السلام عليكم ورحمة الله وبركاته
بمناسبة يوم 6 أكتوبر قررت أكتب موقف حصلى النهارده
كالطبيعى نزلت أتمشى فى البلد
بمعنى أصح عالكورنيش
وأنا ماشى شفت ولد وبنت ماشيين بشكل رومانسى أوى
قلت (( ربنا يهدى ..دا العادى فى هذا الزمان ))
لكن قبل ما أوصلهم لقيت فى إتنسن شباب واقفين
واحد منهم وجه للبنت كلام خلاها تقف
واحد منهم قرب من البنت وهوا بيتكلم
وضربها ومد إيده عليها
........
صراحة مش إستغربت
اللى خلاها تمشى مع شاب وهى فى السن دا
وشاب بالمنظر اللى كانت ماشية معاه
تستاهل أكتر من كدا
طبعا على ما عديت من جمبهم كانت البنت اتضربت
قام الشاب اللى ماشى معاها ......... معملش حاجة
خدها ومشى فى الاتجاه اللى انا ماشى فيه بالظبط
وهما ماشيين ورايا
طبعا أنا قررت أنا هعمل إيه
سبقتهم شوية
لقيت عربية بوليس
أيوة عربية (( أتارى )) من اللى بنشوفها فى الأفلام وفى أى كمين
طبعا أنا توجهت تجاه العربية
ودار الحوار التالى :
شاب فقرى : سلامو عليكم ياباشا (( من باب الأدب مش أكتر ))
الظابط الأول : وعليكم السلام ... فى إيه
شاب فقرى : أنا شفت بنت ماشية مع شاب اللى هناك دول (( وشاورت عليهم ))
الظابط الأول : وبعدين ؟؟؟؟
شاب فقرى : وبعدين قام فى اتنين شباب واحد منهم ضربها أو إتحرش بيها معرفش صراحة .
الظابط التانى : فين دا
شاب فقرى : هناك أهوه هما دول .
الظابط الأول موجه الحديث للظابط التانى : هاتهم وتعالى و إقعد معانا يا فقرى شوية
(( طبعا محدش منهم طلب يشوف البطاقة بتاعتى ولا حتى الكارنيه ولا أى حاجة ...
حاجة حلوة أوى إنهم ركزوا فى المشكلة وسابوا أى حاجة تانية ))
قعدت معاهم شوية ...
الظابط الأول بيطلع سجارة وبيكلمنى: سجاير يا شاب
شاب فقرى : شكرا ياباشا مبدخنش :D
ولع سجارة وانا قاعد معاه و أنا مستنى
الظابط الأول : أنا جبتهم
طبعا البنت كانت ماسكة الموبايل وواقفة عادى مرتبكة والشاب اللى معاها ماسك سيجارة وبيدخن
الظابط التانى : مين البنت دى ؟
الولد المعفن : خطيبتى
الظابط الأول : إرمى السجارة ياله
رماها الشاب المعفن وبدأوا يتكلموا
الظابط : إيه الحكاية فى حد ضربك
الشاب المعفن : دى خطيبتى وابن خالتها ضربها لانه كان عايز يتجوزها ورفضت واتخطبت لى
والواد دا متغاظ وإحنا إتصلنا بخالها
البنت وهى ماسكة الموبايل : أيوا صح
الظابط الأول : طيب إتصلى بأبوكى
الشاب المعفن : والدها متوفى
الظابط الأول : إتصلى بخالك
البنت: الموبايل فاصل شحن (( مع انها كانت مسكاه وبتتكلم فيه من دقيقتين ))
الظابط الأول : مش تبهدلى نفسك ولا تعرفى الأشكال دى
لأن إنتى لو أختى مش هرضى أى حد يبصلها لو حد بصلها هقتله
البنت فى هدوء :طيب
يلا إمشوا من هنا
