الجمعة، 6 نوفمبر 2009

سيبها هى اللى ترد (( فرح طنطا ))


صباح الفل

أنا رجعت من طنطا خلاص

الساعة دلوقتى سته الا ربع الصبح

الحمد لله صحيت امبارح بدرى وعلى ما ظبطت الحال بقت تلاتة ونص

هوبا ... دا النهارده الخميس

هوبا ... الموصلات زفت

هوبتين تلاتة اربعة نزلت وقفت فى الموقف بتاع نص ساعة

فضلت واقف محترم

مش عارف أزاحم الناس من كتر ما بطلت أخرج وبقيت حاسس إنى الدكتور كراملة سبعة ماجيستر وستاشر دكتوراه بوقفتى دى

المهم

لقطت عربية من اول الخط (( الساعة اربعة ونص )) وركبت ووصلت مع صلاة المغرب

نزلت فين فى طنطا

نزلت برا طنطا عند مدخل إخناواى (( قرية هناك قبل كوبرى المحلة ))

نزلت واتصل بصحابى وراحوا يستنونى على كورنيش بلازا

(( كافتيريا محترمة جدا ومن موقعى هذا أحب أسلم على حمزة وسلمان ))

وأنا عديت الطريق وصراحة رحت آكل

أصل العبد لله مكلش ولا لقمة من الصبح

يادوبك صحيت على كوباية المعلم شحاته أبو كف

يطلع حد مش عارف الكابتن العريق شحاته أبو كف ويقولى هوا مين :D

أقوله دا نور مثله نور الشريف مع سعاد حسنى فى فيلم جامد موت

المهم الكابتن شحاته كان بيجيب بيضة وكوباية لبن ويضربهم ويشرب

أنا عملت الخلطة دى بس بالخلاط

لييييييييييييه ؟؟؟؟؟؟

عشان خاطر الزفارة تروح

وفعلا مبقاش فى أى زفارة وكان مشروب مليان بروتينات

المهم روحت أكلت فى مسمط الريس هناك أول ما تعدى الطريق والجرسون اللى هناك جدع اوى

أول ما شافنى إفتكرنى بالرغم من انى مش فى طنطا كل يوم وجرى عملى الطلب بتاعى أبو خمسة جنيهات :D

حاجة كدا عالقد (( كبده )) لأن انا مش باكل من اى مسمط برا البيت :D

المهم طلعت جرى على بلازا

وصلت لقيتهم ملطوعين هناك

نزلت المشاريب بالترتيب والإجبار

هناك حمزة وسلمان بيشربونا اللى هما عايزينه وبالترتيب وبالإجبار :) صدق فإنها حقيقة

المهم طلعنا بعدها نجيب شوية العاب نارية من مكان فى طنطا وطلعنا على المكان اللى فيه القاعة

مكان محترم مش فاكر إسمها إيه كدا كوين

وهى طبعا كانت مليانة ناس

بجد شفت هناك بنات طنطا بجد بقى :)

أدب وجمال وعلم

ما شاء الله عليهم :)

طبعا بغض النظر إن محدش عبرنى بنظرة فى الفرح

ولا حد قالى عقبالك

إلا أنى مبردش على البنات اللى بيكلمونى

هسيبها هى اللى ترد على راى جنات (( حبيبى على نياته ))

ههههههههههههههههههههههههههههههههههه

(( بس أنتى طبعا أحلى من أى واحدة فى الدنيا
كفاية إنك أنتى أنتى
مش عارف أقولك بقيت بتخيل فرحى كل شوية
ومش متخيل قاعد مع حد غيرك))
طبعا الكلام دا لخطيبتى لو فكرت فى يوم تخش المدونة مستقبلا فى أحد الأيام منتفضحش بقى :$ :D

المهم خلص الفرح

صحيح الدى جى طول للساعة اتناشر

بس معلش قلت عادى

نزلنا من القاعة على اتناشر ونص

أربع عربيات عالطريق الزراعى بنوصل العروسة المعادى

كنا ماشيين بنرقص عالطريق (( صدق حدث بالفعل ))

