الخميس، 5 نوفمبر 2009

إليكى أكتب فى عيد الحب :)


السلام عليكم ورحمة الله وبركاته
النهارده إكتشفت بالصدفه إنه عيد الحب
واحد رخم جاى يقولى كل سنة وإنته طيب
جاى يغيظنى يعنى عشان هوا خاطب وأنا لاء :((
وكمان فى تدوينات كتير إتكتبت رومانسية بتتكلم عن عيد الحب
فقلت ليه مش أكتب أنا كمان :$
أهوه اكتب لها
واحكى عن ذكرياتى فى عيد الحب دا

وأخد رأيكم فى كام موضوع شاغلين بالى أوووووووووى:

الموضوع الأول :

الكلام هنا للبنات بس
أو للشباب كمان اللى عايز يقول رأيه نو بروبلم
أنا فكرت إن عندى وقت كبير فراغ
أيون فراغ
أنا متعود إن يومى بيكون عادة 120 ساعة
يعنى شغل بنسبة 100 %
لكن حاليا صراحة الشغل قل أوى
مش معنى كدا إنى هبطل
لاء
لكن بفكر فى حاجة تانية مهمة
إن الواحد يتعلم صنعه
أيوه يتعلم أى صنعه فى الدنيا
ممكن بعدها يفتح ورشة أو مصنع
وكما قال النبى عليه الصلاة والسلام ( رحم الله رجلا بات كالا من عمل يده )
فأنا إنطلاقا من هذا الحديث الشريف ومن إنى لقيت نفسى فاضى فكرت فى حكاية الصنعه دى
بغض النظر عن الاستمرار فيها
ولكن السؤال هنا للبنات لو إتقدم لك واحد فى يوم من الأيام صنايعى
يعنى بيعمل شغلانه معينه أيا تكن
والراجل دا متعلم والحمد لله وخبير كمبيوتر ومهندس عما قريب
زى حالاتى كدا
تعملى إيه ؟؟؟؟
أنا مش بكتب البوست عشان عايز رأى واحدة بعينها ,,,, لاء لاء مش تفهمونى غلط
أنا عايز أعرف تفكير البنات فى النقطة دى بالذات لأنى مش سألت فيها ولا فكرت فيها قبل كدا ولسه فى طور التفكير
فلو إتقدم لك صنايعى وكسيب وكمان معاه ورشة ولا حاجة
هتقولى إيه ؟؟؟


الموضوع التانى :

لا أذكر لنفسى بتاتا أى ذكريات عن عيد الحب
لا عمرى جبت لواحدة هديه ولا حتى باكو لبان
ومحدش يستغرب
ولا عمرى أخدت الموزة بتاعتى وطلعت عالكورنيش
وجبت إتنين كانز ووقفنا كدا زى العيال الأمامير اللى ماليين الكورنيش
لكن فى مرة كنت بحب واحدة وكانت رافضة موقف الحب
دا لحد ما اتقدمت لها بس إتقدمت متأخر ورفضت وإتخطبت دلوقتى
والحمد لله الموضوع إتنسى وربنا كان جمبى
قبل ما يحصل دا كله أنا فكرت أجيب لها إيه فى عيد الحب
طبعا إتصلت بيها قلت لها هابى فلانتين
قالت لى وانته طيب يا خويا ,,, صمت الوقفه ياواد ولا مصمتهاش :D
قلت لها فاتتنى الصراحة قالت لى يلا معلش السنة الجاية بقى تلحقها
المهم فكرت اجيبلها وردة وأقف فى مكان مخفى
أستناها لحد ما تيجى وأطلعها الورده مفاجأة كدا زى الساحر وأفاجئها بيها
بس قلت لاء حاجة تقليديه أوى
فكرت وهدانى تفكيرى إلى بما إنها بتعشق الفاكهة
إنى اجيب لها فاكهة حلوة بتحبها
فكرت فى كل أنواع الفاكهة اللى كانت دايما بتطلعها من شنطتها
(( أيون صدق كانت ممكن تطلع من الشنطة أى حاجة تتخيلها او لا تخطر على بالك ))
قلت فاكهة إيه بقى ؟؟
قلت مفيش غير اليوسفى لا بيتفعص ولا بيبوظ ولا بيبقى مر ولا معفن
وقلت أجيبلها حباية يوسفى وأحطها فى شيكارة (( أيون شيكارة ))
وأحط الشيكارة فى شنطة هدايا محترمة وأقدمها لها تعبيرا عن الحب الرهيب اللى ما بينا
وبدأت فى التجهيز فعلا
ولكن فات العيد وفات أسبوع ومش شفتها
ولما قابلتها بعدها مصدقتش اللى كنت بعمله
بس حلفت لها إنى كنت هعمله فعلا
غير ذلك لا أذكر إنى فى يوم جبت لأى بنت أى هدية
غير أختى جبت لها فى مرة آيس كريم ودفعتها حسابه كمان :D

----
إليكى أكتب فى عيد الحب :)

الآن ..
قد علمتى كل ما تريدين عنى
قد أدركتى الحقيقة

عرفتى من أنا وكيف أفكر ومن اكون

فتحت لك أبواب مدنى

فهل تدخلين :$

تحياتى

شاب فقرى

هناك 42 تعليقًا:

وردشان smilyrose يقول...

اول تعليق

مش عارفه نجرب كدا

غير معرف يقول...

حطام(ك) بقايا
)مكسلة اعمل تسجيل دخول(
:D

السلام عليكم و رحمة الله وبركاته
بما انها فرصة لا تعود و جيت و مش عارفة ازاي في التعليق الثاني
احجز لي و بكرا ابقى ارد
لاني هروح انام دلوقتي ضروررري
هموووووت وانا انااام
محجوووووووووووووووووز
بس عموما انا قريت البووست و جاااامد جداااا بجد
بعدين ابقى اقول رايي في النقط اللي وردت

تصبحوا على خير

فراشة يقول...

السلام عليكم ازيك يا فقري
نجاوب على الموضوع الأول بقى

لو اتقدملي واحد صنايعي هفكر ف الموضوع بس لو كان متعلم واخد بكالريوس مثلا بس اشتغل كدا عشان الفلوس وبعدين الشغل مش عيب
انا والله كان نفسي أطلع ميكانيكي
أو اتجوز ميكانيكي ويعلمنى ونفتح ورشه سوا ههههههههههه

اما بقى عن يوم الحب هههههههههه
الحمد لله يعنى صحبتى كانت بتفتكرني وتبعتلي رسايل وممكن هدية ضغنونة كدا
وانا كنت بجيبلها وردة وقلب احمر صغير

موضوع جميل للنقاش
تحياتي/فراشة

Roqaya يقول...

بما انك قلت عايز رأى كل البنات ومحددتش, قلت أدخل اقول رأيى بقى بما ان الناس بتعتبرنى من البنات :D
رأيى أن لو الواحد دة أنا عارفاة كويس من قبل ما يعمل مشروع كدة يبقى هوافق طبعا وأشجعة.. انما لو واحد معرفوش وهيتقدملى كدة وخلاص بيتهيألى مش هوافق.. طالما هبقى مش عارفاة يبقى استنى واحد تانى مش عارفاة برضه بس متكونش دى شغلته
طبعا رأى مجنون :D و كانت قلته أحسن بس معلش بقى حظك انى دخلت شفت الموضوع :)
وبالنسبة للفاكهة الفكرة حلوة وجديدة وحتى الورد كان هيبقى حلو, المهم مين اللى بيقدم الهدية واحساسه ايه وهو بيقدمها

الشعب لابد له من حكومه تشكمه يقول...

