السبت، 23 يناير، 2010

كل سنة وأنا ...

وانا قاعد كدا بفتكر لقيت فى دماغى موقف محمد هنيدى فى جاءنا البيانا التالى وهوا رايح يقول لاحمد صيام المواطن الغلبان
هابى نيو يير
الراجل بص له بقرف وقاله انته عبيط يا لا
قاله انا خمسة وتلاتين سنة وعالمعاش ومفيش شقة ومفيش زوجة ومفيش اولاد ومفيش فلوس
قام هنيدى قاله : مفيش داعى وسابه وجرى

بسأل نفسى يا ترى هل هوصل سن الخمسة وتلاتين دا زى ما كنت بحلم فى أحد الأيام إنى أوصله وأموت
لأنى مش بحب المرض ولا بحب العجز والتعب وانى ابقى كبير فى السن
ياترى هتبقى إيه السنة الجديدة
عالعموم

كل سنة وانا بنزل أليكس كتير وأعصابى بترتاح هناك
كل سنة وأنا بروح لأصحابى فى طنطا ومش بعرف معنى الصداقة غير هناك
كل سنة وانا عالنت وعايش مرتاح ومبسوط وراضى وبقول الحمد لله
كل سنة وأنا مجنون ودماغى طقه وأى حاجة ممكن تتعمل فى أى وقت وكله خاضع للسيطرة ما عدا أنا
كل سنة وأنا معاهم وبحبهم
كل سنة وانا مدون
كل سنة وأنا منيل بنيلة ووحدانى ومش بقرب من حد وفى حالى :D
كل سنة وأنا فقرى وهفضل فقرى ودى تعتبر ميزة رهيبة مش عيب
كل سنة وأنا بسمع راب وبألف وبوزع مع نفسى ومش بنشر اللى بعمله نوهائى :D
كل سنة وأنا بحب الحياة وعندى طاقة وقوة بلا حدود ولأى شىء وقدرة على تغيير أى شىء
كل سنة وأنا طيب ودا آخر عيد ميلاد هعمله فى تاريخى


أمنياتى فى السنة الجديدة :
1- أبقى رئيس جمهورية
إن شاء الله جمهورية السنغال أو كوالالمبور أو حتى جمهورية زفتى :D
أى مكان فى العالم
المهم أبقى رئيس جمهورية
ومش عايز حد يقولى انته معديتش خمسة وتلاتين سنة والسن الرسمى مش عارف كام
2- إنى أتجوز ويبقى عندى يوسف وسلمى
وطبعا دى مستحيلة السنة دى
بس أنا بقولها كدا زى ما بنكتب الرغبات فى مكتب التنسيق
يمكن تيجى
3- أبقى مهندس it وأقدر أخلص الكورسات اللى طالع عينى فيها وأمتحن وأنا واثق من نجاحى
4- أقدر أنام مرتاح
ودى أمنية مستحيلة وأنا عارف هتتحقق إمتى
5- أبطل أفترى على خلق الله
6- أعمل عمرة السنة دى فى رمضان لانى مش عارف اخد الخطوة دى بقالى تلات سنين دلوقتى :((
7- عايز ألاقى صديق مقرب وحد قريب منى يعالجنى من جنون العظمة بانه يهمس لى كل شوية ويقولى
(( إنته مجرد بنى آدم ))
وإن شاء الله هلاقى
8- هتعشى واجى اكمل لكم الامانى
شكله هيبقى بوست صباحى :D
فقرى

تحديث :

كنت بقول الامانى الخاصة بيه

انا مش عايز حاجة والحمد لله

ولا اى حاجة حتى من اللى كتبتها

مفيش غير امنية العمرة ويارب يقدرنى انى اعملها السنة دى

انما انا مش عايز اى حاجة من الدنيا غير ان الناس اللى بتحبنى وبحبهم يفضلوا جمبى

وانى الناس اللى بتحبنى واللى مقتنعين انهم اصدقائى او حبايبى يفضلوا جمبى ويسألوا عليه حتى وإن لم أكن موجود

