الأربعاء، 4 نوفمبر 2009

بوم بوم بوم



بسم الله توكلت على الله ربى ورب العالمين

الأيام دى هعمل حاجة بحبها أوى

السفر

بعشق السفر

والأكتر لو رايح أقابل حد أول مرة أشوفه وعارفه كويس

عندى مشوارين

الأول بكره الخميس

فرح أخت واحد صحبى فى طنطا

وطبعا لازم أروح وإلا هيقام عليه الحد وصحابى هيرمونى فى الترعة :D

الموضوع مفيهوش هزار وهما فعلا مجانين ويعملوها

وأنا مجنون بما فيه الكفاية إنى أسيبهم أما أشوف هيقدروا ولا لاء :)

بس هروح عشان أتجنب الموضوع بتاع الترعة لأنى صراحة لا بعرف أعوم ولا نيلة

ولا حتى بعرف أسوق

ومحدش يقولى إيه اللى جاب دى لدى

هوا كدا :)

تانى حاجة :

يا جماعة أنا خلاص قررت وعقدت النية والنية لله

إنى هروح لقاء المدونين :)

يوم الجمعة إن شاء الله

محدش يقولى هتسافر إزاى وإنته هتبقى راجع من طنطا متأخر وأكيد شغلك كله واقف والحركات دى

القلق مش من إنى ممكن أكون تعبان وأكسل أسافر

لاء لاء لاء أبدا

ولا القلق عالشغل إنه يبوظ فى غيابى والعملاء تلطم

لاء لاء لاء أبدا

ولا القلق عالحاجة إنها ممكن تزعل لو عرفت إنى مسافر يومين ورا بعض وهقضى اكتر من أربع ساعات عالطريق فى السفرية الاولى او التانية

لاء لاء لاء أبدا

القلق كله من إنى ممكن أقوم من بيتنا وأنزل وأركب المواصلات وأوصل المنصورة

وتلاقينى نسيت اللقاء ونسيت كل حاجة وعمال ألف هنا وهناك :D

والناس تتصل

ولا حياة لمن تنادى :D

عادى بقى

بالإضافة لأن فقرى سبق وعمل الموضوع دا قبل كدا :)

فلو روحتوا ومش لاقيتونى تأكدوا إنى بلف فى مكان ما حول المنصورة

اللى كان حلمى من زمان إنى أسافرها

سمعت عنها كتير أوى أوى أوى

طبعا عمرها ما هتكون زى القاهرة حبيبتى

اللى كلها زحمة وموتسيكلات وعساكر مرور وكماين وشباب واقفين عالرصيف بيبيعوا حشيش وكأنه عيش مدعم :D

لاء لاء لاء أبدا

أنا راسم لها صورة تانية خالص

المحمر والمشمر بقى والخرفان اللى هتدبح فى تحية للمعلم فقرى لقدومه أرض المنصورة

وكمان بقى الرمل اللى هيفرش الطريق من أول عبود لحد بوابة المنصورة

صحيح

عايز أحكى لكم موقف

أول مرة سافرت فيها إسماعيلية

أنا صراحة بحبها أوى أوى أوى

هناك عساكر المرور بنات على فكرة :D

يعنى وإنته سايق خليك رايق هتلاقى دايما حد مبتسم فى وشك

والمدينة جميلة أوى

لكن وأنا داخل إسماعيلية فى اليوم دا

لقيت يافطة كبيرة موت مكتوب عليها

مرحبا بكم فى عروس القناة الإسماعيلية

وشميت ريحة صرف صحى رهيبة

كنت همووووووووووووووت

لأن أنا منخيرى حساسة أوى ممكن أشم أى ريحة حتى لو خفيفة جدا

وممكن أعرف الأكل مسكر ولا حادق ولا دلع من ريحته بس :D

يعنى يا شيما لو فى أكل أرجو يكون متظبط :)