لما ننكر حاجه اوى نباه بنأكدها.!!!!!!!

خد بالك من الموضوع ده:)
ــــــــــــــــ

ثانيا:
عمرى محتفلت بيوم الحب:)..
يوسفى يامفترى وبشكاره:))
كان نفسى تديلها الهديه دى علشان كان نفسى اعرف رد الفعل:)
يوسفى وفى شكاره..
رحمتك يااااااارب,:)

Roqaya يقول...

معلش نسيت أقول حاجة صغيرة, ان البنات عموما بتحب البنى أدم الناجح, يعنى ميكانيكى ناجح فى شغله وعارف هو عايز ايه أحسن من دكتور فاشل

قلم رصاص يقول...

ايه ياعم انت

انت كل يومين تنزل بوست

انا كل ما يدوب اقرأ وافكر ارد

الاقيك منزل واحد تاني

هههههههههههههههههههههههه

كل سنة وانت طيب

رغم تحفظي على عيد الحب ده

بس برضه كل سنة وانت طيب واحنا طيبين

هيثــم رمضـــان يقول...

والله يا باشمهندز إنت دمك زي العسل وإن شاء الله ربنا هيكرمك أخر كرم وإبقي قول هيثم قال , بص بقي بالنسبة للموضوع الأول مع إنه للبنات بس أنا هقول رأي إنت عارف طبعاً إن التوافق شرط مهم من شروط الجواز يعني ما ينفعش حد مش متعلم مثلاً يتجوز حد مُتعلم تعليم عالي لأن ده بيعمل مشاكل بعد الجواز لأختلاف الثقافه وطريقة التفكير لكن في الحاله اللي إنت بتقول عليها إن واحد متعلم تعليم كويس وبعدين شق طريقه بصنعه أو بورشه وما قعدش في البيت مستني الفرج ده يبقي واد جدع وشاطر لكن لازمن وحتماً إن يكون في حب صادق وحقيقي بينهم لان لو مافيش حب ممكن نظرتها إليه تتغير بعد الجواز وتعمله بتعالي وكمان الحب ممكن يضغط علي الأهل علشان يوفقوا علشان إحنا بنحب المظاهر قدام الناس (بلد بتاعت شهادات صحيح), يعني الخلاصه إن ده ما ينفعش في الجواز التقليدي وممكن ينفع في حالة وجود حب حقيقي وبنت يكون عقلها كبيييير .

أما موضوع عيد الحب أحب أقولك إن أنا كمان عمري ما جبت هدية في عيد الحب وعلي رأيك (أيون) عمري وكمان مش بحب المظاهر المبالغ فيها جداً للأحتفال بيه وخصوصاً يوم الفلانتين اللي في شهر فبراير ,ويمكن الناس تزعل مني لو قولت ونا واثق إن أكتر من 90في الميه بيمثلوا إنهم حبيبه في اليوم ده ونادر لما تلاقي حب حقيقي بجد حب مسؤل حب بمعانيه الكتير الجميله مش الحب بتاع الامامير بتوع الكنز ع الكورنيش زي ما أنت قولت اللي الواحد أو الوحده فيهم بيجري من أول موقف , أما بقي اللي بيحب بجد فهو مش مستني يوم أو يومين في السنه علشان يعبر عن حبه لانه بيعبر عنه في كل وقت بكلماته وأفعاله وتصرفاته تجاه من يحب حتي بنظراته إاليها أو نظرتها إليه وكأنهم طول الوقت بيقولوا لبعض (أنا بحبك) أما الهدايا والحاجات ديه إيه المشكله إنها تكون في أي وقت في السنه مش لازم تبقي في اليوم ده وبكده نبقي بعدنا عن شبهة عدم شرعية الاحتفال بيه, وده مجرد رأي ممكن يكون صح وممكن جداً يكون غلط لكنها وجهة نظر.
معلش يا معلم الرغي جامد قوي

تحياتي

غير معرف يقول...

انا أول ما شفت يامعلم اللنك للفيس بوك قولت خلاص الواد شاب فقري هيبطل يكون فقري وهايظهر لقرائه (انا بصراحه بخش اشوف ايه اخبارك السيكيوريتيه من فترة كدا) واكتشفت انك عامل Sharing للاصحاب فقط وده معناه انك لسه فقري :)

Good luck

فاتيما يقول...

الله
السؤال دا للبنات ....
يعنى الستات العواجيز اللى زى حالاتى ميجاوبوش عليه؟!!!!
اصل انا عندى تجربة فى الحكاية دى
و ممكن تنفع حد بيسمعها
و خصوصا سعادتك لأن بتسأل السؤال العويص دا
اقايس و اجاوب و خلاص
بص يا سيدى
فى العصور الوسطى لما كنت طالبة فى الجامعة و ما بعد التخرج
كنت متبنية وجهة النظر دى جدااااااا
و مكنش عندى مانع اطلاقا
اتجوز واحد صنايعى
بس طبعا يبقى معاه شهادة
عشان واحد كويس
افرض هوه ملقاش شغل كويس
و عائد مادى محترم ...يعمل إيه
يسرق ؟؟
بس لو معاه صنعة و مالو؟؟
المهم يكون محترم
و ابن ناس
قوم ايه يا سيدى
وقعت فى الحب و لا حدش سمى عليها
زميل ليا فى الشغل بينى و بينه فروق طبقية و مادية و تعليمية و كل حاجة
بس طبعا اختك معندهاش حلول وسط
يا اتجوزه يا بلاااااش
قرر هوه بحركة جدعنة
يجيب تاكسى يشتغل عليه
عشان يحوش و يعرف يتقدم لبابا
امه اللى هيا مخلفاه رفضت و اخواته استنكروا جداااااا
مين بقى اللى شجعته
و قالتله الله ينور
أيوووووه ..هيا دى
الموكوسة اللى هيا أنا
المهم المذكور اشتغل
و حوش شوية
و بعد صراع طويل اتجوزنا
و المفروض عن قصة حب و كفاح و بتاع
بعد الجواز
ابتدى يظهر الوجه القبيح
و ابتدى كمان الطبع يتغير
و ابتدى الشغل بتاعه
وسط مجتمع السواقين يبان أثره عليه
الألفاظ بقت متدنية
و العنف واضح و ضيق الخلق
و قعاد على القهاوى
و شرب حاجات ما يعلم بيها الا ربنا
و اصلا اكتشفت انه كان طمعان فيا
و فى أبويا من البداية
و لجوازة و الموضوع كله خلص بكارثة ....
كل دا بقوله ليه يا فندم
عشان اقولك
إن المهنة اللى الواحد بيمتهنها بتأثر عليه بعد زمن
و لازم يكون واخد باله من الحكاية دى
البنت مش المفروض
ابدااااااتنكسف ان جوزها صنايعى معتبر ..
لكن تنكسف من اخلاقه و تصرفاته لما تكون أى كلام
بس ارجع و اقول انا تجربتى لا تعمم
لأن الشخص اللى اتجوزته كان قليل الأصل من الاول و حد غيره ممكن يتجاوز عن الصغائر و اخلاقه متتغيرش و لا حاجة
و لحد ما يوسف ابنى كان معايا كنت بعلمه يبص لأى حرفى بنظرة احترام عالية و اقوله لو عاوز تبقى نجار
او سباك معنديش أى مانع
بس بشرط
تتعلم و يبقى معاك شهادة
لأن الحرفى المتعلم و المثقف
احسن الف مرة من اللى معهوش علم
و لا عاوز و قادر يطور نفسه
و كالعادة القاعدة دايما بتكون صح
بس التطبيق هوه اللى غلط
و كويس انك مدتهاش اليوستفندى
لو انا مكانها .....
كنت أكلتهولك فص فص
سلام و اشوفك بكرة
على الف خير إن شاء الله لو هتقدر تيجى

