الأحد، 8 نوفمبر 2009

عدنا بحمد الله



السلام عليكم ورحمة الله وبركاته
الحمد لله كنت عند الدكتور فى الإسماعيلية ورجعت
كانت سكة طويلة ومشوار أطول
بس الحمد لله خلصت على خير
هبتدى أحكى من أول ما صحيت من النوم
***
طبعا كنت سهران عالنت إمبارح
كان فى موضوع مهم جدا شاغلنى
وكمان كنت بكتب لكم البوست السابق وكمان برد على التعليقات
وبشوف البوست بتاع اللقاء التدوينى الخاص بالمنصورة

وما شاء الله عليكم ربنا يجمعكم دايما فى الخير واضح إنه كان لقاء مثمر فعلا وأنا الحمد لله على كل حال مروحتش لظروف قهرية شرحتها
صحيت من النوم الساعة عشرة كل شوية أصحى وأبص عالموبايل
مستنى البهوات اللى جايين من طنطا
ما هوا خلاص بقى الفقرى هوا اللى عارف الدكتور ولازم يوصلهم
كل شوية أصحى وانام ولا أمل على إن حد يتصل يقولى أنا خرجت من البيت
أبداااااااااا
لحد ما جت الساعة واحدة ونص الو يا رجاله إنتوا فين ؟
قال إيه لسه فى موقف (( الجملة )) فى طنطا
قلت لهم ربنا ينتقم منك يابنى إنته وهوا كان هيبقى يوم جامد
قالوا مش مهم نبقى نروح تانى
المهم وصلوا هنا الساعة 3.30 تقريبا ووصفت لهم ينزلوا فين ويمشوا إزاى
ولفوا وراحوا حته غلط وكنت هضربهم بس الحمد لله المسامح كريم

روحنا ركبنا المترو وطلعنا على محطة رمسيس وبعدين عالمرج الجديدة
ومن هناك تقدر تركب إسماعيلية
وصلنا المرج الجديدة مش فاكر الساعة كام وطلعنا من المترو
بعد ما إتريقوا على إحدى عجائب مصر السبع وقعدوا يتريقوا على زحمة المترو
ويقولوا مفيش حد هنا معاه انفلونزا خنازير

طيب يا جماعة تيفود
طيب أنفلونزا طيور
قلت لهم لاء عيب فى واحد برا واقف مخصوص للحاجات الحلوة دى
طلعنا وجبنا شوية حاجات نتسلى فيها فى السكة
ببص لقيت البياع بيقولى تلاتين جنيه
طبعا إفتراء بس هنعمل إيه ركبنا العربية وطيران على إسماعيلية
ربنا كرمنا بعيلين صغيرين زى السكر كانوا جمب السواق عمالين يهزروا معانا
ويدونا طوفى ونكت
وكمان بعتوا لصاحبى مقطع عالموبايل
لبنت متقطعه بمعنى كلمة متقطعه وبيقولوا دى بنت ليلى غفران
شوفوا الأطفال بقوا بيفكروا فى إيه
العنف
ودى مشكلة شغلتنى كتير أوى
وفكرت فيها طول الطريق وإحنا بنهرج
المهم وصلت إسماعيلية الساعة 7.30
وطبعا بما إنى كنت هناك كتير كل صيف أو كل فترة أنزل أتفسح

((||
ملحوطة : لو عايز تصيف فى إسماعيلية مفيش غير شطين بس كويسين وممتازين وعن تجربة
شاطىء القوات المسلحة و شاطىء الدانفا جمبه على طول الأول عائلات وفخم جدا والتانى إحتمال تلاقى فيه أجانب لانه غالى وفخم ومحترم ومش أى حد بيدخل وإياكم بشاطى الفيروز (( شاطىء البيبى )) أنا روحته ومقدرتش انزل الميه أساسا
الصورة اللى فوق دى من داخل شط القوات المسلحة من سنتين تقريبا
واللى بعيد وعامل زى الخنجر دا النصب التذكارى لجندى المجهول وروحته تقريبا من تلات سنين ونص
واتصورت هناك والصور اتمسحت وكان يوم فخم موت بس فى الشتا
||))
فقلت إشطة ولفيت بيهم وعملت فيها المرشد السياحى
وريتهم بقى إسماعيلية من جوا التاكسى اللى رخيص جدا

يعنى حاجة بستغرب لها جدا هناك
التاكسى رخيص جدا
وفخم جدا جدا جدا
يلف بيك وياخد اتنين جنيه ونص
فعلا إسماعيلية عروس القناة يا ولاد جميلة ونضيفة وهادية ومليانة تاكسيات
بس زعلنى أوى إن عساكر المرور البنات مكانوش هناك
لان الصيف خلص وراحوا المدارس :((