وبعدين أنا بكلم الظابط التانى اللى كان جوا العربية
شاب فقرى : محتاج منى حاجة تانى ولا أمشى ؟
الظابط التانى : لاء ياباشا إنته اللى لو عاوز أى حاجة إحنا تحت أمرك فى أى شىىىىء
ما هوا لو كل واحد فى البلد دى عمل زيك وشاف غلط وقال عليه البلد مكانش زمان دا حالها
شاب فقرى : كل سنة وإنته طيب
كان فى ظابط تالت جه بعربية مليانة
قالولى وإنته طيب
وصلت الموبايل وشغلت الأغانى ومشيت
***
أنا بحكى الموقف دا ليه وعملت كدا ليه ؟؟؟؟
لأنى لأول مرة فى حياتى أشوف بعينى تعامل بينى وبين الشرطة ومشوفش اللى بيتحكى عليه
يعنى مثلا كان ممكن اى ظابط من الاتنين يقول انى طرف فى الموضوع ويدخلنى معاه ويودينا القسم كلنا
أو كان ممكن يقولى بطاقتك والكارنيه ويعمل أى مشاكل عالفاضى معايه أو مع الولد والبنت
لكن كان واضح جدا إن البنت لا مخطوبة ولا بتاع وإنها ماشيه مع البوى فرند بتاعها بتتفسح مع جنابه
فاكرة نفسها ماشيه مع حامى الحمى وإن دا اللى هيسندها لو شاب تاني من اللى كانت ماشية معاهم قبله شافها وإتغاظ
مش عارف أقول غير
إنى لو مكنتش بلغت مكنتش هنام أسبوعين بالميت كدا
ومكنتش هبقى راضى عن نفسى لأنى فعلا مرضاش بكدا فى مجتمعنا
وفعلا إتضح لى سلامة مبدئى إنى مش أمشى مع أى واحدة فى أى مكان بدون صفة شرعية أو علاقة رسمية
ولو مشيت مش هتمشى عالكورنيش
ولو مشيت عالكورنيش مش هسكت لو حد فكر يكلمها حتى أو يبص لها
فى ناس ممكن تشوف إنى فضحت البنت .. بس ياترى اللى حصلها مكانش فضيحة ؟؟؟؟
مش عايز أى واحد يقرا البوست دا يبقى سلبى
أمال مصرى إزاى وبتحب بلدك وعايز تغيرها وتقضى عالتحرش والفساد
ولا هوا الناس تفتكر الشرطة لما يبقى فى حاجة مش قادرين عليها ؟؟؟
والحمد لله إنى عملت شىء يرضينى تجاه بلدى فى ذكرى 6 أكتوبر
إتصرفت تجاه حالة من الفساد فى الأخلاق والمسخرة
إتحركت وأخدت موقف وبلغت
ومقدرش أقول فى الآخر غير شكرا لجهاز الشرطة فى مصر .
بالرغم من إنى كل أما أمشى فى أى مكان فى مصر بيطلع لى واحد يقولى بطاقتك
ويحسسنى إن شاب فقرى خطر عالشعب
(( لأنى body bulding شوية ))
بس برده عندهم حق وأنا مبسوط بيهم
وزى ما فى عناصر فيها زى الزفت فى ناس كويسة جدا
ومفيش جهاز أو شركة فى العالم كله مفيهاش فساد
يمكن اللى بنشوفه من فظائع منهم عالنت بيحصل تجاه ناس تستحق كدا
لأن عن نفسى كنت ممكن أقتل الشاب اللى ضرب البنت لو كانت أختى سواء أنا من الشرطة أو حتى بتاع بليلة
ودا موقع وزارة الداخليه عالنت للإبلاغ عن أى تجاوز
وفى الآخر ... بحبك يابلدى
(( أنا عمرى ما هسكت عالحق ...إوعى تفكر فى يوم تهرب ))
شاب فقرى----
ملحوظة البوست اللى فات ليه تكملة .لأنى حسيت إن مفيش حد فهم المغزى منه غير رد واحد.