تحياتى أول وتانى

وندعوكم للقدوم للقاء المدونين

إلى كل مدون وخاصة مدونى الشرقية وكل واحد عارف انا موجه الكلام لمين :D

بس خلاص

هوافيكم بكره بملخص الفرح اللى هيكون جامد آخر حاجة

وبعده هوافيكم بملخص اللقاء التدوينى


والآن أترككم مع الأغنيه اللى بهديها لأى حد بحبه أو حبيته
والله زمان يا سلاحى لعبد الحليم حافظ :D
(( بجد حقيقة بسمعها للى بحبهم بس ))
خالص تحياتى
كان معكم
فقرى عبده فقرى
كرمللة

هناك 41 تعليقًا:

الشعب لابد له من حكومه تشكمه يقول...

القاهره هتنور والمنصوره هتضلم ان شاء الله:)
ايه باه الصوره اللى راسمها للمنصوره اصلى عارفه الصوره دى كويس اوىىىىى بما انى درست عندكو وشفت لطايف كتير منكو عن المنصوره(منكو اى القاهريين)

توصل بالسلامه ان شاء الله.على فكره بتوع القاهره هيكونوا فى عبود الساعه 7 الصبح ان شاء الله لو تحب تيجى معاهم..

فى اقتراح كده لو ينفع تنفذه.حرام انك ترجه مع من طنطا للقاهره ومن القاهره للمنصوره.ممكن تبات عند حد من اصحابك وتيجى من طنطا المسافه ساعه تقريبا.لان كده هيكون ارهاق جامد.

ponpona يقول...

أول مره ف حياتي آجي هنا بدري واقرأ البوست كله D:

تروح وتيجي بالسلامه من سفرك ، تعرف .. فكره السفر دي مغريه جدا ، أنا لو مسافره بافضل من قبليها باسبوع فرحانه ومبسوطه بالذات لو المكان ماعرفوش والناس اللي ها أقابلهم ماعرفهمش لأني باحس ان أي مكان فعلا هايبقي فيه ناس جديره بانها تدخل حياتك ودا لوحده شئ مغري بالاكتشاف .. ناهيك عن الشوارع . أنا بحب اتفرج ع الشوارع والمحلات والناس والقطط والكلاب اللي بيمشو ف الشارع باطمأنان تام يمكن ساعات أكتر كتير مننا

اهم حاجه بقي تقعد جنب الشباك

:))

Yusuf يقول...

صديقي العزيز

متزعلش مني لو مش متابع الفترة اللي فاتت

ربنا وحده اللي يعلم انا مضغوط ازاي ف الدراسة

بس انا سمعت باللي حصل لمدونتك وبقولك

لا تأسفن على غدر الزمان لطالما رقصت على جثث الاسود كلابا

وبالنسبة للقاء المدونين

ربنا يجمعكوا علي خير

تحياتي ليك دايماً

شاب فقرى يقول...

شيما
الشعب لابد له من حكومة تشكمه

القاهريين

آآآآآآه

لازم تعرفى إنى مش قاهرى 100 %

فلو حصل من أهل القاهرة حاجة فأكيد مش هتلاقينى زيهم :D

ايه

:|

سبعة الصبح كمان

يا ساتر يارب

بدرى أوى

ربنا يقدرنى وألحق أنزل بدرى

تحياتى يا شيما

جهزتى الأكل وإشتريتى الخرفان والدبايح ولا لسه :D ؟؟؟؟

ولا إرهاق ولا حاجة

دعواتك بس أكون رايق وتمام لأن الحال مش دايما بيكون تمام

وبالذات مع الإرهاق

دعواتك يا شيما

شاب فقرى

شاب فقرى يقول...

ponpona

نورتى المدونة

يالهوى :|

أول مرة تقرى البوست كامل :$

ماشى ماشى

ولا يهمك

المدونة كلها تحت امرك

أنا كمان بحب اقعد جمب الشباك

ويا سلام سلم بقى لو فى شوارع ولف فى حتت جديدة

لو تعرفى أى مكان فى القاهرة ممكن اكون منزلتوش قبل كدا قولى لى عشان انزل اتمشى لى بتاع كام ساعة هناك

أهوه نوع من التغيير :$

تفكيرك فى السفر نفس تفكيرى

:)

نورتى يا بنبونة

شاب فقرى

شاب فقرى يقول...

