السبت، 6 فبراير 2010

حبيبتى والبطيخة


الأول نشوف الفيديو دا قبل أى حاجة وبعدين يبدأ البوست
ملحوظة هامة : الأغنية دى حاصلة عالأوسكار
إسمعوها
اسمها jai aho
وليها نسخة تانية بالانجليزى بس لفرقة امريكية مشهورة اسمها
Pussycat Dolls
-------

----------

إيه هوا الحب ؟
إيه هى الثقة ؟؟
إيه هى الثقة فى الطرف التانى ؟
إيه هوا الحب ؟
أسئلة بتتكرر وتزن على دماغ الواحد
ببساطة جدا
زمان مسكت كتاب للأستاذ عبد الوهاب مطاوع بيحكى عن شاب فى كلية طب
حب بنت معاه فى الجامعة
هى من فقراء المسلمين الغلابة اللى مش لاقيين ياكلوا
وهوا إبن ناس جدا جدا جدا وأبوه تقريبا كان مدير أمن
المهم إن اللى حصل إنه طلب من أهله إنه يرتبط بيها
رفضوا لانه هوا إبن ناس وهى زبالة بالنسبة لهم
طبعا هوا مش كان شايف كدا
هوا كان بيحب
أنا الصراحة معرفتش معنى الحب فى حياتى غير مرتين
وأنا بقرا القصة دى لقيت معنى الحب دا
وحبيت مرة واحدة قبل كدا
مرة بجد
المهم
إن صاحبنا فكر كويس
وظبط وربط
وقرر يتجوز الآنسة
:|
طبعا الكل مش مصدق اللى حصل
لكن دا اللى حصل
وراح عشا معاها فى بيت عالسطوح
وفضلوا يدرسوا سوا ومرت سنة الإمتياز بمدايقات من أبوه
كان بيبعت له ظباط ومخبرين يبهدلوه ويكسروا له الأودة ستين حته
عشان يسمع الكلام ويرجع لهم تانى ويسيب البنت
لدرجة إن أبوه قاله : يابنى مش خدت منها اللى إنته عايزه خلاص سيبها بقى
اللى حصل إن حبهم دا إستمر
يوم بصل ويومين زفت
كان بيحكى فى الجواب بتاعه إن هما مكانش عندهم لحاف ولا غطا وكانوا بيرتعشوا فى الشتا ومش لاقيين ياكلوا
بالظبط كانوا عايشين عالعيش والميه
لحد ما خلصوا السنة الأخيرة
ربنا كرمهم وخلصت على خير وبدأوا يشتغلوا
وبيدرسوا عشان ياخدوا حاجة إسمها الزمالة
معرفش هى إيه الصراحة لكن اللى فهمته إنه درجة كبيرة فى الطب
الإتنين كانوا عايشين فى عيشة قحت
لحد ما ربنا كرمهم وإشتغلوا وبدأوا يعوضوا
وربنا كرمهم بطفل طبعا فى السنة التانية من الجواز
وبالرغم من المشاكل والقرف كملوا
وفضلت جمبه وفضل جمبها
ولما ربنا كرمهم وبقوا فى مشتوى تانى خالص غير العشة اللى كانوا عايشين فيها
عملوا فرح كبير
وكان فى الفرح دا أولادهم معاهم
فرح بعد الحصول على درجة علمية كبيرة
وبعد النجاح وبعد ما بقى عندهم أطفال
وأهلهم كلهم حضروا
خصلت الحدوته
صراحة أنا مكنتش فى حاجة إنى أقرى رد الأستاذ عبد الوهاب مطاوع
لأنه مش هيفرق معايه كتير
لأن مفيش تعليق ينفع عالقصة
أنا إكتفيت بكاتب القصة والكلام اللى كتبه
الموضوع حقيقة
ويمكن ربنا يكرمنى وكاتب القصة الرهيبة دى يرد عليه فى البوست دا
لكن اللى عايز أوضحه بإختصار
إن الثقة دى حاجة لا يمكن منحها لأى حد
مش أى حد نقرر إننا هنكمل معاه حياتنا كلها بحلوها ومرها
مش أى حد هيكون معانا طول المشوار
اللى حاولت أطلع بيه من القصة
إن لو هى كانت بتحبه وبتشغل عقلها كانت قالت أتجوزه لأن مزاياه كتير
أو عيوبه قليله وبيخاف ربنا
لكن بطلة القصة مفكرتش فى كدا وقالت لما أتجوزه أهله هيرموهع زى الكلب فى الشارع
وكمان البطل مفكرش هى أحسن ولا هوا أحسن
مفكرش فى دا كله
عارفين لما يبقى فى حالة حب الأتنين فيها مش بيدوروا على مين الأحسن ومين الزبالة ؟؟؟
لما يبقوا الطرفين عارفين بعض وكل طرف واثق فى التانى
طز فى الظروف
أنا واثق فى إختيارى
وزى ما قلت للأستاذ abo ali
لما قال تختار ديل الأسد ولا راس القطة
أنا قلت له لما أختار دا أو دا مستقبلا
هل لما أكون ديل الأسد والأسد يطلع عبيط وبياخد على قفاه من كل فيران الغابة هل هبقى مبسوط ؟
وهل لما أختار راس القطة و أى حاجة تعتدى عليه أو تضربنى هبقى مبسوط ساعتها بتفكيرى ؟؟؟
المهم حالة الرضا بعد الإختيار
الثقة فى الطرف التانى
هل أنا واثق فى الأسد وتفكيره
إنى أبقى مجرد تابع ليه ؟
هل مستقبلا هكون راضى عن حالتى
طبقا للقصة
أنا أختار أكون راس القطة
عشان لما الدنيا تتعك برده هحكون راضى عن نفسى ومبسوط وتمام التمام
حتى لو بقت الحالة زفت الزفت
لأن ببساطة أنا معايه حاجة أنا اللى مختارها
وكمان أنا واثق فيها
لا فكرت فى عيوب ولا مميزات ولا بلا أزرق