المهم

انا قلت ربنا فك فقرى وراجع فى عربية مخصوص وكمان ماشيين بمزاجنا ومعايه صحابى

تقريبا انا اللى حسدت نفسى

المهم وصلناها المعادى وطلعناها الشقة كمان

وهوبا نزلنا جبنا أكل وكانز وطرنا عالدائرى

شوية والعربية اللى الفقرى جنابى راكبها وقفت

قال إيه عطل وكنا ماشيين على 180

فصلت فجاة ووقفنا براحة والعربية كانت بتتحرق :D

صباح الفل

فضلنا اربع ساعات عالطريق الدائرى

ساعة بنشوف المشكلة وبندور على حبل او wire من اى عربية تريلا معديه

بس مفيش كلب عبرنا (( زيادة فى الفقر ))

شوية والعبد لله إبتكر فكرة

أحنا نفك اليفط المتعلقة عالدائرى ونعمل بيها حبل

آه وربنا فكرتى :D

اهوه بالمرة أخلص تارى من بتوع مجلس الشعب :D

فكينا اليفط وبعد ما عملنا كل حاجة

قال إيه الفقر بيتفك دلوقتى وطلع لنا واحد بحته حبل

قلت رضا وشيلناها فى العربية ومشينا

ونزلت أنا عند منزل الدائرى عند غبور كدا عالطريق الزراعى

بس بعد ما اتفقت مع صاحبى نزل احنا التلاتة اسماعيلية يوم السبت نصيف فى اخر الصيف ونقضى يوم هناك وبعدين نروح بليل للدكتور المخ والاعصاب اللى هنتعالج عنده بعون الله

المهم

نزلت ركبت لحد البيت

فعلا نطلع من اليوم دا بكذا حاجة :
1- إياك تركب فى عربية مع الفقرى
2- إياك تعزم الفقرى على فرح (( ولو كان هيتجوزك خليكى من بعيد لبعيد كل واحد فى قاعة
3- إياك تفكر توصل العروسة لشقتها ... ليه فاكر نفسك أمها ولا العريس
4- إنى عايز أتجوز بس كل حاجة معاندانى ودا العادى بتاع الفقرى
5- إنى بفكر فى فتاة الأحلام اللى بدأت ملامحها تتضح قدامى أكتر ما باخد نفسى
6- إنى إتحرمت كتير من الدلع والحب والحنان وبفكر أعوض كل حاجة مع فتاة الأحلام دى وبدعى ربنا تكون عاقلة وتفهمنى
7- إن إياك ثم إيام وإياك وإياك إنك تعمل إيه وربنا ما فاكر نسيت :D
8- إنى هضرب كوباية شحاته ابو كف دى دلوقتى فى يوم الجمعة عشان اقدر اطير عالمنصورة
9- إنى هرجع ميت من المنصورة أكتر مما أنا ميت ناو
10- إن الفقرى كرامللة آه بس راجل أوى :)
11- وووووووووووووووووووووحشتيييييييييييييينى
12- إن فى تعليق ريته وغاظنى أوى لأنى مكنتش متوقعه عالبوست اللى فات

التعليقات عالبوست اللى فات هرد عليها وهنشرها بكره لما اجى من المنصورة
إنى بجد تعبان أوى وحاسس إن باب الأودة بيرقص وبينادى عليه أقوم أكمل معاه رقص
دعواتكم أن يعود الفقرى على خير

أنا هقوم أجهز شنطة السفر بقى عشان مش شايف قدامى ولازم أنجز :)

الفقرى يحييكم من قصره وعلو الدور اللى ساكن فيه بتواضع ويقولكم كلكم

رجاءا دعواتكم
هرد عليكم نفر نفر يا حبايبى :)
بس لما ارجع بعون الله

يا جماعة الله يهديكم اقروا البوست اللى فات كويس عشان هيبقى ليه تكملة
وهيبقى فى شعر ورد شعرى على كلام شعرا كبار وعايزين صقفة حلوة كدا
وكمان أنا مش طارح حالة عامة وبطلب رأيكم
أنا بتكلم عن شاب فقرى
جامعى ومهندس محترم فى عالم الكمبيوتر
مش بيتعلم صنعه عشان أى حاجة تخطر فى بالكم
بس عشان الوقت يفوت حرام
وأنا عندى فلوس ومكان أفتح فيه ورشة
ودى ورشة ألوميتال
أنا ليه قرايب شغالين فيهم وناس محترمة جدا جدا جدا ومتربيين ولا عمرى سمعت منهم كلمة وحشة
وحالتهم ميسرة وعندهم سلسلة محلات فى مدينة نصر