المهم وصلنا للدكتور اللى جمب B-Tech جمب السلم الأزرق جمب محطة قطر إسماعيلية
وطلعنا وحجزنا بكام الكشف يا سيدى
سبعين جنيه
طبعا دفعنا بدون مناقشة مع إنه المفروض ستين بس :$
إستغلال من التمرجى بقى
وقالنا تعالوا الساعة تسعة ونص
طلعنا وروحنا تانى عند الموقف الكبير بتاع إسماعيلية بتاكسى لطيف ظريف
وقعدنا على كافتيريا الجوهرة

كافتيريا بجد
نضيفة ومحترمة وفخمة جدا
من كتر العناية فيها تحس إنك قاعد فى فندق
والله ما لقيت زيها ولا حتى فى مدينة نصر
المهم خلصنا وقمان إتمشيت بيهم لحد الدكتور بدون تاكسى
طلعنا وكشفنا وكله تمام وأخدنا الدوا وعينة مجانية كمان
ببص عالدوا لقيته لعلاج الإضطرابات العقلية والشيزوفرنيا
بصيت لصاحبى
وقلت له
إلا فريدة عاملة إيه دلوقتى :D
(( من فيلم أحمد حلمى آسف عالإزعاج كان عنده المرض دا وكان بيتخيل حاجات ومنهم بنوتة عسولة بيحبها إسمها فريدة ))

المهم قلت معلش طلعنا بعدها تعالوا يا شباب أنا عازمكم هناكل إيه ؟؟؟
قلت لهم أجمد مطعم فى إسماعيلية هنا هوا (( حسن أبو على )) أكل بحرى
بس
طلعنا وجبنا الأكل اللى بحبه كله
يعنى لو روحت هناك أنصحك بشوربة السى فود وطاجن سى فود برده وشوربة أم الخلول
والحاجات الحلوة دى
يعنى مش هيكلفك كتير
يعنى لو كنت فرد واحد هتدفع حوالى ستين جنيه
المهم قررنا نروح
بس قعدنا على ترعة الإسماعيلية الكورنيش بتاعها رائع والليل هادى الساعة اتناشر ونص

وطلعنا من إسماعيلية من الموقف الكبير الساعة 1.15

طبعا أنا قلت أركب معاهم طنطا
لأن لو ركبت المرج هنزل هناك مش هعرف أروح
مفيش عربيات ولا مترو
ركبت معاهم لطنطا العربية مشيت كالتالى بالظبط
إسماعيلية - الزقازيق (( بالشرقية )) - بنها (( وبعدين طريق مصر إسكنندرية الزراعى دخلت العربية من عند توشيبا العربى بالظبط)) - طنطا
طبعا المشوار كان طويل وكان إحساسى بيقولى يابنى إحنا خلاص مش هنروح السنة دى
وحسيت إننا فى الدوران حلو أفريقيا والله
الحمد لله العربية معطلتش وقضينا وقت لطيف بنهزر ونهرج
وأنا بشوف الطريق كالعادة

فوتنا عالشرقية والزقازيق بالعربية
بجد كنت سعيد لانى عمرى ما روحتها
بس مسيرى هروحها
اللى إتضح لى بالرغم من إننا كنا بليل
إن المدينة زحمة جدا جدا جدا بالنهار
ومحدش يقولى عرفت منين
قلت الحمد لله إننا ماشيين باليل
وصلت عند توشيبا العربى عالطريق الزراعى الساعة تلاتة إلا ربع

طبعا كنت بفكر أخش بنها وأبات عند قرايبى
بس لغيت الفكرة
لقيت عربيات مخصوص جميلة أوى ب 35 جنيه
طبعا المشوار ميستاهلش عشرة جنيه
بس هوا إستغلال بقى
وبينك وبين القاهرة 45 كيلو ي
بقى الحل إيه؟؟؟؟؟
تمشى يا معلم
لأن العربية كانت هتودينى بنها مش القاهرة
مشيت شوية ووقفت أشاور طبعا مفيش كلب عبرنى ورضى يقف (( مش عارف ليه الناس مش لبعضيها ))
روحت عند كافتيريا عالطريق وكلمت صاحب عربية نقل نازل القاهرة
وركبت معاه
أيون زى ما فهمتوا بالظبط
فى الصندوق
45 كيلو فى الصندوق بتطلع مقتنع إن الإنسان أصله عمود نور مش قرد زى نظرية داروين للبتنجان الشهيرة
نزلت القاهرة وروحت ونشرت التعليقات وكتبت لكم البوست دا
طبعا أنا نازل تانى إستشارة الأسبوع الجاى يوم الأتنين مع صحابى
أنا كتبت كل التفاصيل عشان تحسوا بالرحلة والمشوار
أنا الصراحة نفسى أكتب فى أدب الرحلات زى أنيس منصور
بس أنيس منصور كان بيلف العالم وأنا بلف مصر بمزاج
وطبعا أنا مش قريت له لسه
أكيد لما أقراله هتعلم منه كتير فى الجزئية دى
خالص تحياتى لكم
السوندباد البرى :)
شاب فقرى

هناك 43 تعليقًا:

Aиgel يقول...

