الخميس، 22 أكتوبر 2009

محدش علمنى حاجة ...أنا علمت نفسى بنفسى



بسم الله الرحمن الرحيم
ياترى إيه الفايدة من المشى الكتير اللى كنت بمشيه دا ؟؟؟
كنت بقول لنفسى حاجة واحدة بس
إن مهما طال المشوا وكانت السكة صعبة ومرهقة
لازم تكمل مينفعش تقف تريح
مينفعش تخون ثقة الناس اللى وثقت فيك وتريح وتقف ولو حتى للحظة ولو حتى للراحة

((أى واحد فينا حياته زى السفينه ... لو مش عارف رايح فين تبقى سفينة بلا ميناء عايش حياتى لوحدى ...قاعد قدام جهازى ونتى ( النت ) مفيش حاجة فى الكون كله ممكن تغير فلسفتى ))
يعنى زى النهارده
كتر التركيز والفوقان والمداومة على الشغل
تخلى أجدع واحد يقول لاء نقف شوية
بس حتى مينفعش تقف وتنام
كان زمان فى واحد صحبى أوى قالى جملة مش فهمتها
قالى يا فقرى أنا شغال لوحدى
دلوقتى فهمت معناها
إنك لازم تعمل كل حاجة بنفسك
تشتغل لنفسك مبيعات و support وكمان تبقى الإدارة والفراشين واللى بيعمل القهوة
بتطبق يوم ورا التانى
بتواصل
عشان عندك اللى عايز تعمله
مينفعش تسيب حاجة لحد
لأن مفيش حد هيكمل سكتك أو هيساندك بالشكل اللى أنته عايزه
عملتها مرة فى سنة من السنين فى الكلية وإعتمدت على ناس كتير وسبحان الله
كلهم خذلونى
مش خانونى
لكن محدش عمل المطلوب منه بالشكل السليم
(( حاجات كتير لازم أحققها يلا غنى معايا ...أكيد هييجى يوم والصوت دا هيبقى له نهاية ))
بتحاول تفوق فى كل ثانية لازم ترتاح فيها عشان تكمل
لازم عشان تطلع شمسك وتعيش صح إنك تعمل المستحيل
ضغط .... سهر ... مواصلة أكتر من يوم سوا ... مذاكرة فى أكتر من كورس لأنه مينفعش تقف وتصبر
لأن لو وقفت هيبقى كل اللى فات من غير معنى
معنى الوقوف إنك خلاص ملكش معنى وتعبك ملوش معنى ولا اللى عملته هيفرق
لأن حالة السكون هتعود الواحد على الراحة
تحاول ترجع بالذاكرة شوية
تهدى أعصابك وتفكر فى اللى فات أول ما بدأت
محدش مد إيد المساعدة ومحدش حتى كان بيقولك تعمل إيه أو تمشى إزاى
دلوقتى لما عرفت وبقيت فت
ناقصك إيه ؟؟
الراحة ؟؟؟؟
أكيد هييجى ساعة وتقوم ترتاح
أكيد هتيجى لحظة تقف فيها
بس لما تبقى فى السليم
مينفعش السكون ولا الخضوع للراحة دلوقتى
تفتكر جملة كان المشجعين بيقولوها دايما للى بيلعب فى الماتش أيام الطفولة
(( معلش معلش إلعب ميهمكش ))
تبتدى عقلك يفصل أوتوماتيك وتبتدى دماغك تتقل
وتقرر تعمل كوباية قهوة
وتقوم تعمل القهوة وإيدك بتترعش من التعب وكتر التركيز
تتألم من اللى حالك وصله
لكن لازم تكمل ومينفعش تقف أو حتى تأخد رست صغير
تقوم تعمل القهوة وتغير منظر وتقف فى الهوا فى البلكونة
تحس إنك دايخ وهتقع
تفكر فعلا فى فكرة الوقوع
هيحصل إيه يعنى لو وقعت ؟؟
كسر ؟؟؟
بس أنته عمرك ما عرفت الكسر
تشرب القهوة فى ثبات
يبتدى عقلك توصله الرسالة
عايز أطبق كمان يوم
عايز أكمل شغلى وأكمل مسيرتى
تبتدى ترن جملة فى عقلك
(( ثق فى ربك ثق فى نفسك ... قوم عشانك قوم عشانى ))
وتقرر فعلا إنك تقوم
وترجع للجهاز وللشغل من تانى وتفكر فى إنك تكتب البوست دا وتقوم تنام
ولكن خلاص حتى لو عايز تنام فات الأوان
إنته دلوقتى فايق
كمل بقى ...

