الخميس، 28 يناير 2010

ودينى عاللقاء يا أسطى ...


السلام عليكم يا أعزائى المدونين
النقطة الأولى
طبعا كلنا سمعنا عن إن فى لقاء يوم الجمعة الموافق بكره
ولو موافقش هنضغط عليه وهنخليه يوافق بكره :)
أنا قررت أخرج من الظلام
وأحضر هذا اللقاء التدوينى الخطير الهام
وخصوصا إنه بعد عيد ميلادى
يعنى إخوانا المدونين
كل واحد هيحضر اللقاء هيجيب هدية
أنا سمعت إن سكرة قالت لى هتجيب دكر بط وفطير مشلتت
ويوسف قر يجيبلى عربية جاجوار
وانا عن نفسى بقولهم يا جماعة كفاية وجودكم
بس نعمل إيه بقى فى أهل الكرم :)
نرجع لموضوعنا الجميل
أنا هكون بكره بعون الله فى تمام العاشرة صباحا قدام محطة مترو الدقى
هستنى بالظبط خمس دقايق
لحد عشرة وعشرة (( ساعتى وأنا حر فيها ))
طبعا اللى عايز يكون فى صحبتى ونتوه سوا
لأنى مش هوقف تاكسى
عيب أوى تكون مع الفقرى وتوقف تاكس
هنروحوا مشى واللى موافق أهلا وسهلا
اللى مش موافق هيمشى معايه برده
كدا بلطجة :D
يبقى نو بروبلم
بيانات تفصيلية عن اللقاء
كوبى باست من مدونة الدكتورة ستيته حسب الله الحمش
--------------------
المكان: نادي الزراعيين بالدقي

الزمان: الجمعة 29 يناير

الوقت: عشرة ونص الصبح

طريقة الوصول: مترو الأنفاق محطة الدقي

شارع الثورة أمام بوابة 6 لنادي الصيد "فاتيما ها تكتب بالتفصيل طريقة الوصول في الكومنتات"
التليفونات: استاذ خالد أبو همس 0101345140
وليد بيه الدوغري 0148189205

-------------------------
وطبعا اللقاء ليه شروط
وأول شرط وأساس الشروط تكون مدون وتعرف عالأقل شخصيتين تلاتة من اللى فى اللقاء
هتقولولى هما مين
هقول مش عارف الصراحة
أنا قالولى فى لقاء ومدونين المنصورة رايحين
قلت عيب يبقى فى زوار فى القاهرة ومنرحبوش بيهم
وكمان أنا كنت قلت لهم أنا جاى لقاء زمان ومروحتش وعملت فيها عبده
ولذلك فأنا قلت رايح
أما عن مدونى القاهرة
فأنا اللى متأكد منه إن عادل ومنامينو و داليا قوس قزح و فاتيما والدكتورة ستيته و يوسف
دا اللى أنا فاكره
غير كدا أنا غير متذكر يا جماعة
إعذرونى

نيجى بقى للنقطة التانية :
انا الحمد لله مش برد عالتعليقات الأسبوع دا ولا متابع التدوين ولا المدونة نهائى خالص ودا غصب عنى
بدأ الأسبوع من وجهة نظرى بيوم 24 يناير عيد ميلادى
وكان اليوم دا الصداع هيفرتك دماغى
وعشان كدا لا إحتفلت ولا بطيخ
تانى يوم ربنا كرمنى وصحيت بدرى قبل الضهر على طول
وقررت انزل أجيب جاتوه وأعزم البت سلمى حبيبتى
ببص لقيت نفسى عالحديد المجيد
ومفيش فلوس
قرقرت أروح البنك
إتضح إن دى السنة الأولى اللى يخلوا عيد الشرطة أجازة للمصالح والبنوك وكل الحاجات الحلوة دى اللى بتسمع الكلام
وفى نفس اليوم ربنا كرمنى بعميل مهم بيبعت فلوس عالبنك وبرده البنك قافل :D
قاومت رغبة شديدة فى الصداع ووجع المعدة
وربنا يخلى لى مصر
نزلت ببركة دعا مصر والمعونة اللى بتدفعها كل كام ألف سنة :)
جبت الجاتوه ونزلت إتمشيت فى وسط البلد وبجد كان يوم جميل
لانى بعشق وسط البلد وبالذات شارع 26 يوليو
أنا بحب أقول عليه شارع فؤاد
حتى البياعين فى الشارع كانوا بيحتفلوا بعيد الشرطة ولقيت بياع واقف يغنى
(( مصريتنا وطنيتنا رعاها الله ... الله الله ...))
روحت وإحتفلت وأخيرا ربنا كرمنى وحد عبرنى فى الحياة وجابلى هدية
أنا مش مصدق نفسى
أخيرررررررررررررررررررررررا
شخصية بحترمها وبحبها جدا جابتلى هدية
يا هوووووووووووووووووووووووووووو
طبعا كانت قزازة كالونيه أو كما يطلق عليها الفرنجة (( برفان ))
الحمد لله بقيت الأسبوع بقى تنطيط ومن هنا لهناك وبوم بوم وطخ طخ
ومش عارف حتى أخش أرد على حد
سامع حد بيقولى ما إنته كنت بترد
دا لما بيتاح للعبد لله إنه يفتح المدونة