بيطرية ومش بايدى يقول...

انا عارفة انه مش العاشر ولا حاجة
بس هاحجز برده تعليقى
لحد ما اروح اقرا وارجع تانى
ما النهاردة الاجازة يا معلم ومفيش كلية والحياة السطة

على فكرة بقى عيد الحب كان امبارح عندكم
احنا هنا ف الزقازيق النهاردة عيد الحب شوفت الاخترعات
طب ده على اى اساس حسب التوقيت المحلى مثلا :) الله اعلم
صباح الفل

سلمى يقول...

السلام عليكم
بص حضرتك لو زى ما حضرتك بتقول مثقف ومتعلم وقريبا مهندس ماشى
صانيعى دى بقى تبقى حاجه استثنائيه
يعنى مش اساسيه ممكن شغل ليه فتره تانيه
ويكون كده حلو اوى
اما لو معاه بكالريوس هندسه مثلا ولكن اصلا بيشتغل صانيعى فمش حينفع
بص حضرتك انا قبل ما حضرتك تعلن الفكره او تقول عليها انا فكرت فيها
لقتها متنفعش مش عشانى ولا عشان اى حدبس عشان اولادى
تخيل حضرتك لو ابنك حد وقفه فى المدرسه وسئله بابا بيشتغل ايه مش من حقه انه يفتخر ويقول بابا مهندس بابا محاسب
حقه عليك انك تخليه ميكونش محرج مش معنى كده ان ابن المهندس ينفع وابن الصانيعى وحش وعيب بس لو فى ايدى يبقى اختار الافضل
صدقنى حضرتك انا جربتها
اسفه لللاطاله

أختـــــــــك يقول...

هههههههههههههههههه
يا جماعة انا اخته اللى عزمني على ايس كريم ودفعني تمنه
ههههههههههههههه

بصراحة ياما دفعت


بس الشهادة لله .. هو ياما دفع اكتر
:)
:)


كل سنة وانت طيب يا كيمو فى عيد الحب
منا بحبك برده
مش انا بحبك برده
بحبك اخر حاجة
:)

طبعا هفرحلك لما قلبك يدق وتحب وتتحب
بس دا ميمنعش انى هبقى متغاظة منها برده عشان هتاخد قلبك كله وتسيبلنا حتة صغيرة

يلا بقى انا طولت


بس عادي
صح؟
مش انا اختك والمدونة مدونتي؟


هههههههههههه


كفاية عليك كده وعلى زوارك ويارب اكون ضيفة خفيفة عليكم

خواطر شابة يقول...

بداية ينوبك فيا ثواب فهمني ما قصة عيد الحب هدا انا اعرف اللي ففبراير لكن بتاع نوفمبر موردش عليا قبل كده.
تانيا حجاوب على سؤالك الاول انا عن نفسي معنديش مانع بشرط تكون فيه تكافئ في المستوى الثقافي بيني وبينه يعني حال على شهادته لكن لم ينتظر الوظيفة التي قد تأتي أو لا تأتي
بالعكس انا معه سأطمئن على نفسي أكثر انه لن يخدلني في كل الظروف يعني حيجيبلي اللقمة من بق السبع .
بالنسبة للموضوع التاني اي الاحتفال بعيد الحب لم يسبق لي ان فعلت ولااعتقد اني سأفعل لاني حتى لو أحببت سأجد اختصار الحب في يوم واحد ناقصا وغير معقول
بانسبة للشعر الدي كتبته اتمنى ان تصل الرسالة لصاحبة النصيب وان تحصل على اجابة قريبة ان شاء الله

Yusuf يقول...

صديقي الفقري

ليس كافياً من وجهة نظري أن تفتح أبواب مدينتك بانتظار دخولها

لربما من الأفضل دك أسوار مدينتها بدلاً من ألم الانتظار


كل عيد حب وانت طيب

علي فكرة
انا ضفتك علي فيس بوك Yusuf Ahmed

والسلام ختام

------ يقول...

ههههه
ايه الجديد
طول عمرى اقول فقرى يومه 140 ساعة كمان

انتو متفقين عليا ولا اييييييه هههه

لانى كنت بتكلم فى الموضوع دا النهاردة مع صحبتى
سألتنى نفس السؤال

انا قولتلها اهم حاجة الادب والاخلاق وعارف ربنا وهيحافظ عليا
والشغل مش عيب اولا

ثانيا دى اكيد مش الشغلة الاساسية لانه معاه كلية يعنى شهادة
ويكفى انى احطه فوق راسى

انه مش ساب نفسه للبطاله او مكاتب التوظيف
وشرب سيجارة ولا مشى غلط على ما تفرج
لا دا راح وكافح واشتغل علشان يكون نفسه

ويوم ماييجى شغل كويس ساعتها هيروح يشتغل ويسيب الصنعة
والشغل مش بيعيب صاحبه مهما كان

بالعكس دا يخلى اللى قدامه يحترمه
وبعدين ماممكن مثلا اتجوز واحد معاه وظيفة حلوة

وهوب الدنيا انقلبت وساب الوظيفة وقعد جنبى يقمر عيييش
ساعتها هيعمل ايه هيشتغل صنايعى

ساعتها بقى اقولوا لا وحياه ابوك ضلقنى اصل صنايعنى دى مش هتمشى معايا

دا اصلا تفكير العيال الهايفة
بس برضو اهم حاجة القبول والمستوى الفكرى والثقافى

وفوق دا كله الاخلاق وانه فعلا هيراعى ربنا فيها ويحافظ عليها

لكن لو هو صنايعى ومش معاه شهادة كدا حلوة معلقة على الحيط حاطتتها تحت المرتبة لازقها فى السقف اهو شهادة وخلاص
يبقى لا لانى انا مش اتعب واذاكر ويبقى معايا شهادة واخد صنايعى معاه دبلوووون :) او مش متعلم اصلا

وغير كدا اصلا التفكير مش هيكون واحد
لان انا شوفت ناس كدا وفى الاخر اضلقوا
هو كان دكتور وهى مش كملت
وهى كانت معهد وهو دبلوم تجارة

يو اندر استاند او نو

------ يقول...