يعنى أنا صعبان عليه الوقت وخصوصا إنى كمان عاجبنى المجال لأن لا بتعامل فيه مع صنيعيه ولا بتاع
وكمان بيفكرنى بأكتر حاجة بعشقها بالتركيبات الهندسية
أنا بسميها كدا
يعنى الحاجة دى عاملة إزاى وقايمة على إيه ومن جوا تصميمها عامل إزاى
فمش نازل أعمل اجة غلط ولا أتعامل مع صنيعيه فى موقع عمل ولا مع اى طائفة صنايعية
فقط العدة والخامات

وحشتينى (( جارى دك الحصون ))

شاب فقرى

--
* تحديث:
أنا تعبان جدا جدا ومش قادر أتحرك
وعندى ظروف قهرية جدا
أنا قايم أنام
انا مش رايح اللقاء يا شباب
ولما أصحى هبقى أرد عالتعليقات وأنشر كل التعليقات وأرد عليها

أنا كنت جهزت الشنطة ولبست ومقدرتش أتحرك

لنا عودة

فقررررررررررررررى

هناك 52 تعليقًا:

singamaraja يقول...

Reading and visiting your blog

ميرام يقول...

(:
حمد الله على سلامتك أولا ..
بيجيب بيضة وكوباية لبن ويضربهم ويشرب
:S :S :S :S

ماتصدقش قوي في الفقر (: (:
لحسن يبقى متلازمة كده (:
عادي بتحصل في أحسن العائلات ..


.. حاسة حاسة حاسة مش عارفة ليه ويارب احساسي يكون غلط
ان انا صاحبة التعليق اللطيف الظريف (: الي غاظك ...\

يارب يطلع احساسي غلط ويكون في تعليقات غاظتك أكتر عشان أطلع منها انا (:


بالنسبة لموضوع الورشة
لو انت مقتنع قوي كده اساسا بتاخد آراء الناس ليه (:
استخير ربنا واعقلها وتوكل ..
طالما انت مقتنع بالفكرة يبقى مفيش سبب يخليك تعدل عنها

زعلت انك ماروحتش اللقاء
ان شاء الله يكون خير
سلام عليكم

فراشة يقول...

السلام عليكم

حمدا لله على السلامة

والغربية كلها نورت

فراشة ولي عودة ف التعليق لما أجى مصر بقى

سلام

فشكووول يقول...

ازيك يا فقرى
اشوف كدا فيه رقابه ولا مافيش

فشكووول يقول...

خلاص بالعند بقى مادام فيه رقابه على التعليقات مش حاعلق فى البوست ده عشان انا اتخنقت من كله بقى يعمل رقابه على التعليقات

حبات التوت يقول...

يااااااااااااه

بجد بجد انتة حتة عسل

سيبك انتة من كل الرغى الكتير دة بس احلى احلى احلى واجمل حاجة فى وسط الرغى بتقول كلمة لحبيتك مستقبلا


(( بس أنتى طبعا أحلى من أى واحدة فى الدنيا
كفاية إنك أنتى أنتى
مش عارف أقولك بقيت بتخيل فرحى كل شوية
ومش متخيل قاعد مع حد غيرك))
طبعا الكلام دا لخطيبتى لو فكرت فى يوم تخش المدونة مستقبلا فى أحد الأيام منتفضحش بقى :$ :D


بجد انتة تجنن انا بحب الناس دى

روح يابنى ربنا يحميك ويحفظك من كل شر لانك بجد نادر فى الدنيا دى يااااااه بتفتكرها وبتوجهلها كام كلمة وسط رغيك الكتير دة\\

ياااااااااااه بجد روعة



بس بجد انتة فقرى فقرى نحست على نفسك والعربية باظت هههههههههه


انتة كدة رحت المنصورة ولا لا


اكيد لا تلاقيك نايم وهتصحى يوم السبت اصلا


يلا سلام

بيطرية ومش بايدى يقول...

ااااااااااااااه
انا جبت البوست من تحت لفوق
وفرحت وقولت ان انت اتاخرت ف الرد عشان روحت طنطا وبتحضر حاجتك عشان اللقاء
اتاريك مش رايح
ربنا معاك ويقويك
انا الصراحة عمرى فى حياتى ماعملت اى حاجة زيك كده
ايه ده يابنى
لالالالالالالالالالالالا
بس خلاص

غير معرف يقول...

انت عسل ياواد يافقري والله
ههههههههه

عاشقه الرومانسيه يقول...

