الثلاثاء، 8 ديسمبر 2009

الطريق إلى السماء


بسم الله الرحمن الرحيم

لا يسعنى إلا أن أضع صورة للأمس وألتقط صورة لليوم وأضعهما معا
أتأملهما كثيرا
أحاول أن أدرك ما كنت أمر به
وأحاول أكثر أن أدرك ما أمر به الآن
دعنى أتأمل
لا تحاول أن تفهم ما سأكتب
ولا تحاول أن تسألنى عما كتبت
ربما لأنه عالم خاص قد خلقته لنفسى
فقط إسمع تأملاتى فى صمت وهدوء
لا تحاول إزعاجى صارخا أنك لم تفهم كلمة
أو تطلب تفسيرا ما
وربما يجب عليك أيضا أن تتناسى أننى هنا اليوم

فقط دعنى اتأمل


*****

الأمس

يزداد الملل ولا أدرى سبيلا لمعالجته
أرتدى ملابسى وألتقط هاتفى مع سماعة صغيرة محاولا أن أذوب بين الألحان والأغنيات
أخرج إلى الطريق
لا أدرى لما أشعر بالبرد بالرغم من أن حر الصيف يلهب وجهى وجسدى
لا أدرى من أين يأتينى ذلك البرد القاتل
أرفع من صوت المرسيقى ومن أغانى الراب
أحاول جاهدا أن أذوب فيها قدر ما أستطيع
يبدأ جسدى فى الإستجابة إلى موسيقى الراب
لا أشعر إلا بأصابعى تهتز وكأنها ترسم شكلا للألحان وكأنها تعلو وتهبط على السلم الموسيقى
وأهز رأسى فى هدوء علنى أذوب فيها وبين كلماتها
أستمع إلى الموسيقى وأردد معها
(( حياة إنسان فى كل الأيام أحزان
يوم وأنا ماشى فى الشارع مش شايف قدامى من كتر همومى
رجلى مش شايلانى برغم شبابى
لازم أبعد وأفوق من وهمى ...
فجبت عود كبريت وقعدت أجرب هل هستحمل نار الدنيا ولا هتهرب ؟؟؟
أول حركة قلة فتحت عنيه على الدنيا
بعدوا وقت الشدة كل واحد راح فى حته
يومها بس عرفت من شيطان ومين كويس
مين هيقسم الأحزان ومين هدفه يهيس ...
إتعلمت مش كل حاجة بتلمع تبقى دهب
مش كل عين بتدمع يبقى جواها ألم
وكل كلمة قلتها ... شهد عليها الزمن
أى حد سابنى من غير سبب الباب يفوت جمل ...
واللى واقف جمبى أنا واقف جمبه ليوم الدين
))
يعلو صوت الموسيقى
وتهب نفحة من الهواء
لا أدرى ما أشعر به الآن
ربما هوا نوعا آخر من القوة التى لم ألتمسها من قبل فى أى شخص
ولم أراها حتى من قبل ولم أرى احد هكذا
أقوم بتغيير الأغنيه وأحاول أن أساعد نفسى وأخرج مما أنا فيه

((
مشيت مشوار طويل وحلمى مش سايبنى ماشى جمبى
هو دا حلمى اللى ملازمنى ...
طول الوقن مش هاممنى
عمر ما اليأس هيظلمنى
ومهما هيحصل مش آلمنى ...
))

تزداد القوة التى لا أدرى منبعها
هل ياترى هى تجارب الأمس
أم حاضر تحاول فيه إثبات شيئا ما لا يراه سواك ومن يؤمنون بك فقط

فبرغم إبتعادهم عنك وكأنهم قد تخلوا عن كل ما آمنتم به معا
يزداد إيمانك بما تراه وترى احلامك واقعا تحياه
تحاول أن تنفى الحب خارج حدود مدينتك
وتضحك على ما سبق فى حياتك من أيام عشتها متيقنا بوجود ذلك الوهم الكبير

