الأربعاء، 14 أكتوبر، 2009

السلسلة الفقرية ..الحلقة الثانية (( خريج تالتة إعلام ))


بسم الله الرحمن الرحيم
بعد الصلاة على سيد المرسلين محمد خاتم الأنبياء والمبعثين نبدأ الحلقة الثانية من السلسلة الفقرية اللى هتكمل بعون الله بس بدعواتكم لأنى مش بحب افتكر ايام الفقر أوى (( النحس يعنى )) وكمان مش عندى تفرغ الفترة دى بسبب دراسة الكورس وكمان بسبب ضغط الشغل ولكن هحاول على قد ما أقدر إنى أحكى
أنا طبعا مش بحكى عشان جموع الشعب الغفيرة واقفة تحت الشباك ماسكين الورقة والقلم والووكمان واللاب توب عشان يقروها وقاعدين يهتفوا (( كمل يا فقرى كلنا معاك )) على نغمة واحدة وطبعا دا مش حقيقى
أنا بكتب لنفسى بفكر نفسى بأيام حلوة جدا وبحبها جدا بالرغم من قسوتها اللى هتلاحظوها فى كل الحلقات الجايه
حتى فى أوقات الفرح كانت الدنيا بتحاول تعاندنى على قد ما تقدر وفى أوقات النحس والمشاكل كانت بتقولى فين يوجعك يا معلم فقرى
دلوقتى أنا هحكى على فترة بحبها جدا من حياتى هى فترة ما بعد التخرج من الثانوية العامة (( هحكى عن تجربتى فيها بعد كدا ))
طيب انا بحكى عن الفترة اللى بعد حصولى عالثانوية العامة ليه ؟؟؟؟ ومش بحكى ليه عالثانوية
مزاجى يا أخى أنا عايز كدا :D
انا بحكى عن الفترة اللى بعد الثانوية عشان فى طلبة كتير بتتوهم بموضوع الكليات والبوست دا هيفوق ناس كتير أوى
مش عارف ليه حسيت بعد ما كتبت البوست إنى فى برنامج الكابوس بتاع سيد أبو حفيظة وإنى هعمل برنامج زيه و أسميه السيرة الفقرية
***
المهم نبتدى على بركة الله ....


صلوا عالنبى الأول كدا ( صلى الله على سيدنا محمد وعلى آله وصحبه وسلم وبارك )) ....مش تستخسروا فى أخوكم دعوة بظهر الغيب

أولا كدا نهاية البوست دا هوا إنى خريج تالتة إعلام جامعة القاهرة يا جماعة يعنى كل اللى فى البوست كان سببه إنى عايز أتعلم وأوصل لمجال أنا بحبه وبحب أتابعه وهوا مجال الصحافة والإعلام عموما .
***
بعد ما إتخرجت من الثانوية العامة كنت ما شاء الله عليه شاب زى الفل او نقدر نقول عيل زى الفل ذكى ولماح وبقدر أسمع أى كلمة من أى محاضر بشكل يبهر الناس لأنى الصراحة كنت متعود على موضوع المحاضرات دا وكنت بكتب ورا الأستاذ أيام ثانوى (( الله يرحمها أيام المعيلة قال أستاذ قال )) كل حاجة بيقولها يعنى ببساطة كنت دودة كتابة وقراءة ومذاكرة وعلى قدر محترم جدا من الثقافة
فمن خلال النت إتعرفت على واحد زى الفل بكلمه قالى إنه شغال فى جامعة القاهرة ..أنا طبعت سمعت الكلمة دى من هنا وقلت إشطة ياريس الواحد هيلاقى ضهر جامد يستند عليه ببص لقيت الراجل دا شغال فى بين السرايات وأنا طبعا بينى وبينكم مكنتش أعرف إيه هى بين السرايات دى كنت فاكرها فرع تانى للجامعة جمبها يعنى أو شؤن الطلبة المهم أنا الراجل قالى عايزين حد يشتغل معايه قلت له إشطة يا معلم خدنى أنا ... مفكرتش بقى هتشتغل إزاى فى الحكومة وأنته بثانوية عامة وهندرس والرغى الفاضى دا كله
المهم .... نزلت بقلب ميت أقابل الراجل تقولش رايح أحرر فلسطين وبدأت أحس بقى ان الدنيا بتحبنى وإنى سابق عصرى وسابق سنى وراجل شديد والرغى الفاضى اللى الناس كلها بتحسه دا
المهم وصلت وقابلت الراجل وعرفت أنا شغلتى إيه
أنا هشتغل فى التعليم المفتوح أكتب محاضرات تنزل فى مكتبة معينه والمكتبه تصورها وتبيعها للطلبة (( عشان تصدقونى لما أقولكم أنا ربيت أجيال :P )) والراجل كان مقتنع بيه فى الشغلانه دى لأنى سابق سنى بكتير يعنى اللى كان يشوفنى ساعتها كان يدينى 25 سنة :D ومحدش يقولى إزاى هوا كدا وخلاص
المهم يعنى إيه تعليم مفتوح : الجامعة المفتوحة هى جامعة بنت حلال للناس اللى خلصوا تعليمهم وقرروا يدرسوا حاجة تانية وبتقبل دبلوم ومعاهد وحوارات أنا مليش فيها بس عشان تقدم فيها لازم تكون آخر فترة بين اخر شهادة خدتها وسنة الإلتحاق هوا خمس سنين وكمان المحاضرات بتبقى يوم الجمعة بس وبيقسموا مثلا الكلية الى 8 ترمات يعنى (( term )) وكل سنة بتبقى ترمين وبيبقى الصبح مثلا محاضرتين للترم الأول وبعد الصلاة تلات محاضرات للترم التانى ويتبدلوا الأسبوع اللى بعده يبقى الترم التانى محاضرتين الصبح والترم الأول تلات محاضرات بعد الصلاة