يعنى الفترة اللى فاتت

الشهر اللى فات بالكامل الموبايل مقفول

والحلوين اصدقائى مفيش ولا دزمة منهم خد باله انه اتقفل

طيب لو اتصلت ولقيته مقفول سيب مسج ياعم

دى اكتر حاجة زعلتنى السنة دى نقدر نقول

محدش بيسال ودى اكتر حاجة زعلتنى

حاليا انا مش مستنى حاجة من الدنيا

اقدر ارسم ابتسامة كبيرة على وشى وأقوم

لأنى متأكد إنى مبسوط وسعيد وعارف ان بكره احسن لانى واثق فى ربنا كويس اوى

عايش ولسه بعيش على أيام هواه ....
دا اللى ما بينى وبيه حب ميتنسيش
صعب انى الاقى زيه تانى فى الحياة
وعشان الاقى زيه تانى يا مين يعيش

دى اغنيه العيد ميلاد

اولا اغنيه سمعتها السنة دى

هدية اختى

:D

بدل ما تجيبلى كرتونة فيها مليون دولار جايبالى أغنيه

جتها نيلة اللى عايزة خلف

ههههههههههههههههههههههههههههه

وبكره فى تحديث تانى

ان شاء الله هيكون اطول بوست فى مدونة الفقرى

تابعونا
:D

ودلوقتى انا قايم

رديت على كل التعليقات

ونشرتهم كلهم

اى حد هيكتب تعليق من بعد 12:31
مش هيتنشر لانى ببساطة عامل اشراف ومش هبقى هنا

ادعولى بجد لان بكره شكله يوم ما يعلم بيه الا ربنا

شاب فقرى

هناك 61 تعليقًا:

روح بلا فرح يقول...

اممممممممم
كمل و انا مستنيه بقية الامانى علشان ادعيلك مره واحده ان كلهم يتحققوا
امال يعنى انا فاضيه ادعى كذا مره
انا عندى امتحان يا بشر يعنى مش فاضيه
يعنى انا قاعده اقرا روايات رعب
بص يا بنى الساعه بقت 12
يعنى
هابى بيرث داى تو يو
عقبال ......... سيبتلك تحط الرقم اللى انت عاوزه
اى خودعه
كل سنه و انت طيب
ربنا يوفقك و يهديك و يسعدك و يحقق امانيك

أبو العريف يقول...

باشا

كل سنه وانت طيب

وربنا يحققلك كل الامنيات اللي قلتها دي

معادا بتاعت رئيس جمهوريه دي

امال هقعد من غير شغل وللا ايه




حاجه اخيره

عايز اهمسلك واقولك

" يا ابني انت مش بني ادم عادي

انت شخص مش عادي

انت فوق الفظيع

انت

مش عارف اقولك ايه بس

انت

انت

انت


انت

انت ايه اللي مسهرك لغاية دلوقت

انا هروح اناااام بقي

تصبح ع خير

мαησηα يقول...

كل شوية جاية بقه .. اصل انا بحب اوى اوى الناس تبدا حاجة جديدة اياكانت بقه

اتمنالك سنة جديدة جميلة سعيدة تحقق فيها كل اللى بتحلم بيه حتى العيال ممكن يبقوا توأم عادى يعنى :)

ربنا يكرمك ويوفقك يا احلى فقرى
اختك الكبيرة منونا

عجوزة يعنى هههههههه

صوت من مصر يقول...

كل سنه وانت فقرى
واتولد فى يوم تانى بقى
واحد فينا لازم يغير يومه

طوبه فضه وطوبه دهب يقول...

كل سنه وانت بالف خير وصحه وسعاده يارب ياكريم ربنا يكرمك يارب وتكون محقق كل اللى تتمناه

شاب فقرى يقول...

