السبت، 21 نوفمبر 2009

إمكانياتى صفر


السلام عليكم جميعا

يارب دايما بخير

هنا الفقرى يتحدث بكل فقره وهمومه ومشكلاته وسلطاته وبابا غنوجه

اليوم حصلى موقف فى الشغل تعب اعصابى

كنت فى مدينة جديدة بعمل شغل لناس مهمين

طبعا فى البدايه انا كنت فاكر الشغل فى الشقة تبع الراجل الكبير اللى بيتكلم معانا

وعادى بقى مر يوم الشغل بكل تعبه وهمومه وقرفه والحمد لله إتعلمت كتير أوى وتعبت أكتر

لأن التركيبات بتبقى متعبه وبتكسر الجسم وبتخلى الواحد راجع مش شايف قدامه

فما بالكم بقى بالشىء اللى زاد همى

بعد ما خلصت الشغل ومشيت بكلم صحبى

فبقوله إلا مين الواد الشاب اللى كان بيكلمك دا بعد ما خلصنا الشغل

قالى : واد مين يا كيمو دا وكيل نيابة يابنى

أنا ضحكت أوى أوى أوى

دلوقتى إتضحت كل حاجة فى بلدنا العظيمة دى

تجمعت حواليه كل حاجة

إن لما واحد أمور يخلص الكلية

وباباه يشوف له وظيفة بواسطة ويشغله

ويجيب له شقة فخمة فى مدينة جديدة

ويجيب له عربية 2009

ويتجوز أحلى وأرق بنت فى الكلية وأطيب بنت

ويجيب منها بنوتة زى القمر

طبعا ربنا اللى يعلم إنى ميفرقش معايه كل دا

أنا من وجهة نظرى إن البنى آدم رأس ماله هوا تفكيره ونفسه وعقليته

يعنى مش هتفرق أنا اهلى مين أو أهل مراتى مين أو حتى ساكن فين

عارفين إيه أكتر حاجة إتمنيتها فى كل دا ؟؟؟؟؟

فكروا

إنى نفسى أتجوز عشان يبقى عندى بنوتة عسولة زى دى

ملحوظة :
كنت بكلم صاحبى بقوله بتحلم بإيه ؟؟
قالى نفسى فى شقة فى المدينة الحلوة دى لأنى بعشق الهدوء
رديت بينى وبين نفسى :
إنته حلمك شقة لأنك بتعشق الهدوء
أنا حلمى أبقى صاحب المدينة دى اللى أنشأها من الأصل
لأنى مينفعش أحدد حلمى وطموحى فى شقة وعربية ووظيفة وهبل من دا
أنا مقتنع فعلا إن كل واحد عايش فى الدنيا دى
على قد حلمه
يعنى أنا بحلم إنى أشتغل بمرتب 500 جنيه يبقى يوم ما أخسر حلمى هشتغل ب 400
لأن الحلم هوا اللى بيحدد هدفك و يخليك تتعب عشان الهدف دا وبيحدد تعبك

أكيد فهمتوا قصدى

وفهمتوا يعنى إيه إمكانياتى صفر

يعنى لا أملك إلا نفسى

لا فى واسطة تجيبلى وظيفة فى موقع حساس

ولا فى كاشات بنكيه تخلينى أعمل مدينة كرمللة

ولا فى أب أو قريب يقف جمبى ويمد لى إيده ويمهد لى الطريق بخبرته

طبعا والدى الله يرحمه كان معروف عنه إنه لو لمس التراب بيحوله دهب (( يعنى كان شاطر أوى أوى أوى ))

وأنا حاليا بحاول أكون كدا

أو كمان أحسن من كدا

صحيح الإمكانيات صفر

بس الشغل جبار

والتعب والمجهود المبذول كبير

والأمل فى ربنا أكبر


مش هطول عليكم

دقايق وهرد عالتاج

شاب فقرى

هناك 19 تعليقًا:

جارة القمر يقول...

ازييك ربنا يكرمك فى شغلك يارب و تبقى احسن كمان من الاول

بابا كان دايما يقولى ان الانسان لازم يكون عنده هدف كبير .. مش يحلم حلم صغير و يحاول يحققه و اكيد ربنا هيساعده ... انا منتظرة التاج بس بسرعة بقى يلا

أميرة علي كوكب مهجور يقول...

متفقه معاك جدا ونفسي طريقي تفكيري يا كريم
يعني انا خريجه اداب وهتشغل يعني هشتغل من غير وسطه وكوسه بأذن الله هشتغل بعمل دلوقتي تربوي بأخد ICDL هأخد كورس لغه هعمل سفي محترم وهدور وهشتغل بأذن الله ودي اول خطوه في حلمي..كمان بكتب قصص قصيرة وبروح قصر الثقافه بقرأ كتير وبتعلم نحو وعروض علشان اكتب صح واكيد ان شاء الله هعمل كتاب عليه اسمي

احلامك يعني أنت شابف نفسك تقدر تعمل ايه عايز تطول النجوم هطول النجوم:)

يارب تكون بخير انا حاجزة شقه في المدينه بتاعتك وعايزة مرجحيه في الجنينه :) ربنا يحقللك كل احلامك يارب

Asmaa mahaba يقول...

