الأحد، 11 أكتوبر 2009

أبى الحبيب .... إليك أشتاق.

بسم الله الرحمن الرحيم
أبى الحبيب : بابا
بعد التحية ....
وحشتنى كتير أوى مش عارف أقولك كتير فكرت بينى وبين نفسى إنى عمرى يضيع وأشوفك تلات دقايق بس مش عارف هعمل فيهم إيه أو هنقول فيهم إيه ومش عارف هستمد منك إيه فى التلات دقايق دول ومش عارف ليه برده تلات دقايق هوا نظره واحدة منك هتكفينى
مر سنين كتير نسيت فيها معنى أن كلمة الأب ومعنى الحنان اللى مشوفتوش من حد غيرك نسيت فيها معنى إنك تزعقلى كل يوم الصبح عشان أصحى ونسيت فيها إزاى بيبقى للحياة طعم تانى وإنته فيها وإنته منورها وإنته بتقولى كمل وإتعب ساعتها كنت فاكر إنك أكتر واحد فى الدنيا دى بيتعبنى لكن بعدك فهمت معنى التعب وفهمت معنى إن الواحد يكمل وهوا مش مرتاح ,, يمكن نسيت فيها كل حاجة وإتحفر جوايا حاجات فيها معنى الأبوة لأولادى إن شاء الله بيتهيألى إنى مش هعرف أبقى فى حنانك عليه أنا بالذات

لكن ....
عمرك ما هتقرا الكلام دا ولا هتحس بكلامى
الله يرحمك
كنت فاكر السنين هتنسينى بس خلاص بعترف
إنك وحشتنى أوووووى
مش عارف أقولك إيه؟؟ :'(

أنا حتى مش عرفت أمتع عينى بيك وإنته مبتسم ليه قبل ما تموت ولا عرفت أبقى جمبك
مش تقلق عليه أنا مش بنهار
ومستحيل أنهار أو أزعل على فراق حد من بعدك أو عينى تدمع على فراق حد غيرك حتى لو كانت روحى معاه
بيمر عليه الأسبوع الأخير اللى قضيته معايه وبيمر عليه ليلة وفاتك وبفتكرك على طول وبفتكر اليوم دا
كان يوم جمعة
الجمعة دى الوحيدة اللى مش عرفت تصلى معايه
كنا على طول بنصلى سوا ويمكن يوم الجمعة دا مكنتش تعرف تتحرك من غيرى
سامحنى لأنى كنت قاسى عليك قوى وإنى مكنتش مصدق
أنا مكنتش متخيل إنك ممكن تستند عليه
لأنك بالنسبة لى القوة كلها والقدرة واللى يقدر يسند أى حد لكن مينفعش حد يسنده
مش عارف أقولك إيه
أنته من يوم ما مشيت أنا مش عرفت أستند على حد
دخل حياتى ناس كتير ,, ناس قالوا إنهم صحابى واللى قالوا إنهم بيحبونى وكله كلام ملقتش حد أعرف أستند عليه بجد أو أفكر إنه يبقى جمبى
صدقنى من يوم فراقك بقى للحياة كلها لون واحد ومبقتش ببكى على فراق حد بقيت ممكن أبيع أى حد ومفيش حد عرف يكون فى مكانك ولا حتى أقل منك
مش عارف أزورك
مش قادر أقف قدامك
حاسس إنى مقصر معاك
حاسس إن على قد ما فكرت فيه أنا نسيتك
والله ربنا يعلم ولا يوم غبت عن بالى
فات كتير
أربع ولا خمس سنين
مروا زى الطيف والحلم
وبقيت مش عارف اعمل إيه فى غيابك
بس وحشتنى
فقلت أكتب لك جواب
أنا عمرى ما عرفت أكتب جواب لحد
بس بكتب دا عشان ايه
مش عارف
بجد وحشتنى
ربنا يرحمك يارب
ويصبرنى على فراقك

إبنك ...
أنا

هناك 23 تعليقًا:

------ يقول...

اوووووووووووول

تعلييييييييييييييق

------ يقول...

