السلام عليكم أعزائى قارئى المدونة
أحبكم فى الله
اليوم والحمد لله أخدت خطوة نحو المستحيل
أو نقدر نقول المجهول
او نقول خطوة نحو اجمل احلامى
أو نقدر نقول خطوة تقربنى منها
من مين ؟؟؟
فتاة الأحلام طبعا
البوم بدأت بإنتظام مراجعة ومذاكرة منهج عالمى معتمد يخص اللينوكس (( عشقى الأول ))
الشهادة اسمها RHCE والامتحان ب 2800 جنيه
وفى مهندسين متخصصين حاولوا يمتحنوا فيها وفشلوا وسقطوا
ولو هدرسها فى سنتر معتمد (( فى اتنين بس فى مصر )) هيبقى ب 9800 جنيه فى تلات او ست اسابيع
بمعدل دراسة يومى 12 ساعة تقريبا
بدأت اليوم بمعدل عدد ساعات مراجعة ومذاكرة يوميا بشكل جنونى
لدرجة إنى من أول يوم مش قادر أركز فى أى حاجة وعايز أنام بس من التعب
تعبان من المجهود الذهنى طول اليوم ومن الشغل بليل ومن كل حاجة ومفيش جزء من جسمى مش بيتوجع
بدات المراجعة والمذاكرة النهارده مع مهندس صديق مقرب بالنسبة لى
هوا لسه ممتحن قريب كورس فى السيكيورتى اتكلمت عليه قبل كدا ونفسه مفتوحه عالدنيا
بس المشكلة فى المنهج الجميل اللى بنذاكره
إنه منهج صعب (( لأنه لينوكس ...بالرغم من انه عشقى الاول بس منكرش صعوبته ))
وان المنهج مليان ومعقد حبتين
والامتحان بتاعه يعتبر من اصعب امتحانين على مستوى العالم فى مجال ال it
الامتحانين هما ((CCIE & RHCE ))
لانه بيستمر ست ساعات وبيكون عملى مش زى بقيت الامتحانات فى الشهادات والمناهج المعتمدة
يعنى ربنا يوفقنى
أذكر فى يوم من الأيام مهندس صديق مقرب منى جدا قالى
(( قدامك خمس سنين على ما تخش الامتحان ... لازم خبرة عملى كويسة
وكمان لازم تكون فاهم كويس أوى ))
ودا خبير مفيش منه مثيل فى مصر ... وأنا عملت بنصيحته
اليوم وبعد مذاكرة وتعب وارهاق اكتر من خمس شهور هبتدى أراجع
يعنى اختصار خمس سنين فى خمس شهور ..
تعب + سهر + شغل + مذاكرة + كل أنواع العقبات
اليوم هوا اليوم الأول فى المراجعة والدراسة بالنسبة لى
7-10-2009
يارب يوفقنا
دعواتكم يا جماعة
مش هقدر اكمل كتابه من التعب
ولكن حتما سنتحدث غدا
وحتما سأصل .... بإذن الله ...وحشتينى أوى
شاب فقرى
هناك 45 تعليقًا:
انت ياعم
ربنا معاك
بجد بجد
انا بدعيلك لأنك يمكن المسار اللى كنت المفروض امشى فيه
يعنى انت انا بس وانا كبير
ههههههههههه
لا بجد ربنا معاك وتاخد الشهادة دى
بس ابقى افتكرنى بموقع ولا حاجة ^_^
سلام ياشاب
اممممممممممممممممممم
بقه اقفل التعليقات عندي يحصل عندك كل ده
يفوت عليك خمسين سنة اونا مش حسة
ماشي ماشي
ربنا يوفقك وييسرلك امورك
و تاخد الشهادة و تشتغل و تجيبلي بأو مرتب لاب توب وعربية
يلا
ابسط
عموما لو عاوز الكورس ده انا ممكن ادرسه بخمس الاف بس
محمد
ربنا يوفقك فى حياتك
ويوصلك للى يرضيه ويرضيك بيه
نورت المدونة
شاب فقرى
مها زين
ولكم بيكى فى المدونة
بطلتى تزورينا ليه يا ترى ؟؟؟
ربنا يوفقك للى يحبه ويرضاه ويرضيكى بيه
بالنسبة لو جالى فلوس واقدر اجيب لكل حد طيب زيك كدا عربية وفيلا ولا توب وكمان كارتين شحن :D