تقريبا أول تعليق
(:

أصلي سهرانة

مستنياك شوفت

الشعب لابد له من حكومه تشكمه يقول...

اممممممممممممم انا قلت انى حاسه انى اضحك عليا:(
يعنى اتفسحت والحياه بمبى اهى وبتخضنى وتعملى فيلم علشان اصالحك..(وش بيزعق)

نرجع باه لقواعدنا اللى هى لازال الخصام قائما لفتره قد تطول او تقصر حسب مزاجى..
والمرادى مفيش مصالحه.بس كده.

شاب فقرى يقول...

طبعا أول تعليق

يااااااااااه

مستنيانى أنا :D

ماشى ماشى ... هصدق خلاص :) :)

والله راجع تعبان جدا

بس هنعمل ايه

السفر متعب بجد

ولازم اصحى بدرى

ادعيلى الله يكرمك فى ساعة الفجر دى

لاحسن الصداع هيفرتك دماغى :((

فقرى

شاب فقرى يقول...

شيما

وربنا ما كانت فسحة

دا انا حتى رايح بليل

بس هقولك إيه

مش صالحتينى مرة خلاص بقى مش ترجعى فى كلامك :$

وكمان فقرى قلبه طيب ومكانش يقصد يزعلكم والله

بس الظروف قهرية

دا أنا راجع مش شايف قدامى والله

معلش بقى خلاص

فقرى

Aиgel يقول...


أولاً : سلامتك ألف ألف ألف سلامة
ويارب متشوفش شر أبدا

بس برضوا مطمنتيش كنت عند الدكتور ليه

انا هرد على مهلي بقى
ما أنا من حقي مش كتبت أول تعليق
(:

الشعب لابد له من حكومه تشكمه يقول...

امممممممممممممم هفكر بس زى مقولتلك خدلك ساتر منى اليومين دول.

هسسسسسسسس متقولش بسسس هسسسسسسسسس متقولش اصل.

انت قلبك طيب انا باه قلبى اسود ايه رايك؟اعترض كمان وقول مش عاجبك.
ومش هرد تانى هيه يالا.

شاب فقرى يقول...

الهادئة Angel

نورتى المدونة

اللى تقولى عليه ماشى ولا يهمك

:)

فقرى

شاب فقرى يقول...

شيما

انا قلت معلش كتير

وانا مش بعرف أحايل الناس

بس عارف قلبك طيب وهتفكى من الزعل دا بسرعة :)

دا بدل ما تدعيلى وتقولى لى سلامتك وعملت إيه عند الدكتور :$

ماشى ماشى :((

فقرى

شاب فقرى يقول...

أنا قايم أنام ونكمل غدا بعون الله

فقرررررررررى

:)

الشعب لابد له من حكومه تشكمه يقول...

شوف برضه بيلعب على الحته دى ازاى؟؟:(
امممممممممم يعمل فيها مسكين وغلبان ويتسهوك ويخلى الواحد يحس بتانيب ضمير:(

انا مش بحب اسأل على حاجه صاحبها مقالش عليها وانت مقولتش انت ليه كنت عند الدكتور..
المهم انك كويس..

وايه مش بعرف احايل الناس دى؟؟؟
كمان بقيت انا ناس؟؟؟؟؟؟؟؟؟؟؟؟
قول قول دى كده فيها شهرين خصام.

وايااااك ثم اياااك تتسهوك تانى وتعمل غلبان علشان انا قلت مش هرد تانى..

شاب فقرى يقول...

شيما

يا ساتر يارب

مين بس اللى قال إنك ناس

إنتى صاحبة مدونة :) مش غريبة

برىىىىىىىىىىىىىء يا جماعة

خلاص يا شيما

شكلك بتركزى أوى وبتفكرى أوى زيى برده

ودا دليل إنى مش هعرف أصالحك وهيبقى فى صعوبة

بس برده هصالحك :)

وعد منى أصالحك ببكيه ورد لو حصل نصيب ونزلت لقاء تدوينى تانى :$

خلاص يا شيما :$

مش تزعلى بقى

شاب فقرى يقول...

