الأربعاء، 30 سبتمبر 2009

الرضا والسعادة والقبول بالواقع




بسم الله الرحمن الرحيم
اليوم فكرت فى معنى كبير فى ناس كتير بتقوله ومش فاهماه
زى الرضا مثلا
فمن وجهة نظرى ان الرضا دا درجة من الاحساس غير ثابته
يعنى مثلا ممكن أسال حبيبتى : مبسوطة معايه
هتبص بخنقة وتقول راضية
هنا معنى الرضا بالنسبة لها هوا انها مش سعيدة
يعنى الرضا بالنسبة لها اقل من السعادة
وممكن فى نفس الوقت أسألها : مبسوطة معايه ؟؟
ترد بسعادة غامرة وتقولى : ياااااااااه راضية ومبسوطة وكل حاجة
هنا الرضا بيكون 900 % يعنى قد السعادة 900 مرة
طيب ياترى الرضا والقناعة بمعنى أصح بييجى منين ؟
انا هقول وهتكلم وهقول مشكلتى إيه فى الآخر
الرضا والقناعة بتيجى من قبول الواقع
يعنى إيه ؟؟؟
يعنى بمعنى أصح هوا الواحد يشوف الواقع اللى هوا فيه مهما كان ويتقبله
يعنى مثلا لو انا بنام على كنبة خشب أبنوسى وتكسر الجته
انا ممكن اشوفها انها متعبة ومرهقة ومش مريحة ؟؟
ليه ؟
لأنى ببساطة نظرت لعيوبها بس
مفكرتش لحظة فى جمالها ولا فى إن الكنبة التعبانة دى هى بيتى الصغير اللى برتاح عليه
يعنى قبول الواقع هنا بييجى من حبك للواقع
يعنى حبك للحقيقة
بس الحقيقة مرة ومش مقبولة للجميع ...:(
يبقى المفروض الواحد يفكر فى الواقع اللى هوا عايشه ويتقبله كما هوا ويرضى بيه ومن هنا يعيش سعيد ويحس بالقناعة

أما بالنسبة بقى لشاب فقرى
فالحمد لله أنا عمرى ما نظرت لحاجة إلا وشفتها بشكل 99 % كامل
يعنى شوفتها كلها بعيوبها بمساوئها وبجمالها وبكل حاجة فيها
ممكن عيوبها يكون فيه عيب عاملى عقدة نفسية من قبل كدا
يعنى حاجة انا متعقد منها
بس نرجع ونقول
إن لو فى حالة أنا نفسى فى الواقع دا
يعنى مثلا نفسى فى الحب
فأنا هرضى بالواقع مهما كان أشكاله وصفاته وكل شىء فيه

وإلى هنا ينتهى الكلام

شاب فقرى .....سفير الواقع

هناك 36 تعليقًا:

شاب فقرى يقول...

اول تعليق محجوز للبنت اللى عمرها ما هتعرف انا مين
ولا عمرها علقت لى
واللى انا مستنى اشوفها واحس معاها بالرضا والسعادة

بالانتظار

شاب فقرى

بيطرية ومش بايدى يقول...

لالالالالالالالالالالالا
لن اقبل بهذا ابدا

بيطرية ومش بايدى يقول...

ناااااااااااشى ياعم الامور

انا هتنازل بس
عشان اما تيجى تحس بالرضا والسعادة معاها

بيطرية ومش بايدى يقول...

ما انا برده مابحبش ابص ف لقمة حد غيرى
انا ببحلق بس
ههههههههههههههه

ربنا يبعتها ليك بسرعة يااااارب
بس اوعى ماتعزمنيش
ماشى
اما نشوف يا شاب

بيطرية ومش بايدى يقول...

امممممم يعنى انا على كده تانى تعليق
اهئ اهئ ماشى
يامرات الشاب مستقبلا
كله يهون عشان الشاب
اروح اقرا وارجع تانى

مش بحب ابقى عزوووول
ههههههه

heba يقول...

انا بقى تانى تعليق وراكى وانا اول زيارة ليا عندك وان شاء الله مش الاخيرة
موضوعك جميل بجد ولازم كلنا نرضى بالواقع لانة مكتوب وماحدش بيهرب لامن الواقع والا المكتوب ابداااااااا

تقبل مرورى

heba

شاب فقرى يقول...

اهلا يا هبه

نورتى المدونة

ما هوا المصيبة فى كيفية قبول الواقع بعيوبه عشان يبقى فى رضا

تحياتى
وان شاء الله نشوفك هنا كتير

شاب فقرى يقول...

والله يا بيطرية منورة المدونة

شاب فقرى يقول...

وشكرا عالدعاية المجانية يا بيطرية

وبالنسبة للتعليق الاول

فانا حجزته وانا لسه معرفهاش ولا هى تعرفنى

بس خلاص اخدت خطوة

وربنا يسهل ويقرب البعيد


بانتظار تعليقك واعتبرى نفسك برده اول تعليق

شاب فقرى

بيطرية ومش بايدى يقول...