هل الثقة تمنح لأى حد ؟
هل ممكن أقابل حد وأمنحه الثقة دى بالساهل كدا
حتى إن قلت للطرف التانى أنا واثق فيك ؟
لاء طبعا
الثقة دى بتتكون مع الأيام ومع المواقف المختلفة
الحياة عاملة زى إختبارات
كل ما تعدى إختار معين مع الطرف التانى
بتثق فيه أكتر وبتثق فى رأيه وتفكيره وحبه وفى كل حاجة
كل أما بتشوف هوا بيضحى قد إيه
هوا بيفكر فى إيه
بيشوف الحياة إزاى
بيحافظ عليك إزاى
مش مهم يكون فاشل ولا ناجح ولا مستواه ولا أى حاجة
المهم إن إنته تكون واثق فى المعدن
الإنسان كمان ليه نواة زى البلح كدا
هل أنته واثق فى نواة الإنسان اللى قدامك
هل إنته واثق إن جواه حاجة حلوة مش صفيحة زبالة ؟
دا هوا المهم
ممكن يكون فى عيوب
مفيش بنى آدم كامل
لكن اللى أنا شايفه إن الناس بقت بتتعامل مع الطرف التانى
إنى بعترف بالحب وبقول إنى بحبك ببساطة جدا
تبعا لميزات وعيوب وهتريحنى ولا لاء وهل هتمتحنى الحنان اللى انا مستنيه ولا لاء
بقينا بنتعامل مع الحب على أساس ان اللى قدامنا حلو
طيب بعدين بقى
لازم نركز فى المميزات والعيوب عشان البطيخة متطلعش قرعة
نحن فى زمن البطيخ
هل لما البطيخة تتفتح هل هتعجبك وهتبقى تمام التمام ؟؟؟
(( دا بعد الجواز لأن مش كل حاجة بتطلع فى الأول كدا وبتلاقى كل حاجة إشطة ياريس فى الأول ...أكيد فى حاجات مش بتظهر غير بعد الجواز
أساسى ))
هل خلاص الحب بقى بالنسبة لنا مميزات وعيوب وإتفاقات وشوية ورق ؟؟؟
هوا لازم نتفق الأول قبل أى حاجة ؟
يعنى مثلا
أنا عن نفسى وبالنسبة لى شايف إن الراجل
اللى هوا الراجل
الراجل
الراجل اللى هوا بيحتوى زوجته بحنانه وبحبه وبعطفه ومش بيحرمها من أى حاجة ولا بيبهدلها ودايما عنده معززة ومكرمه
وبيحاول يسعدها
واللى بيعرف يفكر فى بكره
محدش يفهم أى حاجة زى أشباه الرجال اللى ماليين الدنيا دلوقتى
الراجل ليه مطلق الحق فى السيطرة على بيته وهوا صاحب الكلمة الأولى والأخيرة
هل معنى كدا إنها هتعيش صفر عالشمال ؟