بوسف

ياااااااااه

بجد وحشنى تواجدك والله

هوا المدونة محصلهاش حاجة

دا واحد كان مقلد المسمى بتاعى بس :$

يارب نتجمع على خير دعواتك معانا

ياريتك تيجى معانا

تحياتى

الفقرى الكبير

خواطر شابة يقول...

في انتظار تدوينة عن الفرح الدي ستحضره دعني اتعرف من خلالك على الفرح المصري حيكون حاجة شبه اللي بنشوفها في الافلام ولا حاجة تانية وعموما تحياتنا للعروسين وربنا يتمم لهم بخير
بخصوص لقاء المدونين ان شاء الله تتجمعوا في الخير دائما

ميرام يقول...

(: (:
أنا طبعا صحيت بعد الانهيار امبارح ..
وقريت الرد على التعليقات الصبح ومالحقتش أرد على آخر بوست
دايما عندي واجب متأخر ):
("_

مافيش أحلى من السفر .. هو السفر اساسا بيسبب حالة سعيدة مابالك لو السفر يتبعه مناسبة حلوة

هنستني تعقيبك على الفرح واللقاء (:
بالتوفيق وان شاء الله مش هتنسى
(:

Asmaa mahaba يقول...

هو البوست اللى تحت دا نزل امتى:(

شاب فقرى يقول...

خواطر شابة

إن شاء الله ربنا يتمم لهم بخير


بس الفرح على عكس ما تتخيلى خالص ومستحيل يكون طلع فى اى فيلم تانى :D

ربنا يسهل :)

دعواتك معانا

ان شاء الله تيجى معانا المرة الجايه

تحياتى عالتواجد والمرور

شاب فقرى

ponpona يقول...

والله مش قصدي ان انا أول مره أجي اقرأ البوست كامل ، لأ .. انا لما باجي والله باقرأ بس ساعات بيبقي علي مرتين أنا قصدي أن دي أول مره ادخل أقرأ البوست كله مره واحده واحط كومنت وكمان ف الأول يعني مش بعد 98765 كومنت

أول مره أعمل دول مع بعض يعني

:))

بالنسبه للقاهره . فانا أكتر مكان بحبه فيها هو كوبري الجامعه والكليه وميدان التحرير وكنت كنت زمان باحب جنينة الحيوانات والله بس دلوقتي بقت سخيييييفه .. ماتروحهاش

Asmaa mahaba يقول...

ربنا معاك فى السفر يا رب وتروح وترجع بالسلامه
انا بقى الانسانه الفقريه الوحيده معلش اللى ححتكر الفقر فى النقطه دى بالذات اما جيت اسافر واسيب مصر اتنكدت مش فرحت وعملت للجميع زوبعه نكديه رهيبه
ويا اخى على الرغم من ان الشارع نضيف ومفيهوش زباله الا ان زباله مصر ليها طعم تانى:)

Asmaa mahaba يقول...

ربنا معاك فى السفر يا رب وتروح وترجع بالسلامه
انا بقى الانسانه الفقريه الوحيده معلش اللى ححتكر الفقر فى النقطه دى بالذات اما جيت اسافر واسيب مصر اتنكدت مش فرحت وعملت للجميع زوبعه نكديه رهيبه
ويا اخى على الرغم من ان الشارع نضيف ومفيهوش زباله الا ان زباله مصر ليها طعم تانى:)

سلمى يقول...

السلام عليكم
على فكره انا متابعه جيده لمدونه حضرتك ومن يومين بس قرئت بوست انا يتيم والنهارده لقيت بوستين نزلوا
حروح اقرء وارجع

شاب فقرى يقول...