روح بلا فرح :)

صباح الفل


هوا انتى هتدعى بالجملة ولا ايه ؟؟؟

لاء ركزى كويس


ادعى بقى وربنا يعين

اكمل تسعتاشر سنة :D

هههههههههههههههههههههههه

لاء تسعتاشر فوق دول يعنى

كل سنة وانتى اطيب يارب

شاب فقرى

شاب فقرى يقول...

هههههههههههههههههههههههههههههههههههههههههههههههههههههههه

ابو العريف

هوا يوم عيد ميلادى لازم يبقى كدا :)


لازم اسهر ياريس

هقوم ناو

تصبح على خير يارب

بس ياعم هبقى ريس جمهورية وهنبقى نبدل سوا

يعنى انته يوم وانا يوم

انته بالليل وانا بالنهار
انته رئيس جمهورية العياط وانا صفط اللبن :D

تحياتى ياراجل يا طيب

فقرى

شاب فقرى يقول...

منونة

انتى طبعا عارفة اننا مواليد التمانينات سوا

صح ؟؟؟

يبقى كبيرة فين بقى :@

متكبريش فى نفسك يا منونة

يارب كل سنة وانتى اطيب يارب

ربنا يسعدك ويهنيكى يارب

فقرى

شاب فقرى يقول...

صوت من مصر

كيمو حبيبى

يبقى انته ياريس
تروح خمسة وعشرين وتبقى مع عيد الشرطة

ههههههههههههههههههههههههه


انا قلت لك اهوه

شاب فقرى يقول...

دهب
ربنا يحفظك ويعزك يارب

وشكرا لاهتمامك وسؤالك يارب

وشكرا للتهنئة الجميلة دى :)

ويارب يسعد كل ايامك انتى والناس الطيبين دول

فقرى :)

أحمد شريف يقول...

السلام عليكم
أتمنى أن يمن الله عليك بكل الخير وأمانيك بالزواج والنجاح الدراسي وفي المقدمة أن تزور بيت الله

Just Smile يقول...

اقولك بصراحة ولا بلاش انكد عليك يعني في اليوم ده...

نفسي تعمل في نفسك حاجتين وتقولي حسيت بإيه..اولا متفكرش في المستقبل ولا تخاف منه ..وتاني حاجة بص للنص لامليان م الكوباية بس انسى الفاضي اكنه مجرد خيال..

ع فكرة الكلام اللي فوق ملوش علاقة بالبوست ..في الواقع انا فرحت جدا بالبوست السعيد ده مع ان فيه لسه خوف من المستقبل متفكرش في المستقبل على انه هيكون وحش عشان متدمرش الحاضر

اما بالنسبة لأحلامك فاكيد هتتحقق في حالة واحدة بس لو انت واثق انها هتتحقق...دايما بقول لنفسي كده ولحد اخر لحظة لازم تفضل مؤمن بكده

ويارب تطلع عمره السنة ديه بجد وحقيقي

ربنا يسعدك دياما يارب...وسيب الخوف لمدة 48 ساعة بس هتحس احساس مختلف وادعيلي :)


سلاماتي

donya يقول...

كل سنه وانت طيب

فين صحبي اللي بيعاكسني وبيصفر لي

وديت صحبيييييييييييي فييييييييين

خلاص بقي
لكل حب نهايه

بصراحه كان بيخوفني
ههههههههههههههه


وايه كل الامنيات دي

اكتر امنيه عجبتني
جنون العظمه

والافتري علي الناس
ههههههههه

يامفتري

باي

بسنت يقول...

السلام عليكم
كل سنه وانت طيب وعبقال 100 سنه
وتكون احسن دا اهم حاجه
جميله جدا قائمه الامنيات بس الاجمل ان تبدأ بتنفيذها بأى وسائل ولو بسيطه
حاجه يعنى تقرب البعيد

دمت بخير

بحر الالوان يقول...

كل سنه وانت طيب

اما بالنسبة للامنيات .... فهنالك ابيات للمتنبي تقول :

إذا غامَرْتَ في شَرَفٍ مَرُومِ...فَلا تَقنَعْ بما دونَ النّجومِ
فطَعْمُ المَوْتِ في أمْرٍ حَقِيرٍ.....كطَعْمِ المَوْتِ في أمْرٍ عَظيمِ

ياعني خش السنة الجديدة بقلب جامد ولا يهمك منها حاجة .