المهم انك فى الاخر كسلت عن مشوار المنصوره
(:
بينى وبينك سفر يومين ورا بعض هيكون متعب قوى
وبما انك فقرى فبلاش تروح اللقاء علشان يتم على خير
(:
بهزر اوعى تزعل

ريمان يقول...

هههههههههههههههههههههه




يالهوى


الحاجات اللى انت طلعت بهيا من اليوم ده تضحك اوى

بس مهمه اوى

ههههههههههه

اهو الواحد ياخد حذره برضه


انا عجبتنى اوى رقم اتنين

هههههههههههههههههههه



انا حاولت قبل كده اعلق عندك هنا بس قبل ما تنزل البوست ده كانت التعليقات تقريبا متشاله او مقفوله مكنتش عارفه كان فى ايه هنا

المهم سعيده بمروروى هنا

شكرا ع البوست اللى دمه خفيف ده

جه فى وقته


تحياتى لك

Aиgel يقول...


صباح / مساء الفل يا فقري
حمدالله ع السلامة عودتك من طنطا

انا قلت اسلم ولي عودة لقراءة ما حدث

بس بعد ما اذاكر لأختي الصغيرة (:

بيطرية ومش بايدى يقول...

ايه يابنى
انت فين
ده كله نوم
الصراحة حقك

على العموم صح النوم

وصباح الخير ومساء الخيرات

ابقى طمنا عليك
بعد الانتحار اللى انت عملته ده

غير معرف يقول...

انا قريت اخر تلات بوستات مره واحده نظرا لانشغالي بتصليح المدونه .... واللي رسي اني عملت واحده جديده ع الوورد بريس :D

اجابه ع السؤال .... هو فين السؤال اصلا

اصل يعني موش فاهمه .... انت بتسأل ليه ؟

ما هو دي دماغك انت ..... عايز تعمل ورشه اعمل .... دي شخصيتك وتفكيرك

واللي هترتبط بيك هتاخك شروه واحده ... مش بالتقسيط .... فالاحسن تبقا عارفه دماغك

والمهم الثقافه والمستوى الادبي والاجتماعي .... اعتقد يعني الورشه دي موش شتومه

مبروووك لاخت صاحبك ..... وعقبالك


تحياتي

جارة القمر يقول...

حرااااااااام عليك حد يسافر طنطا عشان فرح اخت صاحبه و كمان عايز يسافر المنصوررة لا بجد انت مجنون و جاى على نفسك اوى يا بنى دا تعب عليك جدا ومعرفش ازاى كنت عايز تنفذها


المهم بالنوسبة للبوست اللى فات انا معاك و موافقة جدا جدا على رايك و انا اشيفة ان مافيهاش حاجه خالص لان المشكلة فى نوعية الشغل المشكلة فى تفكير الانسان دا هيكون ماشى ازاى وما دام بيفكر صح و عقله تمام و انسان فاهم و واعى بالدنيا و هتكون فى لغة حوار مشتركة اكيد هوافق عليه طبعا

باختصار انا اشجعك على الخطوة اللى انت عايز تعملها دى

شاب فقرى يقول...

singamaraja

زرت مدونتك بس وربنا ما فهمت حاجة :$

تحياتى

شاب فقرى

شاب فقرى يقول...

ميرام

نورتى

اولا الله يسلمك :) :)

اللى وصفلى حوار الكوبايه دا ابن خالتى دكتور حماده وقالى انها مليانة روتينات وانا حاسس بحالة من الصعف العام

فقلت اعملها واشوف وجابت نتايج مذهلة فوق ما تتصورى وكمان مش مقرفة ولا حاجة زى ما انتى متخيلة

تعليقك من التعليقات اللى خليتنى مستغرب

ليه ياترى ؟؟؟

لأنى أعرف انك بتشوفى الموضوع من اكتر من وجهة نظر

شوفى ردى عالتعليق هتلاقى انك اهملتى جوانب كتير يجب الاخذ فى الاعتبار ليها

وانا ذكرتها فى التعليق عالرد بتاعك :)

بس برده وجهة نظرك تحترم

انا مش باخد أراء كل الناس لان مش كل الناس تفرق معايه

فى شخصيات معينه بحترمها وبقدرها وبحبها وبستنى منهم تعليقات لانى متأكد وواثق من وجهة نظرهم

أنا بناقش فى المبدأ وفى الحالة الخاصة بشاب فقرى مش فى أى حالة تانية او فى حالة عامة

كان لازم مروحش يا ميرام
فى اكتر من سبب واسباب كتير فكرت فيها
خليتنى اغير رايى فى آخر لحظة
بالرغم من انى لما بقول حاجة مش بتراجع عنها ولا عمرى خلفت ميعاد مع حد

بس اعلنت الصبح عشان أبقى قولت ومحدش يزعل منى

ان شاء الله دايما خير :)

تحياتى

ومستنى تعليقك على تعليقى فى البوست اللى فات وردك عالتعليق دا :)

شاب فقرى

شاب فقرى يقول...