فقرى
ربنا يحققلك كل اللى انت عاوزه انا كنت بلف ع الناس عشان اقولهم يسامحونى لو اخطات فى حق حد فيهم
ولو ليهم دعوه عاوزينها يقولوهالى ربنا
خلاص عرفت نفسك فى ايه
كل سنه وانت طيب

shoshta_ joker يقول...

السلام عليكم.....
ازيك يا فقرى ...مقتنعه اوى بفكرتك ان راس مال الانسان هو عقله وتفكير وشخصيته مش الوسطات والناس الى بتقف جنبه وتوفرله جو يبقى فى حد ناجح..... بجد بقى من اكتر اهتماماتى ف التدوين انى ازورك لسبب واحد بوستاتك بتعبر عن تفاصيل صغيرة ممكن تبقى فى شخصية اى حد فينا مش كلام كبير ومعقد وتبقى اسمها مدونة جامدة......قولى مواعيد تنزيل بوستات عشان بغيب يوم مش بتدخل برجع قلاقى ما شاء الله بوستين تالته .....ربنا يوفقك ويكرمك بجد شكلك حد اكتف اوى وربنا يحققلك احلامك ........فى رعاية الله.
shemo

شاب فقرى يقول...

جارة القمر


التاج فى القريب العاجل أوووووووووى

كلام والدك حلو أوى بجد :)


فقرى

شاب فقرى يقول...

أميره على كوكب مهجور

أوعدك لما ربنا يكرمنى بالمدينة

لو قلتى لى

هعملك فيللا كاملة ومعاها مرجيحة :)

يلا أى خدمة :$

كويس إنك بتطورى نفسك

على قد ما بنتعب وبنحب اللى بنعمله

على قد ما بننجح

نورتى

دمتى بكل خير وسعادة وأمان

شاب فقرى

شاب فقرى يقول...

سومة

إيه موجه الحزن دى

مالك ؟؟؟؟؟؟؟

يارب تكونى بخير :$

فقرى

شاب فقرى يقول...

shemo

:)

على طول بيبقى الفجر

او الصبح بدرى

ولو فى ضغط شغل بتأخر كتير فى الكتابة


أسعدنى أوى رأيك

نفسى أى حاجة مهما كانت بسيطة تلاحظيها تعلقى عليها

يمكن تكون قصدى من كتابه البوست من الاساس

يعنى قولى رأيك

أنا بطرح حاجات صغيرة أوى فى وسط الكلام وبنتظر رأى الناس فيها

يشرفنى رأيك

فقرى :)

هيثــم رمضـــان يقول...

إزيك يا عم الفقري

(لا فى واسطة تجيبلى وظيفة فى موقع حساس

ولا فى كاشات بنكيه تخلينى أعمل مدينة كرمللة

ولا فى أب أو قريب يقف جمبى ويمد لى إيده ويمهد لى الطريق بخبرته )

يمكن ما فيش كل ده لكن فيه كرم ربنا وحنيته علي عباده وفي رزقه اللي بيجي في أي وقت وهو اللي بيسبب الأسباب , أنا مش عاوز أقول كلام إنشا لكن طول إنت ما عندك حلم وبتتعب علشان الحلم ده وأنا عارف إن إنت كده يبقي تأكد إن ربنا هيكرمك ويرزقك بكل اللي بتحلم بيه طالما نيتك خير وطول ما أنت بتسعي ربنا هيرزقك علشان ربنا بيرزق كل دابه وطبعاً كل الدواب بتسعي علشان تدور علي الرزق اللي ربنا كتبه.

ولما تعمل المدينه بتعتك ابقي احجزلي شقه.

تحياتي

الشعب لابد له من حكومه تشكمه يقول...

من ملك نفسه وعرفها جيدا,اعلم انه هيملك الدنيا كلها.
مش الفلوس والوظيفه هى اللى بتصنع الانسان,,الانسان هو اللى بيصنع الفلوس ومكانه لنفسه.

متحطش سقف لطموحاتك,عاوز تسافر القمر,,عاوز حد يقف على ايده وماسك بوكيه ورد برضه عادى احلم:),عاوز مدينه ليك احلم بس احلم وانت بتشتغل وبتتحرك.

ربنا يحققلك احلامك كلها ويجعلك نصيب من اسمك:)

ومتنساش وانت بتبنى مدينتك انا عاوزه مواصفات معينه فى بيتى:)اه من حقى احلم انا كمان:)
اعملى جنينه كبييييييره يكون فيها ورد احمر كتير وانواع ورود كتيره,وبعدين بيت عباره عن دورين وسقفه عااالى وواسع علشان مش بحب الخنقه,ومفيش اثاث كتير حجات سيمبل واضاءه خفيفه متوزعه صح.وحجات تانيه كتير,لما تيجى تنفذ قولى وانا اقولك الديزين بالتفصيل:)

donya يقول...

