الأحد، 1 نوفمبر 2009

الفقرى هيفضل فقرى..

السلام عليكم ورحمة الله وبركاته
أعزائى وإخوانى المدونين
لا أريد للخطاب أن يكون رسميا
ولذلك .....
مساء الجمال عليكم جميعا ومساء بلون الجبس أبيض وزى الفل كمان :)
الفترة اللى فاتت ال 24 ساعة الماضية
مش عارف ليه بعتبرها فترة كبيرة
يمكن من كتر اللى حصل فيها من مشكلات ومواقف وحوادث رهيبة بالنسبة لى على الأقل


أول خبر : الشخص القذر اللى أبسط ما يوصف بيه إنه قذر اللى دخل يسب فى رسول الله صلى الله عليه وسلم فى التعليقات عندنا
وكمان اللى إنتحل شخصياتنا وقعد ينزل تعليقات هنا وهناك
واللى ظن إن سكوت البعض مننا عاللى بيعمله ومسح التعليقات بهدوء هوا خوف وان قفلى للتعليقات كان لانى هبطل تدوين
لاء يا حقير الموضوع مش مسأله خوف ولكننا ننزه مدوناتنا عن كلماتك وعن تواجدك
ومش عايزين نجعل لشخصية قذرة مثلك شأن بان نهتم بيها
وكمان فقرى مستمر رغم أنفك ورغم أنف أمثالك وكلنا مستمرين ولن ننتبه لك فالقافلة تسير والكلاب تعوى
وبالنسبة للتعليقات اللى بتوزعها هنا وهناك بإسم (( عاشق الجنة من الإخوان أو شاب فقرى ))
فدى إن دلت لشىء فبتدل على إنك عايز تشوشر على ناس محترمة
صراحة أنا إتعرفت ال 24 ساعة السابقة على مدونين كتير بسببك
كل شوية حد يقولى إيه اللى بتعمله دا وبيكلمنى وهوا مش مصدق وأتعرف عليه
يعنى لو الواحد كان عامل إعلان مكانش هيجيب الأثر دا
حتى عاشق الجنة اللى عمرى ما كنت هدخل مدونته فى أحد الأيام لأنه ينتمى لجماعة الإخوان التى أتعارض معها بشده
بسبب اللى عملته دخلت مدونته ووصلت لأفكاره وزاد إحترامى له وللتيار المنتمى له
وكذلك الناس إن شاء الله هتعمل معايه كدا برده وهتوصلى وهتفهمنى
أنا هسكت فى الموضوع دا لأنه لا يستحق كلام أكثر من ذلك

ثانى خبر : وفاة الدكتور مصطفى محمود
الخبر صدمنى وألمنى بالرغم من إدراكى و إقتناعى التام بأن الموت علينا حق وأننا فى الدنيا عابرى سبيل لا أكثر
لكن مقدرش أقول إلا كما قال المصطفى عليه الصلاة والسلام
يحزن القلب وتدمع العين ولا نقول إلا ما يرضى ربنا وإنا لفراقك لمحزونون وإنا لله وإنا إليه راجعون
اللهم إلهمنا الصبر وإلهم الشعب المصرى كله الصبر فى الفقيد
فقد كان عالما جليلا مؤمنا تقيا وأبا فاضلا لجميع المصريين
البقاء لله

ثالث خبر : لقاء المدونين
خلاص إستقر الرأى على اللقاء فى المنصورة دا اللى وصلت له من المدونات للمدونين أصحاب الفكرة
وإن شاء الله ناوى أحضر ويهمنى الحضور بس دعواتكم الظروف تساعدنى والهوا ييجى سوا
بس طبعا وأكيد مفيش نيه عندى لموضوع التبرع بالدم اللى هيحصل دا ...يعنى أول مرة أروح لقاء تدوينى يطلع فى إبر وتبرعات بالدم
دا انا عمرى ما فكرت أعملها
وحتى أما نزفت ساعتين مأخدتش ولا نقطة دم من اى حد
عالعموم
شكلى بفكر فى عدم الذهاب
أكيد هنشر بوست خاص عن الموضوع قبل اللقاء بيومين على الأكثر
فياريت أى حد يعرفنى ناوى يحضر يقولى
لانى معرفش فى اللقاء غير (( الشعب لابد له من حكومه تشكمه و مسدس صغير ))
ومش عايز حد يقولى مادام متعرفش حد رايح ليه :D

واخيرا بوجه شكر لأى حد سأل عليه بعد البوست بتاع إمبارح دا ولو حتى بإيميل
بجد شكرا شكرا شكرا والناس عارفة انا بتكلم عن مين
بس خلاص
مش فاكر كنت عايز أقول إيه تانى
بس كدا كفاية على هذا البوست
والتعليقات مفتوحة وتحت الرقابة
تحياتى لكم جميعا
شاب فقرى الأصلى :D

هناك 87 تعليقًا:

محمود مخلص يقول...

حمد الله علي سلامتك من كل الي حصل دا و ولا يهمك

فراشة يقول...

حمدا لله على الرجوع وكلنا متأكدين مليون بالمائة ان حضرتك لايمكن تقول كلام مش كويس ...

وطبعا مدونتك هتفضل موجوده

وربنا ميجيبش اى سوء تفاهم تاني ابدا

بالتوفيق دايما يارب

مسدس صغير يقول...