كدا الكل فهم يعنى إيه تعليم مفتوح وفهم إيه الشغل فيه
أنا بقى ولله الحمد مش أروح أكتب فى أى كلية غلبانه
لاء إفتريت والله وروحت على كلية جامدة
روحت أكتب فى إعلام
تخيل إنك بتصحى الصبح قبل الساعة سبعة وأحيانا تمانية وتنزل تشتغل يوم راحتك يوم الجمعة
طبعا أنا مفيش حد فى البيت ليه علاقة بيه
عايز أشتغل براحتى عايز أعمل أى حاجة براحتى دا لأنى بتصرف صح ومش بعمل حاجة غلط تشوه سنى
وكمان مش هتفرق لو نزلت أشتغل يعنى يعنى بشتغل لنفسى وبمزاجى
المهم نزلت والكل واثق إنى هرجع فاشل وكمان هنطرد من الشغل شر طردة كما طرد إبليس من الجنة
(( يا ساتر يارب إيه التشبيهات دى :@ ))
المهم روحت أول يوم ووصلت بدرى
مش عايز أقولكم بقى الشاب اللى كان بيوصلنى من بين السرايات ويخلينى أدخل الجامعة كان عامل إزاى
تأكد إنك لو كنت ظابط بوليس وشفته كنت هتقول الواد دا لسه طافى سجارة الحشيش حالا أو مبلبع حباية تورمادول حبيب الملايين
كان شاب فانكى كدا ورايق ومن كتر شرب السجاير عينيه دخلت لجوا ومحدش يقولى إيه علاقة دا بدا
وشيك وإستايل ومنظر وهنسميه زى ما كان حرس الجامعة حبايبنا بيسموه (( الزعيم ))
المهم بقيت رايح قابلت الزعيم وصباح الفل يا معلم وعزم على قالى سجارة يا فقرى أنا طبعا قلت له لاء
وقام موصلنى جوا الجامعة
دخلت كلية إعلام من قبل ما الدراسة تبدأ فيها للطلبة العاديين قبل السنة ما تبدأ بحوالى تلات اسابيع أو شهر
مش عايز أقولكم كنت طالع عينى إزاى
لما دخلت كليتى بعد كدا وشفت الطلبة والمناظر الحلوة اللى بيكسلوا يا عينىى يحضروا محاضرة او محاضرتين يوميا بقيت عارف فعلا ومتأكد إنى بطل شعبى أو قدوة فى الكفاح ولازم يكتبوا إسمى على باب من أبواب الجامعة (( باب شاب فقرى )) لأنى كنت بحضر يوميا خمس محاضرات متواصلين بدون رحمة وكل محاضرة ساعتين أو ساعة ونص وزغرطى ياللى منتيش ويانا
طبعا كنت مبسوط بكمية الدراسة الحلوة اللى بطلع بيها يوميا
مش عايز أقولكم كنت بطلع مستفيد آخر حاجة
قاعد من صباحية ربنا عمال أسمع فى مواد إتصال ولغة وإنجليش وعلاقات عامة وحركات اللى هوا كنت بسمع عنها فى التلفزيون بس بجد طلع عينى
كنت فاكر بقى لما أروح هلاقى الدكتور بيقول كل واحد يطلع ورقة وقلم ويكتب معايه مقال نهتف فيه بحب الريس
زى ما كانوا بيعملوا معانا فى المدارس
لكن لقيت إن الدكاترة شرحهم أولا بيتميز بكذا حاجة :
1- سريع بشكل يخلى إيدك تقف وإنته بتكتب وراه لأن العبد لله كان بيكتب ورا كلام الدكتور كلمة كلمة
2-بينقد أثناء الشرح وبيخرج عن الموضوع بشكل لانهائى أثناء المحاضرة
3- بيتميز بالغضب الشديد ضد الحكومة أحيانا وضد إسرائيل وضد كل من تسول له نفسه إنه يشتم مصر أو إنه يزعلهم إن شاء الله يكون سايس الجراج
4- المعرفة والثقافة بشكل مكنتش أتوقع أشوفه فى أى إنسان
لأول مرة فى حياتى بقابل شخص ممكن يقنعنى ودى طبعا مستحيلة
كان فى دكتور راجل عتيق كدا بيشرح فى السياسة والراجل دا كان ما شاء الله عليه ربنا يحميه كان دخل السجن فى حياته تقريبا حوالى 18 سنة :D أو كتر انا طبعا فى الأول مكنتش مصدق لكن بعد كدا إتنيلت على عينى وصدقت لما قالها بنفسه وانا شهقت وكأنى سمعت إن حماس إتصالحت مع فتح ..فعلا حاجة لا تصدق
المهم
كان الروتين الأسبوعى بتاعى جميل بشكل لا يصدق
تخيل إنك بتصحى على صوت الموبايل والزعيم بيتصل بيك ويقولك مجيتش ليه يا معلم المحاضرة باقى عليها تلات ساعات وتبدأ أو قوم صلى الفجر وفرفش :D (( علما بأن الزعيم دا مكنتش اتوقع إنه أساسا على علم بأن ربنا أرسل لينا رسل نظرا لأنه شخص بيهتم بمصلحته وبس ومش بيهمه أى قواعد ولا أصول وكمان تقدر تقول عنه إنه لسه طافى سجارة الحشيش وعايش فى عالم تانى تمااااااااااااااااماااااااااااااااااااااااااا ... أنا عمرى ما شفته بيدخن حشيش الصراحة بس منظره كان بيقول إنه بيشرب حشيش وكولا ومن موقعى هذا أطالب الحكومة بتوفير الحشيش والكولا للمعلم الفاضل الأمور الزعيم أو توفر له كبارى يضرب تحتها كولا وتحيا مصر ))
وبعد ما بتصحى بتنزل جرى تلحق المترو لأنى طبعا فى الفترة دى كانت مواصلتى الرسمية والحبيبة هى المترو
وغير كدا وكدا تركب وإنته ولا حتى شربت كوبايه مايه ولا حتى فكرت تاكل لقمة واحدة بس
وتخش الجامعة وتجرى على إعلام (( لأنى كنت بدخل من باب تجارة )) وبعدين لما أوصل أستأذن وأدخل المحاضرة وهاتك يا كتابه
ويخلص أول محاضرتين تطلع إنته بقى تشترى سندوتش حواوشى من عم الأكل الحلو فى مصر قدام الجامعة
(( الشبراوى باشا )) وتجيب معاه سندوتش طعميه وتأكل فى صمت لأنه مكانش ساعتها فى محل غيره
وتلحق تطلع عالمحاضرة اللى بعد الصلاة جرى وتخلص يبتدى غيرها
فى دكاترة كتير أوى عجبونى فى الفترة دى :$ :
دكتورة قانون إسمها ( ليلى ) : كانت ما شاء الله تحس إنها أسرع من ال ADSL وكانت زى الصاروخ ولسانها مش يتوصى فى الكلام فى القانون
وهى بترص لك المادة تمنتاشر فى قانون المش عارف إيه تحس بموهبة فى كلامها وكأنها الست وبتغنى بصوت رخيم وهادى
(( هجرتك يمكن أنسى هواك ... وأودع قلبك القاسى ))
بس طبعا فى فرق بين الست والدكتورة لان الدكتورة كانت بتتكلم بسرعة الطيارة النفاثة
يعنى متمكنه جدا دى بقى كانت تخلص المحاضرة من هنا وأحس إن إيدى مكسورة قطعتين أو تلات تلاف قطعة مش فاكر بالظبط بس كانت بترص بسرعة أوى

دكتور علاقات عامه : صراحة أنا مش فاكر إسمه هوا اللى أفتكره إنه كان بورسعيدى وإسمه تقريبا محمود
الراجل دا كان بيعجبنى فيه جدا شخصيته القوية وثقافته وأدبه الجم
يعنى تحس إنه خلطة زى العسل لمواطن المفروض يستنسخ ويبقى هوا دا المواطن المصرى من كتر ما هوا كويس ومحترم ومؤدب وتحس انه متربى وشخص فاضل وينفع يبقى نواة لمجتمع ناجح وأحيانا كان يحكى عن أبوه وعن الظروف اللى طلع فيها وقد إيه تعب بجد الراجل دا إتعلمت منه كتير جدا بعيدا عن العلاقات العامة وفى العلاقات العامة برده

دكتور سياسة : دا بقى كان بيحكى عن محمد نجيب وتحس إنهم أخوات وإنهم كانوا فى المدرسة سوا ويحكى بطلاقة وتحس إن الراجل دا فوق القانون بجد وإنه عنده علم يكفى إنه يمحى النظام السياسى فى مصر ويبنيه من تانى (( آه والله كان عبقرى ))
طبعا أنا بقول كان لأنه أكيد ودع هواك ودع والله يرحمه إذا كان حى أو ميت

دكتور تانى فى مجال اللغة : دا بقى كان بييجى يعلم العيال التلامذة * ما هى لغة الصحافة وكيف بيتم الكتابه والحاجات الحلوة اللى تنقط دى والراجل دا بقى لما تشوفه على طول تفتكر إن مامتك داعيه على سيادتك
أولا عصبى جدا وكمان مثقف ومتمكن جدا من اللغة
وأفتكر إنه كان بيقال إنه حط مرة إمتحان لطلبة دار العلوم (( كلية اللغة العربية )) الطلبة كلهم سقطوا بكفاءة :D
والإمتحان كان من المنهج 100 %

طبعا بقى العيال التلامذة اللى بحكى عليهم دول تقدر تقول إنهم ناس أساسا زى الفل كلهم معديين ال 23 سنة وفى منهم 40 وخمسين وكمان هتلاقى 66 سنة كمان
العلم ملوش سن يا أستاذ دى أول نقطة
وتلاقى بقى الناس جايه وشايلة هم الدنيا على قلبهم كل واحد بيتصرف من منطلق
يعنى اللى جاى عشان يبقى معاه بكالوريوس ويترقى وياخد له قرشين زيادة أو يتثبت فى وظيفة نص كم
أو تلاقيه شاب كسيب معاه دبلوم وجاى عايز ياخهد بكالوريوس عشان خطيبته
او تلاقيه ممثل بيطلع كومبارس وسمع إن الممثلين والمثقفين لازم يبقوا كلية إعلام فجه يقدم ويتعلم
الراجل دا اللى طلع فى مسلسل أفراح إبليس حرامى الحمير وهوا فى الحقيقة اسمه يوسف .
ومش عايز أقولكم بقى كان ما شاء الله عليه مغرور بشكل وعلى طول بقى يتكلم عن دوره فى فيلم بوحه وإنه كان مؤثر جدا جدا جدا
ويحكى لك عن صحابه الفنانين اللى بيتصلوا بيه بليل بالساعات عشان يكلموا جنابه ويحكوا له عن مشاكلهم
ها إحساسك إيه ؟؟؟ عايز إنك حاسس ترجع أو قرفان أو مخنوق
كل الأحاسيس دى كانت بتيجى على بالى لما بكلم الراجل الطيب السكرة الذوق دا :D

