي ممكن اوي تكون زي اللي في غيبوبة مش مستوعبة اساساً انها اتجوزت
ممكن تكون عارفة انها مش سعيدة او مش دا اللي هي بتتمناه لكن بتنقاد لقدرها من غير ما تكون مستوعبة

ربنا يعوض عليك بحب اعمق واكبر وعشرة اطول

خواطر شابة يقول...

انت قلت الخلاصة في هاتين الجملتين:
وعلى قد ما غيرتى مجرى حياتى
على قد ما هقدر أمشى وأكمل
لان الحياة عمرها ما بتوقف على حد مهما كان غالي ومهما تصورنا اننا حنضيع بعده لانه في النهاية الحياة تستمر

سواحة يقول...

why ?
you will know after some time?
have faith and patient and God will show you why :-)
I hope by putting in words what is inside you
you will fell much better soon ISA

غير معرف يقول...

محدش ساب حبيبه وضاع وادينا خلاص بنتعلم

R-H-S يقول...

مش عارف ليه بحس ان دي من احسن المواقف اللي ممكن تحصل للواحد ممكن تكون قاسيه شويه بس بتكون مفيده كتير

عسي ان تكرهوا شيئا وهو خير لكم

Ana keda يقول...

:(
عارفة انت حاسس بايه كويس اوى اوى اوى اوى من هنا للصبح
وعارفة انك ساعة ما سمعت الخبر تنحت وحسيت ان فى شريط بيجرى قدامك من اول الحدوتة لحد اخرها
هقولك على حاجة انا اتعلمتها بجد
الحياة مش بتقف ولا حد بيدقر يعملها pause
بتكمل والى النهاردة مش متحمله بكره بيهون وكل حاجة بتعدى وانت فى غنى ان اى حد يقولك الكلام ده يا كريم
لانك ما شاء الله عليك دماغك حلوة اوى وبتعرف تظبط نفسك حلو

فكرتنى فى الحزء الاخير من البوست
بعمرو

عشاق كتير اتقابلوا عادى مكملوش
واهو كل واحد يعمل الى يريحه

متزعلش على حاجة حلوة انت عملتها لانك عملتها وانت من جواك كده وانت حاسسها كده
متزعلش على حاجة فاتت بجد افصل وارجع هى كمان فصلت وكملت
متزعلش على عشرة او اى حاجة فى زمن مبقاش يتزعل فيه على حاجة
اقف كده وقول انا جدع واحنا كلنا حواليك يا كريم اخواتك وبنحبك ومش هنسيبك لو حتى ايه
خد بالك من نفسك

أحمد عبد الحميد يقول...

ما أصعب جرح الفؤاد
أااااااااه
على فكرة إنت إتجرحت لما عرفت إنها إتخطبت بس كان لسه عندك أمل قليل بس لما عرفت إنا إتجوزت وإن الموضوع إنتهى تماما بقى الجرح عمييييق
معلش كل شىء بيعدى والدنيا بتستمر
عايز أقولك إن اللى بيكلمك ده حصل معاه موقف شبه ده من 10 سنين وماتقلقش الدنيا بتمشى بس كل شوية الجرح بتحس فيه بوخزة صغننة مهما مرت الأيامتحياتى يا فقرى (شكلنا كلنا كده)
:)

promise is promise يقول...

عسى ان تكرهوا شيا وهو خير لكم وعسى ان تحبواشيا وهوشر لكم والله يعلم وانتم لا تعلمون


كريم مش عارفه اقولك ايه بجد غير ان ما فيشحد بيتجوز مرات حد تانى ولا حد بياخد رزق حد

ومحدش يعرف الخير فين
قول الحمدلله

البنفسج الحزين يقول...

بص مش هاطبطب عليك ولا هاصبرك ولا هقولك بكرة هتنساها...
أنا هقولك كلمه واحدة بس
...الجواز قسمه ونصيب....
أنا طبعا معرفش تفاصيل الحكايه بس هافترض معاك انك كنت بتحبها وهي كانت بتحبك وانكوا ضحيتوا كتير وانت عملت اللي عليك وهي صبرت واتحملت ...وعملتوا كل اللي قدرتوا عليه عشان تبقوا لبعض ...
بس في الاخر اللي بيحصل هو ارادة ربنا انت مش مكتوب لها زوج عند ربنا وهي مش مكتوبالك زوجه عند ربنا...يبقي خلاص مستحيل كنتوا هتبقوا لبعض...