تنظر إلى أحلامك وتراها بسيطة نسبة إلى تلك القوة التى تتمتع بها
تغمض عينيك وتستمع بالموسيقى
تفتح عينيك وتنظر إلى نهاية الطريق
وتشعر وكأن الطريق لا نهاية له وأن السماء بعيدة كل البعد عنك

*****
اليوم

تحاول أن تفكر
لا تستطيع
تحاول أن ترى شيئا من كآبة المنظر فى كل شىء حولك
فقط عينيك لا تبصر شيئا
تبتسم فى هدوء وتشعر وكأنك قد أصبحت أعمى
فتسحب نفسك وتمسك بالجوال وتخرج إلى نفس الطريق الذى إعتدت أن تسير فيه
تمشى فى الطريق مستمعا للموسيقى
ينطلق صوت منير هادئا فى أذنيك
((
مش جايز أموت فيكى وفيكى
دا أنا أموت فى عنيكى من غمزة
دا أنا عارف نفسى وتلاكيكى
بعشق لياليكى من لمسة
أنا أنسى فى شفايفك إسمى ...
دا أنا فاهم فى كنوز العفة
أنا ممكن أجرى لك دمى
أنا حاسس دمى هيتصفى
....
))
الطول واللون والحرية - منير - 1993

يعلو صوت الموسيقى وتهب نسمة هواء ترفع من روحك المعنوية
تجعلك تشعر وكأنك حى ترزق
لا تشعر ببرد الشتاء
تنظر إلى آخر الطريق
ترى أن السماء قد تقاطعت مع الطريق وأن للطريق نهاية
هنالك عند حدود السماء
ومازالت القوة بداخلك

تعود إلى نقطة البداية
وتفتح أبواب منزلك وتدخل فى هدوء
وتشعر وكأنك قد ملكت الكون وبأن أحلامك قد بدأت فى التحقيق
تخلع ملابس الشتاء وتبدأ تجهز نفسك لتحلم بها
فتعد كوبا ساخنا من الشاى ...
تطفىء النور ...
وتفتح الشباك ليدخل ضوء القمر متسللا من بين السحاب
وتطمع أن يصيبك من دفء نور القمر ولو القليل
تسأل نفسك متعجبا وهل للقمر دفء ؟؟؟
ربما هوا دفء روحى
تبتسم لكلماتك وتتأكد من أنك صرت مجنونا
تجلس فى صمت ..
وتهب لسعه خفيفة من البرد ...
الآن يمكنك أن تغفو وتحلم بها...
فملكة أساطيرك لاتأتى إلا مع لسعات برد الشتاء
:)


أحلام ضائعة
شاب فقرى


==========

يمكن بطلت أزور مدونات حد وكتبتفى المود بتاعى إنى فى أجازة كام يوم
وبالفعل كنت فى أجازة من التدوين
يمكن لقيت حد يسمعنى فبطلت أكتب لعموم البشر
مش مهم
لكنى رجعت مرة تانية
جالى تعليق غريب من شخصية غير معرفة وقال كلام أغرب
شكل فى حد راح علق عند الشخصية دى غلط وساب رقم تليفون وإفتكرت إنه انا مع إن دا مستحيل
بس نو بروبلم
كفاية الجماعة السلفيين اللى بيجيبوا تعليقات غريبة بيحسسونى إنى خارج عن الملة
ومن موقعى هذا أحب أقولهم
(( طز... ياريت يبقى فى شوية دم وتقرا المدونة بدل ما بتسيب تعليقات وتجرى كدا ))
****
ليه أخدت أجازة من التدوين ورديت عالتعليقات متأخر وبطلت تزور الناس فى مدوناتها
؟؟؟؟
يمكن لأنى مبسوط ومش قادر أنقل لكم حالة السعادة
وخايف لو مريت تصيبنى هالآت الإكتئاب الموجودة عند الناس
فأنا على إقتناع تام بأن الحالة الحالية للشخص سهلة الإنتقال بين البشر وكأنها مرض أو عدوى
يعنى لو مشيت مع حد مكتئب أو قربت منه سنتك سودا
لازم تكون هالتك أقوى من هالة الكآبة اللى مسيطرة عليه
وأنا مكنتش عايز احارب الكآبة والهموم فى الفترة دى
يمكن كنت عايز أعيش حالة من السعادة بعيدا عن كل شىء وعن اى حد
والحمد لله عشتها وتمام التمام
لكن نرجع تانى للتعليقات
كان جالى تعليقات عالبوست اللى فات بتقولى إنته مش بتنسى وإبتسم للحياة يا ضنايه
وسكر حلوة الدنيا سكر
والكلام الحلو دا كله
اللى أنا بسميه كلام حمصى
بمعنى إنى والحمد لله بالقوة الكافية إنى أنسى أى حد
يمكن اى حد قال كدا نسى إنى مؤسس جبهة الجدعان الشعبية :) (( أنا جدع ))
ثانيا مين قال إن البوست اللى فات تجربة شخصية ليه أنا ؟؟؟:D
عالعموم مش مهم
أسعدنى مرور الجميع والتعليقات والناس
وخالص تحياتى للناس اللى حست إنى مختفى الفترة اللى فاتت ومسألتش عليه
واللى محسوش ومسألوش :)