وتلاقى كمان بنوتة حلوة كدا مطلقه جايه عشان تكمل دراستها وتبقى أحسن من الدزمة جوزها اللى طلقها
والبنت دى بقى حكاية وشفت عليها 2 مثال حتى الآن
عاشت عمرها كله برا مصر (( السعودية )) ورجعت اتعرفت على واحد رسم لها البحر طحينه وحبته وعلى نغمة واحده (( بحبه يابابا )) وتقعد بقى تحكى لك إنه إتغير وبقى واحد تانى ...يعنى كان أحمد صحيت لقيته هيثم وإنه على غير قدر من المسؤلية ومش عارف إيه وفى المثالين اللى شفتهم كانت البنت بتقولى أول ما شفته بقى قلت فى نفسى (( راجل وعريس يا أما .أو. وحبينا بعض حب تقطيع )) مش فاهم يعنى إنتى بنت جايه من بلاد برا ومش عندك خبرة طيب بلاش تفكر فى الإرتباط بواحد غير مسؤل لكن لا حياة لمن تنادى وصباح البتنجان
ونرجع لموضوعنا ونكمل كلامنا
وتلاقى شاب تانى سينارست شاب الراجل دا بقى كان بيكتب سيناريوهات وكان عامل سيناريو عن فيلم رعب كوميدى مصرى لهانى رمزى ... شايفين الشعر والوزن :P
المهم الراجل دا هوا أول من قال ليه كلمة فقرى
وهوا أول من طلعها فى دماغى
كان بيحكى لى عن مسرحية من تأليفه هتتعرض فى مسرح الشباب وإنه بتحكى قصة حياة شاب والدنيا معانداه وإن العوامل اللى بتقف ضده والظروف بتبقى أشخاص يعنى الفقر والفشل والهموم والخيانة والحاجات الحلوة دى كل واحد طالع بدور ممثل
فبقوله وأنا يا أحمد هتطلعنى إيه ؟؟؟
قالى هلبسك جلابيه سودا وطرطور أسود ومكتوب عالجلابية بالخط الأبيض العريض
(( الفقر ))

الله يمسيك بالخير يا أحمد
والله كنت جدع وميه ميه والراجل كان شغال فى شركة وبيحب الفن السابع والسينما الأمريكية وكمان قارىء نهم وكان بيعجبنى تفكيره شخصية مرحه وجدعه وكفاءة وميه ميه
طبعا أنا فضلت عالنظام دا (( مش الفقر أقصد الشغل طبعا فتح مخك معايه )) لمدة سنة ونص يعنى حوالى ست ترمات فى الكلية الحلوة دى
مش عايز أقولكم بقى كنت وصلت لدرجة من الخبرة إنى كنت أكتب المحاضرة دى من هنا وكانت تروح عالمطبعه على طول ومحدش يقدر يستجرى يراجع ورايه لأنى بقيت علامة الجودة خلاص .. وكمان كنت بحل إمتحانات للطلبة أحيانا فى المدرج وأشرح لهم بعد المحاضرة
كان الطلبة أحيانا بتتلم حواليه كدا وأقعد أشرح وكأنى نور الشريف فى فيلم إبن خلدون
كنت وصلت لدرجة معيد من كتر اللى سمعته وكنت ببقى مركز فيه
مفيش سؤال وقف قدامى عربى أو إنجليزى وفى أى مادة فيكى يا إعلام
ومش كدا وبس كان فى واحد معايه بيكتب لمكتبه تانية كان ما شاء الله عليه إتصاحب عليه عشان ينقل منى لما يقع فى الكلام ويتأخر وكان بيدى العيال درس وعامل فيها معيد وكان بيشرح لطلبة حقوق وإعلام وتجارة وكمان كان بيحضر ما جيستير فى كليته (( دار علوم ))
تخيلوا
كان خبرة وفى مرة بيقولى مش عايز حاجة من الإمارات ؟؟؟
بقوله إشمعنا يا أحمد ؟؟
قالى أهوه أصل فى طالبة عندى فى حقوق ممكن تجيب أى حاجة أطلبها منها .
قلت له طيب هاتلى عروسة ويبقى ليك الخير والثواب والأجر عند الله

وفى يوم من الأيام قرر الزعيم بما إنى شاب كفاءة وتمام وجامد آخر حاجة أروح أحضر محاضرة للدكتور محمد محمدى فى سنة رابعة كلية تجارة قسم إدارة (( كانت محاضرة واحدة ورجعت إعلام تانى ))
بقوله إيه يا زعيم طيب وإعلام
قالى المحاضرة دى مهمة وهيقول فيها الخلاصة وهتروح تحضرها فى مدرج (( تمانية حشرات ))
قلت له نعم
قالى أيوا دا مدرج تبع كلية علوم
فبقيت بقى ماشى فى الجامعة أسأل الليل والنهارى والنساء والعذارى عن مكان المدرج وكل واحد يقولى إيه
هتلاقيه جمب تلاتة صراصير
واللى يقولى هتلاقيه عالجدار وتنطلق أغنيه محمد هنيدى الرائعة
(( عالجدار عالجدار الفرخة واقفة عالجدار ))
طبعا اللى يعرف الدكتور محمد ميقولش كدا لأنه متدين وصريح ومش بيطلع أى حاجة برا يا رجالة يعنى من الآخر لو الطلبة وقفوا على الجدار زى ما محمد هنيدى بيغنى و طبعا مستحيل يطلع أسئلة الإمتحان بل والمصيبة كمان إن الدكتور فى اليوم دا قال حاجة حلوة قوى
(( النهارده جايب لكم test عاللاب توب مكون من 90 سؤال إختيارى واكمل وكمان إشرح ومطلوب منكم المتابعة معايه وبكفاءة كمان ))
طبعا أنا سمعت الكلمة دى من هنا وقلبى وقف وإيدى موقفتش بعد المحاضرة دى لمدة تلات تيام وهى بتترعش
الله يمسيه بالخير الدكتور دا كان بيعمل حركة حلوة أوى
كان بيقسم بين الرجالة والستات
يعنى إيه
يعنى كان الرجاله يقعدوا فى جمب والستات فى جمب
لأن طبعا هوا رافض مبدأ المسخرة واللى بيحصل فى الجامعات
الراجل من دول يبقى سايب مراته وعياله وجاى يعط مع واحدة تانية يبقى قلة أدب مش تعليم مفتوح
ودا اللى كان فعلا بيحصل برا كان كل راجل من دول ماشى ومعاه واحدة زى الفل وماشيين وتلاقى حركات العيال اللى بنلاقيها فى الجامعة وأكتر كمان لأن دول قلبهم ميت بقى مش خايفين من أى حاجة وعايشين حياتهم وصباح الجمال

طبعا هتسألونى كنت بتاخد كام
هقولكم كنت بأخد 40 جنيه فى يوم
يعنى ما شاء الله كنت (( عيل كسيب )) ومثقف وخريج تالتة إعلام :D
والله مش كنت بنزل عشان الفلوس قد ما بنزل عشان عايز أتعلم
لأنى صراحة مش يفرق معايه المبلغ بس يفرق معايه العلم الرهيب اللى درسته وكمان عايز أشوف إعلام حلم الملايين دى فيها إيه ؟؟؟ اللى كل أما أشوف ألاقى واحد بيقولك كان نفسى أخش إعلام
وهيطلع سؤال يقولى ليه مش كملت لحد رابعة هقول لأن رابعة تخصص فى التعليم المفتوح يا تتخنصص (( زى ما قرتها )) صحافة او راديو وتلفزيون أو مش عارف إيه تانى كدا
وكان كل سنة عدد الطلبة اللى بيسقطوا بيزيد وكانوا بيفشلوا ويسيبوها
علما بأن الترم كان ب 900 أو 600 جنيه مش فاكر بالظبط
كان نفسى أفتكر كلام أكتر عن الحقبة الرهيبة دى فى حياتى
ومش قادر أوصفلكم الفترة دى رجعت لى ثقة قوية بنفسى لأنى وجدت نفسى بمشى فى مناهج المفروض إنها صعبة والمفروض إنها كلية قمة وأنا زى ال X مش بون وكمان الثانوية العامة اللى خلت مسارى يتنيل وأخش كلية مش بحبها ربنا عوضنى بالكلية إعلام عشان أعرف إن الثانوية العامة مش مقياس وإن ظروفى الزفت اللى حصلت لى فى ثانوية عامة
والحمد لله من النقطة دى تقدروا تقولوا إنطلقت لمرحلة تانية

وفى الختام نقول كفارة المجلس

سبحانك اللهم وبحمدك اشهد ان لا اله الا انت استغفرك واتوب اليك

إنتهى الكلام
إلى اللقاء فى الحلقة القادمة من السلسلة الفقرية
تحياتى
شاب فقرى
-------
ملحوظة : جميع الحقوق محفوظة لكاتب البوست وصاحب المدونة (( شاب فقرى )) وكل ما كتب من خلاصه أفكاره .

