الثلاثاء، 3 نوفمبر 2009

جبهة الجدعان الشعبية (( أنا جدع )) بيان التأسيس


أولا وقبل أو أبدأ كلامى وأقول أنا جدع
تحياتى إلى كل مدون وكل شخص وحيد
لا يجد من يسانده سوى نفسه
لا يجد من يقف بجواره وينصحه فيناقش نفسه ويفكر فى صمت

وإلى كل حزين وإلى كل إنسان خذله كل من حوله
ووجد منهم بدلا من المسانده صد ومشاكل وهم ما يتلم

شاب فقرى

بسم الله نبدأ
هنا جبهة الجدعان الشعبية نعلن بيان التأسيس
وكل ما فيه يعتبر قانونا لا جدال فيه ولا مناقشه ولا حد يقدر يفتح بقه
غير عشان ينضم معانا ويقول أنا جدع :D

جملة أنا جدع هى جملة إعتبرها المصريين جملة يقولها الفاشلين فى حياتهم
اللى بيشربوا ويسكروا ويمشوا بليل فى الشارع يقولوا أنا جدع
تحت شعار إنهم كدا تخلصوا من كل الهموم
هنا وبإختصار شديد نتعاطى أفخم أنواع الخمر
وهوا الحلم والطموح والحب للطرف الآخر والعشق للوصول لما نحب

فهذا من وجهة نظرى ما ينسينى همومى وينسى بقية أعضاء الجبهة همومهم
وينسيهم أى ظروف زى الزفت ومشاكل زى الهباب
ومن الآخر أنا جدع :D

تنص جبهة الجدعان الشعبية على اللوائح والقوانين التالية إقرأها بعنايه :


أولا :
ليه دايما بنظن أن الموت هوا نهاية كل شىء ؟؟
مستحيل يكون الموت هوا كل شىء
يعنى حتى فى وفاة والدى إ
فتكرت إنه لما مات كل حاجة خلصت
لكن فوجئت بأن من التراب وإلى التراب نعود
وفوجئت بقوى خارقة جوايا بتحركنى وبتقوينى وبتقولى فى هدوء
إشتغل ,,,, إتعب ,,, إتعب كمان وكمان ,,, هتوصل يا عبيط ,,, إيه يعنى سابوك ولسه لوحدك
طز فيهم بالعربى وبالإنجليزى والتركى والهندى والعبرى وكل لغات الكون
هوا يعنى لما أصاحب واحد تلات سنين
وفجأة يبطل يعبرنى ولو حتى بميسد كول خلاص يعنى هموت؟؟؟
ولا لو والدى مات خلاص هروح أبات هناك قدام القبر وأبكى فى صمت
وأقعد هناك لحد ما أموت أنا كمان
ياترى دا هيعجبه؟؟؟؟ طبعا لاء
ياترى لما أحكى ذكرياتى لأولادى الحلوين المسكرين أقصد بناتى طبعا لأنى بحب البنات أكتر من الصبيان :D
هل هقعد أقولهم أنا مريت بلحظات ضعف ووحدة وعزله وخوف وبتنجان ؟؟؟
هعقدهم فى حياتهم وأخليهم يلعنوا اليوم اللى بقيت فيه أبوهم ليه ؟؟؟
لازم يكون فى حاجة خاصة ومهمة وخطيرة
لازم يكون الماضى ما هوا إلا دفعة للأمام
لازم يكون كل واحد فينا أقوى من بكره ومن الظروف
إيه يعنى معكش فلوس ولا قعدت أربع شهور ميدخلش جيبك جنيه
لحد ما صرفت كل مليم معاك وكمان إستلفت وعمال تظبط فى كل حاجة عشان المركب تستمر
إيه يا كرمللة ؟؟؟ وإيه ياعم الجدع ؟؟ و إيه يا أختى الجدعه ؟؟؟
ما هى دى الحياة يا معلم ....
إيه يعنى صاحبت واحد ودخلته بيتى وكان معايه حوالى تلات سنين
وبعدين إختفى
أو صاحبت واحد وقعدت معاه سنة ونص وساعدته بكل اللى تقدر عليه
وقلت له قدام الدنيا كلها إنته أخويا
وفجأة
فى يوم جه قالك أخوك مين ياعم روح إلعب فى الطين :D
إيه يعنى يا جماعة ؟؟؟ ياترى هى دى نهاية الكون ؟؟؟
ولا هوا ربنا خلقنا عشان نحط إيدينا على خدنا طيب نبدأ من البدايه براحة كدا ؟؟؟
هوا ربنا أصلا خلقنا ليه ؟؟؟؟ ليه أوجدنا فى الأرض وأوجد كل السبل عشان نقدر نعيش ؟؟؟
العبادة وعمارة الأرض
أنا سامع صوت واحد بيقولى أنا بصلى ياعم مش كفاية صلاة إيه بس ؟؟
الصلاة ما هى إلا تواصل بين العبد وربه
لكن الدين معاملة يعنى إيه ؟؟؟
يعنى تعامل الناس حلوين أو وحشين أو حتى ولاد ستين تيت
وتعاملهم كويس حتى اللى عايز منك مصلحة أو اللى فاكر إنه بيخدعك
شوف العبيط تخيل إنه بيخدعك لفترة وإنه هوا اللى بيحركك
ياعم إستمر يا بنتى فوقى إستمرى رغم كل شىء
هوا أنا لو خانى واحد صحبى ولا حتى إنضربت بالنار خلاص ؟؟
خلصت الحياة يعنى ؟؟؟
فى ستين داهية يا معلم أنا عن نفسى ماشى بمبدأ (( اللى ميقدرنيش ... ميلزمنيش ))
يعنى لو مش قدرتنى
وعرفت إنته بتتعامل مع مين وعرفت إنى بنى ادم مش شاشة بتكلمك فى المسنجر وقاعدة بتضحك معاك وتهزر
يبقى ساعتها مش هحترمك ولا هعبرك ومفيش غير الشوز
لكن لما تقدرنى يا عمى هشيلك على راسى
لكن إن بقى تفتكر إن إنته نهاية الكون لاء يبقى إنته لا مؤاخذة عندك عته وكمان تخلف عقلى
دا ملخص أول نقطة لو صاحبك إكتشفت إنه خانك أو مش بيقدرك
طز إيه يعنى ,,, لينا رب هنتحاسب قدامه كلنا يوم القيامة
وساعتها هتترجانى عشان أسامحك ويمكن ساعتها ربنا يخلينى أسامحك
وتكون سبب فى دخولى الجنه
لكن حاليا ,,,, إنته متلزمنيش
خلاص قفلنا الباب روح شوف حد تانى تضحك عليه
خلاص أنا فقستك يا معلم
يلا طير بقى
ثانيا :

لو بتحب واحدة ومعبرتكش أو مفهمتكش بالقدر الكافى أو بالنسبة لها إنته مجرد إستبن
أو لو بتحبى واحد ومستمرة معاه رغم كل القرف اللى شايفاه منه فى المعاملة وإنك مجرد كنبه
يبقى خلاص الحب مش موجود ...
وإنته أديتنى كل العوامل اللى تخلينى أسيبك ومش أعبرك
يعنى تبهدلنى وأسكت لك ؟؟
أبقى فى حضنك وبتفكرى فى غيرى أو مش عارفة قيمتى
أو بتفكرى وبتقارنى بينى وبين حماصة
لاء معلش أنا بنى آدم مليش مثيل آه وربنا مليش مثيل
يعنى إذا مكنتش يابن الحلال أو يا بنت الناس هتحافظى عليه وتعاملينى كأن أنا مركز الكون
وإنى بعد ربنا
وإنى حبيبة القلب اللى فوق أى إعتبار
يبقى خلاص لازم نفترق يعنى من الآخر
لو مفيش حب صادق يبقى ليه نكمل سوا ؟؟؟؟
غاويين وقف حال ؟؟؟؟؟
وخليك فاكر مبدأ شاب فقرى (( صدقنى اللى يفرط فيه دايما هوا الخسران.... حيران أزعل عليه ولا أنفض مش فارقه يا مان كله بتنجان ))

