الخميس، 10 ديسمبر 2009

ارض الملوك والإسكندر الأكبر

السلام عليكم ورحمة الله وبركاته

حاليا فى الأسكندرية

بعمل إيه ؟؟؟؟

بريح أعصابى وبتفسح وبشوف ناس قريبين منى بجد

لأنى داخل على منحنى تاريخى فلازم أريح أعصابى

هههههههههههههههههههههههههه

آه والله

تاريخى تاريخى يعنى


بذاكر للكورس اللينوكس عشان قربت امتحن وقلقان

بس على مين

كرمللة قدها وقدود

الحمد لله لسه مبسوط

مش محتاج غير دعواتكم

حاجة غريبة

مش عارف ليه قلقان ليه ؟؟

كل أما الحالة بتبقى تمام

بتأكد إنه الهدوء الذى يسبق العاصفة

آه والله

عشان كدا متأكد إن فى مصيبة كبيرة أو صدمة عالمية هتحصلى

والحمد لله أنا جاهز تماما ودايما لاى مصيبة او مشكلة

يمكن أنا بحب الأسكندرية أكتر من ما أهلها بيحبوها

سعادتى لا توصف لما بمشى فى شوارع أليكس

وطول ما أنا ماشى بغنى

((أرض الملوك والإسكندر الأكبر ...عليك تقدر ناسها وإنته كمان هتتقدر ))

والحمد لله ماشى بالنصيحة والأغنية أوى

أنا كدا خلاص تمام جدا

انا نايم عند أعز صحابى

يمكن قدرت أجمع فى السفرية دى كل حاجة نفسى فيها فى الحياة وبحبها

ومن أهمهم صحبى وأعز الناس وأقرب الناس ليه

وحاجات تانية كتير

مش هحكى أى حاجة

بخاف من الحسد :D

إن شاء الله أجيببلكم تقرير لما أروح البيت فى القاهرة

دمتم فى كل ود

شاب فقرى

===============
إعتذار واجب
إلى المعلق (( غير معرف ))
آسف لردى الحاد عليك سابقا
ولكن كان قلقى من بعد انتحال شخصيتى وشكل البروفايل من شخص من قبل
فقد ظننت أنه يحاول التعرف على الناس وتشويه صورتى
أتمنى أن تتقبل إعتذارى

فقرى

هناك 23 تعليقًا:

أميرة علي كوكب مهجور يقول...

اكيد الجو تحفه في اليكس دلوقتي مش عايزة اقول بحقد عليك لا تقول بحسد انا بحقد بس :)


ربنا يوفقك يا كريم ويسعدك دايما

الشعب لابد له من حكومه تشكمه يقول...

وحش,,فى اسكندريه وفى الشتا كمااااااان,اسكندريه فى الشتا احلى من الصيف مليون مره..
وانا هنا فى المنصوره,,كميه حقد لا توصف:(

لا بجد ربنا يسعدك ويريح قلبك وبالك ,
ويا اخى بطل باه القلق ده انت صعبان عليك تتبسط؟؟
ايه الناس دى,,عيييش اللحظه..

*انا هروح بورسعيد على راس السنه ان شاء الله بحبها فى الشتا..
محدش احسن من حد علشان متغظناش بس..


سلملى على الكورنيش وعلى شوارع اسكندريه وعلى بحرها..

متنساش اتبسط كويس:)

كرمله لو تعرف تصورلى البحر ياريت:) ,اه كمان لو سمحت لو الجو فى مطره عندك صورلى الشوارع وهى مغسوله والجو فى ريحة المطره:)

وحش بحقد عليك انا:(

P A S H A يقول...

مسا مسا يا عم الحاج
إن شاء الله تكون أجازة سعيدة وترجع فريش كده وفل الفل ..أخبار الجو هناك إيه ؟؟ أصلها طالبه معايا أنا كمان أسافر ومش عارف أروح إسكندرية ولا الغردقة ؟
أأمنك أمانة يا شيخ ... فيه واحد في محطة الرمل في الجنينة اللي في نص الشارع دايما كان بيقعد يغني لفريد وعبد المطلب والست .. وصوته بجد روعة ... لو لقيته أعزمه على كباية شاي ... وخليه يغني أغنية تلات سلامات !!
وإهديها لي
وصدقني هاتوصل :)
في إنتظار عودتك بالسلامة

تحياتي وسلامي

P A S H A يقول...

