الاثنين، 12 أكتوبر 2009

لحظة وعدت زى سنين



أكتر شىء متعب فى الدنيا من وجهة نظرى
هوا إن الواحد يكون قوى الملاحظة وتركيزه قوى وغير قادر عالنسيان
أنا شايف إنها إبتلاء من ربنا على قد ما هى نعمة لا تقدر بثمن زى نعمة البصيرة بالظبط
إنك تظل فاكر كل لحظة فيها ألم فى حياتك بكل تفاصيلها
وإنك تظل فاكر كل لحظة حلوة فى حياتك ومش قادر تكررها مرة تانية
يحتفظ عقلك بكل شىء يتعلق بالذكرى دى
بداية بعقارب الساعة وتفاصيل بدايه الحدث
لحد آخر لحظة فى الحدث وإنته قاعد بليل عالسرير لوحدك ومش عارف تبكى عاللى راح منك
ومش عارف تصحح وضع غلط
ومش عارف تكلم حد قريب من قلبك وتقول لفتاة الأحلام
(( النهارده كانت أسعد لحظة عشتها من سنين لما شفتك وإنى حاسس إنى هكمل عمرى معاكى ))
بس مينفعش لأنها متعرفكش ولأنك مش هتعرف تقرب ناو
وقاعد برده مش قادر تبطل تفكر فى أى حاجة غير فكرة واحدة عاملة زى النار فى الهشيم
بتحرق عقلك وبتسيطر على مشاعرك
وتفكرك بكل التفاصيل وبكل اللى حصل
أنا عارف الموضوع صعب
لأنى عايش كدا
أقدر أحكى كل حاجة حصلت معايه تخص شخص معين
كل حاجة بمعنى كل حاجة
شوية تركيز وشوية هدوء أفتكر كل حاجة حصلت لى
أقدر أفتكر كل حاجة
ممكن كلمة بسيطة من شخص قريب منى
تخلينى أفتكر وفاة والدى
وممكن أوى إنى أشوف واحدة للمرة الأولى فى حياتى
أفتكر حب قديم وأفتكر كل لحظة وكل كلمة وكل موقف وكل اللى عملته
أحيانا بشوف دا عقاب من ربنا لأن الموضوع بيتم بشكل أوتوماتيك و لا إرادى
والفكرة تسيطر عليك وتحس قدامها بالضعف لأنك مش قادر تبطل تفكر فى الفكرة دى
حتى لو حاولت تتكلم مع حد وتشكى له كل الكلام ينتهى
زى بالظبط أما إيدك تتلسع أو تتحرق
متبقاش قادر تفكر فى أى شىء غير الألم
طيب دا ألم جسدى بيزول بألف شكل وشكل
لكن الألم النفسى
الفكرة المسيطرة عليك

الوجع اللى بتشعر بيه منها أقوى بكتير من أى شىء
تقدر تقول صداع وهمى
ممكن حديث بسيط يقلب عليك جراح سنين
وجراح عمرها ما بتتقفل
متقفلتش بقى لأن إنته مش عايزها تتقفل أو لأنك لما حصلك الجرح دا صمدت زى الجبل
دا اللى حصلى بالظبط يوم وفاة والدى
مفتكرش إنى عيطت أو حصلى إنهيار ومفتكرش إن تفكيرى إتشل ولو لحظة واحدة
يمكن بكيت جمب والدى دقيقتين
وبعدها قمت ونسيت كل حاجة
بقيت بتحرك بقوة وسرعة ونسيت كل حاجة
فى حين توقع الكل إنى أكون أول من يسقط ويضيع
بالعكس
وقفت زى الملك فى الشطرنج لآخر لحظة صامد
عشان كدا ممكن تمر عليه لحظة حزينة زى اللحظة اللى كتبت فيها البوست اللى فات
لحظة تخلينى غصب عنى أفكر وأفتكر اللى فات
فعلا قوة الملاحظة والتركيز والذاكرة القوية بالنسبة لى أكثر شىء متعب فى الدنيا
وأكتر شىء مؤلم
وأكبر نعمة شايف ربنا منحها ليه
بتفكرنى بكل حد حبيته وفارقته
و بكل غالى فقدته
و بكل وهم عشته
و تيجى عليه لحظة
و تمر زى سنين

شاب فقرى :(

----
ملاحظة : مقدرتش أرد على البوست الأخير . شكرا لكل الردود واللى حاولوا يقفوا جمبى مع خالص تحياتى وشكرى للجميع.