هجيب :)
نورتى المدونة
دعواتك لينا بالهدايه والتوفيق
شاب فقرى
ااااااااااااه
ابتديت انت كمان العذاب
معلش يابنى كلنا لها :(
يااااااارب فى هذه الساعة استجب دعائى اللهم اعنه ووفقه الى ما تراه حسن وبارك له ف عمله وارزقه من حيث لا يحتسب واجعله قرة عين لوالديه وادخلهما الجنة به وابعد عنه وعنهم كل سوء وحقق له كل امانيه وحبب فيه جميع خلقك يا رب العالمين
اللهم آآآآآآآآآآآآآآآآآمين
انا كده التعليق التالت
صح؟
ياحلاوة يا ولاد
لوووووووووووووووووولى
ايه الهنا ده
بيطرية
you are wellcome any time
اللهم امين
انا ابتديت العذاب الخاص بيه
فلسفة المتعة فى الحياة عندى بتقول ان دا احلى عذاب
وهوا الحلم وتحقيق الحلم والانجاز
وانى اخد خطوة
دعواتك
ومقدرش اقول غير اللهم امين
وبالنسبة للتعليق التالت
ولا يهمك هبقى احجزلك اول تعليق بعون الله
شدى حيلك فى الكلية
شاب فقرى
ونبتدى منين الغلاسة
من هنا
ولا من هنا
ولا اقولك من هنا :d
ولا اقولك
رافتا بك مش الهجان نونونو
رأفتا بيك قررنا نحن وزير الغلاسة
ونائب رئيس وزارة الاحتلال التدوينى
الافراج عنك مؤقتا نظرا لظروفك الصحية
وعدم اكتمال قواك العقلية
قصدى البدنية :d
وتؤجل القضية الى القرن العاشر والعشرين
يا الله انت لسه صاحى
ربنا معاك بجد
انا قريت البوست اللى فات
بجد والله البلد هينصلح حالها باذن الله مادام امثالك موجودين فيها
ربنا يكرمك
يااااااااااااارب
افراج
يا خسارة :(
ابقى طلى عالمدونات ومش تقطعى علاقتك بيها
لان كل حاجة فى الدنيا دى بتيجى بالتدريج
وبعدك عن التدوين هييجى لو بعدتى كتير
وبالنسبة للتدوينة السابقة
طول ما فى حد بيتحرك ومش ساكت
يبقى فى فايدة فى بكره
:)
منورة المدونة
شاب فقرى
لالالا ان شاء الله مش هاقطع
وهاحاول ان انا اتابع ومش مهم بقى رقم التعليق
هارفع شعار الاخير ربه كريم
دمتم سالما غانماَ
تحياتى
دعواتنا معاكى
شدى حيلك
وان شاء الله كلها سنه وتعدى
ربنا يكرم الكل فى السنة الاولى دى
وان شاء الله خير
شاب فقرى
هههههههههههههههههه
ياعم انا قولت ربنا فك فقرك :))
وفرحت قولت حد فينا يافقريين يامدونيين خط خطوة حلوة تيجي تقولي معرفش ايه
انا كمان النهارده اول يوم استكمالاً للكورس بعد اجازة الشهر الكريم
ربنا معاك ويوفقك ويوفق الجميع يارب ويجيب فتاة الاحلام المتنظرة دي بجد خلينا نخلص
تحياتي :))
اممممم... اولا انا عاجبني الاسم اللي انت داخل بيه، ثانيا صورة احمد حلمي، هما دول اللي جابوني هنا... عموما مبروك مقدما عالشهادة و ربنا يوفقك... انا مؤمنة بان كل واحد عايز حاجة بيحبها هيوصلها، هما شوية تعب بس لما هتوصل للي بتحلم بيه هتحس انك ما تعبتش اصلا و ان كله يهون قدام لحظة فرحتك بالوصول للي بتحلم بيه
ربنا معاك ويوفقك يارب
ويحققلك كل احلامك
بالتوفيق ان شاء الله
وان كنت مش فاهمه الصراحه طبيعه
الامذاكره اللى بتذاكرها واهدافها يا ريت توضح علشان نفهم
بس كل الدعوات بردوا ان ربنا يقف معاك