سلااااااااااااااام

romansy يقول...

كل سنه وانتى طيب يا كريم
بكره تحقق احلامك وامنياتك يا كريم
وبعدين اجمل حاجه فى الدنيا الصداقه والحب لو عندك تبقى امتلكت الدنيا

سلمى يقول...

كل سنه وانت طيب ويارب كل سنه تكون احسن من غيرها وتحقق كل اللى بتتمناه
وتكون مهندس وتعمل عمره وكل كل اللى عوزه تحققه
يوم ميلاد سعيد
معلش تعليقى متأخربعد 12.30 نظرا للظروف التوقيتيه والامتحانيه
تحياتى

موناليزا يقول...

عام جديد وعلى عملك شهيد ويارب يكون سعيد
happy new year:)

well يقول...

كل سنة وانت طيب ..

...تحياتى

مي يقول...

كل سنة وانت طيب وبخير وسعادة ويارب تحقق كل امنياتك
وتكون سنة سعيدة عليك
وكل سنة وانت فى وسطنا ومبسوطين بوجودك معانا
كل سنة وانت طيب يا اجدع مدون
ومش فقرى بالعند فيك (؛

قلم رصاص يقول...

تنشره متنشروش
انا جي اقولك كل سنة وانت طيب ياكريم
كل سنة وانت بخير وتحقق كل احلامك ان شاء الله

جت متأخره بس اللي في القلب في القلب يابني

في حفظ الله

ghorBty يقول...

اممممممممم

ايه التفائل دا اللي اول البوست

خير تفاءلوا بالخير تجدوه

كل عام ونت بخير

وربنا يحقق كل امنياتك وزياده كمان

ويارب يكتب لك الحج مش العمره بس

ربنا كريمـ اطلب واتمني ..

الازهرى يقول...

كل سنه وانت طيب يا صاحبى
وباذن الله تحقق كل احلامك
صدقنى
كلمة واحد لف الدنيا وخد لى دماغه كتير بس فى الاخر بدا يشوف النجا من تانى
المهم تحاول الف مرة
وباذن الله نحتفل السنه جايه وتقول انك حققت كل حاجه
ما عدا الاولى طبعا

dramaqueen يقول...

كل سنة وانت اطيب
كل سنة وانت اروق
وكل سنة يارب تعدى بالخير عليك ويحقق لك امانيك

reem يقول...

كل سنة وانت طيب
وعقبال 100 سنة

ويارب يارب يا كريم ربنا يقدرك وتعمل عمرة السنة

وترجع من العمرة تخطب وتتجوز وتجيب يوسف وسلمى

ربنا يحقق لك كل امانيك ويخلى لك الناس اللى بتحبهم وبيحبوك

سنة سعيدة عليك يارب

happy birthday to you

قوس قزح يقول...

كل سنة وانت طيب
و ان شاء الله تحقق كل اللى بتتمناه

شاب فقرى يقول...

أحمد شريف

شكرا لزيارة حضرتك :)

وحضرتك طيب يارب

خالص تحياتى لك

شاب فقرى

شاب فقرى يقول...

just smile

ان شاء الله لما ألاقى الكوباية هبص للنص المليان بتاعها :)

مينفعش منفكرش فى بكره

عش لدنياك كأنك تعيش أبدا وإحسب لآخرتك كأنك تموت غدا

صدقينى بالنسبة للأحلام الإيمان لوحده مش كفاية

فى حاجات كتير اوى غير الشغل والتعب والايمان

هحاول أعمل بنصيحتك وإن شاء الله تبقى الحياة بامبى :)

نورتى وكل سنة وانتى اطيب والى الله اقرب

فقرى

شاب فقرى يقول...

donya

وانتى طيبة يارب

انا شيلته لمدة 48 ساعة فقط بناء على طلب الأم الفاضلة شمس النهار

:)

لكن مينفعش يمشى

اكيد قصة الحب هتكتمل

بس معلومة عالماشى

الراجل اللى فى الصورة دا مات بعد الفيلم على طول :D

هههههههههههههههههههه

نورتى وعقبال عيد ميلادك كدا اما نردها لك

فقرى

شاب فقرى يقول...

