السبت، 5 ديسمبر 2009

بفتح زرار قميصى


بفتح زرار قميصى للنسمة وللأمانى ...

وأنور فوانيسى وأملى العالم أغانى ...

بغنى للمحبة وللنجم الهلالى ..

الغنوة فى قلبة شابه وطايرة فى العلالى ...

بفتح زرار قميصى وأملى العالم أغانى .....

منير


نقول إيه

الأغنيه بتحكى كل الواحد عايز يقوله

إن الواحد هيفتح قلبه للحياة ويستقبل الحياة مهما كان اللى فارقناه

هنسى أى حاجة وأروح للحياة

على راى منير

هفتح زرار قميصى للنسمة وللأمانى

ومحدش يقولى مين نسمة وأمانى دول :))

يمكن فى ناس كتير مفهمتش البوست اللى فات

لأنى موضحتش أى حاجة

ومقلتش دى قصة ولا حقيقة

فإن كانت قصة فلى مطلق الحرية فى تأليفها لأننى الكاتب

وإن كانت حقيقة

فلى مطلق الحرية فى التصرف فيها لأنها ببساطة حياتى

ولكن

عايز أتكلم شوية مع حد يفهمنى

عشان كدا هكتب لنفسى وللمدونة

****

عندما يأتى الفراق ..



لماذا أفارقها

وأنا أعشق أن أكون بين يديها

ونظرات عينيها ترسم لى إبتسامة اليوم وكل يوم

تسعدنى بكلماتها

إلا كلمة واحدة تقتلنى

تحرق أعصابى وتفتت أحلامى

وأتمنى لو لم أخلق فى الحياة من البداية

حينما أسألها : (( بتحبينى ؟؟ ))

ترد : (( مش عارفة ))

كيف تكون على غير علم بأمر مثل هذا

إذا لم تدرى هى

من يدرى ؟؟؟

كيف أحيا معها

وأعيش معها سعيدا وأنا وهى فقط لا تدرى

تتصرف معى وكأننى مركز الكون

لا تبدأ يومها دون أن تقول لى أولا (( إزيك ))

وتأتينى دوما كالطفلة الباكية وكأنها تصرخ مستغيثه

(( بابااااااااااااااااااااااااااااااااااا))

فلا أملك إلا أن أضمها

أتكفل بكل مشاكلها

أعطيها من قوتى ما يكفيها ألف عام

أناقشها فى دخائل نفسيتها

أحدثها

أغير لها مبادىء

أرسم لها عالما آخر

تضحك وتنسى ما جاءت لأجله :)

تتملكنى السعادة من ضحكتها

وتمتلكنى هى أكثر

إلى أن يأتى يوم

أقرر أن أضع حدا لهذا

أتقدم لخطبتها

نعم هذا ما حدث

فمن اجلها نجحت فى كل شىء

صنعت كل شىء

تعودت على وجودها

فلم لا تكمل معى بقيت عمرى

وأنا أعشقها

وسأهب لها ألف عمر فوق عمرى لتحياه حتى لو ذهبت أنا


بعدما تقدمت


تفاجئنى الأخبار


(( هى مخطوبة منذ ثلاثة أيام ))


لا أعترف بالصدمات فى الحياة


لأنه لا يوجد ما يمكن أن يصدمنى فى تلك الحياة حقا


إلا ما حدث


شعرت وكأن قلبى إنكسر


ذهبت بعيدا

فارقتها

بحثت عنها فى وجوه الكثيرين

لم تكن إحداهن شيئا

كن سرابا

فارقتهن بائسا وسعيدا

بائسا إلى ما وصل إليه حالى

سعيدا بأنى لم أكن سبب الفراق


نعود لنتحدث مرة أخرى

فلا يوجدمن يفهمها فى الكون سواى

تأتينى تبكى وتشكى خوفها من (( بكره ))

أطمئنها

(( بكره خير يا قلبى ))

تقول : أمازلت تحبنى ؟؟

أرد : بل أذوب فيكى عشقا

تقول : وأنا أدركت أنى أحبك

أرد : وكيف هذا ؟؟؟

تقول : إحتاجك وأحبك ولكن (( مش عارفة ))

أرد : أسنعود مرة أخرى إلى تلك الحالة ؟؟؟ لا ,,فارقينى غفر الله لك

لم يعد عشقى متاحا يا حبيبتى ,

قد صرتى الآن حلما لإنسان آخر

حينها فقط أنطقها :

(( طالما الأيام هتفرقنا ...

وهييجى يوم ونبعد غصب عننا ...