ثالثا :
أنا فعلا بنى آدم مفيش ليه مثيل
مين قال كدا ؟؟؟؟ أنا بقولك أهوه آه والنعمة عندى حق
أفتكر مدرس كان عندنا فى الثانوى
كتبنا مرة لوحة عليها إسمه غلط بالقصد
وبدل ما نكتب عبد الخالق السباعى .... كتبنا عب الخالق ثروت :D
طبعا الراجل شاف اللوحة قال الكلمتين دول قال:
يا ولاد عبد الخالق ثروت أحسن منى فى حاجات
هوا كان رئيس وزارة وراجل ميه ميه وعمل كتير لمصر ولا معملش
لكن مش هوا عبد الخالق السباعى
أنا ربنا مخلقش منى إتنين
وكمان أنا قد أكون متميز عليه فى اخلاق أو فى حاجات تانية
ربنا أعلم بيها أنا منفرد ومتميز ومفيش منى تانى فى الدنيا
يعنى أنا ربنا لما خلقنى مفيش حد زيى والكلام دا ينطبق على كل الناس
من أول عم عبده البقال وتامر الزبال لحد عبد الجبار رئيس شركة زعبولة للإعمار :D
كل واحد فيهم مميز بحاجة ربنا خلقها فيه هوا وبس
ممكن يكون إحساس او أخلاق أو طبع أو شكل
أو حتى نظرة عين
عارفين حتى نظرة العين بتفرق
أنا مثلا ممكن أبص لحبيبتى نظرة واحدة بس
تحسسها إنها ملكة الكون و إن مفيش منها مثال وإنها عشقى الأول والأخير
وإنها حبيبتى وروحى وإنى مقدرش أعيش من غيرها
كل دا فى نظرة
ممكن واحد يبص نظرة
أو يقول كلمة تغير ملايين
وهنروح بعيد ليه فى ناس غيرت مسار ومجرى التاريخ بكلمه
الناس دى مفيش منها إتنين
أكيد إنته كويس ومفيش منك إتنين
متحاولش تقنع نفسك إنك معفن بأى شكل كان
لأن أكيد أنا عارف قيمتك وعارف إنته مين
ومتحاولش تقنعنى إنى شخص عادى وإنك هتلاقى حد تانى زيى
أنا مفيش منى إتنين أنا شخص خلقه الله وأبدع فى خلقه :) فلك الحمد يارب العالمين
رابعا :
الناس الحلوين اللى زى حالاتى اللى عايشين فى وحدة
اللى ملوش صحاب ولا بيخرج حتى ولا بيصاحب حد ولا ليه أى حاجة فى الدنيا غير نفسه
هل فاكر إن دا هيأثر فى مسيرتك
يا عمى إنته هتكمل وهتكملى برغم كل شىء
لازم توصل للى إنته عايزه
حتى لو مفيش عوامل مساعدة وإنته خريج معهد البتنجان لفن الأشكال والألوان
ومفيش فلوس وإنته مكحرت وعيشتك آخر ضنك ومش لاقى تجيب كانز تشربه فى البلكونة فى الهواء الطلق وتحس إنك زعيم الدنيا
ياعم لو حتى مفيش بلكونة
هل هتسكت وتقف وتقول أنا لوحدى وانا لازم ألاقى بنت الحلال ومش هبدأ غير من غيرها ؟؟؟
ومش هعمل أى حاجة غير عشان حبيبى لما ألاقيه هلبس الحجاب وهحفظ قرآن وهظبط حياتى وهبطل أى حاجة غلط
طيب وبعدين ؟؟؟؟
ياترى لما هى تلاقيك معفن كدا هتقرب منك من الأول
ولا ياترى لو هوا لاقاكى بالضعف دا هيقتنع بيكى إن أنتى اللى هتربى عياله وهتسهرى على حاله ومحتاله
؟؟؟
لازم تكون أحسن واحد فى الدنيا فى نظر نفسك عالأقل وتقتنع بدا وتحاول تضنع المستحيل حتى لو معندكش مكنة تصنعه إعملها على إيدك وطير يا معلم

متحاولش تقف أبدا أيا كان السبب الحياة لا تنتظر والوقت كالسيف وتأكد إنك فى الدنيا عابر سبيل
يعنى شوية وهتسيبها
هتقول لربنا أنا كنت بصلى يارب وبعامل الناس كويس وراجل سكرة
طيب والهدف التانى يا معلم
هتقوله أنا معمرتش الأرض أصلى كنت لوحدى
وملقتش حد يساعدنى
فوق كدا وظبط وإنسى أى ظروف منيلة وتقبل الواقع فى محاولة لتغييره
بس مش تتف عليه وتقولى بلد بنت كلب عشان مزعلش منك.


خامسا :
أنا مكتئب وحالتى زفت
طيب وبعدين لما إنته مكتئب الحياة هتتدمر الزمن هيقف والقيامة هتقوم ؟؟؟ أبدا
الناس هتسيبك زى الجزمة لحد ما ينصلح حالك واللى بيحبوك هيحاولوا يفوقوك
يبقى من الأول تقوم وتقف على رجليك يا معلم وعلى رأى شيما
(( قوم نفض هدومك ))
يعنى لازم تقوم وتقف على رجليك
ومش تسمح للإكتئاب يخش حياتك
هتقولى كل يوم بصحى بروح الزفت الكلية أو الشغل أو أعمل نفس الحاجات ؟؟؟
ما أنا عندك أهوه قاعد على قدام النت بقالى كام سنة وشغال وماسك أعصابى
ومش بخرج ولا بروح ولا بآجى وحالتى ميه ميه ومحبوس فى أودتى صحيح
بنزل كتير وبخرج وبتفسح
بس عشان تطلع من أى مود ممكن يسبب لك كآبة
من الأخر لو بتصحى بدرى عشان تروح الشغل نام بدرى أو نام متأخر
وإعمل أى تغيير
إن شاء الله تقوم الصبح بدل ما تغسل وشك وتفوق
تخرج كدا معفن آه والله ليها طعم مميز (( أصلى جربتها ))
إمشى من طريق تانى وغير الطريق اللى بتمشى فيه
بدل ما تركب للشغل كل يوم عربيتك دا لو ربنا كارمك ومعاك عربية
إمشى يا معلم وإوصل متأخر وخد جزاء
أهوه أى تغيير ولو حتى زفت بس تغيير فى اليوم الحلو بتاعك
عشان مش تزهق
مش تتخيل أنا بغير أودتى اللى بشتغل فيها بقالى كام سنة إزاى
كل يوم اجيب كرسى وأقول هوا دا اللى هشتغل وأنا قاعد عليه
ويوم تانى أقول لاء الكرسى دا وحش وإبن تيت
وأقوم أجيب غيره كسرت لحد دلوقتى تقريبا ست كراسى
مبقاش غير كراسى الأنتريه بس الحاجة قافشه ومش عايز أجيب واحد منهم أشتغل من عليه :D
كمان بدل ما الأودة مرتبه ومنظمة غير المود وغير النظام
بعتر كل حاجة
دعوة للبعترة والتغيير
حتى البعتره والتغيير ليها طعم
قوم هات ورقة وقلم وإقعد شخبط شوية
عمرك جربت تشخبط
وإنته عندك كامل الثقة إنك مبتعرفش ترسم وحمار فى الرسم زى حالاتى ؟؟؟:D
إقعد أكتب خواطر
هتقولى مبعرفش
أقولك والنعمة ولا أنا بس بعك
جرب تكتب شعر
وتحكى عن حبيبتك وحلمك والشغل وعم عبده بتاع الطعميه اللى حطلك طرشى زيادة النهارده
أهوه أى نوع من التغيير
يطلعك من مود القرف والإكتئاب
لو تعرف أنا بعمل إيه ؟؟ هتنبهر
أحيانا ممكن أنزل أدور على أى حاجة أشتريها ولو حتى باكو لبان أو علبه ( أم على ) أو كريم كراميل
وجرى عالمطبخ
أينعم المطبخ بيبقى عامل زى أما يكون حصل فيه الحرب العالمية الستين بعد ما بخلص
بس بعمل تغيير جرب حاجة جديدة
جرب تأكل من إيدك
أقولك على حاجة أجمد
إنزل وحاول تساعد الناس وخليك حشرى
تعرف إنى فى سنة من السنين كنت بركب المترو وأكلم نفسى لحد أما ألاقى حد يعبرنى ويكلمنى :D
آه وربنا حصلت وفى السنة دى إتعرفت على ناس بالهبل
واحد إسمه صفيان من العراق وجاى يدرس فى مصر وواحد تانى شغال فى مكافحة المخدرات :D
وغيرهم كتير
إعمل أى حاجة متبقاش برطة وتقول أنا مكتئب
أو أنا قرفانه أصل وبعد ما تكتئب مفيش فايدة ولا حل
ولا أى حاجة هتعود عليك من الإكتئاب الرائع وكمان لما تقرر تقفل المدونة
أو تقرر تقفل الميل وتبطل تخش تكلم حد هتستفيد إيه يا عبيط :D ؟؟؟؟
هتعيش لوحدك ؟؟
طيب ما إنته حواليك ناس زى الفل إتعامل معاهم ومش تخسرهم ولا تبعد عنهم
لأن يابنى الصحاب دول زى الرزق فى الدنيا ممكن يكون نصيبك فى حياتك كلها إتنين بس وتصاحبهم تلات تيام ويختفوا بعدها من حياتك والباقى كله يبقى سيس
فحافظ على صحابك وقدرهم وخليهم يعرفوا قيمتك
سادسا وليس عاشرا :