فراشة

تنورى مصر يارب
وتوصلى بالف سلامة
تحياتى

شاب فقرى

شاب فقرى يقول...

فشكووول
احنا عملنا رقابة عالتعليقات لما كان فيه حد بينتحل الشخصيات ويعمل بلوجر جديد بنفس الاسم ويخش يشتم فى صاحب المدونة او فى الاديان

صدقنى والله مش غلاسة :$
دى بس رقابة على ناس مش بتحترم نفسها :)

وطبعا انته اكبر من كل دا :)

نورتنى وخالص تحياتى ليك

شاب فقرى

شاب فقرى يقول...

wella

شكرا ربنا يحفظك ويعزك يارب :)

لازم اسيبلها كلام فى وسط البوست عشان تفهم انى مش بصباص ولا بتاع بنات
عشان مش أنضرب :))

يا خسارة مروحتش المنصورة

بس مفيش مشاكل

تتعوض

شاب فقرى

شاب فقرى يقول...

بيطرية

هههههههههههههههههه

عمرك فى حياتك ما عملتى حاجة زى إيه ؟؟؟


ربنا يعيننا ويقوينا كلنا يارب

شاب فقرى

شاب فقرى يقول...

غير معرف

:)

وربنا نفسى اعرف انته مين

بس برده تسلم على تعليقك ووجهة نظرك فى الفقرى :$
خالص التحية

شاب فقرى

شاب فقرى يقول...

عاشقة الرومانسية

:)

والله صدقينى لو روحت كان ممكن يحصل مصيبة

انا عارف نفسى

هههههههههههههههههههههههههههههه

نورتى المدونة

وبكره فى سفر تانى

تحياتى

شاب فقرى

شاب فقرى يقول...

ريمان

أهلااااااااا وسهلا

نورتى المدونة :)

هههههههههههههههههههههههههههه

رقم اتنين جت فى بالى كتير اووووووووى

تحياتى على تواجدك والتعليق :)

شاب فقرى

شاب فقرى يقول...

Angel

نورتى

ربنا يعينك بقى

ذاكرى لها كويس

عايزين البت تنجحك

وساعتها ليه الحلاوة

انا قلت اهوه

تحياتى

شاب فقرى

شاب فقرى يقول...

بيطرية

هههههههههههه
مش أنتحار أوى

أنا ياما عملتها

نورتى المدونة

صباح الفل


شاب فقرى

شاب فقرى يقول...

فتاة من الصعيد

اهلا باحسن ناس

هوا فعلا حاجة الواحد حر فيها

بس لو هى قدامى وينفع اخد رايها يبقى لازم اخد رايها فعلا

ولا ايه ؟؟؟

نورتى المدونة

ربنا يكرمك يارب وعقبالك انتى كمان

تحياتى

شاب فقرى

شاب فقرى يقول...

جارة القمر

رأيك واضح وصريح وعجبنى رأيك

بالنسبة للسفر

فأنا ملحقتش اروح المنصورة


تعبت فجاة

تحياتى لتواجدك ولرايك

شاب فقرى

بقايا انسانه يقول...

ههههههههههههههههههههه


داايه المعاناه دي دا طول مانا بقرء

معيشني دراما واحداث وبقيت في كل سطر


بتوقع حادثه زلزال اي كارثه طبيعيه


بجد البلوج هايل

وربنا يكرمك

ميرام يقول...

