الخميس، 4 فبراير 2010

إلى سيدى الفاشل



السلام عليكم ورحمة الله وبركاته عزيزى الفاشل
يارب تكون بخير
أخوك فى الكفاح بجد بيتمنى يشوفك
لأن الفشل بقى اليومين دول سهل أوى
والناس كلها بتفشل وبقينا كتير أوى
بجد مش قادر أقولك الفشل لم قد إيه
والله يا صاحبى ما عارف أوصفلك إزاى إن الفشل بقى بيلم أوى
حتى الناجحين والكويسين والأقويا بقوا بيتمحكوا فى الفشل
وبيدوروا عليه بمنكاش
تعرف يا صديقى
واحد صحبى قابلته إمبارح يادوب لسه طالع من دوامة الإدمان
ومتعالج وحالته تمام ومر بفترة الكل وقف معاه فيها وكفايه إن أهله ذات نفسهم وقفوا جمبه
بصراحة الراجل منظره كان يفرح
لأنه من زمان وأنا بعتبره شخصية قوية وبيفكر وبنى آدم بجد من اللى خلقهم ربنا

وأهله ناس كويسة وعايزينه ينجح ويبقى كويس
وبعد ما عملنا لقاء إحنا التلاتة اللى أصدقاء من أيام ثانوى
وسلمنا على صاحبنا التالت ومشيناه وركبناه العربية لحد بيته
لقيت صاحبى اللى المفروض شخصية كويسة وبيفكر وربنا كرمه وإتعالج
بيطلع الموبايل وبيتصل بديلر عشان يجيبله حشيش
آه والله
الناس يا أخى مبقتش عايزة تنجح
مهما توفرت لها أساليب النجاح
متشوفش غير النص الفاضى من الكوباية
وأحيانا نظرهم بيضعف تماما ومش بيشوفوا الكوباية :D
طيب وهنروح بعيد ليه يا صاحبى
تعالى أوريك أبسط مثال
قصة حب بين تيفا ونونا
قصة حب رهيبة إستمرت سنين وسنين فى الكلية
طبعا كلمة كانوا بيعشقوا بعض دى شوية وتعتبر تافهة وملهاش معنى جمبهم

والراجل الصراحة كان عامل اللى عليه

كل أجازة يسافر لقرايبه فى هولندا ويقعد يشتغل هناك شهرين تلاتة
يرجع بحوالى عشرين ألف ولا حاجة يدفع منهم مصاريف الكلية والباقى يصرف بيه عالبيت وعلى أهله
بجد حاجة تبسط لما تشوف قصة حب جميلة وفى طريقها للنجاح وتبقى حياة زوجية سعيدة
والحمد لله إتخرجوا السنة اللى فاتت الأتنين وتقديرات كويسة
وصاحبنا تيفا راح يتقدم لأهل البنت
عشان يخطبها
شكلك فاقس الحوار وعارف أنا بتكلم على إيه
أهلها رفضوا
دا لو كان من الكفار مكانوش عاملوه كدا
فما بالك بشاب كويس وبيحب بنتهم وعلى استعداد يسافر آخر الدنيا عشان يسعدها
مش هطول فى الحكاية عشان عارفك بتكسل تغسل وشك الصبح
صاحبنا بعد ما إترفض زهق وإتنرفز وإتجوز بنت كانت شغاله معاه فى بلاد برا
والله زى ما بقولك كدا :)

