الاثنين، 9 نوفمبر 2009

إيه آخر خطوة ...؟


الحب
الغريب إن كل مرة الواحد بيتجرح فيها من حد بيحبه ولو من غير قصد
بيكون حاسس إن بعد كدا عمره ما هيحب تانى
بس للأسف بيرجع يحب من تانى ويخلق لنفسه عالم خاص
ويبتدى يحس بالناس ويقرب منهم
ويحبهم
ويتجرح من تانى
يمكن عشان الحب عامل زى الإدمان
الواحد لما بيخش فى دايرته مش بيقدر يسيبها أبدا
يمكن الإدمان بيأذى الواحد بشكل جسدى كبير وبيبهدل الواحد وبيفاجؤه بمصايبه
والواحد بيبعد
لكن .....
الحب
جراحه أقوى بكتير من الإدمان
بالرغم من إنى أعرف ناس ماتت من السجاير والمخدرات
وناس تانية ماتت من الحب
بتوع الحب دول قليلين أوى
مش عارف ليه ؟؟؟
يمكن عشان لما بيموتوا الواحد بيحسد الطرف التانى
وبيقول يا بختك لقيت حد يحبك لدرجة إنه يموت وراك
حاجة وحشة وفى نفس الوقت بتكون قمة الوفاء
مش عارف
بس بإختصار
دايما الجرح بيكون من أقرب الناس ليك
مش عارف ليه
ياترى العيب بيكون فى إيه ولا مين ؟؟؟
العيب فينا مبنعرفش نوصل مشاعرنا ومش بنقدر ناخد خطوة جريئة للطرف التانى
ولا ياترى العيب فينا إننا إتعلمنا الحب من قصص فاشلة ؟؟
ولا يكون الطرف التانى أساسا مش حاسس
أو مش مقدر
ياترى مين الجانى فينا ؟؟
مش عارف أوصل اللى جوايه إزاى
سؤال :
ياترى إيه آخر خطوة هتعملها قبل ما تخسر الطرف التانى وتحاول تحافظ عليه بالخطوة دى ؟؟؟؟

إنتهى

=============|| كلمات من فيلم زى النهارده ||=============

البطلة : (( وكان جوايا إحساس إنى هشوفه تانى ))
فعلا إحساسى صدق بس حلمت بيها مش شفتها فى الحقيقة كان نفسى أحكى الحلم بس مينفعش
البطل :
(( ياريت الواحد كان بيعرف يتحكم فى مشاعره أو يفهم أسبابها ,,
ياريت الواحد كان بيعرف ينسى اللى عايز ينساه ,,,
أو يعرف إيه اللى بيخليه يتشد لناس معينه فى الوقت اللى كان حاسس فيه إن دا لا يمكن يحصل ))
البطلة : (( حاولت أبطل أفتكر إنى المفروض أنساه ))
البطلة : (( كنت كل ما أحس إنى خلاص هنهار أروح إسكندرية عشان ماما متشوفنيش كدا
فى الأول كنت بعيط ,,,, ولما العياط معملش حاجة كنام وكان نفسى كل مرة بنام فيها إنى مصحاش
لحد ما وصلت للمرحلة الأخيرة اللامبالاة وبقيت مش حاسه بحاجة ))
البطلة :(( كنت فاكره إن الذكريات ينفع تتمسح بدوسة زرار ))
البطل :
(( عشان فى حاجة بدأت بينى وبينك
حاجة إنتى عارفاها وحساها كويس
لو عاندتيها هتغلبك
متضحكيش على نفسك أنا متأكد إنك هتحبينى زى ما أنا هحبك
دا لو مكنتش إبتديت أحبك فعلا ))

===========
ملاحظات :
أنا مخنوق أوى ومش عايز أفتكر حاجة من الماضى أو من بكره حتى
شاب فقرى

هناك 19 تعليقًا:

بيطرية ومش بايدى يقول...

انا هالحق اول تعليق

ونقول مساااااااااااااء الخييييييير

او صح النوم

بيطرية ومش بايدى يقول...