دمتم بكل ود وخير وسعادة

شاب فقرى

هناك 19 تعليقًا:

Aиgel يقول...


مساء الخيرات

فقط إسمع تأملاتى فى صمت وهدوء
لا تحاول إزعاجى صارخا أنك لم تفهم كلمة
أو تطلب تفسيرا ما
وربما يجب عليك أيضا أن تتناسى أننى هنا اليوم
فقط دعنى اتأمل



.................

خلاص أنا تأملت في هدوء

مع السلامة بقى
;)

نصيحة : خليك مكانك متروحش عند حد عشان الغالب عند الكل جو كئيب بس رومنتيكي (:

بقيت غريب غريب

مش هكتب اسمي

ponpona يقول...

طيب تصدق بالله ... والله انت بتفهم
انا لو هاقولك علي اكتر حاجات عجبتني في البوست دا انا يمكن ارجع اكتبه تاني هنا .. كله كله عجبني آه والله .. أصل انا تقريبا بردو باعمل باظبط زيك كده لما باكون متضايق بالم حاجتي واحط منير في وداني واقعد أغني ولو ماشي في الشارع بردو باقعد أغني .. انا باعمل كده باقاوم أحزاني بالغنا وان ماقدرتش تضحك ماتدمعش ولا تبكيش ..

" تزداد القوة التى لا أدرى منبعها " .. هو دا اللي بيخليني قادر اكمل رغم مودي اللي بيبقي مكسور

بالنسبه بقي لانك كنت غايب فتره .. فانا كنت عارفه انك واخد آجازه يومين وراجع ... انت كنت كاتب كده علي جنب .. انا قرأتها واحترمت غيبتك وعامة يعني .. حمدلله ع السلامه

:)

мαησηα يقول...

ههههههههههههههههه والله يا انجل انتى مشكلة ..

فقرى تعالى عندى ماتخافش ههههههههه والله ما تخاف حلوة الدنيا سكر عندى

انا بقالى فترة مش بعلق عندك بس لسبب انى مدام مش عارفة اعلق مش بحب اعلق وخلاص فاهمنى

لان ده بيعتبر قلة احترام للكاتب واللى مكتوب انك بس تدخل تقول رد وخلاص ال يعنى بقه تحمل المدون حمل تعليقاتك

دول ناس كده بيبقوا شبه السلفيين وتعليقاتهم بس اسمهم السفيهيين ماعلينا

المهم ..
عجبانى الحالة اللى انت فيها يارب لو كانت مرتاح تفضل فيها ع طول وتتنقل للاحسن باذن الله

متبعاك ولكن بدون تعليقات لحد مالاقى تعليق مناسب اوك يا باشا

الحمد لله انك بخير دايما

الشعب لابد له من حكومه تشكمه يقول...

,,,اتابع فى صمت,,,,

Eman يقول...

