الأربعاء، 17 فبراير 2010

موزتى و الكلب و جرة قلم




فى يوم من الأيام كان فى شاب ماشى مع خطيبته

وهما ماشيين لقوا كلب على جمب الطريق

الكلب شكله جربان ومش قادر يقوم ولا يتحرك ولا يرفع راسه حتى

لدرجة انهم لما راحوا وقفوا جمبه

الكلب محاولش يهرب منهم

البنت طلبت من خطيبها الكلب دا

إبتسم صاحبنا فى هدوء

وقالها طيب

و سابها وجرى

راح جاب شنطة سودا كبيرة بربع جنيه

وكانت المشكلة ازاى يشيلوا الكلب فى الشنطة ؟؟؟؟

واحد متدين ومربى دقنه شافهم

قام راح قالهم انا هشيلهولكم

وشال الكلب وحطهولهم فى الشنطة

والاتنين روحوا البيت

ساب لها الكلب فى البيت بعد ما وصاها عليه

وقالها

خدى بالك منه ...بحبك

وسابلها الكلب

وفى نفس اليوم بعتت له الصور عالنت

البنت أخدت الكلب وعالسطوح وعملت له دش ونضفته

الكلب نزل منه كمية حشرات تكفى لغزو مديرية بحالها

وهى نضفت الكلب وجابت له دوا

وخليته ياخد حقنه

والكلب بقى بياكل لنشون

إتفتحت له طاقة القدر

وربنا كرمه وخف وبقى بيجرى وزى الفل

بس بيلاعبهم ومهتم بيهم

بيرد الجميل

وفى تانى يوم

اخو البنت الكبير قالها مينفعش نحط كلب فى البيت

لازم تسربوه

وطردوا الكلب من البيت والكلب مشى وهوا زى الفل

البنت جالها طفح جلدى ومشاكل فى جلد إيدها بسبب الشاور بتاع الكلب

بس الحمد لله خفت منه

تخيلوا بقى

لو إنته شخصيتك زى البنت دى وخطيبها ومش هتستخسر أى حاجة فى حيوان

ممكن تخاطر إن ييجى لك جرب ومتخرجش من البيت

فما بالك بقى لو كان طفل شوارع

وما بالك لو كان شاب نفسه يشتغل ويتجوز ويفتح بيت

ويا سلام بقى لو كانت بنت نفسها تحقق طموحها وتتعلم وتبقى حاجة فى البلد

تخيل هتعمل إيه معاهم

تخيل لو تقدر تجيب أكل للجيزة كلها

تخيل لو تقدر تجيب لهم غاز يكفيهم طول الشهر ويعملوا اكل ويوفروا فلوس المطاعم ويبطلوا يقفوا فى طوابير

تخيل بقى لو تقدر تعمل كل دا

ومش معرض ييجى لك جرب

ولا أنتكاريا حادة

ولا حتى يشكك دبوس

إنته بس هتعمل جرة قلم على الورق

ياترى هتجر كام مرة القلم على الورقة ؟

ياترى كام مرة هتختم الورقة دى ؟

ياترى بعد ما تمضيها هتوصلها ولا هتأتمن حد غيرك يوصلها ؟

ياترى هتعمل إيه ؟؟؟

ياترى هتعمل إيه لو عرفت إن فى إمرأة دخلت النار فى قطة حبستها وحرمتها من الطعام ؟

ياترى هتعمل إيه لو عرفت إن فى إمرأة عاهرة دخلت الجنة لأنها سقت كلب ؟؟

يا هلترى ؟


شاب فقرى
ملحوظة : حدث بالفعل ... الكلب كان كنيش وشكله حلو اوى لما نضف ... للأسف منعرفلوش طريق ناو ... إنفصلنا وهى إتخطبت عقبال كل البنات الحلوين .. يمكن دى قصة الحب الوحيدة اللى غيرت مجرى حياتى تماما..

هناك 49 تعليقًا:

وصف الاحساس يقول...

ياااااااااااه فكرتني بيوم من الايام
جات بنت بتدور علي شغل وراحت في كل مكان عشان تكمل الورق وتاخد موافقة من كل الجهات
الورق كان واقف علي امضة شخص واحد
لا هو وزير ولا رئيس مجلس ادارة
هووكيل وزارة فاضله شهر علي المعاش
دخلتله البنت وابوها مرتين
والمرتين لا
دخلها واحد زميل له قاله لا
طلعت من عنده وهي دموعها مخنوقه مش قادرة تنطلق من عنيها
مشت وهي مش شايفة قدامه
كل ده بجرة قلم من شخص مش حاسس بنار حد
كانه بيطلع من جيبه ويديها او بتاخد من مرتبه وتديها
كل دة بجرة قلم

شاب فقرى يقول...