تيجى وتنور طبعا يا باشا
منتظرك
ان شاء الله

الشعب لابد له من حكومه تشكمه يقول...

لسسسسسسسسسسه جايه من فرح حااااااالا..وسامعه الفن الاصيل انا اشرب سيجاره بنى والست لما وراااااااائع الغناء الاصيل.
ادخل الاقى البوست ده؟؟؟؟؟وكلمتين يغيظونى:(

وعلى فكره لينا حسااااااااب جااااااااااااامد على الكلمتين البايخين اللى قلتهم..اه كلمتين بايخين...
ايه معرفش حد غير الشعب ومسدس دى؟؟؟؟؟؟
مش ماليين عينك؟؟؟؟؟؟؟؟؟؟؟
(وش متعصب وبيزعق)
ال معرفش غير اتنين ياسلااااااااااام...بدل متقول دول كفايه انى اشوفهم واتعرف على الباقيين....:(

_ربنا يرحم دكتور مصطفى محمود انا كبرت لقيت برنامج العلم والايمان وكنت بحب الميوزك بتاعته جدااا ولسه لحد دلوقتى فى حلقات فاكراها وهو يقول سبحان الله شوف شوف الطيور بتخاف على اولادها ازاى سبحان الله...
ربنا يرحمه ويعفو عنه ويغفر له..

أميرة علي كوكب مهجور يقول...

انا معرفكش بس والله مصدقتيش انك انت اللي تكتب الكومنتات دي

وبالنسبه للقاء انا جايه ان شاء الله بس مش هتبرع بالدم :(

мαησηα يقول...

يا اخى حراااااااام بجد .. قعدت ادور ع ايميل اجيبك فيه ماعرفتش راعى ظروف اختك جاهلة جوجل ده ههههههههه

حمدا لله ع سلامتك يا باشا واللى عملته عين العقل انا عن نفسى كنت معترضة ولو انه مش من حقى ع انك تقفل التعليق خالص

وكنت هاقترح عليك موضوع مراقبة التعليقات دى

يلا خييييييييييييييير

نورت يا باشا كنت هازعل منك جدااااا لو كنت قفلت المدونة وسيبت التدوين

تصبح ع خير بقه

شاب فقرى يقول...

محمود مخلص

صباح الفل

ولا هاممنى يا معلم

ثابتون على الدرب

نورتنى

شاب فقرى

شاب فقرى يقول...

فراشة

اللهم يهدينا ويهدى اللى عمل كدا

أكيد موجودة
مش هيقفلها غير سبب واحد بس

نورتينى وشرفنى تعليقك ومرورك :)

شاب فقرى

شاب فقرى يقول...

مسدس صغير

أبو صلاح

دعواتك معايه بعون الله هاجى :$ :)

بس المشكلة إنه يوم جمعة

دى فى حد ذاتها مشكله كبيرة

لان يوم الجمعة عندى يوم الطحن الرسمى

تحياتى لإهتمامك ومرورك ياباشا :) :) :)

شاب فقرى

شاب فقرى يقول...

شيما

الله

يوه بقى

خلاص

ما قلنا غلطة وعكه مطبعيه

:$

عالعموم فعلا الواحد ينزل وكفاية إنه يتكلم معاكم بس والله :)

وربك يستر من موضوع التبرع بالدم شكلى خلاص قربت أقتنع :$

عايزة الوردة بلدى ولا بلاستيك بقى :D ???
ومين هيدفع الحساب ؟؟؟:$

شاب فقرى

شاب فقرى يقول...

أميرة علي كوكب مهجور

شكرا عالثقة اللى إن شاء الله هتكون دايما فى محلها

:)

تنورى يوم الجمعة

والله انا ما ناوى

بس بدأت أقتنع بالفكرة :$

ودى أكبر مشكلة بتواجهنى ناو

لأن روحى بتروح بسرعة

تحياتى لمرورك وتواجدك وثقتك

شاب فقرى

شاب فقرى يقول...

๓คภ๏ภค

والله أنا جاتلى لحظة كنت ناوى اجيب ضلفها

لولا عالصبح دخلت مدونة كدا وسمعت اغنيه بتقول إبدأها دايما بسم الله

صبرت وفقت وفهمت الحكاية شوية شوية

الميل فى البروفايل

الله ليه الإحراج دا

انا صراحة بعشق التراسل البريدى

انما المسنجر نادر أساسا إنى أفتح حسابى الشخصى

على طول على ميل الشغل بتاعى وبس

وكمان مش برد عالعملاء :D

رخم أنا صح ؟؟؟

نورتى المدونة وفرحنى إهتمامك جدا

وشرفنى تعليقك وتواجدك

وإنتى من أهله

شاب فقرى :)

الشعب لابد له من حكومه تشكمه يقول...

عاوزاك تيجى باسلامه ان شاء الله:)
وبرضه لينا حساب جامد كل مدخل عند حد الاقى الكلمتين دول:(
وبتقولى يوه كمان يوه..حسابك تقل اوى..ماااااااااااشى ان غدا لناظره قريب باذن الله,ان شاء الله ....
اوعى حد يشربك حاجه اصفرا فى الطريق ولا ياكلك الحلاوه يازكى:) واى حد يقولك تعالى اوديك لشيما اوعى تروح معاه..
اللهم مبلغت اللهم فاشهد.ونكمل باه النصايح ومتنساش تشرب اللبن قبل متنام بالمره:)

شاب فقرى يقول...