أنا عارف إنكم زهقتوا من البوست والقرايه
بس برده لازم تكمل لأن الموضوع يستاهل
وحياتك دى مش لعبة ومش ينفع تمر بالساهل كدا
وإنته قاعد زى العبيط مكتئب أو عايش فى صدمة
أو حزين على رحيل حد أو زعلان على فراق أى شخص بالموت
إنتم عارفين إيه هى أصعب حالات الفراق ؟؟؟
إن الناس تفارقك وهى عايشة مش تموت
يعنى انا بتخيل لو أبويا دا الله يرحمه
كان سابنى وبطل يعبرنى وقالى خلاص أنا مش عايز أعرفك تانى
والله دا أنا ممكن كنت أدفن نفسى فيها
إنما لما مات أرحم لى وأحسن لى
صحيح مريت بألف موقف العن من بعض وتعبت وكافحت وزهقت وإشتغلت وحبيت وخاصمت وصالحت
بس الحمد لله عايش وراضى وباخد نفسى

سابعا :
إنته تعرف ربنا انعم عليك بكام نعمه
أنا مش هقولك كام نعمة ولا هقولك كام حاجة مميزة فى حياتك
هقولك لما بتبتسم أو بتضحك
تخيل إن عضلات الوش مش عارف كام عضلة كتير أوى
تخيل لو عضلة واحدة بسسسسسسسس وقفت هتعرف تضحك ؟؟؟
فما بالك بقى بوالدك ووالدتك وأهلك وصحابك والبنت اللى بتحبها
وعينيك وشفايفك ونفسك وإيديك وغيره كتير
لو قعدنا نعد مش هنخلص ليوم الدين
دا عشان بس تأخد نفسك بيحصل فيها جوا جسمك ألف مليون حاجة لحد ما النفس بيخرج
كل دا فى لحظة وإنته ولا دارى
ياريت تعرف نعم ربنا كويس وتؤدى شكرها
وتتدبر وتقول يارب أنا بحبك
ونفسى أكون جمبك وقبل دا كله أرضيك
رغم كل الظروف الطين برده هرضيك
رغم كل الناس اللى ماتت وكانوا غاليين عليه دا قضاءك يارب وأنا راضى بيه وبرده هرضيك
رغم كل صحابى اللى خانونى هرضيك
رغم إنى واقع فى مشاكل ملهاش حصر والكدب والنفاق والغش هيطلعونى منها بس هفضل فيها وأقول الحق وهرضيك يارب أنا بحبك
ثامنا :
إنته من الآخر إتظلمت ,,إتفحتت ,, إنضحك عليك ... وكمان أخدت على قفاك
حد بهدلك وطلع عينك وخانك وباعك ومرمطك وخلاك متسواش نكلة قدام نفسك
حسسك إنك عبيط وإن إنته معرفتش تختار لا صحاب
ولا حتى عرفت تختار حد يحبك
خلاص سيبه لصاحب نصيبه
فى حالتى يا صاحبى مش بسيبه ممكن أخليه يندم عاليوم اللى إتخلق فيه
أو يندم عاليوم اللى فكر فيه إنى عبيط
وممكن برده أسامحه والحياة تستمر
عارفين لو الواحد فكر فى السماح والتسامح بشكل عام
هيلاقى غنه لما بيسامح الناس بيكسب هيطلع واحد يقولى كسبت إيه يا عبيط
هقوله كسبت إحترامى لنفسى عالأقل
لو هوا محترمش التسامح دا أو هوا مفهمش اللى عملته عشان خاطره يبقوا هوا اللى عبيط
وساعتها أقدر أقول انا إنسان هوا اللى جوايا دا الإنسان اللى ربنا خلقه الكائن الجميل النضيف الطاهر الحلو اللى بيسامح وبيعمل كل حاجة حلوة
تاسعا :
لازم عشان تبقى جدع وتكمل مسيرتك وتبقى شاطر وناجح فى حياتك
مش تدوس على حد
ولا تهين حد ولا تهزق حد
ولا تبيع حد عشان خاطر مصلحة أو مكسب حتى لو هتبقى فيها رئيس جمهورية

لأن ساعتها هتفتكر الراجل اللى أنا دوست عليه عشان خاطر مصلحتك
وتحس إن نجاحك كله غلط وحرام فى حرام
وإنك عبيط لإنك جرحت الشخص دا وأهنته

وكان ممكن تكمل مسيرتك من غير ما تدوسه أو تهينه

كمل مسيرتك وإنته حافظ مركزك وعارف مقامك وعارف مكانك فين
من غير ما تبهدل حد أ تظلم حد

لأن الظلم ظلماااااااااااااات يوم القيامة
ربنا يستر علينا منه


عاشرا :
لازم عشان تنضم لجبهة الجدعان الشعبية
تقوم ناو وتغسل وشك وتشرب كوباية ميه ساقعه فى عز التلج دا

وتقول بأعلى صوتك أنا جدع
وتوعد نفسك تكمل مسيرتك وتوصل لهدفك أيا كان
سواء كان بنوتة بتحبها توعد نفسك إنك هتحافظ عليها وهتحطها فى عنيك ومش هتخونها وهتقدرها
سواء كان شاب حليوة بتحبيه تقومى توعدى نفسك وتقولى يارب أنا مش هعصيك أبدا وهحافظ عليه وهحبه وأحترمه وعمرى ما هعيشه فى نكد (( بليز يابنات عشان الرجاله متطلعش من هدومها وتلبس حلل فى دماغها ))
سواء كان شهادة أو وظيفة يبقى تقوم تذاكر إيه اللى مقعدك معانا ياض :D

وتجتهد على قد ما تقدر وتبهدل نفسك إجتهاد وتتعب نفسك أكتر من المعقول
ومش تسيب فرصة للظروف إنها توقفك
سواء كان حلمك كبير أو حقير
توعد نفسك على طاعة ورضا ربنا
وإنك هتفضل طول عمرك فقرى .. قصدى جدع

إنتهى بيان التأسيس
هل من منضمين للجبهة ؟؟؟؟
خالص تحياتى

مؤسس وزعيم جبهة الجدعان الشعبية
شاب فقرى
كرمللة :D

هناك 73 تعليقًا:

شاب فقرى يقول...

التعليق الأول محجووووووز

لفتاة

بنوتة

هادية

تتقن لغتى الوحيدة

واحدة وخلاص

الشعب لابد له من حكومه تشكمه يقول...

على كده انا جدعه من زمااان:)

بس ماليش مزاج اشرب ميه باكل موز تاخد موزه؟؟؟؟:)

شوف يا مستر انت دلوقتى تفتح اى مدونه تهب فى وشك رياح الاكتئاب والاحباط واليأس متفهمش حد رش حاجه فى الجو او دعى على شباب مصر روحوا اللهى يارب متفرحوا مثلا...
وعلى فكره انا اكتر حاجه بكرهها فى حياتى الطبطبه يىىىىىىىىىىىى مبدا الطبطبه ده سخيف وملوش معن...وتلاقى كل واحد عمال يرثى نفسه وليه اتعمل فيا كده وليه وليه...
متقوم تقف على رجلك كده وتخليك راجل وانتى خليكى بنت مش اى كلام.,,
اتوجعتوا وايه يعنى لا انتو اول الناس ولا هتكونوا اخرها..
انا عارفه ان كلامى قاسى,
,بس دى الحقيقه لا اكتئابك هيفيدك ويحللك مشاكلك بالعكس هتتألم وتتقرف اكتر يباه ايييييييييييييييييييييييييييييه؟
ايون تنفض هدومك وتقوم....وابتسم وقول وايه يعنى:)

فكرتنى زمان اول مفتحت البلوج عندى لقيت كل الناس مكتئبين روحت نزلتهم بوست هيا بنا نكتئب:)

وقلت زيك لو مكتئب اعمل اى حاجه انشاالله تجيب نمله وتكلمها وتقولها انتى يانمله قوليلى مذكر نمله اييييييه؟:)

شاب فقرى يقول...

شيما

ايه النور دا يا خواتى

اهلا برياح المحمر والمشمر

انا مش هاكل من بكره زى ما قلت عشان لما اجى اعرف اكل بجد

والله حاجة غاظتنى وخليتنى احس بالناس أوى

بزعل لما بشوف حد مدايق

وبالذات لو إنسان طيب

انتى فعلا قاسية

أيوووووووووووووووون
قاسية :D :) :)

وماله لازم الواحد يبقى قاسى عشان يحاول يفوق الناس من غير ما يغرق فى همومهم

قولى أنا جدعة وهاتى لى صباع موز

أحسن الحالة طالبة موز خالص :$

بالنسبة للنملة

قالتلى بس حلفتنى مقولش لحد :D

:P

نورتى يا شيما

صباح الورد

فراشة يقول...