نيجى للنقطة التالتة :
ماتش مصر والجزائر
يارب يارب يارب يارب يارب الكهربا تقطع فى الماتش
ويأجلوه :D
ويمكن يلغوه من البطولة خالص
أنا مش ناقص حاجات تحرق دمى فى البلد دى
كفاية الماتش اللى فات واللى طلع من ورا مشاكل لا تعد ولا تحصى
وخلانى لحد الآن ماشى فى الشقة وبغنى
(( والملاحة والملاحة ... وحبيبتى ملو الطراحة ... وحسرة علينا يا حسرة علينا ..))
صدقوا لان دى حقيقة بالفعل والله
لكن أكيد بتمنى النصر لمصر ونكسب الماتش والناس مش تزعل ولا تنقهر ولا ينقهر الجزائريين ولا تحصل حوادث ولا بطيخ
يارب الناس تفهم إن النبى عليه الصلاة والسلام وصانا على إخواتنا
كلنا مسلمين وكلنا اخوة
وكلنا عرب
وكفاية قلة أدب بقى

ننتقل للنقطة الرابعة :
البطاقات الإنتخابية
يا جماعة آخر معاد هيكون فى 31 -1
يعنى كل واحد يلحق ينجز
لازم يكون ليك صوت فى الانتخابات
البطاقة دى محتاجه منك صورة بطاقة وتطلع عالقسم تعملها ويقولك تعالى استلمها كمان تلات شهور
دا اللى حصل معايه بالظبط
الانتخابات القادمة فى شهر حداشر
شدوا حيلكوا يا رجالة ويا بنات مصر

وشجعوا كويس
شجع بلدك بإنك تكون إيجابى مش تقف تقول مصر مصر وإنته مش عارف عنها أى حاجة

وأخيرا ربنا يستر
هقوم بقى أجهز نفسى لهذا اللقاء التدوينى التاريخى
هجهز دوا الصداع عشان مش طالبة خالص بكره أقعد مصدع
وهجهز دوا المعدة عشان مش أفضل قاعد تعبان
وبس كدا
إدعوا بقى لأونكل فقرى لأنى خلااااااااص
مبقاليش فى الدنيا غير شوية أدوية وشوية حاجات فوق بعض :D

نقول إيه بقى
كالعادة ....
خلص الكلام
شاب فقرى

هناك 5 تعليقات:

غير معرف يقول...

لقاء سعيد

تحياتي

adel يقول...

10/10 بالنسبة للبطاقة و عموما انا عملتها بس عاجبني التشجيع للناس

الباقي لما اقابلك بكرة
احتمال نتقابل 10 الصبح دي لو عرفتك يعني :):)
ههههههههههههه

Cute Kitty **sookra يقول...

لالالالالالالالالالالالالالالالالالا
وبلغه الفرنجه
nooooooooooooooooooooooooo
فطير وبط
يالهوى ياسكره اتدبستى ولاايه
والله شكلك هتاخد مقلب ولافطير ولاحمام بيطير حتى
اقولك اجبلك جبنه بمش
ههههههههههههههههههههه
بس من غير دود اطمن ماما بتعملها تجنن
طيب اجيبلك بط وفطير
حاضر
لك عليا اجيبلك صورهم كدا عينى عينك
وكويس موضوع دوا الصداع دا
يعنى انا كدا موش هاجيب دوا للصداع
اصل اختك سكره ماشيه بصيدليه متنقله فى شنطتها
والنبى ياخويا موش عارفه ايه اللى هيحصل
بس ربنا يستر
ههههههههههههههههههههههههه
واد يافقرى
لو اتأخرت عن عشره وعشره دى اوعى تمشى اصل اتوه واجيبلكم مصيبه تدوينيه وتطلعوا تعلقوا ميكروفانات وتمشوا كدا تنادوا عيله تايهه واسمها سكره ياولاد الحلال وابقى شوف مين هيعبركم اصلا
سلام بقى وكفايه رغى لحد كدا
باى باى
اشوفك الصبح
تومورو
اه صحيح انا عيد ميلادى بعد اللقاء بكام يوم يعنى هديه مقدما
ههههههههههههه
وش بيطلع لسانه

سلمى يقول...

بلنسبه لموضوع الدوا انا حاسه انك رجل فى الخمسين من عمره
ربنا يجعله لقاء حلو وترجع متفائل املى فى الحياه انى اشوفك متفائل
على فكره انا كنت عاوزه ابعتلك حل لمشكله الصداع
ربنا يسعد ايامك

iHibo يقول...

قرأت الموضوع وأعجبني كثيرا لكن كان ليكون افضل بكثييير لو كتب بالعربية

ملحوضة لغتك المصرية مهضومة واعجبتني حقا لكن افضل القراءة بالعربية ..

اتمنى ان يمر لقاءكم بخير
مبروك لمصر
سلام اخي