يا شيما :$

والله انا ما اقصد حاجة ب يوه دى

انها من أساليب اللغة العربية فى التعبير عن الدهشة

مشيها الدهشة والمسامح كريم

وبكره تتأكدى من كدا :D

لا تقل ولا حاجة

ربك يستر ومتضربش بس :$

وبالنسبة لنصائح السفر

دعواتك معانا يا طنط بقى :P

هحاول آجى بدرى ومش هكلم أى حد معرفوش :)

وكمان هجيب معايه الشوكلاته بتاعتى والعصير عشان ماخدش حاجة من حد :$

ولو حد قالى هوديك لشيما لازم أروح معاه
اللى يسأل ميتوهش

ولا إيه :D

شاب فقرى

خواطر شابة يقول...

عود محمود وتأكد ان الشجرة المثمرة هي التي تقدف بالحجارة.
"فسيكفيكهم الله وهو السميع العليم"
مع تحياتي وتمنياتي لك بدوام التوفيق

الفراغ يقول...

اهلا بعودتك
انا كنت زعلت قوى من قفل التعليقات
لانى مبعرفش ابعت اميلات
وكمان كنت اول مره اجى عندك...تقوم بعدها تقفل التعليقات
المهم حمدا لله على رجوعك ورجوع التعليقات

وبالنسبه لمن تتكلم عنه
احنا لا نعرفه ولا نسمع عنه
وانت قلت بنفسك
القافله تسير والكلاب تعوى

والف رحمة على روح كاتبنا العظيم مصطفى محمود وربنا يرحمنا جميعا

Aиgel يقول...


مساء الورد ..

أيووووه كده شوفت المدونة نورت ازاي لما فتحت التعليقات

وصاحبنا ده سيبك منه إنسان مهزأ وجاب لنفسه الكلام (:
..........

بالنسبة لدكتور مصطفى محمود
حقيقي الله يرحمه حقيقي كان نابغة أنا عرفت من عندك الصبح والله وحزنت أووووي وماما أكدت لي الخبر الله يرحمه يارب
............
بالنسبة للقاء المنصورة آآه
كان نفسي اجي أوي بس مش هينفع عشان هموت واجي مصر بلدي حبيبتي الأول (:
أتمنى تقضي وقت سعيد بين المدونين
...........

ممكن طلب بقى (:
نخليهم طلبين
1- تكمل لنا الجزء الثاني من الذين ذهبوا في سلام.
2- تبقى تحكي لنا بقى عن اللي دار في اللقاء عشان أحس أني معاكم بعد إذنك طبعاً لو هتروح .

دمت بكل خير وحب

Angel love

بنت قلبى يقول...

ايه دااااااااااا
الحبه الا روحت اروق فيهم اجى الاقى الناس دى كلها
هما بيناموا على الجهاز ولا ايه
المهم بقا
من نحيه الا انا شفه بعنيا من قله قدب بجد وقذاره البنى ادا
ما صدقتش خالص ان انت تقول كده او عاشق
وعرفت وقتها ان الاسم مسروق وحتى شفت دا عند الدكوره ستيه ومصدقتش برضو
والله يهديه يارب
كفايا شويه العصب الا طلعوا منك فى الكلمتين دول عليه

ومننحيه الدكتور مصطفى محمود فا طبعا اكبر خساره انى معرفوش لان لقيت ناس كتيره جدا عرفاه وزعلانه عليه
فا الا اقدر عليه هوا
الله يرحمه يارب ويحسن جناته

ومننحيه اللقاء فا انشاء الله انت هتروح
وانا كمان نفسى اروح لانى مش متفائله
دا اذاكان قلت للبي هنا لقاء وتبرعات للاطفال وبس واعترضوا اال لو قلت دم بقا
ربنا يسهلها
وان شاء الله كده انت هتكون موجود
لانى حسا انه هيبقا لقاء كويس

Cute Kitty **sookra يقول...

هو ايه دا بقى
كل مااكتب تعليق موش يوصل
المهم حاولت كمان انى ابعت اميل لكن النت هيس خالص
شاب فقرى
ولايهمك الواد ابن التيت دا لاننا كلنا عارفين مين شاب فقرى وعارفين طريقته فى الحوار وكمان موش ممكن نصدق التعليقات الرخمه القذره بتاعت العيل ابن التيت دا
تحياتى

طهر فؤادك يقول...

السلام عليكم ورحمة الله وبركاتة ,,

ربنا يكرمك يارب والمسلمين

على فكرة كلنا معاكوا ومش تقلق من الى حصل من الشخص دة لاننا كلنا مسلمين ومترابطين ومش هياثر علينا اى حد باذن الله .. وانا عارفك وبتابعك ومن او وهلة عرفت ان العلعبة دى من شخص خبيث وربنا يهدية اللهم امين والمسلمين ..
وانا كتبت موضوع بخصوص الشخص دة ياريت تشوفة وتقولى رايك

د. ياسر عمر عبد الفتاح يقول...

بص بقي يا عم فقري
هوه ده حصل معاك إنت طبعاً علشان إنت فقري :)

أنا مدخلتش عندك كثير
ومعرفش مدونتك أوي
لكن لما الواد القذر ده جالي ودخل بإسمك مصدقتش
مش عارف ليه؟
بس والله كنت متأكد إن أكيد حد منتحل شخصيتك

الله برحم الدكتور مصطفي محمود

عمرو جويلى يقول...