نروح بقى لعيد الحب
كل سنة وانت بصحة وبخير
وان شا ءالله السنة الجاية تتصل عليها وتقول كل عام وانت حبيبتى :)
وربنا هيسعدك كدا بس انت اصبر
بس انت اكيد مشيت من طريق وهى جت من طريق بس مؤكد هتتقابلوا :):)

وهتديها لبان هارتى :)


هههههه
انا لقيت واحدة صحبتى بعتالى رسالة استشفيت منها انه عيد الحب امبارح :)
بس احتفلوا بيه النهارجة فى الجامعة

وواحدة بتقولى مش تقولى كل سنة وانت طيبة ليه ياحبيبتى مش عيد ميلادى النهاردة والفلانتينو كمان النهاردة:)

ولا الدكتورة بقى المفروض ورانا محاضرة ياريس لغيتها البنات بتقول علشان الفلانتينو برضو ههههههه

بس مش هو فى شهر 2 برضو ولا ايه النظام

فكرتنى بالفاكهه صحابى مسمين شنطتى شنطة حمزة كل ماتتخيله موجود شوكولاته شاندوتشات عصير لبان مصاصة بسكوت شيبسى موز تفاح وبرتقال :):):)
وحاجة ساقعة بيبس لالا كان عصير بس

ياكريييييم ياكريييييم
لا لالا انا مش بنادى
انا قصدى يوسيفاية واحدة بس وتتعب تفسك وتجيب شيكارة لالا دا كتيير

ايه العزومة الجميلة دى لالا
هى تحمد ربنا انك عزمتها على ايس كريم بس :) :):)

ربنا يخليلك اختك لانها شكلها بتحبك اوى
وخلى بالك بقى لحسن تطلع عين حبيبتك :)
وشكلك انت الوحيد
علشان كدا هتبقى متغاظة لما حبيبتك تاخدك منها :)
ربنا ميحرمكوش من بعض


الآن ..
قد علمتى كل ما تريدين عنى
قد أدركتى الحقيقة
عرفتى من أنا وكيف أفكر ومن اكون
فتحت لك أبواب مدنى
فهل تدخلين :$

انا دخلت برجلى اليمين من بدرى :)
وبقالى ساعة

ومعلش طولت عليك ورغيت
وزهقتك منى :)

Aиgel يقول...


مساء الخير ..
أزيك يا كريم؟

وهابي فلانتين ( اللي أنا عمري بردو ما احتفلت بيه حتى بيني وبين نفسي )

........
بالنسبة للمواضيع اللي شاغلين بالك
الأول : ده بيرجع للبنت نفسها ومن بعدها أهلها .. بس أنا شايفة إنها مش عيب على الأقل الإنسان ده جد واجتهد بدل ما يفضل قاعد كده أو يمشي في الغلط بسبب البطالة
وأنا لو .. لو اتقدملي حد كده وكل مواصفاته متناسبة يبقى ليه لأ مش هتقف على أنه حرفي ولا موظف في شركة قطاع خاص خصوصاً أني هبقى فاهمة السبب وهعرف منه ليه اشتغل كده
ومن تواضع لله رفعه (:
.......
بالنسبة للموضوع التاني (:
بردو عادي خالص يا كريم إيه المشكلة أنك متجيبش ليها هدية في اليوم ده
لو بتحب بجد يبقى كل يوم في حبكم ولقاءكم هو عيد حب خاص.. له مميزاته الخاصه وسماته ورونقه الخاص بيكم أنتم وبس
أنا بردو لو.. لو بحب وحبيبي ده مش قالي هابي فلانتين ولا جاب لي حتى وردة وطلعلي بيها مفجأة (: مش هزعل كفاية أنه يحسسني بحبه في أي وقت وأي يوم مش في يوم محدد
فا متحسسش نفسك أنك مش طبيعي
(: عشان في بنات عقلها كبير
.......
بالنسبة للكلمتين القمة في البساطة والرقة اللي كتبتهم

فأقبل تحياتي لقلبك
حيث أن رغم قلة الكلمات إلا أن القلم توقف والحروف لزمت الصمت

دمت بود واحترام

Angel love

Cute Kitty **sookra يقول...

كان نفسى اعلق بس ياخساره مودى موش نافع
بس موش هااعرف اقولك عيد حب سعيد لانى اصلا موش بعرف اقولها

ميرام يقول...

(:
البوست حلو ..
والردود جميلة ..
(:
انا افتكرت وورك شوب عملناها مره في الكلية
وكان اسمها الشباب وتحديات المستقبل (:
المفروض ان الندوة كان فيها ناس ناجحين وبيتكلمو عن تجاربهم .. والشباب الي هما احنا وآخرين بيتناقشو ويسألوا
مش عايزة اقولك ان تلات أرباع النقاش
الي كان هيبقى خناقة بسبب طالب حقوق تقريبا بيقول ان االشغل مش عيب وان هو ندم انه دخل ككلية لما بيشوف سواق الميكروباص بياخد أحسن منه
المحاضر الي كان في الندوة قالله لو مقتنع باللشغل لازم نربي في الناس وفي الجيل الجاي ان الحرف مش عيب وانك ممكن تشتغل حرفة مفيدة وان ده مايتعارضش مع الدراسة وطلب العلم
(:
قامت قامت بنت قالتلو ايه الجهل الي بتقوله ده (للولد الي في حقوق) يعني ربنا كرمككككككك واتعلمت وفي الاخر تقول عايز ابقى سواق ميكروباص .. انت لو اتقدمتلي مش هوافق عليك ولا اهلي
قالها وانا مارضاش اتقدم لواحدة زيك ( ومستوى الحوار بقى حاجة فظيعه بقى ) (: (: (:
انا حالا افتكرت الموقف ده بالكامل وازاي ان كان فيه مؤيدين ومعارضين كتير قوي لموقف زي كده وده طبيعي باختلاف الثقافات والمجتمعات ...
يعني بره في اوروبا مفيش اي مشكلة ان بنت تشتغل في ماكدونالدز أو ولد يغسل اطباق حتى لو هو ايع
لكن عندنا بنقلل من كده
(: خدت بالك انت ان انا لسه ماقلتش وجهة نظري
(:
أنا لو اتقدملي حد بيشتغل في ورشة او كدا
بصراحة بصراحة بصراحة
مش هــــوافـــــق
حتى لو معاه مال قارون !
ووالله مش تقليل من الحرفيين ولا من الناس
لكن الفكرة ان طبيعة الشغل بتؤثر بشكل أو بآخر عليك
ليه أنا في دراستي رافضة قطعيااا اني أنزل موقع مثلا مع اني هفضل برضه مهندسة ..
لأن الشغل في الموقع بيتطلب التعامل مع العمال .. يعني لو اتكلمت معاهم بذوق يبقى انت مهندس اي كلام والشغل مش هيمشي ولو اتكلمت انجلش مش هيفهموك .. باختصاار لازم تنزلهم ..
لكن في المكتب هتقابل ناس في مستواك أن لم يكونو أعلى ..
على فكرة ده مبدأ عام لا ينطبق على الحرفيين يعني لو في مجال شغل مثلا يتطلب نفس الي قلته انا مش هوافق ..
ومنهم على سبيل المثال الشرطة ..
حتى لو في حالات تخرج عن الاطار ده
يعني حد كويس وبشكل او بآخر قدر مايتأثرش .. هيبقى لفترة زمنية
وهيبقى (ريسك) أو مخاطرة ..
والله أعلم طبعا مش قاعدة ممكن الواحد يقابل مهندس أو دكتور أو ايا يكن وتكون أخلاقه زي الزفت
(:
يعني الموضوع مش قاعدة بس النسبة الأكبر تحتم الرفض ...(: وبس
.....