بنت هولندية
هتقولى مش فاشل
ياعم روح إلعب بعيد
بقى فى حد يسيب بنات بلده كلهم اللى 85 % منهم مثقفات وناجحات ومتدينات ومتربيات ويروح يتجوز واحدة ملهاش مله أصلا ومش من بلده كمان
من وجهة نظرى هوا فاشل
المهم يا صاحبى
سيبك من كل الناس اللى بتتمحك فى الفشل دى
إنته عامل إيه وإزاى المدام والأولاد
وأوعى تقولى عديت التلاتين ومفيش شقة ومفيش زوجة ومفيش أولاد ومفيش داعى
تصدق أنا خلاص قربت أتنقط
الناس مبقتش عايزة تشوف الجانب الحلو فى الحياة
هتقولى إن حالتك لسه متكحرته وزى الطين
هقولك
إن دايما الجانب الحلو فى الحياة إننا عايشين وقادرين ناخد نفس
لاء إوعى تفهمنى غلط مش نفش من السجارة
يعنى قصدى إنك عايش وربنا كارمك بالحياة
يعنى لسه فى إمكانية فى التغيير تقدر تتغير وتبقى حاجة ميه الميه وتمام وفل الفل
لاء يا صديقى إوعى تفهمنى غلط وتقول إنى تركت معسكر الفاشلين بقى وخلاص مش هكافح فى الفشل معاكم أنا بس بحاول أنقص المعسكر واحد لأنه خلاص بقى زيادة بشكل أوفر أوى وبجد بقى زحمة وأنا عندى حساسية من الزحمة

تعرف إن نظرتنا للحياة هى اللى بتشكل دايما إختيارتنا
يعنى مثلا : ممكن إنته تشوف المجال اللى إنته فيه ملوش مستقبل وزى الزفت ومش بيكسب وحالته طين وبينقرض بس

أحب أقولك يا صديقى إن فى شركات عالمية متخصصة فى صناعة حاجات تافهة وهبلة أوى
لاء وإيه معتمدة وعليها ختم
يعنى تيجى تشترى مثلا جزمة (( صراحة مش لاقى حاجة أقل من كدا ))
ممكن تلاقيها أمريكانى أو تلاقيها هندى أو حتى بتنجانى وعليها ختم الشركة أو ختم عم الحاج السعداوى أشهر صانع أحذية فى بلده
تخيل واحد شغال فى صناعة الجزم ولسه مستمر وعايش وصناعته متقدمة و مبسوط
ليه مش تكون زيه مهما كان مجالك مقرف
صدقنى لو حبيته وتعبت وعملت اللى عليك هتلاقى الوسيلة اللى تخليك أحسن وأحسن وأحسن
وتسيب المعسكر بقى

دا يعتبر الجواب الأخير اللى ببعتهولك يا صاحبى
أنا جهزت خطة للهروب من المعسكر
بجد لو ناوى تهرب معايه
إبعت لى جواب
بس صدقنى على ما يوصل هكون هربت
هتوحشنى يا دزمة
مع تحياتى وإحتراماتى
أخوك يا أبو الشباب الفقرى الكبير
ملاحظة : كتبت بوستات كتير أوى الفترة اللى فاتت بس مكنتش بنشر لأن مفيش وقت للتعليقات والردود
وهنشرهم إن شاء الله اليومين دول بس أكيد مش بمعدل سته يوميا
بالمناسبة : أنا فزت فى مسابقية خيخيه وهاخد جايزة عشرة جنيه :D
حاليا مشغول بجهز عشان أرجع لشغلى تانى وأستمر
وكان دا أول حاجة جت فى بالى إنى أكتب جواب وداع لصديقى الفاشل

وحشتونى

لكن خلاص رجعت الحمد لله

(( تم فتح الغير معرف فى التعليقات ))

هناك 33 تعليقًا:

حبات التوت يقول...

حلوة الروح المتفائلة دى
وحلوة نبرة الصوت اللى كلها امل فى بكرة
يارب ديما

حلوة فكرة جواب الوداع دة على اله مش يبقى فى جوابات تانية بس ويبقى اخر جواب بجد

اية كمية كلمة حلوة اللى انا بقولها دى
اية الحلاوة دى ههههههههه

شاب فقرى يقول...

ويلا

دى حلاوة روح :D

يارب فعلا يكون الخطاب الاخير

نورتى

فقرى

غير معرف يقول...

ايه دا

ياناس ياهوو لسه فى امل


صبرنى يارب

انا فعلا عندى اكتئاب بس بضحك برضه

ودا علشان ببص لنص الكوبايه المليان :)

شاب فقرى يقول...