وكمان أنا قلت هبقى أقول

فى بوست لوحده

لأن الحالة خطيرة ومحتاجين تبرعات

وتعاطفك لوحده مش كفاية :$

الشعب لابد له من حكومه تشكمه يقول...

شوف برضه بيستفزنى ازاى.. ويعمل سهوكه.

لا مش خطيره ولا حاجه انت زى القرد اهو..

وبطل الطريقه دى مش علشان نجحت مره ومش هتنجح تانى.

وتؤ تؤ مش صالحك جوااااااب نهائى ال لقاء تانى .فورجت انا باه مش راحه.

شاب فقرى يقول...

شيما

والله هى دى الحقيقة

فعلا الحالة مش خطيرة ولا حاجة

بس دايما فى حاجات بتضعط عالواحد

الصحاب مينفعش اسيب صحابى يسافروا لوحدهم او اسيبهم فى موقف زى يوم الفرح دا

وكمان اختى مقدرش ازعلها واقولها خليكى هنا وانا رايح اقابل المدونين

حتى ان رضيت يمكن تبقى زعلانة من جواها وانا مرضهاش

اتمنى تتفهمى موقفى

ولو مش فى لقاء تانى انا كدا كدا هنزل المنصورة قريب أوى

ههبقى أجيب لك بوكيه ورد معايه واسيبهولك عند أى حد تقولى عليه :)

كدا يا شيما

بقى أنا قرد :(((

شاب فقرى يقول...

Angel

نورتى

انا فتحت الفيس بوك حالا وظبطت كل حاجة

معلش الحالة ملخبطة

لا قلق ولا حاجة

تنورى دايما

وشكرا طبعا للإنتظار

دا أنا أمى معملتهاش ولا أختى اللى عاملها بوست إتناشر دور :D

ربنا يحفظك ويعزك

شاب فقرى

شاب فقرى يقول...

مستنى منك كومنت هناك عالفيس
لان كدا اتلخبطت خالص
فقرى

الشعب لابد له من حكومه تشكمه يقول...

انت سيد القروووووووووود ولا تزعل نفسك هههههههههههههه.
ماشى انا مش زعلانه ولا حاجه كنت هشوف عمر خورشيد يعنى :)
انا بس كنت بغيظك شويه:)

شاب فقرى يقول...

شيما

كدهوه

على فكرة بقى مع احترامى

أنا متميز عن أى بنى آدم تانى

وأجدع كمان من عمر خورشيد دا :$:$:$:$

شفتى بقى

ولا يهمك

غيظينى

بس هدفعك كدا تمن بوكيه الورد :D

فقرى

Aиgel يقول...


وعليكم السلام ورحمة الله وبركاته

حمد لله على سلامتك يا كريم

وأتمنى يكون خير إن شاء الله

والله سبب اعتذارك عن لقاء المنصورة ده بيدل على أسباب رجولية وليست أسباب قهرية ( حلو الجزء ده )
طبعاً عشان أختك ميصحش تسيبها
..............
نيجي بقى للجزء بتاع أصدقاءك
حلو أوي يتريقوا على عجائب الدنيا السبع في مصر
هما كل اللي مش من القاهرة ميحبوش الزحام اللي فيها ويستغربوه أوي
بس أنا بحبه جدا
...........
وحلو كمان التاكسي الرخيص ده بردو سمعت أن المحافظات دي فيها حاجات كتير رخيصة خصوصا المواصلات
غير القاهرة خاااااالص
..........
بصراحة عجبتني أوي الرحلة دي يا سندباد كريم بجد حسيت أن أنا اللي بعملها (:

أما بالنسبة للعربية اللي مش بتقف لحد ده اعتقد انه بيرجع لذوق الإنسان وللأسف ده معدوم عند العرب كلهم ):

وبالنسبة لأدب الرحلات وأنيس منصور

أنا كمان مقرتش حاجه له
بس ربنا يحقق لك كل اللي تتمناه

دمت بكل ود واحترام
ولتاني مرة يارب يكون زيارة الطبيب خير وسلامي لأختك (:
هفضل اسلم عليها لحد ما اعرفها واسلم عليها بنفسي (:

Angel love



شاب فقرى يقول...

Angel

هرد عالتعليق دا بقى بكره عشان أعرف أرد بمزاج

سيبى كومنت عالفيس

كريم

فراشة يقول...