جميل ان الحزن لم يرمِ رماداً هنآ =)

كلآمك جميل
وقد ظللني اليوم :)

قلت انك تريد التأمل في هدوء
وانا لا اريد ان اصنـ ع
المزيد من الضج ـيج

دمتـ بتفآؤل يا فتى ^^

فراشة يقول...

أولا حمدا لله ع السلامة
ثانيا يارب تفضل مبسو كتير على طول الايام

ثالثا عجبني العنوان جدا

رابعا حبيت بس اسلم وأسيبك لتأملاتك الجميلة

"منى\فراشة"

قلم رصاص يقول...

ماشي ياكريم

خد راحتك على الاخر واحنا متابعين

على فكرة عاوزك في موضوع اللينوكس

شوف وقتك المناسب وعرفني

في امان الله

Cute Kitty **sookra يقول...

عشان كدا قلت ابعد شويه عشان موش ابوظلك مودك
اهو
بعيدهههههههههههههههههههههههههههههههههه
لاتعليق

أميرة علي كوكب مهجور يقول...

يارب تكون بخير
واستمر ياكريم في طريقتك دي لو مقدرتش تخف بسرعه ع الاقل هداوي جزء كبير من المك
لمت ببص للسماء بحس ان ربنا موجود وبيقولنا متخافوش انا معاكم ادعوا انتم بس

ربنا يسعدك يا كريم

غير معرف يقول...

ليا تعليق اخير حكتبة لك فيما بعد ياريت تستحملنى فى اخر تعليق

riri يقول...

ههههههههههههههه جامده الحته دى وعندك حق فيه
(((فأنا على إقتناع تام بأن الحالة الحالية للشخص سهلة الإنتقال بين البشر وكأنها مرض أو عدوى
يعنى لو مشيت مع حد مكتئب أو قربت منه سنتك سودا )))

وانت تأمر بس انا من نينى الاتنين كده ااقلبلكم المدونات كلها سعاده
اوعى حاجه تعكر عليك مزاجك ياكرملله :d

Remas يقول...

ازيك يا كريم

عامل ايه

انا كمان شفت انك كاتب انك هاتاخد اجازة كم يوم

وعرفت انك محتاج دا

ويارب دايما مبسوط على طول

وانا متابعة لك باستمرار

ponpona يقول...

انت فين يا بني؟
:(

سلمى يقول...

تعجبنى جدا فلسفتك
شابوه

رحلتنا في الحياة يقول...

ايه ياعم البوست ده كوكتيل والله :)
يعنى فى الاول تخلينى نعيش حالة غريبة مش عارفة حسيت ان من مرحلة جمود مش عارف تعمل ايه وبعدين بتحصر الحزن فى مكان معين بالتدريج التفاؤل بيزيد مش عارفة حسيت انها زى مقاومة منك فى حالة اليأس
اما فى بقى موضوع انك سعيد ربنا يسعد ايامك كلها يارب وعندك حق فعلا ان الاكتئاب عدوى وبيتنقل بسهولة من واحد لواحد
وبعدين ايه اسلوب التقطيم اللى فى الاخر ده

للناس اللى حست إنى مختفى الفترة اللى فاتت ومسألتش عليه
واللى محسوش ومسألوش :)

Somaya Kamal El Din يقول...

تووووووووووووووووت

جيت

حلوة الخواطر لليوم والامس

وكلمات الاغانى اللى كتبها عجبتنى اوى



وحمد لله على السلامة

ويا رب دايما مبسوط كده

ريمان يقول...

تعلمت مش كل حاجة بتلمع تبقى دهب
مش كل عين بتدمع يبقى جواها ألم
وكل كلمة قلتها ... شهد عليها الزمن
أى حد سابنى من غير سبب الباب يفوت جمل ...
واللى واقف جمبى أنا واقف جمبه ليوم الدين


ـــــــــــــــــــــــ

عجبتنى اوى الحته دى


اهو ده الكلام ولا بلاش

شاب فقرى يقول...