السلام عليكم
رأيك صريح جداً
وموضوع جميل
خالص تقديرى

شاب فقرى يقول...

خواطر شابه

شكرا للزيارة والتعليق والتشبيه

:)

ربنا يحفظك ويعزك

شاب فقرى

شاب فقرى يقول...

الفراغ

نورتى المدونة

خلاص التعليقات اتفتحت من تانى

ربنا ما يجيب زعل

ويارب ما تكون اخر زيارة

تحياتى :)

شاب فقرى

شاب فقرى يقول...

العزيزة Angel

شرفتينى بتعليقك

وأسعدنى الموضوع اللى كتبتيه كمساندة

ربنا يكرمك يارب

بالنسبة للطلبين هنفذهم طبعا

بس دعواتكم معايه لأن يوم الجمعة عندى بيبقى مليان ومش عارف والله هروح إزاى

بس خلاص أخذت قرار بالذهاب

دعواتك معانا

أطيب التحية

شاب فقرى

شاب فقرى يقول...

بنت قلبى

ربنا يسهل وميبقاش فى تبرع بالدم

لأن إنتى شايفة فقرى لوحده فقرى مش محتاج فقر اكتر من كدا

ان شاء المولى تبارك وتعالى هآجى

تحياتى لمرورك وتواجدك

شاب فقرى

شاب فقرى يقول...

saso

الناس كلها بتقول النت كان مهيس واللى قال ملقتش الميل وكل واحد بحجه :D

خلاص سماح المرة دى

هعتبر العذر حقيقة

وهقولك

أنا فى مدونتك من إمبارح بسمع منير

:D

سيبك منه هوا على رايك ابن تيت

تحياتى

شاب فقرى

شاب فقرى يقول...

طهر فؤادك

شرفنى تعليقك وتواجدك

:)

وأسعدتتنى ثقتك ومتابعتك :$

هدخل حالا اشوف الموضوع :)

تحياتى
دمت فى حفظ الله
شاب فقرى

شاب فقرى يقول...

د. ياسر عمر عبد الفتاح

تحياتى لك ولتواجدك

وشكرا عالثقة والزيارة :)

يارب يستمر الود بينا جميعا

:)

شاب فقرى

بنت قلبى يقول...

انت عارف انا ذات نفسى ان شاء الله نفسى اتبرع وهتبرع
بس حسا انى مش هاجى لانى مخبيا البرع بدالدم دا على ماما
فا حسا انها مش هتنفع خالص
بس ربنا يسهالها يارب
ولو ربنا كبلى بقا هاجى وابرع كمان
بس هوووووووووس
كلمه كده ولا كده لاءوالنبى
الحكومه تشوطنى على طول

شاب فقرى يقول...

اللؤلؤة

أى موضوع فيهم بالظبط اللى جميل للدرجة دى ؟؟؟

نجياتى لتواجدك

شاب فقرى

شاب فقرى يقول...

بنت قلبى

والله انا كمان ما قلت لحد

مش طالبة معايا نقاشات من حد وبالذات الحاجة لان انا الصغير بس راجل البيت وبتخاف عليه ولا كأنى فى حضانة

كفاية الصداع اللى بيقطعنى كل شوية مش هستحمل خناقات على مبدأ أنا أساسا تقريبا كدا شاكك فيه

يعنى احتمال متبرعش

حسب رأيى وعواطفى ساعتها

موش هقول لحد لا تقلقى :$

بس انتى نورى اللقاء

شاب فقرى

بنت قلبى يقول...

هيا بتكون مجرد خوف بس علينا
لكن انا هتبرع ان شاء الله يارب لو جيت يعنى باذن الله
انت بس ادعى والنبى انى اجى
منا علشان سا انى امى بتنيمى فا دا الا قلقلنى وكبعا زعلانين مع بعض
فا ربنا يسترها يارب
ولو مقدرتش معاها هعرف صبرنى بقا وخلاص
والا ربنا كتبه هنشوفه
بس ياريت بس ما يعملوش تحاليل قبل التبرع
دى تبقا نصيبه والله

انت بس كده خليك على ياقين وهيسهلها ان شاء الله

شاب فقرى يقول...

تحاليل :|

يا ستار يارب

ان شاء الله خير مش تقلقى

وان شاء الله تحضرى كمان

:)

شاب فقرى

غروب يقول...

انت فقري بجد

ههههههههههههههههههههههههههههههههههههه

معلش على اللى حصل

بس زى مقولت فعلا

القافله تسير والكلاب تعوى

انا كمان زعلت جدا لوفاه الدكتور مصطفي محمود ربنا يرحمه

اما بقه عن اللقاء اللى في المنصوره

ف انا اول مره اسمع عنه منك دلوقت بس اكيد لو في لقاء في المنصوره بلدنا بلد سواح يبقي هروح ان شاء الله

ياريت تيجي ونبقي نستخبي بقه ساعه التبرع ههههههههههه

بس هو امتى اللقاء ومين اللى منظمه ؟؟؟؟؟؟؟؟؟؟؟

غير معرف يقول...