هناك 27 تعليقًا:

VÖltaa يقول...

اقولك ايه ياصحبى

عندى نفس الموضوع ده

ولسة حالا قبل مادخل

كنت فى لحظة من اللحظات اللى بتفتكر فيها كل حاجة وحشة

للأسف لسة حالا بعد ماكنت فاكر نفسى كويس مع الشخص اللى افتكرته
اكتشفت انه بيعانى منى وتعبااان اوى

ادعيلى ياشاب انه يسامحنى
وادعيلى انسى


تحياتى ياكبير

Cute Kitty **sookra يقول...

شاب فقرى
قريت البوست من 3 ساعات لكن ماقدرتش اعلق وموش همنى انى اكون اول تعليق
لكن ...............

adel يقول...

بص هو انا الحقيقة بقالي كام بوست مش عارف اعلقك
بس انا بقرا كلامك عموما ...
بس بلاش اعلق :)
انت عارفني يابقول كلام عن البوست وبفصصه (بس مش علي البوست ده)
يا برد علي الموضوع بغباء (وده مش ينفع حاليا)

شاب فقرى يقول...

Mo7ammed

ربنا معاك ويصلح لك الحال يارب

تحياتى

شاب فقرى

شاب فقرى يقول...

saso

ولكن ايه ؟؟؟

شاب فقرى يقول...

adel

نورت

هحاول أحل اللغز اللى كتبته دا

دعواتك :)

ووابقى فهمنى فى الرد الجاى

شاب فقرى

غير معرف يقول...

ومش عارف تكلم حد قريب من قلبك وتقول لفتاة الأحلام
(( النهارده كانت أسعد لحظة عشتها من سنين لما شفتك وإنى حاسس إنى هكمل عمرى معاكى ))
بس مينفعش لأنها متعرفكش ولأنك مش هتعرف تقرب ناو
ماتغلطش الغلط الي انا غلطته وتتعلق بوهم
انا فضلت سنتين بحب واحدة من غير ماتعرف واوقات كنت متهيالي انها بتحبني وحاسة بيا لحد ماشوفتها في يوم لابسة الدبلة
كان اول يوم اروح اكلمها عرفتها بنفسي وحسيت وقتها اني كنت عايش وهم في دماغي وهي ولا كان في بالها
انا عارف انه نصيب بس انا كل مافتكر قد ايه كنت غبي اقلها وقتها كانت هتبقى عارفة ويانكمل يامنكملش لكن مديتش لنفسي الفرصة دي
انا من تجربتي بقولك ياتعرفها ياتصرف نظر والله مش عايزك تحس نفس احساسي

الشعب لابد له من حكومه تشكمه يقول...

اولا: لو بتحب واحده وهى متعرفش فى حجات كتير ممكن تفهم منها اذا كانت هى موافقه او لا يعنى فى تلميحات فى بعض التصرفات اللى بناء على رد فعلها هتعرف اذا كانت مياله ليك او لا...

ثانيا:
ادعيلى باه اصلى مش بنسى:( وياسلام لو حد عمل حاجه تضايقنى يووووووه مش بنسهاله ولو حاجه جامده يباه مفيش سمااااااااح:(

Yusuf يقول...

انت عندك حق

قوة الذاكرة داء وليس ميزة

وللأسف انا أحد المرضي

ربنا يرحم والدك

مش عارف اذا كان ده وقته ولا ايه

بس نصيحة مني اتفرج علي فيلم Elizabeth town

بتاع اورلاندو بلوم

والسلام ختام

ميرام يقول...

(:
أنــا كــدة
(:
ممكن أفتكر موقف بتفاصيلة بكل حرف اتقال بيه وازاي اتقال ..