شاب فقرى
فاصل ومواصل
-------
ملحوظة اللى بين الأقواس أغانى راب

هناك 36 تعليقًا:

محمود مخلص يقول...

شجعتني والله,واهم حاجة فعلا انك تعمل الي انت عايزه بنفسك انا بحاول امشي كده في الحياة..ربنا يكرمنا ويكرمك

محمود مخلص يقول...

ايه ياعم مابقتش تيجي عندنا ليه:)
المهم بوستك جميل ياباشا

Cute Kitty **sookra يقول...

هيييييييييييييييه
بسرعه بسرعه
تانى تعليق
هاقرا وارجع بسرعه

غير معرف يقول...

موش عارفه ..... بس انا موش بحب استهلاك البني ادم لنفسه كده

بس انت شكلك ووركهوليك بقا

ربنا يقويك ...... بس حاول ترتاح علشان ما تفصلش فجأه

تحياتي

غير معرف يقول...
أزال المؤلف هذا التعليق.
Cute Kitty **sookra يقول...

الله عليك
بجد انحنى امامك واخلع قبعتى احتراما وتبجيلا
انت عارف انى اعرف شخص زيك كدا ومعجبه بيه اوى ,معجبه باصراره وقوه عزيمته وطموحه اللى مالوش حدود .
عارفه انك دلوقتى حالا فهمتنى مشكله عشت فيها عشر سنين وماكنتش عارفه ايه سبب كسرتى دى
دلوقتى حالا فهمت لانى قبل العشر سنين دول كنت زى مابتقول كدا بتعب اوى وبركز اوى وموش باسمح لاى حاجه ولا لاى حد انه يعطلنى عن هدفى وماكنتش بعتمد على اى حد
وجات لحظه بعد ماتخيلت انى كدا وصلت لبر الامان ولازم ارتاح واللى حصل انى كنت لسه فى البحر ولما بطلت اسبح غرقت فى البحر
نبهتنى لحاجه مهمه اوى من غير ماتاخد بالك
تحياتى بجد وانحنى مره ثانيه واخلع قبعتى احتراما ليك
تحياتى وربنا يوفقك

غير معرف يقول...
أزال المؤلف هذا التعليق.
غير معرف يقول...

معلش الجهاز هنج ونشر التعليق تلات مرات

يظهر اتعدى منك نشاط زيائد :D

الشعب لابد له من حكومه تشكمه يقول...

صح وصح اوىىىىىىىىىىىىىىىىىىى كمان

موناليزا يقول...

دى فعلا حقيقة
إذا اردت ان تحصل على شئ على اكمل وجه فاصنعه بنفسك

The illusionist يقول...

دى احلى حاج عجبتنى فيك يا استاذ
عشان كده
انا هبدا من دلوقتى
محدش هينفعنى
حتى اخويا
حتى انا مش هنفع نفسى لو فضلت كه
بوستك بيتكلم عن اللى بيدور جوه شاب
لسه عاوز يبقى حاجه
انا عجبنى البوست جدا
اعذرنى على تغيبى
الدراسه شديده عليا

سلمى يقول...

السلام عليكم
حلوه اوى مدونتك
فعلا والله وانا بقرء البوست ده افتكرت
كام شخص خذلنى وكام شخص حاول يكسرنى حتى لومن غير ما يقصد بس مجرد انه يخذلك وهو شخص عزيز اوى عليك ممكن يكسرك
بس انا دايما بحاول ارمى ورا ضهرى عشان متكسرش لكن الصراحه اتكسرت كتير اوى من جوايا
تفتكر حد كان واخد باله
الله يسمحك قلبت عليا المواجع

------ يقول...

