الجمعة، 9 أكتوبر 2009

متع نفسك ...!



بسم الله الرحمن الرحيم
البوست دا تكملة لبوست آخر بعنوان الغرقى
لما كتبته كل اللى قروه ماعدا تعليق واحد بس هوا اللى فهم الغرض من الحكى
نبدأ على بركة الله

***
متع نفسك
يعنى إيه متعه أساسا ؟؟
المتعه هوا إحساس بيأتى من فعل معين أو فكر محدد بيسيطر على عقل الانسان وكيانه ويخليه يحس بإحساس يعلو السعادة ويسمى الإستمتاع
المتعه ليها أشكال كتير جدا لا مجال لذكرها ولكننا هنتكلم فى المتعه نفسها
محدش يفهم غلط
المتعه بالنسبة للبعض هى الإبداع
مثلا :
بتكون فى كتابه الشعر للبعض وإظهار مشاعره للآخرين من خلال إلقاء قصيدة تسحر المستمعين
قد تكون فى رسم لوحة جميلة تجسد موقف معين يسحر الناس
قد تكون فى قراءة والترجمة من بعض الكتب الأجنبيه
قد تكون فى الجلوس منفردا هادئا وحيدا فى صمت فى الظلام (( زيى مثلا ))

المتعه بالنسبة للبعض الآخر هى العمل
مثلا :
الحلم بهدف كبير وعالى والوصول ليه وتحقيق الحلم المستحيل للناس والتعب والمجهود بالنسبة لى بيكون حلو
الشغل بالنسبة للطبيب مثلا وتحقيق ذاته بالكشف عن المرضى وعلاج الكثير منهم
التصميم بالنسبة لمهندس شاب ورسم مبنى عملاق ويقف قدام المبنى بعد ما ينتهى ويبص لرسمه عالورق ويشوف المبنى
أكيد إحساس ممتع

لكن بالنسبة لشخص معندوش أدنى فكرة عن التعليم
ولا حتى يفهم ولا يعرف يعنى إيه ثقافة ولا حتى بيتابع أخبار
بيتابع أنا بكره إسرائيل كنوع من حب الوطن
وبيسمع العنب العنب العنب إعتزازا بتراثه الشعبى
وبيشوف نانسى وهيفا عالدش عشان يبقى إسمه بيشوف بنات
شخص فى الأرياف مثلا
كل همه هوا الزرع والحصاد والشغل والتعب والعرق والمجهود وياكل ويشرب ويربى العيال ويشترى فدانين للعيال ولا يبنى لهم بيت

يعنى متعه إيه اللى هيفكر فيها غير شغله وتعبه وعرقه ووصوله للى بيحلم بيه

الشخص المذكور دا هوا اللى غرق فى بوست الغرقى
وكما قال مدون قرأ البوست جملة أعجبتنى جدا وأكدت لى هوا فاهم اللى قراه
---------------------
أحمد عاطف يقول...

البقاء لله يا شاب

ثقافة الشعوب الطيبة تجعلهم يتكففون المتعة في اي شيء صغير حتى ولو كان سيودي بحياتهم