بوبو يقول...

شوف يا شاب مش فقري خالص.. انا مش هقولك الكلام بتاع الحياة هتستمر وكله بيعدي وما الى ذلك.. اصل الكلام دا رغم انه حقيقي جدا بس محدش بيحب يسمعه ، والواحد لما بيسمعه بيبقى غالبا مدايق من الناس اللي بتقوله ولاني مش عوزاك تدايق مني مش هقوله .. هقول العن منه.. ههههه
انا متاكدة ان هي خسرت كتير لما خسرتك.. جايز كسبت حياة مستقرة وربنا يكرمها ويهدي سرها عشان واضح انها انسانة كويسة.. بس اكيد برضه خسرت انسان بيحبها بجد.. وبعدين الراجل صعب عليه اوي يقول للي بيحبها واتخطبت لواحد غيره:لو رجعتى حتى بعد الخطوبة هفضل جمبك وأحبك .. طالما قال كدة يبقى حبه اكبر بكتير من احساسه بنفسه.. بس خلاص البكاء على اللبن المسكوب ملوش لازمة.. الحب والجواز دا نصيب ورزق.. وواضح ان رزقك ونصيبك لسه متحوشين عند ربنا.. ربنا يسعدك ويكرمك بذات الدين اللي تحبك وتصونك وتبقى عندها اغلى من الدنيا

Lady E يقول...

حلو اصرارك مع انه طالع من قلب موجوع بس هتنسى وهتبقى اقوى واحسن وهتقابل البنت اللي تستاهل حبك ومتبخلش عليك بحبها

اوعى تبكي على حد مش بيبكي عليك

ليس فقيرا من يحب يقول...

هيا دى الدنيا يا كريم

تقرب ناس وتبعد ناس

ناس نحبهم ويضيعوا وناس منترتحلهمش

يلزقوا فينا

النصيب هو اللى بيتحكم فى كل حاجه

فى الاخر احنا عايشين بننفذ اقدارنا

انت جبت المفيد اوى اوى فى الاخر

هاقدر امشى واكمل

علشان الحياه مبتقفش عند حد مشى ولو

وفقت بيقى مش الحياه اللى وقفت مخنا

او عقلنا او احساسناهو اللى ممكن بيقف شويه وبعد

كده بنقوم ننفض هدومنا ونمشى ونفرح

تانى ونزعل تانى ونحب تانى

ربنا يسعد قلبك ويريح بالك يارب

حبات التوت يقول...

.

SHAPE YOUR LIFE (ABOALI) يقول...

الحب عنوان كبير بيجمع روحين
ان لم يوفق الله بينهما يتمنى كل منهما للاخر السعادة الكاملة
هذا ان كان الحب صادق
وعلى قدر صدق هذا الحب تاءتى ذكرياته لتذكرنا اننا ضحكنا يوما هنا وتبسمنا يوما هناك
تلك الذكريات هى نفسها المستقبل الذى سيتم عليه بناء سعادة اخرى

وعلى قدر صدق الحب
يكون حال الانسان بعده
فاءن استثمر حبه فى فتح نوافذ جديده لنفسه كان فعلا الانسان العاقل المحب بقلبه وعقله

سيمر يقينا على الانسان لحظات انكسار نتيجة فقد حبه
ولكن تعجب من زواج حواء باءخرى بعد موت زوجها وكيف تبدء حياه جديدة
تعجب ممن فقد زوجته فى حادث ام لم يوفق الله بينهما
كيف بدء حياه اجمل

كما قولت الحياه مستمرة
استثمر ما فعلته فى شركتك ونجاحك لتنمو الى نجاح اعمق وارقى


وهو ده حال الشاب الفقرى
(وش بيغمز)

تقديرى

همسات ساكنه يقول...