الكلام اللى باللون الأزرق من أغانى راب هوا والعنوان
هناك 31 تعليقًا:
اول واحد اشوفه بيتكلم كويس عن الشرطة...الي انت عملته موقف جدع منك والي حصل من الضباط موقف اجدع...شكرا عالبوست الجميل
طبعا اى مجتمع فيه الكويس وفيه الوحش حتى ولو كان مجتمع رجال الشرطة
اقولك حاجه
المحترم اللي على حق يقول للغلط لأ
محمود مخلص
فى ناس كتير معجبهاش اللى عملته والله يا محمود ومش عارف ليه الفكر الغريب دا
تحياتى لتواجدك
شاب فقرى
مسدس صغير نورت مدونة شاب فقرى
هوا فعلا فى عناصر وحشة
بس فى عناصر ممتازة
تحياتى :)
شاب فقرى
شاب مفقوع اخونا العزيز فى الكفاح
ياريت كل الناس تبقى محترمة ومش تسكت على اى غلط
انا لو مكنتش لقيت عربية البوليس دى كنت هسكت لان الموقف خلص
ولو كان التصرف اللى بيعملوه ضد البنت زاد كنت هتصرف
تحياتى
شاب فقرى
تحياتى ليك على موقفك دا
بس ياترى لو كان الظابط اللى قابلك من النوعيه الفاسده التانيه كنت هتواصل انك موش تسكت عن الغلط ولاكنت هتقول "اللى اتلسع من الشوربه ينفخ فى الزبادى" تحياتى مره تانيه وكل سنه وانت طيب
ياترى ياشاب لو ماكنتش لقيت عربيه الاتارى كنت هتعمل ايه؟
يااااه على البنات واللى بيعملوه فى نفسهم وبيعرضوا نفسهم وغيرهم كمان للخطر
soso
لو كان من النوعية الفاسدة
مكنتش هعمل حاجة
ومكانش هيقدر يعملى حاجة :D
انا شاب فقرى مش اى حد
وانا سيبتها لان هى اللى سمحت يحصل لها كدا
لانها تعرف الاشكال دى
وكمان
انا عارف ان البوليس بيقف فى المكان دا
:)
انا حافظ الكورنيش دا عن ظهر قلب
تحياتى لتواجدك
شاب فقرى
بص يا صديقي
هو اللي انت عملته صح
وصح الصح كمان
بس نتكلم عن كام نقطة
الظابط التانى : مين البنت دى ياض ؟
الظابط الأول : إرمى السجارة ياله
مع كامل احترامي لوجهة نظرك بس دي مش طريقة ادمية في الحوار
كمان انا معترض علي وصفك للشاب بالمعفن
بس لتاني مرة احييك علي موقفك
وفعلا قليل اللي بيعمل كده ف البلد
ملحوظة اخيرة
انا كمان بسمع ايجي راب سكول وسمعت اغنية الهلاك
ودي الوحيدة اللي من اغانيهم مش بسمعها عشان الكلام اللي فيها
والسلام ختام
اكيد فى كل مكان الصالح والطالح
يعنى صوابعك مش زى بعضها
وبعدين انت مصرى على حق
عشان قولت للغلط لا
بتاعت الاعلان
بس فى سوال بيفرض نفسه عليا ايه اللى يخلى بنت تحط نفسها فى موقف زفت زى ده ؟
Yusuf
صراحة هما اعتبروا ان عيل زى دا
هوا فعلا عيل من وجهة نظرى
يقف يدخن سيجارة قدامهم
واى واحد فيهم قد ابوه
دى اول نقطة
تانى نقطة سؤال محترم
هوا قاله مين دى
مش مين البت دى
وكمان ايجى راب سكول بحبهم وبسمعهم
بس فى اغانى مش بسمعها زى الهلاك
فى كلام فيها بسمعه بس
بيعجبنى البيت وبمشى التراك بسرعة عشان اى كلمة ممكن تأذى السمع
والاغنيه لا تنطبق على الموقف
بس انا بحب لما اقول كلمة اقول جبتها منين
نورت
شاب فقرى
حلم كان
مش عارف صراحة لانى مش اعرف البنت
بس متاكد انها عايزة تعيش عشان كدا عملت كدا
بس
او يمكن بتحب الشاب اللى ماشية معاه
تحياتى
شاب فقرى
تحياتى لهذا الموقف الشجاع
ياسلااااااااام انا كمان شفت موقف جدعنه من الشرطه,,متبوصليش كده اصلى سوابق هههههههههه هفهمك.