يبقى نبعد من دلوقتى أحسن ...

مش تكلمينى غير لما تحتاجينى أقف جمبك فى مشكلة

وأنا هفضل أحبك ...))

الآن لم يعد هناك مفر من الفراق

ولم يعد ما قلته كلاما خاطئا

الآن إتضحت الصورة


****

كيف أنساها .....



كيف أنسى عشقى الأول والأخير

حلم حياتى

كل كلماتنا معا تتردد فى أعماقى

كل أحلامنا معا لا تفارق مخيلتى

كل شىء ما عاد إلا ليصرخ طالبا الرجوع لها

حددت خطوات لأنساها

وكانت كالتالى :

أولا :

لا تذكرها فى حديثك

تانيا :

لا تتذكر ما كانت تعشق وتكره فى الحياة

ثالثا :

لا تردد كلماتها

رابعا :

لا تفكر فى أراءها فى الحياة والناس وعد إلى ما كنت عليه أو ربما عليك أن تكون شخصا آخر يجب أن تكونه

خامسا :

لا تفكر فى عينيها

سادسا :

بعد قليل ستنمحى وكأنها لم تكن هنا


*****


الخزانة ....




تعبت من البحث

أشقانى التفكير


ولكن لابد من وضع حدا لكل هذا


واليوم



على أن أحضر خزانة من نوع خاص


أضع فيها كل أحلامى


حتى الفتات منها


أضع فيها حلمى بمنزلى الصغير


وحلم إبنتى الجميلة الهادئة الحنونة ( سلمى )


وحلم عمرى بلقاء أمها ذات يوم


حتى أحلام العمل والتطور


أجمعها كلها فيها


أجمع كل أيامى القادمة


كل سعادة الدهر


كل دقيقة فرح


أغلق باب الخزانة بالمفتاح


وأضع المفتاح فى قلبى


فحتما حين تأتى من تدخل قلبى ذات يوم


ستجد المفتاح لكل ل خزانة أحلامى وفرحى


وتصبح هى السيدة الأولى


لحياتى كلها وما تبقى من عمرى


تحياتى

شاب فقرى
ملحوظة : (( مش هرد على تعليقات البوست السابق لأنى للأسف مقدمتش الصورة كاملة ومينفعش أخش أشرح للكل إن الرأى اللى كل واحد قاله مش دا محله ...لكن طبعا هرد هنا وكلمة بكلمه كمان :) ))

هناك 38 تعليقًا:

Aиgel يقول...


صباح الخير ..

أزيك يا كريم ؟

طبعاً وأكيد أنا قريت كل اللي فات
وطبعاً مردتش ع البوست اللي فات رغم أني قريته قبل ده ما ينزل

يمكن مش بحب أرد على أمور ممكن تكون شخصية عشان مهما حاولنا نفهمها أو نقول رأينا فيها مش هتعجب صاحب الأمر نفسه أو مش هنعرف نوصل للي بيقصده

.............

نيجي بقى لمنير .. مش بسمع له أساساً
بس فعلاً حلوة الأغنية وليها معنى أجمل
هنسى أى حاجة وأروح للحياة

على راى منير


أحلى حاجة هي النسيان بس بيكون بالإرادة مش مجرد كلام


ومحدش يقولى مين نسمة وأمانى دول :))


طبعااااااً أنا بالذات مش هسأل
لييييييه عشان دول بنات عمي ((:

...........

المقطع بقى بتاع الفراق بردو شخصي
وأنت كنت بتحكي وبتفرض أمور وتجاوب على نفسك

فعشان كده اسمحلي مش هعلق
........

الخزنة بقى
من حقك طبعاً تحتفظ بأحلامك وحلم ببيتك الصغير وبنتوتك سلمى الجميلة
ومامتها وكل حاجة

بس حذاري تحط نفسك جوه الخزنة دي

عشان تعرف تعيش حياتك وتفتح بعد كده لأحلامك وتحققها

تقريباً أن أنا معرفتش أكتب حاجة بردو .. وممكن تطلعني مفهمتش قصدك من كل حاجة

بس زي ما قلت كله ألا الأمور الشخصية


المهم

كن بخير وكن سعيد
وكده
تمام

Angel love

Aиgel يقول...

ايه ده بعد الغيبة دي كلها أنا
أول تعليييييييق


على فكرورة أنا مش بحب أكتب 100 تعليق وتعليق بس بعملها هنا
عشان المدونة مدونة ولا اييييييه

غير معرف يقول...

