الثلاثاء، 6 أكتوبر 2009

الغرقى


حتى هذه اللحظة مازلت فى حيرة كبيرة ماذا سيكون إسم هذا البوست
ولم أصل بعد
ولذلك سنترك هذا لمشاعرى بعد الكتابة

***
الصداقة من أسمى وأجمل العلاقات فى الحياة
التى لا نستطيع الإستغناء عنها ولو لوهلة صغيرة
بالأمس كنت أزور مجموعة من أصدقائى المقربين جدا فى محافظة قريبة نسبيا من القاهرة
( طنطا - الغربية )
أقطع تقريبا 90 كيلو مترا بالسيارة حتى أجلس معهم ساعتين وأعود مرة أخرى إلى منزلى المحبوب :( :(
لا أستطيع وصف مدى فرحتى بلقائهم جميعا وكلنا جالسين غارقين فى أحاديث تخصنا وتخص أعمالنا
وحتى تخص حياتنا الشخصية وتفاصيل لا أنوى ذكرها
ولكنها تظل دوما اجمل اللحظات التى اجد فيها نفسى وأشعر بأن روحى قد عادت إلى مرة أخرى
وإن كان السفر لذلك المكان البعيد يفتت قلبى
فكلما مررت على بلدتى القديمة (( بركة السبع )) أسعر بأننى أعشق هذا المكان
أشعر وكأننى ينبغى ان أنزل من السيارة أدفن نفسى فيها حتى لا أفارقها أبدا
وصلت بالامس فى تمام التاسعة والنصف
جلسنا نحكى فى أحاديثنا المعتاده فى المكان المخصص لنا
كافتيريا هادئة جميلة تطل على النيل
أو بصراحة أكثر تطل على (( ترعة القاصد ))
كنت دوما أقول لأصحابى ساخرا
(( بقى جايبينى من القاهرة مخصوص عشان أشوف حلاوة الترعة وجمالها ))
كل مرة كنت أتخيل أنها مجرى مائى صغير
وبالرغم من قدرتى الفائقة على الغرق فى شبر ماء إلا أننى دوما أتخيل نفسى وأنا أعوم فيها وأعبرها بسلاسة
وأنها (( صغيرة ))
إنتهت الليلة بكل جمالها ورونقها وكل ما أحببته فيها بعد جوله حتى الثانية صباحا فى شوارع طنطا الرئيسية
ميدان الساعة وحول السيد البدوى والمنطقة الرائعة تلك
وفى أثناء العودة مررنا مرة أخى على ترعة القاصد
وهنا دار الحديث التالى :
صديقى 1 : تعرف يا شاب هنا غرق اتنين من اسبوع
شاب فقرى : نعم
صديقى 2 : كانوا مين دول ؟؟؟
صديقى 1 : تعرف الواد محمود قطة
صديقى 2 : اللى كان بيركب الموتسيكل ويلف البلد ويشغل أغانى بصوت عالى دا ؟
صديقى 1 :هوا الواد الر** دا
شاب فقرى : الله يرحمه متقولش عليه كدا .. وبعدين عايز أفهم انتم بتتكلموا جد؟؟؟
صديقى 1 : آه والله كان نازل مع واحد صحبه يعوم هنا فى الترعة دى وكان معاهم عيل صغير
قعدوه فوق جمب الهدوم يحرسها ونزلوا مش طلعوا
الطفل فضل ربع ساعة واقف وبعدين خد الهدوم لاهل الطفل وقالهم ان هما نزلوا الترعة ومطلعوش
وبعدين يا فقرى قاموا جه الغواصين وطلعوا واحد من الاتنين ودفنوه والتانى طلع بعده بتلات تيام
مالك يا فقرى
انته هتعيط ولا ايه
امال لو كان صحبك بقى
شاب فقرى : لو كان صحبى انا كنت ممكن اعيط فعلا
بس مبعرفش اعيط يارجاله
هوا انتوا بتنزلوا زيه كدا يخرب بيوتكوا
صديقى 1: ننزل نعوم ايه يابنى انته شايفها حلوة اوى
انته اتجننت ؟؟؟؟
دى عالم جاهلة
وهوا ايه اللى يخليه اساسا ينزل يعوم هنا
صديقى 2 : فى ناس بتحب كدا يابنى والله دا بييجوا من البلاد اللى حوالينا يعوموا هنا
شاب فقرى : هى صحيح الترعة نصيفة وجميلة بس مش للدرجة دى يا جدعان
انتم محسسينى اننا قدام حمام سياحة الهيلتون
صديقى 3 : والله يابنى أكتر من كدا
أنا نفسى العوم دا عندى هوايه
صديقى 1: دا حمار متصدقوش دا مبيعرفش يعوم ولا عمره نزل ولا يعرف ينزل حتى
شاب فقرى : على الله الناس يبقى عندها وعى وتتعظ شوية
انتهت الليلة فى سلام
وهنا نعود إلى موضوعنا الرئيسى
شاب فى مقتبل العمر غرق فى الترعة
أقسم لكم أنه لو كان أى شخص اخر حكى لى هذه القصة
لم أكن لأصدقه حتى لو أقسم بكل شىء
ولكن إنها الحقيقة
مازال فى بلادنا أولئك الطيبين
من يعتبرون الترعة فى أى مكان شرم الشيخ
من يعشقون مياهها بقذارتها وبكل ما فيها
وربنا يهدى عباده
شاب فقرى
------
ملحوظة هامة:
ماكتب حقيقى 100 % وغير قابل للسخرية أو التهكم من أى تعليق .
من أراد واعظا ...فالموت يكفيه .
انا من سكان قاهرة المعز ومليش اى علاقة بالحاجات دى بس بحكى الموقف عشان ندعى للى توفوا
لا انا ولا صحابى لانهم ساكنين هناك بس

