الثلاثاء، 15 سبتمبر 2009

خرج ولم يعد ...



اللى بستغرب له هوا جملة زى دى كنا بنسمعها زمان فى التلفزيون والراديو
فلان خرج ولم يعد
ولما تيجى تركز فى الكلام اللى بيتقال وبيانات الشخص تلاقى انه لا مختل عقليا ولا فيه اى حاجة وتمام التمام
طيب ليه ؟؟

انا بقى مش بستغرب هوا خرج ولم يعد ليه
لكن بستغرب فى زمننا دا ازاى خرج واحتمل يفضل برا كل دا
يعنى انا مثلا لسه جاى من برا ومش مستحمل
الحر والميكروباصات والزحمه المفزعة اللى تحسسك انك بجد فى بيت نمل
والمعاكسات اللى بتشوفها
ودخان السجاير والشيشة اللى بتشوفه ( بيعملى صداع حتى لو مش شميته ... حالة نفسيه :$ )
والخرق الواضح للعادات والتقاليد اللى فى المجتمع وغيره

ازاى حد يحتمل يخرج وميرجعش

ونرجع ونقول ... له فى خلقه حكم وشؤون

تحياتى
شاب فقرى :(

هناك 8 تعليقات:

ميرام يقول...

كنت عملت تحقيق صحفي عن موضوع المغتربين الي مابيرجعوش
(:
وسألت ناس كتير قووي
وفعلا كان أغلب الناس لقيت راحتها برة ..
واذا مالقتهاش بره بتلاقي التعب مضاعف هنا ..
فبترجع لتعب بره

...

ربنا يصلح الحال
(:
تحيـــاتي

شاب فقرى يقول...

منورة المدونة يا ميرام

تحقيق صحفى مرة واحدة

ما شاء الله عليكى ( بجد )

انا بجد بستغرب ازاى الواحد ممكن يستمر برا البيت مدة طويلة من غير ما يرجع بيته يستريح

حتى لو كان عايش مع سفاح وقاتل دموى فى البيت

او فى تعبان كوبرا مسيطر عليه

بس برده البيت هوا البيت

وبرا بيعتبر هوا عدم الراحة

واكيد كل اللى بيخرج ومبيرجعش بيكتشف كدا من اول يوم

تحياتى ليكى وان شاء الله نشوفك تانى فى مدونتنا المتواضعة :)

شاب فقرى :)

ميرام يقول...

اعتذار مبدأي على فهمي الخاطيء
(:
أنـا فهمت في البداية ان الكلام على بره مصر
ومغتربين وكدة
طلع على جوة البيت وبرة
(:
بس بردة مش مقتنعه قوي
يااما اقتل السفاح والكوبرا دي
(:
تحيــاتي

شاب فقرى يقول...

تعرفى يا ميرام

أنا عشت فترة طويلة جدا فاكر إنى عايش مع السفاح

ولكن جالى يوم وفقت وندمت إنى مفقتش قبل اليوم دا

ولكن انا شايف ان لكل شىء فى الدنيا دى ليه طعم وسحر وإن ربنا أبدع فيه

ومستحيل طبعا أقتل الكوبرا أو السفاح لان البيت من غيرهم مش هيبقى بيت :(

صراحة أنا لما بخرج من البيت بييجى لى كمية صداع رهيبة جدا

يمكن لان شغلى كله عالنت واكتر الوقت فى اليوم عالنت
( هرد على تعليقاتك وبوستاتك لحظة بلحظة :p )

بس مش برتاح لما بخرج
بحس بتعب ومش بلاقى له حل غير انى ارتاح شوية أو أنى أنجح فى السبب اللى خرجنى من البيت

ومتنسيش أنا مصرى وأبويا مصرى وفى مكان فى قلب قلب قلب مصر
مع الإعتذار لنانسى عجرم ( لأن صوتى وحش أوى :$ )

تحياتى
نورتى المدونة
وخلينا نشوفك ونشوف إبداعاتك

شاب فقرى :)

شاب فقرى يقول...