وصف الاحساس
تعرفى كنت حاسس ان كل حد هييجى هيفتكر موقف ويحكيه
انا بقى مش بسيب حقى عند الناس دى
وكيل وزارة او حتى وزير
بدخل وبهزق
انا مصلحتى مش هتقف على بنى ادم
بدخل وبرزعه كلمتين
مادام المصلحة كدا كدا مش هتمشى
يبقى مسيبش حقى لحد حقير يتحكم فيه
لازم اقوله كلمتين فى العضم احسسه ان المكتب اللى قاعد عليه قيمته اعلى منه
وانه هييجى يوم ويسيبه زى ما قبله سابه
الناس دى مش قادر اقول معندهاش وعى نهائى
نورتى
فقرى

أحمد عبد الحميد يقول...

تصفيق حااااااااااد
رائع ربط الموقف ده مع اللى بيحصل للناس من الناس
المشكلة إن كله بيعمل كده فى كله
بمعنى: الموظف ولا المسؤل ده بيعمل كده فى مكان عمله ويجى أخوه أو إبنه أو بنته أو أى حد قريبه يروح يخلص ورق من مصلحة تانية يتعمل فيه كده برضه

شاب فقرى يقول...

عزيزى أبو حميد
نورت
وشكرا جدا لرأيك
هوا الصراحة انا مرضيتش اربط المواضيع اكتر من كدا
بس صدقنى فى امثلة كتير على المستوى الدولى مثلا:
ممكن تلاقى اليهود جوا اسرائيل جايبين أقفاص لحماية القطط والحيوانات بتاعتهم من الهجوم بالغازات السامة وفى نفس الوقت تلاقيهم بيضربوا وبيقطعوا فى غزة
فهمتنى ؟
فى تناقضات كتير اوى
ولازم مننساش :
البر لا يبلى والذنب لا ينسى والديان لا يموت إعمل يابن ادم ما شئت فكما تدين تدان

تحياتى لك
شاب فقرى

Mahmoud Ahmed يقول...

كويس و حلو اننا نعطف على الحيوانات
بس لو نعطف على البني آدمين كمان يبقي احسن
انت قلت في الاخر ما بالك لو كان ده طفل ؟؟
نايس بوست
في الاخر كان وحش ( عشان سيبتوا بعض ) :(

شاب فقرى يقول...

سبايدر مان
ياعزيزى
مرديتش على سؤالى
انته دكتور تخصخص إيه ؟؟
لانى نفسى اقرا فى الطب النفسى
وعايز حد يساعدنى
شكرا لرأيك فى البوست
وتذكر دوما
أحبب من شئت فإنك مفارقه
يعنى كدا كدا هنفترق مفيش مفر
فاهمنى طبعا
شاب فقرى

غير معرف يقول...

نصيبك كده و احسن حاجة اننا نرضى

كما تدين تدان المسئول الللى بيعطل مصالح ناس ويمكن يضرهم بتصرفه ده هيترد له

شاب فقرى يقول...

ستار إن زا سكاى

الحمد لله

كما تدين تدان

نورتى
فقرى

بنت قلبى يقول...

ههههههه
الله كل دا مع كلب
طب والا احنا بنشوفهم ليهى فى الشوارع نايمين
من غير اكل ولا غطا
عارف وانا كنت فى السويس عند اختى
بالصدفه كده واحنا ماشين بالعربيه قدام الكنيسه لقيت ست كبيره ومعاها بنت صغنونه نايمين قدام الكنيسه
6 مرات اعدى عليها وبرضو القيها نايمه قدام الكنيسه
واخره مره لقيت التيلفزيون وناس كتيره اوى قدام الست دى
ليه لان كان فى شيخ عاوز يتبنى البنت والست لاء
طب ليه الا ياكل البينت امها هتاكله منه
وبقالها شهور مرميه ومسلمه
مافيش واحده ليه قالت لخطيبها انا عاوزه من دا
مخنوقه والله ياكريم ومش قادره افتح فى الكلام
لان كل الحقيقه قدام عنينا هنا بنشوقها
معتش جد وبس
لاءءءءءءءء
الكل بقا خد وهات
والله معرف انا بقول كلام يخص البوست لولا لاء
بس الا على لسانى كتبته وخلاص

واحد بيحب يشخبط يقول...

اولا : التشبيه الذى استخدمته يا فقرى يجعلنا ندرك ما وصل اليه حال البلد دى فعلا .. لقد اصبحت قيمة الادميه لا تدنو الى قيمة الحيوانات بل اقل منها كثيرا .... انا مره كنت ماشى فى الشارع و شفت ولد صغير قاعد فى الشارع ف عز البرد مش لابس تقريبا حاجه و بيبيع مناديل و ماسك ف ايده كتاب عربى ثالثه ابتدائى و بيحل فيه و سألته انت ف سنه كام فقاللى ف ثالثه ابتدائى و قولتله مبتعملش الواجب ف البيت ليه فقالى ابويا هيضربنى لو مخرجتش ابيع المناديل ... من المسئول عما يحدث هنا؟ ... لست ادرى.