فلندعوا الله ان يغفر لهم

----------------------

يعنى أولاد البلد اللى بيدوروا على شىء صغير جدا جدا جدا قد يكون بالنسبة للبعض الآخر مقرف أو كله قذارة عشان يستمتعوا بيه
زى ما فى ناس هوايتها الرقص مع الأغنيه
فى ناس بتعشق العوم فى الترعة والبلاوى التانية
يعنى لو أى واحد من اللى بيقرا البوست دلوقتى قالوا له ينزل الترعة ولو حتى هيلاقى مال قارون تحت مش هينزل
لأن ببساطة الموضوع دا موضوع ثقافة
المصريين مش غرقانين فى الترعة
المصريين غرقانين فى بير غويط
والبير دا مليان بالعادات والتقاليد الغلط والأفكار المتخلفة اللى بتأذيهم وبتضرهم وبالثقافة العتيقه القديمة اللى متنفعش فى هذا الزمان
ويمكن من الحاجات اللى فى البير دا هى عدم إحترام الغير
يعنى ممكن واحد يسمع شيخ الازهر بيقول الحجاب والنقاب ويطلع يقول النقاب عادة ومش من الدين
بيتهيألى إن اللى بيتكلم هنا هوا شيخ الأزهر مش عم سيد بتاع البليلة
يعنى راجل دارس فى الدين وعارف أكتر من الشيوخ اللى الجماعة المتشددين طالعين بيهم السما
اللى بيلعبوا على أعصاب الشباب عشان يلموهم حواليهم وبس
دى كانت ملاحظة صغيرة بس عالهامش ونرجع لموضوعنا من تانى
يمكن إحنا فعلا بننشر رأينا بحرية عالنت فى المدونات والمواقع والفيس بوك وغيره
ولكن هل الناس الفقرا الغلابة دول حد بيوصلهم
الناس اللى شقيانة طول السنة وبرده مش بتقدر تخرج من البلد اللى هما فيها ولا حتى يمتعوا نفسهم بأى شىء
الناس اللى عيالها بتستحمى فى الترعة وبيروحوا يغسلوا المواعين بتاعتهم هناك
الناس الفقرا والغلابة
نعملهم إيه ؟؟؟
إنته كمدون واجبك تجاههم إيه ؟؟؟
طبعا أنا هنا مش بتكلم عن الدعم المادى والمالى لأن الناس اللى بتكلم عليها دى يحسبهم الجاهل أغنياء من التعفف
أنا بتكلم فى حاجة مهمة جدا بالنسبة لهم ولينا كلنا
التوعية
محو الجهل والثقافة الغلط اللى هما فيها
يعنى إنته كمدون أو كفرد فى أسرتك المفروض محدش يسكت لما يشوف غلط
سواء فى الأسرة أو فى المجتمع أو الوسط المحيط
أيا كان الغلط دا صغير
مش حكاية العوم فى الترعة بس
الناس دى محتاجه اللى أهم بكتير من الأكل والشرب
محتاجه تنور عقلها
تفهم وتفكر قبل ما تعمل الشىء
تنتبه للكارثة اللى ممكن تحصلهم من الشىء مهما كانت
أظن كدا البوست (( الغرقى دلوقتى إتفهم ))
ووضح معنى كلمة المتعه بالنسبة للناس الفقرا
اللى ممكن تكمن فى سجارة وقعدة عالسطوح بليل فى الطراوة
او تكون فى تستير البنت اللى حيلتهم
أو فى ليلة حب بسيطة
حاول تغير الوضع اللى حواليك
الناس هتقول عليك حشرى ؟؟؟أو بتدخل فى اللى ملكش دعوة بيه ؟؟؟؟
أحسن ما تقف قدام ربنا وتقوله يارب انا سكتت عالغلط وسيبت مثلا عيل زى دا يغرق فى الترعة لانى كنت مكسوف اقوله متنزلش..

مش عارف أقول إيه تانى
بس مفيش توضيح اكتر من كدا

البقاء لله فى كل ضحايا الفقر والجهل ونقص التوعية وإنعدام الثقافة فى مصر
وربنا يصبرنا على مدعين الدين والمتشددين اللى ناسيين ان الدين يسر لا عسر

تحياتى
شاب فقرى

هناك 43 تعليقًا:

بيطرية ومش بايدى يقول...

الحق امتع نفسى

واحلق
اول تحليق
على الهيلوكوبتر
صاروخ ارض جو بر بحر

فوووووووووووووووووووو

بيطرية ومش بايدى يقول...

اروح اقرا وارجع تانى

وعلى بال ما اقرا روح عند تويتى

ماشى نتقابل عند السكرة الامورة
باربى

ميرام يقول...