السلام عليكم

امممممممم ..أقول ايه أرد إزاي
بص انا المفروض أرد على كل نقطة
بس انا جعانه وعايزة انام

بس مبسوطة قوووي انى قريت البوست قبل ما انام ...يعنى هحلم بكل الكلام دا
بس تعليق صغنن قبل ما أمشي

"انا بنضم وأقول انا جدعو هكمل وأحقق هدفي لحد ما آخد الدكتوراه وأفيد بلدي بحاجة"
وأوعد اللى هيبقى زوجي ف يوم الله اعلم امتى "إنى بحبه من دلوقتى ولحد آخر عمري وهكون ليه زوجة صالحة وأراعي فيه ربنا"

تصبح على خير ولي عودة اخرى

الشعب لابد له من حكومه تشكمه يقول...

صباحك سكر زياده:)
ايون انا عاوزاك متاكلش علشان تيجى يغمن عليك عندنا ان شاء الله وندور على حد يتبرعلك بالدم:)...


لا انا مش قاسيه انا شيما:)

ربنا يسامحك دنا حتى حونينه :) ههههههه
فكرتنى بواحده صاحبتى قعدت تحب فى واحد 8 سنين وكان يعرف عليها فى السنه حوالى 3 بنات دا فى المتوسط ويسيبها ويرجع ويسيبها ويرجع ويقولها اصلى مريض بالبنات:)
وتيجى تحكيلى وتتشحتف وتنهار وانا ابصلها بكل هدووووووووووء وبعد متخلص كلامها ابصلها وابتسم واقولها كلمه واحده:
تستاهلى:)(عمرك شفت اساوه اكتر من كده:)

بعد 8 سنين وبعد مسابته افتكرت تسالنى ايه تستاهلى دى؟ قلتلها :
علشان مبداك فى الحياه اخد بالجزمه واسكت..

من الاخر:
اللى يحب ميجرحش ,اللى يحب ميخونش,اللى يحب ميكأبش قلب حبيبه,اللى يحب يخاف على مشاعر اللى بيحبه من نظره مش من كلمه...

وعلى فكره دا راى سواء كانت صداقه او حب او زماله او اى علاقه انسانيه..

طالما جرحتنى مع السلامه ومفيش ندم وانا الكسبانه لانى متعوضش:)

طبعا لاحظت ان (ثالثا اللى انت اتكلمت عنها ) متضخمه عندى ههههههههههه مش غرور والله بس تقدر تقول انا شايفه انى اللى يخسرنى بيخسر كتير اوى:) لا والمصيبه باه انها خساره للابد اصلى مش بسامح ابداااااا:)
قاسيه قاسيه:)
بس انا شايفه انى طالما انا مش بجرحك ومش بضايقك مش من حقك انك تضايقنى...

تصدق دا قلب غرور:)لا غرور اوى يععععععععععع:)

بس انا مقتنعه بكده.....
الموز خلص تاخد يوسفى:)

شاب فقرى يقول...

فراشة

نورتى

يارب يحققلك كل اللى بتحليمى بيه وتوصلى للدكتورة وتفيدى بلدك أيا كان فى إعتبارك هى إيه
ويوفقك ويرزقك بإبن الحلال اللى يريح بالك ويحافظ عليكى

شاب فقرى

شاب فقرى يقول...

شيما

صباح الإشطة

ماذا هنالك ياترى ؟؟؟

كل دى قساوة

دا انا ممكن اعمل اكتر من كدا

احلى حاجة لما ببقى قادر اقسى واكسر وادمر واسامح فجأة

صحبتك دى مش تجيبى سيرتها لأنى بزعل لما بشوف بنات بالطيبة دى بيقعوا مع شاب تعبان زى دا

وكمان لا مؤاخذة يعنى

هى تستاهل :D

انا واثق فى نفسى اكتر منك والله يا شيما

وناس كتير قالت لى انته مغرور وبتاع

بس أنا عارف قيمة نفسى كويس أوى

خايف أقولك هاتى يوسفى تقولى لى خلص

خلينا فى الموز أنا عايزك تنزلى تشترى ناو

أيوووووووون ناو

غلاسه كدا

مليش دعوة بقى

متخافيش إحنا جامدين قوى

يعنى لا هيغمن عليه ولا حاجة

ربنا يستر

بلاش الفال الفقر دا

كفاية الفقر اللى انا فيه :$

ولا ايه ؟

هتنضمى للجبهة ولا هتعارضى ؟؟؟

ميرام يقول...

):
انا كده مش هعرف أرد على ايه ولا ايه
(:
بس حالا حالا ...
عايزة أقول ..
ايه تدفق الأفكار الرهيب ده ماشاء الله (:
وايه علاقتك بأحمد حلمي ؟؟؟؟!!!!
(:
بجد والله شغالة في البحث (:
بس ليا عودة
تحيــاتي

شاب فقرى يقول...

ميرام

أسأل الله لك العون فى مشروعاتك وتصاميمك :)

تدفق الأفكار

هنالك الكثير يشغل البال


و الأكثر يشغل القلب

:)

بحب احمد حلمى

بشوف فيه حاجات كتير بحبها

وربنا يعينك فى التعليق :)

ننتظر الغد

تحياتى

شاب فقرى

هيثــم رمضـــان يقول...

أعلن إنضمامي إلي الجبهة ويشرفني أن أكون من الأعضاء الأوائل للجبهة,

أينعم دي مش أول زيارة ليه هنا بس أول تعليق في مدونتك المميزة وطبعاً أنا معاك وبشدة في دعوتك ضد الأكتئاب والخنقه والحاجات ديه ,

وماشاء الله معجب جداً بوجهة نظرك في الحياة من حيث الاصرار علي تكملة المسيرة وتحقيق الأهداف وكمان في التعامل مع الناس والتسامح وده بيخلي الواحد حاسس بالسعادة وإنه فوق أي تفاهات.

أما بالنسبة للصداقة والأصدقاء يمكن يكون كان حظك وحش فيه لأنه بالتأكيد رزق زي إنت ما قولت لكن لو المشكلة كلها إن صاحبك مش بيسأل عليك زي ما إنت بتسأل علية دي سهله خليك إنت أجدع وألتمس له الأعذار لكن لو هو يستاهل كده وأنا عندي واحد صاحبي كده أنا ديماً اللي بسأل عليه وهو لاء بس علشان أنا عارف إنه إنسان كويس, الصداقة شىء جميل وإن شاء الله ربنا يرزقك بأصدقاء جدعان علشان واضح إن إنت جدع وأكيد كل اللي حوليك بيحبوك,

وإن شاء الله طالما دي أفكارك ربنا هيكرمك جداً وهيوفقك في كل شىء بإذن الله.

تقبل تحيات صديقك الجديد ..ده طبعاً لو سمحت

Cute Kitty **sookra يقول...

صباح الخير
انا بقى صاحيه كدا حاسه انى جامده اوى وممكن اسب تيت اى حد يدوسلى على طرف واى حد شايف انى موش استاهل صداقته او معرفته هو اللى خسران لان انا مافيش منى اتنين
سواء كنت كويسه او لا
بوستك صحانى من النوم وشيما حبيبتى ربنا يخليها قالتلى انتى يابت انتى قومى ونفضى هدومك ايه يعنى وقعت وخدت هدر جامد اوى
ايه يعنى حد شايفنى وحشه انا من هنا بقوله انا موش وحشه
حد يقولى انتى ماعندكيش دم
صح انا ماعنديش دم عشان كنت متمسكه بيه للنهايه
صباح الشيكولاته

Cute Kitty **sookra يقول...

اه خلاص مدونتى مالهاش اى ذنب هافتحها
وهاحكى فيها بكل صراحه عن اللى مضايقنى وهيكون هناك اعترافات كتيره اوى
انتظرنى بس بعد الامتحان

فراشة يقول...