الدنيا مش بتقف عند حد معين
بس أكيد اتعلمت من الموقف ده كله
وياريت يأثر عليك ايجابيا مش سلبيا

وزي مانت قولت انها خليتك تكون مبرمج ناجح فدي حاجه اكيد كويسه
بصرف النظر عن الموقف ككل لانه اكيد قاسي جدااااااااااااااااااااا
بس
وزي ما قال عمرو برضه :
" ونندم ع العشره الغاليه ونرضى بالمكتوب
والله ادى حال الدنيا بتفرق فى القلوب "

مجرد حلم صغنتوت يقول...

اكيد احساس صعب
بس يمكن بنحس الاحساس الصعب ده علشان نعرف نحس بعده احساس احلى من اي حاجة تانية بمراحل
الحياة لسه قدامك.. هتقدر تكمل ان شاء الله.. يمكن هتفضل فاكر فترة طويلة او قصيرة مش هتفرق بس المهم ان شاء الله هتعديها وهتلاقي اللي بتدور عليه واكتر في حد تاني تكمل معاه باقي الطريق

بالتوفيق يا كريم

غير معرف يقول...

البوست ده أكتر بوست وجعني و بكاني في كل المدونات اللي أعرفها!!!

اللي نساك إنساه واللي هواك إهواه واللي قدر فرقاك تقدر على فرقاه !!!

dr/shiko يقول...

بص ياكريم ، انا مش حقلك زي اي حد ان اللي سابك سيبه ، لانني عارف كويس ان الحب مش بايدينا وممكن اكون انا او غيرنا كتير مروا بتجربة زي دي او اخف و اوحش ، ولكن دائما حط في دماغك انك لما تحب حد حبله الخير في كل مكان ومع اي حد ، لان ده هو الحب الحقيقي ، انا مش عارف اعبرلك كويس علي اللي انا عايز اقوله بس اتمني ان فكرتي تكون وصلتلك .. وربنا يكرمك ببنت الحلال اللي تحبها وتحبك وتكون من نصيبك ...

dr/shiko يقول...

ايوه صح ، انا نسيت اعرفك بنفسي ، انا زميلك المدون شيكو شريك في مدونة الرحالةhttp://alr7ala.blogspot.com/
، ياريت تشرفنا في مدونتنا ، ونكون اصدقاء علي طول

Asmaa mahaba يقول...

معلش يا كريم كفايه انك تفتكرلها انها حمستك وخليتك احسن وناجح ومنغيرها مكونتش حتبقى كدا
اتمنالها الخير واديها عذرها
يا رب ربنا يعوضك عنها خير
ربنا ما يكتبها على حد يا رب ويعينك

هي وظروفها يقول...

ازيك يا كريم

حاسس بيك يا حبيبي والله

وعارف ان مفيش كلمه دلوقتي

يا حبيبي تقدر تريحك

وحاسس بنارك

بس اجمد شويه

وبلاش تفكر نفسك يا كرم

باغاني ومتمشيش ولا تروح يا حبيبي
مكان كنتم بتروحوه سوا
ولو عايز تنورني وتجيلي في اي وقت انا تحت امرك ورقم تليفوني هتلاقيه في بوست قبل اللقاء عند ستيته وفاتيما
لو حبيت تيجلي تغير جو ونتكلم انا تحت امرك

بس الله يخليك امسك نفسك وانت جوهره وبكره تكمل وتفرح وتنجح وتقابل اللي تقدرك وتبقي عمرك بجد
ربنا يديك الصبر ويلم شتات قلبك يا حبيبي

Asmaa mahaba يقول...

ربنا يحسن خاتمتنا جميعا يا رب ويهدى الاحوال

riri يقول...