لكن الألم النفسى
الفكرة المسيطرة عليك
مين قالك كده ....!؟
الألم الجسدي بيتعالج
والألم النفسي كمان
ممكن أقولك لا العكس ... الجسدي على الاقل علاجه ممكن يكون بايد حد تاني ...
لكن النفسي بايدك انت وبس
من رحمة ربنا بينا ان الانسان يقدر يصنع الحالة الي عايز يعيش فيها
انا مش بتكلم كلام نظري
ممكن اتنين يقعو في نفس المشكلة
وواحد منهم يتخطاها أو يتجاهلها
والتاني يعيشها وتؤلمه
الفكرة في مدى تعاملنا مع المشكلة
لو حطيت نفسك في دائرة الاكتئاب مش هتخرج منها
لو حسيت انها عادي مشكله مرت بناس وهتمر بناس ومرت عليك هتتعامل بمنطلق تاني مع نفسك
(:



بالنسبة لاستحضار الصورة
وان موقف يفكرك بآخر ..
فده برضه انت قادر على التجاوب معاه
لأنه شيء طبيعي جدا
أنـا كل مااشوف كانز ميرندا بفتكر شخصية معينة (: (:
تخيل بقى بشوف كم ميرنداية في اليوم وبفتكر الشخصية دي قد ايه
(:
المهم في الموضوع انك ماتقيسش حالة مش هقول فشلت فيها هقول ماوصلتش للنتيجة الي عايزها _مقياس ليك للحالة التانية
لأن لو اختلفت الشخصيات هتتخلف الظروف تباعا
(:

على فكرة أنـا بقول الكلام ده وانا واثقة انك ممكن ماتستفيدش منه كتير
مش لأنه كلام مش مهم
بس عشان ماشاء الله واضح من شخصيتك قد ايه انت ايجابي ومتفاءل

بالتوفيق

غير معرف يقول...

النسيان اكبر نعمه

كمان القدره على اجتياز الالم .... ومحاوله عدم تذكر ما فيه من صعاب .... واستخلاص الفائده فقط مع قليل من الندبات

ده هيتقدر توصله بالخبره والنضوج

تحياتي

------ يقول...

احم احم احم
واحد ينسون لو سمحت
لحسن شكل القعدة هطول
البوست طويل
بس هيتقرى هيتقرى
ههههه

قوى املاحظة
ذاكرته قوية
وغير قادر على النسيان


سبحان الله
صفات مش موجودة
يبقى كدا انا
اسعد اوحدة فى الدنيا ههههه

نروح نكمل يمكن نلاقى حاجة كمان

النسيان نعمة حلوة
بس فيه مواقف احنا اللى نقعد نتذكرها
ونفصصها ونحاول نشوف تفاصيلها
وتمر علينا زى شريط السينما
وساعات يمر عليك موقف اثناء العرض السينيمائى
تكون هتكون من الغيظ ليه حصل كدا
ليه انا قولت كدا

هههه حلوة لفتات احلامى دى
اكيد برضو هييجى يوم تتخانفو وهتفضل تفتكر الموقف وتقول ليييييه
اصل الحياه مش وردية على طول

احم احم
انا مش فاهمة
انت بتقول مينفعش علشان هى متعرفكش
يعنى انت هتحب اى واحدة ومش هتعرف مين هو شاب فقرى
ولا انا دماغى ركبت فى الفهم ولا ايه النظام
نروح نقرا تانى

سبحان الله انا
مبفكرش فى موضوع واحد

يمكن اقعد قبل ماانام
اجيب ميت موضوع فى بعض لدرجة
انى بحس انى دماغى هتتفجر
من كتر التفكير

ومشكلة الواحد انه مبينساش
الحوار مهما كاااان
يعنى مثلا لما افتكر حد
اجييب الماضى كله
وحواراتها كلها
بس : ): )

مش بقولك الذاكرة
عندها زهايمر رهيب ههههههه

لا لا لا متحسبهاش كدا
هو مش عقاب
ربنا برضو رحيم
والله المثل الاعلى
مش حد هيقفلك على الواحدة
بس هو انت لما بتوشف واحدة
ممكن يصدر منها قول او فعل
كانت حبيبتك قبل كدا
عملتوا او قالتوا

فالعقل بيربط
زى ماتشم ريحة برفان او تسمع اغنية او تروح مكان تفتكر الموقف
اللى مشابهه لدا
او تتذكر شخص معين