بجد من كل قلبى بقولك ربنا ينولك اللى نفسك فيه
وتلاقيه بسرعة اوى
وبعد شوية صغنتتين نلاقى ولادك اللى مش فقرين هما اللى بيكتوا البوستات عشان بابا مش ملاحق ع الشغل
ان شاء الله الايام اللى جاية احلى بكتيير
يارب يجعل ايامك كلها افراح وحاجات حلوة
اللهم آآآآآآآآمين
لالالا ياعم انا مش هاعتبر نفسى الاول و حاجة
هو انا اقدر
لالا الكبير كبير خليها الاول عشان هى ان شاء الله هتيجى وتكتب فيه احلى كلام

شاب فقرى يقول...

لما ابقى اعرفها وتعرفنى

ليه اسبق الاحداث

مازالت حالة الوحدة مسيطرة عليه

والبوست دا اكبر دليل

ربنا يصبرنى يا بيطرية

شاب فقرى

*البت المشمشية *حلوة بس شقية * يقول...

انتا هنا

شاب فقرى يقول...

اكييييييييييييييد

شاب فقرى

شاب فقرى يقول...

مشمشية

دعى القافلة تسير

والكلاب تعوى

انا زمان اتقال عليه رخم وغلس وسخيف ومعقد

ودلوقتى شايف نفسى فيلسوف

والناس شايفانى حاجة تانية

سيبك من الناس

لان فى منهم شريحة زبالة

مش تستاهل الواحد يشوفها اساسا ولا يتعامل معاها

انا عالفيس بوك برده

*البت المشمشية *حلوة بس شقية * يقول...

انا كنت بحكيلك بس

بيطرية ومش بايدى يقول...

ممكن اتدخل ف الموضوع يا مشمشية وياشاب واقول رايى اذا سمحتم انا اسفة اذا كنت دخلت بدون ما اخبط بس انا باخد الاذن لو مش موافقين مش موشكل خااالص
اقول ولا ايه؟؟؟؟؟

شاب فقرى يقول...

وانا اساسا معرفوش ومش ناوى اعرف اى حد يغلط فى راى حد

ولو حصلت انا اساسا امبارح كنت بفكر اقفل التعليقات بشكل نهائى

بس راجعت نفسى وقلت اعملها تنقية وامسح

وزى ما الناس بتتعامل بقلة ذوق وبتغلط
من حقى انى اكون سخيف وامسح تعليقاتهم بمزاجى

شاب فقرى

شاب فقرى يقول...

والله يا بيطرية الموضوع ميخصتيش

عشان كدا مليش علاقة او مقدرش اقول حاجة غير اللى قلته

تحياتى

*البت المشمشية *حلوة بس شقية * يقول...

بيطرية ومش بأيدى
حبيبتى
الموضوع اتفه مما تتخيلى
واحنا اكبر بكتيـــــــــــــــــــــــــــــــــــــــــــــــــــــــــــــــــــــــــــــــــــــــــر
من اى حاجة تتخيلها ولله الحمد يعنى

well يقول...

التعليق رقم 20 امممممم هحاول اتقبل الواقع ...
كنت مستنى منك تسأل وتقول يا ترى انت مبسوط وانت عايش فى مصر
مش معنى الرضا ان انا اكون راضى فى كل الحالات يعنى مثلا ماينفعش اكون راضى على اللى بيحصل فى فلسطين ومينفعش اكون ارضى على كلام كل مدون لان اكيد هنختلف فى شئ ومينفعش اكون راضى على حبيبتى وهى مجنونة او بتاعت مشاكل
لكن لازم نفهم الواقع ..الحقيقة
وانا فهمت من كلامك ان انت عاوزنا ننظر الى الجانب المشرق ننظر الى نص الكباية المليان
بس على فكرة لو اتقبلت الواقع كما هو مش هتقدر تغير الواقع للاحسن
تحياتى

Yusuf يقول...

مساء الجمال

انا ليا وجهة نظر ف موضوع الرضا ده

الرضا اكيد مرتبط بالسعاده

يعني مينفعش ابقا راضي ومش مبسوط

والرضا جوهر الحياة

بس علي فكرة

رضا لو عرف انك بتتكلم عليه وهو مش موجود هيزعل منك اوي

والسلام ختام

شاب فقرى يقول...

عزيزى ويل

انا مبسوط فى مصر لانى مصرى وعايش فيها
حتى لو عايش فى بلاعة

فهى بلدى وهفلض مبسوط فيها
عشان كدا مسالتش مبسوط فى مصر
وبالنسبة لحبيبتى هفضل مبسوط بيها حتى لو مجنونة وبتعمل مشاكل وبلاوى
لانها ببساطة حبيبتى وتستاهل انى اشوف عشان خاطرها المرار كله

وبالنسبة لفلسطين زعلان بس عارف انى ناوى اغير الحال

بالنسبة لتقبل الواقع هيخليك فى يوم تعتز بماضيك حتى لو كان وحش
وكمان هتحاول تغير بكره للاحسن

لان انته مش عايش غير عشان اعمار الارض وعبادة ربنا

تحياتى
شاب فقرى :)

بيطرية ومش بايدى يقول...