بصراحه مقتدرش اعمل زى كل مره اكتفى ان انا ااقرا بس
وانا بقرا كلامك اتمنيت امنيه واحده بس وكل ماكنت ااقرا سطر زياده ااقول يارايت اكتر
يارايت الواحد يقدر الحاجه اللى فى ايده قبل ماضيع منوا يمكن انا بش ااقصدك انت ياكرملله
بس انا ااقصد حد يمكن حكايتنا شبيه للحكايه دى
وفى حاجه كنت ناويه اكتبها عندى بس يالا خليها علينا :p ((هو ليه لما بنحب حد وبنخاف عليه اوووى اول حاجه بنعملها ان احنا بنخاف عليه من نفسنا بنخاف نقرب ناذيه مع انى لو بعدنا قلبنا عنه بناذيه اكتر عشان هو بيحبنى بجد )))
بتمنى اللى فى بالى يدخل ويقرا كلامك مع انوا مستحيل بس عشان يعرف ان كل حاجه ليها نهايه فقبل ماتنتهى نهايه ولا تعجبوا ولا تعجبنى يلحق قبل ماكل حاجه تتضيع كده
ااقولك ايه بس والله كل كلمه انت كتبها فى البوست ده نفسى اخدها واخلى كل واحد يقراها ويتعلم منها
بش هعرف اعمل زى اى حد قالك معلش وحاول انسى عشان بش اتعودت ان اخلى اللى قدامى يكدب ولا انا اكدب عليه وااقولوا انك تنسى عشان ده عمر والعمر بش بيتنسى
راغيت بس طلعت كل الكلام اللى جوايا
بس تقول ايه انت اللى مع بعض اكتر من 4 سنين وخايفين يقربوا من بعض ليخسروا بعض ؟؟؟ هجى اسمع رائيك

غير معرف يقول...

كله نصيب الفراق نصيب واللقاء نصيب والحب والجرح كله قدر مكتوب

مش عارفة يمكن دلوقتى ملكش نصيب وده الافضل ليك
بس تفتكر لو جات لك فرصة ترتبط بيها بعدين هتوافق وهتكمل معاها ؟؟
ولا مش هتوافق عشان ارتبطت بغيرك مش هقول باعتك لان واضح انه كان فى حب ويمكن ظروف اللى خلتها ترتبط بحد غيرك

اهدى وروق وكله خير

sony2000 يقول...

بص ياعمنا انا موش هقدر اقول غير حاجه وحده
لوربنا كان رايد انك تتجوذها محدش علي وجه الارض كان يقدر يفرقكو...بس دي اراده ربنا
هو مخبيلك حاجه احسن فأنت تقول ايه:الحمد لله علي كل شيء سواء فالسراء والضراء...
"وعسي ان تكرهو شيء وهو خير لكم وعسي ان تحبو شيء وهو شر لكم"
تقبل مروري وتحياتي

منــار فايد يقول...

كريم هو انت كنت قافل التعليقات وبعدين فتحتها؟؟
أصلي حاولت كتير اكتب تعليق مش نفع
............
اقول ايه واعيد ايه....
متاكده ان عمر ماكلام اي حد هيهون عليك
بس اهو كلام بنقوله وخلاص
عشان ماينفعشي نبقى ساكتين
انت بتقول عملت اللي عليك معاها ومع اهلها
ومع ذلك راحت لواحد تاني
يبقى ربنا ماكتبشي نصيب
مش هاقولك جايز
عشان جايز حجات كتير اوي
احنا مانعرفعاش
الاحساس اللي انت فيه صعب جدااا

بادعيلك اوي
ربنا يقف جنبك علطول
ويديك قوه اكتر من كدا

غير معرف يقول...

اااه يا كريم

معلش ربك قادر ينسيك

صدقنى يا كريم انا تبعت زيك واكتر
لان مافيش حد بيقدر وانتا عارف

قد ايه عملنا وقد ايه اتصدمنا وقد ايه ماحدش قدر اللى احنا بنعمله

تعيش وماتأخدش غيرها تعيش ويجيلك اللى احلى ان شاء الله

هناء محمود يقول...

أنا قريت البوست غللى فات وده علشان أفهم

مممممممممممم

هارد لك

الحمد لله

بجد حاسة بيك إنت أكيد فى مشكلة كبيرة

بس أنا مش فاهمة إزاى تكونوا بتحبوا بعض ومكنش فى مشاكل وليه حصل كدة

كله خير الحمد لله واكيد ربنا هيعوضك

مجهوله يقول...

السلام عليكم
الصراحه انا فى البوست الاخير فى مدونتى سئلت نفس السؤال
هو ليه الشاب لما يحي حبه مش بيتقدر؟

زى الهوا يقول...

معلش الدنيا كده

بس يارب نتعلم ومانسيبش من ايدنا حاجه

Eman يقول...