تصحيييييييح

- أنا مش فاكر قوي بصراحة هو الراجل في محطة الرمل ولا المنشية !! أصلي باتلخبط بينهم هو عموماً الشارع اللي أوله النصب التذكاري من ع الكورنيش
:))
سلام

Somaya Kamal El Din يقول...

الحمد لله تمام

ويا رب دايما مبسوط
وخير مفيش لا عواصف ولا مطر ان شاء الله

وربنا يكرمك فى الكورس وتنجح وتكمل فى المجال اللى بتحبه

لما ترجع بقى ابقى طمنا

فى امان الله
يلا سلام

قلم رصاص يقول...


كرمله حبيب هارتي

قال وانا اللي فاكر اني الوحيد اللي عارف انك في اليكس قال ههههههههههههههههههه

عموما انا اتمنىلك كل توفيق في رحلتك المكوكية .. ومستني الريبورت يابطل بفارغ الصبر

هتروح مني فييييييييييين ههههههههههههه

واجمد يابطل .. عاوزك تسد في اللينوكس عما اخوك يحصلك .. احنا لازم محطك الأرقام القياسية وناخد الايزو
ههههههههههههههههه

رحلتي مع اللينوكس بدأت من امبارح ياكرمله .. ومتضامن معاك بهارتي

جمد قلبك .. أيوا بحبك ..لسه بحبك

ايه انا هنسى نفسي واغني بعد الاعتزال ولاايييييييييه ههههههههههههههه

يلا في حفظ الله والقلب داعيلك


غير معرف يقول...

اجازه سعيده وترجع بالسلامه

تحياتي

Lady E يقول...

ربنا يوفقك في امتحاناتك ان شاء الله

وترجع القاهرة بالسلامه

ورحلة سعيدة في اسكندرية عروسة البحر

Aиgel يقول...


طاب صباحك / مسائك
شاب فقري

ورحلة سعيدة إن شاء الله

وترجع بالسلامة وإن شاء الله مش هيحصل حاجة ... لك دعواتنا متواصلات

وهنستنى التقرير القاهري
(:

دمت بود واحترام
يا كريم

Angel love

ponpona يقول...

السلام عليكم ورحمة الله وبركاته

حاليا فى الأسكندرية

بعمل إيه ؟؟؟؟

بريح أعصابى وبتفسح وبشوف ناس قريبين منى بجد


عقبالي يارب عقبالي
ولو انها مش باينلها خروجه عن قريب

ربنا يوفقك يا فقري
وان شاء الله كل حاجه تبقي تمام

:)

سلمى يقول...

منورنا فى اسكندريه يا فندم
وانا اقول ان فى حاجه مش طبيعيه اتارى حضرتك موجوده
فى مكان رائع لو تحب تروحه اسمه بير مسعود سيبك من البير نفسه ادخل عند البحر واقف على الصخور منظر ولا اروع
ترجع بيتك بلسلامه وربنا يوفقك فى الامتحان

سلمى يقول...

حضرتك سئلت يعنى ايه شابوه فى البوست اللى فات
شابوه يعنى برفع القبعه احتراما ليك
وشابوه اصلا فى الفرنساوى يعنى قبعه بس احنا هنا بترجمعها زى ماكتبت الاول
شكرا لان حضرتك بتكون مبسوط لما تشوف اسمى لاول مره احس ان اسمى مش موحش ولا قديم وكده يعنى

غير معرف يقول...

اعتذار واجب زى عزاء واجب كدة لالا ولا يهمك انتة مش غلطان اكتر من مرة تقولى انك مش الشخص اللى ببحث عنة وانا مفيش فايدة مصصممة برضة لكن امبار ح اتاكدت انك مش انتة...علشان كدة انا اللى باعتذر سلم على البحر بحبة قوى بس عدار بيتحول الى سونامى لما القى الشخص اللى ببحث عنة هكتب لة ...اعتذاى لحضرتك رديت مرة عليا رد سئ قفلت مدوناتى لكن ان شاء الله هفتحها طالما مش انتة

غير معرف يقول...