الموقف غريب شويه .... فعلا غريبه كلمه موش عارفه دي

المهم ليه الصوره النكد الاخيره دي :( .... لازمن تفكرنا بالمأساه القادمه على البلد

تحياتي

خواطر شابة يقول...

الان توضحت الصورة فعندما نجتزأ شيئا من سياقه يصل المعنى مبثورا .
اغنية منير فيها كل ماينبغي ان يقال فيها الحل السحري لحياة سعيدة
تحياتي لك

ايوشة يقول...

طيب اروح اقرا البوست اللى فات لان من الواضح انه مرتبط بالبوست ده ثوانى وهرجع

ايوشة يقول...

مش هرد على البوست خالص علشان مش بعرف ارد اقول ايه فى المواقف دى انا واحدة اصلا مش بتفكر غير بعقلها واحد زاد واحد يساوى اتنين وبكون مستغربة ازاى محدش يقدر ينسى ويكمل حياته
بس انا اتاكدت من ناس كتير ان الحب الاول مش بموت بسهولة ويمكن مش بيموت ابدا
اما احلامك اللى عايز تحبسها دى مش هتقدر لان الاحلام لو اتحبست هتموت وهى هتدافع عن نفسها منك
كان معاكم ايوشة ومش عارفة بتخرف بتقول ايه :)

غير معرف يقول...

مش هقول غير ان ربنا معاك وخليك قوى

Cute Kitty **sookra يقول...

انسى ياسها
ماتفكريش فى كلامه
ماتفكريش فى ارائه
ماتفكريش فى اى ذكرى كانت بينك وبينه
وانتى هتنسى
موش دا كلامك
انت لو كنت قدرت تنسى يبقى انا هانسى

donya يقول...

مساء الخير
كل بوستاتك كده
ماعلينا
استعنا علي الشقاء بالله
انا لما بعلق علي بوست بيتكلم عن مشاعر او تجربه برد بدماغي ومن منطقي انا وبتكلم علي اللي ممكن اعمله انا لو اتحطيت في نفس الموقف هعمل ايه
وبرضه الواحد لما بيتكلم علي مشكلة حد تاني او بيدي راي بيكون علي البر مش حاطت ايده في النار اي المشكله

بالنسبه للبوست
مش من المنطق ان حبيبي يسألني بتحبيني
هقول له لا لو السؤال استفزني
وعايزه اغيظه
او لو عايزه ارخم هقول له اسأل نفسك او قلبك
او لو خالي الطيب حاضر وطالبه دلال
هقول له طبعا ياحبيبي

اما موضوع ان الانسان ينجح علشان حد ده ماينفعش
الانسان لازم ينجح علشان نفسه هو
علشان يكون رجل ناجح له قيمه في الحياة
مش علشان اي حد
طيب الحد ده راح هيعمل ايه هيقلب نفسه نكيره

اما وصفة النسيان نهني انفسنا وشعوب العشاق
واقول دي وصفه سهله دي وصفه هايله
وماكنش حد غلب
كده مابقاش قلب ده بقي مول

تحياتي

فراشة يقول...

السلام عليكم
مع علمي ان الأغاني مش هي اللى هتخلينا عندنا أمل وتفاؤل الا انها ساعات بتدينا الأمل لما منلاقيهوش جوانا

وعن البوست اللى فات وده وانها حقيقه ولا قصه دي حاجة ترجعلك اكيد يس انا هعلق على اللى مكتوب سواء حقيقه او خيال

من خلال المكتوب هي مكانتش تعرف بتحبه ولا لا بس اكتشفت انها كانت بس بتحتاجله
ودي بتحصل كتير بنحتاج وجود شخص لكن مش بالضرورة نبقى بنحبه الحب دا

اما عن العشق الأول والأخير هو لسه مبقاش اخير عشان انت متعرفش هتحب تاني ولا لا بس العشق الأول مش بيتنسي او ممكن مع مرور الايام يتنسى الحب وتفتكر الذكريات الحلوة والقصة الجميلة اللى كانت بينهم
بس مش لدرجة انها تنمحي وكأنها لم تكن هنا
بس حلوة خطوات النسيان دي :)

حلوة فكرة الخزانة بس معنى كدا انه هيأجل كل حاجة حلوة ف حياته عشان تشاركة معاه؟
طيب يعنى يعمل ايه لو اتأخرت
طبعا كل واحد وليه رأيه بس صعب انى أأجل فرحتي وأحلامي ومفرحش بيهم لو اتحققوا عشان مستنيه شخص ما
مش عارفه انا كدا فهمت صح ولا غلط

المهم ... يارب كل اللى تتمناه يتحقق

اقصوصه يقول...