أنا جيت تاني....
أولا..لاطبعا الموت مش النهاية خالص
النهاية بالنسبة ليا انى افقد الامل وأيئس ومبدأ (( اللى ميقدرنيش ... ميلزمنيش )) دا صح جدا اليومين دول
كن زمان بزعل وبتاثر وأقول ليه لكن ..خلاص كل واحد حر وهم الخسرانين مش أنا.. بس انا اتعودت أسامح بس وانا قوية مش ضعيفة
-----------------
ثانيا..انت بتقول لو مفيش حب صادق يبقى ليه نكمل سوا ؟
وأصلا لو مفيش حب صادق يبقى ليه نبدأ سوا..بس لو الطرفين كانوا صادقين من الاول
-----------------

ثالثا..ان مفيش زيي اتنين دي حقيقه علمية معقول هيبقى حد عبقري وغبي ف نفس الوقت زيي كدا ههههههه

بس انا متأكدا ان مفيش اتنين زي بعض
-----------------
رابعا..الناس الحلوين اللى عايشين فى وحدة "انا يعني ههههههه"
الحمد لله أخيرا اقتنعت انى ممكن أبدأ لوحدي من غير ما استنى فرصه
----------------
خامسا.. لا الأكتئاب دا بيجيلي كتير
بس الحمد لله بقيت أقدر أطلع منه بسلام وأبقى أحسن من الاول
الصحاب دول زى الرزق فى الدنيا فعلا الحمد لله اكتر حاجة بتفرحني ان ليا صحاب جدعين قوي هم 3 بس رضا مكانش ليا صحاب اصلا قبل كدا
---------------
سادسا..
أصعب حالات الفراق ؟؟؟
إن الناس تفارقك وهى عايشة مش تموت
صح بجد والله انا كنت ف اوقات ببقى محتاجة بابا وبيبقى مسافر ومبيقدرش يعملي حاجة وهو بعيد
بس داخلاني اعتد على نفسي اكتر
---------------
سابعا..نعم ربنا كتير قوي الحمد لله على نعمة الإسلام والصحة وكل شيء يارب
--------------
ثامنا..الحمد لله انا بسامح كل الناس مش عشان حاجة بس عشان ربناوالعفو دا شيء عظيم مش بالسهل خالص
--------------
تاسعا..ربنامايجعلنا من الظالمين ابدا يارب
--------------
عاشرا..حاضر هشرب كوباية المياة
بس الدنيا هنا حرررر
وانا جدعة وهكمل الطريق بإذن الله

--------------
رغيت كتير قوي انا بس انا أسفه دا من كتر إعجابي بالكلام انا بحب الخبرات الحياتية دي جدا عشان بتيجي من تجارب كتير

شكرا ليك على النصايح الحلوة بجد
جزاك الله خيرا

خواطر شابة يقول...

بداية انا اعلن انضمامي للجبهة وموافقة على بنود التأسيس واحد واحد من غير مفتح بقي شفت انا مطيعة ازاي
اهو يا سيدي من البداية بقت عندك أعضاء من دول أخرى وستصبح الجبهة عالمية
بالتوفيق وشكرا على كل ماجاء في هده التدوينة سأحاول جاهدة ان اعمل به لاستحق فعلا ان أقول أنا جدعة

بنت قلبى يقول...

يالهووووووووووى
اانا راضيه زمتك والنبى
انت ما تعبتش فى الكتابه دى كلها
نفسى ادخلك بوست والاقيه سمبتيك كده
حرررررررررررررررام
عنيا يا ناس
انا بحب اتنيل اقرا اه بس مش ااوووووووى
كده وبالذات معاك
لانى بكون نفسى اخلص البوست علشان اعرف استفاته ايه
وانت عاوز توصلنا ايه
بس بالبوست دا حسا انى هتوه
حرررررررررررررام بجد
ومعليش بقا انا هعمل حاجه فى البيت هنا وهرجع افتح وقرا منتا لو كنت كتبه على صغيهه صغنونه كنت خلصت بس حسا انى هتاخر علشان امعمع فيه
فا ليا عوده

donya يقول...

صبااااااااح الخيرررررررر

كلام جميل كلام معقول ماقدرش اقول حاجه عنه

لكن انا هقول

انا جدعه وجدعه جدا كمان
بس حد يسندني كده علشان اقوم وارفع ايدي واقول القسم

ربنا يكرمك البوست حلو اوي اوي


*تحياتي

*البت المشمشية *حلوة بس شقية * يقول...

هههههههههههههههههههههه


ده كاو بوست حرام
عليك نسى اتطع
ده انا تعبت من السطر التانى

*البت المشمشية *حلوة بس شقية * يقول...

انا معاك يا معلم طبعا
وبضم صوتى لصوتك وانا من هذا المزنق
بطلب من كل الناس انها تبقا معاها فى الحزب ده


بس ياريت المرة الجاية البوست يبقا اصغر شوية حرام عليك

------ يقول...

انا مش هقرأ الموضوع لانى بجد مفياش دماغ لاى حاجة حاولت اقرأ شوية ودماغى وقفت فمش هكتب تعليق
بس جيت اصبح عليك بس

غير معرف يقول...

هو الانضمام بفلوس ولا مجاني :D

على فكره لو انت بالعقليه الجدعنيه ي .... يبقا مايتخفش عليك

ربنا معاك ... وتكمل بنجاح وتوصل ان شاء الله

تحياتي

morgana يقول...

أنا قريت البوست من أول كلمه لأخر كلمه
احساسي دلوقتي بعد ماخلصت قرايه اني مبسوطه جدا

تحياتي:)

بنت قلبى يقول...

احم احم

وحدوووووووووه الاول
الله يسامحك من كتر كلامك نستنى عاوزه ارد ااقول ايه
استغفر الله اعظيم يارب
بص يا استاذى
اولا انا مش جدعه ولا حاجه
ايوه ما تستغربشى اوى كده
لان الجدع هنا بيسموه انه حمااار
وبيتركب كتير وبيضحك عليه كتير
بس طبعا انا برضو مش جدعه
هوا كده بقا
منا لازم اديقك علشان كل الكتابه دلا الا دخوتنى وحيرتنى
ـــــــــــــــــــ
اولا بقا
الموت هوا مجرد جسم افترقنا بس انما رو لاء
اكيد بتفرق معانا كتير بس روحه دايما جوانا والكل بقا بيحسبها كده انما طبعا العكس هوا الا مطلوب

وبدال جوانا ايمان بربنا يبقا مافيش يائس يا فقرى

ـــــــــــــــ
ثانيا بقا يا عم فقرى
ربنا بيقول بدى كل واحد على قد نيته
رغم طبعا ان مافيش مخده بينام عليها اتنين كويسين
بس يمكا احنا كنا بنختار بقلبنا وبس
انت لما تيجى تختار حد بجد اختاره بقلبك وبعقلك وبلاش تجرى ورى مشاعرك ابدا
ـــــــــــــــ
ثالثا بقا
وبص يا فقرى
انا ولا مغروره ولا تنكه ولا متكبره
بس بجد انا شيفا فى نفسى الوحش اكتر من الحلو
والحلو الا فيا ما هواش عند حد
وانا بقلها لنفسى ولااى حد عارفنى
ان انا ماليش اتنين
فى الرخامه والخلاسه والامضه
والحنيه بقا
مهى حبه كده وحبه كده
ـــــــــــــــــ

ولا رابعها ولا الكلام دا
عيشت عيشت على البوست يا فقرى
ايدى وعنيه ومش فاكره اى حاجه عن الا قرائته اصلا

صوت فيروز يقول...

ايه ده كله ايه ده كله يارتني يا احي قريت البوست ده من زمان ...انا بس هدعيلك انك تحقق اللي انت قلته يا رب

------ يقول...

انا جدع اممممم

هههه
المقدمة دى مواساه ولا ايه

عندك حق
مش معنى اننا فقدنا حد يبقى الحياه وقفت
دا احنا اللى نقول طز لدنيا وهنوصل هنوصل

ههه
متقعدش تقول كدا لحسن ربنا يرزقك بولاد
ربنا يرزقك باللى فيه الخير

احسست انك توجه لى هذه الرسالة وبتقولى فوووقى الحياه مش وقفت على عيال زى دوول :):)

بس لا صدقنى مش هقف ومش هموت
وهكمل واذاكر وهكون احسن منهم

نروح لثانيا
مية مية
عثل والله

ثالثا
دى اغنية متحاولش تبقى حد تانى غير نفسك ههههه
معلش تهييس بقى

ومش هعمل أى حاجة غير عشان حبيبى لما ألاقيه هلبس الحجاب وهحفظ قرآن وهظبط حياتى وهبطل أى حاجة غلط
انا عملت كل دا
من قبل ماييجى بس علشان لما ييجى ..مش لسه هغير فى نفسى وبعدين يقولك ان اردتى على فكونى انتى فاطمة
فى كل حاجة

نفضت هدومى من امبارح هههه
ههه
انا مش عايزة اقولك انا بعمل انقلاب فى اوضتى بس لما تبقى حالتى النفسية مش مظبوطة ياانزل الدولاب واطبقه تانى
يااسيب الاوضة منعكشة بس بعرف فين الابرة يعنى بطلع الحاجات من تحت الانقاض هههه