حمدا لله على سلامتك وعلى صاحبك كمان

عن البوست بقى ... الوصف جميل خالص واستمتعت كأني انا اللى كنت هناك

بس انا مرحتش هناك خالص ولا رحت اى مكان ولا حتى القاهرة مع انى بحب السفر قوي

شكرا كمان مرة على الوصف
ولو على رحلة انيس منصور كتاب حول العالم في 200 يوم جميل قوي على فكرة كأنك مسافر معاه "بحب الكتاب دا"

Cute Kitty **sookra يقول...

نقول كدا والصلاه على النبى
اولا حمدالله على السلامه يافقرى
كنت خايف متوصلش بس ربنا خيب ظنك اهو ووصلت
صحيح وصلت متاخر وطالع عينك لكن وصلت
ثانيا بقى
كنت هااقول ايه يالهوى عليا من النسيان دا
والنبى ياضنايا شكلى كدا هااسلم نمر قريب
المهم سلملى على المدونه المجهوله (اختك اللى اكيد عسوله واكيد كمان لها الجنه انها عايشه معاك يافقرى
هههههههههههههههههههههه
وش بيطلع لسانه واوعى تزعل ولو زعلت تعال عندنا ترعه كبيره ممكن تشرب منها
هو كدا بقى طالبه معايا بلطجه اوى النهارده لانى متغاظه وموش عارفه ليه
المهم انى متغاظه اوى لانك اتفسحت وكمان روحت للدكتور
ايه يابشمهندس حسن صلاح الدين
عندك شيزوفرينيا وموش تقولى
هههههههههههه
بصره ياعم احنا كدا بقينا اتنين مدونين عندهم شيزوفرينيا
وكمان ضيف انى انسانه مكلكعه كدا
هههههههههههههههههه
طولت ؟
موش مهم ماهو انا عاوزه ارغى ولازم تسمعنى شوفت بقى انانيه اكتر من كدا
ارغى وانت تسمع
ههههههههههههههههههههههههههههههههههه
فسحه سعيده يافقرى
وكمان انا زعلانه منك
كدا كدا ولاتعليق واحد
يعنى انا اعبرك كدا وعماله اعلق مره واتنين وتلاته وانت ولاهنا
نسيت اقولك كنت سهرانه لكن الله يحرق النت كان فاصل واستغلتها فرصه وقعدت اقرأ شويه عند عمك احمد فؤاد نجم
ههههههههههههههههههه
كفايه عليك كدا
النت لسه واصل من شويه
صغيرين

Unknown يقول...

لا دا الدوران حول القاهرة
حمد الله على السلامة

غير معرف يقول...

حمد الله ع السلامه

انا موش هكون متطفله واسال ليه بتروح لدكتور .... بس هسال اشمعنى دكتور في الاسماعيليه ؟

معلش بس انا استغربت انك رايح الاسماعيليه علشان تكشف

عموما الف سلامه

تحياتي

------ يقول...

مساء الخير يافقرى
والله دعيتلك امبارح من غير ماتقول اصلى مش مطمنة اصلا من ساعة ماقولت رايح لدكتور مخ واعصاب

وربنا يكرمك والصداع يروح نهائى
ان شاء الله

بس اروح اقرأ البوست واجى

معلش انى قولت انى هستغلك
هى طلعت كدا

ponpona يقول...

اممممم
هو انا كل ما أقرأبوست وآجي أحط كومنت عليه ألاقيك حطيت واحد جديد
:(

بجد والله ... أنا قرأت البوست اللي قبل فات وجيت أحط كومنت لاقيت البوست اللي فات اتحط قولت خلاص مش مشكله قرأته ومشيت وجيت احط كومنت عليه دلوقتي لاقيت واحد جديد اتحط .. عااااا

طيب شوف انا كل الرغي دا ولسه ماقرأتش البوست .. هه بس العنوان بيقول انك رجعت .. حمدلله ع السلامه
أنا هاجي بالليل بقي اقرأ واسيب كومنت علطول علطول .. أوكيه

سلام بقي .. فوتك بعافيه

قولي صحيح انت اخبارك اايه ؟ كويس ؟ يارب علطول

:))

------ يقول...

يعنى اليوم ميت فل واربعتاشر
وهزار وضحك
وعمال تقوم مش عارف ايه وخضتنا عليك
وقولنا خلاص فقرى راح

لا اصلهم جم عندنا الشرقية
اتصدمت لما لقيت البنات هما عساكر المرور
وكنت تايهه فى الشوارع لقيتها مبتسمة كدا ووصفتلى المكان

اللى عايز يكشف لازم يدفع

لقيته لعلاج الإضطرابات العقلية والشيزوفرنيا

اهه دا اللى كنت خايفة منه :):)

حسن ابو على دا حبيبى :)
عملنا معاه اشتراك خلاص وعرفنا
والله ساعات بنزل انا واخويا كدا تطق فى دماغنا بس عشان نروح اسماعلية لابو على

ياعم كنت اتفضل هتلاقى الشرقية كلها بترحب بيك :):)
وان شاء الله هتروحها لما تتفقوا تعملوا لقاء فى الشرقية

وحمد لله على السلامة
وسفرية تفوت ولا حد يموت

وان شاء الله ربنا يزيل عنكم
ويطمنكم

بيطرية ومش بايدى يقول...