بالنسبة لعيد الحب ..
(: بضحك قوي على تفاهة الشعب (:
معتقدش اني بأي شكل من الأشكال ممكن أحتفل بيه (:

بس حلوة فكرة اليوسفي
(:

على فكرة عجبني تعليق يوسف قوي
تحيـــــاتي

عاشقه الرومانسيه يقول...

فكرت فى كل أنواع الفاكهة اللى كانت دايما بتطلعها من شنطتها
(( أيون صدق كانت ممكن تطلع من الشنطة أى حاجة تتخيلها او لا تخطر على بالك ))
***************************
يالهووووووووى
ده ايه الرومانسيه الفظيعه دى؟

صحيح من الحب ما قتل
والحب اللى من نوعيه الشكاير دى بيجيب الضغط ويموت بالبطئ
فى حد كده فى الدنيا
لالالالالالالالا
اكيد انت بتهزر
قول انك بتهزر لان ضغطى انا اللى بدأ يعلى
(:

عاشقه الرومانسيه يقول...

اما عن السؤال اللى فى البدايه فانا ليا راى فى الموضوع ده مش بيتغير

الراجل الجدع هو اللى يعرف يجيب الفلوس والشغل مش عيب مهما كان طالما شغل شريف
(شريف صفه مش اسم)
(:

donya يقول...

مساء الخير
البوست لذيذ ورايق
وبجد تصدق انت فقري فقري يعني
اما موضوع الصنعه ده غريب شويع
لكن هيكون تبع المستوي الفكري للعروسه والبيئه المحيطه بيها والمستوي الاجتماعي
يعني ماتحبليش بنت سفير وتقول لها عندي ورشة نجاره بس انا مهندس كمبيوتر طب مافتحتش مكتب كمبيوتر ليه وبقيت اسطي بليه كمبيوتر قد الدنيا

اما الكلمتين اللي بالاحمر دول علي جنب يجننوا
يابختها ياعم ولو مادخلتش مدينتك بعدهم
تبقي عبيطه رسمي

اروح بقي اشوف البوست اللي فاتني

*تحياتي

R-H-S يقول...

انت مقتنع يابو الشباب ان في حاجه اسمها عيد حب ؟؟؟؟

اما بالنسبه لليوسفي والبرتقال هما مبقوش يبيعوهم في شكاير ليه صحيح كان ليهم شكل مميز

تحياتى

dr/shiko يقول...

جميل قوي البوست بتاعك .. بس يوسفي كنت بحبحتها شوية وجبتلها تفاح يمكن كنت تلحق تخطبها قبل ماتتخطف ..يلا ولا يهمك .. ربنا يكرمك بواحدة احسن منها وتجيبلها يوسفي ..هههههه

فشكووول يقول...

طبعا يا فقرى انا ماليش فى عيد الحب ده ..

دا عيد للشباب الحبيب بس
وانا راحت على

لكن كل سنه وانتم كلكم طيبين ومحبوبين ومحبوبات بس يكون حب شرعى مسلم وشرعى مسيحى . مش حب جيرل فرند وبوى فرند

أسما يقول...

امممممم... واضح اني غبت كتير اوي و فاتني كتير اوي، بس انا جيت مرة و لاقيتك قافل التعليقات ما عرفتش اسيب تعليق... ما علينا

اولا، ازيك؟ يا رب تكون بخير :)
ثانيا، موضوع سؤالك اللي للبنات ده انا ما اخدمكش فيه اوي يعني... العمل عبادة و مفيش شغلانة شريفة عيب خصوصا لو صاحبها متعلم، بس مجتمعنا، اللي مش اسلامي بالمرة، مش بيدي فرص كتير للشاب ده، بس عايز رايي الشخصي، اتوكل علي الله و اتعلم صنعة و افتح ورشة و كمل في الكمبيوتر برده، و ساعتها اللي تتقدملها و توافق هتكون شارياك و مش هاممها اذا كنت صنايعي ولا رئيس وزرا، و هي دي اللي تستاهللك و و الله يا ابني يا ما ناس في وظايف مرموقة و مجرد معرفتهم ممكن تعيشك في كابوس زي اللي انا عايشاه بس من مجرد الصدمة... ربنا يوفقك ما دمت بتتقيه و مش بتعمل لا عيب و لا حرام :)

أحمد عاطف يقول...

انا هاقولك

كل سنة وانت طيب

عشان عيد الاضحى

اما عيد الحب دا

فهو بيمثل ليا صدمه

كنت خاطب من 6 سنين

واتصلت بخطيبتي وانا في الجيش وعشان اتصل اصلا عملت فيها اللهو الخفي


قولتلها كل سنة وانتي طيبة

قالتلي بمناسبة ايه

بقولها عيد الحب

قالتلي هو تاريخه النهاردة والله ما اعرف انا ماعرفش ان في عيد للحب

قولتلها احسن انك متعرفيش

اللي زيك مش لازم يعرف روحي كملي نوم

حروف يقول...

هههههههههه انا مش عارفة امتي ربنا حيتوب علينا من ان اسمع هابي فلانتين من صحباتي البنات

كلنا لها وانا كمان مفتكرش اني جبت هدية لحد او اتجابلي هدية

يالا كل سنة وانت طيب

Cute Kitty **sookra يقول...

شاب فقرى
بصراحه موش عارفه اقول ايه
اصله عدى اليوم دا ولاحسيت انه عيد حب ولاحاجه
انا قضيته مع حرووف واسكندرانيا وكان يوم جميل اوى بجد
اما عن سؤالك
فانا من البنات اللى قبلت انها ترتبط بصنايعى وموش مكمل تعليمه لان اللى حواليه قالوا محترم وابن حلال ويعرف ربنا
و و و و
ماعلينا
نصيحه ياريت كل واحده تفكر مليون مره قبل ماتوافق على صنايعى
موش معترضه عليهم لكن دورى على اصله
لو اصله طيب يبقى دورى على...
حاجات كتير قبل ماترتبطى بواحد صنايعى وكمان تعليمه اقل منك
هتقولى ممكن تعليمه اقل لكن مثقف جدا هاقولك
والنبى اسكت بلانيله
هههههههههههه
هاشوفك الصبح طبعا فى المنصوره

شاب فقرى يقول...

smilyrose

شرفتينا بحضورك التعليق الاول

بس فين الرد على ما كتبت

تحياتى

------------
حطام(ك) بقايا
ولا يهمك
احنا تحت امر الكسل لانى الصراحة بحبه فى الشتا
بيدى للشتا طعم خاص
بإنتظار تعليقك عالبوست مرة تانية
تحياتى