صباااااااحك ثكر

شكل البوست مفعم بطاقات عالية
ههههههه


نروح نقرأ ونرجع

فاصل قصير ونواصل

لان البوست عنده انيميا النهارده هههههههه

ميرام يقول...

(:
(ان لبدنك عليك حق )
وده مش كلام معاكس ولا ضد مبدأك
لأنك بتفكيرك بتناضل عشان توصل لهدف لو ماوصلتلوش عمرك ماهترتاح
بس الفكرة كلها ان أوقات الارهاق الكتير بيخلي عزيمتك تضعف حتى لو مانتبهتش
عشان كده ربنا حتى لما أمرنا بالعبادات أمرنا بأخذها تدريجيا ..
وعشان كده الرسول عليه الصلاة والسلام لما رأى عثمان بن مظعون يقوم الليل ويبالغ في الصيام والقيام قاله ان لبدنك عليك حقا
مع ان الهدف هنا هو أرقى هدف مش مفروض النفوس تكل فيه وهو الجنة
بشدد تاني اني مش ضد بذل الجهد وانك تسعى لهدفك بكل ما أوتيت من قوة عشان ربنا يكرمك وتوصله باذن الله
بس أول ماقرأت البوست افتكرت مباشرة قول معاوية
ما رأيتُ إسرافًا في شيء إلا وإلى جانبه حق مضيع
و..
مع تحيــاتي

------ يقول...

لااااا

حضرتك يعنى انا لا اتفق معك فى هذا المنظورر
لازم تكمل مينفعش تقف تريح

انت كدا خلطت بين العمل الصعب والعمل الدءوب

العمل الدءوب اللى تقصده مش معناه ابدا العمل بلا توقف او بدون راحة

والا كان دا اجهاد للنفس

يعنى مثلا اتنين كل واحد منهم ماسك حاجة تقيلة بإيد واحدة

واحد فضل شايل شايل

والتانى شالها شوية وساب شوية ورجع شال شوية وكدا

تتوقع مين منهم لما يسيب الحاجة دى
اللى هيبقى مرتاح
الاولانى هيكون فطس وهتقولو تعالى مثلا ساعدنى هيقوول لا انا مش قادر

والتانى هو اشتغل صح فى العمل الاولانى
فعلشان كدا ممكن يروح لاى عمل تانى

فخمتوووو ولا ايه النظام يافقرى

وانك تستريح دا مش معناه انك بتخون ثقة اللى حواليك
ماهو ان لو مخطط لحياتك صح هتبقى مية مية

والنجاح بيجى بالاجتهاد اه بس برضو انك تريج نفسك ولو فترات قصيرة ودى تعمل حسابها فى الخطة اليومية اللى انت بتعملها لنفسك


نروح نكمل

ايون كلامك مظبوط ركز على نفسك
واجتهد لوحدك علشان توصل

والتخطيط والهدف دول حاجات مهمة جدا
هما اساس الانطلاق فى الحياه

ومش معنى انك نجحت فى حاجات كتير تقف لا
الحياه محطات فلازم انك فى كل محطة تحدد هدف ومتقفش عند تحقيق هدف واحد لكن ابحث عن كل جديد وابحث عن ايه اللى انا لازم احققه

لا يابنى انت كدا هتموت نفسك مش هتوصل
وحتى لو وصلت هييجى يوم تزهق

لأن لو وقفت هيبقى كل اللى فات من غير معنى
معنى الوقوف إنك خلاص ملكش معنى

حلوة الجملة دى

لازم تنتهز كل فرصة ولحظة فى حاضرك لانك مش عارف ايه اللى هيحصل فى مستقبلك

اهاااااااا
انا كدا فخمووو قصدك يابروفيسير

عايز أطبق كمان يوم
عايز أكمل شغلى وأكمل مسيرتى
ببس انا برضو مش متفقة معاك
لانك لو وقعت وجرالك حاجة
مين اللى هيمسك شغلك اللى محدش هيقدر يطلعه زى ماانت عايزة غيرك