هناك 43 تعليقًا:

شاب فقرى يقول...

أول تعليق محجوز لكل قراء المدونة الأعزاء :
بيطرية ومش بإيدى ودموع القمر وطوبة فضة وطوبة دهب والشعب لابد له من حكومة تشكمه وponpona ويوسف و well وكل الحبايب والناس الطيبين

تحياتى ليكم جميعا قبل الرد طبعا
عايز الناس تفكر فى المجمل بتاع البوست والفترة مش تركز عالحوادث التافهة اللى فى البوست ولا حد يقولى الموضوع دا حلال ولا حرام (( كتابة المحاضرات )) فكروا وإقروا بالراحة وتحياتى للجميع

شاب فقرى مسن :D

الشعب لابد له من حكومه تشكمه يقول...

وتحجزلى ليه صغيره انا ولا صغيره؟ انا احجز لنفسى:)
بص هقولك حاجه انا اول مشوفت البوست مش انت ايدك كانت بتقف من الكتابه انا باه قلبى كان هيقف قلت هقراه فى يومين:)
بس بصراااحه خلصته كله:)
تقولى باه طايب انتى جايه هنا ليه اقولك المفروض انى اسيب كومنت بس مسيت اصلا البوست فيه ايه ههههههههههه هنجت باين.
بس جميل انك تكون صغير فى السن ده وفكرت تنزل تشتغل و40 جنيه كويس ان اخلاقك منحرفتش مع الزعيم والفلوس فى ايدك اهى زى الرز وميفسدش الراجل الا اييييييييييه ايون الفلوس :)
بالمسبه للدكاتره فى ناس بتعلق فى دماغك وتسيب اثر على شخصيتك ودول الناس اللى بجد يستاهلوا انهم يقفوا ادام طلبه ويتكلموا.

ايه باه المجمل بتاع البوست:) انا هنجت هباه اجى تانى ان شاء الله اقراه,
ماشى يازعبوله:)
اوعى اوعى تفكر انك تقولى على حاجه بتغيظك او مش عاجباك اعرف انى هعملها علشان اغيظك وبكده انت اللى حكمت على نفسك باسم زعبوله:)لحد مترفع الرايه البيضا وتيجى تقولى اعفى عنى وقوليلى يا .....

صحيح هى فقرى دى من النحس ولا دمه خفيف؟؟؟انا احترت معاكو يابتوع القاهره والله انا اللى اعرفه حدانا فى المنصوره فقرى دى منحوس,جيت عندكو قاهرة المعيز قالولى لااا فقر يعنى دمك خفيف جدااا.حدد انت مين فيهم اصلها تفرق اوى.

شاب فقرى يقول...

أهلا بالشعب لابد له من حكومة تديه على قفاه


بقى انا زعبولة

ههههههههههههههههههههههههههههه

لو قلت المجمل بتاع البوست أمال يبقى إيه فايدة البوست

حضرتك انا خريج تالتة اعلام بتقدير مقبول فحت :D وجيد طحن :P

فعلا الدكاترة دول مش قادر انساهم لانهم كل شوية يجيبوهم فى اذاعة القران الكريم او البرنامج العام او حتى فى الجزيرة :D

صباح الفل

زعبولة مين ياعم الحاج

انا كاتب شاب فقرى من الفقر والنحس والهم والمشاكل والغم اللى على قلبى اللى لما بفتكر اللى عليه فى الحياة والمشاكل اللى بواجهها والجبهات اللى بشتغل فيها كلها فى نفس الثانية بحس انى بطل شعبى شهير لازم يبقى لى سيرة بإسمى :)
:) :) :)

ومعلش يا اهل المنصورة

هههههههههههههههههههههه

نفسى والله ازورها المنصورة دى وعن قريب اوى هشد الرحال وأروحها أتفسح شوية وأتوه شوية هناك :D

بعشق التوهان فى أماكن معرفهاش :P

نورتى المدونة

واى خدعة حاجز لك اول تعليق اهوه

شاب فقرى

دموع القمر يقول...

اييييييييييييداااااا كله

البوست البوست ربنا طارح فيه البركة ليييه

نرووح نقرأ على مهلنا كدا

ونيجى هوا

دموع القمر يقول...

ثكرا ثكرا ثكرا

ان اسمى محجوز فى اول تعلييق

كويس نبقى الاول

والرابع والخامس والسادس هههه

على بال مااروح واجى

فاااااااصل قير ونواصل

شاب فقرى يقول...

دموع القمر

نورتى ونورك غطى على الكهربا اللى فصلت منى بعد ما كتبتا لبوست على طول

اقرى وتعالى

واى خدمة اول تعليق اهوه

يارب البوست يعجبك

شاب فقرى

دموع القمر يقول...

علية الصلاه والسلام

لا ياعم مفيش احسن من انك تفتكر ايام الفقر ههه وتضحك انك كنت زمان فقر

كمل يااااافقرى كلنا اذان صاغيه
وسمعنا سيرتك الفقرية ههه

ههههههه انت عملت ايه يابنى دى شكلها مستحلفالك وماسكة الشوبشوب

ربنا يكرمك يارب ويوفقك ويصلحلك كل امورك ويرزقك بالزوجة الصالحة
الودوود الولود اللى تسعدك فى الدنيا
وتكون سبب لدخولك الجنة
ويعدل حياتك كدا بعد الفقر دا

ايييدا دا اعلام
زملاء يعنى بس ايه خريج تاليت اعلام دى
نروح نكمل اكيد هنفهم برضو ههه

مادا الطبيعى جدا فى سنة اولى
كنت اروح احضر كل محاضرة
واقعد فى البنش الاول
واكتب كل كلمة
وفى تانية ماشاء الله نروح بعد الدراسة باسبوعين
ونستلم الكتب ونحضر نص المحاضرات
فى تالتة اعتزلنا الفن وقدمنا ومنازل
:) :)

ههههههههه
شغلانة مية مية ولافراخ الجمعية
يامعلم الاجيال

اممممممم شكلى كدا والله اعلم انى بدأت افهم :) :)

الشغل مش عيب ولا حرام المهم انك تلاقى سعاتك وانت بتعمل الحاجة دى

ولو مين عارضك انت مقتنع خلاويص

ههههههه
شكل كان ليك ماضى سىء
علشان يطلقوا عليييك فاااااااشل

المهم انت كان شكلك عامل الزاى :) :)

كان لازمن تعمل كدا
والا هيطردوووووك ويقولولك برااا

وطبعا فى البيت هيحطوا دى فى البلاك لييست
وهيقولوا يافاشل يافاشل ههه

انت هتقولى على المواد اللى تطلع الروح دى
ماهو علشان كدا قدمنا ومنازل لابفهم ولا اكتب محاضره
لانى بروح وارجع بخفى حنين

ههه الدكاترة عندنا بينفسوا عن الغضب والثورة بتاعتهم ضد الحكومة فى المحاضرة انا بستهيألى كدا
ان مفيش دكتور دخل وقال كلمة حلوة فى حقهم
لغاية امبارح الدكتور بيقول ان مفيش حد ليه البقاء
يعنى كلنا هنموت
يعنى بابا حسنى هو كمان هيودعنا
وهما طبعا عارفين اننا مش هنتكلم يعنى علشان ننجح ومنشلش المادة ههههه

بس تعرف دا برضو الصح لاننا اعلام يعنى منمدحش وبس لازم ننقد

فكرتنى بندائك دا باللمبى
اوجه رسالة للسيد المسموم .....
هههه

احنا دكتور السياسة دخل السجن
والعربى توفى
وعلاقات ساب قسم الاعلام
والصحافة اعتزلت الفن وبقت بتيجى ضيفة شرف
ولقينا السنة دى وجوه جديدة ولكن ليست لذيذة ههه

قالى هلبسك جلابيه سودا وطرطور أسود ومكتوب عالجلابية بالخط الأبيض العريض
(( الفقر ))
هههههههههههههه
هو وراك وراك ولايه النظام
شكلك عامل معاه توكيل

سنة ونص تقدر تقول اتعلمت فيهم الادب
قصدى المذاكرة والاجتهاد
بالحق انت اصلا كنت فى كلية اييه

مالازم يفرفش يابنى يعنى حكومة فى البيت وبرة كمان
بس ياسلام لو عملوا حملة تفتيش على الجامعة هتبقى وقعتهم سودا
طلقنننننننننى ياااحنفى

الله ماتشغلنى معاك ياكسيييب
(مش لما تحضرى محاضراتك الاول ) ههه

بالحق يعنى بم انك منتاااااااااز
ادخل صحافة ولا علاقات عامة

بوست لذيذ والله

وكويس انك مبسوط
لانك عملت حاجة شرفتك
ورفعت راسك مش كسفتك وقالوا علييك خايب ولا فااشل
وانك سيبت الحاجة دى مبذاجك مش غصب هههه

والسلام عليكم ورحمة الله وبركاته

دموع القمر يقول...