فقرى
----------
فراشة

انا مش طارح القضية بشكل عام للأسف
أنا طارح حالة خاصة ومنفردة ووحيدة
يعنى بتكلم عن شاب فى ظروف فقرى بالظبط
ودا مشكلة فى الردود كلها
الناس كلها داخله تقول رايها فى القضية بشكل عام وبتفكر فى الجواز ولو اتقدملى صنايعى
مش فاهمين ان فى ناس بتغير المسار لو جامعى او مهندس كمبيوتر وعايز يشتغل حاجة بيحبها

ذكرياتك جميلة عن عيد الحب :)
ربنا يديم صداقاتك ويعمقها ويحافظ عليها ويكون راضى عنها

شاب فقرى

--------------
Roqaya
رأيك مجنون لكنه يستحق التقدير والاحترام والتفكير فيه اكتر من مرة

تحياتى
فقرى

--------------
الشعب لابد له من حكومة تشكمه
وربنا وربنا وربنا كمان مرة يا شيما ما فهمت من الجزء الاول بتاعك دا حاجة

صدقينى والله كانت هتفرح ونقف نضحك سوا
بس انا اللى غيرت رايى فى اخر لحظة

تحياتى
شاب فقرى
------------------
Roqaya
بس فى ناس مش بتقدر تفهم النجاح غير لو كان فى حاجة هى بتحبها بس

فاهمة قصدى طبعا

تحياتى
شاب فقرى
------------------
قلم رصاص

ياباشا انته اللى مبتحلقش البوستات الطازة :) :) :)

تنورنا وطبعا عيد الحب انا مش بعترف بيه

نحياتى

شاب فقرى

----------
هيثم رمضان

شرفتنى بالتعليق

ولكن ....

انا هنا بتكلم عن الحالة خاصة مش حالة عامة

ورايك فى عيد الحب ان الحب بيكون طول السنة دى حقيقة

امال انا مش بعترف بيه ليه ؟؟؟

تحياتى ياجميل

شاب فقرى
------------------
غير معرف

ولا يهمك

بكره تطق فى دماغى واقفل اكونت الفيس بوك :D

نورت يا معلم

-------------------
تحياتى لكم جميعا هكمل ردود فى تعليق تانى

شاب فقرى

شاب فقرى يقول...

فاتيما

تجربتك مثيرة لللإهتمام وقوية بما يكفى وغير قابلة للنقد لأنها من الماضى ولأنها من الاشياء الشخصية التى أمتنع عن التعليق عليها لأنها تمثل قيمة خاصة لصاحبها

أفادنى تعليقك جدا ونبهنى لنقط مهمة

وهى الأصل
وهى طبيعة الشخص
وهى قوة شخصية الشخص اللى هيتعلم صنعه دا

يعنى ايه

يعنى لو الواحد اصله كويس ومحترم وعنده مبادىء وقيم ماشى عليها يبقى مفيش منه خوف او قلق لانه عمره ما هيتغير ويبقى النقيض فجأة

طبيعة الشخص واخلاقه ودى برده شبه الاولى بس انا شايف ان فى فرق

قوة الشخصية : يعنى انا مثلا لو نزلت الشغل دا الناس هى اللى هتأثر عليه ولا أنا اللى هأثر عليهم

وأولا وأخيرا شرفتنى الزيارة واللى أسعدنى أكتر القصة بالرغم من انى قريتها من قبل بس امتنعت عن التعليق لغاية فى نفس يعقوب

خالص تحياتى وتقديرى
شاب فقرى
-----------------
بيطرية
صباح الروقان
ماشى منورة بحجز التعليق وبانتظار رايك :)

عيد الحب والله انا عرفته بالصدفة

انما انا مش مهتم بيه اساسا لاى سبب كان

ويا بختكم بفروق التوقيت دى

يعنى كدا ممكن اخد عيد الحب مرتين
مرة فى القاهرة ومرة فى الزقازيق :D

ههههههههههههههههههه

نورتى

شاب فقرى
-----------------------
سلمى
تصنيفك مش عارف ليه حاسس بانه عنصرى قوى

تعرفى انا فكرت فى مجتمعنا من غير صنايعية لقيته مجتمع فاشل

بالنسبة للاولاد يعنى

انا كان ليه واحد صحبى ابوه بيعمل جزم (( صرماتى )) ومكانش بيتكسف ولا عمر دا قلل من مكانته عندنا

وكمان الكسوف دا حتى لو انا فكرت بطريقتك لما يكون بيقوم بعمل حقير
يعنى مثلا بيصلح جزم او زبال
انما مش مهندس بيرسم وبيعمل مكاتب وحاجات الوميتال
فى فرق

تحياتى
شاب فقرى
-------------------
أختى

صباح التسببح
مش قلنا بلاش سياح فى المدونات يا حاجة

خلاص هجيبلك غيره ولا تزعلى ولا تدايقى

وبرده هتدفعى تمن الجديد :D

أيوه بتحبينى

وربنا يعلم غلاوتك عندى وحبى ليكى قد ايه :)

اخوكى الفقرى
----------------------
خواطر شابة

عجبنى ذكرك لتشبيه انه بيجيب اللقمة من بق السبع

يارب الرسالة توصل

تحياتى لتواجدك وتعليقك

شاب فقرى
------------------
يوسف

رأيك شرفنى كتير

بس فى شخصيات ينطبق عليها القول
(( النار يدوب توهب دفا واللى لمسها يتحرق ))

يعنى لو قربت منها
ممكن ترفض وتعمل مشكلة كبيرة
وتختفى من حياتى خالص
أكيد فاهم قصدى
ربما انتظر منها شيئا وكأنه يقول نعم
حتى أبدأ فى الإقتراب منها
لابد من (( نعم ))

تحياتى يا جميل
انا كمان ضفتك
شاب فقرى

شاب فقرى يقول...

دموع القمر

اهم حاجة قلتيها

الشغل مش عيب

المهم الاصل والتفكير والتوافق

تحياتى ليكى بجد

انا معاى فى نقطة انه لازم يكون فى شهادة دى

بالنسبة للتعليق التانى الخاص بعيد الحب

ههههههههههههههههههههههههه

دمك خفيف والله يا دموع

ربنا يكرم واحوش تمن لبان الهارتى :D

فى اخ غيرى يا دموع

بس انا الصغير

وبرده راجل البيت

تحياتى
--------------------
عارفه يا Angel
الفترة اللى فاتت بفكر فى حاجات
حاسس منها ان دماغى هتنفجر

الله يفتح عليكى
من تواضع لله رفعه

بالنسبة لعيد الحب

السنة كلها موجودة وعايشين فى حب وسلام

المفروض كل واحد وواحدة يختاروا اليوم اللى يعجبهم ويحتفلوا بيه

تحياتى لتواجدك :)
شاب فقرى
-------------------
saso
لاء بجد حاجة اخر جمال
هتعلقى يعنى هتعلقى
:D
نورتى

شاب فقرى
--------------------

نكمل التعليقات فى تعليق تانى

شاب فقرى

شاب فقرى يقول...