مبدأيا ..
أنا مبسوطة عشان أنا تقريبا تقريبا أول تعليق
لو اعتبرنا ان سينجاراماجا ماعلقش (:
بس حتى لو علق ..
أنا والله بتقدم ... ومين عارف مسيري ابقى في الاول (: (:

بالنسبة للوصفة .. مع اني معروفة اني مغامرة جدا في الاكل وبحب أجرب .. لكن أعتقد الشجاعة مش هتواتيني لأني أعملها (:
مين عارف يمكن أضرللها في حالة ضعف عام أكون مواصلة يومين على مشروع ويبقى بعده مناقشة فأحتاجها (: (: (:

لا حدد
هو التعليق الي دايقك ولا لا (: (:
السؤال محدد ومطلوب اجابة محددة (: (:

على فكرة امعانا في الغلاسة مش هرد غير بعد الرد على ردي ده (:
وساعتها هناقش وهقولك كل الزوايا الممكنة (: الي انت شايف ان انا ماشوفتهاش وانا شايفة انك ماشوفتهاش (: (: (: (: (:

شاب فقرى يقول...

بقايا إنسانة

شكرا لرأيك وتوقعك فى محله

انا فى حاجات كتير محكيتهاش فقر بجد

خليها لليوميات :D

تحياتى
شاب فقرى

شاب فقرى يقول...

ميرام

والله الوصفة هايلة ومفيهاش اى حاجة وحشة
ولا قرف ولا اى حاجة

وكمان طعمها مش هتدوقيه لانك هتشربى الكوبايه مرة واحدة

كلها بروتينات

فى الخلاط لبن وبيض وعيشى

:)

هو التعليق الي دايقك ولا لا (: (:
السؤال محدد ومطلوب اجابة محددة (: (:


أيون هوا تعليقك
الحق يقال بقى :)



نورتى
:)

ومستنى تعليقك

شاب فقرى

شاب فقرى يقول...

تمام

Cute Kitty **sookra يقول...

موش هااعلق
عشان بجد زعلت انى موش جيت اللقاء

Roqaya يقول...

حمد الله على سلامتك :)
موضوع العربية دة بيحصل كتير يعنى ممكن ميبقالوش علاقة بيك, متظلمش نفسك وتعلق كل حاجة على وجودك :)
بالنسبة لرقم 2 ان شاء الله ربنا يوفقك ويرزقك بالزوجة الصالحة بس انت ادعى وقول (اللهم ارزقنى بمن احب فى حلالك الطيب)
بالنسبة لرقم 12 يا رب مايكونش قصدك على تعليقى أنا
وكلمة صنعة اللى انت قلتها الموضوع اللى فات مكانتش مفهومة أكيد انها على ورشة ألوميتال (أو يعنى أنا عن نفسى مفهمتهاش كدة)
أكيد ورشة الألوميتال تفرق عن الميكانيكى مش هيتيبصلها على انها صنعة أو شغلانة مستواها قليل.. وبعدين طالما المشروع بتاعك يعنى هتبقى رئيس جمهورية الورشة ومفيش حد هيقدر يكلمك :D
ربنا يوفقك ان شاء الله :)
وعلى فكرة أنا جدعة جدا وهبلغ عنكوا انكوا فكيتوا اليفط :D

ميرام يقول...

كلاكيت تالت مره
النت بيفصل والتعليق بيضيع (:



طيب ..(:
مبدأيا .. أنا توقعت ان انا صاحبة التعليق الي استفزك ...(:
وبصراحة أنا تعمدت أستفزك ...
لأني قرأت معظم الردود الي بحترم أصحابها بصدق وبحترم وجهات نظرهم
لكن لقيتها تقريبا معظمها موافقاك وأغلبها في الطريق الى المثالية (:

عارف لما حد صاحبك يجي يقولك أنا معجب ببنت ومش عارف أعمل ايه ..
فتقوله ياابني انا لو مكانك مش هضيع وقت هروح اقولها ..!
مع ان انت لو في نفس الموقف ممستحيل تعمل كده ..

عارف لما حد يقولك حصللي كذا وكذا فاتنرفزت وغلطت وشتمت .. فتقوله انت غلطان
انا لو مكان هرد عليه بكل ذوق واسيبه ..
مع ان انت لو مكانه هتعمل أسوأ من كده ..
انت فاهم أنا عايزة أوصللك ايه ..؟
ساعات لما بيبقى الموضوع نظري بنعتقد أن احنا هنتصرف تصرف معين ..
لكن لما بنتحط فيه الواقع بيفرض علينا طريقة تفكير معينة ..
هل ده ضد المثالية ..؟
هل ده مش كويس ؟؟
هل ده معناه ان احنا عندنا ازدواج مثلا في الشخصية والتفكير ..؟
اطلاقا ...
بس هي دي الحقيقة .. وأعتقد انك هتتفق معايا في الفكرة
(:
أنا كده بتكللم على وجه العموم
هروح لمكان التعليق واعلق على نقطة نقطة
(:

شاب فقرى يقول...