ما احب الاغاني :(

ريمان يقول...

هو


قصدى هى دى قصه

ولا بوست شخصى

انا عامله زى الاطرش فى الزفه

بس بوست الفراق ده عجبنى مع انى حاسه كله مشاعر مضطربه كده مش متزنه

البوست اللى فات خلاص يا سيدى مش هنرد عليه مادام هو شخصى

وفعلا لازم نحرتم خصوصيه صاحب المدونه

كلمات اغنيه محمد منير جميله وفيها دافع للامل كده

كلك ذوق فى اخيتارك

ЯậŇ MỗŘỹ يقول...

السلام عليكم و رحمة الله و بركاته
يااااااااااااااااااااه فكرتنى بالحاجه اللى عمرى ما نسيتها
خليتنى عاوزه اقول كلام كتير قوى
اممممممممم
وصفة النسيان دى صدقنى صعبه قوى بقالى سنه بجرب فيها و مقدرتش
لاناللى بنحبه ممكن دايما قدامنا و لو مش قدامنا كلامه موجود افكاره قريبه من افكارنا كلما نفكر فى حاجه نفتكر ان ارائنا قريبه مثلا ف النقطه دى
بس للاسف احيانا اللى بنحبهم بيبعدوا قبل ما
يالا مش مهم
سلام
معلش بقى لسه راجعه من الكليه و الجو تقريبا برد او انا اللى بيتهيألى
لو معرفتش تنسى قولى و انا اجيبلك العفريت اللى ف البوست بتاعى يمحيلك الذاكره

Lady E يقول...

وش مكسووووووووف وزي الطمطمايه من تعليق البوست اللي فات

حلوة خطوات النسيان والبوست كله احلى من بعضه وهسمع اغنية منير

حـــــروف متــبعترة " عــمرو الشــايب يقول...

شاب فقري و كلام معسول
بينزل مفاتيح تفتح القلب المدفون
بتقول كلام الكل نفسي يقولة و تعبر عن مشاعر مدفونة و قالت كلام من القلب كان نفسة يقولة
ابدعت يا فقري

سلمى يقول...

السلام عليكم
انا مش حكتب تعليق لان مينفعش اعلق على حاجه فى كل مره تقول ان قرائك مش فاهمين قصدك فمش حكتب تعليق يحسسك ان كل الناس مش فاهماك عشان كل ما التعليقات بتزيد وكلهم مش فاهمين كل ما حضرتك بتتخنق من المعلقين
ولا حتى حدعيلك
يا افهم كلامك يا ابطل ادخل مدونتك
اسفه لطريقه كلامى لو حدايقك

قلم رصاص يقول...


ازيك ياكريم

هو ايه حكايةة منير اليومين دول مع كل الناس .. على فكرة لقيت مدونين كتير اليومين دول بيسشتهدوا بكلام الراجل ده

ربنا يسعدك يارب وتحقق كل احلامك

في امان الله

أحمد عاطف يقول...

انت بتكتب بقوة 12 موضوع في اليوم

انا مبلحقش اقرى موضوع الا والاقيك بتكتب موضوع جديد

بس دا مينكرش ان مواضيعك رائعه

مش لازم كل واحد يفهم اللي انت عايز تقوله

في مقولة بتقول المعنى في بطن الشاعر

وكل واحد يفهم اللي يريحه

اللي يحس انه مطابق لحالته

ساعتها هاتكون انت فعلا نجحت

لانك باحساسك اللي صعب يتكرر قدرت تجمع معظم احاسيس الناس في كلمة واحده

تحياتي ليك

على فكرة فكرتني اغنية بافتح زرار قميصي بالشريط دا ... كان بتاع ابويا وانا خدت الشريط وسجلت عليه حميد الشاعري

تحياتي

الشعب لابد له من حكومه تشكمه يقول...

هرد عليك بنفس كومنت البوست اللى فات,,روح هاته واعمله كوبى ورد عليه باه:)

صحيح احسان عبد القدوس قال:
ما الحب الاول الا وهم كبير...
والحب الاخير هو الحب الاول...

بالنسبالى باه مفيش حب اول وحب اخير, فىىىى حب حقيقى وبسسسس,
والحب الحقيقى بين طرفين محدش يبعد عن التانى,لو طرف قدر يستغنى ويبعد دا مش حب حقيقى.