الورقة والقلم
بقى انا لما اكون زعلانة امسك كشكول واقعد اشخبط وارسم قلوب واشخبطها
وارسم دواير دواير واشخبطها
واقطع ورق صغير صغير صغير
يااما اكتب خواطر هبل واى كلام فى اى كلام اهه اطلع اللى جوايا وخلاص
والله لقيت ورق مطبق ميت تطبيقة بفتحه لقيت جواه كلام انا مش عارفة كتبته امتى وازاى بس باين ان حالتى كانت تحت الصفر وقعدت اضحك ومرضتش اقطعها

فحافظ على صحابك وقدرهم وخليهم يعرفوا قيمتك
ههههههههههههههه
دى مش عايزة كلام

انا تعبت ياعم
ايه كل دا بس والله الواحد مش بيزهق لان اسلوبك حلو

اللى يرضى ربنا بيراضيه واللى نيته سليمه وسايبها على الله ربنا بيقف جانبه فى كل حاجة

ايه ياكريم هو انت عامل البوست دا لدموع ولا ايه هههههه
بس استفدت منه بجد

تفتكر فى حالتى دى ينفع اسامح هههه
انا بحبهم بس ياهما ياماما فى البيت وانت فاهم بقى :)

نو كومينت على تاسعا
لان بحمد ربنا وبشكر امى انها ربتنا على الحب
تعرف لما اتخانق مع حد واحيلها تقولى لا برضو مهما كان صحبتك وخيركم من يبدأ بالسلام لا دى بنت عمك مهما كان كلميها وخدى ثواب
حبى الناس علشان يحبوكى
واوعى تظلمى حد واوعى تهينى حد
لدرجة انى اتخنقت
لكن محدش بيقدر يافقرى

لالالا
دا كدا انااااااااا جدع يااارادل

ياعم ربنا يرزقك بالبنوتة اللى عمال تتكلم عليها دى
وتكون زوجة صالحة وتشيلها فى عنيك

جزاكم الله خيرا ياكرملة :):)
لا بعد كدا عيب نقول فقرى

بعد الكلام اللى قولتوا دا

سماء يقول...

السلام عليكم


الحزن مش بيرجع اى حاجة الحياة بتستمر وغيرنا بيستمر


سواء اللى فارقنا شخص عزيز علينا او صاحب بموت او بأى شىء اخر لازم برضة نستمر بعدة

كلام معقول مقدرش اقول حاجة عنة

وان عضوة مؤسسة

وانتخبو مين شاب فقرى

ههههههه

دمت بكل ود

جارة القمر يقول...

يعنى اعمل فيك ايه انا دلوقتى ها ؟؟ خلتنى اسيب الامتحانات اللى بكتبها للعيال فى المدرسة و اقعد اقرا البوستات اللى فاتتنى دى ... نبدأ واحد واحد

موضوع الواد بتاع التعليقات دا انت وصفته باقل حاجه حقير هو فعلا كدا ولما انت قلت انك هتلغى التعليقات خالص استغربت اوى لانى حسيت ان دى مش شخصيتك ولا طريقة معالجتك للامور الحمد لله انك رجعت فى الفكرة دى

بوست انا يتيم ... مافيش اى تعليق عليه خالص لانه ماينفعش انه يتعلق عليه غير ربنا يرحمه و يسكنه جناته العلى يارب

البوست دا بقى الله يساااااااااامحك هو انت معندكش اوبشن الاختصار دا خالص رغم انك بتعرف تلخص يعنى يا فقرى
بس بوست جاااااااامد جدا جدا الصراحة ... انا معاك طبعا طبعا تصدق انك ادتنى دفعة جامدة اوى كانت بدأت تغمق معايا شويتين بس انا جدعة يعنى بعرف اخرج نفسى من الغمقان دا بس الدفعة المرة دى جت منك يا سيدى مستشكرين اوى جدا خالص
الفقرة اللى بتقول فيها ان مافيش منك اتنين وان اى حد كدا انا متفقة معاك جداااااا عشان انا دايما بقول كدا

ان حبيبك يسيبك بقى و دى بقت كتير دلوقتى الصراحة انا من موقعى هذا بضم صوتى لصوتك و بقول الف طز مش طز واحدة و على راى محمد فوزى اللى ينساك انساه

حاجات كتير اوى المفروض اقولها بس عايزة اخلص حط الامتحانات بقى و احس بشعور الافترا على العيال و احطلهم امتحان صعب ههههههههههه مفترية انا اوووى

من الاخر يا فقرى انت شخصية انا بحترمها جداااا رغم انى مش اعرفك من كتير ربنا يوفقك و يسعدك

حـــلـــم كـــان يقول...

حسيت ان موضوعك ده بيشبهنى فى شويه حاجات عشان كده عجبنى اوى
وان كان على اللى يبعك فكك منه وسيبه خالص ولا تسال فيه عشان لو حطيته فى دماغك صدقنى هتتعب اسال مجرب من حكايه الاصحاب دى ومش 3 سنين دول 5

عجبنى اوى حكايه انا مليش ذى اصلى النهارده وانا ماشيه النهارده فى الشارع كنت بقول كده مش عايزه حد يقارن بينى وبين حد انا مفيش حد زى انا حاجه والباقى حاجه وكل واحد حاجه يعنى لو حد احسن منى فى شى معين فانا اكيد احسن فى شى تانى

حكايه انى اروح الكليه متاخر دى كاتغير فده العادى بتاعى فالما بحب اغير بروح بدرى
اما بقا عن حكايه انك عرفت كام حد فى المترو فانا كل يوم بعرف البنت اللى جمبى فى المكروباص يعنى لو غيرت مش هحاول اعرف

اما بقا حكايه قفل الميل والمدونه والموبيل والحورات دى فده مش حل انا بحس لو انا كنت مخنوقه وقفلت المدونه انى اتخنقت اكتر يعنى ده مش حل وبطلت اعمل الحورات دى

كيكى عوووووو يقول...

معاك قلبا وقالبا
ومعرفتش اجيب حاجة معينه لانى حسيت كلهم انا
فعلا الدنيا مابتقفش عند حد
ويارب كلنا نكون احسن واحسن من عب خالق ثروت

ponpona يقول...

بقي ياراجل يطلع اسمك كريم وانا عماله أقولك يامحمد يامحمد لحد مادوشتك ... طيب كونت قولي ، عامة حصل خير انت عامل ايه بقي ياااا .. كريم

معلش انا عارفه انا انا مقصره بس والله انا مش قادره اعمل حاجه خالص خالص ، مش عشان مش لاقيه وقت .. لأ .. انا مش قادره ، عندي حاله لخبطه واحباط عامه درجة مش قادره حتي ارد ع التعليقات اللي عندي .. مش عارفه ارد علي حد ، ماهو أنا مش هينفع أرد وانا مكشره كده بس ياللا بكره تروق وتحلي

حاول تضيفني تاني ع الفيس بوك ولو ماعرفتش ابقي ابعتلي رساله وانا أضيفك .. أوكي

:)
فوتك بعافيه بقي

'' حطام (ك) بقايا '' يقول...

مش معقووووول
انا خلاص زعلانة مليش دعوة
اصلي جيت ماخرة قويييييي
اقرى و ارجع
/ وربرضه زعلانة/

'' حطام (ك) بقايا '' يقول...

انا جيت ثاني
نسيت زعلي لحد ما افتكرت ردي الاولاني
ما علينا

عارف
حسيت ان البوست كله موجه لي شخصيا في نقط كثيرة قوييييييييي
مش عارفة ليه حسيت كان الكلام كله لي لوحدي بطريقة ما وكان العنوان مكتوب عليه بالقلم السحري لك يا كوكي
:D
ما علينا

اوعدك و قبلها اوعد نفسي باني هحاول اغير حاجات كثيير قوي
اولها اني ابعد عن الوحدة لانها كانت في بداية تدميري
وبعديها حاجات ثانية كثيير
تقريبا كلها متعلقة بالجانب النفسي

وارفع بدوري راية الجدعنة و اقول
اناجدعة و قوية بادن الله

حاسة اني محتاجة اتكلم بس مش عارفة اقول ايه
ما علينا

جزاك الله خيرا يا شاب يا فقري

أميرة علي كوكب مهجور يقول...

انا معاكم يا باشا
انا جدعة :)
حابه كل الناس مش زعلانه من حد ابدا لسه مسامحه حد طلع اكتر من ندل وحقير معايا لسه عندي ثقه في نفسي لسه عندي ثقه في بكره والاهم وقبل كل شئ معايا ربنا وبحبه اوي لانه بيكرمني اوي ومعايا ع طول وكاتبلي الخير دايما

لسه بحب الدنيا وبحب الناس وبحب نفسي انا جدعه جدعه جدعه:)

عاشق الجنة من الإخوان صلى على النبى يقول...