صحيح بلاش أعذار لأنى مش بحبها :$

ولا بحب الناس تعتذر

ومحصلش حاجة عشان تعتذرى :)

وأنا عن نفسى نادر إنى أعتذر

وجهة نظرى فى ذلك : (( إن الإعتذار اللى بجد إن الواحد ميكررش فعلته ))

بيطرية ومش بايدى يقول...

اولا وبرده قبل اى حاجة انا هاعلق اه بس مش على الموضوع
انا هاعلق ع الصورة بتاعتك ليه حرام عليك شكلك مثقف وجامد ماشاء الله عليك ربنا يحفظك ليه بقى يا افندينا كاتب انا فاشل
اقولك نصيحة ماما قالتهالى اوعى تقلى من قيمة نفسك
وفرقى كويس اوى مابين التواضع وما بين تقليل قيمة نفسك
وتذكر ان لم تصنع لنفسك قيمة فانه لن يصنعها لك احد
هتستغرب من كلامى وان انا داخلة حامية عليك بس انا خايفة عليك
اصل كنت بعمل زيك زمان وفكراه تواضع لحد ماصدقته
وبقيت مقتنعة تماما ان انا كده لازم عشان خاطرى تغير الصورة وتكتب انا بروف فى كليتى بروف فى دينى
بس بلاش فا.... عشان خاطرى

شاب فقرى يقول...

اهلا وسهلا دكتور

صباح الخير ورمضان كريم

بالنسبة للتعليق عالصورة

أنا حاططها للكوميديا مش أكتر ولأنها أقرب صورة لكلمة ( شاب فقرى ) وعلى فكرة مش شرط الفاشل يكون فاشل بسبب شخصيته ممكن يكون فاشل بسبب ظروفه اللى بتحبطه وأبسط مثال اللى هحكيه فى بوست لوحده إن شاء الله قريب أوى وهيكون بكره أو بعده وهوا انى قبل كدا فكرت أغير مسار دراستى وروحت المدرسة الثانوى وقلت لهم عايز أعيد ثانوية عامة
الكل اتغرب لانى كنت متفوق جدا وناجح ولكن مش لاقى نفسى فى المجال اللى بدرسه
فساعتها القوانين وقفت ضدى ومن وجهة نظرى انا خلتنى فاشل

المشكلة يا دكتور انى عندى ثقة رهيبة فى نفسى لدرجة انا بحس احيانا انى مغرور وبحس من نظرات الناس ليه برده إنى مغرور لكن والله مش غرور هوا ثقة فى شخصية الواحد

انا بس كاتب شاب فقرى لانى بشوف الواقع وبحكيه لكن انا مفيش جوايا حاجة تخلينى فقرى ولا ناقصنى حاجة والحمد لله

انا متعلم وبدرس فى اكتر من مجال فى نفس الوقت ووبشتغل وبكسب وبصرف على نفسى من زمان أوى فى حين ان معظم اللى فى سنى مبيعملش كدا

أنا برده كنت بقول لنفسى نفس الجملة اللى والدتك بتقولها لك ان لو معملتش قيمة لنفسى واديت لنفسها قدرها وبالبلدى ( قدرتها ) عمر ما حد هيدينى قدرى او يقدرنى او يثق فيه لانى ببساطة هكون مش واثق فى نفسى

انا مش مستغرب من كلامك ولا حاجة وبجد نورتى المدونة وأتمنى أشوفك تانى فى المدونة

ووفقك الله لما يحبه ويرضاه

شاب فقرى :$

بيطرية ومش بايدى يقول...

طب الحمد لله كل كلامى طلع غلط احمدك يااااااااارب
يارب يوفقك وتكون شاب تفتخر به مصر والامة الاسلامية كلها
وعلى فكرة حكاية ان الناس تشوف انك مغرور ده كلام فاضى رضا الناس غاية لا تدرك سيبك منهم ومادام انت واثق من نفسك ولا يهمك
فى حفظ الله