حنين

نحن من نصنع الإكتئاب لأنفسنا

ممكن طلب :

سلفينى الكوباية بتاعتك اللى فيها نص مليان :)

فقرى

promise is promise يقول...

يا خبر ابيض ايه ده

ده انا بعد اللى قريته ولا شايفه نص كبايه فاضيه ولا ملان

انا هاكسر كل الكبايات اللى عندنا

بس سيبك انت

سيبك من كل طقم الفناجين والكبايات والماجات والحوارات دى
وراسم حياتك بريشه ملونه وعيشها
قلبت كاروهات معاك عادى ياعم حطلها حبه كلور تقلب ابيض
ولو عايزها ملونه حطلها كلورس بالوان
يعنى من الاخر حياتك انت اللى بايدك تخليها ناجحها وانت اللى ممكن تخليه حاجه تانيه خالص

تحياتى

شاب فقرى يقول...

promise

يعنى من الاخر حياتك انت اللى بايدك تخليها ناجحها وانت اللى ممكن تخليه حاجه تانيه خالص


دايما بتجيبى من الاخر

انا مش بتاع كوبايات

انا عندى الزير الخاص بتاعى :D

فقرى

سلمى يقول...

فى ناس عايشه بلبركه
يعنى لا بتفكر فى الحلو ولا الوحش
او بتفكر تبعد عن الوحش وتعمل الحلو بس زى ما هى
تفتكر هى الناس دى تعتبر فاشله؟

promise is promise يقول...

طب خلاص بيس ياعم بدال عندك الزير بتاعك همتك بقا


فضيه واملاه من الاول

بس شيد حيلك انت الاول

الشاعر الفنان أحمد فتحى فؤاد يقول...

أنا قلت لك قبل كده إنت إنسان جميل جدا

أحييك يا أخى على البوست ده

و ربنا ينجحك و ينجحنا جميعا يا رب

بنت الصالحين يقول...

جميلة جدا تدوينتك

كانو بيسموني المدونة المتفائلة

وشكلك منضم لفريق المتفائلين ان شاء الله : ))

تدوينة جميلة واسلوبها قوي

غير معرف يقول...

بما انك سمحت لكل من هب ودب يعلق عندك
قصدي الغير معرف يعني فاسمح لي باعتبار حد مغمور اعلق عندك واقولك:

ازيك ياكرررررررررررررررررريم

هههههههههههههههههه

قلم رصاص ياد

قلم رصاص يقول...

سعييييييييييد جدا والله ياكريم بكلامك النهاردة
انا بحب التفاؤل اوووووي وزي ماانا قولت مره لحد مش فاكر هو مين في مدونته :

اني عندي نموت من التفاؤل احسن مانموت من التشاؤم

ولازم فعلا نبص للجانب المشرق من حياتنا
ماهو من غير امل مش هنقدر نكمل
الامل وقود الحياه ياصديقي

وايه رأيك انا عاوز اهرب معاك
ههههههههههههههههه

على فكره انا صاحب تعليق الغير معرف اللي ممهور في اخره بــ قلم رصاص

حلوة ممهور دي انا عارف هههههه

سلام ياصاحبي

romansy يقول...

جميل جمال
يا عم كريم
ودع فشلك واتمنى النجاح دايما
وداع وداع لعمنا الفاشل
بس بقى الفشل مش مقياسانالشخصيه كويسه ولا وحشه فيه ناس بتحاول تنجح وبرضه بتفشل تقريبا الفشل صاحبهم قوى قوى

جارة القمر يقول...

حياتك انت اللى تمشيها مش هى اللى تمشيك لو كل واحد فكر حتى لو فى انجاز بسيط فى حياته هيحس انه عمل حاجه فى دنيته

مش بحب كلمة فشل دى لان كل واحد اكيد عمل حاجه مفيدة فى حياته مافيش حد فاشل على طول دى كلمة بنوهم بيها نفسنا لاننا مش لازم ننجح فى كل حاجه بنعملها دى طبيعة الحياة مش هنسميها فشل بقى

ازيك يا كريم ؟ و ايه اخبارك ؟

mohamed ghalia يقول...