حمد الله على السلامة يا فقرى
وكمان حمد لله على السلامة
وكلاكيت اخر مرة حمد لله على السلامة

تصدق بايه انا كان نفسى
اروح للدكتور مخ واعصاب عايزاها يشوفولى مدى ذكائى قد ايه
اصل انا عارفة فهمى لاى حاجة بيبقى حاجة من الاتنين
ذكاء منى او غباء من الاخرين

:)))))))))))))))))))

حمد الله على السلامة
ومساء الفل والخيرات

بيطرية ومش بايدى يقول...

انا لسه ماقريتش البوست

قولت الحق اقول اى حاجة
قبل ما حد يجى ويقبض عليا

وتبقى ليلة القبض على بيطرية


هاروح اقرا ويارب ارجع تانى
:)))))))))


وحمد الله على السلامة :d

قلم رصاص يقول...



والله يا شاب ياخويا انا كنت داخل ابهدلك
عشان كل يوم بتنزل بوست ومش ملاحق ارد عليك ومكنتش ناوي اقرا البوست للاخر بصراحة لأنه طويل كعادتك معانا

لكن واااااااااه منها اااه .. انت اجبرتني اني اغير النظام لأكتر من سبب

اولا انك كنت عند الدكتور ولازم كنت اطمن عليك من خلال البسوت فاضطريت اقراه للاخر..شوفت انا بحبك ازاي !

ثانيا اسلوبك جميل ياواد جدا في الاسهاب
انت فنان والله في الكتابه بتكتبت بسلاسة غير عادية..ربنا يزيدك

ثالثا الكلمة دي موتتني من الضحك وقولت لازم اعلق عليها



"بتطلع مقتنع إن الإنسان أصله عمود نور مش قرد زى نظرية داروين للبتنجان الشهيرة"


هههههههههههههههههههههه

المهم بقى طمنا عليك وان شاء الله اللقاءات الجايه في المنصورة انا هحضر وانت لازم تحضر بإذن الله ونعمل حاجة كويسه لعالم التدوين الجميل ده

دمت في حفظ الله

بيطرية ومش بايدى يقول...

يا خااااااااااااااااااااااااااااااااااااااااااااااااااااين العيش والبطيخ

بقى كده
تعدى على الزقزوقة وماتيجش تزورنى
خياااااااانة
ناشى يا فقرى
ده احنا كان عندنا اكلة سمك ايه تحفزز


فاتك نص عمرك
:d
;)

بيطرية ومش بايدى يقول...

المهم بالنوسبة للزحمة
فهى تقريبا زحمة بس ماتيجيش تلت زحمة الكاهرة طبعا
بس انا اقولك ليه بقى ياسيدى
لان عندنا وقريب من بيتنا بالتحديد حتة اسمها القومية
الحتة دى اول ما جينا نسكن هنا فى الحى
كانت تقريبا مقطوعة ماينفعش حد يمشى فيها بعد اذان العشاء
وكان الحى بتاعنا اهدا مكان فى العالم

قوم ايه بقى يا سيدى
فتحوا عندنا فرع مؤمن بس طبعا ازبل مؤمن شوفته فى حياتى شتان وتلات شتاتيت
بين مؤمن مصر وهنا
وهكذا دواليك ياابنى فتحوا كام محل لبس على كام محل شنط وبقت القومية روكسى الصغيرة
وتلاقى بقى البنات فيها ايه
عنب وموز وبطيخ وخيار وكل حاجة
والشباب كذالك نظرية طبيعية طبعا فاهمنى :d
فنتيجة لكل ده
بقيت ناس كتيرة اوى تسيب بلدها او اى حتة هى فيها وتيجى هنا الزقزوقة تقولشى بلد سياحى
ما عليناااااا
وتلاقى بقى العربيات على قفى من يشيل
انا افتكر وانا ف اعدادى كنت بقف ف البلكونة اعد العربيات اللى راكنة فى شرعنا بطوله كانوا 6 بالعدد
دلوقتى تقدر تقول الشارع بقى جراج عربيات

اه هو انت ما جيت تنزل نزلت فين عند المحطة ولا فين
اصل اللى انا اعرفه ان المواصلات عندنا ما تهبطش اربع وعشرين ساعة
اخويا بلاقيه بيسافر فى اوقات متاخرة سواء الصبح او بالليل


على العموم خيرها فى غيرها
شوفت ده كله حصلك عشان معدتش علينا
كان زمانا ظبطناك انا وصاصا
:)))))))))))))
حمد الله على السلامة يا مسكر

كفاية عليك كده

ريمان يقول...