وهتقابله ان شاء الله متقلقش وهتلاقى سيده قلبك الاولى لاااااا تقلق:)

روح هات التعليق اللى فى البوست اللى فات وحطهم مع بعض وجاوب:)

وكل شويه انتو اغبيا انتو اغبيا هههههههههه محدش فاهمنى محدش فاهمنى.
خلاص يابنى انت عقدتنى حسستنى بقصور عقلى حاد:))

ربنا يريح قلبك وبالك ياكرمله:))

أميرة علي كوكب مهجور يقول...

عاشقان في الليل
خائفان
كدمعتين
في عيني طفل
مثقوب القلب
وردته مجروحه
معطفه علي كتفيها
ذراعها حول عنقه
يرتعشان
بردا و عتمه
مثل ورقتي شجره
شبه عاريه
يحبها
وتحبه
لكنهما
عند نهايه الشارع الطويل
سيفترقان
انظروا الي الرساله التي
يسطع
طرفها الشاحب
من حقيبه يدها
انظروا الي المصابيح التي تنطفئ
اثر خطواتهما
سرب نجوم
تتساقط اجنحته
سيمضي
وحيدا
بدموعها الساخنه
علي خده
وستختفي هي
عند المفرق
متكئه علي ظلها
علي حنان كلماته الاخيره
"صحبتك الملائكه يا حبيبتي"
كم نت قاس
ايها العالم!!



البوست ده فكرني بالقصيده دي

يارب تكون بخير

أسما يقول...

يعني اعمل فيك اييييييه،ها؟ اوففففففف، بص بقي الحب ده مشروع فاشل، اي و الله فاشل... يعني ليه الواحد يحب حد و بعدين يبذل مجهود في نسيانه، طيب و ليه ينساه من اصله ما دام حبه... هو مين بيقول اييييه... انت قلبت علينا المواجع يا ابني... بس هاقولك علي حاجة قبل ما تقرر تنساها و تشيل احلامك لواحدة تانية، اسال نفسك و اسالها الاول، اتاكد اذا كانت هي فعلا مش بتحبك، اصل هاقولك علي سر حريمي بحت، ساعات الواحدة مننا بتضطر تقول انها مش بتحب و هي غرقانة لسبب او لآخر، بس اقسي حاجة ممكن الواحدة تحس بيها هي ان اللي حبها و حبته عايز ينساها بكامل ارادته و بكامل قواه العقلية اعتقادا منه انها مش بتحبه و ان كدة اسلم ليه و لحياته... فاهم حاجة؟ ... و لا انا... المهم، انت عامل ايه؟ كل سنة و انت طيب، و لو انها متاخرة اوي، بس انت الكبير و هتستحملني، مش كدة؟ :)

فخفخينا يقول...

بما إن دي أول زيارة فموش هطول عليك لأن شكلك مش طايق نفسك .

لما تروق إن شاء الله نتمنى تشرفنا في مدونتنا " شيش وإزاز"

وسبها على الله

آه بالمناسبة ... ولو انها حاجة هيفه بس عاوزه اقولهاأغنية منير بتقول : باغني للمحبة وللنجم المِلالي معلش بقى اصلي منيرية قديمة
باي

هيثــم رمضـــان يقول...

بصراحة يا كريم الله يكون في عونك ,لكن في حاجه غريبة المفروض إنها بتحبك رغم ردها الغريب علي سؤالك (مش عارفه) لكن تصرفتها بتقول إنها بتحبك ليه مقلتلكش علي موضوع الخطوبه ده ولا هو جه في يوم وليلة , تاني حاجه لو هي مش عايزة الإنسان التاني ليه الخطوبه مستمرة ما أفتكرش إنها ممكن تتجوز غصب عنها, المشكلة يا كريم إنها ضعيفه ما إتمسكتش بيك زي ما إنت كنت متمسك بيها مش عاوز أظلمها وأقول إنها كانت متردده بدليل ردها (مش عارفه) وكمان الموافقه علي خطوبه رغم حبها المفترض ليك , المهم لو هي لسه مخطوبه وما إتجوزتش وده الارجح والواضح من كلامك لازم تصلح غلطها وتنهي الخطوبه لأنها بأستمررها هتظلم خطيبها وتظلمك وتظلم نفسها وهترجع تندم ندم شديد لما تلاقي نفسها مفتقده السعاده ولازم تبقي قوية وتاخد القرار ده أما لو خلاص إتجوزت أو حتي أصرت علي الأستمرار فعليك كما قلت أن تتخلص من أي شيء يذكرك بها وستعاني بالطبع لكن مع الوقت وأحداث الحياة ستقل المعاناه شيء فشيء والمهم في هذه الحالة أن تقطع أي وسيلة إتصال بها حتي تسطيع مقاومة نفسك ورغبتك في التحدث إليها من وقت لأخر.