بسنت

بقالك كتير مش بتيجى المدونة

لكن جيتى فى اهم يوم :)

وانتى طيبة واسعد يارب

تحياتى ليكى :)
وان شاء الله هبدأ فى التنفيذ لتحقيق سعادتى من اليوم
:D

فقرى

شاب فقرى يقول...

بحر الألوان

أنا بعشق أشعار المتنبى

بحبها اوى

بتعجبنى برغم جنون العظمة الموجود فيها

ومليانة حكم

شكرا لبيتين الشعر الهدية دول:)


خالص تحياتى لك

شاب فقرى

شاب فقرى يقول...

romancy

ربنا يسهل ونلاقى اللى بنقول عليه

الحب والصداقة

الاتنين مليانين التزامات

واذا الواحد التزم

مش بيلاقى التزام من حد تانى

واخد بالك من إذا :)

نورت وشكرا ليك يا جميل

شاب فقرى

شاب فقرى يقول...

سلمى :)

انا بحب الاسم دا ودى المرة الستين اللى بقول فيها كدا :D

نورتى المدونة وعيد الميلاد

ربنا يوفقك فى الامتحانات ويقدرك على النجاح والتفوق ان شاء الله

شاب فقرى

شاب فقرى يقول...

موناليزا

وانتى اسعد يارب :)


نورتى :)

شاب فقرى

شاب فقرى يقول...

well

وانته طيب يا جميل

تحياتى لاهتمامك :)

شاب فقرى

شاب فقرى يقول...

مى

:)

نورتى :)

وانتى طيبة يارب

شكرا لاهتمامك وتعليقك ويارب كل سنة وانتى اسعد بكتير يارب ومن نجاح للتانى :)

نردهالك فى الافراح

تحياتى

شاب :P

مستخلص افندى يقول...

كل سنه وانتا طيب يا عم اسماعيل

:D

كل سنه وانتا طيب يا كريم

كل سنه وانتا مع اللى بتحبهم

خليك فى اسكندريه على طول يا عم وما تعبرش صحبك الله يسهلو يا عم مين قدو

كل سنه وكلنا منيلين بنيله:D

يا اعم ربنا يكرمك ويفتح عليك ويبعد عنك النيله كلها

ليه اخر عيد ميلاد فى حياتك
ما تعديش من الشارع ده تانى :D

شاب فقرى يقول...

قلم رصاص

اللى فى القلب فى القلب واللى فى البنك فى البنك ولازم تجيب هدية

متحورش :D

انا ليه عندك هدية ومش هتنازل عنها ابدا

تتصرف بقى وتبعتهالى باى شكل

عشان التأخير دا مش ببلاش :P

نورت يا سديكى

شاب فقرقر

شاب فقرى يقول...

gHoRbty

نورتى المدونة

اهوه حبة تفاؤل كدا بمناسبة السنة الجديدة :$

:$

اسعدنى تواجدك ومرورك :)

وكل سنة وانتى اسعد وفى حال أحسن يارب :)

شاب فقرى

شاب فقرى يقول...

الازهرى

:)

اهلا يا أخى الجميل :)

نورت والله

وسعيد جدا بتعليقك والتهنئة

انا مفهمتش السطر دا

((
كلمة واحد لف الدنيا وخد لى دماغه كتير بس فى الاخر بدا يشوف النجا من تانى
))

وان شاء الله السنة الجاية اكون حققت كل امانيه وخاصة الأولى :$

فقرى

شاب فقرى يقول...

drama queen

انا فاكر ان فى عيد ميلادك انا علقت بتاع اتنين وعشرين تعليق وعملت هيصة جامدة جدا

انا عايز بقى بقيت التعليقات

:D

نورتينى واسعدنى مرورك :)

ونردهالك فى الافراح ان شاء الله

وكل سنة وانتى كمان طيبة وبخير يارب

شاب فقرى

شاب فقرى يقول...

reem
ميت سنة كتير اوى :$

انا عايز خمسة وتلاتين بس :$

كل سنة وانتى اطيب يارب وبالف خير :$

شكرا ليكى ولمرورك :)

شاب فقرى :)

شاب فقرى يقول...