اه برده جيت من تحت لفوق

ولسه قايل انك تعبان
ودلوقتى مخنوق
ربنا يستر

فى ايه يافقرى

طمنا

بيطرية ومش بايدى يقول...

لانى داخلة انام يا كرمللة
وشكل الناس حسدتك يابنى والله
مش قولت لك حط خرزة زرقا
انا حاسة انك مش متقبل اى هزار اصلا ولا حتى راضى تبتسم
بس ربنا يفك كربك
ويشرح صدرك ويبعد عنك اى حزن

بيطرية ومش بايدى يقول...

ربنا يسترها معاك يافقرى
بجد لان شكلك فى حاجة مش ولابد

ماعلينا

بس ابقى فكرنى اسألك سؤال كده اما اصحى

وربنا شكلك زهقت واتخنقت منى

طاااايب
هاقوم انا بقى واقول
تصبح على خير وتتمسى على خير
ويجعل كل ايامك خير

شاب فقرى يقول...

بيطرية

مساء النور

وربنا ما كنت واخد بالى مين

نورتى

لسه تعبان

مش عارف السر او الاساس جاى منين

بس تعبان اوى

ايه السؤال

قولى ناو

وانتى من أهله يارب :)

شاب فقرى

Asmaa mahaba يقول...

اخيرا سرحت شعر الراجل :)) وكمان حلق
بص هم كلمتين
من حبينا حبيناه وصار متاعنا متاعه ومن كرهنا كرهناه يحرم علينا اجتماعه
براحه شويه الله يسترك الريدر مبيلحقشى يقرا
حمد الله ع السلامه

Cute Kitty **sookra يقول...

يالهوى طيب موش تقول
ساكت كدا وخبيث وموش رضيت تنبهنى عشان موش ابقى الاول وتجيبلى الشيكولاته
ماشى ياكريم ماشى
زحلانه منك
هههههههههههههههه
بكره هاجى اعلق بس موش هاانام غير اما اقراه

Cute Kitty **sookra يقول...

انا كتبت حاجه زى كدا بس موش بالاتقان دا
وتقريبا برده موش كل الناس فهمتنى
فقرى بشويش على نفسك شويه
بالهداوه كدا عشان تقدر تكمل
ربنا يشيل عنك همك
ويفرج كربك
ويقويك ويساعدك
تصبح على خير

Cute Kitty **sookra يقول...

الادمان له علاج اما الحب فعلاجه الموت
ولو الطرف التانى موش فارق معاه اى خطوه عملتها او هتعملها
تعمل ايه؟
موش قادره اركز بصراحه لانى خلاص هنجت وسقطت شبكه خالص
بكره اكمل

موناليزا يقول...

هديله فرصة اخيرة بينى وبين نفسى ولو معرفش يستغلها يببقى خلاص كل اللى بينا انتهى

الشعب لابد له من حكومه تشكمه يقول...

دايما الجرح بيكون من أقرب الناس ليك ..

مختلفه جدااااااااا معاك لانه لو هو اقرب الناس ليك عمره ميجرحك, دا ببساطه..

بالنسبه لسؤالك:
ياترى إيه آخر خطوة هتعملها قبل ما تخسر الطرف التانى وتحاول تحافظ عليه بالخطوة دى ؟؟؟؟
سؤالك مش واضح ومش مفهوم بالنسبالى,طالما فى حاجه حلوه هخسره ليه؟
فهفترض معاك انه هو اللى عاوز يخسرنى مش هعمل اى حاجه وهسيبه يخسرنى علشان يندم بعد كده بقية عمره.

لو بسبب تصرف منى اشوف هو ايه واصلحه .
واخر خطوه هقوله انا شاريك متخسرنيش:) بس كده .

بس انا مش فاهمه انت بتفتكر زكريات ودا اللى مخليك مخنوق؟
ما احنا قلنا قبل كده نفض هدومك وقوووم.ومتبنيش تمثال ونعيط عليه.

ولا انت فى احساس جديد لامس قلبك؟
بس ده المفروض لو هو احساس حقيقى مش هيخنقك ولا يضايقك بالعكس هيفرح قلبك.