انت جدع
ولا يهمك
بوست رائع
في انتظار زيارتك
صلي علي النبي

شاب فقرى يقول...

هيثم رمضان

نورت الجبهة والمدونة

ربنا يكرمك على كل الإطراءات والمجاملات دى

مش كل اللى حواليه بيحبونى للأسف :(

هيثم يشرفنى الصداقة

ويشرفنى تواجدك :)

تحياتى على التعليق الجامد وعلى صبرك عالبوست الرهيب دا

شاب فقرى

شاب فقرى يقول...

saso

أيوا كدا هوا دا الكلام

ربنا معاكى يارب ويارب البوست يكون منحك القوة اللازمة للإستكمال
فى إنتظار إنتهاء الإمتحان بالتوفيق يارب
شاب فقرى

شاب فقرى يقول...

فراشة

نورتى تانى :)

تواجدى فى أى وقت وستجدى تعليقا موجودا للرد

الخبرات والتجارب كتير

الواحد تعب من كتر ما قرب من الناس وإتعامل معاهم

زهق منهم ومن اللى بيعملوه

متنسيش تشربى كوبايه الميه الساقعه

وتقولى أنا جدعه

تعليقك طويل ومينفعش يترد عليه

لأن هوا والبوست أولاد خاله

بس خدى بالك التسامح لازم يكون موجود فى القوة والضعف

مش فى القوة بس

تحياتى

شاب فقرى

شاب فقرى يقول...

خواطر شابة

الفرع الخارجى للجبهة

الله

أحب انا الطاعة :)

ربنا يحفظك ويعزك

وتستمرى جدعه دايما

خالص التحية

شاب فقرى

شاب فقرى يقول...

بنت قلبى

ربنا يقدرك على اعمال البيت كلها

معلش مش متعود أكتم اى كلمة جوايا :)

فالبوستات بتطلع كدا زى الفل طول بعرض وإرتفاع

تحياتى

شاب فقرى

شاب فقرى يقول...

donya

ربنا يستجيب دعاكى يارب ويكرمنى :)

دا أقل بوست عندى :P

يارب يكون أعطاكى القوة الكافية عشان تقولى أنا جدعه

أهلا بيكى فى الجبهة :$

شاب فقرى

شاب فقرى يقول...

البنت المشمشية

بقالك كتير غايبة

يارب تكون الكلية كويسة وبخير

إحنا مش خايفين عليكى
خايفين عالكلية من كتر الإجتهاد والدكاترة كمان :P

تحياتى للمرور

وأهلا بيكى فى الجبهة

مبعرفش اسكت عن حاجة عايز أقولها
:$
شاب فقرى

شاب فقرى يقول...

دموع القمر


معلش البوست طويل وبإنتظار تعليقك :) ورأيك وإنضمامك للجبهة

شاب فقرى

شاب فقرى يقول...

فتاة من الصعيد

أهلا بأحسن ناس :)

ليكى إنتى هتدفعى خمسين جنيه فى صندوق تبرعات الجبهة

عشان نشترى مكاتب وكتب وأقلام وحته أرض كمان ونبقى جدعان طيبين قصدى أغنيا يعنى :$

ولكم بيكى فى الجبهة

شاب فقرى

شاب فقرى يقول...

morgana

ربنا يسعدك كمان وكمان

الحمد لله على النعمة دى

الواحد لما يقدر ينقل سعادته وقوته للآخرين فدا فى حد ذاته نعمة لا مثيل لها من المولى :)

تحياتى

شاب فقرى

شاب فقرى يقول...

بنت قلبى

المنافسة القوية لجبهة الجدعان

أنا جدع :D

بس الجدع مش حمار لأنه إنسان قوى وبيساعد غيره وعارف إزاى يوصل بجد

دمتى فى ود وخير وسلامة وحفظ الله

شاب فقرى

شاب فقرى يقول...

صوت فيروز

مش مهم التوقيت

المهم ان التجربة والتجارب اللى مرت عليك تكون علمتك وأكسبتك القوة الكافية

وتذكر لولا تجاربنا وآلامنا لما كنا نحن

تحياتى عالتواجد

شاب فقرى

شاب فقرى يقول...

دموع القمر

حمدا لله عالسلامة من الخناقة

واضحة جدا فى المدونة ومسيحه للدنيا كلها

ربنا يبارك لك على اللى قلتيه

كنت نسيت أنا الجمله دى أو بطلت أفكر فيها

هرجع أفكر فيها تانى

والحمد لله غنك قمتى ونفضتى هدومك :)

صباح الفل

إتعودى لما ترمى حاجة مش تفكرى فيها تانى لأنك خلاص إستغنيتى عنها

ولو رجعتى لصحابك دول

ياترى هل هتنسى اللى عملوه وهل هتثقى فيهم ؟؟؟

أنا عن نفسى لاء

فحافظ على صحابك وقدرهم وخليهم يعرفوا قيمتك

دا لما يكونوا صحاب بجد

صباح الفل

تسلم صوابعك عالكومنت

ربنا يخليلك والدتك الطيبة :)

بحس غن كل الأمهات طيبين مش عارف ليه :$

حلوة هوايات الفراغ بتاعتك دى

مسلية أوى الهوايات بتاعتك دى

أنا فى موقف لو حكيته الناس هتقسم إنى مسطول

شبه الهوايات بتاعتك دى بالظبط

تحياتى عالمرور ومشاركتنا فى كل تلك التفاصيل الدقيقة

شاب فقرى

شاب فقرى يقول...

سماء

نورتى

إيه كل الهتافات الجميلة الجامدة دى

بس أنا دكتاتور جدع

يعنى عمرى ما هعتزل الحكم فى الجبهة :D

الحزن يصنعنا وينقش معالم وتعاليم كتير فى قلوبنا

تحياتى عالمرور
وأهلا بيكى فى الجبهة
شاب فقرى

شاب فقرى يقول...

جارة القمر

يا بختك بأطفال المدرسة

أنا بعشق الأطفال وكان نفسى أبقى مدرس ليهم

بس يا خسارة مينفعش الحلم دا

نورتى الجبهة والمدونة

مينفعش نختصر فى بيان التأسيس :$

على رأيك اللى ينساك إنساه

ربنا يستر عالعيال :((

:)

نورتى المدونة

وشكرا على الثقة الغالية والإحترام

تحياتى

شاب فقرى

شاب فقرى يقول...

حلم كان

الله عليكى

وربنا يكملك بعقلك

إنتى مثال للشابة الجدعه فعلا فى التدوين

الحمد لله على نعمة الوصول متأخر

نعمة الناس لو تعرفنا هتنافسنا فيها

رضا أوى

بالنسبة للميكروباص

أنا مش بكلم حد فيه لأنه بيبقى عامل زى علبة الكبريت

بركز فى الطريق

هوا السواق هيعمل إيه ولا إيه بس

لازم نساعده كلنا :)

تحياتى عالتواجد والتعليق
وأهلا بيكى جدعه أصيله فى الجبهة

شاب فقرى

شاب فقرى يقول...

كيكى عو

يعنى معنى كدا إنك معانا فى الجبهة :D

يارب نكون احسن من أى حد مش عبد الخالق ثروب وبس :$

تحياتى عالتواجد :)

شاب فقرى

شاب فقرى يقول...

ponpona

إندهى باللى يعجبك

كريم أو محمد جميع الطرق تؤدى إلى رما

سلامتك من اللخبطة والإحباط ألف سلامة

لو كنتى قريتى البوست

كان إحتمال ضعيف يفوقك

ربنا معاكى وتكونى أقوى من كدا

أوكى

تحياتى

شاب فقرى

شاب فقرى يقول...

'' حطام (ك) بقايا ''

ولكم بيكى فى الجبهة

هنا اللى بيوصل متأخر زيه زى اللى بيوصل بدرى

:)

بيشرفنا وبينورنا طبعا :$

معلش يا كوكى

بس البوست ملعوب فيه على كافة الأوتار

بحيث كل من يقرؤه يشعر بأنه موجه له هوا فقط :)

سلامتك من الوحدة

على قد ما بحبها وبتحبنى على قد ما بحبش اطول فيها

عشقها من بعيد لبعيد حلو :$

ولا إيه :D
أهلا بيكى فى الجبهة كجدعه جدا ومنورة الجبهة ربنا يحميكى

تحياتى

شاب فقرى

شاب فقرى يقول...

أميرة علي كوكب مهجور

أهلا بقائدة الجدعان

ولكم ولكم ولكم

معلش المسامح كريم

على قد ما كان الطرف التانى حقير على قد ما لازم نكون متسامحين

بس برده نطرده من حياتنا لأن اللى يبيع مرة يقدر يبيع على طول :)

تحياتى

شاب فقررررررى

شاب فقرى يقول...