ويديك مش على قد لا اكتر باذنه من مجهودك
كل التحيه
ربنا معاك وبتوفيق
وتنجح وتجيب مجموع كبير
انا كنت فاكرة ان اصعب امتحان cpa
طلع في اصعب منة بس ممكن اعرف يعني اية الكورس بتاعك دة
ربنا معاك
دمت بالف خير وكلنا لها
يارب يارب يارب معاك
حاسه بالايام اللى شكل دى
ربنا معاك يارب
الطموح بيغير طعم الحياة
ربنا يوفقك ويقدرك ويعينك علي اللي تتمني تحققه
تحياتي
ربنا يوفقك
أه وكفى
الحمد لله بدأت
وشدى حيلك فى الكورس بتاعك
دعواتك معانا بقى :)
مسيرها هتيجى
يا مقرب البعيد يارب
شاب فقرى
isolde
إسمك كمان جذاب جدا
وفكرنى بفيلم شفته زمان
ربنا يبعت لحظة الفرح دى بقى
لان الواحد تعب من اللى بيشوفه
وان شاء الله ربنا يقرب البعيد
تحياتى لتواجدك
شاب فقرى
ليس فقيرا من يحب
يارب كلنا نتوفق للى يرضى ربنا وربنا يرضينا بيه :)
تحياتى لتواجدك
شاب فقرى
بسنت
الدراسة اللى بتكلم عليها دراسة تخصنى فى مجال شغلى
كورس كبير ومهم
والامتحان بتاعه صعب جدا
وانا بدأت أرراجع
لانى ذاكرت خلاص
بس المراجعة هتاخد وقت يمكن تلات شهور
نورتى
شاب فقرى
اسكندرانية
الامتحان اللى بتكلم عنه فى مجال الكمبيوتر وهوا بيمنح الشهادة بان دارس المنهج دا
Linux System Administrator
وهوا من اصعب الامتحانات اللى ممكن تسمعى عنها فى الحياة
تحياتى ليكى ونورتى المدونة
شاب فقرى
حلم كان
والله ايام ربنا لوحده اللى يعلم بيها
شكرا لوقوفك جمبنا
دعواتك
شاب فقرى
ربنا يوفقك ان شاء الله
محمود مخلص
نورت :)
الله يجفظك
تحياتى
شاب فقرى
عزيزى شاب فقرى
كان نفسى ابقى اول تعليق واول حد يدعيلك بس سورى لانى تعبانه جدا ولسه فاتحه الكمبيوتر من شويه
ربنا يقويك ياعم ويوفقك
ربنا يكرمك
وبالتوفيق باذن الله
.....
على الهامش ..
غريب انك تعمل كل ده عشان حد لسه ماتعرفوش
(:
على الهامش تاني
قرأت البوستين السابقين ..
ومش عارفة مش بعرف أعلق عن طريق الموبيل بكتب الكومنت ولينك النشر مش بيرضى يحمل
بأكد بس حضوري ومتابعتي(: (:
تحيــــاتي
saso
شكرا ليكى
كفايه دعواتك بظهر الغيب
تحياتى شاب فقرى
ميرام
حمدا لله عالسلامة
وشكرا لكل محاولات التلعيقات
انا عارف ان الموبايلات متعبة
مين اللى قال انى معرفهاش
انا اعرفها كويس يمكن اكتر ما تعرف نفسها بس يمكن الظروف مش تسمع بأى شىء ويمكن الظروف مش عايزة تجمعنى بيها دلوقتى ...
ربنا عايز كدا
:)
وبعدين لما اوصل واحقق حلمى
هبقى اسعد انسان هيبقى كل التعب والصداع والألم وشهور الشغل والإرهاق كل دا حاجة بسيطة بالنسبة لتحقيقى لحلمى ووجودى معاها
ولا ايه رايك ؟
ميرام نورتى المدونة
نتمنى نشوف تعليقاتك دايما
تحياتى وإحترامى الكامل لشخصك الكريم ولمتابعتك :)
شاب فقرى :)
ميرام
بالنسبة للكومنتات عالبوستات السابقة نو بروبلم
اتعودى تاخدى كوبى من الكومنت قبل ما تبعتيه وابقى ابعتيهم كلهم مرة واحدة :)
نورتى المدونة وشكرا عالمتابعة :) :)
تحياتى واحترامى لشخصك الكريم
شاب فقرى
ولا ايه رايك ؟
للأسف ....