هناك 31 تعليقًا:

ليس فقيرا من يحب يقول...

بسم الله

شكلى كده اول تعليق

ليس فقيرا من يحب يقول...

ايون بالظبط

دا انا اول تعليق

طب الحمد لله

ليس فقيرا من يحب يقول...

طيب المفروض اقرى وبعدين ارجع باذن الله

سلام مؤقت

ليس فقيرا من يحب يقول...

طيب ربنا يرحمهم ويرحم جميع موتى المسلمين وفعلا فى ناس كتير بتعتبر الترعه
دى احسن من شرم الشيخ وانا منهم لان بيتنا كان بيطل على الترعه قبل لما يردموها وتبقى طريق وكانت هوايه عند كل العيال عندنا يجوا يستحموا فيها
طب وايه المشكله لما شاب يغرق فى الترعه
دى بتحصل كتير قوى
ربنا يرحم جميع موتى المسلمين يارب
ويرزقك طول العمر وحسن العمل
وبعدين اللى هيسخر او يتريق هيتريق على ايه مش فاهمه انا

آه وكفى يقول...

لا اله الا الله
الله يرحمهم يارب
انا مبحبش البحر ولا الترعة ولا اي حاجة بحس فيها بغدر

معلش يافقري خلي بالك على نفسك بئى واتعظ انته واصحابك

adel يقول...

ربنا يرحم الجميع

ومعتقدتش حد ممكن يتريق علي الموت

----------
بس كلامك في سرك انا شخصيا بهزر معاه كتير
ده كلام جد قوي ولا يحمل اي نوع من التهكم و انت عارفني

VÖltaa يقول...

الله يرحمهم
كتير والله بتحصل الحاجات دى

احنا عندنا مرة واحد غرق فى ترعة قدام بيته على طول !!
الله يرحمهم جميعا

الشعب لابد له من حكومه تشكمه يقول...

ربنا يرحم الجميع

طوبه فضه وطوبه دهب يقول...