ههههههههههههههههههه



ههههههههههههههههههه



ده انا حبيت الاسماعليه حب


خصوصا شاطىء البيبى ده


هههههههههههههههههههههههه


ايوة كده اعمل دعايه



ميه ميه


تحياتى ليك


المهم حمد الله ع السلامه


عودا حميدا

عابرة السبيل يقول...

ياسلااااااااااااااااااااام

ايه ده
تصدق بقالى سنة فى الاسماعيلية لكن عمرى ماقدر اوصفها زى ما وصفتها

المرة الجاية بقى روح نادى الشراع
برضه حلو ومحترم بس بيقفل بدرى على 5او 6

وفيه الساحة كان جميل فيه ملاعب كورة بس لازم تحجز عشان تلعب لكن القاعدة حلوة

بصراحة الاسماعيلية كلها حلوة بجد

ولولا بس انى مودام وانثى كان زمانى رحبت بيك عندنا
والاسماعيلية اسمها مدينة السحر والجمال
ونورت يا معلم

R-H-S يقول...

عديت علي الزقازيق طيب مكنت تحود تاخد واجبك
يالا مش مهم تتعوض مره تانيه ان شاء الله

بس بيني وبينك السفر دا متعه اي نعم لازم يكون في صحاب بس انا بفضله لوحدي

تحياتى

بقايا انسانه يقول...

حمدلله ع السلامه الحمدلله وصلت ارض الوطن بخير

تمام اهوة مفيش اي خساير اوفقدان في الارواح

الحمدلله انها عدت على خير

ويارب على اد تعب السفر تكون انبستطوا

سلمى يقول...

السلامه عليكم
حمدلله على السلامه يافندم
وبدعى تانى ان ربنا يخليك انت واختك ومش تفترقوا ابدا
ثانيه انا بحب المدونه دى عشان بتفكرنى بفيلم اسف للاازعاج
رغم انى مليش فى التليفزيون اوى
بس الفيلم ده ساب عندى اثر كبير اوى
ولو عاوزنى اشرح مفيش مشكله بس اعتقد ان حضرتك فهمت
وكمان بحبها لانها خاليه من التكليفات والمكلفات مدونه بسيطه يعنى
ثالثا انا ححاول اعمل المدونات المفضله
اتمنى من حضرتك زياره لمدونتى
شكرا ليك يا فندم

OlivE يقول...

انا بحييك على المدونه
وطريقه التدوين رائعه

وربنا يحلى دايما ايامك واوقاتك

يمكن انا متابعه المدونه من فتره
وطريقه جميله جدا فى السرد

تحياتى

أميرة علي كوكب مهجور يقول...

حمدلله ع السلامه ويارب تكون بخير

شاب فقرى يقول...

Angel

منورة

أحلى ما فى القاهرة فعلا قرفها وزحامها ومشاكلها اليومية

كل حاجة هناك رخيصة

يا بخت اهلها بيها

للاسف مينفعش اعيش هناك

لانى محدد من زمان مكان هعيش فيه مرتاح وروحى راضية

والله انا كان نفسى يكون عندى عربية

ساعتها كل كام يوم هنزل ألف أشوف أساعد مين

بس هنعمل إيه

يادوبك أحوش وأجيب عجلة الأول :$

الله يسلمك :)

كلك ذوق والله يا Angel

شاب فقرى

شاب فقرى يقول...

فراشة

أفتكر آخر مرة حاولت أشترى الكتاب دا كان من ست سنين ومكانش معايه تمنه

لما بقى معايه تمنه بطلت أقرا وبطلت أقعد مع نفسى زى زمان

لازم تنزلى القاهرة وتشوفى الدنيا وتتفسحى وتسافرى وتعرفى فوايد السفر بنفسك

تتحياتى
فقرى
================

saso

الدوا مش ليه ومش انا اللى كنت بكشف

انا كنت رايح استشارة وهبقى اقول ليه

لاء متخافيش مش هزعل ولا حاجة

نورتى المدونة

والله ما بلحق اقعد حتى اشوف شغلى فى النت

دعواتك

فقرى
=====================
العيسوى الصغير

شكرا لتواجدك :)

