الخميس، 21 يناير 2010

أنا مبسوط أوى




(( أنا مبسوط أوى ))
دى مش حالة نفسيه أنا بمر بيها
يمكن تكون أمنيه أقدر أحققها قبل ما عيد ميلادى يوصل فى يوم اربعة وعشرين من الشهر المبروك دا
اللى إكتشفت ان تقريبا نص مدونين مصر مولودين فيه
كل شوية الاقى عالفيس بوك او على اى مدونة ناس بتهنى وبتبارك بعض
مش عارف ليه كنت زى اللى مستنى الناس تبارك له بعد ما لف عليهم نفر نفر ونبههم اكتر من مرة ان عيد ميلاده كمان كام يوم
انا مش عايز حد يرد يقولى عيد ميلاد مين وبتنجان مين ودا حرام وبطيخ وانتوا عالم فاضية وسايبين الازمة العربية وجوازة الدكتور نظيف اللى خلاص بقت قضية قومية وبتفكر فى عيد الميلاد وخلاص رايق وعايز الناس تهنيك او تبارك لك ... من شطارتك أوى يا فالح
هقول كلمة واحدة وهى انى مش عايز أسمع الكلام دا لانه لا وقته ولا أوانه
لانى لما بكتب حاجة زى دى هنا بكون زى اللى بيكلم المرايه
بيكلم حد هوا متأكد إنه فاهمه لا هوا مستنى رد ولا مستنى كلمة ولا اى بطيخ من اى نوع
تمام جدا
نرجع لموضوعنا
السنة دى او السنة اللى فاتت اتعرفت على مجموعة من الممثلين الشباب فى كلية الاداب جامعة القاهرة
فى عرض مسرحى فى مسرح ميامى فى وسط البلد كان إسمه (( البدروم ))
لأول مرة فى حياتى بحس بسحر المسرح وجماله لما يكون فى ممثلين هواة هما اللى بيمثلوا وبجد كل واحد فيهم بيحاول يطلع اللى جواه
ببساطة اقدر اقول ان العرض دا بهرنى وخلانى اتعرف عالشباب دول بل واحضر بروفاتهم كمان لاكتر من مرة فى مسرحية جديدة عملوها تحت اسم
أنا مبسوط أوى
هى بتحكى عن شاب إسمه عزت وبيحب بنت اسمها سميرة ومش بيقولها وبيفضل عالحال دا
وياعينى كل اما ييجى يقول كلمة أنا مبسوط أوى
بيطلع له شخصية محدش بيشوفها غيره بتضربه وبتجرى
وبيفضل طول المسرحية يروح لدكاتره وعرافين و يسأل صحابه ويكلم الناس
لحد ما فى الآخر بيكتشف ان مشكلته بتنحصر فى انه بيكدب علي نفسه لما بيقول انه مبسوط اوى فى حين انه مش كدا
وخياله بيصور له الموضوع دا انه فى حد بيضربه
والمشكلة بتتحل لما بيعترف لها بحبه
وبتخلص المسرحية
انا طبعا مش بحكى القصة دى الا لسبب واحد
مش عشان خاطر انا بحب سميرة
لاء ابدا
عشان خاطر انا نفسى اعيش فى حالة انا مبسوط اوى بس مش عارف
وخايف اقول انا مبسوط اوى يقوم يطلع لى الراجل دا يخلص عليه
وينتهى الفقرى على يد سفاح خفى
وينطلق فريق البحث الجنائى وميلاقوش حاجة
انا بجد كل يوم بقرر انه من هنا هتبدأ سلسلة منا الاحداث السعيدة
لحد عيد ميلادى يوم اربعة وعشرين
بالرغم من انه هيبقى يوم فيه مشكلة كبيرة اوى
بس انا عشمى فى ربنا كبير
يارب
أسيبكم مع مقطع من المسرحية
كان نفسى أحضرها فى كلية الأداب بس
كنت مكتئب الفترة دى ومكنتش ناوى أخرج ولا أعمل أى نشاط فى الحياة







ودلوقتى
انتهى الكلام
اتمنى تستمتعوا بالفصل الأول من المسرحية

شاب فقرى

هناك 20 تعليقًا:

طوبه فضه وطوبه دهب يقول...