وانا فى اولى جامعه ياسيدى وعندكم فى قاهرة المعز وكنت راحه اركب السوبر جيت وراجعه المنصوره اذ ببص انا وصاحبتى ولقينا تعرضنا لعملية سطو:( صاحبتى موبايلها وانا محفظتى بالفلوس بكارنيه الجامعه والبطاقه اتسرقوا, فى حد نصحنا بضرورة اننا نقدم بلاغ لان الاثباتات الشخصيه دى ممكن يتعمل بيها بلااااااااااااوى.
اوم ايه بكل شياكه وتناكه كده روحنا دخلنا قسم الازبكيه:))
ومقولكش كان فى وقتها ترحيلات لناس وزحمه وجيه رتبه كبيره كده راح مزعق لينا :انتو تعالوا هنا انتو الاتنين انتو ايه الى جابكو هنا؟؟
بكل هدوء وخلاص هعيط قلتله اصل حضرتك اتسرقنا:)..
ضحك جداااا واخدنا على جمب بعيد عن الناس العجيبه اللى شوفناها وقلنا انتو منين وعرف اننا مغتربين وراح نادى لظابط ملازم تقريبا وقاله سيب اللى فايدك وعملهم محضر بالىى عاوزينه ومشيهم من هنا بسررررررررعه..خرج الرتبه الكبيره من الاوضه ولقانا لسه موجودين ,تصدق مسك الظابط بهدله ادامنا وقاله انا قلت دول ميستنوش هنااا ,لسه بيعملوا ايه هنا لحد دلوقتى.وبعدين واحنا ماشيين نادى علينا وقلنا معاكو فلوس تسافروا؟ ومسابناش غير لما وريناله ان كان فى فلوس التذاكر فى جيب البنطلون مش فى المحفظه وفى الاخر زعقلنا وهو بيضحك وبيقولنا يلا امشو من هناااا وخد بالكو من نفسكو.
فى نماذج لسه كويسه والله بس للاسف فى وسط الوحش مش بتبان..
عارف اللى لفت نظرى ايه باه فى كلامك؟ان دا كله يحصل فى الشارع ومحدش يدخل ولا يزعق للمعفنين اللى مدوا اديهم على البنت ايه هى باه حاجه عاديه ولا ايه؟
على فكره مينفعش كده كل مدخل اكتب كومنت طويل اوى عندك,بحس انى رغايه:)
طيب ماهى اللي تستاهل هزقت نفسها ليه صحيح
بس تتحسد الشرطة والله ايه الهنا ده
اشمعنا انا كل لجنة يوقفوني وقعدوا يتفرجوا عليا ولا كأني عجبه امال لو نازلة بالميكرو جيب ولا حاجة كانو عملو ايه .. ده انا بحجاب حتى
يمكن العربية هى السبب؟!