لا تندم على حب عشته وانتهى
واعتبره ذكرى عشت فيها
لحظات جميلة

ذكرى تعلمت منها
ليكون اختيارك بعد ذلك
افضل

أشعر انك قوي
وانك قادر على هزيمة اي حزن
يحاول ان يسيطر عليك

وأنك سوف تكمل المشوار
وسوف لن توقف حياتك
وانك سوف تمضي فيها
بكل ثقة

وانك سوف تجد من يقدرك
ويقدر قلبك
ذاك القلب العظيم


ٍٍ[وعسى أن تكرهوا شيئاً وهو خير لكم]


أتمنى لكَ كل كل الخير

بنت قلبى يقول...

مش قادره اعلق خالص

فراشة يقول...

"المهم إنى متاكد إنى عملت اللى عليه ومقصرتش فى أى حاجة نهائى "
دا كفايه انك تحس انك مظلمتش حد معاك

ومش عايزة اكون منحازه وان البنت اهلها بيفرضوا عليها الجوازه والكلام دا بس الاكيد انها مش نصيبك ولا انت نصيبها ... نصيبك هيجيلك ف يوم
ويارب يبقى جميل وتفرح بيه باقي عمرك

وافضل حاجه ف الموضوع ان التجربه فادتك كتير

ربنا يسعدك يا كريم وانا حاسه ان فرج ربنا قريب قوي اصبر

جارة القمر يقول...

انت طيب يا كريم

مافيش كلام يتقال ... ربنا يكرمك و تبقى كويس عشان انت تستحق تبقى كويس :)

لاسع افندى يقول...

انا حسيت اوى بمشاعرك
اتمنالك تعدى الموقف
اتمنى من كل واحد ضاعت منه توته
يفكر فى حياته ومايرهنش مستقبله على حد


تحياتى

Rosie يقول...

أنا قريت البوست ده و اللى قبله..
و هاعلق كله هنا..هى ىه البنت قلبها كبيرة و رحيمة أنها تعمل كده فى الكلب بس دهاللى حصلها ده أقل حاجة متوقعة ..برده لازم الناس متخاطرش بى حياتها..
كبعا الكلام اللى كاتبه عن أطفال الشوارع أنا متفقة فىه معاك بس انا مفهمتش تقصد أيه بجرة قلم..المسئولين يعنى؟؟..
البوست ده...
بص من بتهيألى أنت كاتب المشكلة و رادد على نفسك...فأنت لما تحلف انك هتكمل برغم انها كانت حاجة كبيرة فى حياتك يبقى انت كده نهيت الموضوع صح..هى غلطانة بدام مش هتقدر تستناك كانت المفروض متديكش أمل...
و انت لازم تعرف أنك كسبت مش خسرت..كسبت أنك تبقى مع حد مش هيبيعك..

غير معرف يقول...

قد إيه الواحد مش بيعرف قيمة الحاجة إلا لما تروح منه
يعنى السبب فى البعد انت ؟؟؟؟؟؟؟

مهما حصل انا مش هقولك غير وعسى ان تكرهوا شىء وهو شر لكم
صدقنى اكيييد ربنا عارف انها مش هتنفعك مهما كنت بتحبها او فهمتها وخليك على يقين ان كل شىء مكتوب
ولاااااااااازم تكون راضى ياكرييم
بس انا معجبنيش اسلوبك فى البوست انا عارفة انك مضااايق واسة بييك اوى
بس بس كدا ياكيمو انت بتفكر بطريقة سلبية
سيبك من اللى فات انا عارفة انك مش هتنسى بس حاول علشان لما ربنا يرزقك ببنت الحلال متظلمهاش
خلااص هى اتجوزت يعنى مهما قولت ومهما بكيت ومهما سمعنا اغانى قديمة تفكرنا بيها هى خلاص اتجوزت ودلوقتى فى حضن واحد تانى
اقولك هى يمكن حبتك ويمكن هى الظروف كانت اقوى منها ويمكن نسيتك ويمكن لسة بتفكر فيييك بس اكييييد هتنساك لانها دلوقتى خلاص
وزى ماانت قولت العشرة مابتهنش على ولاد الاصول
اكيد فاهمنى

عمو سمااااسم :):)

غير معرف يقول...