عاشق الجنة من الأخوان

أول تعليق ليك فى مدونتى

يارب يعيننا ويوفقنا ويوصلنا للى يرضيه ويرضينا بيه :)

تحياتى على تواجدك

قريبا بعون الله الزيارة

شاب فقرى

(( اللهم صلى على سيدنا محمد عليه الصلاة والسلام ))

Aиgel يقول...


يا صباح الجدعنة..

انت شكلك هتخرج الهدوء اللي عندي بسبب بوستاتك دي (:

بس تعرف اني اكتشفت اني ولا جدعة ولا حاجة .. لأن كل الكلام اللي قلته ده كأنك بتقوله عليا ولا حاجة وانا مش حسه

الصحاب واللي بيحصل للواحد
بس والله تعرف انت موتني على نفسي من الضحك بسبب كم الأفهات اللي بتكتبها على كل كام سطر كده
وخصوصاً يا عبيط (:

اصلها تشبه اسمي وتفرق حرف واحد والكلمة دي كانها مقسومالي وكل ما حد ما بيقولها بحسب اسمي واقول نعم وانا مبتسمة ههههههههه
بس بجد خلاص انا هجد واجتهد وانضم إليكم في جبهة الجدعان الشعبية

بس حد يجيب لي كوباية الماية الساقعة والنبي لحسن قدامي ومكسلة اقوم (:

شوفت انا جــــــــــدع

(( بليز يابنات عشان الرجاله متطلعش من هدومها وتلبس حلل فى دماغها))

انت عارف لو قدام كنت عملت فيك ايه بسبب الكلمة دي

دايما كده ضدنا يا عيني علينا يا نون النسوة (:


كفاية رغي .. اتمنى تكون بخير يارب دايما


Angel love

حروف يقول...

اممم عرفت ان مدونتك اتسرقت حمدلله علي سلامتك
شكلها متاخرة
اووووووووي
بقوللك بوست طويل اوي انا بجزئة ف القراية ههههههه انا بنهج في النص حقراة وارد عليك

دمت بخير

إسكندرانية يقول...

نورت مدونتك والبلوج من تاني
ليك عندي تعليق تاني ع البوست
استناني صباح الخير

Empress appy يقول...

عجبنى درس التنميه البشريه ده
وانا جدع يا سيدى ولا تزعل ولا انا ازعل

ليس فقيرا من يحب يقول...

اناااااااااا جدع

ههههههههههههههههههههه لا قصدى انا

جدعه

معاك فى كل كلمه نظرة واقعيه ومنطقيه

للامور حتى لو حاولنا نقنع نفسنا بعكس

كده هيا دى الحقيقه والجدع اللى يعرف

كده

مشاء الله على نظرتك للامور

تحياتى ليك يا فقرى قصدى يا جدع

بيطرية ومش بايدى يقول...

يا حلاوة يا ولاد
ده انا امبارح باليل كنت هابقى التعليق التربنتاشر مش عارف حاجة زى كده
دلوقتى 54 الرقم اللى انا بحبه
عشان رقمى ف القايمة
ف الاخر يعنى
طيب نروح ناكل ونصلى ونخلص كل اللى ورانا ونشمر عشان نقرى
واقول انا بقى حادى عشر
بعد عاشرا يعنى

بيطرية ومش بايدى يقول...

اه ولحد ما ارجع انا هاحجز رقمى ف مؤسسة الجدعنة 54 هه
محدش ياخده
اوعى ياد انت وهو وهو وهى
اديك وشك

جارة القمر يقول...

ان ان آآآآآآآآآآآآن

بتقول ربنا يستر على العيال قصدك ايه ها ها تقصد ايه ... دا انا مدرسة جامدة يا بنى مش اى حاجه :)

بيطرية ومش بايدى يقول...

كرمللة
ده انت طلعت مسكر خالص
انا عاجبنى اوى مبدأ الفقرى

بس انا عايزة اعرف اية حكاية البتنجان معاك
انت عندك ازمة بتنجان ولا ايه

شاب فقرى يقول...

Angel

يا ولكم يا ولكم :)

هههههههههههههههههههههههههه
على فكرة انا بحب كلمة يا عبيط دى

بس قعدت افكر فى اى اسم قريب من الكلمة

ملقتش :D

جبهة الجدعان ضد النكد بشكل عام من بنات حوا :$

أهلا بيكى فى جبهة الجدعان

تحياتى يا Angel

شاب فقرى

بيطرية ومش بايدى يقول...

والله العظيم بوست تحفة جميل روعة والله العظيم فاق الوصف
عارف انا كتير بكلم نفسى كده واقول لنفسى كتير اوى من الكلام اللى انت قولته ده
والله ما فى اجدع منك

بس انا كان نفسى ادوق ام على بتاعتك

اينعم كنت هاحجز عربية اسعاف احتياطى

:))))))))) بهزر طبعا
والله بجد كلامك شجعنى تصدق كان عندى صداع
واقول ما قريت البوست قعدت اضحك على البتنجان وعلى كرمللة المسكرة
الصداع راح
وكنت ناوية اقوم انام بس تطبيقا لشروط الجبهة عشان ماازورش فى اوراق رسمية هاقوم اشرب مية ساقعة وبعدها كوباية شاى واقوم اتهبب اذاكر
حد عايز يتهبب معايا
يتفضل....

شاب فقرى يقول...

حروف

نورتى :)

بإنتظار تعليقك

لاإتسرقت ولا حاجة :D

دى أشاعة مغرضة

ومازلنا على الدرب صامدوووووون

:)

تحياتى

شاب فقرى

شاب فقرى يقول...

إسكندرانية

صباح الفل

بإنتظار التعليق القادم :)

تحياتى

شاب فقرى

شاب فقرى يقول...

Appy

للأسف عمرى ما درست تنمية بشرية ولا حضرت محاضرات ولا أى حاجة

كله من دماغى كدا

من وحى الحب للحياة

تحياتى
نورتى :)

شاب فقرى

شاب فقرى يقول...

ليس فقيرا من يحب

نورتى المدونة :)


ولكم بيكى فى جبهة الجدعان

أفضل شىء أراه فى أى إنسان هوا طريقة التفكير والنظرة للحياة

إذا كان فاسدا او خاطىء فلاتتوقع منه أى خير :)

تحياتى

شاب فقرى

شاب فقرى يقول...

بيطرية

يا ولكم يا ولكم :)

كنت بإنتظار التعليق عالبوست من إمبارح

إيه الذوق دا كله :)

كرمللة كمان

والله كان عندى حق لما نشرت إسمى فى البلوجر :D

رقم التعليق الخاص بك مازال محجوزا كما هوا :)

البتنجان هوا دليل على اى حاجة مش تمام او غلط

فبقول الكلمة دى كتير

لانى الصراحة بكره الكوسة ومبحبش اقول اللفظ لانه بيفكرنى بالطبيخ بتاعها وانا مش بطيقها على اى شكل

بالنسبة لام على

ياااااااااااه بس كدا

هبعتهالك العنوان :
الوحدة الصحية بالشرقية الدور التانى إلى الدكتورة البيطرية :D

إيه رأيك إنى أنا نفسى كنت أحيانا باكلها وكان بيجرالى كل اللى قلتيه دا بحس بوجع رهيب فى معدتى

بس فترة الوجع دى راحت

بالرغم من انى لا كشفت ولا بتاع

أنا مبسوط أوى إنى خليتك تضحكى غنتى و Angel برده

بجد فى غايه السعادة بيكم

ويارب دايما أكون سبب سعادتكم

أنا كمان هتهبب وأذاكر لينوكس كمان شوية

دعواتك بقى :)
وربنا معاكى يارب

كرمللة تانى

أنا بتكسف يا جدعان :$

:)

شاب فقرى

ميرام يقول...

هو البوست ده طويل قوي
وانا بجد قرأته 3 مرات أو أكثر ..
لكن مش عايزة أقول أكتر من كلمتين ...




انت جدع
(:

تحيــاتي

أسما يقول...

انا جيييييييييييت... مش لاقية كلام اقولهولك يا زعيم يا مؤسس، انا نفسي اتقطع علي بال ما خلصت... بس فرق معايا كلامك... ادعيلي
:)

شاب فقرى يقول...

isolde

البوست دا انا فكرت فيه لما شفت الحالة بتاعتك فى مدونتك :(

وزعلت أوى وفكرت فى كل نقطة منه واستدعيت ذكريات كتير عشان اكتبه

بجد يارب يكون أثر فيكى

ويارب يطلعك من اى ازمة ايا كانت

تحياتى

شاب فقرى