ثانيا : ردا على تعليقك "احبب من شئت فأنك مفارقه" فأنا اعتقد اننا نحب و يمكن ان نظل مع من نحبه الى ان تنتهى حياتناو لكن احيانا كثيره يكون القدر اقوى منا او اعند منا و هذا ما يجعلنا نفارق و لكننا لا يجب ان نستسلم.

ثالثا : من المحزن ان تكون نهاية اى قصة حب هو الفراق و لكن يا صديقى اتمنى ان تجد الحب الصادق الذى يعوضك عما فقدته

تحياتى ليك يا فقرى و اعتذر على الاطاله

شاب فقرى يقول...

بنت قلبى
تعرفى
وحق لا اله الا الله
انا نص الكلام بيقع منى لانى مش قادر اقرا لهجتك
مش عارف الخلل فين
بس نرجع لموضوعنا
انا خطيبتى لما كانت بتشوف الناس دول برده كانت بتتعاطف معاهم وبتجيب لهم اكل
انا مش كنت خاطب واحدة فافى
دى كانت بميت راجل
مش فافى وعايزة من دا ومن دا
بالنسبة للست دى اللى حكيتى قصتها
يمكن لان الناس معندهاش دم
خليها تيجى تنام قدام الكنيسة اللى فى شارعنا
وشوفى هيحصل ايه
انا مليش دعوة بالناس اللى يسيبوها هى وبنتها مرميين فى الشارع للرايح والجاى
انا ليه بنفسى
أبدأ أغير نفسى الأول
كلامك فى البوست وفى الصميم
انا هعمل تحديث
نورتى يا بنت قلبى
فقرى

شاب فقرى يقول...

اللى بيحب يشخبط
يا عزيزى
بالنسبة للنقطة الاولى :
اللى انته شفته دا اسلوب بيتبعه بعض الشحاتين فى وسط البلد
اسلوب جديد
تقريبا انته اول مرة تشوفه
بس انا شفته كتير اوى
ولو دا حقيقى
فالناس اللى بتخلف وترمى عيالها فى الشارع انا بعتبرهم ادنى من الحيوانات واقل مرتبه منهم
لانهم نسيوا ادميتهم
نسيوا اهم غريزة فى الانسان
يعنى سمعت فى مرة فيما معناه
واحد سأل النبى عليه الصلاة والسلام
قاله يارسول الله ليه ربنا وصى فى القران الابناء انهم يهتموا باهلهم
وليه مش العكس
النبى عليه الصلاة والسلام قال لان الاب والام مش محتاجين وصاية
هما بيحبوا اولادهم جدا جدا جدا جدا
فلما انسان يشيل الغريزة من جواه
يبقى لا معنى له ولا لحياته

نيجى للنقطة التانية :
يا عزيزى
بالنسبة للفراق فهذا حقيقى
لماذا ؟
حتى الموت يعتبر فراق
الظروف والزعل ممن تحب يعتبر فراق
فاهمنى ؟

نيجى للنقطة التالتة :
لازم يكون فراق نهاية الحب
على فكرة احبب من شئت فأنك مفارقه
فدا تقريبا والله اعلى واعلم مقولة او حديث مش عارف
هبقى اشوف واقولك
نورت يا عزيزى
شاب فقرى

شاب فقرى يقول...

اى خدمة :)

منورة وتحت امرك فى اى وقت
فقرى :)

بوبو يقول...

شاب فقري.. ازيك
اولا المقولة بتاعت : " احبب من شئت فانك مفارقه " دي حديث قدسي بيقول : (( يا ابن آدم عش ما شئت فإنك ميت، وأحبب من شئت فإنك مفارقه ، واعمل ما شئت فإنك مجزي به ))
اما بالنسبة لموضوع جرة القلم دا فعلار فيه ناس عندها نقص بتستمد قيمتها من تعطيل مصالح الناس ويحسوا بكدة انهم مهمين .. انا قريت ردك لما بتقول انك مش بتسيب حقك وبتهزق .. فكرتني بحديث - قدسي برضه- قريته زمااااااان وفرق معايا جدا بيقول : " اطلبوا الحاجات بعزة النفس فان بيد الله قضاءها " وكنت وقتها لسه طفلة بس كبرت وهو الحديث دا ف بالي دايما وعشان كدة عمري ما ذليت نغسي لحد ابدا عشان مصالحي تمشي.. وحتى ف شغلي مش بنافق حد عشان اكل عيشي زي ما ناس كتير بتعمل.. ما هو كل حاجة ف ايدين ربنا مش ف ايد العباد
انا مش عارفة ايه علاقة كلامي بالبوست بصراحة بس مش مشكلة .. انما انا ليا ملاحظة صغنونة.. طالما البنت كانت خطيبتك وبتقول عنها كانت بميت راجل.. ربنا يكرمها ويكرمك - يبقى شيل كلمة موزتي دي عشان انا بحسها اهانة وخليها مثلا خطيبتي
دا مجرد راي تقدر طبعا تعتبره ولا حاجة
تحياتي