بس اقوولك بجد لما ترتبط بإنسانة وتتجوزها هتحس بطعم الحب الحقيقى هتحس ان كل اللى فات كان ولا حاجة لما تلاقى بنتك بتطنطت حواليك وزوجتك دايما جنبك فى كل حاجة ولما تحس بطعم السعادة هتحس قد ايه ان اللى فااات دا ولا حاجة
وهتندم انك نزلت دمعة واحدة على حد مايستهلش :):) فااااهمنى

بص مهما قولنا ومهما كتبنا وانت قريت كل التعليقات دى
الامر كله فى ايدك انت
محدش هيغيرك لكن انت اللى هتغير نفسك
كريم اللى عرفته بيتححدى اى حاجة
كريم اللى عرفته متهزوش واحدة
كريم مينزلش دمعة واحدة علشان سراب

عايزة بوستاتك اللى جاية متتكلمش عن الماضى انا عايزاها تتكلم عن اللى جاى عن المستقبل

هى اى نعم مبقتش لييك بس يكفى انها غيرت حياتك

هى يمكن هتفوق متأخر
ويمكن مكنش فارق معاها
انت او غيرك
بس بجد هى خسرت كتيييير لما خسرتك
اذا احبت فأحبب هونا عسى حبيبك يصير بغيضك يوما
واذا كرهت فأكرهه هونا عسى بغيضك يصير حبيبك يوما
مش هقول غير استعن بالله
لا اله الا الله
سمااسم

غير معرف يقول...

وعلى قد ما غيرتى مجرى حياتى



على قد ما هقدر أمشى وأكمل

يبقى كل اللى فات دا ملوووش لزمة

ويكفى اخر جملتيييين :):):)

شاب فقرى يقول...

sam sh
أكيد هنسى يا راجل يا طيب
مفيش حاجة بتبقى على حالها أبدا
يارب يوفقنا كلنا
تحياتى
فقرى
------------------
سمو الأميرة سارة :
بصى الحياة علمتنى إن مفيش حد بيبقى نايم وهوا بيحدد مصير حياته
إنته متعرفيش الشخصية دى كانت عنيده قد إيه وكانت بتعمل مشاكل مع الدنيا كلها وتيجى لحد عندى انا وتقولى حاضر
أنا زعلان عالعشرة اللى كانت بينى وبين الناس دى
على كل الأيام دى
بس كدا
نورتى يا أميرة
شاب فقرى
----------------
خواطر شابة
على راى والدى
كان بيقولى يابنى محدش بيموت عشان خاطر حد
نورتى
شاب فقرى
---------------
wanda
إن شاء الله عن قريب الموضوع يبقى ذكرى
إن لم يكن أصبح ذكرى من الآن
نورتى
فقرى
--------------
غير معرف
للأسف معرفش الأغنيه دى والله
بس نورت
فقرى
----------------
عاوز أصحى
وعسى أن تحبوا شيئا وهوا شر لكم
نورت يا اخى افى الانسانية
فقرى
----------------
ana keda
أولا كلماتك جميلة أوى أوى
شكرا ليكى ولاهتمامك وسؤالك
أنا زمان كنت عامل حملة إسمها جبهة الجدعان الشعبية
بوست فى المدونة ورافع شعار أنا جدع
ومازلت رافع هذا الشعار
ربنا يحفظك ويعزك
شكرا لكلامك جدا
نورتى جدا
شاب فقرى
---------------
أبو حميد
يعنى كمان عشر سنين متأكد غنى هكون نسيت الأيام دى تماما ؟؟؟؟
ها ؟؟؟؟
الواضح إن كلنا مجروحين
نفسى ألاقى حد بيحب ومبسوط

فقرى
------------------
promise
كله بأمر الله
الحمد لله على كل حال
نورتى
فقرى
-----------------
البنفسج الحزين
هوا الحقيقة إن القصة اللى إفترضتيها مش حقيقية
لأنه ببساطة هى مكانتش عارفة هى عايزة إيه
لا هى بتحبنى ولا هى بتكرهنى
شويةى كدا وشوية أصحاب وشوية بعيد
والحياة ماشية
بس كلامك فى محله
كل شىء قسمة ونصيب
نورت
فقرى
----------------
bobo
أهلا وسهلا بيكى
على فكرة والله مقدرتش أحضر الحفل لأنى كان عندى أعذار كتير أوى هقولها البوست الجاى