ميرام

انا احيانا مش بحب الورك شوب او الحاجات دى لان لو فى شخص واحد مش كويس اسلوب الحوار بيتدنى وبيبقى مش كويس
عشان كدا مش بحضر غير الندوات الشعرية او الامسيات الغنائية

نرجع لموضوعنا

بصى يا ميرام
تعرفى ان احيانا قوة الشخصية هى اللى بتحرك وبتحدد حياة البنى ادم
تعرفى ان مثلا شخص زيى يعرف اصحاب من ادنى مستوى لحد احسن ناس وعمر ما حد أثر فيه
يعنى قصدى لو انا شخصيتى قوية هفرض رايى عالعمال بدون ما اتدنى لمستواهم
ولو شخصيتى قوية برده مش هتأثر بأسلوبهم وأكون بالقوة الكافية إنى أفصل بين الشغل والبيت

يعنى مش هعامل المدام زى ما بعامل الصنايعى اللى معايه (( دا بفرض انى تدنيت لمستواه ))
كمان فين شخصيتى انا لو انا بقيت بتأثر كل شوية بدا ودا ومش بقدر أحرك حياتى بإيدى ؟؟؟؟

طيب إقرى رد فاتيما
بس بتركيز شوية
هتكتشفى ان فى حاجات كتير جدا انا ركزت عليها فى ردى عليها

طيب نرجع لموضوعنا
انا اساسا كنت بفكر فى صنعه او حاجة قلتها فىا لبوست اللى بعده
حاجة لا بتتعامل مع عمال ولا بتاع ولا اى حاجة
انا مش بفكر امضى عمرى كله فيها
انا عندى فراغ
والشهادات بتاع الكمبيوتر فى قدامى وقت كبير سواء دلوقتى أو بعدين
فالفراغ الواحد يستغله فى تنفيذ حاجة مغبدة او تعلم حاجة جديدة

كمان فى حاجة نسيت اقولها لك

وهى ان انا كنت بتكلم عن حالة خاصة

والمجال اللى انا ناوى ادخله دا فى ناس قرايبى شغالين فيه
وسبحان الله الناس دى متدينين ومعروف عنهم الذوق والاخلاق والطيبة
بالعكس هما من افضل الناس اللى اتعاملت معاهم

اتمنى وجهة نرى تقنعك

------
بالنسبة لعيد الحب انا مش بحتفل بيه
بس ممكن يكون فى طرف تانى بيقتنع بيه فمينفعش نصدمه
وكمان انا بالنسبة لى ومن وجهة نظرى السنة كلها حب فى حب
فمش لازم يعنى نحدد يوم حب
ممكن نحدد يوم نكد على سبيل التغيير

----------------------
بالنسبة لتعليق يوسف

أنا رديت عليه :)
إقرى التعليق ومنتظر ردك على كل ما سبق

تحياتى
شاب فقرى

شاب فقرى يقول...

عاشقة الرومانسية


صراحة مش بهزر

هههههههههههههههههه

الحقيقة دايما مرة وانا سفير الواقع مش تفرق معايه اوى :$

ان شاء الله تطلع ارانب من الشنطة

المهم الحب يكون موجود

:)

جزااكى الله كي خير على الرأى والتشجيع

شاب فقرى :)

-------------------
donya

للاسف اللى عايز ارتبط بيها احسن بكتير من بنت السفير

لأنها كريمة إبنة الأكرمين

أكيد هتوافق لو بتحبنى وعارفانى وفاهمة قصدى إيه
تاكدى إنها مش عبيطة رسمى :)

تحياتى

شاب فقرى
------------------

جهاد
صباح الفل

انا مش مقتنع بيه طبعا

بس كنت خايف تكون مقتنعه بيه والحمد لله طلعت مش مقتنعه بيه

وفعلا مسير يرجعوا يبيعوهم فى شكاير :)

تحياتى

---------------------
dr/shiko

هى كانت بتحب اليوسفى

وكمان صدقنى

اللى ميقدرنيش ميلزمنيش :)

تحياتى عالزيارة والمرور

شاب فقرى
-----------------------
فشكووووول

مراحتش عليك ولا حاجة

الشباب شباب القلب

عشان كدا انا شاب

تحياتى لتواجدك

شاب فقرى
---------------------
isolde
الله يا ابني يا ما ناس في وظايف مرموقة و مجرد معرفتهم ممكن تعيشك في كابوس

اكتر كلمة قلتيها عجبتنى

يارب الناس تفهم بقى

تحياتى

شاب فقرى
---------------------

أحمد عاطف

ياترى خطبت تانى ولا لسه

وكل سنة وانته طيب :)

انا حاسس من اللى بتكتبه ان مرحلة الجيش دى مأثرة عليك أوى أوى

تحياتى

فقرى
-------------------

شاب فقرى يقول...

حرووف

ربنا يرزقك باللى يفرحك من كتر الهدايا كل يوم :)

تحياتى لتواجدك

شاب فقرى
-------------------
saso

اللى قلتيه تمام التمام

بس انتى مش اخترتى

الناس اللى اختارت ودا غلط

انا مديش دماغى لحد

وابنى فى جيبى مدورش عليه

صبح

تحياتى
شاب فقرى

ميرام يقول...

سوري النت فصل

أنا بعشق الوورك شوبس (:
شكلها مش لطيف بالعربي (:
بس بحس ان (ورشة عمل) وهي تعريبها بتدي معنى تاني مش عارفة ليه (: (:

بحبها ليه .. لأني غالبا ببقى أورجنايزر فيها (:
فبحدد المكان والزمان وأوقات كتير الأشخاص كمان .. تخيل !!

قمة السعادة لما تلاقي فكرتين متضادتين تماما واصحابهم كل واحد بيبقى معتقد مليون في المية ان هو صح
(:
وأنا كل يوم بزداد قناعة ان مفيش صح مطلق ولا خطأ مطلق

الرأي في قمة صحته لمن هو مقتنع به ..
وده حقه ,. ومش حق التاني يخطأه باي شكل من الاشكال ولا يشكك حتى في مدى صحته ...



على فكرة ...
ومن تاني لو تخيلت ان انا ضد الحرفة هعيد لك الف مرة واقولك اني بحترم الناس دي جداااااااا
وعشان تصدق أكتر ... (: أنا كنت منهم .. وأتمنى أكون منهم
هتقولي ازاي (:\
هقولك اني عملت مشروع (: (:
اه والله
كان اسمه ميرا ستايل ..(:
المشروع كله كان قائم على حاجات بعملها بايدي .. ابتداء من الفكرة مرورا بشراء الخامات لحد مابوصل لآخر مرحلة وهي البيع (:
ورغم ان المشروع كان بالنسبة لأهلي ولصحابي مش هيضيفلي غير التعب وتضييع الوقت ..
أنا خرجت منه كسبانة كتير جدااااااا
أنا بتكلم كده ...
عشان أنا عارفة قد ايه بيبقى احساس جميل لما تعمل حاجة بنفسك وتشوف نتيجتها وتشوف عائدها المادي أو المعنوي
انت كده اقتنعت اني مش ضد المبدأ (:

يبقى أناقش الفكرة الرئيسية (:
لو انا بحترم الفكرة بالشكل ده .. يبقى ازاي ممكن ارفض حد بنفس الفكر !؟

هقولك ان ده مابيبقاش وقف على الطرف التاني أو عليك بس ..
فاكر الباكيدج ؟؟!
هي نفسها هنا .. لو الباكيدج الموجودة حلوة .. بس فيها حاجة انت شايف انها حلوة بس الناس بتقلل منها ويضم الناس اهلك أو صحابك ..
هتاخد الباكيدج ؟؟

عارف (:
لو الباكيدج دي كانت على موبيل أو أكل |أو لبس .. هاخدها (:
بس لو عريس (: هتردد ألف مرة ....
مش عشان أنا بحط اعتبارات للناس ولا عشان انا مش عارف ايه ولا تبعية الغلط ولا ...
بس لما تلاقي ناس بتحبك بجد حاطة ايدها على قلبها (:
هتتاخد ....................