ربنا يرحم د. مصطفى محمود ويغفرله يا رب

والله ماكنتش اعرف ان الواد الرخم ده انتحل شخصيتك .... اصله دخل عندي باسم الاخوان

بس انا عندي مودريشن والصراحه يا ريت الكل يحطه لانه اوبشن جميل

وانا على فكره البوست اللي فات مااعرفتش اعلق علشان الجي ميل ده صعب عليا :D

تحياتي

شاب فقرى يقول...

غروب

اللقاء الجمعة الساعة عشرة الصبح قدام مستشفى الجامعة للاطفال فى المنصورة

اللى منظم اللقاء على حد علمى :
صبرنى يارب -- رغى إمرأة غير مطحونة
شيما --- الشعب لابد له من حكومة تشكمه
أبو صلاح --- مسدس صغير

زورى مدونة رغى إمرأة غير مطحونة هتعرفى كل التفاصيل

:)

فعلا عندك حق فقرى فقرى يعنى

تحياتى

شاب فقرى

شاب فقرى يقول...

فتاة من الصعيد

نورتى المدونة

مش مهم التعليق

كفاية الزيارة والمتابعة

:)

تحياتى لمرورك ويارب الكل يعمل اشراف عالتعليقات

شاب فقرى

donya يقول...

صباح الخير

الشخص اللي بيتستر وراء اي اسم ويدخل يضايق الناس شخص طبعا ضعيف الشخصيه
ومريض نفسي من الدرجه الاولي
علشان لو كان عكس كده
كان دخل بصفته هو
ومااداراش تحت اسامي ناس تانيه

المهم ان الموضوع خلص والوجه المشرق انك اتعرفت علي ناس جديده

*تحياتي

رابطة هويتي اسلامية يقول...

السلام عليكم ورحمه الله وبركاته

اسال الله ن يوفقك لكل ما يحبه ويرضاه

نتمنى مشاركتنا النقاش حول شعار الوطنى من اجلك انت !!

شاب فقرى يقول...

donya

نورتى المدونة

شرفنى تعليقك للمرة الأولى

الحمد لله فعلا الحسنة الوحيدة للموضوع انى اتعرفت على ناس جديدة :$

تحياتى لتواجدك ورأيك فى المدونة
شاب فقرى

شاب فقرى يقول...

رابطة هويتى إسلامية

آسف ... أرفض النقاش

شاب فقرى

mimi يقول...

أنا متباعاك من زمان بس لما وصلني تعليق بأسمك وبمنتهي الحقارة .. عرفت إن ده مقلب معمول فينا

برافو انكم عديتو الأزمة

تحياتي

شاب فقرى يقول...

mimi

نورتى المدونة وشرفنى تعليقك وتواجدك ومتابعتك

الحمد لله إن الأزمة دى مرت على خير :)

خالص تحياتى

شاب فقرى

بيطرية ومش بايدى يقول...

وسسسسسسسسسسسسسسسسسسسسسسسسسسسع
وسسسسسسسسسسسسسسع طريق الاسعاف

البيطرية هتقتحم يا ردالة
بعد ال44
وام اربعة واربعين

سلامو عليكمممممممممممم

بيطرية ومش بايدى يقول...

ازيك يا اصلى
والنعمة اصلى اصلى
ولا حد يقدر يقول عليك غير كده
انا كنت متاكده تماما ان القذر ده هو اللى عمل كده بس ولا يهمك
البدلة البيضة عمرها ما هتتوسخ يا فندم :)))))))))))))

شاب فقرى يقول...

وعليكم السلام يا بيطرية

نورتى


هخلى الكل يوسع

إتفضلى

نورتى المدونة :)

شاب فقرى يقول...

أصلى والنعمة

على رأى سحس بمب

هههههههههههههههههههههههههههه

وإن إتوسخت نغسلها يا فندم :$

صباح الفل

بيطرية ومش بايدى يقول...

عارف انا كنت خايفة انشر تعليقات اى حد المعفش ده يتعرضله
ولا ياخد اسمه
بس شكلى كده هانشرهم وامرى الى الله

اه البقاء لله ف العلامة مصطفى محمود رحمه الله رحمة واسعة وادخله فسيح جناته
اللهم آآآآآآآآآآمين

بيطرية ومش بايدى يقول...

اه وفكرت انى ابعتلك ايميل
بس عرفت انك هوت ميل وانا معنديش هوت كفاية عليا ياهووووووووووووووووووووووووووووو

:)))

يلا سلامات بقى عشان ماازهقكش

سلامووووووووووووز

------ يقول...

لالالالا

فقرى فتح التعليقات

حمد لله على سلامتك ياراادل

------ يقول...

لسة جاية من برة

وقولت لو فقرى مفتحش التعليقات هنتخانق بقى

اصل انك تفقل التعليقات مش حل
اللى اتعمل اتعمل وخلاص

حسبى الله ونعم الوكيل

------ يقول...

الفقرى فقرى
ههههه

دى يومياتك ولا اييييه

نروح نقرأ ونرجع

ميرام يقول...