لو فكرت فى كدا يبقى هى مش بتحبه
نسيت إنه بيحبها
نسيت إنها كل حياته
إنها أهم حاجة فى الدنيا ومستحيل يكسر نفسها أو يدايقها أو يخليها تغضب يوم واحد
ولا حتى دقيقة واحدة
يعنى لو إتناقشوا فى حاجة وموصلوش لحل
لازم هى تسمع كلامه
لأنها ووووووووووواااااااااثقة فيه وفى رأيه
واثقة فى حيه وإهتمامه بيها وإنه عمره ما هيرضى بحاجة تزعلها
ولا هيمنع عنها حاجة زى الشغل مثلا عشان مجرد إنه يذلها وتبقى محووجة له على طول زى ثقافة رجالة كتيررررر أوى
الثقة
الحب
الإحترام
الإهتمام
الطاعة
فين المعانى دى ؟؟؟
هل يعرف البعض إن فى الصعيد اللى الناس بتفتكر إن هناك الست مش واخده حقها نهائى وبتتبهدل
هل يعرف البعض إن الست هى اللى بتحرك الراجل
بتفكيرها وحبها وحنانها وعقلها الراجح
مش الكل
أنا عن نفسى مكنتش أعرف لحد ما شفت
سواء فى الريف
أو فى الصعيد
لكن عندنا فى المدينة بيحصل كدا
الحقيقة إن الست لما بتسلم للراجل جوزها وتمنحه حياتها وروحها وتحبه
ضعفها هوا مجرد قوة أخرى لا يعلم عنها العالم شىء
ضعفها هوا مطلق القوة
لا يمكن واحدة هتروح تهزق جوزها وتقوله يلا يا جزمة هاتلى عربية
لكن لو جوزها دا بيحبها وبيتمنى لها الرضا لأنها كل حياته وروحه
مش هيتردد ثانيه فى منحها أى حاجة فى حياته حتى لو هيموت بعدها
لأنها فى اللحظة دى بقت هى كل حاجة
ربنا يهدى الجميع ويوصل الحقايق دى للستات ويفوق الرجاله
مستحيل منح الثقة
بدون التأكد من الطرف التانى
بدون رؤية الطرف التانى تحت كل الظروف وتحت كل الضغوط
هل هيفضل ولا هيسيب حبه دا يضيع مع التيار
هل هيتمسك بالحب دا لآخر لحظة
أحيانا عن نفسى ممكن أخفى حقايق وأسيب العيوب تظهر وجوانب الضعف
عشان أشوف الطرف التانى هيعمل إيه
ولو مفهمش معنى الحب ولا حبنى
يبقى خلاص مع ألف سلامة
شاب فقرى


هناك 16 تعليقًا:

بيطرية ومش بايدى يقول...

انا قولت اجاى احجز مكان واصبح
ايه صاحى ولا ايه
اكيد كده مش اول تعليق

بيطرية ومش بايدى يقول...