ميرام

نورتى والله

فى شوية لخبطة فى التعليقات :$

بس مقدور عليها :)

إن شاء الله هكتب عن الفرح واللقاء

وكمان لو لقيتك مشغولة هبعتهم دليفرى على مدونتك :)

تحياتى على كل ما قلتى ولم تقولى

شاب فقرى

شاب فقرى يقول...

سومة

هنا البوستات تنزل أسرع من التعليقات

لمن يرغب فى المتابعة

ربنا معاه :D

مش بقدر ءأخر أى بوست لأنى لو أخرت يبقى مش هكتب خالص

تحياتى عالمرور والتواجد

ههههههههههههههههههههههه

فعلا الزبالة فى مصر ليها طعم تانى

مش زبالتنا واحنا اللى راميينها

غالية علينا برده

وترجعى مصر بالسلامة :)

شاب فقرى

شاب فقرى يقول...

ponpona

إذا كان كدا معلش

نورتى


كل الأماكن دى انا ياما لفيت فيها وميدان التحرير انا بحبه اكتر

وكمان بحب كوبرى قصر النيل أكتر ويا سلام بقى عالاوبرا والمنطقة اللى حواليها

ياما لفيت فيها وانا طفل :$

اه والله كنت طفل فقرى برده :D

نفسى اروح جنينه الحيوانات بس مش لاقى حد يودينى

بكره هفتكر مكانها فين وأروح بعون الله

تحياتى عالتواجد

شاب فقرى

شفـقــة و إحســــان يقول...

اهم حاجة يا فقرى انك تبارك للعروسة فى طنطا العروسة بس ها
اما بخصوص المنصورة فتبرع بذمة عايزين يجى 5 كيلو دم كده ها اتوصى
بجد احنا مبسوطين انك رجعت فتحت التعليقات تانى

بنت قلبى يقول...

ليه كده
مهوا كده هيبقا تعب عليك من طنطا والمنصوره
وكمان يومين ورى بعض
ياخوفى لما تيجى لقد الله يارب احنا الا انتبرع ليك بدمنا
علشان يبقا عيش ودم
يععععععععععع
هتنو هتنو هتنو بعد نور ربك طبعا لانى انا مش بكاشه
ويارب لعند كده تمام التمام وربنا يسترها على بكره
والف مبروك على الفح وعقبالك كده يارب

ميرام يقول...

لا لا ديلفري ايه
(:
أنا باجي أستلم الوجبة هنا
(:
حتى لو كنت مشغولة ..

ايه مالم أقل (:
.,(:

صحيح ..
أنا نزلت المود خلاص (:
الحمد لله
تحياتي ..
على ما قلت ومالم تقل (:

*البت المشمشية *حلوة بس شقية * يقول...

تروح وتيجى بلسلامة

سلمى يقول...

اولا البوست التانى حلو جدا
وعجبنى جدا طريقه عرضه
وحضرتك عندك حق فى كل كلمه حضرتك قولتها
والبوست الثانى
تروح وترجع بلسلامه
وان شاء الله تكون رحله حلوه
دمت بخير

كيكى عوووووو يقول...

لولوولوىىىىىىىىىىىىى
**الزغروطة دى حصرى عشان العروسةه**
مبروك
انا رأى انك تلبس كتافات احتياطى لازوم الترعه؟؟
وبخصوص انك تلف وانك متحضرش اللقاء خلى عندك امل انك تحضر نصه
عادى انا قبل كدة كان المفروض نتقابل فى مستشفى الهلال روحت دخلت مستشفى سكة الحديد ونبى مافاكرة اسمها اوى هى ولا لا المهم يعنى دخلت مستشفى تانى خالص ولقيت تجهمر كدة لناس قلت اكيد همه بكلم اصحابى انتوا فين مش شايفكم اكتشفت انى قاعدة فى حته تانية خالص
عادى
المهم انى وصلت يكفينى شرف المحاولة
!!!!1!
***انت بتحب حلمى بجنون كدة!!!