اه انا اعمل واشتغل ومضيعش وقت ولا اى حاجة لكن برضو ارتاح استرخى
انام نص ساعة هقوم عقلى نشيط هكمل وانجز اكتر ما
هكمل وانا تعبان ونهمك كدا وشوية شوية هيطلبوا الاسعاف

بس طلب صغنون
يعنى انا لما بحضر المحاضرات ببقى مركزة اول ربع ساعة و3 اربع الباقيين نو تركيز
دى حاجة والحاجة التانية انى مبلحقش اكتب ورا الدكتور لا عناوين ولا ايتها حاجة
فدا خلانى فى حاله بؤس ويأس واحباط اشمعنى انا اللى كدا
ومبقتش اروح وقولت هستلم الكتب
هعمل الشيتات وافقعد الخص واذاكر مع نفسى
مافيه ناس مبيروحوش وبيجيبوا تقدير واحنا اللى طالع عنا
مش بنحصل حاجة
ومش عارفة اعمل ايه لان الاحساس دا ماسكنى
وبعدين حاجة تانية عاملين محاضرة كل يوم من 9 ل 10 ونص
طبعا
انا قولتلك على البهدلة اللى بنشوفها واحنا رايحين الجامعة
طلعت بدرى طلعت متأخر كله سواء نفضل مستنين الميكروباص وطبعا دايما اول ماييجى الاولوية للصبيان
وعلى بال مابنوصل ونيجى ندخل نلاقى الباب مرزوع فى وشنا ونبقى عامين زى المطاريد
ونرجع فى اول ميكروباص رايح على بلدنا
ههههههههه
وبصراحة السنة دى انا مش شايفة فيها اى معالم للامل
والدنيا معايا سوداء وشكلى انا للى هلبس نظارة فاشل زى الصورة بتاعتك كدا
نفسى حد يدينى دفعة كدا
يقولى اعملى واحد اتنين ثلاتة
ظبطى يومك كدا
انا ساعات بيجيلى وقت مش بكون عايزة اعمل فيه حاجة غير انى اقع متنحة ههه

معلش انا بتقل عليك
وبرغى كتير
بس عندى حاجة تانية كمان لانى بجد كنت هعيط امبارح فيه حد ومعرفش مين دخل عندى فى الميل وقعد يرص فى كلام هو شكله بيزور المدونة بس انا مش عارفة مين ومستغربة جاب ميلى منين
وقعد يقول انت وانت وانت
وخلانى منحله وفى نفس الوقت متطرفة ههه انا كنت هعيط وعملتله اجنور بس بجد
انت شايف فى كلامى او ردى على اى حد فى تجاوزات انا اصلا فكرت انى اقفلها واريح دماغى
عايزنى اضيفه فبقولوا حضرتك انا مبكلمش ولاد على الميل قعد يقول والله ياقطة امال بتقعدى ترغى وتتمايصى فى ردودك وكلامك على المدونة هو دا مش كلام برضو ولا ايه وكلام كتير
مش عارفة بقى

معلش لتانى مرة انى بصدع دماغك
وبرغى كتير

تحياتى لك

------ يقول...

معلش بقى خد 30 جنيه كمان

يبقوا 60 اصل شكلك المرة اللى جاية

مش هتدخلنى علشان الكلام الكتير دا ههه

انا قولت اكتب كل اللى عندى فى تعليق واحد كدا بدل ياعينى ماتفضل رايح جاى

امشى بقى
عقباال عندك كدا يافقرى ياارب وتلاقى العرورة
شبكة بنت عمتى وطبعا لاومن اكون معاها
وانا رغيت كتيير وشكلى هضرب هه

بس يارب متكنش صحتك خلصت بس من كتر المشى واول ماتلاقيها يغمن علييك من كتر التعب وعدم الترويح عن النفس هههه

ربنا يكرمك ويعزك يارب

شاب فقرى يقول...