والتااااااانى كمااااان


صبااح حيير طير

للشاب اللى بكرة ان شاء الله مش هيكون فقرى :)

------ يقول...

شكللللللل الناس نامية

اما احتل شوية

برااحتى بقى

------ يقول...

لالالا

ارووح اقرأ واجى

شكلها كدا رسالة شوق

------ يقول...

مش تقلق عليه أنا مش بنهار

ودى احسن حاجة انك متوقفش حياتك او تنهار

ربنا يثبتك ويصبرك

ويرحمه ويسكنه فسيح جناته

فعلا الاب دا حاجة متتعوضش

انا فى الاول افتكرتك بتتكلم انه بعيد عنك فى البلد
ساعتها افتكرت نفسى
ويمكن دمعت لان بابا بيوحشنى اوى بس مبقدرش اقول كدا
غيابوا عننا شهرين وييجى 10 ايا مش سهل بس اهه بيهون

لكن انت ربنا يصبرك
واوعى تكون قاسى على اولادك
خليك دايما سندهم
اوعى تزعل منهم فى يوم
افتكر انت كنت بتعمل ايه مع باباك وهو كان بيستحمل

كل واحد مبيحسش بقيمة الاب والام الا لما بيتوفوا
وساعتها بنحس اننا كنا وكنا ....

ربنا يسامحنا ويرحمنا
ويرحم موتى المسلمين

ادعيلوا بالرحمة
طلع صدقة
اقرأ سورة يس

تحياتى لك

ستيتة يقول...

صباح الخير
صباح الفل
ربنا يرحم والدك رحمة واسعة هو وكل أب حنين من الآباء الموجودين والراحلين

عاوزة اقول لك على حاجة
هل عندك علم ان فيه آباء عايشة وسطنا فارقم أبناءهم وطلقوا الزوجات ومش بيشوفوا العيال خالص
تعرف اني انا اعرف كام واحد سايبين عيالهم الأم تربيهم أو زوج الأم يربيهم وهم أحياء يرزقون؟
تعرف إن عددهم كبييييييييييييييييير جدا ويتمتعوا بما يسمى لا مبالاة في لغة المؤدبين والصداغة في لغة الصيع

أه والله ياأخي منهم واحد لسه موجود وعياله قدي
بقى له 32 سنة غير مسئول عن عيل بيخلفه
هو يخلف والست اللي كان متجوزها تربي العيال هي وعيلتها
وواحد تاني ساب العيال خالص ورباهم وجوزهم زوج الأم اللي بيقولوا له يا بابا وأبوهم حي يلدغ

ليه بقول لك الكلمتين دول والصداع والوش ده؟

علشان لما يكون عندك أب عزيز غالي
كان حاطك رموش لعيونه
وساعد في مرورك من سن الدلع وسن التربية
وسابك بس في سن الصحوبية
تحمد ربنا كتييييييييييييييييييييير على نعمة اب تفتخر به
وتحمل له كل ذكرى طيبة
وتكون إنت شخصيا صورة الناس لما تشوفها تقول الله يرحمه اللي خلف مامتش

ياترى انت كده؟ او بتسعى في طريق كده؟

يارب ربنا يوفقك ويجعلك خير خلف لخير سلف

لو عرفوه هيحبوه يقول...

السلام عليكم

اسال الله العظيم رب العرش العظيم ان يرحم والدك ويسكنه فسيح جناته
اصبر واحتسب وادعو له

طالبه الفردوس يقول...

السلام عليكم

كثيرا ما نشتاق لاحبابنا ولفراقهم لنا ولكن ما يصبرنا ان هناك لقاء اخر فى الجنه باذن الله

اللهم اسكنه الفردوس الاعلى

r يقول...