بيطرية ومش بايدى يقول...

الله الله انا بقول فى حاجة منورة فالبوست ده
ايوة كده هى الشرقية حبيبتشى
ايه ده ايه ده
طب ما انا كده منكن اصدق واجاى
يامعلم
احنا حوالى خمسة من الشرقية
عندك دموع القمر والزقردة بيطرية
وهبة ومين كمان
استنى كده هافتكر واجاى اقولك

بيطرية ومش بايدى يقول...

على العموم اولا الف مليووووووووووووون مبروك لصحبك وليك
وعقبالك ان شاء الله

ويا بختك ياعم بالسفريتين دول
انا عن نفسى عملت اكبر لقاء مدونين
ف العالم تجمع فيه اكبر عدد من المدونين
تخيل مين





انا ودموع القمر
شوفت قد ايه لقاء دولى فظيع
مش كده


يا بختكم بجد يحرق الدراسة اللى مكتفة الواحد ومش عارف ياخد راحته

أميرة علي كوكب مهجور يقول...

طنطا يا سلام خلاص تجبلي وانت جاي عسليه:)حجم عائلي مش اللي بربع جنيه:)

توصل بالسلامه ان شاء الله ونشوفك ع خير

Unknown يقول...

تحياتي على تلك المدونة الهادفة

وفعلمك في واحد خد البروفيل بتاعك وصورتك وعامل مدونة إباحيةوعلق عندي في المدونة باسمك

خلي بالك

ويبقى التواصل

جارة القمر يقول...

مبرزك لاخت صاحبك و ربنا يتمم بخير يارب

بالنوسبة للسفر بقى فلو حصلك حاجه اعرف انى هنا قاعدة بقر و احقد و احسد كمان ... ايه مش عاجبك مش مهم :P:P ههههههههههه انا بحب السفر اوووووى واكتر مكانين بحبهم الاسماعيلية بغض النظر عن رائحة الصرف دى و مرسى مطروح دى بقى بعشقهاااا اوووووووووى

تروح و تيجى بالسلامة

شاب فقرى يقول...

شفقة وإحسان
حمدا لله عالسلامة للمدونة من تانى :)
نورتونا والله

إن شاء الله هبارك للعروسة بس

أنا معرفش العريس

والصراحة عمرى ما شفت العروسة بس هبارك لها برده :$

وربنا يستر بقى فى التبرع بالدم دا

تحياتى

شاب فقرى

شاب فقرى يقول...

بنت قلبى

ربنا يستر يارب

والله انا مقلق مووووت

بس إن شاء الله خير

دعواتك معانا :)

بكش إيه بس إنتى وش ذلك برده :D ?

إن شاء الله عقبالى عن قريب كمان عشر سنين ولا حاجة كدا

تحياتى
شاب فقرى

شاب فقرى يقول...

ميرام

منورة

:)

والوجبة تحت امرك فى أى وقت :)

إحنا بس بنحاول نخدم

مودك نص حالة :(

ربنا معاكى ويفرحك بالنص الحلو لحد ما تبقى حالة كاملة :)

وتحياتى لما قلتى :$

شاب فقرى

شاب فقرى يقول...

البنت المشمشية

دعواتك

شاركى بأى حاجة فى اليوم المبارك دا :)

شاب فقرى

شاب فقرى يقول...

سلمى

نورتى المدونة وأسعدنى تواجدك

فقرى يحييكم من الجمهورية الفقرية

:)

يارب تكون رحلة سعيدة يارب

ويارب يسعدك :)

تحياتى

شاب فقرى

شاب فقرى يقول...

كيكى عوووو
شكرا عالزغروطة ونردها لك فى الأفراح

هيقفشونى لو لبست كتافات

دعواتك بس عشان دول أيديهم تقيلة أوى :)

اه بحب حلمى أوى كدا :)

تحياتى لتواجدك المميز

شاب فقرى

شاب فقرى يقول...