كويس اننا ودعنا عمنا الفاشل ده
يلا يغوووووووووووور

Lady E يقول...

عجبني جدا البوست وجه في وقته بجد

"تصدق أنا خلاص قربت أتنقط
الناس مبقتش عايزة تشوف الجانب الحلو فى الحياة "

أينعم
كل واحد بيبص على مشكلته انها افظع مشكلة في الحياه وبينسى ان في حاجات كتييييييير حلوة في حياته ولو قارن نفسه بغيره هيلاقي نفسه 100 فل وتمناشر واحسن من ناس كتييييير

"تعرف إن نظرتنا للحياة هى اللى بتشكل دايما إختيارتنا"

انا دايما بقول كده وفعلا المبدأ ده بيتحقق في كل حاجه في الحياه

يعني مثلا في الدراسة اليوم اللي بشوف فيه ان الامتحان هيجي صعب بيبقى فعلا صعب جدا مع انه ممكن يكون امتحان بسيط بس انا شايفاه صعب فبيصعب
والعكس صحيح طبعا
ممكن يبقى امتحان مكلكع وعلشان انا شايفاه سهل وبسيط فبيبقى سهل

بجد بجد من أحلى البوستات اللي قرأتها في مدونتك

ربنا يكرمك ويرضى عليك ويفرح قلبك ويجعلك من الناجحين ويوفقك في شغلك وحياتك

ومبروك على الفوز في المسابقة الخيخية

غير معرف يقول...

صباح الخير يافقرى
شكرررراااااااا واكيد انت عارف ليه :)
بس ايييييييييييييه التفاؤول دا
ايييييييه الامل اللى مالى المدونة دى
مش ممكن :)
مش مشكلة ان الناس تشوف الجانب الحلو
المهم انت تكون لابس النظارة البيضة وتشوف الحياه حلوة
ومتيأسش ولا تتشائم
وبص للجانب المليان
لكن شكل المية مقطوعو لاايام دى والكوباية فاضية هههه


يعنى قصدى إنك عايش وربنا كارمك بالحياة
يعنى لسه فى إمكانية فى التغيير تقدر تتغير وتبقى حاجة ميه الميه وتمام وفل الفل

هو دا اللى اقصده بالظبط

انا ليه نصيب فى العشرة جنيه مش تطمع فيها لوحدك ماشى

لك منى كل احترام وتقدير
لا اله الا الله
عمو سماااسم مر من هنا ههههه
همسات

غير معرف يقول...

لا الكوبايه اتكسرت :)

تحياتي

hend anwar يقول...

مدونتك رائعة
بالتوفيق

Ana keda يقول...

والله برافو عليك هو فعلا المعسكر لم جامد اوى
وحلوة الروح دى هو ده يمكن عشان يوم 3-2
الى انت قولت عليه :)
انا ممكن كنت هستغرب لما قريت ع الولد الى رجع تانى للادمان ده
بس رواية ربع جرام بجد خلتنى مستغربش لاى حاجة وخصوصا انى كنت بقراها السنة الى فاتت لما كنت فى الكلية ولما كنت بسال واحد من الولاد معانا كان يقولى اه ويحكيلى حواديت اجمد من الافلام وانا افضل متنحة وبعدين قالى ع طريقة اعرف بيها ان كان الى قدامى ده بياخد مخدرات ولا لا
وليك تتخيل كمية الصدمات بقى انف ى ناس قريبة كانت معانا فى الكلية وطلعوا كده
انا بقول كده ليه؟؟
لان بجد المعسكر اتملى عالاخر ولما مرة حاولت مجرد محاولة فاشلة انى اقعد مع حد منهم كان من اصحابنا للاسف طلعت منها خسرانة
لانهم فى جزء معتبره هروب واحسن حل
ام هند يعنى فعلا عندك حق مشكلة البلد دى ان الكل عامل نفسه ضحية لحد ما بقينا فى مجتمع كله ضحايا ومحدش بيعمل الى عليه

فى كلمة حلوة كنت سمعتها مش ضرورى نبص للنص المليان من الكوباية المفروض نبص حتى لو فيها بوء واحد بس
رغاية انا اوى معلش

Rosie يقول...