دايما كتر تفكيرنا فى الحاجة وخوفنا اننا مننساش حاجة علشان ناخد النصيحة صح

هو اللى بيخلينا اننا اول مانحاول نتكلم الدماغ تقف والتفكير والافكار تهرب
وتلاقى نفسك نسيت انت رايح ليه هههه

اكيد الالم النفسى بيوجع وبيأثر فينا
بس احنا المفروض منفكرش فيه نحاول نقلب الموضوع

اترك الماضي وتحدي المستقبل

ولا تندم على اى لحظة عشتها

وإذا جلست يوماً وحيداً

واستجمعت ذكريات الماضى

فخذ منه كل العظة

واترك كل مشاعر الألم والوحشة التي

عشتها

بعيدا حتى لاتؤثر على حاضرك

دا بالنسبة لاى موقف

لكن فيه اشخاص مهما عملنا عمرهم مابيفرقوانا
صوتهم دايما فى ودانا
صورتهم فى الاوضة
مواقف فى كل ركن

بس المهم اننا نفضل صامدين زى الجبل مهما حصل مبنتهزش ولا لحظة
وان اتهزيت يبقى بينك وبين نفسك
واوعى تبين لحد ضعفك

تحياتى لك
والسلام عليكم ورحمة الله وبركاته

شاب فقرى يقول...

غير معرف

مينفعش تقف تحب حد من بعيد

لأنها فكرة فاشلة صراحة

انا عالاقل شايف كدا

ولو قربت واتعرفت بيها

وعايز ترتبط بيها رسمى

لازم تكون هى عايزة كدا قبلك

دا شىء طبيعى

لأن الواحد مينفعش يفرض نفسه عالناس

لازم هى تكون عايزة الارتباط دا واكتر منك كمان

الحمد لله انى مش حكيت كتير فى البوست

هخلى اللى يتحكى للبوست الجاى

تحياتى لتواجدك

ومنتظر تعليقاتك تانى لما أبدأ أحكى

شاب فقرى

شاب فقرى يقول...

الشعب لابد له من حكومة تشكمه

نبتدى منين الحكاية

مش عارف

ولكن انا ذكرت الموقف دا كمثال

لانى اذا كنت فى علاقة حب او بحب عموما

اكيد مش هسكت

واكيد هى هتكون عارفة من أول لحظة

لأنى إنسان صريح أوى بلا حدود

وكمان زى ما قلت للغير معرف

اكيد هى لازم تكون عايزة الارتباط دا او راضية عن الحب دا

مينفعش فى الحب تلميحات

لأنها بتكون زى السراب مينفعش حد يتعلق بيها

وكمان بيكون الحل فى الموضوع دا

هوا الصراحة التامة
مينفعش انا افضل احبها او احبها من الاساس لو هى مش شايفة الحب او مش عارفانى بشكل كامل

ربنا معاكى يارب وتقدرى تسامحى

انا ممكن اسامح الناس الغاليين عليه بلا حدودودى مشكلة
بس عشان ينولوا التسامح دا لازم يكونوا بيحبو ومش بيعتمدوا عالمنظق والتحليل فى فهم تصرفاتى

تحياتى

شاب فقرى

شاب فقرى يقول...

يوسف

نورت المدونة
الفسلم انا شفته زمان
ولو عندك اى اراء فى السينما ضيفنى
هتلاقينى شفت معظم الافلام لانى من عشاق الفن السابع
الفيلم عندى مش مجرد فيلم
نورت المدونة يا جميل :)

الله يرحم كل موتى المسلمين

شاب فقرى

شاب فقرى يقول...

ميرام

هوا فكرة الألم النفسى الناتج من الذاكرة هوا وجود موقف حالى او كلمة ولو كانت من حد غريب تفكر الواحد بالموقف السابق
يعنى انا مش بعيش فى الحزن لذكرى والدى كل يوم
دا لما بيحصل موقف معين ويتجمع عليه كل الذكريات والتفاصيل الخاصة بالموقف
والألم الجسدى انا مش بعترف بيه صراحة