والله أنا لما كتبت البوست دا كنت خايف إن كل ما حد يدخل يقولى جمد قلكب وخليك قوى والكلام دا
لأنى ببساطة أقوى من كل المواقف دى
يمكن إتعودت فى حياتى غنى مش بثق فى الدنيا
وإنى لما بآجى أسلم على حد
بودعه وداع الموت
مبقتش بثق إنى ممكن ألتقى باالشخص دا تانى
من يوم ما والدى توفى و أنا بتعامل كدا
بقت الحياة سهله والواحد بقى قلبه أجمد بكتير بكتير بكتير
هوا أنا مقلتلهاش الجملة دى الصراحة
أنا قلتلها لو إتجوزتى وجيتى وحسيتى بالندم هتلاقينى جمبك ولسه بحبك وهرجع لك ساعتها
تخيلى بقى
يعنى مفيش أى إحساس بنفسى
بس من الأفضل أحيانا أننا منكونش مع الحب دا
ليه ؟
لأنى هفنى نفسى عشان أسعدها
وهى ولا هنا
هى عايشة مش شايفة كل دا لانها مش حاسه بحبى وتقدر تبيعنى
فساعتها بقى هبقى عايش فى عذاب أبدى
ربنا يستر بقى فى الرزق والنصيب دا لأنى مقلق من الموضوع دا مووووووووووووت
نورتى
وبكرر أسفى لأنى مقدرتش أحضر الحفل وأبارك لشاعرنا الكبير
تحياتى
شاب فقرى
---------------

شاب فقرى يقول...

Lady E
للأسف عندى مشكلة كبيرة
إنى مش بعرف أبكى ولا أزعل على حد
أنا بزعل عالأيام والعشرة والحب وعلى نفسى وبس
إنما الناس ؟
بتتعوض
ودا شىء أنا واثق منه
نورتى
فقرى
--------------
ليس فقيرا من يحب
أكيد هكمل
ومش هتفرق معايه
إبتسمى
إنها إرادة الله
وهى سنة الحياة وهى الفراق
نورتى
شاب فقرى
---------------
ويلا
................
----------------
SHAPE YOUR LIFE (ABOALI)
بصراحة أول تعليق يسعدنى بالشكل دا
بيحمل فكر يتحط فى بوست لوحده
وتستمر الحياة
برغم كل شىء
بس لو نويت أكمل لازم أفوق وأتغير من تانى
ودا عن قريب إن شاء الله
نورت يا أخى الفاضل
أقصد أستاذى :)
شاب فقرى
------------
همسات ساكنة
كله بيمر
ولازم نفوق ونتغير
دى سنة الحياة
نورتى
شاب فقرى
--------
مجرد حلم صغنتوت
ربنا يصلح الحال وأقدر
نورت
شاب فقرى
------------
غير معرف
آسف لو زعلتك
شاب فقرى
------------
dr/sheko
يادكتور
أنا صعبان عليه العشرة
إنما أتمنى لها الخير
دا أكيد
نسيتها ؟
دا أكتر من أكيد
نورت المدونة
تحياتى
شاف فقرى
-----------
سومة .. مجنونة فى بلد عاقل
الحمد لله على كل حال
أنا محكيتش كل حاجة
بس فى أحيانا دوا
بيعالجنا وبيخلنا أحسن
بس ليه آثار جانبية مدمرة
نورتى وشرفنى تعليقك
شاب فقرى
--------------
هى وظروفها
وليد
نورت يا صاحبى
والله أنا كنت حزين على العشرة مش أكتر
وصعبان عليه الأيام اللى فاتت بس
يمكن الموضوع انا قافله من زمان
بس حسيت إنى لازم أفتحه واكتب فيه ناو
وخصوصا إنى لسه عارف مبقاليش يومين
نورت يا صاحبى
أكيد هنتقابل قريب
شاب فقرى
-----------------
سومة ... مجنونة فى بلد عاقل
دمتى بكل ود يارب
شاب فقرى
------------------
riri
بقالك سنين مش بتعلقى
تيجى أخيرا تعليق التعليق الأربعتاشر دور دا
طويب
بس لما تفتحى التعليقات
نرجع لموضوعنا
يمكن لما بنخاف على الطرف التانى بيكون أهون علينا جرح قلبنا وبنحس إنه أكيد هينسانا بالساهل والعمليه سهلة
دا أكيد بيغيرنا
جملة إيه اللى عجبتك فى البوست ؟
صحيح بالنسبة للحالة اللى قلتيها
انا عن نفسى مبتسحملش
لازم أتكلم وأقول حتى لو هخسرها
أمال هعيش متعذب بأنى مش عارف أكلمها نهائى ؟ ولا أوضح لها جوايا إيه ؟
مينفعش
ولو أنا مش عارف أتكلم
هى تتكلم
هى غنسانة
بنت
قوية
تقدر تتكلم وتتحكم فى سير العلاقة
موضة إن الراجل هوا اللى بيتكلم دى خلاص بطلت
الرجاله بقت مكتفة نفسها بمليون حاجة ومشاكل وشقة وعربية وعفش وشغل ومشروع الجواز
بقوا خايفين يوعدوا أى بنت بأى حاجة لأحسن ميقدروش ينفذوا
خلاص
نورتى يا ريم
شفتى فاكر إزاى
فقرى
---------------
star in the sky
أكيد دا الأفضل ليه
أنا بقول الحمد لك يارب
لأن كنت هعيش بحاول أرضيها وهى ولا هنا
نورتى
فقرى
---------------
sony2000
لحمد لله علي كل شيء سواء فالسراء والضراء...
واللى فيه الخير يقدمه ربنا
ربنا هوا الكريم
نورتى التدوين والمدونة
شاب فقرى
------------------
هروح المستشفى اطمن على جدتى وارجع اكمل رد عالتعليقات
شاب فقرى