(:
السلام عليكم ...
بالنسبة لأول خبر ..
مش هعلق طبعا لأن تعليقي أكيد معروف ..
وطبيعي ان محدش هيتخيل ان انت صاحب التعليقات دي ..
بيقولو الشجر المثمر فقط هو الذي يُرمى بالحصى .. ولا ايه (:
بس من باب الكومنت فقط ..
استغربت انك فكرت للحظة تشيل الكومنتات ..
مش شايفة ان في حد يستحق تغير شيء عشانه وكان الموديراشن كفاية (:
وزعلت لأني مكنتش هبعت للميل ..(:
بس خيرا فعلت بانك رجعتها تاني (:



....
الدكتور مصطفى محمود ..
أنا كمان كنت بحب البرنامج بتاعه ,..
وان كنت يمكن مااتفرجتش على حلقات كتير منه لكن كان بيعجبني اني أحس ان في حد بيتفكر ومابياخدش الأمور كمسلمات ..
الله يرحمه ويسكنه فسيح جناته ...
............

لقاء المدونين (:
ان شاء الله يكون يوم جميل (:

بالتوفيق

شاب فقرى يقول...

بيطرية

متخافيش من حد ولا من حاجة

ببساطة ومن الآخر

طز فيه

مش عايز أحلف إن اللى عمله فادنتى اكتر ما ضرنى

الايميل عبارة عن رساله بتتبعت من اى اكونت للتانى ملهاش علاقة بنوع الميل

ولا يهمك كأنك بعتتى وزيادة كمان :)

انا كنت قلت لك كلمتين هفهمهم لك ناو

بالنسبة لجملة انا كنت هقول بيطرية وبيطرية

يعنى كنت هاخد اقتباس من عندك واجيب سيرتك فى البوست دا لانك من وجهة نظرى احسن حد رد عالشخصية الحقيرة دى

بالنسبة لرأيى فى الأحوان لن يتغير وهييجى يوم وربنا هوا اللى هيفض الجماعة دى بعون الله

لأن أى تجمع مفيهوش الإخلاص للمولى تبارك وتعالى يبقى مش هيكمل مسيرته بالتأكيد

أى تجمع قايم على عشق السلطة وخداع البسطاء لن يكمل مسيرته بعون الله

مش عايز أتكلم أكتر من كدا عشان مش عايز مناقشات فى الموضوع دا لأنى مقتنع برأيى فيه جدا ولن يتغير

وللمرة التانية انا مغيرتش نظريتى

والحمد لله انا تمام وزى الفل وميه ميه

لكى منى كل التحية يا دكتورة

شاب فقرى

شاب فقرى يقول...

دموع القمر

فتحت لك التعليقات أهوه

أى خدمة :)

علقى براحتك وإعملى إحتلال وهيصى :P

هوا المفروض يتحسب جزء من السلسلة الفقرية

بس بلا نيلة مش هتفرق

هوا مش حلو اوى بقدر السلسلة ما هى مليانة فقر

الحمد لله ان الموضوع مر على خير

انتظرى منى تعليق فى خلال دقايق

أخبار جديدة

شاب فقرى

شاب فقرى يقول...

ميرام

أهلا وسهلا

أنا كنت بعتت لك تعليق

وصل ؟؟؟؟

بس انا لسه مشوفتش الرد اللى فاكره انه كان تعليق عملاق كدا من كتابتى

طيب الحمد لله

بالنسبة للموضوع الأول فهوا نكرة ولا يستحق الذكر بس قلت أذكره عشان لو حد قراه يعرف اللى حصل حرف حرف

انا كنت شايل الكومنتات عشان مش يعرف بعلق عند مين ومين بيعلق عندى ويروح يدايق فى خلق الله :$

إنما أنا والحمد لله ميفرقش معايه حد ولا حاجة فى الدنيا

وزى ما قلت الصبح إن سبب واحد بس هيخلينى أقفل المدونة

دا لو حصل يعنى

ومش مهم موضوع الرسايل عبر الميل أنا أساسا كنت إتعلمته زمان من مدون شاب وصديق عزيز بس خلاص بطل يدون حاليا

لقاء المدونين إن شاء الله هيكون يوم جميل

شرفينا بقى

أنا بحضر نفسى وناوى أروح :)

تحياتى لتواجدك وتعليقك وإهتمامك

------ يقول...

عدنا بعد الفاصل الطويل دا

مساء ابيض زى لون الحليب

ههههههه
تصدق بالله انا حصلى النهاردة وامبارح حاجات بحس انها 24 ساعة كبيسة

سيبها على الله
هو المنتقم
الهى يتسخط ولا يطلع عليه نهار
انا اصلا لما دخلت عند ايثار ولقيت التعليق انا اتخضين وقولت مش ممكن يكون فقرى كاتب دا انا افتكرت انك بترد على الواد ال...... اللى داخل بأسم الاستاذ طه

بس حسيت ان الموضوع فيه ان
وقعدت احسبن عليه
بس انت الاصل برضو والحديدههه والباقى تقليد وزجاج

كنت هعمل زيك كدا بس قولت لا
احنا نعمل اشراف
وخلاص بس الانهاردة دخل وقالى كلام اقذر مايكون انا كنت هعيط والله هو المنتقم

بس انت ولا يهمك ياريس
اهى شوطة وتعدى

------ يقول...

وبم ان التعليقات اتفتحت تانى

فأحتل براحتى بقى :)

الله يرحمك يادكتور محمود

بجد مهما قولت مش هعبر عن مدى حبى ليه

ربنا يجعل مثواه الجنة

ويفكى انه ترك علم ينتفع به

شاب فقرى يقول...