لأنه بيزول بسرعة ومش بيظل سنين
وبيزول لوحده وبسهولة
عشان كدا فى صداع رهيب عندى ناو ومش باخد اى ادوية او اى حاجة
مش عارف دا عناد ولا إيمان بأن الألم النفسى لا معنى له
انا كدا
قد اكون مجنون فى وجهة نظر البعض
وفعلا دايرة الاكتئاب دى بقى عندى كانت من واحد صحبى
عامل إتفاقية مع اليأس والألم والهم والغم
لما كنت بكلمه كنت بكره الدقيقة اللى بدات اتكلم فيها
الحمد لله أنا مش أفتكر إنى حطيت قدام عينى هدف ومش قدرت أوصله أو بمعنى آخر فشلت فى الوصول له
أنا من الناس اللى عندها صبر وقوة للوصول للى هما عايزينه وإيمان بالهدف وبالذات وقبل دا كله فى ربنا

وشكرا لوجهة النظر اللى أكيد هستفيد منها

بس كنت عايز اقول حاجة
لو اتنين اتحطوا فى موقف والاتنين نفس الشكل والتفكير والعقد النفسية اللى فيهم
هيتصرفوا نفس التصرف
او تصرف مقارب ليه

عشان كدا مش بعتمد على حد غير نفسى
يعنى تصرفاتى بتبقى نابعة منى انا مش من الظروف ولا من الآخرين

لأن دايما المشكلة من الطرف الآخر فى أى علاقة عندى
مش من نفسى
لأنى ببقى عامل حدود لكل شخص وخط أحمر مش ينفع يعديه
وكمان ببقى عارف طبيعة العلاقة وهتوصل لإيه
وفكرة عن كل شخص .. الشخص دا هوا الوحيد القادر على تغييرها

تحياتى وإحترامى الكامل

شاب فقرى

شاب فقرى يقول...

فتاة من الصعيد

النسيان ليس له علاقة بالنضوج صاحة من وجهة نظرى

يمكن الخبرة بيكون ليها علاقة بالنضوج وكثرة التعامل

لكن النسيان نعمة من ربنا
بالإضافة لانه شىء أساسا فى الانسان واساس تسميته انسان انه كثير النسيان

انما فى ناس بتتحرم من نعمه النسيان وبتاخد نعمة الذاكرة ودقة الملاحظة

تحيااتى لتواجدك :):)
شاب فقرى

شاب فقرى يقول...

دموع القمر
كل دا تعليق :|
:) :)
الله يحفظك يارب
خارج وهرد عليكى لما آجى لأن كلامك محتاج تركيز
وانا لازم اخرج ناو

تحياتى

شاب فقرى

شاب فقرى يقول...

دمووع الفمر

شكل الرد كمان هيطول

الينسون جاى فى السكة اهوه

نبتدى

لو الصفات دى مش موجودة فيكى

يبقى انتى فعلا اسعد واحدة فى الدنيا

يا ريت لما نتجرح يكون بالسهل ننسى

ياريت لما نفارق حد يكون بالساهل ننسى

وياريت نقدر ننسى لحظات الوداع

هوا الطبيعى اننا هنختلف كتير انا وهى
وكتير اوى كمان

لان مفيش اتنين متطابقين بنسبة مليون فى المية
ولا حتى خمسين فى المية

الشخصيات والظروف وعوامل التربية وحاجات كتير اوى بتخلى فى اختلافات
المهم نتجمع على ارض فيها كل الاختلافات دى
ارض مقبولة للطرفين

زى ما انتى قلتى بالظبط
ممكن تحبنى ومش تعرف انا مين

وساعتها للأسف مش هيبقى حب
لانه ناقصه جانب المعرفة
المعرفة التامة بالطرف التانى
انا من ساعة واحدة كنت حاسس ان مخى هينفجر من كتر التفكير برده
كنت مصدع وتعبان اوى
ربنا يستر على دماغنا كلنا يا دموع
((
بس المهم اننا نفضل صامدين زى الجبل مهما حصل مبنتهزش ولا لحظة
وان اتهزيت يبقى بينك وبين نفسك
واوعى تبين لحد ضعفك
))

للاسف معرفش الضعف ولا حتى مع نفسى :):)

نورتى المدونة
وشكرا لرأيك الطويل الجميل دا

تحياتى

شاب فقرى

جمهورية شومبونجو العربية يقول...