.....
تعرف ...
انـا افتكرت جدتي الله يرحمها ..
لما كانت بتلاقي قمة متعتها لما تروح البلد تقعد فيها اسبوع
الاسبوع ده كانت عائلتي بتبقى في قمة القلق ..
من الحشرات من انها تمرض من الناس حتى الي هناك .. من الأكل الدسم والمكشوف والغير نظيف غالبا
يروحو يجيبوها بالعافية ...
تبقى متدايقة وكأنهم حرموها الجنة ..
..............
بجد في أمثلة كتير قوي في بالي ..
شخصيات شفتها وناس عرفتهم ..
بس على قدر ايجابيتك ..
مين من الناس ماتعرفش ان الترع ممكن تودي حياتهم
مين دلوقتي ماسمعش عن البلهارسيا ..
مين مش عارف ان الاكل الدسم بيجيب كذا وكذا ..
ان الي عنده السكر مايكترش سكر
أوقات بحس ان العلم وصل بس الناس مصره تمشي بمبدأ خليها على الله
ومحدش هياخد اكتر من الي مكتوبله
ومحدش هيموت ناقص عمر
.......
كتير جدااا بسأل هو ده جهل ولا ايمان
توكل ولا تواكل
رضا .. ولا استمتاع ..!
.....
أوقات كمان بحس ان الانسان لما يقدم على شيء وهو عارف انه خطر بيشعر بلذة في نفسه
(:
أنـا شخصيا بحس بكده
مش من باب المغامرة ..
لكن النفس البشرية جبلت على كده ..
أرجع برضه واقول لاتلقوا بأنفسكم الى التهلكة
.....
مش عارفة هو الموضوع محير
.....
بس انـا مش مقتنعة انه كسبب رئيسي ( الجهل) ..
لأني بحس ان كتير قوي بيبقو عارفين بس بيتعمدو يتجاهلو ...
ممكن تعتبرها سلبية
بس بجد دي وجهة نظري
(:
تحيــاتي

ميرام يقول...

على فكرة بحس اني اتأخرت في التدوين
لما بلاقيني في آخر الليست عندك (:

Cute Kitty **sookra يقول...

شاب فقرى
انا مع ميرام ان الموضوع موش جهل لكن الموضوع عدم لامبالاه لان بجد الثقافه واقصد الثقافه البسيطه اوى وصلت للارياف بشكل واسع وانا بتكلم من واقع انى بعيش فى الريف
الريف دلوقتى مابقاش الفلاح والست بتاعته اللى بيصحوا الفجر عشان الارض والحاجات بتاعه زمان
دا بقى بيسهر قدام القنوات الفضائيه وهى كمان وتلاقيهم كمان بسبب ان اولادهم اتعلموا وعلموهم ابسط انواع الثقافه ممكن يقولوا حاجات بالانجليزى زى مابيسمعوها من اولادهم .
نرجع تانى الموضوع موش جهل فى المرتبه الاولى زى ماهو مجرد انه عاوز يستمتع بحاجه زى اللى بيشوفها على التليفزيون والدش وهى مثلا السباحه او العوم ولكن مافيش مكان غير الترعه يبقى ماقدموش غير انه ينزلها عشان يشبع رغبه عنده مهما كان الضرر اللى ممكن يقع عليه .
طولت عليك ؟
تحياتى

مسدس صغير يقول...

احييك على البوست
المتعة الحقيقية هى ان ترضى بالمقسوم

موضوع شيخ الازهر بلاش نتكلم فيه طالما ده رأيك.

احييك على الطرح المثمر

أحمد عاطف يقول...

الحمد لله ان جملتي نالت اعجابك كما نال موضوعك اعجابي الشديد ولكن

اخي العزيز الصغير

اعتذر أنني اعلق على هذه النقطة فقط

ولكن شيخ الازهر هذا ليس بشيخ ثق فيما اقول لك

اجتمع اهل العلم ( اهل العلم هنا بما فيهم اهل الازهر ) على ان الشيخ الالباني من علماء الحديث المعاصرين الذين أفنوا عمرهم في علم الحديث

فكيف بالله عليك يطلع واحد زي طنطاوي ويسخر من الالباني من منصبه الذي بهذا يمحو كل ما جمع الالباني من احاديث

سيد طنطاوي الذي احل كثيرا مما حرم الله تابع فتاويه وانت تعلم انه لا يعلم في الدين اكثر من فرائض الوضوء هذا ان كان يعلمها بيقين

اما ما نراهم متشددون فنحن لسنا أهل حكم لنحكم عليهم

تحياتي لك

واقرا موضوع سيد بيه اوكي

شاب فقرى يقول...