قوس قزح

مبسوط اوى بزيارتك دى وكل سنة وانتى كمان بالف خير يارب :)

شاب فقرى

شاب فقرى يقول...

مستخلص

شكلها هتقلب بخناقة

تصدق ان انا كنت مستنى تتصل تقولى كل سنة وانته طيب

ياعم متخافش

لو نزلت اسكندرية تاني مش هعرف اشوف حد

مش هيبقى لى غيرك يا جميل

وكل سنة واحنا فى النيلة سوا والحدق يفهم :P

هههههههههههههههههههههههههههههههههههه

نورت ياض

وهعدى من الشارع دا تانى

وهفتح فيه كشك سجاير كمان :D

وبكره تشوف

كريم

شمس النهار يقول...

امنياتك كلها مشروعه

بس في اعتراض
ماهو ماينفعش اكون ماما من غير مااعترض كده واعمل منظر يعني

كل الناس اللي دخلت تعيد عليك وبتحبك
وتقول ان الموبايل مغلق وماحدش خد باله

ياعم ده انت ممكن بالناس اللي بتحبك في البلوجر
ترشح نفسك للرياسه وضميرك مرتاح
هتكتسح الانتخابات

اما باقي الامنيات تدل قد ايه انت انسان بتراجع نفسك دايما
وده مش كتير
ودليل النجاح ان شاء الله

كل سنه وانت بتحقق احلامك واحده واحده

سلامي

Aиgel يقول...

مساء الخير والورد وسنة جديدة
في عمر مديد يارب إن شاء الله

كل سنة وأنت طيب يا كريم وعقبال
امممم ما تتم الـــ 35 والــ 100 وزيادة كمان في صحة وسعادة وتحقق كل اللي تتمناه وإن شاء الله هيحصل

(:
الساعة عندي دلوقتي 12 إلا دقيقة
يعني متأخرتش P:

كل سنة وأنت طيب مرة تانية

(:

Angel love

Ana keda يقول...

كلامك بيفكرنى بشخص واحد يمكن فرق معايا فى حياتى كلها
مش عارفة حاسة وانا هنا ان فيه حجات كتير بتقولها بتفضل فى دماغى مع انى يعنى مش المتابعين المخلصين الى بييجوا هنا كل شوية :(
اول حاجة كل سنة وانت طيب
تانى حاجة حابة اوى حالة الدماغ العالية بتاعتك دى والله ربنا يخليك لنفسك وينفع بيك اهلك كلهم
الاغنية حلوة والله وجامدة
ربنا يحققلك امنية العمرة وتبقى حج كمان
وتلاقى الناس الى بجد تسأل عليك اوى وتاخد بالها منك أوى ان شاء الله
بس خلاص

*الطالبة عفو الله *زوزو يقول...

كل سنة و انت طيبة وو الى الله قريب
لائحة المتمنيات الطويلة العريضة خلقت جوايا اننا اخذ و رقة و قلم و اكتب امنيات رغمة اننا عيد ميلادي فات من فترة بس مش ضروري بقى في يوم العيد ميلاد
المهم ربنا يحققلك كل امنياتك و رغباتك يا رب
و وعقبال للايحة السنة الجاية مع امنيات تانية
تحياتي

قلب مصرى يقول...

كل سنة وانت طيب
بالنسبة للاحلام احلم زى ما كلنا بنحلم بس التحقيق امتا الله اعلم الكل يحلم والفعل لا يعلمه الا الله ربنا معاك واحلامك تتحقق عن قريب

فتاه من الصعيد يقول...