شاب فقرى يقول...

bobo
أضفتى المفيد للبوست
:)
شكرا لتواجدك
انا مش بعتبرها اهانة
لان المصريين زمان
كان كلمة موزة مش موزة
انطقيها على انها فاكهة
كانت بتتقال للبنات الحلوين بس
وفى ستات كبار بالاسم دا
انا مش بعتبرها اهانة والله
بالعكس
دى شخصية حبيتها
وهتفضل جوايا
ولو حتى كذكرى جميلة
المهم احنا نقصد ايه بكلامنا مش مهم اللى كل واحد يفهمه
لان الناس بتفهم الكلام بالف الف معنى
لمن احنا نقصد معنى واحد بس
نورتى المدونة ومبدأك سليم ميه فى الميه
ربنا يحفظك ويعزك
شاب فقرى

promise is promise يقول...

انت يا كريم على فكره انسااااااان للغايه

اولا فكرتنى بموقف صعب انى احكيه لانى انهرت جدا جدا فى نهايته لان الناس بقيت وحشه جدا

وانت بقا ربنا يكرمك
عارف الموقف ده كان حتاجك فعلا تعرف الناس دى ان المكتب اللى قاعدين عاليه اغلى منهم وليه قيمه عنهم على الاقل المكتب شايلهم وهما مش قادرين يشيلوا بعضهم

شاب فقرى يقول...

promise
حلوة اوى الجملة دى
المكتب شايلهم وهما مش عارفين يشيلوا بعضهم

ولله فى خلقه شؤون

سبحان الله

نورتى
فقرى

بيطرية ومش بايدى يقول...

ياسلام سلم الكابتن بلية بيتكلم
ايه الحنية والجرأة دى قدرت تحط ايديها على عمو الكلب وتغسله كمان مش لانه جربان لاوالله
لانه كلب مجرد حيوان انا عن نفسى لو كان كتكوت ولا اى حاجة مش بقدر احسس عليها ولا المس فروها اصلا
تخيل بقى وانا فى بيطرى مش بالذمة دى وكسة وخيبة تقيييييييييييييلة
طب انا راضية يجيلى ان شاء الله شلل اطفال بس اتجرأوالمسهم
عالاف اما يكون نفسك تعمل حاجة خير ومش قادر حاجة غبية اخر حاجة صح
بتحبط وبتحس انك مقيد وماتملكش حاجة فاحسن حاجة تسكتتتتت

بس خلاص

تحياتى البيطرية

شاب فقرى يقول...

ازيك يا دكترة
فكرى فى الموضوع على انه كائن خلقه ربنا يستحق اهتمام ورعاية زيك بالظبط بس هوا مش لاىقى حد يعبره ولا حد يعطف عليه
دى روح يا بيطرية
رووووووووووح خلقها ربنا
زى الانسان بالظبط
الانسان هوا كمان جواه روح
بس كدا
بإيدك تكسرى كل القيود
بس لازم تاخدى قرار وتقدرى تنفذيه
تحياتى الفقرية
فقرى

Mahmoud Ahmed يقول...

مختدش بالي من السؤال بتاعك ( وش مستغرب خالص ) ^_^

...

انا سيدي دكتور لسه صغنن خالث

لسه مخلص اهو اليومين دووول دراسه ^_^

....

و اكيد فاهمك طبعا
و على فكره برضه حصلي نفس الموقف بتاعك بس لسه هي متتخبتش ^_^ منتظر اهو
مش بقولك بتقول عني حاجات كتير :(

شاب فقرى يقول...

سبايدر مان
الحمد لله انك خلصت على خير
بالتوفيق فى حياتك ان شاء الله
ربنا يقويك عاللى جاى
كان زمان فى شخصية اعرفها قالت لى
اتعب عشان هتتعب اكتر قدام
بس كدا :)
نورت
فقرى

سواحة يقول...