صباح الخير
ساعات الحلم بيتقلب كابوس
لكن لحد دلوقتي مش عارفه العيب بيبقي في مين ساعتها
فينا والا ف الحلم

ويعني ايه اللي عايز يحلم يحلم علي قده
ومين اللي يحدد قده ده
مش يمكن قدي ده ماحدش يعرفوا غيري
لكن انا املي في الله

تحياتي

شاب فقرى يقول...

هيثم رمضان

بجد ربنا كريم أوى ومحدش عارف بكره هيبقى فى إيه :$

شكرا لرأيك وتواجدك

فقرى

شاب فقرى يقول...

شيما

دى تانى فيللا تتباع النهارده :$


شفتى الهنا اللى انا فيه

لازم تدفعى مقدم بقى

هاتى لى علبه شوكلاته مورو

أيون اللى فيها كراميللة

أينعم هأكلها فى سنة ونص :$

بس هتبقى مقدم للفيلا

مفيش فيلل ببلاش خالص كدا يا جدعان

لازم هدية زوغيرة :$

انا برده قلت لنفسى زى ما بتقولى كدا

انا ممكن اعمل كل دا

واحسن منه كمان

:)

أنا أملى فى ربنا كبير

ما هوا المشكلة انى بحلم وانا بشتغل

واحيانا نفسى تتسد عن الشغل كله

:$

بس بفوق على طول وبظبط كل حاجة تانى :)

حلمك هيتحقق

هجيبلك بوكيه ورد تانى :D

ومتقوليليش بقى وانته جبت اولانى

وبعدها هشوف بقى هقدمه إزاى :$

كرمللة هيحوش ويجيبلك بوكيه ورد

:)))))

صبح صبح

صباح الورد الأحمر بس

شاب فقرى

شاب فقرى يقول...

donya

فعلا محدش يعرف امكانيات حد

فى امكانيات احيانا تقاس بالصفر

لكن فى امكانيات زى إمكانياتى تتعدى الحدود

:)
نورتى
فقرى

الشعب لابد له من حكومه تشكمه يقول...

ايه ده انت بتتكلم بجد؟
يعنى ايه مش عارف عندك ايه وبتعاند علشان متروحش للدكتور؟؟؟؟؟؟؟؟؟؟
ليه بتخاف تروح للدكتور؟
روح ياكريم,متسكتش وتعاند نفسك,هتلاقيها حاجه بسيطه ان شاء الله وبعدين ممكن لا قدر الله لو سكت دلوقتى وهى حاجه بسيطه بكره تألمك اكتر.

ماما دايما تقول ربنا خلق الطب والدوا ليه احنا غاويين نعذب نفسنا.

شاب فقرى يقول...

اه وربنا بتكلم جد يا شيما


دعواتك بس

ما هوا انا مش باخد دوا


اولا بكرهه

ثانيا مبحبش ازور الدكاترة بحس إن العيادة مرتبة ونضيفة زيادة عن اللزوم وإن الناس دى بتضربنا على قفانا بوهم المرض :D

ثالثا :
أنا ذكرياتى مع العيادات يا إما عملية أو نزيف أو كشف على صحة والدى ومبيقولش عنده إيه ومات من غير ما أعرف ماله

بغض النظر عن كل دا

يومين وكل حاجة هتهدى من تانى

أنا نويت النهارده أقعد فى البيت وأبقى شاب مأنتخ
:$


بس دخلت مدونة ناو بتاعت حد بيتكلم فى السياسة وقرفت من اللى قريته فى التعليقات وفى البوستات

عالم زبالة وربنا

وشكل اللى قريته دا هيخلينى أنزل الشغل وأبعد عن النت بأقصى قدر ممكن وأقعد ءأجل فى التاج لحد ما أطلع عالعماش المبكر :$

فقرررررررررررررى

ponpona يقول...

-إنته حلمك شقة لأنك بتعشق الهدوء

-أنا حلمى أبقى صاحب المدينة دى اللى أنشأها من الأصل


كريم ... انا باحترم دماغك دي جدا جدا

ربنا يكرمك ويقويك

:))

فراشة يقول...

اهلا استاذ كريم

فاتنى بوستات كتيييييير قوي
بس اكيد قرا كل اللى فاتني

عن البوست اكيد انت صح الواحد لازم تكون احلامه غير محدوده عشان لو حددها هتفضل تقل تقل لحد ما تنتهي وميوصلش لحاجه

ربنا يوفقك يارب ويوفق كل واحد بيلم يقق ححلمة يارب

نعكشة يقول...

عاوزة أطفش :D

ههههههههه


(إني أغبطك)

ربنا يوفقك و يقويك تحقق كل اللي بتتمناه و اكتر

سلامٌ عليك