هههههههه

اصلى بحب افصص بوستاتك

وارد عليها واحدة واحدة

اصلى بعيد عنك لما اقرأ الموضوع كله واجى اكتب تعليق

بحس انى ....... واقول هو كان بيتكلم عن اييه هههه

تحياتى لك

ويارب اكون ضيفه خفيفة

شاب فقرى يقول...

دموع القمر

بصى

نصبحتى حولى كلية الآداب قسم لغة انجليزية

بيشتغلوا كويس

او كلية التجارة وإدارة الأعمال

حاجة تجيب فلوس

إعلام مين يابا

على فكرة انا كنت بحضر عشان شغل لو ركزتى هتعرفى انى كنت بحضر كل يوم جمعة وكنت لازم افهم واكتب كلمة كلمة كمان

يعنى كان طالع عينى بجد

وعلى فكرة متبقاش فى دماغى من الحوار دا غير قليل اوى لانه مر عليه سنين
بقولك ساعتها كنت فى اولى كلية

هههههههههههههههههههههههههههههه

انا شاب فقرى مسن :D

لاء فى البيت على طول مش بيصدقوا السكة اللى انا ماشى فيها لانى مشهور انى بدوس فى حاجات محدش بيعرف يمشى فيها

سكك الناس كلها بتمشى فيها وتفشل وانا لما امشى فيها تتفتح وتبقى اخر جمال

هما دكاترة اعلام بتوعنا دول بقى اللى فى جامعة القاهرة معمرين

يعنى بيموتوا الطلبة وهما بيفضلوا صاحيين واخر جمال

مش زى عندكم

حلوة أوى مفيش حد ليه البقاء دى

هههههههههههههههههههههههههههه

يعنى حد سعد الدالى هيموت

ههههههههههههههههههههههههههههههههه

والله وغلاوتك سيبت الشغلانة دى وحاليا ربنا كرمنى وشغال فى حاجة أعقد من كدا بكتير فى البيت

قاعد بشتغل فى النت وطالع تيت عينى

وعليكم السلام ورحمة الله وبركاته

قلت ارد السلام عشان منساش

لسه التعليق طويل

بالنسبة لاعلام فهى كلية حلوة وسهلة وجميلة وعايزة ال** ولا بلاش

كل سنة وانتى طيبة

وننتظر عودتك فى بقيت السلسلة

شاب فقرى

شاب فقرى يقول...

دايما ضيفة خفيفة اكيد

:)

:)

:)

ربنا معاكى فى الكلية

وانا برده بعد ما بكتب بيصعب عليه القارىء بس بقوله نصيبه

بقى عايز اقول إنته وقعت ولا الهوا اللى رماك عالمدونة دى يابنى

بس بسكت وبكمل كتابه وبدعى ربنا اللى يشوف يقرا واللى يقرا يكمل للاخر واللى يكمل للاخر يفهم واللى يفهم يرد :D

تحياتى يا دموع

شاب فقرى

دموع القمر يقول...

ههههههههه

امممممم كفرة حلو ةبرضو
وهكون زيك خريجة تالتة اعلام

طب ماالدنيا ماشية وزى الفن اهه

امال بتقول فقرى ليه

تمشى الطريق وربنا يفتحها قدامك

وغيرك تتقفل فى وشه بالضبة والمفتااح

بس والله انا بتلكم بجد
اصلى جتلى صحافة
وانا عايزة علاقات
واسمع من بتوع صحافة بيلعنوا المواد والدكاترة
طب اروح علاقات احذرىىىىىىى
فالشعبة بها سم قاااتل هههه
والاذاعة لايونكن ابدا لانى وبلا فخر مش جبت فيها تقدير
طب نروح فين
اممممم
خلااص قررت انى اكون خريجة 3 اعلام
وهكتب يوميات شابة بائسة ههه

ربنا يوفقك فى شغلك ويكرمك

دموع القمر يقول...

امشى بقى

لحسن حد يضربنى على الاحتلالات دى
هههه

ودعواتك كدا

شاب فقرى يقول...

دموع القمر

الكهربا قطعت

خلتنى اتاخرت فى الرد


بصى اتبعى نصائح ذهبية اسير عليها دوما

1- دور عاللى بتحلم بيه وإعرف نفسك عاوز إيه ؟

يعنى ملكيش دعوة بصحابك وكل واحد بيتكلم من واقع السهولة والصعوبة اللى هوا متخيله يمكن انتى لو دخلتى قسم مثلا صعب زى صحافة وكل الناس بتسقط فيه انتى الوحيدة اللى تنجحى دى هى قصتى الازلية بنجح وبحقق احلامى فى اماكن مستحيلة والاماكن المضمونة ممكن افشل فيها

فقرى بقى

ألغى من دماغك موضوع الشغل والفلوس وطلبات السوق والبتنجان اللى الاهالى بيقولوهولنا دا يعنى اعملى اللى نفسك فيه بعيد عن نصايح الاخرين

لان ببساطة ممكن ان انتى تستغلى فى مجال نادر او مجال شائع بس ربنا يكرمك وتتميزى فيه

2- ماشى لوحدى فى سكتى

يعنى اما تحبى تختارى حاجة او تنفذى اى حاجة او تقررى اى حاجة خليكى لوحدك فى الحياة

يعنى مش تعتمدى على حد وتقولى هخش القسم عشان فلانه فيه او الكلام دا

خليكى لوحدك فى الحاجات اللى زى دى

ومش تفرق معاكى حاجة

المهم انتى عايزة ايه

وتذكرى دايما النصبحة الفقرية الذهبية :

(( مش مهم يابنى تشتغل زبال ... بس المهم تبقى شيخ الزبالين ))

يعنى مش مهم الوظيفة المهم انك تبدع وتحقق ذاتك وتتميز وتوصل للى نفسك فيه

وهستنى نشوفك تانى فى المدونة

تحياتى يا دموع القمر

شاب فقرى:)

طهر فؤادك يقول...

السلام عليكم ورحمة الله وبركاتة ..
الله يكرمكوا يارب شاركونى يوم مقاطعة الفيس بوك يوم 24 /10 وياريت تشوفوا موضوع المقاطعة على مدونتى ومعاية بأذن الله

فتاه من الصعيد يقول...

حرام ليه انت بتساعد الناس اللي موش بتعرف تكتب ورا الدكتور زيي كده :D

بص الجامعه استفاده مش غياب وحضور .... والماده العلميه موجوده بس اللي يذاكر

هو انت كنت بتعمل برشام يعني

المهم انا عرفت ليه انت مش بترغي كتير في التعليقات .... بتستهلك رغي في مدونتك :)

تحياتي

7akwena يقول...

قالى هلبسك جلابيه سودا وطرطور أسود ومكتوب عالجلابية بالخط الأبيض العريض
(( الفقر ))

هههههههههههههههههههههههه
انت قاسيت بجد يا فقرى
والله انت جامد جدا يا ابنى
تخياتى ليك

isra2 يقول...

معرفش بنشكح ليه اوي لما بشوف حد بيكتب عن حرس الجامعة بحس يعني اني مش الوحيدة اللي حرس الجامعة واقف في زورها :)) و رغم اني نسيت كتير مما قرأت بفعل الزهايمر لكن انا سعيدة سعيدة بحوار الشغل :) تاكل من عرق جبينك بجد خطوة مهمة اوي في حياة البونو آدم مننا :) و عموما الجوماعة دي كميييلة بستفيد منها استفادة رهيبة معرفش بس واضح انك بتغشش زمايلك و كده مش كويس :) مش عاوزة أجبلك إحباط بقى

سلااااموز

جمهورية شومبونجو العربية يقول...

شاب فقرى

ية الحقبة الطويلة دى

بس جد الذاكرة عندك 100 100

ربنا يوفق

تحياتى
...........

رئيس الجمهورية

Saso يقول...