باشا اول تعليق
ونبتدى الاحتلالالات ولا اييييييه

just waiting يقول...

هيييييييييييييييييه
اول تعليق :)

just waiting يقول...

ربنا يهدى الجميع ويوصل الحقايق دى للستات ويفوق الرجاله

محدش يفهم أى حاجة زى أشباه الرجال اللى ماليين الدنيا دلوقتى

اولا في مقوله بتقول ان الرجالة ماتو في حرب 73
ثانيا بعد كل الكلام اللي قولته دا وعندك حق طبعا في كل كلمة فيه انا بتفق معاك في كل حرف طبعا مش لاقيه حاجة اقولها اكتر من كدا

شاب فقرى يقول...

بيطرية
منورة باول تحليق :D

شاب فقرى يقول...

just smile
منورة التعليقات :D

عشان الناس تفوق لازم تتصدم
وعشان تغير تفكيرها لازم وقت كافى من التأمل والتفكير
ودا مش متاح
كل واحد بيجرى ورا حاجات تانية وناسى اهم حاجة
كل واحد خايف يراهن على اسهم معينه لانها خرسانة من وجهة نظره زى الحب مثلا وبيدور على اسهم تانية كسبانة مش هتحقق له السعادة :)

نورتى :)

ولسه فى رجاله والله

:D

فقرى

سلمى يقول...

الحب الحقيقه تلك الجوهره المكنونه صعب وجودها
لذا انا دائما اخشى من المستقبل
تحياتى

سلمى يقول...

ثوانى بقى
انا كتبت التعليق ومكنتش شوفت الكليب
هو انت على اى اساس حاطط اغنيه هندى
هههههههههه
لاء خد بالك انا بفهم انجليزى بلعافيه تحط هندى
طب ترجم بقى

قلم رصاص يقول...

"لكن اللى عايز أوضحه بإختصار
إن الثقة دى حاجة لا يمكن منحها لأى حد
مش أى حد نقرر إننا هنكمل معاه حياتنا كلها بحلوها ومرها
مش أى حد هيكون معانا طول المشوار"

أجزت وأنجزت ياكريم

ـــــــــــــــــــ

على فكره الشيكولاته وصلتني النهاردة
صلاح كان عندي ..

وميرسي جداااااا ياكريم على لافتتك اللطيفة دي ..بجد انت انسان طيب وعندك زوق عالي.

معايا اداة الجريمة وهصورهالك .. قصدي الورقه الفاضيه يعني ههههههههههههههه

تقبل مروري

شاب فقرى يقول...

ٍلمى

كلنا بنخاف من المستقبل
دا شىء طبيعى جوا كل البشر
لكن المهم ان الخوف دا مش يمنعنا من أداء أفعال وإتخاذ قرارات مهمة جدا فى حياتنا

بالنسبة للترجمة
كنت ناوى أنزلها بس قلت البوست هيطول
فبلاش :D
تحياتى
نورتى
فقرى

شاب فقرى يقول...

قلم رصاص

مبروك الشوكلاته يا صديقى الطيب :)


عقبال ما اشوفك وتجيبلى ديك رومى :P
تحياتى يا غالى

شاب فقرى

غير معرف يقول...

الثقه شيء صعب جدااااااا

يمكن كمان يكون مستحيل في الزمن ده

تحياتي

Ana keda يقول...