ميرام

متفق فى وجهة نظرك

فى الانتظار

شاب فقرى

شاب فقرى يقول...

saso

ولا يهمك

معلش مقدرتش اجى

بعتذر ولكن انا نبهت الصبح انى مش جاى

كل التحية

فقرى

شاب فقرى يقول...

رقية

موضوع اليفط دا من حق كل مصرى انه يقطع يفط الانتخابات

لسبب بسيط جدا

الناس دى حطت اليفط ومش خدمتنا

الناس دى حتى ما هتمتش بنظافة الطريق وتشيل اليفط اللى بقى شكلها زبالة

فى مبررات من هنا للصبح :D

يعنى مش هاجيب محامى لو بلغتى عنى :P

لكى منى كل التحية والتقدير

فقرى

Aиgel يقول...


بااااك (:

أنا جيت يا مستر فقري
والله عندك حق أنا اللي ذاكرت والله مش هي
والبنوتة بتقولي ايه ما تيجي تختبري بدالي (:
............

بالنسبة للبوست الحلو ده واللي حصلك يا حرام
هاخد البوست واحدة واحدة
بالنسبة لكوباية شحاته أبو كف
أنا والله كنت بشربها وأنا صغيرة لأ وايه كانت تخلص اقول لماما كمان تاني ههههههههههه

ودي مسألة تقبل ( اهو كل المدونين هيقرفوا مني أنا وأنت هههههه)
بس نصيحة حط عليها شويه بسيطة فانيليا عشان الزفارة دي (:
P: المدونين هيموتوني

................
وألف هنا يا سيدي ع اكلة المسمط
مع أني عمري ما عملتها (:
عشان مش بحب بل مستحيل أكل برا البيت
دلع بنات بقى ويمكن بكرة اتجوز واحد يطلعه على عيني (:

..............
ازاي بقى يا حرام بيشربوا اللي عايزينه إجباراً دي هو في كده
.............
كل بنات مصر حلويين يا فقري
أحلى تحية طبعا لبنات طنطا (:
ومتزعلش أن محدش قالك عقبالك عقبالك يا كريم (:
أنا لما حد بيقولي عقبالك بقول شكراً :$
وبعدين جوايا أقول بعد الشر (: مش عارفه ليه ههههههه
...................
ما شاء الله عليكوا كمان وصلتوا العروسة ده ايه الكرم ده
والله أنتم شباب جدعة أوي

...........
بالنسبة بقى للعربية يا حرام واللي حصل لها .. ازاي تعملوا حبل من اليفط مش بردو بتبقى حديد معلش خدني على قد عقلي (: وفسرلي
.............
والله زعلت أنك مروحتش اللقاء بس معلش تتعوض
وسلامتك ألف سلامة يارب متشوفش شر أبدا
...........
وسلامة راسك (: ( ده رد على ردك على تعليق البوست اللي فات )

دمت بكل خير يا كريم

والله بكتب التعليق ده من يجي ساعة إلا ربع كده
(:
Angel love

Cute Kitty **sookra يقول...

نبهت الصبح والنبى لا قول كلام غير دا
بزمتك مين يبقى مسافر الساعه 6 زى حالاتى كدا وادخل اشوف تنبيهك دا
دى يابنى غلاسه
ههههههههههههه
على فكره ناويه على احتلال الليله عندك
دورلك على جيش عشان تحارب الاحتلال دا
ههههههههههههه

أميرة علي كوكب مهجور يقول...

انت مجتش ليه حضرتك وفاضل بس تقول هاجي هاجي فاتك كتير بجد وش بيطلع لسانه

وانا عارفه انت مجتش ليه طمعت في العسليه لوحدك وبعدين انت لا جيت اللقاء ولا بتجي مدونتي ماشي ماشي انا مش هعلق ومش مسامحه في العسليه:)

donya يقول...

مساء الخير
هههههههههههه
هرجع تاني بس مش قادره اكتب تعليق من الضحك دلوقتي مش عارفه اركز من الضحك
تحياتي

أميرة علي كوكب مهجور يقول...

كأبه ايه:( انت مش لسه جاي من الفرح وكاتب بوست تنميه بشريه اصلي :) ايه اللي حصل بس ده ايه المود اللي بيلقب كل ساعه ده :( خلاص يا سيدي مش عايزة عسليات :)

Asmaa mahaba يقول...