وأتمني لك كل التوفيق

تحياتي

dramaqueen يقول...

سلام عليكم
بص مبعرفش ارد واقول حلول
بس اللى عرفته ان انت انسان حساس اوى وطيب
وكل اللى اقدر اقوله او تمناة من ربنا انك تبقى احسن ومش تبقى متضايق

Eman يقول...

مؤلمة هي الكلمات هنا

مش عارفه ماذا يجب ان اقول
ولا اعلم حقاً كيف للقلب أن ينسى :(

بداخلك الكثير من البياض
لا تدع الاحزان تلهو بك
ولتفتح زرار القميص :)

جدير بك أن تحظى
بكل السع ـآدة

فلتمزق الاوراق القديمة
ولترسل شتاتها ادراج الرياح

دمت بسع ـآدة لآ تزول
:'(

شاب فقرى يقول...

أحمد عاطف

بص هوا الشريط كله جامد والله

انا مش بقول ان مفيش حد بيفهمنى

بس احيانا الناس بتركز على حاجات انا مبكونش قاصدها
او مش مهمة بالنسبة لى فى الكلام

نورت :)

هوا مش كتير اوى كدا

دا بوست كل يومين

تحياتى لحضورك

شاب فقرى :)

=======================
عزيزى قلم رصاص

منير إنتششر فى الأوساط التدوينية

لازم يكون لينا وقفة

على رأى الإعلان

وقفة رجالة

ههههههههههههههههههههه

نورت :) والله

خالص تحياتى

شاب فقرى
==================
سلمى

زى ما ذكرت فى تعليقى للاستاذ احمد عاطف

هوا ان الناس احيانا بتركز على حاجات لا تستحق التعليق فى اللى كتبته

وعالعموم مسموح لك تمرى بدون تعليق

كفايه ان اسمك سلمى على اسم بنتى :) ان شاء الله

دمتى بكل ود

شاب فقرى

===========================
3mr wa2el
اسعدنى تواجدك وشكرا لرايك الجميل جدا فيما كتبت :)

خالص تحياتى واحترامى

شاب فقرى
=============
أحن إلى ذكرى تقسو علي

والله نفسى أقولك إن الوصفة سهلة جدا وقابلة للتنفيذ

أنا مجربها وناجحة بشكل يفوق الوصف :)

بس للى واخد قرار بجد وعايز ينسى

مش اللى بيضحك على نفسه

أنا عن نفسى نسيت

:)

يارب تكون ذكرى جميلة

ربنا يعينك فى الكلية والدراسة

وهنشوف العفريت ان شاء الله

خالص تحياتى واحترامى
اسعدنى مرورك :)
شاب فقرى
========================
lady E
نورتى

عادى رأيك يشرفنى فى أى وقت :)

حتى وإن كان زى تعليق المرة اللى فاتت

خالص تحياتى

شاب فقرى
====================
ريمان

البعض حقيقة والبعض الآخر واقع :)

ههههههههههههه

لكى مطلق الحرية فى الرد على اى بوست :)

فلو مكانش شخصى مكنتش هنشره :)

نورتى ودمتى فى كل ود :)

خالص تحياتى

شاب فقرى
===================
أقصوصة

لكنى صراحة بحب منير

الاغانى الهادفة اللى ليها معنى

تحياتى

شاب فقرى
=====================
وحبى لك لن يموت

مش مهم الكلمات

وجودك اسعدنى

اتمنى لكى كل السعادة :)

=====================

شاب فقرى يقول...

drama queen
نورتى
ويارب دايما بخير

أسعدنى رايك

صدقينى لا ابحث عن الحلول

:)

دمتى بكل ود
شاب فقرى
====================
هيثم رمضان
اعجبنى رايك فى مناقشة منطقية ما كتبت

ولكن كل انسان حر فى ظلم نفسه

فامام الله ياتى الحساب

عن نفسى انا لا احن ولا اشتاق لاى حد مهما كان

متفرقش معايه

انا كدا مبسوط :)

دمت بكل ود

شاب فقرى
======================
فخفخينا

نورتى وطبعا هزور مدونتكم

والمشكلة انى مكنتش قادر اسمع الحرف دا او افسره

نورتى :)
=======================
isolde

نورتى حضرتك

فهمت جدا كلامك

وانا بالقسوة اللى انتى ذكرتيها

وكل سنة وانتى طيبة وبالف خير

متاخرة احسن من مفيش :p

نورتى :)

شاب فقرى
==================
أميرة على كوكب مهجور

نورتى اولا

القصيدة جميلة وبالذات اخر جملة

عجبتنى اوى

برغم الفراق مازال مقتنع انها حبيبته وانها ملاكا يستحق صحبة الملائكة

جميل اوى

الحمد لله انا بخير :)

شاب فقرى

شاب فقرى يقول...