بيطرية ومش بايدى

يا خسارة ملحقتش البمب والصواريخ دى كلها

شكرا لزياراتك الدائمة للمدونة

تحياتى

شاب فقرى

شاب فقرى يقول...

ميرام

أهلا وسهلا بيكى فى المدونة

أنا كنت بعمل زى جدتك كدا بالظبط

كنت ممكن أروح أقعد فى البلد تلات اربع تيام هناك
مش بفكر فى أى حاجة

بريح أعصابى وبس

وفعلا وانا ماشى كنت بحس إنى ههجر الجنة :$

مش عارف السبب فى إيه لكن نقدر نقول الإنتماء والذكريات والحب للريف والخضرة والأهل اللى بيحبوا الواحد بدون سبب

وبطلت أروح خالص
بسبب برده الأهل والمعاملة مش عجبانى
بس هناك فى ناس فعلا متعرفش
يعنى فى ناس فعلا عندها جهل
وفى ناس بتعمل الشىء من باب السلبية
((أهوه مفيش قدامنا غير كدا ))
دى الجملة اللى بتتقال
وفعلا إيمانهم قوى جدا
يعنى لما بروح البلد بحس الناس عارفة ربنا وبتفكر فيه ألف ألف ألف مرة فى اليوم عن أى حد تانى شفته فى حياتى
مش تشدد فى الدين
لكن توكل وإيمان
عشان كدا بيتصرفوا وهما على يقين إن (( يقينى بالله يقينى ))
فى أسباب كتير أوى
وانا حبيت أعالج سبب واحد بس وهوا الجهل
الناس اللى بتدور على أى شىء تستمتع بيه حتى لو كان حقير وقليل بس بالنسبة لهم حاجة كبيرة

شكرا على وجهة نظرك وتواجدك

تحياتى وإحترامى الكامل لشخصك الكريم وتواجدك

شاب فقرى

شاب فقرى يقول...

ميرام
نسيت أقول إن المغامرة بتخلى الحياة ليها طعم
وكذلك ان الواحد يقدم عليه شىء فيه خطر
أو شىء مستحيل
فى ناس بتشعر إن مكانها عالجبال فى بيت النسر مش فى الحفر
وبتتعب فعلا عشان توصل

ويارب أوصل :)

-------------------
مين قال إنك متأخرة فى التدوين
الليست هنا ترتيبها من وجهة نظرى من أسفل إلى أعلى
القمة فى نهاية القائمة :) :)
وعشان أبقى أول تعليق على طول
انا حاطط مدونتك ظاهرة فى مكان معين عشان أخد بالى لو فى اى جديد
بإنتظار تدويناتك القادمة
ونورتى المدونة

تحياتى وإحترامى الكامل
شاب فقرى

شاب فقرى يقول...

saso

مش طولتى عليه ولا حاجة
ما أنا كمان ليه أهل فى الأرياف وعارف بتبقى عاملة إزاى
صحيح منزلتش بقالى فترة كبيرة
اكتر من ست شهور
انا متفق فى إن الموضوع فى الدرجة الأولى جهل + إن مفيش قدامهم غير كدا

تحياتى لتواجدك

شاب فقرى

شاب فقرى يقول...

مسدس صغير

نورت المدونة

ما هوا المشكلة بتكمن أحيانا فى الرضا

بس مين يقدر عالرضا والقناعة

بالنسبة لموضوع شيخ الأزهر ...

حاضر هسكت طالما دا رأيى :)

تحياتى لرأيك وتواجدك الكريم

شاب فقرى

شاب فقرى يقول...