السلام عليكم

فينك يا مان

معلش انا جيت متأخر انت عارف المواصلات عندوكو صعبة قوى

بس انا جيت بسرعة
اصل انا جاى فى توك توك

وبعدين انت المفروض يكون اسمك
شاب متفائل مش فقرى

انا معنديش اعتراض ولا حاجة

ومستنيك فى الرئاسة
.....
تحياتى

رئيس الجمهورية

شاب فقرى يقول...

عزيزى رئيس الجمهورية

اشطة ياريس
هنالك نلتقى فى الرياسة :)

انا عارف انى مقصر مع الكل

بس فى ضغط فى الشغل اليومين دول

لأول مرة بعمل اعلانات وشغل لموقعى بشكل مكثف

فوقتى ضايع اوى

ومجهد ومصدع وغالبا نايم اوى

تحياتى

شاب فقرى

الشعب لابد له من حكومه تشكمه يقول...

احم احم لا مش هينفع كده يا اخ......اممممممم اسميك ايييييييه؟
زعبوله؟ اه حلو زعبوله:)
اعترررررررررف وقول اسمك بدل منشر زعبوله فى عالم المدونين ههههههههههه.

المهم شوف يعنى ايه لما تكون بتحب واحده تروح تقولها كده مره واحده؟؟؟
لا طبعا عارف ليه؟ لانك ببساطه لو هى مش بتبادلك نفس الشعور انسى ان يكون فى بينكو اى كلام تانى,اللى قصدته لما بتحب حد تصرفاتك وكلامك وحتى نظرة عنيك هتعرفها انك بتحبها من غير ما انت تتكلم,وانت كمان هتحس بالحجات دى فى عنيها لو هى بتحبك,دى اللى بناء عليه حضرتك هتتكلم مش فجاه وانتو بتاكلوا كشرى تروح خابطها انا بحبك..هى حلوه بصراحه ههههههههه مفاجاه تخلى اى حد يفقد النطق :)
بس المشكله لو مش بتبادلك نفس الشعور ...
فهمت قصدى...

انا باه عكسك تماما كل مزاد حبى لحد مسامحوش:(
لانى عمرى مبحاول اجرح اى بنى ادم بكلمه فتخيل لو حد عزيز عليا بحافظ جداااا على شعورهم وبكون جدعه جداا معاهم علشان كده اى حركه نص كم بتخلينى اشيل الكم اصلا:)) وبدون رجعه..
تفتكر قلبى اسود؟؟؟؟؟:(
بس انا احب انى زى مش بجرح حد عزيز عليا لانه غالى عليا محبش انه يضايقنى واعتقد ان ده حقى:(
تفتكر اروح لدكتور نفساوى :)اقوله قلبى اسود وابيض نفسى يكون كروهات..

ماشى يازعبوله:)
طب حلو زعبوله طب اثبات للديموقراطيه اختار:
زعبوله,,بسطويسى,,بوزو..:)
شفت الديموقراطيه:) اختار باه:)

شاب فقرى يقول...

الشعب لابد له من حكومة تديه على قفاه

ولكم

صراحة اللى يريحك

بس بلاش زعبولة دا

بقلق منه بالاضافة لانه اسم شعبى جدا :D

فى وسط طبق الكشرى اقولها بحبك

تصدقى فرصة

ههههههههههههههههههههههههههههه
ههههههههههههههههههههههههههههه
ههههههههههههههههههههههههههههههههه
هههههههههههههههههههههههههههههههه

وهوا انا هعزمها على كشرى اساسا :P

المشكلة لو مش بيبادلنى نفس الشعور

فعلا مشكلة

بس مش عندى لان حاليا مفيش حد اتبادل معاه مشاعر وجوابات والحاجات دى كلها

فعلا من حقك ان الناس مش تزعلك

انا كمان دا من حقى عشان كدا قطعت علاقتى بكمية بشر لا مجال لذكرهم

كتير جدا بغباء

لدرجة انى حسيت انى ندل لانى بعتهم

بس طبعا العيب فيهم من كتر ما باعونى

لاء مش لازم دكتور نفساوى

انا فى مرة فكرت اروح لدكتور نفساوى كنت فاكر الكشف بتاعه عادى زى العيادة العادية مثلا 20 جنيه