=======================
شيما

الشعب لابد له من حكومة تشكمه
وانتى محتاجه كوباية قهوة
انا مقولتش حاجة غير ان الناس مش وصلت لهم الحقيقة كاملة
عشان كدا محدش فهم الموضوع

شكرا لدعوتك يا شيما

هقول ايه غير امين :)

تسلمى :)


**,ينتهى هذا العشق عندما يصبح فى حياتنا شخصا عابرا ترك ذكرى ورحل و لا نمتلك تجاهه اى مشاعر سواء كانت كره او حب..ويصبح مجرد صفحه فى كتاب الذكريات..وقتها نكون بالفعل تخطيناه.


والله فعلا نسيت يا شيما :)

ومش حاسس باى حاجة تجاهها هى بالذات

عادى بقى

الحياة حلوة :)

فقرى
==========================
فراشة

بصى

انا شايل احلام مينفعش تتنفذ غير مع الطرف التانى بس

يعنى احلام تخص الطرف التانى دا بس

احلام لازم تتحقق معاها

فاهمة

نورتى :)

شاب فقرى
==================

دنيا

انتى فهمتى حاجات غلط فى البوست

بس نو بروبلم

انا لما نجحت

نجحت لانى عايز كدا ولانى اى مجال بروحه بنجح فيه

فما بالك بمجال بحبه

وعايز اتطور نفسى عشان اخد خطوة كويسة

يارب يكون الموضوع اتفهم

يعنى برده بنجح لنفسى

ووجهة النظر الخاصة بالنجاح لا تنطبق عليه

ووجهة النظر الخاصة بالسؤال بتاع بتحبينى برده لا تنطبق على الموقف
انتى بتقولى لو انا مرتبطة وبحب واحد

من وجهة نظرى لو سأل يبقى شخصية رخمة

انما الحالة هنا مختلفة تماما
حلوة حكاية مبقاش قلب دا بقى مول دى

براحة علينا شوية

فقرى
========================

شاب فقرى يقول...

سكرة

يارب الكلام يتسمع

انا بحكى عشان عايز ارغى وبكتب لنفسى مش للناس ولا عشان راى الناس :)

فقرى
==========================
7annen

صدقينى مر سنين كتير اوى

نورتى ودمتى بكل ود وشكرا للدعاء

اللهم خليك معانا كلنا :)

فقرى
============================

آيوشة

يبقى مش تعرفى الحب لو بتحسبيها كدا

بالنسبة ليه انا

انا تمام وبنسى بسهولة جدا بس اعرف الحب اوى اوى

الاحلام اللى حابسها احلام تخصنى انا وهى بس ومينفعش تتحقق فى غيابها

نورتى :)

فقرى
=======================
خواطر شابه

اسعدنى ردك :)

فعلا منير صوته الحل السحرى عشان الواحد يبقى طموح او سعيد

او نقدر نقول احد الحلول :)

خالص تحياتى واحترامى

فقرى

====================
فتاة من الصعيد

ملقتش صورة رومانسية اكتر من دى :)

نورتى ودمتى بكل ود

شاب فقرى
=====================
Angel

نورتى اولا

ثانيا نتكلم فى تعليقك

بالنسية للامور الشخصية

فى حاجات انا كاتبها

يمكن لنفسى ويمكن عشان اخد راى الناس

مش مهم

المهم نورتى

وشكرا لتعليقك

فقرى

هــو..مش ..نـو يقول...

دا والله الفقر بعينه
كلام غريب ...ووجع دماغ
الكلام عندي مُش عندك .
عندك راحه بال
وبتقول ولا يهمك ما يُقال.
تعالي شوفلي وجع دماغي ..
بلا وجع دماغ.
--هو--هو--

TWEETY يقول...

ازيك ياعمو

ايه الكلام الكتير دا

بس الصور حلوة خالص

انا جيت اسلم على حضرتك

donya يقول...