ربنا يرحمه ويجزيه الجنه
تعرف انا لسه معايا كتاب اسمه الايمان بالقضاء والقدر بيقولك
ان فقد اعز الاحباب زى الاب او الام او الابن ابتلاء من الله عز وجل وعندك قدوتك رسولك عليه الصلاه والسلام وربنا لما بيحب حد فعلا بيختبره ويبتليه علشان يشوف مدى صبره وايمانه
واحمد لله اجد الايمان بقدر الله موجود مهما مر العمر

الواجب منك واعتقد انى مش محتاجه افكرك الدواء لوالدك وعملك الصالح لوجه الله تعالى له ايضا كصدقه جاريه

اخيرا نحن لا نشعر بقيمه ما لدينا وراحتنا فعلا كما وضحتها ولا سندنا فى الدنيا غير لما نشوف ابتلاء الاخرين او فقدنا انفسنا لهم

ربنا يحفظ ابائنا وامهاتنا جميعا ويعوضك خير

ملحوظه ايها الشاب المكافح انت تشبه كثيرا شخصيه مكافحه مثلك اعرفها جيدا فى الواقع
وفقكم الله لما يحب ويرضى

بيطرية ومش بايدى يقول...

لالالالا
مش منكن ايه البت دموع دى
هو انا كل ما اروح حتة تيجى ورايا

ناشى ناشى
انا سايبة ليك التعليق الاول بمزاجى هه
مش عشان انتى حبيبتى
ولا عشان بمووووووووووووت فيك
لالالالالالا

بيطرية ومش بايدى يقول...

ناخد بقى تانى تعليق
بس من تحت

خاص للشاب مش فقرى باذن الله

ابعت فيه سلام كبييييييييييير جدا جدا
واعتذار اجمد لانى مش متابعاك بصفة مستمرة
بس والله مش بايدى خااااالص
وتلاقى كمان معظم المدونات اللى بقيت اتابعها معدتش ازورها خالص

ادعيلى هه اوعى تنسى



ثالثا بقى البقاء لله فى والدك
ربنا يسكنه فسيح جناته
عارف يا ياد يافقرى انا حاسة
ان والدك ووالدتك باذن الله ان شاء الله يعنى
هيدخلوا الجنة بيك وانت هتكون السبب فى كده
وبكرة تقابلنى يوم القيامة وتقول بيطرية قالت

بجد ربنا يرحمه ويخليلك والدتك
وماتنساش ان ربنا الحنان
بص اقولك حاجة كلام ف سرك
بجد يمكن تفتكر ان انا عيلة ولا حاجة
بس انا ساعة ما افتقد اوى للحنان
افكر ف ربنا واتخيل انه بيحضنى اوى او ان شاالله حتى يبص ليا بصة فيها حنية
والله يابنى بتبقى الدنيا مش سيعانى طظ بقى فى اى حد محتاجة لحضنه هو غالى
لا بقى والجميل انك تفكر بنفس الطريقة مع حبيبه انه هيجى يوم القيامة ويحضنى بقى ويشربنى بايده
وحاجات حلوة كتيييييييير
بص ممكن تستعيلنى شوية عادى مفيش موشكل بس انا بحس بالحنان اوى ساعة ما اعمل كده
يلا بقى عشان مااطولش عليك
ربنا معاك ويعينك ويرزقك من حيث لاتحتسب ويصلحلك امرك وينجيك من كل سوء

طوبه فضه وطوبه دهب يقول...

كلامك بجد ابكانى ربنا يرحمه ويرحم موتى المسلمين جميعا ويسكنه فسيح جناته ويلحقك بيه حيث الحياه بلا فراق والعمر بلا انتهاء فيصبح اكبر واعظم مكافأه على صبرك دمت بكل خير

Unknown يقول...

الله يرحمه ويجعل مثواه الجنة

انجح وابدع وهو هيكون فخور بيك

الله يرحمه ويصبرك

أحمد عاطف يقول...

صديقي شاب فقري

الله يرحمه ويحسن اليه

وتذكر

لا ينقطع عمل العبد إلا من ثلاث صدقة جارية وعلم ينتفع به

وولد صالح يدعو له

فلا تمل ولا تكل من الدعاء له

تحياتي لك

الشعب لابد له من حكومه تشكمه يقول...

ربنا يرحمه..

غير معرف يقول...

ربنا يرحمه ويبارك فيك يا رب

او ولد صالح يدعو له

ادعيه دايما

تحياتي

شفـقــة و إحســــان يقول...