يارب تتحول السعاده من مجرد امنيه الى حاله حقيقيه ما تحتاجش لا حد يطلع ولا حد يقتل اتمسك بالامل لحد اخر لحظه واخر دقيقه خلى املك فى ربنا كبير هو على كل شىء قدير ربنا يكرمك يارب وتحقق كل ما تتمنى كل سنه وانت بالف خير وصحه وسعاده يارب

♥نبع الغرام♥♪≈ يقول...

ههههههههههههه

جامد يافقرى

ربنا يسعدك يارب ويكرمك بتمنالك السعاده من كل قلبى

تحياتى
ايناس

promise is promise يقول...

انت تعرف ايه اللى عجبنى اكتر من البوست
السناريو بتاع المسرحيه
تصدق اننا كلنا عزت كلنا بنقول اننا مبسوطين واحنا جوانا ميت حاجه تخلينا عكس كده تماما يمكن الخوف من كونك بتتبطر على النعمه او لخوفك ان تكون مش راضى بتتدعى السعاده والانبساط
بس ياريت كلنا عندنا نفس الشخص الوهمى اللى يفوقنا من اللى احنا فيه
ونفوق بقا لنفسنا

عموما كل سنه وانت طيب
وربنا يسعد ايامك كلها

donya يقول...

مسااااءالخير

ازيك

يارب تكون مبسوط بجد الجد

وخالي الي يقول عيد الميلاد حرام يقول
اه احنا بنتلكك علشان ننبسط

كل سنه وانت طيب

كنت بحب اوي مسرحيات الجامعه
وحماس الطلبه في التمثيل
باي

قلم رصاص يقول...

ازيك ياكرملله
يارب دايما تكون في سعاده
ان شاء الله متقلقش هتبقي سعيييييييد

وكل سنة وانت طيب ياواد
ومش ضرورة كنت تقول الناس اللي بتقول ان الاحتفال بعيد الميلاد حرام .. ممكن تسميها مكروه .. ماهو مش الاحكام الدينيه كلها ياصاحبي زي مانت عارف .. مش حلال وحرام بس

فيه الحلال والحرام والمكروه والمندوب والمستحب ,, والفر والواجب .. الخ الخ الخ

كده يعني

المهههههههههههههههم

كل سنة وانت طيب
وربنا يسعدك دايما ياكرملله

في حفظ الله

الشعب لابد له من حكومه تشكمه يقول...

الصوره معبره اوى عن العنوان ههههههههههههههههه.

على فكره عجبتنى اوىىىىىىىىىى القصه بتاعة المسرحيه فكره حلوه اوى بجد.
ربنا يفرح قلبك ياكريم وقلوب الناس كلها:)

R-H-S يقول...

انا مبسوط اوي فعلا لما تطلع من بؤك لازم تكون طالعه برضا عن كل اللي حواليك وعن كل جوارحك وعن نفسك ساعتها هتقدر تحسها بجد
بيتهيألي لما كان بيقول انا مبسوط قوي كان بيقولها بنص رضا او ربع رضا فمبتبقاش رضا كامل(هتقولي مين رضا كامل بقي وكدا هقولك معرفوش) فعلشان كدا كان بيتلسع هو تقريبا يعني ضمير اللي كان بيديله علي قفاه او حاجه زي ضمير ممكن تكون نفسه مش عارف

تحياتي يابوالشباب
محكتليش عن نهايه dvdscr؟

غير معرف يقول...

كله سنه وانتا طيب يا كريم وعقبال مليون سنه وربنا يسعدك كومان وكومان.