كل سنه وانت طيب

وعقبال ليون سنه وتحقق كل امانيك

تحياتي

سبايدرمان spiderman يقول...

كل سنه وانت طيب
^_^

ليس فقيرا من يحب يقول...

كللللللللللل سنه وانت بالف خير

يا كريم

ربنا يسعدك ويحقق كل احلامك يارب

( خلاط العربى )

دى هديتك خدها من بين القوسين

هههههههههههههههههههههههه

ريمان يقول...

السلام عليكم

كل سنه وانت طيب ومع اصحابك ومع كل اللى بتحبهم

عقبال 100 سنه ان شاء الله

ربنا يباركلك فى عمرك

وماتفكرش كتير فى اللى جاى عشان دماغك مش توجعك

خليك فى النهارده احسن

معلش اتاخرت عليك بس والله ظروف النت عندى مش كويسه خالص

sookra يقول...

كل سنه وانت طيب ياابو سلمى
يوه ياابويوسف
طيب يابويوسف وسلمى وهيبقوا توأم انشاءالله
هابى بيرث داى تو يو
من اختك الكبيره ساسو

سلمى يقول...

قربت احب اسمى بجد والله كل حد يسئلنى على اسمى واقوله يقولى الاسم ده غالى عندى اوى
تؤ شكلى حتغر
شكرا لدعواتك والله بتفائل لما الناس تعبرنى وتدعيلى
اين باقى قائمه الامنيات؟

كلام عيب يقول...

جميله قوى يا كريم امنياتك

و باين فيها قوى انك حد طيب و غلبان

فين يا عم جنون العظمه ده اللى بتقول

عليه و مع ذلك فوق يا عم انت بنى ادم

ربنا يكرمك يا كريم و يحقق لك كل امنياتك و زياده كمان

و هابى بيرث داى تو يو

شاب فقرى يقول...

سامحونى مبردش عالتعليقات واتاخرت فى النشر

لانى تعبان اوى اوى اوى

معدتى توجعنى شوية

والصداع يبهدلنى حبه

كان عيد ميلاد تحفة بالصداع

معلش بقى :$

هرد لما الاحوال الصحية تنتظم

تحياتى لكم جميعا

ولنا عودة

فقرى

Romancia يقول...

كل سنه وانت طيب
امنياتك جميله
ربنا يحققلك الى بتتمناه

:))

الشاعر الفنان أحمد فتحى فؤاد يقول...

كل سنة و إنت طيب و بألف خير و سعادة
و يا رب يحقق لك كل أمنياتك و تبقى مهندس it قد الدنيا .. و الأهم بجد أدعيلك من كل قلبى تعمل عمرة و يا رب تحج كمان ... هتتغير كل حاجة

على فكرة أنا ماعنديش مانع يا عم إنى أكون صاحبك ... أفتكر كده عدانى العيب و اللا إيه؟
ربنا يوفقك

حلمى البعيد يقول...

السلام عليكم

المدونه جميله والامانى دى جميله خاصة رئيس الجمهوريه

رئيس ايه يا راجل شفلك شغلانه عدله

علي قد المقام

وإن شاء الله تتحقق كل أمانيك

تقبل مرورى

الشعب لابد له من حكومه تشكمه يقول...

ايييييييييييييه ده ايييييييييييييه ده,
انت بتقلبنا يوم عيد ميلادك ولا ايه؟؟؟؟؟؟
انا فاكره ومتأكده انى سيبت كومنت هنا؟
لالالالالا الزهايمر موصلش لكده...

امممممممممممممممم فين كومنتى:(

عموما كللل سنه وانت طيب ياكريم وربنا يسعد قلبك ويريح بالك يارب فى السنه الجديده:)


اه ان شاء الله باذن الله عندى النيه انى اجى يوم الجمعه ان شاء الله.
بس ادعى ياكريم الجو يكون كويس اصله بيشاور نفسه عندنا:(