يارب يصبرك على فراقه ويرحمه ويرحم امواتنا جميعا
بس بجد عجبنى الاحاسيس والمشاعر الصادقة وكلامك الموثر اللى فى البوست شكلك كده كنت ابن بار ومطيع
ان شاء الله تعوض حنانه وحنيته وحبه فى معاملتك مع اولادك
شفقة

Cute Kitty **sookra يقول...

وولد صالح يدعو له"
ربنا يرحمه ويسكنه فسيح جناته.
ويصبرك ويلهمك الصبر ويقويك وتحقق كل احلامه واحلامك

مسدس صغير يقول...

الله يرحمه
ويجعل مثواه الجنة
ويجمعك ويمعنا واياه والنبى صلى الله عليه وسلم فى الجنة

ميرام يقول...

بجد حسيت قوي بكل كلمة

حاولت بجد أعلق من اول ماقرأت الرسالة
بس لأني عارفة قد ايه لما الفقد يكون صعب علينا مابيكفيناش كلام الدنيا كله للعزاء
هكتفي بأن أدعو غيبا
له .. ولك

ponpona يقول...

هو يعرف .. صدقني يعرف
يعرف أنك لم تنسه لحظه ويعلم أنك مكسور
ويعلم أيضا أنك تدعو له وتصله هداياك الصغيره باستمرار ولا ينقطع عمل ابن آدم الا من ثلاث ..
وأنت الولد الصالح وبالتأكيد أنت تدعو له
ابتسم دائما فهو يراك الآن وكل وقت
وافعل ما يجعله فخورا بك لأنك منه ولانه لا هويه لك ذا ذكرت اسمك مفردا بلا شيئ بعده واذا احترت استشره وسيرد عليك .. هذه أنا اعرفها جيدا
احساس الفقد سيئ .. فشيئ ما كان هنا و الآن لا
هذه اراده الله وهي بالتأكيد افضل


محمد ...أنا هافترض ان اسمك محمد
هو ليس هنا الآن لكن هذا لا يعني أنه ليس موجودا
ولا يعني بالضرورة أنك وحدك
هناك فقط تغير ببعض الأشياء .. هو لم يعد هنا الآن .. لكنه موجود ..
هو هناك ويمكنك الوصول اليه متي شئت
ابتسم وأخبره انك تحبه وأخبره عن كل الاشياء الاخري
التي لم تقلها من قبل لأنك كنت حينها صغيرا ولا تفهم ولأنه لم يكن هناك وقت

الآن أنت أكبر ، كما أنه لايزال لديك وقت
فتحدث كيفما تريد وسيصل اليه وسيخبر الآخرين ويقول:
انظروا .. هذا ابني و أنا أحبه

نعكشة يقول...

الله يرحمه

جعل الله مثواه الفردوس الاعلى
وجمعك معه بعد عمر طويل فى اعلى عليين
آمين

.........

بيقولك إيه بقة

فيما معناه عشان مش فاكرة الحديث بالظبط
ولا اقولك
استنى هدور عليه فى جوجل
دورت كتير وملقتهاش
اصل انا مش فاكراها بالنص
بس انا فاكرة سمعتها

المهم يعني

كان فيه حد يعني دايماً بيدعي لناس معينة و يستغفر لهم كل يوم
فجه فى يوم و مدعالهمش
فجولوا فى المنام و قالوله انك كنت بتنورلنا قبرنا

فحضرتك لما بتدعي لوالدك انت بتعمله خير

وبعدين بيقولك
إذا مات ابن آدم انقطع عمله إلا من ثلاث

ومنهم ولد صالح يدعو له

وكمان
قريت فى كتاب الروح بتاع ابن القيم باين او بن تيمية
ملعش عشان ذاكرتي بايظة

إن السلام و الدعاء و الحاجات دية بتصل للموتي

ربنا يرحمه يا رب و يرزقك انت و هوه الفردوس

آمين

سلام عليك

حـــلـــم كـــان يقول...

البقاء الله يافقرى

ان شاء الله هتتقبل مع بابك بعد عمر طويل فى الجنه

ربتا يرحمه