أبو العريف يقول...

كريم باشا الزناتي

اولا كل سنه وانت طيب

وربنا يحققلك كل امانيك

وزي ما وعدتك الهمر موجوده ومستنيه يوم 24

بس علي فكره همر دي احنا خدناها في اعدادي يعني مطرقه باين

فخلي بالك اوعي تقول كلمة مبسوط قوي دي تاني

احسن محدش يضمن الظرووووووف

هناء محمود يقول...

حلوة أوى

ربنا يسعد الجميع ويفرحهم

Lady E يقول...

HAAPPY BIRTHDAY TO U

عيد ميلادك يوم 24 وعيد ميلادي يوم 26 :) برج الدلو

يارب تبقى مبسوط اوي وتبقى حاسس كده بجد مش بتكدب على نفسك

كلية الاداب عندكو في القاهرة بتعمل مسرحيات انا كده اتغظت اكتر ما انا متغاظة لأن كليتنا الموقرة مفيش فيها نشاطات

قصة المسرحية حلوة لسه مشوفتهاش بس اكيد هشوفها

دمت بخير

وكل سنة وانتا طيب مرة تانيه

Lady E يقول...

انا مبسوطة اوي اني شفت الفصل الاول من المسرحية وكان نفسي اشوفها كلها

بجد جميلة اوي وبرغم ان الامكانيات محدودة في المسرح يعني مفيش ديكور ولا تجهيزات المسرح لكن الممثلين موهوبين بجد وبيمثلوا كويس

غير معرف يقول...

يا رب كلنا نبقى مبسوطين اوي :)

هشوف المسرحيه

تحياتي

هي وظروفها يقول...

اولا اختيارك لأحمد زكي كصوره اختيار جميل جدا

ثانيا يا فقري اتبسطت براحتك محدش هيضربك ولا حاجه اتبسطت وعيش

ها نشوفك ان شاء الله يوم الجمعه طبعا جاي صح؟؟؟؟

اخوك وليد الدوغري

هي وظروفها يقول...

الشاب الفقري

مساءك جميل يا بوس اللقاء التدويني يوم الجمعه القادمه تحت اشراف د/ ستيته في نادي الزراعيين بالدقي الميعاد الساعه عشره ونص الصبح ادخل عندها البوست اللي قبل اللي فات وهتعرف الدنيا فيها ايه

شمس النهار يقول...

بجد مبسوطه انك مبسوط

بقالك فتره مهموم ومش متظبط :)


يارب تفضل مبسوط علي طول يارب

وكل سنه وانت طيب وعقبال ميت سنه في الهنا والسعاده

سلامي

мαησηα يقول...

كل ده يا كرملة علشان بقالى فترة ما نورتش بتعليقى عندك

كرمللة يا جميل ان شاء الله هتبقى سعيد

وبجد بجد والله هيبقى يوم ميلادك جميل وهتشوف باذن الله

اممممممم مش عارفة اقولك ايه بس بجد نفسى ربنا يسعدك من قلبك

يارب

صدى الصمت - عاشقة الورد - يقول...

المسرحية فكرتها حلوة قوى
أشكرك إنك عرضتها علينا وإديتنا فرصة اننا نشوف حاجة جديدة لشباب واعد
تحياتى

shoshta_ joker يقول...

السلام عليكم.....
ازيك يا فقرى البلوج ليه وحشة عندك بقالى حبة مش جيت
ان شاء الله امنية السعادة تتحاول لحقيقة وكل سنة وانت طيب يارب مقدما
ع عيد ميلادك
دومت بخير فى رعاية الله
shemo

حبات التوت يقول...

انا مبسوطة اوى

اى يادماغى اى


بس حلوة فكرة السرحية عجبتنى

انا نفسى اروح مسرح الجامعة تعرف فكرت مرة اروحة وقولت لصحبتى قالتللى بطلى هبل

بجد نفسى اشوفة بس على الاقل