بيطرية اللى منورة الشرقية كلها :)

فعلا أكبر لقاء تدوينى

ربنا يديم صداقتكم وسعادتكم يارب :)

ويهديكم ويوفقكم للخير :)

مش هدعى عالدراسة عشان بحبها :$

تحياتى عالتواجد

شاب فقرى :)

شاب فقرى يقول...

بيطرية

صحيح

حاولوا تنوروا اللقاء اليوم دا

مش بعيدة عليكم يعنى :)

تحياتى

الفقرى الكبير

شاب فقرى يقول...

أميرة على كوكب مهجور


يااااااااااااه بس كدا

أنا فى مرة نزلت أشتريت ب حوالى 80 جنيه حمص وحلاوة

ومش عايز أقولك بقى وزعت عالعيلة وعيلة العيلة والحبايب والقرايب

ولحد دلوقتى فى حمص فى البيت :D

هجيبلك حلاوة عينيه بس كدا :)

بس الحساب هيبقى باليورو

لأنى بسافر بيها وبعدى جمارك وحاجات كتير أوى :$

تحياتى عالتواجد

شاب فقرى

شاب فقرى يقول...

معتز شاهين - باحث تربوي

أنا ملاحظ الشخص اللى عامل مدونة شبه بتاعتى وإسم زى بتاعى بالظبط

دع القافلة تسير والكلاب تعوى :)

تحياتى على تواجدك وعلى رأيك فى المدونة

أنا نفسى أقرا فى المجال التربوى

بس للأسف مش لاقى وقت

تنصحنى أقرا لمين وأجيب كتب إيه ؟؟؟

شاب فقرى

شاب فقرى يقول...

جارة القمر
أنا بعشق إسماعيلية جدا جدا جدا :)

بس لسه مروحتش مرسى مطروح

فى الخطة الجايه بعون الله :)

متحاوليش تقرى وتحسدى عشان أنا عندى كمية فقر مش عند حد

وعلى راى المثل ضربوا الاعور على عينه قال مش فاكر إيه كدا

وقال هيسخطوك يا قرد هيخلوك إيه يعنى :D

الحسد مينفعش معانا

تحياتى لمرورك

شاب فقرى

فراشة يقول...

ايه دا....انا جيت متأخر خالص

السلام عليكم ...ازيك يا فقري
ربنا يتمم لاخت صديقك بخير يارب ...وعقبالك بالزوجة الصاحة

رايح طنطا ..wow وحشتنى والله آخر مرة رحت لوحدي فضلت أمشي ف الشوارع ومعرفش انا رايحة فين ولما تعبت سألت فين المحطة ورحت مشي

ولقاء المدونين ... ان شاء الله يبقى لقاء جميل وتفرحوا كلكم فيه وتتبسطوا خالص كمان

فراشة

أسما يقول...

لقاء مدونين؟ و في المنصورة؟ عيب و الله... انا قلت لك قبل كدة ان انا من المنصورة؟ بص هو انا مخلط، بابا مامته من المنصورة و اتجوزت راجل صعيدي جدع اللي هو جدي، و بعدين قام بابا رد التحية و راح متجوز واحدة زي القمر من المنصورة، اللي هي مامتي، و قاموا خدوا جزاءهم كلهم و خلفوني هع هع هع

عموما، انا رحت المنصورة كتييييييييييير، و امتحنت آخر امتحان عشان المنحة اللي انا فيها دي في نايل آكاديمي هناك ف يناير اللي فات، يعني في عز البررررد و قبل ما اسافر امريكا رحت المنصورة ليلة واحدة بس عشان ابوس علي ايد نينة و اسلم علي خالاتي قبل ما سافر... يا بختك اذا كنت رحت هناك قريب، انا من موقعي هذا بحقد عليك
:)