صحيح حلو اوى حوار الفيلم ده .وخصوصا دى:

متضحكيش على نفسك أنا متأكد إنك هتحبينى زى ما أنا هحبك
دا لو مكنتش إبتديت أحبك فعلا ))
جميل جدااااااااااا الشخصيه الواثقه من نفسها اللى تقتحم اللى ادامها.
نصبحتى ليك:
اعمل زيه:)

Aиgel يقول...


صباح الخير.. أو مساء الخير

الحب ؟؟؟؟؟

بعد كل اللي قريته نطلع بكام نقطة كده ..
1- أن أنت وصفته بالإدمان وطلعت وجهات الشبه والفرق كمان ودي حاجة حبيتها عشان حقيقية أوي

خصوصاً فعلاً أنك بترجع له تاني ومش بتقدر تتحكم في عواطفك

2- أنت كأنك كنت بتتكلم بالنيابة عني في كلام كتير مش هنوضحه .

3- أنك لغبطتني أوي ولغبت كل تفكيري عشان خلتني افكر من تاني في نفس الأسباب اللي محيراك دي .

لو قدرت اجمع إجابة مقنعة هعلق ع البوست ده تاني
ونروح نشوف اللي بعده (:

Angel love

في الأخر هقولك ربنا يريح بالك وقلبك

شاب فقرى يقول...

سومه...مجنونه فى بلد عاقل

يااااااااه بس كدا

عنيه

حلوة الجملة اللى قلتيها دى

صريحة وبتجيب من الآخر

بس مش بمشى بيها

بمشى باللى ميقدرنيش ميلزمنيش


الاتنين اخوات عادى بقى :)

:)

تحياتى

شاب فقرى

شاب فقرى يقول...

sookra

قومى نامى وبعدين نتقبل منكم التعليق بعدين

شكلك مسقط خالص :)

نورتى

شاب فقرى

شاب فقرى يقول...

موناليزا

فكرة حلوة

بس دى مش خطوة

دا موقف

تحياتى

شاب فقرى

شاب فقرى يقول...

شيما

انا عارف ان مدام قلتى رايك فى البوست يبقى مش هتقولى حاجة واضحة

دى المشكلة

عايزة حاجات محدده عشان تقدرى تحكمى على الرأى الخاص

مينفعش اعمل زيه :)

نورتى يا شيما

تخمينك الوحيد الصحيح انه احساس جديد

بس خلاص

بحححححححح

تحياتى

فقرى

شاب فقرى يقول...

Angel

يجب أن نطوى كل الصفحات حتى الصفحات الغير مكتملة

وننسى ما فات وربما يجب أن نطوى صفحة الحاضر ونصنع حاضرا جديدا خاصا بنا نحن فقط

دون أن نجعل لكل شخص لا نعرفه حقا فى هذا الواقع وحلما فى المستقبل

تحياتى

شاب فقرى

نعكشة يقول...

صراحة دائماً أنا الطرف المؤذي :D

في حب أي شخص او شخصة

أنا اللي فجأة بقرر ابعد
و فجأة لو قرروا يحافظوا عليا بقرر أءذي عشان يبعدوا

المصيبة اني معرفش اسباب
سوى إني مبحبش حد يقرب مني

تقدر تقول مرض يا اما مرض في عدم القرب من الناس
او مرض حب اذية الناس المقربين مني

هوهمرض و خلاص

بالنسبة للنسيان

محدش بيعرف ينسى اللي عاوز ينساه

دة غير اني اصلاً ذاكرتي على قدي
والحمد لله

خير خير

سلامٌ عليك

ربنا يفك خنقتك يااااا رب

سلامٌ عليك

شاب فقرى يقول...

ههههههههههههههههه
ليه كدا بانعكشه :$

حرام عليكى الناس

انا اتعودت ابقى بعيد

بقيت زيك كدا

بس ولا مرة كنت انا اللى بأذى

احمدى ربنا على ذاكرتك الضعيفه

ارحم بكتير جدا من ان تبقى ذاكرتك قوية وتسبب لك عذاب نفسى

:)

صباح الورد

فقرى