سلامتك الف سلامه وحمد الله ع السلامه
وياسيدى عقبالك :) ومتردش عليا عشان انا بنت :)))))))))))))

سلمى يقول...

السلام عليكم
حمدلله على سلامه حضرتك
معلش لو حضرتك تسمحلى ارد على رد حضرتك فى البوست اللى فات
انا مش ببص بعنصريه ولا تصنيف
ومش بقول ان يا اما واحد متعلم وشهاده كبيره يا اما لاء
كل اللى بقوله ان فى ايدك تكون افضل ماشى مفيش فى ايدك الا كده يبقى حلو ومش عيب و كمان ورشه الوميتال جميل اوى
وانا بحترم كمان تفكير حضرتك جدا لانك بتقول المكان والوقت موجودين وعاوز تتعلم حاجه جديده
انا بس لانى جربت فكنت بقول كده
تحياتى ليك يا فندم

شاب فقرى يقول...

Angel

هما العيال الصغيرين على طول كدا

زى العسل بس بيطلعوا عين الواحد

ربنا يخليهالكم يارب

---------
لاء مش تقلقى

أى شىء يقال داخل الجمهورية الفقرية فلا يملك أحد التعليق عليه سوى العبد لله

وبعدين انا بحب كوباية شحاته ابو كف دى اوى

والله بتفوقنى اوى

-------------
بصى

انا برده مباكلش بره البيت

بس عشان الحاجة مش بتحب كدا

وكمان انا لو دخلت محل ولقيت فى اى ريحة ولو ضعيفة اوى مش كويسة ممكن ابطل امشى فى الشارع دا (( حدث بالفعل ))
عشان كدا مبحبش اكل برا

------------
اصحب القهوة بينزلوا لنا المشاريب بالاجبار

بيحبونا وبيعملوا لنا مشاريب خاصة

وكمان دى كافتيريا مش قهوة فى فرق اه امال ايه

كافتيريا والله ما شفت زيها ولا حتى فى القاهرة هنا

----------------
وصلنا العروسة وهى اساسا ساكنه فى المعادى فى الدور السابع كمان

يعنى طلع عينى بليل وانا بوصلها

لاء وهى على باب البيت بتقول للعريس شيلنى

ههههههههههههههههههههههههههههههه

ههههههههههههههههههههههههههههه

يلا ربنا وقعه فى شر أعماله وأتجوز أهوه

---------------
فعلا حاجة تفرح كلمة عقبالك دى بس تخوف موووووووووت

---------------
جبنا اليافطة القماش ولقيناها وبرمناها جامد زى الحب وبقت حبل ميه ميه
---------------
بصى كل بلد وبناتها فيهم ميزة ودى حاجة بالتجربة وانا مجرب لانى ياما لفيت
صباح الفل
----------------
هوا فعلا تعليق كبير
بس تمام

نورتى يا Angel

شاب فقرى

شاب فقرى يقول...

saso

بس بس بس

إلا محد عبرنى وقالى مجيتش ليه وكأنى غريب

لاء لاء لاء أنا زعلان :((

شاب فقرى يقول...

أميرة علي كوكب مهجور

بالنسبة للعسلية تتعوض

لكن والله تعبان وانا فسرت كل حاجة فى التعليق فى مدونتك على بوست اللقاء

دمتى بكل ود

شاب فقرى

شاب فقرى يقول...

donya

ربنا يسعدك كمان وكمان

انا قايم اصلى الفجر

تحيااااااااااااتى

فقررررررررررى

شاب فقرى يقول...

donya

يارب يسعدك ويفرحك كمان وكمان

وفى انتظار تعليقك :)

تحياتى

فقرى

شاب فقرى يقول...

سومه...مجنونه فى بلد عاقل

لاء هرد طبعا

مش هى مش هنا دلوقتى

يبقى لازم ارد انا :)

الله يسلمك :))))

نورتى المدونة :)

شاب فقرى

شاب فقرى يقول...

سلمى

والله مش قصدى هجوم ولا مدايقة

بس انا على طول كدا فى التعليقات بحس انى على خط النار ولازم ادافع عن رايى :)

ههههههههههههههه

فمش تزعلى

وانا وضحت الموضوع وانتى رديتى اهوه يعنى متفقين فى المبدأ

تحياتى واحترامى لرأيك دوما

شاب فقرى