شاب فقرى يقول...

طلعت الزيارة ممنوعة
نكمل رد بقى عالتعليقات :
------------
منار فايد
كنت قافل التعليقات يومين كدا وفتحتها من جديد
شكرا لاهتمامك والرد
اللهم امين
القوة موجودة
بس المهم التغيير بعد اللى حصل
يكون إيجابى
دا أهم شىء
نورتى
شاب فقرى
------------
مستخلص
قل لن يصيبنا الا ما كتبه الله لنا
دعواتك يا صديقى
فقرى
---------------
أم بوبة
إن شاء الله ربنا يعوض لما الواحد يبقى عنده بيت وأشرة
إنما علاقة تانية وحب تانى بيتهيألى مش هتبقى أى تعويض
المهم البيت والحياة تبدأ بقى
نورتى
شاب فقرى
---------------
مجهولة
مفهمتش
شاب فقرى
---------------
زى الهوا
نفسى مرة تفتحى التعليقات
ربنا كريم
وقادر يعوضنا عن اى حاجة فقدناها فى يوم من الأيام
نورتى أكيد
شاب فقرى
-------------------
وحبى لك لن يموت
كلماتك تشجيعيه وحماسية بجد أسعدتنى
شكرا ليكى
:)
فقرى
-----------------
بنت قلبى
:)
فقرى
----------------
فراشة
بقالك زمان الزمان مختفية
يارب يكون الفرج قريب
نورتى
وشكرا لاهتمامك والتعليق
شاب فقرى
---------------
جارة القمر
إن شاء الله خير يارب
إنتى عارفة إنى مش بزعل على حد
نورتى
فقرى
---------------------
لاسع أفندى
تحية لاسعه
ضاعت
لكن
أكيد فى غيرها
وأكيد على قد ما كل واحد كان وفى وصادق ربنا هيكرمه
نورت
فقرى
-------------
Rosie
أكيد ربنا هيكرمنى على قد ما وفيت وقدرت
بقول يارب وبس
البوست اللى فات كان قصدى على اى مسؤل او اى حد فى منصب ولو صغير يتحكم فى مصالح الناس
ويبهدلهم ويطلع عينيهم بجرة قلم منه

نورتى
شاب فقرى
-------------------
سمسم
هرد عليكى لوحدك
لما أقدر أركز
نورتى واسعدنى وجودك
شاب فقرى

غير معرف يقول...

الله يخربيتك يا كريم وجعت قلبى :(