أحمد عاطف

أهلا وسهلا

بجد لما قريت تعليقك المرة اللى فاتت هوا التعليق الوحيد اللى حسسنى إن فى حدب يقرا وبيتابع وبيفهم القصد فى البوست (( الغرقى ))


بالنسبة لموضوع شيخ الأزهر

أنا مش من أهل الدين ولا أفهم فى الفقة لا بدرجة شيخ الأزهر ولا حتى بدرجة كبيرة أو قليلة

فمش هقدر أتكلم فى الموضوع

وكمان جاتلى نصايح أسيب الموضوع

تحياتى لتواجدك ورأيك

شاب فقرى

ميرام يقول...

مين قال إنك متأخرة فى التدوين
الليست هنا ترتيبها من وجهة نظرى من أسفل إلى أعلى
القمة فى نهاية القائمة :) :)

انت هتعمل ثورة عليك ..
هههههه
قمة ايه بس ... احنا على قدنا
ان شاء الله هنزل قريب
شكرا ليك ...
(:

غير معرف يقول...

والله الواحد مش عارف يقول ايه
ماهو الصراحة فعلاً فيه عادات وتقاليد كثيرة ملهاش لازمة وبنعملها
وفيه صفات سيئة أكثر الناس بقت موصوفة بيها
بس علي فكرة، ده مش في مصر بس، بص حوليك كده
حتلاقي في أمريكا العنصرية والإستهلاك الغذائي الرهيب وإدمان الكحوليات ومعدلات العنف والطلاق، ده غير التحرشات الجنسية والإنحرافات الجنسية المنتشرة هناك
وليه أمريكا ؟ علشان فيه ناس كتيرة بتبصلها بإحترام، ونسيوا إنهم واقفين فوق حضارة الـ7 آلاف سنة
مصر إللي مات في سبيلها ملايين علشان يحافظوا عليها، يجيي عيل سيس مسقط البنطلون ويقولك "دي بلد زبالة معفنة"
ميعرفش إن الناس وإللي هو منهم هم إللي نزلوا ببلدهم للمستوي ده، إخص
أنا فضلت أقرا في تاريخ مصر لمدة 3 سنين لحد دلوقتي وبرضه مزهقتش منه
لإنه ببساطة كان مشرف، حتي وهي في الإستعمار، كان مشرف، الناس كانت رجالة مع بلدها، يا خوفي بقي من أولادنا لما يقروا عن تاريخنا إحنا

شاب فقرى يقول...

ميرام

الحق يقال:)ومش مهم اى حاجة تانية

متقلقيش منا لثورات فى المدونة عندى
كل شىء تحت السيطرة :) :)

تحياتى :):)

شاب فقرى

شاب فقرى يقول...

Islam El-Deeb

اهلا وسهلا بيك

التاريخ المصرى فعلا مش يتزهق منه لانه بيظهر فعلا حقيقة الشعب المصرى والخامة المصرية الاصيلة الموجودة فى البنى ادم

ومصر احسن من وجهة نظرى من اى مكان تانى فى العالم أجمع إن شاء الله امريكا كفاية انها بلدى
وانا مش بحب اى بلد تانية غيرها
يمكن فى ناس الفقر تعبهم والجهل وجههم غلط
بس مش معنى انى كتبت البوست دا ابقى بكرهها
((استاذ اسلام انا مش مسقط البنطلون ومش بشتم بلدى ومش سيس))
وانا مش هقول اكتر واحد بحب بلدى فى غيرى بيحبها اكتر منى وبيخاف عليها ومات عشانها
انا كاتب البوست دا لانى صعبان عليه
أشوف أهل بلدى بيموتوا بسبب الجهل اللى وتقاليد غلط وافكار برده غلط
شكرا لتواجدك ورايك الكريم
تحياتى
شاب فقرى

Romancia يقول...

انا عايزة اقول انى عجبتنى مدونتك اوى واسلوب كتابتك وليا عودة عشان اكمل باقى البوستات
بس حبيت اسجل رأى

ما شاء الله عليك وربنا يوفقك

زى الهوا يقول...

الموضوع اللى بتناقشه جميل

وبجد شكرا على التذكرة

فعلا الجهل يعتبر سبب رئيسى

والتوعيه هيه الحل

واللى عايز يركب دماغه بعد كده هوه حررررررر

شاب فقرى يقول...