انا مش عارفة أنا قرتلك كم مرة قبل كده..لأنى تقريبا كنت عايشة فى غيبوبة(امتحانات و خنقة و بتاع)..المهم يعنى إنى ركزت جدل فى كل كلمة كتبتها لدرجة إنى فى حاجات كنت برجع أقراها مرة تانبة لو مدخلتش كويس..طلعت اكتشاف يا شاب فقرى..عجبنى أوى أسلوبك و طريقتك و الأهم .الفكرة...
آه بقولك مستنياك فى معسكر الناجحين..
سلامييييى

سمع هوص (Abo 3li) يقول...

ويلكم باك ياعم الفقري

مستنيين فقرك

بيطرية ومش بايدى يقول...

فقرىىىىىىىى اللى مش فقررررى خالص
هلا اهلا باكتر كرمللة مسكرة
شوفتها عامل ايه يا بونى
اخبارك ايه واخبار الدنيا معاك ايه
بصراحة البوست فتح نفسى تصدق عايزة اروح اذاكر دلوقتى بعد ما المعركة خلصت وطلعت بدون خساير بس بيتيهألى فى جرحى كتير ربنا يستر
لالالا بجد كل ما اجاى افكر فى اسمى افتكرك وانت بتقولى حب ماتعمل كى تعمل ماتحب
وانا تقريبا خطيت اول خطوة فى حب الكلية
عقبال الباقى بقى

بجد بجد ليك وحشة والقاعدة من غيرك وحشة كان نفسى اجيلك بس الحرامى سرق الجحشة واللى انا كنت بشرح عليها كمان

مساء الفل

Sam Sh يقول...

إشطة !
ياللا نهرب يا عم .. ناوى تنط السور ولا ترشي الحارس ؟؟

لا .. خلينا جد شوية .. بجد ويلكم باك .. فرحت إنك طلعت من الموود الصعب اللى إنت كنت فيه من فترة ..

أبو العريف يقول...

فقري

مبروك العوده

طبعا انا كنت متخيل ان الجواب ده ليا انا

لحد ما وصلت للنهايه لقيت بتقول يا دزمه

وبما انك محددتش المقاس فاكيد مش انا


ايه كل الفشل ده


ربنا يوفقك يا باشا و تبقي دايما بعيدا عن الفاشلين

غير معرف يقول...

فكرتك بتقولى عليا :D

يا مسهل يارب.

صدى الصمت - عاشقة الورد - يقول...

الحقيقة أنا أعجبت بالرسالة دى جداً جداً وقرأتها أكتر من مرة
أحييك عليها

شمس النهار يقول...

حمد الله علي السلامة

وعلي بلد الناجحين وديني

::))

سلامي

ghada mOhsen يقول...

حلو كتير البوست ده احييك عليه بجد ...

المفروض اصلا نحذف كلمه فشل من قاموس حياتنا .. ده لو عايزين حياتنا تستمر ...

او نبص دايما للجانب المشرف زى مانت قولت ... لان لو انت فشلت يبقى قربت من النجاح اوى بس المهم ماتخليش للفشل طريق الى قلبك وعقلك عشان تحبطهم ...

بجد تسلم على هالانتاج الرائع ...
... ;) ,,, ;) ...

وصف الاحساس يقول...