Angel

نورتى

وشكرا لتركى لتأملاتى :)

دمتى بكل ود

=======================
ponpona

أنا هنا أهوه

أحلى حاجة انك ماشية بمبدأ لو مقدرتش تضحك متدمعش :)

بكون مبسوط اوى اما اشوف انى مش لوحدى كدا فى العالم دا

:)

فقرى

======================
manona

بانتظار التعليق المناسب :)

تعليقك أسعدنى كثيرا جدا جداجدا بعد طول غياب

:)

نورتى

شاب فقرى

====================
الشعب لابد له من حكومة تشكمه

وأنا أيضا مازلت أتابع فى صمت

لعل سعادتى تستمر :)

شاب فقرى
====================
وحبى لك لن يموت
شكرا لاحترامك لرغبتى فى التأمل والصمت :)

دمتى بكل ود

(( تعليقاتك دوما هادئة ولم تصنع الضجيج يوما ))

شاب فقرى
====================
فراشة

أسعد الله أيامك

يارب سعادتى تكتمل

يارب

فقرى
===================
قلم رصاص

صديقى الطيب

أنا تحت أمرك دوما :)

فقرى
=====================
سكرة

ههههههههههههههههههه

فاهمة الحالة

غريبة دى والله

:)))))))

فقرى
==================
أميرة على كوكب مهجور

لا أدرى لما دوما حاولت ولم أستطع

الحمد لله الذى أخرجنى مما كنت فيه

يارب يسعدك يارب

شاب فقرى
==================
riri

مادام فى سعادة

هتلاقينى فى مدونتك كل يوم :)

شاب فقرى
=====================
reem
الحمد لله انا بخير زفى احسن حالاتى
ياااااااااااااااااااااارب

دعواتك معايه بس

فقرى
=======================
سلمى

بتغمرنى السعادة لما بشوف اسمك

بيفكرنى باكتر حد خلقه ربنا بحبه فى الحياة

:)
سعنى ايه شابوه

فقرى
==================
آيوشة


دا اللى حصل بالفعل

بالنسبة للبوست

فالدنيا كدا

يوم فقرى

ويوم جنرال :)

تحياتى

فقرى
=======================
سمية كمال الدين :)

نورتى

الحمد لله على حالة السعادة

دعواتك معانا

شاب فقرى
=====================
ريمان :)

ياريتها كلماتى

دى اغنيه راب :)

دعواتك معايه بقى

شاب فقرى
================

شاب فقرى يقول...

غير معرف

رد خاص بك فقط

عشان أقدم إعتذارى

بعد الموضوع اللى حصل لما شخص انتحل البروفايل بتاعى وبقى بيكتب عند الناس أفكار إلحادية وكلام كتير مش كويس

فقلقت اكتر يكون بيستغل الموضوع انه يتعرف عالناس بشخصيتى

أنا آسف جدا

لم أذكر إن حضرتك بالصفة اللى قلتيها أبدا

بالعكس انا كل من يترك لى تعليق ولو حتى غير معرف فأنا أحترمه :)

أنا مش متابع اى مدونات

لانى بجهز نفسى لامتحان الكورس وتعبان ومريض الفترة دى

كل شوية يطلع لى مشكلة شكل

على فكرة انا مش زعلت من تعليقك بس اتخضيت والله عالناس مش اكتر

وبالنسبة لاغلاق المدونة فهوا مش هيحل اى مشكلة أبدااااااااااااا

فياريت تفتحى مدوناتك تانى

على فكرة انا مقصدتش ازعلك

بكرر أسفى

لانى مبحبش حد يزعلنى ولا يهزقنى فمبحبش اعمل كدا مع الناس

أشكرك للمتابعة والإهتمام ويشرفنى السؤال طبعا ومتابعتك

يارب ميكونش التعليق القادم آخر تعليق

:)

المسامح كريم

آسف للمرة التالتة ولو أقدر أنشر الأسف فى بوست لوحده هعمل كدا بالرغم من انه سوء تفاهم

دمتى بكل ود

شاب فقرى