يعنى كدا كدا
ماشى وربنا هازعل وبعدين هاتقمص
وموش هتعرف تصالحنى غير لما تجيبلى شيكولاته ماكالتوش
ركز موش ماكنتوش اسمها ماكلتوش
المهم الظاهر انى موش هاعرف ارد غير انى اقولك انك احسن حاجه عملتها انك عملت حاجه كويسه وساعدت ناس وساعدت نفسك
انا كمان كنت بشتغل وانا فى الكليه عشان انا موش بعرف اتفرغ لحاجه واحده بس
لازم اشغل نفسى بحاجات كتير فى وقت واحد والحمد لله بقدر اوفق وانجز واجيب من الاخر
وعاجبنى اوى تعبير يستنسخ ليكون نواه للشعب المصرى حلوه اوى الفكره دى.
ماتيجى ياواد يافقرى نفكر مين الناس اللى هنستنسخهم ومين اللى هنعدمهم رميا بالقبقاب.
موش لازم ابقى اول تعليق المهم ان تعليقى يعلق بذاكرتك او يبسطك او يعرفك ان تعليق من حد فاهم
وعلى فكره لو قلت انى موش فاهمه هاضربك بالنار.
تعرف ايه عن دراسه البرمجه؟
ايه هو انا يعنى موش هاعرف اطلع منك بمصلحه كدا ولاايه؟
هههههههه

شاب فقرى يقول...

طهر فؤادك

أنا خلاص أخدت موقف ومقاطع الفيس بوك لمدة شهر مش يوم واحد بس

الحياة مش هيحصلها حاجة لو مقاطعناش الفيس بوك

ربنا يحرق الجروبات اللى بتشتم فى الاسلام دى بجاز

تحياتى لتواجدك

شاب فقرى

شاب فقرى يقول...

فتاة من الصعيد

أهلاوسهلا بأهل الصعيد كلهم
والله الواحد بيكتب كل اللى ييجى على باله مش بيقف عند كلمة واحدة او موقف واحد بيحكى بصراحة وبيفتكر كويس ومش بينسى

تحياتى لمرورك

وبإنتظار زيارتك القادمة

شاب فقرى

شاب فقرى يقول...

حكاوينا

يا ولكم يا ولكم

إنى أحبك فى الله يا أخى والله

تعليقاتك دايما هادية وبتريح أعصابى

شفت بقى ازاى بدأت معايه بالفقر من زمان

تحياتى

شاب فقرى

شاب فقرى يقول...

isra2
انا من يوم ما خلصت ثانوى وانا شغال وبعتمد على نفسى

موضوع الشغل اللى فى البوست دا من سنين

صحيح الواحد لما بيعتمد على نفسه بيشيل الهم بس بيحس بمتعه فى الحياة فى كل نفس بياخده

حرس الجامعة دول مش عايز اقولك عاملين بمبدأ قوم يا صالح شوف مصلحتك
يعنى بيدخلوا مندوبين مبيعات واى واحد يغمز لهم بخمسة جنيه والصلاة عالزين الصلاة عالزين

وكان الله بالسر كله عليم

تحياتى لتواجدك

وبانتظارك مرة أخرى فى المدونة

شاب فقرى

شاب فقرى يقول...

عزيزى رئيس الجمهورية

الساعة دلوقتى خمسة وبكره الخميس وانا خارج كمان خمس دقايق :D

ذاكرة ايه اللى قوية بس دا أنا غلبان :$


ياريس نورت المدونة واتمنى يكون عجبك البوست

شاب فقرى

شاب فقرى يقول...

saso

ياه بس كدا

شوكلاته مكالتوش

عينيه

أجيبلك علبة بحالها بس بشرط لا يتعدى سعر العلبة اتنين جنيه

يا إما تستبدلى الهدية بحاجة ساقعه من كانتين المدونة

:D

المشكلة يا saso
ان العالم كله دلوقتى بيتجه لفكرة نواة المجتمع والاستنساخ دى والكلام دا فكر حقيقى وفى جماعات بتتبعه
انهم يشوفوا مين الاصلح لتكوين المجتمع ويقتلوا الباقى وعشان كدا بيدفعوا للدول الفقيرة وبيمولوا فيها الحروب وبيضربوها بالفيروسات
واخرهم فيروس انفلونزا الخنازير
اللى اللقاح بتاعه منيل بنيلة وهتكلم عنه البوست الجاى

يعنى يعوض ربنا

مش احنا اللى هنحدد هما اللى هيحددوا

عايزين يقوموا بدور ربنا

وإن شاء الله ربنا قادر يخسف بيهم الأرض

أو يقوينا عليهم

او يستبدلنا بقوم غيرنا ويعفو عنا يارب ويغفر لنا

فعلا تعليقاتك بتسعدنى وبيسعدنى زيارتك للمدونة

وإنتى فاهمة وزى الفل ربنا يعينك
:) :) :) ياريت كل القراء زيك كدا :P

بالنسبة لعلاقتى بالبرمجة فهى نفس العلاقة اللى هتلاقيها بين البليلة والترماى

:D

حددى انهى برمجة وفكرى عايزة ايه بالظبط وانا ممكن اقولك على اماكن او كورسات برمجة مجانية ماشية بنظام التعليم عن بعد وبتعتبر منح ولكن منح بسيطة اوى لانك بتشوفى فيديوهات وتدرسى البرمجة مع نفسك

وبينى وبين نفسى صراحة بكره البرمجة جدااااااااااااااااااا

لكن ممكن اساعدك بعون الله

وعلى فكرة حوار الشغل والحقبة دى من سنين ولت يعنى من سنين فاتت مش من قريب

انا حاليا شغال عالنت فى البيت ومش بخرج

تحياتى لتواجدك ولردك الكريم

شاب فقرى

ميرام يقول...

مبدأيا ..

بحب افتكر ايام الفقر أوى (( النحس يعنى ))

فقر .. نحس ...!!!!!!!
هو أكيد الجملة دي من باب السخرية
لأني ماقرأتش حرف لا يستحق افتخارك به


(:
ثانيا ...
الأحداث مش مرتبة زمني صحيح .. يعني ليه لسه هتحكي عن الثانوية العامة ..؟!!! ليه مابدأتش ببيها
هل ياترى ده لعلة في نفسك \؟
ولا لأنك افتكرت ده الاول ولا ايه (:
وان كنت مااعتقدش ان ده بدون سبب
وانا مالي أصلا (: (:


نيجي بقى للقصة اللي قرأتها وخرجت بالآتي ..
(:

_ بطل القصة طموح جدا و .. سيصل .. باذن الله
_ عندك فضول رهيب لأن تسلك طرقا جديدة لا تعرف فيها شيئا
_ مازلت تحاول التكتم على الكلية الأساسية التي تدرس بها
!
_ أن تكتب محاضرات لتصويرها فهذا يعني أنك حسن الخط ...( مجرد افتراض )
يتبعه توابع فقط ان ثبتت صحة النظرية (: (:

_ بصراحة كنت أعتقد اني صبورة ...
لكن طول قراءتي وانا ارغب في النطق ب ياااصبررررك (:
اللهم زد وبارك (:
5 محاضراااات (: أنا ممكن أنتحر
_ قدرتك على استحضار ايجابيات أشخاص تعرفهم ستجعلك شخص ناجح جدا ان شاء الله

_ ابتسممممممت بشدة وانت بتوصف الناس الي بتدرس
على فكرة الأوصاف تنطبق وان اختلفت الظروف في كل الجامعات
وأخص بالذكر . .. البنت الي شفتها مرتين وشفتها أنا مية
(: ربنا يهدينا جميعا ويصلح أحوالنا\


المهم
أنـا ماتفاجأتش بأي كلمة ..
لأني كنت متوقعة حياة حافلة لك ..
ولأن توقعي ماخابش وظنوني كانت في محلها
أتوقع لك نجاح باهر ان شاء الله في حياتك
(:
(:
كل تقديري

شاب فقرى يقول...