جايز برضو مع انها سودة يعني مش راكبة عربية حمرا انا
ربنا يجازيك خير يافقري والله ومنغير مناسبات 6 اكتوبر ولا غيرو يقدرك على الخير
هستنى كمالة البوست القديم يا كبير
مهو بدايه ان الحال يتعدل ان اللى
يشوف غلط مش يقول انا مالى
موقف سخيف للاخت ربنا يهديها ويهدينا جميعا يارب
وبعدين وانا مالى
هههههههههههههههههه
انا اول مرة ادخل عندك
بس شدني اسمك شاب فقري :)
الموقف اللي حكيته دا انا شاكه انه يكون في مصر وخصوصا مع الشرطة المصرية اصلي واخده موقف منهم ولامؤاخذه يعني :( اكيد الموقف دا مش من فراغ اكيد دا نتيجه تصرفاتهم وافعالهم علشان كدا انا استغربت من اللي بتحكية
كل سنة وانت طيب
تقبل مروري
موقفك صح وفيه ناس كتير كويسه وفيهم الناس الوحشه
وعلى فكره حتى الكويس مع الشخص الوحش بيكون مش كويس
يعنى علشان انت محترم كلموك باحترام وكمان نصحوا البنت
انت برافو عليك
عزيزى well نورت المدونة
شاب فقرى
اه وكفى
غيرى العربية أحسن حل :)
ان شاء الله هنزل بالبوست اللى قلت عليه
بس مش دلوقتى
كمان يوم او يومين كدا
تحياتى لتواجدك الجميل
شاب فقرى
(green eyes)
وانتى طيبة
مستحيل اى جهاز او شركة فى الدنيا يكون على درجة كاملة من الصحة والكمال
لازم يكون فى فساد وعناصر عايزة الحرق
تحياتى لتواجدك :)
شاب فقرى
Appy
اللهم اجعلنا ممن لا يخافون فى قول الحق من لومة لائم ولا سلطان جائر
تحياتى لتواجدك
شاب فقرى
بجد برافو عليك وياريت ما نبقاش سلبين ولازم نعرف ان لكل قاعده شواز لو فى ظباط فاسدين فى الالاف محترمين وكل مكان فى الكويس والوحش اعمل اللى عليا واخلص ضميرى والباقى بتاع ربنا يحاسب عليه اللى يستاهل تسلم ايديك
طوبة فضة وطوبة دهب
نورتى المدونة :)
يارب السلبية تختفى من الحياة
شاب فقرى
انا كنت هنا الصبح وكنت فاكرة اني علقت وطلعت معلقتش انا اصلا قعدت اقري البوستات اللي فاتت كمان بتاع الحب من اول نظرة وان نصيب كل واحد نصيب حيقعد اد اية ساعه ولا مدة اد اية وطلعت معلقتش
بلنسبة للبوست دة مش دايما يمكن خافوا منك وافتكروا ابن مين في البلد دية ولو قالوا حاجة تقولهم انت متعرفش انا مين اصل كل واحد في البلد يقوللك متعرفش انا مين وابن مين علي اساس ان بلد كلها في السلطة ماسكين مناصب
دمت بالف خير اخي العزيز ومنورني دايما
حروووف
الحمد لله كان منظرى بيقول على انى بتاع بليلة
كنت لسه صاحى من النوم
ولبست اى حاجة وخرجت اتمشى فى هدوء وربك ستر
نورتى المدونة
تحياتى
شاب فقرى
الشعب لابد له من حكومة تشكمه
لا رغايه ولا حاجة
بتنورى المدونة
وكمان لازم تقولى رايك وتعبرى عن نفسك
انا بعمل كدا فى كل المدونات
ضحكت عالموقف اللى حصلك
متعرفيش ان اى مغترب فى مصر لازم يبجى واخد باله من المحفضة والموبايل
ههههههههههههههه
انا دخلت القسم دا مرة
كنت معزوم
دخلت قعدت على مكتب وكوبايه شاى وحاجة اخر احترام :)
نفسى احكى الموقف بس مينفعش
تحياتى
شاب فقرى
الصراحه الشرطه سمعتها فى غايه السوء فى بلدنا لان زى ما انت عارف الحسنه تخص والسيئه تعم
علشان كدا لازم فعلا نفرق
ودا فى كل المجالات مش شرطه وبس
بس تجاوزات الشرطه لانها متعلقه بحياتنا
بتاخد محور اهم
بدايه موقفك ايجابى وغالبا مش بيحصل
لان للاسف دلوقتى كل واحد بيقول يالا نفسى
بس احب اقولك ان كما تدين تدان
والديان لا يموت فربنا فعلا بيكرم اللى بيعمل اى حاجه ولو بسيطه لتصليح حاجه غلط اخلاقيا او سلوكيا او حتى حياتيا
اما عن حب مصر
فما فيش داعى انا قلت اللى عندى فى البوست الاخير بتاعى
ربنا ينفخ فى صورتها وتنضف مصر
دمت بخير
بسنت
اللهم امين ويصلح لها الحال بلدنا الجميلة دى
فعلا فى عناصر فى الشرطة كويسين جدا
ربنا يحفظهم ويزيدهم
تحياتى لتواجدك
شاب فقرى
إرسال تعليق