هو بالنسبة للناس ال بتتمحك في الفقر ممكن عشان ما اتعودتش علي الفرح فدايما لازم تخلي الفقر قدام عينها عشان ما تنساهوش لو لا قدر الله رجعوله فجاه
وممكن عشان خايفين من العين والقر جايز
بس هو فعلا بقت حقيقة ان العدد زاد كتير
بالنسبة للكوباية النص فاضية او مليانه فدايما تلاحظ ان بعد كل نقطة فرحة حاجة تخاف منها
ممكن ما تعرفش تفرح بجد فتشوف الكوباية حتي لو علي اخرها ان فيها حته ناقصة
تحياتي

شاب فقرى يقول...

سلمى

مش لازم الواحد يعيش بالبركة
لازم يكون راسم لنفسه طريق
اللى عايش بالبركة دا لو وصل لحاجة حلوة مبيبقاش ليها طعم
ولو وصل لحاجة مش كويسة بطريقته دى بيرمى اللوم كله عالظروف

الفشل حاجة كبيرة اوى مينفعش تتكتب فى سطرين وتختلف على حسب وجهة نظر كل واحد مننا ليها
يعنى مثلا فى ناس بتشوف ان الفشل هوا انك مش تعرفى تحققى حلم من احلامك فى الحياة
فى ناس تانية بتشوف انه بعد ما تحققى الحلم تضيعيه من ايدك هوا دا الفشل
بس كدا كلام كتير مش عارف اقول فيه ايه ولا ايه
نورتى :)
فقرى
-----------------------
promise
اشطات اشطات :)
سيتم ملىء الزير حالا

:)

فقرى
-----------------
الشاعر الفنان أحمد فتحى فؤاد
أهلا وسهلا بك أخى الكريم
شكرا لرايك فى البوست :)
خالص تحياتى واحترامى لتواجدك
شاب فقرى
------------------
عاشقة الفردوس
شكرا لرايك فى التدوينة
هوا المفروض الانسان يبقى متفائل بس يحسب لكل حاجة برده :)
نورتى وسعيد بالزيارة
فقرى
--------------------
غير معرف
قلم رصاص
حبيب هارتى :)
ماشى ياعم
اطلق سراح كلماتك فى الغير معرف
فقرى
--------------------
قلم رصاص
على رايك
بس انا مش عايز اموت يا صديقى
عايز اكمل :D
هوا لازم اتفاءل واموت يعنى :P
عبيبى
منور
فقرى
---------------------
رومانسى
مش معاك فى ان ناس بتحاول تنجح وتفشل
عشان لو عايز تنجح مينفعش تقول هحاول
اسمها هنجح
وطز فى الظروف واى حاجة تانية
فاهمنى
بلطجة مع الدنيا والظروف والحياة :)
لازم تحاول تعيش مع الحياة دور عسكرى الامن المركزى
تواجه الصعاب
وتبقى اسد لا يخاف
وتبهدل الظروف :D
منور يا صديقى
فقرى

شاب فقرى يقول...

جارة القمر
مختفية بشكل غريب
حمدا لله عالسلامة
مبسوط انك بتزورى المدونة
:)
الحمد لله انا تمام وبخير
يارب يكون حالك أحسن منى
فقرى :)
----------------
محمد غاليه
هكررها دايما يا اخى
انى احبك فى الله
تعليقك وتواجدك بيسعدنى والله
:)
------------------
lady E
نورتى
اللهم آمين يارب
بيبقى نفسى اغير نظرة الناس للحياة
بس مش بعرف
لان كل واحد بيكون فاكر ان ظروفه دى ملهاش مثيل
مع انه هوا لو فكر هيلاقى متين مليون طريق لحل مشكلته
بس يفكر ويقول يارب
الفشل الناس بتستسهله أحيانا عشان مش تتعب نفسها فى الوصول للنجاح
بس كدا :)
نورتى ويارب يسمع منك يارب
وتكونى دايما بخير
شاب فقرى
-----------------
عمو سماااسم
ازيك
يارب دايما بخير
ويارب دايما بتزورى المدونة
طبعا انتى عارفة انى هقول عفوا ودا واجب علينا وعارفة قصدى على ايه :)