:-)
اقولك حاجتين
الاولى
الى لفت انتباهى
"واحد متدين ومربى دقنه شافهم
قام راح قالهم انا هشيلهولكم
وشال الكلب وحطهولهم فى الشنطة "

عارف الانطباع العام للخواجات و اعتقد بقيت زيهم ان المتدينين مبيحبوش الكلاب
عارفة انه مش حرام الكلاب بس لعابهم بينقض الوضوء بس ساعات الناس بتبالغ فى النفور بشكل صعب

بس جملتك حسستنى ان مش كل الناس تتاخذ بالانطباع العام للشكل بس بالفعل يكون اصح

الثانية
عايز كل واحد يحكيك عن موقف مشابه
عن جرة قلم
يييييييييييييييييوه ياما وقفت حاجات و مشيت حاجات
بس فى الاخر بحس ان الى وقف دا وقف لان ربنا مش عايز ان الموضوع يمشى فبيحطلنا حد دماغه كده يوقف بدون معنى مهم حاولت
و برضه بيبعت حد متتخيلوش يحللك حاجة علشان ربنا رايد انها تمشى

المهم نرجع للذكريات

ذكراياتى :-))
كنت مع اخويا بنزور صاحبه و مراته فى التجمع الخامس و الطريق المودى كان و اعتقد لازال بيمشى فى الصحراء (انا الى كنت سايقة لسه بتمرن سواقة فاخت بالى من عربية اعتقد اوبل راكنه على جانب فى الطريق الصحراء ده
المهم مطولناش تقريبا ساعة زمن و نزلنا ورجعنا و اخويا الى ساق لان الدنيا بقت ليل
و احنا بندخل الطريق لمحت بنت بتشاور للعربيات و اخويا بصراحة اتخض لان الطريق مفيهوش عمدان نور و ممكن كنا حنخبطها و هى واقفة فى نص الطريق تشاور هو مشى بس انا قولت دى بنت و بتعيط لقيته وقف بعد 500 متر منها و بصلى نرجع نشوف ملها
قولتله احسن لحسن عربية ثانية تخبطها
رد فى الطريق و ده كان خطر (لانه اتجاه رايح ) و شغلنا انوار تحذير و قربنا منها و قفلنا البيبان
و لما وصلنالها
سالها بتشاورى لايه فى الطريق
لاقناها بتعيط و بتقول عايزة توقف تاكس او ميكروباص
بالسوال عايزة توصل المقطم
طبعا فى الطريق ده مفيش ميكروباصات ساعتها المهم لما سالنها وصلت ازى
افتكرت العربية الاوبل
هى توهت بس ما معناها كانت مع حد و سابها و مشى
بصنا لبعض و كلمنا بعض بالعنجليزى بتاعنا نعمل ايه
قولتله ناخذها لاقرب موقف تعرف تركب منه حاجة
اخويا سالها على البطاقة و بص فيها
و ركبناها و احنا بصراحة قلقانين منها بس مقدرناش نسبها
و وصلناها موقف فى مدينة نصر فى طريقنا
و رجعنا
بس ساعتها انا حسيت براحة قوى
ممكن تكون غلطت بس ربنا قدرنا نعمل خير عن طريقها
اما اخويا فكان قلقان انها تتبلا علينا و على نمرة عربيتنا
بس الحمد لله ربنا ستر متردتش المساعدة باذية

بس كفاية ياه انا رغيت
معلش بس معرفتش انام فمدياها رغى :-))

شاب فقرى يقول...

wanda

فى متدينين عارفين الدين
وفى اللى مش عارفين أى حاجة

ودا الطبيعى

بس اللى الناس بتعمله دا يعتبر ظلم برده

هما بيظلمونا بطريقتهم دى ؟
ولا ايه ؟
عالطريق دا بقى ليه موقف كنت عامل زى البنت دى
بس مفيش حد عبرنى ساعتها
المهم
ربنا ساعتها كرمنى بعربية نقل ركبت معاها لحد القاهرة
المساعدة فى حد ذاتها بتمنح احساس للانسان بالامان
بتخلى الواحد يحس ان فى امان فى الدنيا دى
انى لو انا اللى واقف هلاقى حد يعبرنى ويمد لى ايده
بحس ان رصيدى زاد
ان ربنا هيكافئنى ويردلى الموقف دا اكيد
فاهمانى ؟
اكيد فاهمانى :)
نورتى المدونة وكانت الزيارة الاولى رائعة بحق وتعليق طويل ورائع ايضا
تحياتى
شاب فقرى

سمكه واحده يقول...