Romancia
شكرا لرأيك فى المدونة

:)

تحياتى
شاب فقرى

شاب فقرى يقول...

زى الهوا

شكرا لتواجدك :)

تحياتى

شاب فقرى

------ يقول...

يااااااكثووووووفى

ايدا

انا كنت فى غيبوبة ولا ايييييه

------ يقول...

والبت بيطرية

مابتصدق تلحق التعليق الاول

اما اروح اقرأ وارجع

فوريييرة

شاب فقرى يقول...

دموع القمر

نورتى المدونة

المرة الجاية احجزلك اول تعليق

تحياتى لتواجدك :)

ياترى قافلة التعليقات عندك ليه ؟؟؟

منورة

شاب فقرى

------ يقول...

اى والله

انا بكون فى غاية الانبساط كجا
لما اقعد مع نفسى واكتب حاجة

وبكون سعيدة لما احقق اللى انا عايزاه

اى والله انت هتقولى على العادات والتقاليد الغلط اللى احنا ماشين عليها

يابنى شيخ الازهر دا المفروض يوقفوه يبيع مع بتوع الخضار
: ) :) :)
مع احترامى يعنى لهيبتة الا اتبعترت

اكيد فى ناس محتاجة للمساعدة
بس والله لو انت بس كلفت خاطرك ورحت زرتهم على الاقل مرتين فى الاسبوع ساعة واحدة والله انت نفسك هتكون سعيد من جوااك على العمل دا

ويمكن ربنا يرضى عنك ويوفقك فى حياتك لانك ادخلت سرور على قلب مسلم

انا عن نفسى لمااشوف حاجة غلط بسسسكت
لانى بخاف اتكلم مش عارفة ليه
بس فى مرة خلاص كنت هموت من الغيط لقيت نفسى بتكلم
وكلامى كان حلو والله ههه
والست اللى قدامى تقبلت منى

يعنى انا حلوة اهه امال كنت بسكت ليه
الشيطان كان يقول وانت مااالك هو انت اللى هتغيرى يعنى

وبجد تحياتى لك يافقرى
وسمعنى احلى سلااام

------ يقول...

ايدا انت موجوود

ازيك

والله بجد بعتذر عن التأخير

------ يقول...

انا فتحت التعليقات تانى

بس انا كنت قفلاها على اساس ان دى حملة انقذ طفلك

فكل اللى هيدخل هيقول ايه

جزاكم الله خيرا ؟؟؟؟؟؟؟؟

فخمتووو

تحياتى لك

شاب فقرى يقول...

دموع القمر

ايه الردود الحلوة دى

كنتى فين من زمان

إتأخرى براحتك

:P

هوا العيب فى شوشو هوا اللى بيقول للناس مش تقول للغلط لاء

ربنا يجازيه بقى :)

منورة

تحياتى

شاب فقرى

------ يقول...

نحن هنا من زماان

اى خددمة



بس المرة الجاية عايزة اووول تعليق
ههه

شوشو ياشوشو

وكمان بندلعه

لازم يعمل فينا دا كله هههههه

Unknown يقول...

خطوة واعية لتوعية الشعب
ولكن هل ترى أن جيلنا يحتاج إلى تلك التوعية

ويبقى التواصل

------ يقول...

يلا امشى بقى

لحسن حد يضربنى على الاحتلالات دى

اكيد مستنية زيارتك

وتويتى كمان نزلت حاجة جديدة

شاب فقرى يقول...

دموع القمر

انا بشوف مقالات والبوستات من اول ما تنزل بدقيقة

اللى مبردش عليه معناه انى مش لاقى رد او انه مش مفهوم او مش عاجبنى

:)

تحياتى

واكيد هتشوفينى فى المدونة لما تفتحى التعليقات

شاب فقرى

------ يقول...

انا فعلا فتحتها

؟؟؟؟؟؟؟
ونزلت بوسست جديد

اوعى يكون الموضوع مش عجبك هههه

شاب فقرى يقول...