محمود مخلص

أهلا بيك فى المدونة

والله بفوت يا محمود بس مبيبقاش فى وقت أحيانا حتى للرد

فى ضغط شغل زى ما أنته شايف ومش بنام حتى

إن شاء الله عن قريب أوى هظبط كل حاجة وهتلاقينى زى الأول وأكتر كمان

تحياتى يا جميل

شاب فقرى

شاب فقرى يقول...

saso

ولكم بتانى تعليق :P

فى إنتظار تعليقك

:)

تحياتى

شاب فقرى

شاب فقرى يقول...

فتاة من الصعيد

أهلا بأحسن ناس :)

لازم الواحد يتعب عشان يلاقى

تحياتى

شاب فقرى

شاب فقرى يقول...

saso

تسلمى على رفع القبعه :$

أنا غلبان مستاهلش دا كله

بس ياترى إيه اللى شفتيه فى البوست فكرك بالماضى وعرفك غلطة قديمة ؟؟؟؟

بالانتظار

شاب فقرى

شاب فقرى يقول...

فتاة من الصعيد

يا ولكم يا ولكم للمرة التانية

ولا يهمك :)

كنت سيبيهم أحس بأن فى حد بيرد :$

وفى ردود كتير بقى وكدا

تحياتى للجهاز النشيط

شاب فقرى

شاب فقرى يقول...

الشعب لابد له من حكومة تشكمه

ربنا يكرمك :)

بس الناس مش فاهمة دا مش عارف ليه

شاب فقرى

شاب فقرى يقول...

موناليزا

ومازال جارى العمل على الصنع :)


تحياتى لتواجدك

شاب فقرى

شاب فقرى يقول...

THE illusionist

للأسف أنا مش لسه عاوز أبقى حاجة

الحمد لله بقيت

وعايز أكبر كمان وكمان :)

شد حيلك

وإبقى إسأل علينا

وربنا معاك يا هندسة

شاب فقرى

شاب فقرى يقول...

سلمى

أكيد كل واحد قبل ما بيزعل حد بيبقى عارف

عشان كدا انا مش بسامح حد

التسامح للناس القريبين بس وبلا حدود

غير كدا كله بالسلامة

تحياتى لمرورك

وخدى بالك إياكى والإعتماد على حد غير المولى تبارك وتعالى

شاب فقرى

شاب فقرى يقول...

دموع القمر

صباح الفل


ليكى منى رد كبير أوى


بس الصبر أخلص كل التعليقات دى

فقرى

شاب فقرى يقول...

ميرام

فعلا البدن ليه عالإنسان حق

صدقتى فى كل كلمة قلتيها

لكن

فرضا إن مهندس عمل تصميم لمبنى كبير والمبنى وقع

يا ترى وقع ليه ؟؟؟

لأن المهندس كان سرحان وهوا بيرسم أو نام ونسى تفصيله صغيرة اوى

او شاعر كتب بيت الناس اخذته عليه وقالت إنه أسواء بيت فى تاريخ الشعر
زى مثلا :
(( وكأننا والماء من حولنا
قوم جلوس حولهم ماء ))

يعنى قصدى ان الواحد مينعش يقصر

أنا بقى فى مجال عملى التقصير بيكون بالتأخير

يعنى لو إتأخرت عالعميل ساعة واحدة يعتبر إنى كدا نصبت عليه

أنا شغلى فى النت
الثقة والسرعة والصدق أقصر الطرق للنجاح فى مجال عملى

حتى لو على حساب راحتى

مينفعش أتأخر
لأن فى ناس معتمدة عليه فى أداء العديد من الحاجات المهمة
ودفعوا وخلاص منتظرين العمل

المفروض إنى أبذل أقصى مجهود ممكن حتى لو على أى حساب
لأن الحياة لا تنتظر
ولأن دا اللى بيبنى سمعه طيبة للبنى آدم فى الشغل
وكذلك فى كذا حاجة تانية غير الشغل زى الكورسات اللى بذاكرها بدون ما حد يشرح تقدرى تقولى بفك طلاسم وحاجات مش عارفها أوى بس بفهم فى الآخر وببقى تمام

نورتى المدونة بعد طول غياب

شاب فقرى

شاب فقرى يقول...