بتفق معاك بشدة
انـا من الناس اللي بتقتنع ان حلاوة الشيء ولذته بتتضاعف مع مقدار التعب للوصول اليها
مجددا أتمنالك التوفيق
تحيــاتي
ميرام
:)
لا يوجد شىء يدعو للأسف
خلق الإنسان فى كبد
وهدفه من الحياة هوا عمارة الأرض
مش هيعمرها بدون تعب ومش هيوصل لأهدافه بدون تعب
فى ناس زي حالاتى كدا متأكدين إن حتى لو كان الهدف مستحيل لعيون البعض
المهم الانسان يكون عنده ثقة فيما يتمناه ويكون عنده ثقة فى ان امنياته اللى بيتعب عشانها هتحقق له السعادة :)
ونقول امين لدعواتك :) :)
تحياتى وبانتظار مرورك مجددا
شاب فقرى
شوف بقي ياسي فقري :)
انت قولتلك كل الكلام اللي أنا عايزاه هناك عندي
بص .. اعمل كل اللي تقدر عليه طالما ربنا بيدنا يوم جديد يبقي أنا لازم أعمل فيه كل اللي أقدر أعمله قدر الامكان وربنا شايف احنا بنعمل ايه ... ربنا هيحاسبنا ويكافئنا علي قد ما احنا حاولنا مش علي النتائج
بس بردو أنا عايز أعرف ... عرفتني منين؟ منين ؟ ياتري منين ؟
تصبح بقي علي خير
ponpona
السلام عليكم
اهلا وسهلا بيكى فى المدونة
الحمد لله اننا مش بنتحاسب عالنتايج وان الاعمال بالنيات
الواحد بيعمل كل اللى يقدر عليه
عرفتك منين ازاى يعنى؟؟؟
لينك المدونة تقصدى ؟؟؟
مش فاكر بس بيتهيالى واكيد شفت تعليق هنا او هناك ورحت رديت عندك
عادى بتحصل معايه كل دقيقة
تحياتى لتواجدك
شاب فقرى
بسم الله ماشاء الله عليك
علي فكرة انا بحب ادخل اقرا تدويناتك
بتديني أمل في بكرة ف وقت انا ببقا محتاج الأمل ده
ربنا يقويك ويوفقك
وفعلا حاجة اتعلمتها الصيف ده لما كنت بفضل 12 ساعه برة البيت ف الشركة اللي كنت بتدرب فيها
مفيش متعة تعادل متعة التعب
ربنا يكرمك ويوفقك لما يحبه ويرضاه
تحياتي
ربنا يكون بعونك دا تعب مادي ومعنوي ونفسي وجسماني
بس شي جميل انك تتعلم وتاخد شهادات وحاجات تفيدك في مستقبلك
ربنا يوفقك وتاخد الشهادة وبامتياز
دمت بحفظ الرحمن
ربنا يوفقك وبالنجاح ان شاء الله
شفقة
يوسف
نورت المدونة
وشرفنى انى بمدك بالامل
احيانا كلنا بنحتاج الامل من اى حد حوالينا بس مش بنلاقيه وخاصة انا
بمر بلحظات صعبة اوى اوى اوى اوى
بس هعمل ايه
هى دى الحياة
ان شاء الله تفوق ويبقى عندك امل على طول
والله تعليقك فرحنى :)
تحياتى لمرورك
شاب فقرى
ঔღঔ نـــوارة ঔღঔ
نورتى المدونة
واللهم امين يوفقنى واخد الشهادة وانجح كمان وكمان عشان اقدر افيد نفسى وغيرى
شكرا لتواجدك
شاب فقرى
شفقة هانم واحسان بك
شرفتونى بالزيارة
:) :) :)
تحياتى لكم
واللهم اجمعين ربنا يوفقنا
شاب فقرى
مدونه جميله
وربنا يوفقك ويوفقنا جميعا
تحياتى
شوشو
شوشو
شكرا لرأيك وتشريفك بزيارة المدونة
تحياتى
شاب فقرى
إرسال تعليق