نورت ووصلت بالسلامة والحمد لله

شكرا ليك

فقرى
====================
فتاة من الصعيد
مش انا اللى عيان على فكرة
الشيخ البعيد سره باتع

تحياتى

فقرى :)
====================
دموع القمر

ولا يهمك انا تحت امرك فى اى حاجة حتى لو استغلال

دعواتك وصلت وطلعت من الموت اكتر من مرة والحمد لله

خالص تحياتى وتقديرى
فقرى
===================
ponpona
كنت هنزل بوست النهارده جديد
بس قلت لاء يا فقرى
خليها لبعدين
مع ان الموضوع مصيرى ومهم بس هأجله
:)
نورتى يا منى وفى إنتظار تعليقك
فقرى
=====================
دموع القمر

انا كدا كدا لما يبقى فى اى فرصة هنزل الزقازيق تانى

يمكن عشان بتفكرنى أوى بقويسنا

ومتسألنيش ليه وإيه العلاقة

بس محتاج فترة إستقرار وسلام نفسى أبعد فيها عن الدنيا كلها ودا اللى هعمله قريب أوى

قلبى بيقولى إنى مش هحضر أى لقاء تدوينى

يمكن عشان إعتقاد بأن التدوين نشاط لا يحتاج إلى شخصية ظاهرة وجلية وتظهر فى التجمعات هنا وهناك

تحياتى يا دموع

فقرى

شاب فقرى يقول...

بيطرية ومش بإيدى

متروحيش لدكاترة

أنا عن نفسى عمرى ما روحت غير لو فعلا بموت وحالتى زفت

لكن أى تعب مستحيل أروح لأى دكتور مهما كان التعب

انا كنت فايت عالزقازيق الساعة تلاتة إلا ربع بليل

يعنى أكيد مكنتش هلحق حاجة من أكله السمك دى :)

بيتهيالى فوتت عليها القومية دى بالعربية

الله اعلم بقى

بس حلو

منطقة نشطة ودى حاجة ممتازة

انا منزلتش انا فوتت بالعربية مريت مرور الكرام بس :$

انا فعلا بسافر فى اى وقت مهما كان مش بخاف ولا بقلق من حاجة ودايما بعرف اتصرف

ولا يهمك

انا عارف أنكم صحاب واجب :)

المرة الجايه بقى بعون الله

قبل ما أنزل أى بلد للمرة الأولى بعمل إعلان هنا فى المدونة :)

دعواتك معايه بس عشان ميت من التعب

================
عزيزى قلم رصاص

مساء الجمال والسكر ياباشا :)

تعرف إنى كنت حاسس إن دا أوحش بوست كتبته فى حياتى

بس والله ردك فرحنى

هقولك ليه حسيت انى عمود نور

من كتر عمدان النور ونور العربيات اللى خابط فى وشى

طريق زراعى وراكب بالعكس يعنى ساند ضهرك فى ضهر السواق

شعور ممتع ومرعب

إن شاء الله نلتقى عن قريب

صدقنى مش لازم لقاء تدوينى :)

نورت ياجميل

فقرررررى

=======================
ريمان


:$

الشاطىء دا كان يوم لوحده خلانى كرهت الحياة

بس الحمد لله أحلى حاجة الرضا

:)

نورتى

دمتى بكل ود

شاب فقرى
=======================
عابرة سبيل

بجد يا بختك

مدينة هادية وجميلة جمال رهيب

ولا يهمك

تتعوض

انا لسه مروحتش نادى الشراع بس شفت الساحة

دعواتك معانا

شاب فقرى
========================
جهاد

انا كمان والله بسافر لوحدى

بس المرة دى إستثناء وكان إستثناء جميل

شكرا يا جميل

فقرى
==========================
بقايا إنسانة :

الحمد لله الموضوع لم يسفر عن أى خساير فى الأرواح

الحمد لله انا مبسوط عشان خاطر صاحبى دا بس

نورتى

شاب فقرى

===================================
سلمى
انا سعيد ان المدونة عجباكى

صراحة مش بحب العب فى التصميم او احط صور ملهاش لزمة

عايزها تبقى بسيطة وهادية زيى بالظبط :)

تحياتى لتواجدك

وهنرد الزيارة قريب بعون الله

فقرى :)
=====================
OlIvE

مرحبا بك للمرة الاولى فى مدونتى

سعيد بتشريفكم

شكرا لرأيك الجميل :)

========================
أميرة على كوكب مهجور
الحمد لله بخير

دعواتك بس معايه

فقرى :)

بيطرية ومش بايدى يقول...

شكلك باين عليه
انك فعلا ميت من التعب
ربنا معاك

ويقويك

تصبح على خير