جينا للتعليق بتاع دموع القمر

بوم بوم بوم بوم بوم

نورتى يا دموع

أنا قريت التعليق من بعد الصلاة ونزلت أفطر وأنا بفكر فيه

وإفتكرت حاجات كتير جدا فى حياتى


بالنسبة للبوست

حلو المثال اللى قلتيه

بس لازم أكمل حتى لو مش قادر ومسير هييجى لحظة أرتاح فيها

ونيجى للجانب الآخر

بصى نأخد الموضوع نقطة نقطة :

بالنسبة للمحاضرات

طز فى الكتابه

أنا ياما كتبت وشلت المادة بل وسقطت كمان والحمد لله فقت وبقيت عارف الصح إيه

السر فى التركيز

فى المحاضرة إبعدى عن أى عوامل تشتيت إجعليها وقت مقدس إفهمى من الدكتور بنسبة 300000% عشان تقدرى تذاكرى لوحدك لما تروحى

الكتابه هتقدرى تنقلى من أى حد بس الشرح محدش هيعرف يشرحلك

والكتابة ممكن تشترى اى ورق من برا ومش مهم الفلوس لان مثلا عشرين جنيه كل اسبوع مش هتأثر

واسمعى من الدكتور وأنتى بتسمعى ركزى وإعرفى المغزى بتاع كلامه إيه يعنى الجوهر بتاع الكلام
شوفى الأساس فى اللى بيقوله إيه
هوا عايز يوصل لإيه من بين الشرح دا كله
فهمتينى طبعا

الحل الوحيد للمحاضرة دى هوا ان الواحد يصحى بدرى ويلحق المواصلات بدرى أوى أوى كمان
يعنى مثلا تبقى فى الموقف الساعة سبعة وتركبى بدرى وتروحى الكلية تقعدى هناك تقرى فى اى كتاب وتذاكرى كويس وربنا يسهل وتحضرى وتقعدى فى أول بنج كمان :D

لبس عبايه الفقر مش هيطلع الواحد من الحالة اللى هوا فيها
عارفة انا فى اول سنة من الكلية
لقيت جروب من صحابى واقف مع ناس قدام فى الكلية
لقيت واحدة منهم بتقولى
بص يا فقرى إنته بتحضر وبتكتب
أنا زمان كنت بعمل زيك وبسقط :D
كنت بحضر كل المحاضرات وبسقط
وبكتب كل المحاضرات وبسقط
مرضتش أقولها العيب فيكى لا فى الحضور ولا الكتابه
يعنى من الآخر الناس اللى مبتحضرش دى هما أحرار إنما أنتى لازم تأخدى الموضوع بجديه أكتر
يعنى تقرى الكتب بتاعتك وتتابعى مع الدكتور ويا سلام بقى لو تحضرى قبل ما تدخلى المحاضرة وتروحى بعدها على طول للدكتور تقولى له أقرا من مصادر خارجية أو لكاتب أو كتاب معين عشان أنمى معارفى فى المادة
وإعرفى إسم كاتب أو كتاب وجرى عالمكتبه و إقرى بالظبط زى ما تكونى بتقرى خواطر
بهدوء وتركيز ومش مهم تسرحى أو يفوت تلات تربع الكتاب وانتى مش فاهمة
عادى إيه يعنى
شوفى كتاب تانى
مش تزهقى
حاولى تأخذى المووضع كدراسة زى الطلبة الأمريكان
بيعجبونى أوى فى النقط دى مجتهدين بغباء
وهما لا يعرفوا الدين ولا الإسلام ولا أى حاجة
بس بيجتهدوا

هرد رد تانى لأن الرد كبير أوى وعدى 4096 حرف والبلوجر رافض ينشره

نستكمل بعد الفاصل

:)

شاب فقرى يقول...