مساء الخير
ازيك
انت فين مش بعاده يعني تغيب وماتصدعناش ببوست جميل

انا بحب رغيك في بوستاتك جدا
بحس انك فاتح لنا الجمجمه وعمال تفكر معانا بصوت عالي

يارب تكون كويس
ومافيش حاجه

علي فكره اوشو بيسلم عليك

تحياتي

سماء يقول...

انا هعلق عليها كقصة

اسلوبك جميل وبسيط فيها


وقريتها كلها من غير مايجيلى ملل


ربنا يوفقك

دمت بكل ود

صوت من مصر يقول...

لسه سامع الاغنية حالا
ومش محتاجه منك شرح فكلمات الملك تشرح نفسها
وتسلم دماغك بجد

riri يقول...

كريم او كرملله الاسم الا عجبنى جدااا من ساعات مادخلت عندك انا ممكن اكون جيت هنا قبل كده بس بقالى كتير بش دخلت
واول مادخلت فضلت فى المدونه بتاعتك يوم كامل بش خرجت غير لما قريت كل حاجه وفضلت سهرانه عليها يمكن وبصراحه بش همنى كلام الا انت بتقولوا ده لمين وليه
بس بش عارفه هتصدقنى ان انا بتعلم منك حاجات كتير عجبتنى فى كلامك والتحدى الا انت واخدوا حتى على نفسك
وخلتنى اتحاول من حاجه لحاجه
يمكن مكنتش اتخيل ابداا ان انا اتحدى نفسى وكل الا جوايا بشكل ده بس يمكن تكون انت من ضمن الاسباب الا خلتنى اتغير واحاول ابقى حد راضى عن نفسى
لو شكرتك ممكن تفتكرنى بجاملك
بس انا هاجى عندك هنا على طول
عشان اتعلم منك

شاب فقرى يقول...

هو مش نو

مش عارف لهي دايما تعليقك بيكون غامض بالنسبة لى

نورت

خالص تحياتى لك

=========================
Tweety
أنا سعيد بمرورك

الله يسلمك ويارب يحفظك ويعزك يارب :)

نورتى

فقرى
=========================
donya

نفسى اعرف مين اوشو دا

انا كاتب انى واخد اجازة مع نفسى

ومريح شوية من كل حاجة فى الحياة

شكرا على سؤالك واهتمامك ومرورك

شاب فقرى
=====================
سماء

أسعدنى إعجابك بها كقصة

ربما أكتبها كاملة أحد الأيام

دمتى بكل ود وخير

شاب فقرى
======================
صوت من مصر

منور يا جميل

:)

شكرا لرايك

شاب فقرى
=======================
riri

انا اولا سعيد جدا برأيك فى المدونة

وسعادتى أكبر بأنى قدرت أغير فيكى ولو جزء بسيط :)

نورتينى وأسعدنى تواجدك :)

بجد شكرا على كلامك اللى قلتيه :)


فرحنى

شكرا ليكى

شاب فقرى :)

==========================

غير معرف

والله والله والله أنا ما عارف إنته مين

والله والله والله ما أعرف حتى أنا إتصلت بيك إمتى ؟؟؟ بس محصلش إنى كلمت حد وقفل فى وشى قبل كدا او معرفنيش من الثانية الأولى
وكمان انا مش بكلم حد من خلال الموبايل ولا بتواصل مع حد بالشكل دا

فأكيد لو حد كلمك فهوا مش أنا

بجد مش فاهم حاجة ولا عارف مين حضرتك :)

نورتى وياريت توضحى لى الموضوع

شاب فقرى

محمد قاسم يقول...

امممممممممممممممممممممم




اها يعنى الرغى والنرفزة والفضفضة اللى انا كتبتها كانت فى غير
محلها

بس انا كنت استريحت انى رغيت معلش صدعتك

يلا ماعلينا





حددت خطوات لأنساها


وكانت كالتالى :

أولا :

لا تذكرها فى حديثك

تانيا :

لا تتذكر ما كانت تعشق وتكره فى الحياة

ثالثا :

لا تردد كلماتها

رابعا :

لا تفكر فى أراءها فى الحياة والناس وعد إلى ما كنت عليه أو ربما عليك أن تكون شخصا آخر يجب أن تكونه

خامسا :

لا تفكر فى عينيها

سادسا :

بعد قليل ستنمحى وكأنها لم تكن هنا





ياترى بتنجح الخطوات دى ولا اية

حبات التوت يقول...

مساء الفل ياكريم

ههههههه اخيرا اخدت بالى انو اسمك كريم ههههههههههه

والله لاتعليق على البوست اللى انتة كتبتة يعنى انتة كفيت ووفيت

مش عارفة اقول اية بصراحة


خير خير