ربنا يرحمهم رحمه واسعه بس لو كنت نزلت وشفت الناس اللى لسه عامله مزارع طيور فوق الاسطح وبتربى الطيور تحت السرير وبتجرى وسط ولادها ولو شفت الناس ساعه قرار اعدام الخنازير وهى بتخبى الحيوانات القزره دى فى بيوتها هتعرف اد ايه لسه فى عقول فى بلدنا محتاجه تتغير لسه فى سلوكيات محتاجه تتنسف ومحتاجه اعاده تربيه احنا قدامنا كتير اوى عشان نستغرب من صرفات الناس دى لانه مش فرد دى افراد ومش اقليه دى اغلبيه واخيرا ربنا يرحمهم ويرحم موتى المسلمين جميعا ويكتب لنا نعيش لحد ما نشوف بلدنا بصوره تانيه ومنظر مشرق مختلف تماما

محمود مخلص يقول...

ربنا يرحمهم ...زفعلا ياريت الباقي يتعظ من موضوع نزول الترعة دا

ستيتة يقول...

الله يرحمهم رحمة واسعة هم وكل اموات المسلمين

لما انت رايح طنطا مش تزمر قبلها علشان اطلب منك حلويات

ولما انت من بركة السبع اللي جنب قويسنا بلد الحبايب مش تقول علشان أوقرك يا ابني
ماهو اي منوفي لازم اقول له يا عمي
هههههههههههههههههههههههههههه

شاب فقرى يقول...

ليس فقيرا من يحب

انها اراده الله

الدوام لله

نسألك الدعاء

شاب فقرى

شاب فقرى يقول...

اه وكفى

فعلا مفيش حد بيآمن للحاجات دى

ربنا يستر

احنا ملناش دعوة بالحاجات دى احنا بنتفرج فى صمت

شاب فقرى

شاب فقرى يقول...

عادل

الله يرحم الجميع

شاب فقرى

شاب فقرى يقول...

Mo7ammed

محدش بيعرف قدره امتى ولا ساعة الموت امتى


تحياتى

شاب فقرى

شاب فقرى يقول...

الشعب لابد له من حكومه تشكمه

الدوام لوجه الله

شاب فقرى

شاب فقرى يقول...

طوبة فضة وطوبة دهب

المشكلة مشكلة ثقافة شعب بالكامل

محتاجين تغيير ووعى بس مفيش للاسف

انا بفكر ازاى دا هيقابل ربنا

ولو انا مكانه هقابل ربنا ازاى وانا كنت بعمل اللى كان بيعمله

ربنا يعفو عنه

شاب فقرى

شاب فقرى يقول...

محمود مخلص

انها اراده الله

الله يرحم الجميع

شاب فقرى

شاب فقرى يقول...

ستيته حسب الله الحمش

انتى بس تأمرى وتحت أمرك

ان شاء الله المرة الجايه

انا سكنت فى بركة السبع مدة

بس حبيتها اوى اوى اوى

وانا مش منوفى مع ان المنايفة احسن ناس من وجهة نظرى لانى عاشرتهم ومش شفت منهم حاجة وحشة

تسلمى للتوقير :)

شاب فقرى

أحمد عاطف يقول...

البقاء لله يا شاب

ثقافة الشعوب الطيبة تحعلهم يتكففون المتعة في اي شيء صغير حتى ولو كان سيودي بحياتهم

فلندعوا الله ان يغفر لهم

شاب مفقوع يقول...

صديقي شاب فقري

ربنا يصبر أهلهم

واتمنى ماشوفكش في الحالة دي تاني

Cute Kitty **sookra يقول...

شاب فقرى
البقاء لله وحده . انا لسه خارجه من حاله وفاه ربنا يرحم الجميع ويصبر اهلهم.
وهقولك دعوه بيدعوها دايما الحريم لوالده الميت فى العزاء .بيقولولها ربنا يسقينى من حوضه البارد.مش فاهمه المعنى لكن اعتقد انهم بيدعولها بالصبر.
على فكره كان فيه فكره بوستات فى بالى وعاوزه اعملها .
انا من الارياف وعاوزه اكتب شويه بوستات عن الريف وعادات اهله لكن بشكل مختلف عن اللى بنشوفه فى الافلام والحاجات دى هاكتبها من الواقع بتاعنا هنا فى الريف.
تحياتى

شاب فقرى يقول...

احمد عاطف

أهلا وسهلا بيك فى مدونتى

الدوام لوجه الله

حضرتك الوحيد اللى فهمت الهدف من نشر البوست

شكرا لردك

تحياتى
شاب فقرى

شاب فقرى يقول...