كان لازم اعلق علي البوست ده
لسبب يعني
اني افتكرت موقف مشابه
بس مختلف اني كنت انا واختي
لا خطبتي ولا خطيبي يعني
فكرتني من كام سنه كنت ماشيه انا واختي وبنتكلم المهم سمعت صوت نونوه تحت العربيه المهم قعدت تبص ونبص يمين وشمال لقينا قطه صغنونه جدااا وشبه عاميه وشكلها لا يسر عدو ولا حبيب
بصيت لاختي متوجسه خيفه لان عارفاها وعارفه قلبها الطيب الحنون لقتها بتبصلي كده بنظره مخيفه وبتستعطفني وبتقولي انا هاخدها معانا هي جعانه وشكلها عاميه وصعبت عليا ياحرام بقولها يابنتي بس هنعملها ايه دي شكلها بايز خالص تقولي معرفش بس مش هسبها كده في الشارع المهم لقتها هوب دورت علي ورقه كبيره في الشنطه كده ولفتها فيها وشلتها لحد ما وصلنا البيت ولقتها جابتلها لبن وحالولت تنضفها بس في حذر وبعد كده لقتها بتنط من مكانها وتتصل بالتليفون بوحده صحبتها عندها قطط بتسالها علي رقم الدكتوره انا استغربت !
وقالت ماما انا نازله بالقطه للدكتوره ورجعت وبتقولي الدكتوره قالتي لازم لها عمليه في عنيها وهتشيل عنيها ومش هتشوف نهائي وبنصحك انك تسبيها لان كده حاله ميئوس منها المهم اختي جت وحزينه وقعدت تعيط واكتئبت كام يوم بسبب القطه
وكل ما اشوف اختي بتعيط
قعدت انا وصحبتي نبص عليها ونضحك مش بستخف بمشاعرها بس استغربت
انا فعلا صعبت عليا القطه بس اختي كانت بطريقه فظيعه كانت حساسه اوي ركيكه اختي دي اوي
بقت كل ما اشوف قطه ولا اسمع صوت قطه في الشارع احاول اغير الاتجاه او نمشي في طريق تاني او اغلوش واكلمها في اي حاجه عشان مفيش اي صوت قطط يلفت انتباها مش عارفه ممكن يطلع قطه مالها المره دي
من اللي شوفته واختي قعدت كام يوم متأثره مش ناقصه بقي غم

عارف بقي لو كل واحد في البلد دي ربنا مديله نعمه ميحجبهاش عن اهل بلده من الوزره الحلوين ولا رجال الاعمال ولا الناس الحلوين اللي مشرفين البلد دي
انا سمعت ان الوليد بن طلال واخد 280 فدان في توشكا سهر المتر 50 جنيه
عارف يعني ايه؟؟؟؟؟؟؟
واميره سعوديه اشترت 10 افدنه لاميرات سعوديات سعر المتر حوالي 230 جنيه عشان الاميرات تروش شويه
ربنا يرحمنااااااا
يافقري يالي مبتدرش علي التعليقات
ربنا يصلح حالنا
تحياتي

Mahmoud Ahmed يقول...

ربنا يخليك يا جميل
^_^

Tamer Moghazy يقول...

حلو قوي التفكير بالطريقة الايجابية دي يا كريم بس الاحلى والاهم هو التنفيذ فعلا ومن غير رقيب.

Bent Men ElZman Da !! يقول...

انا توقعت انها مجرد قصه حطتها كبدايه عشان توصل للكلام اللى انت قاصد تقوله
لما قولت انها حقيقه استغربت بصراحه
يمكن عشان مش بيتكرر مواقف زى دى كتير
بص فى مواقف زى دى انا مقتنع بالمثل اللى بيقول ما عمل يعمل ولو بعد حين
البنت اللى عطفت على الكلب اكيد هيتردلها الاحسان ده فى يوم من الايام بأى صوره من الصور
واللى بيزل فى خلق الله بأى طريقه كانت اكيد بتتردله برده

شاب فقرى يقول...

سمكة واحدة
اولا الفقرى بيرد عالتعليقات على طول أول بأول
إلا فى حالة ظروف تمنعنى من دا
اختك مش فافى ولا طريقتها فى التعبير عن مشاعرها ركيكه جدا ولا حاجة
بصى
الحياة ببساطة قايمة على التفكير والتأمل
يعنى ببساطة روحك وروحى وروح أختك متفرقش أى حاجة عن روح القطة
كلها أرواح خلقها ربنا
بس هى موجودة جوا القطة
وانتى فى جسم إنسان
يعنى ممكن تمرى بحاجة زى دى
او امر انا بيها
او اى واحد فى الدنيا
ساعتها لو حصل الموقف دا مع طفل
هتبكى ولا لاء ؟
من أعمالكم سلط عليكم
وكماتدين تدان
شفتى بقى الموضوع سهل وبسيط ازاى
لازم الواحد يهتم بكل كائن خلقه ربنا
لان دى رحمة
لما بترحمى مخلوق
الخالق بيرحمك
وبيحنن قلب المخلوقات كلها عليكى
نورتى
تحياتى
شاب فقرى

شاب فقرى يقول...

سبايدر مان
ولا يهمك يا مان
منور البوست والمكان يا دكترة
فقرى

شاب فقرى يقول...

timo
وحشتنى تعليقاتك
مختفى فين ؟
شكرا لرأيك
نورت المدونة
شاب فقرى

شاب فقرى يقول...