دموع

بعتت لك اخر الاخبار واصل الموضوع

اقريه كويس وبعدين احرقيه :D


مش تفرق والله خلاص

الناس دى مش تهمنا

قريب هنرتاح منهم بعون الله

تحياتى

شاب فقرى

------ يقول...

تصدق انا هيجيلى نقطة منكم والله

انا نفسى اعمل لقاء مدونين كدا بس اعمل ايه بقى

لا فيه حد بيشجع ولا حاجة

وعلى الرغم من المنصورة جارتنا
بس الظروف بقى

التبرع بالدم
دى حاجة لذيذة وتاخد ثواب :)

انا عملتها فى الجامعة
لقيت الهيموجلوبين 13
بعمل تحليل الايام دى علشان اتبرع
لقيته 10 هههه

كفاية انك تروح تتعرف على ناس وعلى مدونين

احنا عندنا كام فقرى يعنى
كنا لازم نسأل عليك طبعا

ربنا يديم الاخوة

والسلام عليكم وحمة الله وبركاته

اسكت لو حكيتلك على اللى حصل النهاردة هتفطس على نفسك من الضحك
بس بفكر اعمله فى بوست
وبفكر لا
مش عارفة
بس لسه كدا

من اول مارحت الجامعة لغاية ماروحت كلها مواقف وخناقات وكدا :)

------ يقول...

كويس انى كملتهم 60 واقوم بقى

اى خدمات

------ يقول...

معلش كله بيهون
ويمكن دا اختبار من ربنا
علشان يمتحنا بيه
او فتنه او اى حاجة
بس ربنا يقوينا بقى

يامقلب القلوب ثبت قلوبنا على دينك

وربنا يهديهم يارب
ويطهر قلوبهم
انك لاتهدى من احببت ولكن الله يهدى من يشاء

:):)
وشكرا مرة تانية ياريس :)
بقولك اعمل البوست ولا هيكون كلام هبل
ولا ايه النظام

شاب فقرى يقول...

دموع القمر

نورتى

كله على الله

اكتبى واستمرى

ربنا معاكى ومعانا

شاب فقرى

م/ الحسيني لزومي يقول...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

tamer.sala7 يقول...

هو اان تقريبا اول مرة ادخل اعلق عندك بس فعلا انا اعرفك من زمان

علي اعموم المفروض ان انت شخصية محترمة وبعيدة جدا عن الشبهات ده بخلاف شغلك في عالم الانترنت يعني اكيد عندك خلفية عن 108 اللي هو مكافحة جرائم الانترنت جرب اتصل بيهم ومش ح تخسر اي حاجة

الكلام عجبك روحلهم معجبكش اقفل السكة وكمل في السكة بتاعة الاشراف علي التعليقات

بس اقسم لك ان الواد ده ممكن يتجاب بطريقة سهلة جدا وانت حتسمع منهم الكلام ده لما تتصل

'' حطام (ك) بقايا '' يقول...

اولا ازيك يا استاد فقري
بجد و الله العظيم متعرفش قد ايه زعلت امبارح لما قريت البوست و معرفتش اعلق
والله العظيم
و كون على يقين اننا عمرنا ما هنصدق كلام زي اللي اتقال عنك
و انا عن نفسي رغم اني معرفش حضرتك كويس الا اني متاكدة من اخلاقك و كلامك و ان ده بعيد كل لابعد عنك
وكن متيقن ان الصواعق لا تضرب الا القمم
تحياتي

كيكى عوووووو يقول...

ازيك؟؟
اخبارك يامان ايه؟؟
ممممممممممممم
انا ع ما اظن عارفك قبل الموضوع دة!! مش انت برضة كنت بتغيب كتيرررررررررر اوى وترجع وهكذا ايوة ايوة بنفس اسم المدونة متقلقش اكيد اسم المدونة مش مختلف وبسألك ع حاجة تانيه!!
المهم يعنى انا عايزك تفك اصلا من الحوار الفاشل ده وانا اول ماقريت البوست انك مش هتشمى
اقعدت اقول
بيب بيب فقرى برافو عليه والله
وعايزة اغنيلك والله وعملوها الرجاله ورافعو راس مصر بلدنا!!!

سماء يقول...

السلام عليكم


حمد الله على سلامتك

حلو اوى العنوان

الفقرى هيفضل فقرى

طبعا الفقرى هيفضل فقرى بمدونتة الجميلة

ومنور مدونتك

وربنا يرحم الدكتور مصطفى محمود

دمت بكل خير

Cute Kitty **sookra يقول...

ياااااااااااااااه
يانهار ياخبر يانداشه
الواد فقرى عندى وكمان بيسمع الملك معايا
دى حاجه حلوه اوى
بس الاغنيه دى انا بموت فيها اوى
اصل بصراحه كل شويه البراح اللى حواليه عمال بيضيق
منور يافندم
وبعدين وربنا وربنا وحياه دى النعمه على عنيا انا بعت اميلين امبارح لكن موش كانوا بيوصلوا



ايه دا ايه دا هو انا كمان بحلف
طيب تصدق بقى انتى فقرى بجد



وكان الحلم ......براح"

شاب فقرى يقول...

م/ الحسيني لزومي

شكرا للزيارة

ربنا يوفقكم فى الحملة يارب

شاب فقرى

ميرام يقول...

اه وصل ...
وماعرفتش أرد عليه فين (:
بس ان شاء الله هرد عليه بكره بعد ما أسلم مشروع الديزاين ..
سورري .. بعد بكرة بعد مشروع التخطيط ):

..........