الأستاذ :معتز شاهين
أهلا وسهلا بيك فى أول زيارة لمدونتى

الجيل اللى طالع محتاج غرز صفة الإنتماء فيه

يعنى يبقى بيحب بلده مش أكتر

دا هوا المطلوب

لو قدرنا على كدا

كل حاجة هتنصلح

التوعية دى للأجيال اللى فاتها التعليم واللى فاتها الثقافة والتربية السليمة

تحياتى لتواجدك

شاب فقرى

غير معرف يقول...

جميل التحليل ده

مدوونه جميله

اعتقد ان لو كلنا بطلنا نضال ع النت .... وناضلنا في الواقع هتفرق كتير قوي

طبعا هيكون افضل

تحياتي

منى يقول...

المتعة بتختلف من شخص للتاني وكل واحد وحسب تفكيره وثقافته بيشوف متعته وزي ما أوردت من أمثلة وضحت الإختلاف بين الناس ولو هنتكلم عن الناس الفقراء اللي ناقصهم التوعية يبقى لازم الأول نكون فاهمين نفسينا علشان لما نحاول نقنع الطرف التاني بإن في جهل في المفاهيم اللي عندهم وفي العادات اللي توارثوها لازم نكون عارفين ايه هو الصح ومقتنعين بيه كمان ومش اخبي عليك حكاية إنك تقنع الناس البسطاء بالصح دي صعبة لإن الأغلبية بيشوف التغير مشكلة ووجع دماغ مش ليه اخر فبيفضل إن يبقى معتقادته على حالتها كما توارثها من أهله.
أما بالنسبة لشيخ الأزهر فده مش ليه عندي غير ربنا يهديه ويرحم الناس اللي جالهم الضغط منه وانا اولهم
معلش رغاية بس استحمل انته اللي جبته لنفسك

هــو..مش ..نـو يقول...

نفسي افهمك
معلهش مش قادر...
قلت اهوهو هنا ..
ممكن نتقابل هناك ؟

غير معرف يقول...

شاب فقري
إظاهر إنك فهمتني غلط، أنا مش بتكلم عليك والله، وأنا عارف إنت قصدك ايه
وأنا زيك برضه صعبان عليا إللي بشوفه
بلد زي مصر دي ليه كده ؟ أمال لو إحنا بقي شعب قذر زي إسرائيل كان حيبقي ايه حالنا
دا ربنا بيورينا بس درس غالي وقاسي
ربنا بيقولنا شوفوا يا عرب شوفوا يا مسلمين لما تخليتوا عن العلم والقرآن وحبل الله بيحصل فيكم ايه
بيطلع حتة عيل زي بوش ويدخل أرض العراق العريقة ويغتصب نسوانكم وإنتوا بتسمعوا هيفاء وهبي وبتسقفوا
الحل الوحيد بقي إللي في إيدينا إننا نصلح نفسنا علشان علي الأقل أولادنا يلاقوا حاجة حلوة يفتكرونا بيها
والله المستعان

شاب فقرى يقول...

فتاة من الصعيد

اهلا وسهلا

نورتى المدونة

ياريت الواحد يقدر ينقل كل افكاره اللى عالورق للواقع

مكانش بقى فى تعاسة فى الدنيا

تحياتى لمرورك

شاب فقرى

شاب فقرى يقول...

كقطعة ثلج اهوى الذوبان به حد التلاشي

اهلا وسهلا فى الزيارة الاولى للمدونة


فعلا إيصال الفكرة للناس الغلابة او اللى مش متعلمين او اللى مقتنعين بالعادات اللى ورثوها بيكون مستحيل

وبالنسبة لشيخ الازهر

ربنا يهديه

تحياتى لتواجدك

شاب فقرى

شاب فقرى يقول...

هو مش نو

ولا يهمك

نورت المدونة

شاب فقرى

شاب فقرى يقول...

Islam El-Deeb

اسف جدا عالفهم الخاطىء لرأيك

صراحة الأيام دى أنا مشوش جدا

نورت المدونة

وشكرا لرأيك ومساندتك

تحياتى

شاب فقرى

غير معرف يقول...

ههههههههه
ولو أنا مساندتش مدوناتكم، أمال حساند مدونات مين ؟
وأي خدمة يا معلم