شاب مفقوع

منور المدونة

والله انا حزين جدا عالشباب دول

وحسسونى بان شبح الموت بيقرب أكتر

نلحق نتجوز بقى ولا نعمل أى حاجة فى الحياة

:)

نورت المدونة

اخوك شاب فقرى

شاب فقرى يقول...

saso

للأسف الإعلام المصرى مش بيواجه مشاكل الأرياف بشكل جدى

بس برده المشكلة دى مش فى الأرياف

دى فى مدينة طنطا

تحياتى ونورتى المدونة
شاب فقرى

мαησηα يقول...

البقاء لله

ربنا يرحمهم ويغفرلهم اللهم اميييييييييين

انا من سكان الغربية .. قاهرية واعيش ف الغربية وبيتى بردو بيطل ع ترعة جميلة ونضيفة بردو

وبردو باكد ع كلام اصحابك ان الناس بتيجى من بلاد تانية تعوم هنا وان كل يوم ف غريق او اتنين اول مرة سمعت فيها صراخ الامهات اللى ماتوا اولادهم جالى انهيار عصبى بعدها بقيت بصحى العصر ع صوت الصريخ

ومافيش حد بيتعلم

السبب ان رغم نضافة الترعة الا انها فيها ورد النيل _ وهو مايطلق عليه الجنيه او العفريتة او النداهة _ ( اهل البلد بيسموه كده لانه بيكون سبب الوفاة لكل اللى بيغرق بيشبك ف رجليهم فبالتالى بيغرقوا )

ورغم ان البلد هنا مدينة مش قرية وان فيها اساتذة جامعة وتقريبا معظم سكانها تعليم عالى الا انهم مابيتبوش يظهر ان ده مالوش علاقة بالجهل

هى طبيعة فالفلاح المصرى والله اعلم

نورت طنطا والغربية كلها يا شاب مش فقرى

شاب فقرى يقول...

๓คภ๏ภค
يارب بخيردايما

شكرا ليكى

الغربية منورة باهلا واهلى :P

فعلا الموضوع دا نكد عليه وعصبنى

بس هنعمل ايه

ثقافة شعب

تحياتى
شاب فقرى

Yusuf يقول...

لا حول ولا قوة الا بالله

ربنا يرحمه ويلهم اهله الصبر

مش عارف اقول ايه

لما بقيت اسمع حاجة من دول بقيت بفضل الصمت

تحياتي

شاب فقرى يقول...

الدوام لوجه الله يا يوسف

تحياتى

شاب فقرى

r يقول...

انا مصدقاك طبعا لانى بشوفهم بعنيا
فى القرى المحيطه ببلدتى فى الصعيد
ودا الطبيعى على فكره لكل من لم يتعلم
ولمعلومه كتير مش عارفه عارفينها ولا لأ
فى ناس كتيره شباب وبنات فى عمر المراهقه
وزهور زى الورد وللاسف مش متعلمين

الاعلانات والحمله للاسف موجهه لناس تانيه خالص

علشان تصدق لما اقولك انك مصر هى اللى ما بتحبناش
مصر وخيرها واقله التوعيه للناس الغلبانه دى لناس تانيه

طبعا المتعلمين واهل البلد فيها
المفروض ليهم دور فى كدا بس
التنشأه والتعليم بكل شئ فى الصغر شئ وفى الكبر شئ تانى خالص

دمت بخير
وما تزعلش كلنا لها وبكره افكرك

شاب فقرى يقول...

للاسف مجتمعنا بقى بينظر للتعليم على انه كمالة عدد

والناس بقى عندها احباط من ناحيته

وبقى فى نظرهم طموح زائف

يعنى كل واحد بيحلم يطلع ابنه اى حاجة الا واحد يتعلم ويقرا ويستفيد ويفيد بلده
هما شايفين الفايدة من وجهة نظر واحدة بس

انا شفت اللى بتقولى عليه لان ليه اصحابى فى بنى سويف واسيوط

تحياتى

شاب فقرى