انا وانا بكتب الكلام ده حاسة اني مش مقتنعه بيه قوي (:
عشان هو ضد تفكيري ............
مش عارفة ..
حاسة اني كده بجادل في باطل رغم اني لسه مش متفقة معاك .. بس مش معترضة كما يبدو (: (:



مش عارفة بقى ..
بالنسبة للجزء بتاع قوة الشخصية والتاثير والتأثر (:
هقولك أنا شخصيا شفت ناس قوية واتأثرت ..
وده بيبقى نتاج طبيعي ..
وشفت ناس في أماكن مش كويسة وهي كويسة جدا
وشفت ناس ولاد ناس ولا يبدو عليهم اي أثر للتربية ..
وعشان كده أكدت في نهاية كلامي انها مش قاعدة ...
وأكدت كمان انها هتبقى ( ريسك) ..
أنا هبعت الكومنت لأني مش ضامنة النت (:
لو افتكرت حاجة تانيه هعلق (:

شاب فقرى يقول...

ميرام

والله انا كان نفسى اجربها

بس منفعش

لسبب بسيط اوى

انى بحب اعيش لوحدى

ودا يعتبر اكبر عيب فيه

انى لوحدى ومش بدخل اى موديلات فى الجامعة او فى اى حته تانية أيا كانت

يمكن مثلا ممكن اروح كورس ولا حاجة

لكن مجربتش ال ورك شوبس قبل كدا

وفعلا جميل اللى قلتيه عنها

لكن انا جربت الامسيات الشعرية والغنائية

كنت فى غاية السعادة ساعتها

بالنسبة للرأى فى الحرفيين

نبسط الموضوع عشان الفكرة شكلها متلخبط

ببساطة :

انا عندى وقت كبير جدا

المذاكرة مش بتاخد منى وقت ولا بنزل اى مكان

فدلوقتى لو فكرت أشغل وقتى فى النت واكمل فى شغلى دا

شغلى دا مفيش ناس كتير بتقتنع بيه لانه قابل للرفض والقبول بين الناس
انا اساسا بتعب على ما بفهم الناس انا شغال فى ايه

فقررت انى انزل اشتغل
لكن فكرك انى مثلا ممكن اوافق ابقى office boy فى مكان أيا كان المكان دا محترم

ولا هنزل اشتغل فى ايه
حتى لو اشتغلت فى مكان محترم حاجة كويسة مش هستفيد منها اوى

لان اكتر حاجة مفيدة للانسان العلم

طيب دلوقتى العلم بيندرج تحته موضوع الحرف دا

فكرت فى اكتر الحرف هوء وقلة صنايعية وقلة تعامل مع الناس

ولقيت ناس قرايبى شغالين فيها والحمد لله كويسة جدا جدا وهما ممتازين ما شاء الله عليهم

فقلت ليه الوقت اللى بيضيع دا مش استفيد فيه بحاجة

بالاضافة لانى لسه هتعلمها وبعدين افكر هل هفتح الورشة دى ولا لاء
عندى مكان وامكانيات افتحها
يبقى ليه مش افتحها واشتغل وانا فاضى ؟؟؟

ليه اوقف نفسى فى اطار محدود كشخص خبير فى الكمبيوتر مش هقول مهندس لانى لسه مبقتش
او كطالب جامعى ؟؟

ليه ارسم لنفسى حدود واعيش جواها ؟؟؟
ليه مستفيدش من كل ثانية خلقها ربنا ؟؟؟
طيب بفرض انى اتقدمت لواحدة بنت ناس وانسانة محترمة وتفكيرها رائع
هل هترفض ؟
هوا دا اللى كنت بسأله
تعرفى
فى مرة سمعت واحد فى مسلسل بيقولك كل واحد فى الدنيا دى على قد حلمه
لان على قد حلمك انته بتتعب
فبالتالى انا مش هفتح ورشة وافضل صنايعى طول عمرى
اكيد هنتقل ابقى عندى اكتر من ورشة او مصنع مثلا او اى حاجة كويسة ومتميزة
وفى نفس الوقت محترمة
مش مهم الفلوس ولا الحلم ولا عايز اوصل لايه

لكن الاساس انى عايز استغل وقتى صح فى حاجة مفيدة تفيدنى بجد وترضى ربنا وتساعدنى فى حياتى

وبرده كان سؤالى لو اتقدمت لها هترضى ولا لاء

عشان كدا فكرت قبل ما تقولى فى موضوع الباكدج دا

وجه فى بالى قبل ما انزل البوست وقلت اكيد هتتكلمى عنه

ليه باخد رايك ؟؟؟
عشان انتى ممكن تبقى فى الموقف دا ولانى شايف انك بتوصلى لجوهر الموضوع بسهولة عشان كدا بستنى رايك لانى عارف اللى بيوصلك ايه كويس لانى انا اللى ببقى قاصده يوصل

تحياتى

وبانتظار الرد برده

شاب فقرى

ميرام يقول...

معترضة بشدة على انك مصر تاخد أراء
انت مقنع ..(: ومقتنع اساسا بنسبة 100% .. يبقى لو هي مش مقتنعة هي الي ماتناسبكش مش انت الي مش هتناسبها (:
وهناك فرق لو هتقولي مش هتفرق .. لا تفرق (:



ماتسألنيش تاني لأن لو في حاجة هقولها هيبقى انك تتتوكل على الله وتاخد خطوة في شيء انت على قناعة كاملة بيه ..
وفي شيء باذن الله هيضيفلك حتى وان اختلف عليه الاخرون (:
وبعدين ابقى سيبها لربنا (:

....
على الهامش ..
(:
ومن باب الفضول ..
حضرت ندوات شعرية وغنائية لمين وفين ؟.(:


(:

شاب فقرى يقول...

ميرام

تمام كدا

يعنى رأيك أتوكل على الله

أنا برده قلت كدا

حضرت ندوات لمين ؟؟

مرة واحدة بس

سر بقى ابقى اقوله بعدين :P

تحياتى

كريم

ميرام يقول...

(: (: (:

مرة واحدة تبقى حضرتلي ...
الي بيحضرلي مابيعيدهاش

شاب فقرى يقول...

ميرام

مفيش حاجة فى البلد دى بتستخبى ولا إيه

اه فعلا

حضرتلك مرة واحدة بس

بس مش هقول فين

ومتابعين ومنتظرين الجديد فى المدونة :)

كريم