بنت من الزمن دا
كما تدين تدان .... دا الملخص
الرحمة ... دا المبدأ
الواقع ....دا الموقف
لازم يحصل كدا
أمال هبقى فقرى إزاى ؟
نورتى
شاب فقرى

قيس بن الملووووح يقول...

نحن في حاجه الي كل راي حكيم في مشاكل اصدقاء مدونة "دقات قلب بعد الخمسين"

غير معرف يقول...

يعينى يعينى

ايه الحاجات الحلوه دى :)

ربنا يوفقك بواحده تحبك بجد يا كيمو ويكون معاها كلب كنيش :) برضه

خواطر شابة يقول...

في الحياة هناك النموذجان معا من يحس بألام الناس وهناك من لايهمه الامر وشعاره انا ومن بعدي الطوفان وللاسف هذه الفئة هي الغالبة الان بحيث تعطينا الانطباع ان الخير معدوم في حين الحقيقة غير هذا
انا سأسير عكس التعليقات (مبدأ خالف تعرف هههه) وسأحكي عن نموذج ايجابي في موضوع جرة قلم اعرف وعن تجربة شخصية موظفين يبذلون المساعدة وييسرون المصالح للناس لوجه الله ويفرحون بدعوة من القلب ممن قضيت مصلحته صحيح هم ليسوا الغالبية لكنهم موجودون
تحياتي لك

منــار فايد يقول...

كريم الفقري
انا عنوان البوست شدني اوي اوي
مزتي والكلب
لا بجد عنوان يشد........
المهم ياسيدي
انت طبعا معاك حق في كل اللي قلته
احنا بتطلع عينا على مابنخلص ورقه ولا بنسدد فاتوره ولا حتى بنستلم كتاب
بس خطيبها ده حد كويس
انه رضي انها تاخد الكلب عندها
ووافقها على فكرتها.....
انا بقى يااستاذ كريم
عندي قطه
للاسف هيا قطه عاديه من الشارع يعني
باكلها ومش اي اكل
وساعات باخدلها الاكل من وراهم
الهانم اتعودت عليا وببقت ليل نهار
نايمه تحت البلكونه عندي
اتفاجئت بقى وهيا تربيتي
انها يوم الفالنتين اختفت
وقال ايه جايه وجايبه البيه معاها
صدقني كل ده حصل
يعني افضل اكبر فيها واربيها
عشان تروح تعمل اسره وانا لسه
فعلا قطط تاكل وتنكر.........

شكرا جدااااا
على البوست الرائع
او الاكثر من رائع

دمت بخير

z!zOoOo يقول...

السلام عليكم

ازيك يا فقري

يارب تكون بخير

موضوع حلو

وجره القلم ديه

عامله زي ما يكون واحد واقف في مستشفي وبيموت

وتلاقي واحده ماعندهاش دم تقولوه

انا مامضيش مافيش سراير اعملكوا ايه يعني

او تكون عايز إمضاء من دكتور في عيادته عشان تدخل مريض القصر العيني

والتمرجي البلط يقولك لا الدكتور مش فاضي

تقوله ده مريض تعبان قوي

يقولك مش فاضي يعني اعملك إيه

وتبقي مأساه الدكتور بعد كده إنه يفتكرك فقير ومش هتقدر تدخل المريض قسم خاص

طيب إنت مال اهلك امضي وخلاص ومش مشكلتك يدخل عام ولا خاص

يقولك لا مامضيش

انماط زباله من الناس

والاسم ملايكه رحمه

قال ملايكه رحمه قال

علي فكره الموقف ده حصل معايا لما كان والدي تعبان قبل ما يتوفي

وشوفت موقف تاني كنت في الشهر العقاري
واحد تقريبا عايز يعمل توكيل بتاع رخصه او حاجه زي كده

والست تبص جوه البطاقه وإلا بالدين مش هو

يقولها ياستي هو انا بس تخنت شويه

تقوله لا مش انت ..الي في البطاقه ده مناخيره مختلفه ورفيع وعنده شعر
وانت تخين وماعندكش شعر ومناخيرك مختلفه

هو انا اصلا مت من الضحك عليهم واتشليت بس بصراحه عندها حق في المكان ده لازم الواحد يتأكد قبل ما يمضي لأن ديه فيها حبس

بس اهو برضه عشان جره قلم

مديره المدرسه الي انا كنت فيها

انا كنت مفصول وعملت شهادات وكذا حاجه وكده والمديريه رجعتني المدرسه

والمديره مش عايزه تمضي علي الورقه وترجعني

شوفت العند والغباء

اهو برضه عشان جره قلم

دكتور بيصحح ورقتك وانت حالل وعارف حلك وضامن تقدير كمان

يقوم يديك ض . ج وتتظلم

وبرضه عشان جره قلم

الست الي تشوف السن هاددها وجايه المعاشات بالعافيه وواقفه عماله تتذلل للراجل عشان يمضيلها وهو عمال يمطوحها ويماطل معاها