لو عايزة من العشرة جنيه نو بروبلم
بس الاول نتفق
ممكن واحد فى الميه
رضا :D
صح ؟؟؟
:P
محمد رسول الله
إيه أحوال الإمتحانات ؟
يارب تكون مرت على خير
فقرى :)
--------------
فتاة من الصعيد
الكوباية اتكسرت
والنعمة ما عرفت ولا حد قالى :(
نورتى :)
فقرى
----------------
sun of freedom
نورت المدونة
شكرا جدا لرايك
فقرى :)

------------
ana keda
اولا
ايه الطريقة اللى زميلك قالك عليها
قولى اهوه منكم نستفيد
فعلا فى ناس كتير بتعيش دور الضحية لانه الدور الاسهل واللى بيريح النفس وبيخليها تنسى الالم بسرعة لانه مش بيحس انه ظلم حد
وبالتالى بيكمل حياته عادى جدا
لكن ان ربك لبلمرصاد :)

نورتى ومستنى ردك
شاب فقرى
------------------
rosie
اسعد لحظات حياتى لما بلاقى حد بيقولى انا قريت لك واستفدت
شكرا بجد ليكى ويارب دايما تكونى بخير
هل ياترى انتى متاكدة انك من معسكر الناجحين :D

نورتى
فقرى
---------------
سمع هوص (Abo 3li)
انا رديت عليك فى مدونتك يا جميل :)
نورت ودمت بكل ود
فقرى
---------------
بيطرية وبكره هيبقى بايدك

انا مبسوط برجوعك ويارب تكون الامتحانات خلصت على خير:)

والله ما فى اطيب منك

سعيد برجوعك مرة تانية :)

وخلاص مش زعلان
بس انا مكنتش زعلان من كدا على فكرة
كنت زعلان من حاجة تانية
بس خلاص مش مهم
عود احمد
:)

تحياتى ليكى
وازاى صاصا عامل ايه ؟؟
نورتى كالعادة
فقرررررررررررررررررررى :)
----------------

شاب فقرى يقول...

sam

الحمد لله كل حاجة بتمر
حتى العمر بيمر ويمشى

بس مكنتش فى مود وحش اوى للدرجة دى
لا تقلق
الفقرى اقوى من كل دا
كريم
--------------------
ابو العريف :)
حبيب قلبى والله :)

اكيد مش انته ياباشا :$
انته رفيق كفاح متقولش كدا :(

نورت يا جميل
فقرى
----------------------
مستخلص
لاء يا حبيبى
اكيد مش انته لان انته والفشل والحزن فى بيسنكم صداقة قوية
واحنا شلة واحدة يا صاحبى :)
ولا نسيت قهوة فاروق :D?
نورت يا حوبى
فقرى
--------------------
صدى الصمت - عاشقة الورد
سعيد جدا انها اعجبتك :)

دمتى بكل ود
فقرى
------------------------
شمس النهار :)

نورتى
سعيد جدا بمرورك
يارب تكونى بكل خير :)

ان شاء الله هنروح على بلد الناجحين :)

إبنكم الفقرى
كريم
--------------------
ghada mOhsen
بصى
مينفعش نقول الحياة حلوة مفيهاش شر ومينفعش نقول حلوة وسكر وجميلة
لازم يبقى فى دايما الشىء ونقيضه
المهم نقدر نتغلب عالنقيض المؤلم بسرعة ونقدر نقيم ظروفنا وحياتنا وافعالنا ونقرر هنعمل ايه وايه الصح دلوقتى :)
اذن الفشل هتظل فى القاموس لاننا فشلنا فى مسحها
:)
نورتى
شاب فقرى
--------------------
wasf_elahsas
وضحى رايك من تانى لان فى نقطة تهمنى وعايز افهمها بوضوح
وهوا ان احيانا الكوباية بتكون مليانة وناقصنا حاجة
ودا اللى بيخلينا نشوفها ناقصة
يارب اكون فهمت صح
نورتى
وبانتظار زياراتك للمدونة
شاب فقرى