واو
اول حاجة اقولك عشان ملحقتش ارد عالبوست الى فات
اه صاحبنا ده قالى ع كزا علامة كده عينيه دايما بتبقى مسقطة يعنى كده وفى ناس تانية والله كانت بتاخد حجات تانية وبتبقى معلمة فى جسمها بغباء
ولسانه بيبقى تقيل سنة فى وسط الكلام ويبقى عامل دماغ اصل احنا كان فى ناس بتعمل كده وهى فى الكلية وساعات كتير كنا بنشم ريحة حاجة مش ولابد ولما سألت عرفت بقى
وفى ناس كانت الكلية عارفة من الاخر انهم حشاشين كده وش انا كنت بتنح لان فى ناس كنت بقول عليهم غاية فى الاحترام بنظرية البنت الهبلة الى كنت عليها زمان وكنت بقول ادام هو كويس خلاص بس لما ابتديت ابص تانى للموضوع انا تنحت بجد جامد
ام هند يعنى
انا قريت والله القصة دى قبل كده وكنت متنحة اوى لانى بحب عبد الوهاب مطاوع والقصة دى كانت تحفة اصلا وكنت متنحة اوى وانا بقراها وعاملة اقول هو فى كده وخصوصا لما كانوا راحوا سكنوا فى شقة تانية ومكنش فيها غير مرتبة بس وكانت البنت واقفة جنبه ومسانداه جدا
ما انت لو جيت تدور ع رجل من الى انت بتقول عليهم دول موجودين والحمد لله انا جوزى حد مريحنى جدا ومحتوى بجد كل حاجة فيا مع ان تركيبتى انا صعبة اوى ولحد ناو الحمد لله مفيش عيوب من الخطيرة او من الى لسه مظهرتش مع الجواز والحمد لله فى ثقة اه وفى اخلاص وفى حجات تانية كتير
يمكن لانى بحب بعد مواقف كتير اوى
مش من النوع الى بيحب بسهولة كده ويدى كل الى انت قولت عليه لكن فعلا فى ناس بتبقى محتاجة حب ومحتاجة تحس بده اوى واول حد تلاقيه بيبقى كل حاجة بتديه ثقة وامان وحنان وكله
وفجأة بيحصل أوبا هوبا وكلو يروح وتفضل تعيط وتتعقد ولما ييجى الى يستاهل مياخدش حاجة عشان هى مبتكونش واثقة فى قرارتها
أنا فى رأيى الموضوع للراجل معاك جدا وهو الى فى ايده يخلى بيته جنة او نار ويكون متفهم وحنين وطيب وابن حلال زى ما بيقولوا يتقى الله فيها وهى كمان تكون متقية ربنا فيه
صدقنى لو وصلت انهم يتقوا ربنا ف بعض الحدوتة تبقى خلصت
والطيبون للطيبات
مننساش دى
ياما فى ناس كانت فاكرة انها هتختار وهتعمل وف الاخر البطيخة بتطلع قرعة قرعة
ربنا يكرمك ويديك الى تصونك وتستاهلك
:)رغاية برضه

غير معرف يقول...

السلام عليكم لى تعليق على البوست الشعر الابيض الاحساس بالكبر او بالسن مش بيكون احساس خارجى دة بيكون احساس داخل الانسان يعنى تيجى تشترى ملابس تقول لا اية دة انا البس الالوان ديةلالالا حتى لو شكلك صغير وحلو لكن الروح الل جوة هى اللى بتحكم وناس بتعيش حياتها بالطول والعرض وناس بتكتئب وهى فى اول حياتها وناس بتشيل المسئولية فمتخدتش بالها غير بعد فوات الاوان ...المظهر الخارجى مش هو الاساس

Tamer Moghazy يقول...

هل ممكن أقابل حد وأمنحه الثقة دى بالساهل كدا
حتى إن قلت للطرف التانى أنا واثق فيك ؟
كلامك صح يا ابو كريم لاني ديما باقول كده..وديما يقولوا عني بطيء في قراراتي شوية وانا شايفها تأني احسن ما اخد قرار بسرعة وارجع اندم عليه وممكن مش ينفع نصلحة تاني.

Tamer Moghazy يقول...

"عن نفسى ممكن أخفى حقايق وأسيب العيوب تظهر وجوانب الضعف
عشان أشوف الطرف التانى هيعمل إيه
ولو مفهمش معنى الحب ولا حبنى
يبقى خلاص مع ألف سلامة"
لأ ممكن يفضل في حياتي..بس مش ها يدخل جوة الصندوق ويشوف اللي جواه.