-----------------------
نيجى بقى للأخ الفاضل اللى دخل لك عالميل دا
بصى أنا هحكى لك على فيلم كدا منيل بنيلة إسمه
Devil's Advocate
وهوا محامى الشيطان
محامى الشيطان تمكن منه وحاجات بطيخ كدا
ففى اخر الفيلم لما اكتشف الحقيقة بيقوله طب ودلوقتى مش فى إرادة حرة للبنى آدم
الشيطان قاله آه
قام صاحبنا دا مطلع المسدس وضرب نفسه بالنار :D

المغزى إيه من القصة الصغيرة دى

هوا الإرادة الحرة

أنا مش همسى بتفكير أى حد
اللى فى دماغى مش هيتغير
وأنا حر فى اللى بعمله
وأنا اللى بعمله مش محتاج تعليق من أى حد
لو حد بيحبنى وعايز يغيرنى يتفضل يناقشنى بالمنطق والدين والسنة
غير كدا محدش ليه عندى حاجة ومفيش غير الشوز :D
لأن أنا اللى هتحاسب قدام ربنا
مادمت مقتنع بأن اللى بعمله صح وميه ميه ومقتنع برضا ربنا عنى
فأنا خلاص مش محتاج حاجة من حد ولا محتاج رأى حد ولا محتاج واحد ييجى يقولى إنته غلط

طبعا الأخ دا كان من الأول قفلتى الميل ومش رضيتى تردى على حد وقفلتى الميل كام يوم ودخلتى أوفلاين وقمتى لزقتيه بلوك وخلاص

وصباح الفل

إنما المناقشة والكلام وأنا بكلم ومبكلمش والرغى الكتير بيجيب وجع دماغ

بالنسبة هل فى تصرفاتك حاجة تخلى حد يقول كدا

كتر الهزار بيخلى الناس تفهم تصرفاتك غلط والطيبة الزايدة مع أى حد

تفتكرى أنا كام مرة سمعت كلام كتير عن إنى فى حاجات كتير غلط وإنى بطيخ وحاجات ملهاش لزمة
بس تفتكرى دا هيخلينى اقفل النت واقفل الاودة على نفسى واعيط وابطل شغل وابطل دراسة فى المجال اللى بحبه وامشى زى الألف وأنزل أدور على شغل بشوية فلوس اهلك فيه نفسى وخلاص ؟؟؟

طبعا لاء
أنا ماشى فى سكتى وهكمل رغم أنف الجميع واللى مش عاجبه يخبط دماغه فى أجدع حيطة فيكى يا بلد

ومش تفرق معايه أى حد ولا أى حاجة ومفيش حاجة هتغيرنى لأنى أنا اللى هغير نفسى وأنا اللى بحرك حياتى بإيدى :) مش حد تانى ولا كلام الناس
((
يعنى من الآخر بتمايص أو مش بتمايص أو بعمل البلاء الأزرق
مفيش لحضرتك دعوة حاجة مش تخصك ولا أنا أساسا مستنيه رأيك ولا عايزة أسمعك من الأساس وإنته مين وعلى أساس إيه بتتكلم ؟؟؟ تقربلى إيه يعنى ولا يخصك إيه ؟؟؟
ولو بتمايص يعنى هوا إنته اللى بتحاسبنى
لما آجى أتمايص على جناب حضرتك إبقى تعالى إقفل فى وشى الباب وبس
))
دا الرد المناسب

واكيد هتلاقى واحدة من اللى معاهم ميلك طلعته برا

مش تقفلى المدونة

مش معنى إن الكلاب بتنبح يبقى أنا أقعد فى البيت ومنزلش ولا إيه ؟؟؟

كملى وربنا معاكى :)

وطز فى أى حد



أنا شفت ناس زيك بتتعامل بنفس الطيبة دى زمااااااااان
زيك أنتى وبيطرية نفس الهزار والطيبة والروح الحلوة بس فى ناس مش بتفهم المعنى ولا القصد


بس خدى بالك مش الهزار مع أى حد ولا الطيبة مع أى حد
فل كدا ؟

أمال بقى لو قلت لك عاللى بشوفه والمشاكل والناس اللى بتحاول تقف فى وشى وبتحاول تسد نفسى والصحاب اللى بيخونوا والناس اللى بشتريهم وبتبيع
ههههههههههههههههههههههههه
هتعرفى إزاى الواحد لازم يبقى أحيانا منعدم الأحساس ويقوى قلبه على الناس اللى بتعصبه وبتحاول تهده