لقيت التذكرة ب 150 جنيه

الجلسه

طبعا ساعتها قلت تولع

انا هقعد اقرا فى الطب النفسى واعالج نفسى عند الشيخ كتكوت اوفر

ههههههههههههههههههههههههههههههههه

فحاولى تنسى موضوع الدكتور النفساوى دا خالص

انا مستنى لحد ما يبقى فى بيتنا دكتور فى العشرين سنة الجايين وان شاء الله يتخصص نفسى ويعالجنى

عشان سرنا ميطلعش برا :D

والله انا محتار

بجد الاسامى كلهم هايلين

لكن هكتفى ب

شاب فقرى

Roqaya يقول...

de awl marah ad5ol elmodawana bas begad elpost shadny awy w Allah ykon fe 3onak bema en elmawdo3 da 7agah sa3ba kda w ta3bak :)
asl ana ll2asaf mgrabtsh eza kan mawdo3 elzakra elqawya da 7agah w7sha aw kwysa
3shan ana 3aksak tmaman, msh baftkr mwaqf wala ash5as kteeeeeeer,, w hwa dah ely ana mgrabah kwys.. w lazm a2olak en elzakra elday3a zayee kda de 7agah mot3ba awy bardo
msh hatkon mabsoot wenta nasy el7agat el7lwa w elw7sha.. 3shan 3omrak ma htt3alm mnha lama tnsaha kda, w aked hatla2y nafsak bto2a3 fe nafs el3'latat 100 marah, msh 7lw lama tnsa elnas w elmawaqf w elamakn sada2ny
w asfa 3shan elcomputer m3andny w msh rady yktb 3araby

شاب فقرى يقول...

رقيه

اهلا وسهلا بيكى فى المدونة

يارب تكون الأفكار والكلام اللى فيها عجبتك
مش مهم طريقة العرض

وبالنسبة للموضوع بتاع الذاكرة
انا صراحة بتكلم هنا عن انى مش ذاكرتى قوية وبس انا بفتكر كمان لحظات مرة جدا ف حياتى

اينعم انا اتعلمت فيها كتير

بس تعبت أكتر مليون مرة

والحمد لله اتعلمت من أخطائى كويس أوى

وشكرا لردك وربنا يقدرك ويقويكى على الكمبيوتر ويتصلح

تحياتى لتواجدك

شاب فقرى

نعكشة يقول...

هوا إن الواحد يكون قوى الملاحظة وتركيزه قوى وغير قادر عالنسيان


الحمد لله ولا عندي قوة لماحظة
ولا عندي تركيز
ونساية درجة اولى

بس برضو حاسة انى عندي الم
نفسى افهم نابع من اية
والله الحمد لله احمد الله كثيرا
عندي كل حاجة
عاوزة اية بقة؟؟؟؟؟؟؟؟؟؟؟؟؟
متعرفش

عامة

بس برغم كل الكلام اللى قولته فوق
فيه حاجات معينة مبعرفش انساها
وكل اما افتكرها عيني تدمع
وبعد ما تدمع اعيط جامد
وبعد ما اعيط جامد اصدع
وبعد ما اصدع و زوري يوجعنى قوي و مببقاش قادرة اتكلم
بقوم و اغسل وشى
وانا مش فاهمة انا ليه فجأة عملت كدة فى نفسى

............


الوجع اللى بتشعر بيه منها أقوى بكتير من أى شىء
تقدر تقول صداع وهمى


.................

كل واحد عندة الشئ القادر على ان يجعله بائس
والشئ القادر على ان يجعله مبسوط و منشكح
الفكرة اننا ندعبس جوانا
ونشوف احنا عاوزين ايش

عامة

زى ما حضرتك قولت

الحاجات دية بتحصل اوتوماتك
للأسف

بس كدة

سلام عليك

Sam Sh يقول...

كل موقف عدى علينا فى وقت من الأوقا من الطبيعى إنه يسيب جوانا أثر .. سواء كويس أو وحش ......
أنا فاهم كلامك و حاسس بيه جدا لأن أنا تقريبا فى نفس موقفك بالظبط و يمكن أصعب شويتين تلاتة.
أتمنالك كل خير
تحياتى