ميرام

حللت أهلا ونزلت سهلا

أيام الفقر
هى بالنسبة لى تعبت فيها جامد لانى كنت بعمل كل الحاجات دى فى اوقات نفسية سيئة وبرده كنت حماسى جدا وكمان كنت ببذل مجهود جبار تخيلى خمس محاضرات يوميا يعنى حوالى عشر ساعات ولازم ابقى فايق تماما واركز فى المحاضرة لانى لو مش ركزت او اهملت فلوسى تبقى حرام :(((((
وانا براعى الحلال فى كل شىء فى حياتى


أنا حكيت الموقف دا الأول لأنه حاجة مشرفة لانه انا اعتبرت نفسى خريج الكلية دى ودرست فيها كتير وفهمتها كويس
يعنى وصلت لدرجة الخبرة الشبه تامة فى المجال دا

وكمان لأنى بحب أحكى عن اللى بعمله خارج مجالى لأن النجاح فى مجالى شىء متوقع إنما إنى أدخل مجال معرفش فيه أى حاجة وأنجح لدرجة ان كانت المحاضرات بتطلع من تحت إيدى للى بيكتب عالكمبيوتر على طول

كنت دقيق جدا فى النقل والشرح للناس

(( ربيت أجيال :P ))

- يارب أصل يا ميرام
هبقى سعيد أوى أوى أوى وهبقى أحكى البوست اللى جاى او اللى بعده عايز أصل لإيه بالظبط

دعواتك معايه

- الفضول والقوة والصبر عوامل مهمة للنجاح و لإستكشاف الحياة وأكيد أنا بالقوة الكافية إنى أنجح

-الكلية اللى بدرس فيها وتعريف شامل بنفسى هنزله قريب إن شاء الله لما أحقق حلم مهم فى حياتى
وليه مش أقول إيه هى دلوقتى ؟؟؟
لأنى عايز الناس تعرف شاب فقرى الأول وتفهمنى وتعرفنى بجد قبل أى حاجة تانية مش تفكر فى أى حاجة تانية
لأن الناس لو عرفت مثلا أن شاب فقرى طبيب ممكن يقولوا دا راجل مجتهد ومفكر ولو قلت إنى فى معهد بريد إنتساب الناس هتقولك دا فاشل
والناس دايما بتنسى كل حاجة وبتفكر فى الكليات عشان كدا مش وضحت سنى ولا وضحت أنا مين
أنا قلت إن البوست دا حصل من سنين ودى حقيقة ومقلتش أنا بدرس ولا خلصت ولا بعمل إيه فى الحياة غير شغلى عالنت
فترة الشغل اللى بحكى عنها دى مرت من سنين بس اتعلمت منها كتير

- بالنسبة للخط الحلو فدى ميزة تقريبا لا أتحلى بها
فى ناس كتير شايفه انى خطى وحش
وانا لما كنت بكتب ورا الدكتور كنت بتملى وبشرح كلامه فى الورق وبعدين الورق بيطلع للكمبيوتر ومنه للناس :)
إفتراض حسن الخط مش صحيح أوى

-والله كانت ظروف العمل إنى أحضر خمس محاضرات
فى الفترة دى إتعلمت كتير أوى فادنى جدا للفترة اللى بعدها كتير بشكل رهيب
ومينفعش أكسل أو أغيب أو أنام ومينفعش أجيب نسكافيه وشاى فى المحاضرة :(
-إستحضار إيجابيات الأشخاص والأحداث والذاكرة شىء جميل جدا وموهبة الحمد لله أتمتع بها ولا يمكن إنى أنسى شخص أبدا .... تصل لدرجة المستحيل :) :)

- بالنسبة للبنت اللى حكيت عنها
أنا شفتها مرة فى تعليم مفتوح
ومرة تانية فى المترو وكانت جريئة لدرجة انها تتعرف عليه وترغى معايه وتحكى لى قصتها كمان
وفعلا حاجة تحزن الواحد .. والناس دى خلتنى أخاف وأقلق من الحب وممن أحب والناس اللى بتقول إنها بتحب لأنى ببساطة مش عارف حقايقهم

القادم يفاجىء الجميع :):)

تحياتى لتواجدك ومتابعتك وقراءتك

ومعلش البوست كان طويل أوى بس مكانش ينفع أقسمه على مرتين كان هيفقد رونقه
مع خالص تحياتى
شاب فقرى

دموع القمر يقول...
أزال المؤلف هذا التعليق.
دموع القمر يقول...

لو سمحت لو سمحت ايوة انت

ممكن تدينى المايك دا شوية

ثوانى بس هشكر البروفيسير شاب فقرى
على نصايحه الجميلة دى

هديهولك على طول متخافش
اوووعى بقى ايدا هاات

احم احم

ادخل برجلى اليمين واقول صبااح الفن
والويد والياشمين

كلامك جميل ويظبط الدماغ زى كووباية الشاى بالنوعناع

بص ياسيدى
انا عمرى مااخدت رأى حد فى حاجة المفروض انى اعملها من اختيارى

انا اشتغلت فى الجرنال مع انهم كانوا رافضين بس انا حابة كدا

جت فرصة انى اطلع القاهرة ورفضوا لانى لسه بدرس وكمان ان فكرة انى اروح اى جرنال بره الشرقية ممنوع

طبعا انا مرضتش انى احاول او اجادل لانى كنت بقول وانا من جوايا مش مقتنعة من كتر البهدلة اللى بنشوفها واحنا فى جرنال بلدنا

وغير كدا ليا زمايل قالولى انه مينفعش معاكى لانك محترمة وغير كدا لبسه خمار اى نعم مجتهدة وتحقيقاتك حلوة وكدا بس هناك فى القاهرة عايزين الناس الحركة

بعد ماكنت حاطة حلم انى اكون صحفية مشهورة فقولت لا بلاهم
وان كان على كتاباتى فهحاول اشوف النادى الادبى عندنا واروح قصر الثقافة
واكمل المسيرة بعيد عن الصحافة

وحطيت لنفسى انى هكمل علاقات عامة
وان شاء الله لما اخلص احضر دبلومة
وانا فى الفترة دى هاخد دورات تنمية بشرية وتسويق وكدا
واخويا قالى انا هساعدك وهحاول اقدملك فى شركات

كلام جميل وخلاص على كدا

وقررت انى ادخل العلاقات العامة
ودى كلها قرارات انا اللى عملتها
مسمعتش كلام حد

اوفااجىء بقى لما رحت الكلية لقيتهم حطينى فى صحافة

طب لييييه
انت مستوفية الشروط جايبة جيد مرتفع
الصحافة محتاجة ناس

والعلاقات العامة فيها 200 طالب
وقدمت طلب انى مش راضية وعايزة احول

وانا بقى سيباها لربنا هو اللى هيقرر ان خير احول وان شر خلاص يرفضو التحويل

انا ليا صحاب حولوا علاقات على اساس انى فى علاقات وانصدمو لما لقونى صحافة وافتكروا انى ضحكت عليهم هههه

الخيرة فيما اختاره الله

يلا كفاية كدا علشان اودى المايك

اتفضل ياريس شكرا نجيلك فى الافراح كدا

لا لا استنى فيه حاجة بس هقولها

- بالنسبة للبنت اللى حكيت عنها
أنا شفتها مرة فى تعليم مفتوح
ومرة تانية فى المترو وكانت جريئة لدرجة انها تتعرف عليه وترغى معايه وتحكى لى قصتها كمان
وفعلا حاجة تحزن الواحد .. والناس دى خلتنى أخاف وأقلق من الحب وممن أحب والناس اللى بتقول إنها بتحب لأنى ببساطة مش عارف حقايقهم

لا ياعمو صوابعك مش زى بعضيها
الناس اللى زى دى بتبان كدا من كلامك معاها من جرأتها
لكن لما تكون واحدة محترمة اصلا مش هتفتح معاك كلام وان اتكلمت هيكون فى حدود حاجة او موضوع
وعمرها ماهتفتح اى موضوع شخصى مهما كان
وهتلاقيها بتتكسف انها حتى تبصلك او تتكلم
وانت نفسك هتحترمها

ولا ايييييه

والسلام عليكم ورحمة الله وبركاته
:) :) :)

طوبه فضه وطوبه دهب يقول...

انت قصتك تتعمل افلام ومسلسلات المهم ودا اللى دايما بقوله لنفسى انى مدام جربت وعشت التجربه بس ما عملتش حاجه غلط يبقى اكيد دى حاجه فيها اضافه ليا مش عيب

شاب فقرى يقول...

دموع القمر

إتفضلى الميك هديه وهنبقى نجيب واحد تانى

بالنسبة للنقاشات اللى ذكرت فى الرد عندك

- الواحد فى بدايه حياته لازم يتعب ويتبهدل ودا شىء طبيعى جدا

يعنى سواء فى جرنال بلدكم او فى اى جرنال تانى فمش هتفرق

وبعدين انا ليه تعليق عاللى قالك انتى متنفعيش عشان محترمة ولبسه خمار

عادى فى صحفيين شغالين فى مجال الصحافة بالخمار وايه علاقة الاحترام بالمهنة ؟؟؟؟
وبعدين بيحبوا الناس الحركة
طيب ما تبقى من الناس اللى قلتى عليهم دول

مش شايف اى مانع صراحة

وبالنسبة لمجال العلاقات العامة
المجال دا الصراحة صعب
بس انا بحبه جدا برغم اى صعوبة موجودة فيه
لانه المدير فيه او الموظف بيخاطب الكل وبيتفاهم مع الكل وبيوصل معلومات لناس برا وجوا المؤسسة ولازم يحسن صورة المؤسسة ودا فى حد ذاته صعب على اى حد
بس الحمد لله
انا لو كنت عايز اكمل فيه
انا عندى قدرة ان اقنع أى حد بالشىء ونقيضه فى نفس الوقت :D

ربنا يعينك فى اختيار القرارات الصائبة

وبالنسبة للبنت اللى انا كنت بتكلم عليها

انا شفت واحدة فى تعليم مفتوح انا بالنسبة لها ساعتها عيل

وشفت واحدة تانية غير الاولى فى المترو

يعنى اتنين

الاولى حكت القصة عادى
والتانية حكت القصة برده وهى اللى اتعرفت عليه لانى اساسا مش بتعرف على حد

واللى اتعلمته منهم هوا عدم الثقة فى الناس اللى بتحب لانهم حبوا واتدبسوا

ونورتى المدونة يا أستاذة :D

شاب فقرى

شاب فقرى يقول...