وبرضه عشان جره قلم

ها اقول كمان ولا كفايه

كل المواقف ديه حصلت معايا وغيرها كتير

بس ده فعلا إنعدام إحساس

بس صدقني إلي بيتفنن يذل إنسان

ربنا بيحطله الي يذله

يمهل ولا يهمل

حمد الله علي السلامه يا عم فقري

نتمني نشوفك علي خير

وقلبت علينا المواجع

:(

تحياتي

شفـقــة و إحســــان يقول...

اسلوبك هايل يا فقرى اد ايه المقارنة جميلة ومقنعة
وياريت نقدر كلنا نعمل كده ونبقى ايجابين مش نحمى كلاب.....ههههههههه
لا نعطف على المحتاج والمريض والمسكين واليتيم
تعرف لو كلنا عملنا كده وكل واحد عمل حاجة كنا هنبقى حاجة تانية خالص
كلمتين على جنب" بنوتة زى دى ما كانش ينفع حد يسيبها اللى ترق لحيوان وتعطف عليه فما بالك تعمل ايه مع البنى ادم"
وعموما كل شىء قسمة ونصيب وخيرها فى غيرها
شفقة

غير معرف يقول...

البوست جميل بجد

ريمان يقول...

السلاام عليكم

سامع الصوت ده؟

ده صوت التصقيييييييييييف

بجد جميله اوى اوى المقاله دى

يا ريت اللى بالى بالك يقرأو البوست ده

Eman يقول...

ربنا مش بيضيع حق حد (:
أشكركْ

شاب فقرى يقول...

قيس بن الملوووح
أنا دخلت
وقريت
بس انا مبحبش أقول رأيى فى المشاكل المصيرية صراحة إن لم أكن على معرفة كاملة بالشخص

تحياتى
شاب فقرى

شاب فقرى يقول...

مستخلص
نورت يا صاحبى
يارب
فقرى

شاب فقرى يقول...

خواطر شابة
أنا كمان أعرف موظفين يعرفوا ربنا
وياما ناس أنقذتنى
اللى ماشى بمبدأ أنا ومن بعدى الطوفان
هوا أول واحد بيغرق فى الطوفان
تحياتى لتواجدك
فقرى

شاب فقرى يقول...

منار فايد
أهلا وسهلا
الصراحة أنا بحس أحيانا غنى مبعرفش أكتب غير عناوين بس
مش عارف ليه مع إن أى بوست بكتبه بيكون فيه فكرة
ما هوا خطيبها دا يبقى أنا
أنا طول عمرى بكره القطط
لأنها بتاكل وتنكر
ومش عندها وفاء زى الكلاب
حتى القطط عرفت عيد الحب
يالهوى
أنا لو منك أطردها من تحت البلكونة
أو أحط لها أكل فيه ... ولا بلاش لاحسن الناس تفتكر إنى شرانى ولا حاجة

شكرا لرأيك
نورتى
شاب فقرى

شاب فقرى يقول...

z!zOoOo
تصدق أنا بقيت حاسس إنى بنكد عالرايح والجاى بكل حاجة بكتبها
بقلب المواجع عالناس عشان تشوف الحياة بشكل مختلف
تقدر تشوف جوهر الحياة
انما المواقف اللى قلتها دى
:(
صراحة أنا مبسكتش
مبعرفش أمسك لسانى
بشوط فى اللى بيتدلع ومبوظ لى شغلى على طول
اه والله
نورت
وتحياتى ليك ولتعليقك
شاب فقرى

شاب فقرى يقول...

شفقة وإحسان
نورتوا المدونة
ردا على الكلمتين اللى على جمب
إقرا البوست للى بعده وهتعرف مين اللى ساب التانى
أنا عمرى فى حياتى ما سيبت حد ولا جرحت حد
أنا فى الموضوع دا تقريبا طلعت روحى وعينى بجد
وفعلا كل شىء قسمة ونصيب
نورتوا
فقرى

شاب فقرى يقول...

بنوتة مصرية جدا جدا
شكرا جدا جدا جدا لرأيك
فقرى

شاب فقرى يقول...

ريمان
بقالك كتير مش بتيجى المدونة
ياريت مش اللى بالى بالك بس
ياريت كل البشر فى كل الدنيا تقراها وتفهمها
ربنا يهدى عباده
دمتى بكل خير يارب
شاب فقرى

شاب فقرى يقول...

وحبى لك لن يموت
أكيييييييييد
كله بأمر الله
نورتى
فقرى