ومتخافيش أنا صعب أوى إنى أقع :)

وشكرا عالفلوس دى كلها :$:$:$:$

وبتقولى إسعاف

بقولك معايه دكتور فى الأودة

بكشف وبتعالج ببلاش :P

هههههههههههههههههههههه

ربنا يستر

ومش رغيتى كتير ولا حاجة ويشرفنى تعليقك ويشرفنى إنك تأخدى رأيى فى أى وقت وشكرا عالكلام الكتير دا

تحياتى وربنا يقويكى أكتر من كدا

الفقرى الكبير

ghorBty يقول...

تعظيمـ سلامـ

بجد الكلامـ دا حساه بيحكي عني ساعات كتير بلاقي نفسنا في طريق متعب ايوا ومش شايفين له نهايه بس العزيمه ساعات والبرمجه والتعود علي المشوار بتلزمنا نكمل فيه


وعلي طول الطريق بنتعلمـ وناخد خبرات متعلمناش في المدارس لاننا بنتعلمها عملي من الدنيا

ودائما لازم نقول لعله خير كل شئ مسير لنا نمشي فيه هو في داخله خير وان كان ظاهره متعب وغامض

اهمـ شئ ان ربنا يكون راضي عنا ونخرج من الدنيا فائزين بما ينفعنا يوم القيامه ..


بس نصيحه تذكر دوما

ان لبدنك عليك حق الاستهلاك دا هيضر مش هينفع كويس اننا نواصل بس لازم لفترات من الراحه نستمد منها الوقود الروحي علي الاقل ..

------ يقول...

بجد بجد

انا مش عارفة اودى جمايلك دى فين

وربنا يكرمك وانا سعيدة انى ليا اخ زيك

وان شاء الله اعمل اللى قولتلى عليه من يوم الحد لان دى اول محاضرة ليا

انا مش عارفة اقول ايه بجد
بس
ربنا يخليك للناس اللى زيى ههههه
وبالنوسبة للنصائح يعنى
على الحساب برضو
ولا ايه النظام هههه

بص انا وبيطرية من كتر العبط اللى احنا فيه
بيضحك علينا كتير وشوفنا بلاوى من ناس كتير ومن صحابنا ومبنتعلمش
حبنا للناس بيخلينا منزعلهمش علشان منخسرهمش
وهما مش بيقدروا
البت بيطرية
دى صحبيتى الانتيم :)

وربنا يكرمنا كدا ويوفقنا فى دراستنا

تحياتى لك

جمهورية شومبونجو العربية يقول...

عزيزى شاب فقرى

معلش انا مقصر معاك

بس كلامك 10/10

وبيحصل بجد

تحياتى ليك

........
رئيس الجمهورية

Tamer Nabil Moussa يقول...

ساعات نحتاج المساعدة من الاخرين ودة مش عيب بس الاساسى لازم يكون الاعتماد الاساسى والكلى على نفسنا ومجهودنا

ربنا يوفقك ويكرمك

مع خالص تحياتى

خواطر شابة يقول...

ان لبدنك عليك حقا لو لم تعطيه له سيخدلك
يعني لو مبتنامش كويس حتموت ناقص عمر طبعا الشر بره وبعيد
مع تحياتي

نعكشة يقول...

Run forest Run

,,,,,,,,

may Allah be with u

..........

فيه شوية كلام اثرتهم فى نفسي .. بس دول يخصوني انا نفسي
فملهمش لازمة هنا

تسلم

......


سلام عليك

الله معك

غير معرف يقول...

بجد عندك حق والله لما بعمل حاجة بنفسي بتطلع مظبوطة لو اعتمدت على حد بتبوظ

بس ساعات للأسف الواحد بيضطر يعتمد على الناس ف حاجت مينفعش يعملها هو

ودي المشكله اة الظروف بتخلينى معرش اعمل حاجتى لنفسي

شكرا للنصيحة الحلوة