طوبة فضة وطوبة دهب


ووووووولكم بيكى فى البوست دا

انا كنت حاسس من قبل ما اكتب انها تتعمل مسلسل

ربنا يستر وميجيبوش بطل من برا :$


شكرا لمرورك

شاب فقرى

GeHaD-----(male) يقول...

تعرف ان البوست دا غير شويه حاجات فيا

الي الامام يااحمد ههههه انت اسمك احمد ولااسمك ايه انا مبحبش فقري دي

شاب فقرى يقول...

عزيزى جهاد

مشيها فقرى مفيش مشاكل

why should i hide who am i ???

الحقيقة فقرى

ويارب يكون البوست وكل اللى حصل فيه دا عجبك

تحياتى

أخوك فقرى

الشعب لابد له من حكومه تشكمه يقول...

جييييييييييييت تانى:)

ازيك يازعبولتى(نسبه الى زعبوله:)

اكتر حاجه عجبتنى هنا مش البوست تؤ تؤ كومنتاتك وبالتحديد كومنتك اللى فيه نصايح لدموع القمر وردك على ميرام دا عجبنى جدااااااااا....

وانا متفقه جدااا مع جهاد انا اصلا وبصراحه كده انا مكسوفه اقول لواحد فقرى؟! ازاى يعنى اكلمك واقولك شوف يافقرى!!!!!!! اتكسف والله:(
وبعدين مفيش حاجه اسمها فقرى,كله مكتوب ونصيب واللى تعبك زمان او لسه بيتعبك دا هو اللى خلاك انت(مش الشاب الفقرى) لا خلاك انت اللى هو انت,بدماغك بتفكيرك.خلاك بتعتمد على نفسك وتفكر وتشتغل و ازاى تطور من نفسك ومن قدراتك.

اخيررررررررا سؤال:
انا عندى احساس انى اعرفك,,,!! انت عندك بلوج تانى او بتعلق باسم تانى؟؟؟؟؟
امممممممم مش عارفه ليه عندى الاحساس ده؟!!!!!!!

سلام يازعبولا.

dramaqueen يقول...

أسلوبك حلو اوى فى الحكى

تحياتى
وشكرا ليك على متابعة مدونتى

بسنت يقول...

تعرف كان نفسى اعرف فعلا مين اللى بيكتب محاضرات التعليم المفتوح لانى كنت بلخص تصدق محاضرات اخويا فيها اللى يمكن واحد فقرى زيك كدا ولا نقول مكافح كان بينقولها وكنت بلخصهالوا واكتبله المهم بعد مراجعه اسئله الامتحانات
ولو كنت اعرف انه بياخد 40 جنيه كدا نا اكسب كتير
ههههه

على العموم انت شكلك مكافح من يومك بس فعلا كانت فرصه انك تدرس اعلامك بالمره وتاخدلك شهاده فيها ما دمت فهمتها اوى كدا

بس المهم تكافح كدا فى الاتصالات والالكترونيات زى الاعلام

ودمت بخير

asadma7bos يقول...

ربنا ينتقم من فقرك انا زى اللى عمل شجيع السيما وفى الاخر عيط
كلامك كوارث مجمع تسونامى التعليمى
بس بجد مش معنى كلامى انى هتوقف عن دخول مدونتك بالعكس انا كل ما احب اكسب ثواب فى حد حبيبى هزقة عليك يمكن يتعظ وهبعتلك منتخب الجزاير كللة ممكن يتم المراد ونصعد ببركة سيرتك الفقرية
مع تحياتى الى الامام

شاب فقرى يقول...

شيما والشعب لازم يلاقى حكومة تلسعه على قفاه

بصى يا شيماء

انا بحب الحاجات دى فعلا لانها هى اللى عملتنى

عملت شاب فقرى

اسما وليس حالة

يعنى هى اللى صنعت الانسان اللى بيكتب دا منقدرش ننكر فضل ربنا وفضلها


بالنسبة لردى على دموع القمر انا كنت مكسوف وانا بكتبه لاكتر من سبب
- اولهم انى بحس وانا بنصح حد انى بقول كلام حمصى
- ثانيا بحس انى وانا بدخل فى حياة انسان انى بفرض رأيى عليه للى انا شايفه فى مصلحته مع انى مش بعمل كدا فى الحقيقة بيبقى على لسانى كلمة واحدة بسسسسسسس (( براحتك , اللى يناسبك , اللى يريحك اعمله )) دا طبعا بعد النصيحة
-ثالثا والأهم : نسيت والله لما افتكر هبقى اكتب

جهاد شرفنى باللى كتبه بإنى غيرت فيه حاجات ورده فرحنى جدا وخلانى اخد بالى برده وانا بكتب اوى عشان مش أحبط حد كفاية الاحباط والهم اللى عايشين فيه فى البلد دى

إجابة السؤال :
بالنسبة إذا كنت تعرفينى من قبل
الرد : مستحيل لأنى منعزل جدا جدا جدا جدا جدا
هل ليه مدونة سابقة ؟
الرد : أينعم وقفلتها وبقيت بكتب هنا بس
هل بعلق بإسم تانى ؟؟
الرد مستحيل لأنى بعتز بشخصيتى جدا حتى اما برد على بعض المدونات ردود تحرق الدم لسبب معين برد باسمى برده لانى بعتز بنفسى جدا

بالنسبة للإسم اللى الناس تندهلى بيه خليها فقرى
فقرى حلو ومش أى حد بيندهلى بيه
:D
واسمى هطلعه ان شاء الله لما اخد الشهادة من ريدهات ان شاء الله وهطلعه هنا فى المدونة كمان :$

حلوة طريقة سين وجيم دى

هههههههههههههههههههههه

المرة الجايه هبقى انا سين وانتى جيم
:D
مينفعش حد يستجوبنى :P

وأغلق المحضر فى ساعته وتاريخه قبل صلاة الجمعة الساعة عشرة وتمان دقايق

شاب فقرى :P

شاب فقرى يقول...

dramaqueen

ذكر فى المادة رقم 18 فى القانون رقم 0900123456 فى الدستور التدوينى الحر بالنص التالى : من حق كل مواطن يتابع المدونات الممتازة التى تعجبه والتى يحس فيها بموهبة لدى المدون على أن يترك تعليق فى كل زيارة حتى وإن لم ينزل بوست جديد

ولذلك أمرت النيابة بمتابعه مدونتك على مدار 24 ساعة يوميا

نورتى المدونة :) :) :)

شاب فقرى :)

شاب فقرى يقول...

بسنت

يا ولكم يا ولكم

انا كنت باخد فى اليوم الجمعة فى الخمس محاضرات 40 جنيه

شكرا لزيارتك

بعد كدا خليه يدفع لك عشان يبقى ليكى نفس وانتى بتجهزى المحاضرات

وبالتوفيق لاخوكى

شاب فقرى بمزاجه

شاب فقرى يقول...

اسد محبوس

ايه النور دا كله

حزب الاه ملعلع عالنت

مدونتك جامدة اوى وهزورها قريب تانى بعون الله لما اليوم دا يخلص على خير لان شكله يطول معايه

شرفتنى بالزيارة والرد

والله لو جبتلى جيفارا ذات نفسه وعايزنى اقنعه بانه يبطل الهبل اللى كان بيعمله
هخليه يعتزل ويشرب شيشة عالقهوة كمان

بس للاسف جيفارا مات

ودى لحظات مش بتطلع لاى حد

نورتنى يا اسد

وبصراحة انته جدع اوى عشان حاطط قصايد لابو القاسم الشابى عشقى الاول فى الشعر


تحياتى

شاب فقرى

sony2000 يقول...

بجد بوست جاااااامد اوي
ههههههههههههههه
قعده عماله اضحك من المواقف
معظمها او كلها تقريبا بتحصل حدانا
موش جيراااااااااان
تجاره بقي ..اوعي
دمااااااار شامل يامعنمي
تقبل مروري وتحياتي