للمرة التانية بتؤكد سبب واحد الي ممكن يخليك تقفل المدونة ؟؟!
ياترى ايه (:
من باب الفضول (:


بالنسبة للقاء ..
دايما بحس انها فكرة لطيفة جدا ...
بس عمري مافكرت وأعتقد ولا هفكر اني اروحه !!
تقدر تقول اني معجبة جدا بالفكرة لدرجة اني مقتنعة انها ماتناسبنيش !!!!!!
(:
مع ذلك واثقة انه هيكون يوم جميل ان شاء الله .. وهنتظر تعقيبك عليه (:

شاب فقرى يقول...

tamer.sala7

والله صدقنى انا لو عايز أقفشه بالهاكنج هجيبه هجيبه

بس الواد دا مش مصرى
:)
نورت مدونتى

وشرفنى أول تعليق ليك :)

دومت فى حفظ الله
شاب فقرى

شاب فقرى يقول...

'' حطام (ك) بقايا ''

شكرا على ثقتك الغالية :)

تحياتى لتواجدك ومرورك

شاب فقرى

شاب فقرى يقول...

كيكى عوووووو

ولكم بيكى فى المدونة :)

نورتى المدونة

سعيد بالزيارة والتعليق

وان شاء الله هستمر ومش هبطل تدوين

دعواتك
خالص التحية والتقدير :)
شاب فقرى

شاب فقرى يقول...

سماء

ربنا يكرمك يارب :)

شكرا للاهتمام والزيارة والتعليق :)

دعواتك افضل فقرى اسم بس

تحياتى

شاب فقرى

شاب فقرى يقول...

Saso

النوايا بس

بقى كدا محدش يسأل عليه

ماشى ماشى براحتك :((

انا بعشق الكنج وكل أغانيه

بس صراحة مش عارف إسم الأغنيه

اه صحيح

والنهارده فى بوستين كمان :D

خالص تحيتى وتقديرى

شاب فقرى

ليس فقيرا من يحب يقول...

السلام عليكم

ازيك يا فقرى يا اخويا

بجد والله محدش صدق الهبل ده

لعبه اصلا سخيفه ومدخلتش على

اى حد من اخواتك

Cute Kitty **sookra يقول...

وخد كمان التالت
عشان بس موش تقول اننا موش عملنا معاك واجب
يلا انشالله ماحد حوش
هههههههههههههه

Cute Kitty **sookra يقول...

وخد كمان التالت
عشان بس موش تقول اننا موش عملنا معاك واجب
يلا انشالله ماحد حوش
هههههههههههههه

شاب فقرى يقول...

ميرام

ردى فى أى مكان المدونة كلها تحت أمرك

معلش إتأخرت فى الرد بس عشان بكتب حاجة مهمة جدا بوست جديد فى السلسلة

أكيد السبب مخفى حاليا

بس هقوله فى أحد الأيام

وساعتها هبقى أبعتلك السبب فى تعليق خاص كمان :)

يا خسارة

كان هيبقى تواجدك مميز

أكيد لو انا روحت هعلق عاللقاء

لحد دلوقتى مش مقتنع أوى بالذهاب

تحياتى لتواجدك :)

مش عارف كنت عايز أقول حاجة مهمة
وتقريبا نسيت

شاب فقرى

شاب فقرى يقول...

ليس فقيرا من يحب

شكرا للثقة الغالية وللإهتمام المميز

تحياتى لتواجد :)

دا العشم برده من كل أخواتى

تحياتى

شاب فقرى

شاب فقرى يقول...

saso

احلى واجب واحلى كلام

الاغنيه اسمها إيه بقى ؟؟؟؟

شاب فقرى

marmar يقول...

انا لقيت تعليق من اسمك عندي عل مدونه ومحاولتش انزلو حتى او افكر اشوف البرفايل بتاع الشخصيه نفسها وطنشت الحوار لانو هبل يعني
والنهارده بالصدفه لقيت تعليقك عند كيارا بشكل محترم فأستغربت وقلت طب ازاي اللي كتبلي كلام وقح بيقول كلام كلو عقل وكويس ودخلت على مدونتك وشفت البوست ده وفهمت الحوار
بس اللي مش فاهماه طب الشخصيه دي ليه انتحلت اسمك انت بالذات وايه هدفها من كده وايه حكايه الهاكر وتغيير الباسوردات والكلام ده كلو ياريت بجد تفهمني لاني مضايه وزعلانه من اللي بيحصل ده كلو

شاب فقرى يقول...

marmar

شكرا جزيلا عالثقة الغالية

ونورتى المدونة

نتمنى نشوف تعليقاتك مرة تانية

شاب فقرى

ميرام يقول...

بس هقوله فى أحد الأيام

وساعتها هبقى أبعتلك السبب فى تعليق خاص كمان :)

(:
طيب


(:
مش عارف كنت عايز أقول حاجة مهمة
وتقريبا نسيت
(:
طيب .. هروح أرد على الكومنت الي قبل ده ..........
(:

شاب فقرى يقول...

ميرام

إن شاء الله تدركي السبب بدون قول فى أحد الأيام

لا أذكر حتى الآن ما نسيت

أو ربما تناسيته قاصدا

:) :)

تحياتى لكل ما تكتبين

شاب فقرى