اعتذار واجب زى واجب عزاء او سقط سهوا مثلا اكتر من مرة تقول لى انك مش انتة الشخص اللى باكتب لة وانا مفيش فايدة برضة بعتذر على غبائى لكن امبارح تاكدت انك مش هو فعلا وانى كنت غلاطانة فى رد من ردودك قفلت مدوناتى لكن ان شاء اللة حفتحها تنى وعرفت انك حتى ملاحظت انى قفلتها دليل على انك مش هو فعلا انا باعتذر سلم على البحر قد ماهو جميل بس ساعات بيقلب سونامى

Pink Dreams يقول...

ربنا يرجعك بالسلامه يا رب

ويا رب دايما كدا فى سعاده باذن الله

ومتقلقش من اى حاجه

ربنا يوفقك

الزنارى يقول...

السلام عليكم و رحمة الله و بركاتة
تحية طيبة و بعد
يحتاج الفرد من فترة لأخرى لكى يستريح و يستعيد نشاطة ثانيا .
لكن اسكندرية فى هذا البرد قل أسوان مثلا .
ان شاء الله لا مصيبة و لا شئ قادم محزن و كل شئ جيد لك .
مع خالص الاحترام و التقدير
أحمد الزنارى

رحلتنا في الحياة يقول...

ازيك ياكريم والله كويس جدا الحالة دى اللى انت فيها ربنا يديمها عليك وتفائل وبطل تعمل زى باقى الشعب المصرى لما يتبسط شوية يقول خير الله مااجعله خير

جارة القمر يقول...

مبسوووووطة اوووووووى انك مبسوط كدا يارب يارب ترجع وانت مريح اعصابك على الاخر وان شاء الله مش يحصل مصايب ولا حاجه وربنا يخلف ظنك

خد بالك من نفسك .. سلالالام

بيطرية ومش بايدى يقول...

سلام عليكم
يا كريم باشا

يارب تقضى اجازة سعيدة ف اسكندرية
وتخرج من مودك الفقرى ده للابد

بس انا احب اوضح حاجة بس معادها متاخر شوية
انت افتكرت ساعة ماكنت بعلق عندك بغير معرف ان انا اللى كنت بانتقدك وكده وباكتب كلام غريب كده
وافتكرتها الاول دموع وبعدين افتكرتها انا
بس انا ماكتبتش غير تعليقين
وكان فى واحد منهم فيه سلاموز

بس ادى القصة اصل لقيتك قطعت مرة واحدة

وياسيدى لو فى حاجة مزعلاك او مضايقاك منى ابقى قول

محدش فينا ضامن عمره

يلا سلام

صيدلانيه طالعه نازله يقول...

شد حيلك و ربنا معاك ان شاء الله و بلاش تشؤم و ان شاء الله يبقى الهدوء اللى يسبك الخير كله
سلملى على اسكندريه و امى و ابويا اللى هناك

كلام عيب يقول...

مستنيين تقريرك اما ترجع ان شاء الله و متخافش انا مش باحسد و عينى بارده
ربنا معااااااااااك

حبات التوت يقول...

شط اسكندرية ياشط الهوى روحنا اسكنرية رمانا الهوى يادنيا هنية وليالى رضيةاحملها بعنية شط اسكنرية


ااااه على اسكنرية ااااااه ليها حب غريب فى قلبى بحبها اوى اوى اوى

بعشقها

مش عارفة لية الناس بتحبها كدة


ياحظك ياكوكو يابختك ااااااه ناس تروح اسكنرية تتفسح وناس قاعدة مزنوقة عندها امتحنات ميدتيرم


يلا هدعيللك بالمرة معايا مش انتة بتقول عندك امتحان كدة مش عارفة اقرى اسمة ربنا يوفقك فية

ذاكر كويس وبطل لعب شوية

حبات التوت يقول...

اه نسيت اقوللك

يارب يسعدك على طوووووووول

ربنا يسعدك ويشرح صدرك ويفرح قلبك

وانسى القلق ماتخفش ان شاله خير خير