خلاص مش مهم
اوكيشن
انا ماكنتش هازود عن اللى انتم قولتوه

الموضوع خلص
ربنا مايحرمنا منك يا مشمشية
ولا منك ياشاب

ياااارب يديم بينا المعروف
ولا يدخل بينا هادم اللذات ولا مفرق الجماعات
قولوا انتم الاتنين ف نفس واحد
آآآآآآآآآآآآآآمين

*البت المشمشية *حلوة بس شقية * يقول...

امــــــــــين

شاب فقرى يقول...

عزيزى يوسف

نورت المدونة

الرضا حالة نفسية نسبية من وجهة نظرى

ووجهة نظرك تحترم ونورت المدونة

عشان خاطرى محدش يقول لرضا :((

لاحسن دا عصبى ونظره ضعيف وبيضرب بايده الشمال :((

تحياتى

شاب فقرى

شاب فقرى يقول...

آآآآآآآآآآمين

شاب فقرى يقول...

جميل الصمت دا
بيحرقنى

واحس بفرحة منه

آه وكفى يقول...

اللهم لا اعتراض هنقول ايه
هو اه الواحد قرفان من العيشة واللي عايشنها بس عارف جرب كده تعيش في اي بلد تاني هيجيلك ملل ممن كتر الراحة لدرجة انك ممكن تجنن .. جنس نمرود المصريين دوول
واكبر دليل على رضاك انك عارف انك فقري ومبسوط اهو و ساكت لأ وبتعترف احييك على شجاعتك


تحياتي

------ يقول...

ايييييييه الجمال دا كله

الاول صباح الخير

البت دموع القردة رجعت تااانى :) :)

البوست جميل جدا

فعلا الرضا اهم حاجة
كانت امى تقولى وانا صغيرة اللى يرضى ربنا يراضيه

وطبعا لما كبرت وفهمت لقيت الموضوع اوسع من كدا بكتير

ولما تسمع شريط عمر خالد بتاع الرضا جمييل جدا

تحياتى لك

يااعظم شاب نااجح
ياابنى كلمة شاب فقرى دى تخليك فقرى بجد ومنحوس هههههههه
وانت عارف المنحوس منحوس ولو علقوا على راسوا فانوس شيلها شيلها وخليها

يوميات شااااب ناااجح

شاب فقرى يقول...

اه وكفى

زى ما قلت فى اول التعليقات

هفضل احب بلدى حتى لو كنت عايش فيها فى بلاعة

لانى ياما اخدت منها ومش هرفض يوم انى ادى لها

وهى فعلا مصر فيها حاجات كتير تتعب

بس جميلة ومتقدرش تستغنى عنها

وانا معترف انى شاب فقرى مصرى من اللى شفته واللى بشوفه

بس مازلت شاب مصرى خد بالك من دا كويس
يعنى قوى مؤمن عندى اللى يقوينى ويصبرنى ويوصلنى لبكره

لانى ببساطة مصرى

تحياتى
شاب فقرى

شاب فقرى يقول...

دموع القمر

الف حمدا لله عالسلامة

بجد فرحنى رجوعك

يارب دايما بخير وبصحة جيدة

هقولك انى شاب مصرى فقرى

مصريتى هى اللى تقدر تمحى اى حاجة

تقدر تقوينى اعمل اى حاجة

تقدر تخلينى اعمل المستحيل

وهعمله

وبكره يتنشر فى كل المدونات
باسم
السيرة الفقرية لشاب فقرى

والا هتقدموا التعازى هنا فى المدونة وانا بحاول لسه

بجد نورتى المدونة والف حجمدا لله عالسلامة
شاب فقرى

غروب يقول...

بصراحه الموضوع حلو اوى وتصورك ليه جميل ومقنع

حتى تمثيلك لموضوع الكنبه ده عجبنى

ربنا يرضيك

شاب فقرى يقول...

غروب

شكرا لردك

نورتى المدونة :)

انا كنت بفكر بهدوء

امبارح ودار فى ذهنى كل دا

بس مقدرتش احس بالرضا

زى ما انا شايفه

تحياتى

شاب فقرى

أبو العريف يقول...

المرادي يا باشا انتت مش فقري ولا حاجه

انما انت حكيم

و افرض مثلا مثلا يعني

كلام جميل كلام معقول

مقدرش اقول حاجه عنه

شاب فقرى يقول...

أبو العريف
نورت المدونة
والفلسفة جزء من الحياة
وان شاء الله خير
تشرفن زيارتك وردك
شاب فقرى

r يقول...

حلوه حكايه صابر وراضى دى

ممكن تقول مستحمل
عاصر على نفسك لمونه
بس راضى دى كلمه كبيره اوى على فكره
عارف ليه؟
لانها معناها انك وصلت لهدف جميل فى حياتك وهو ايمانك نفسه

انا استمتعت والله وانا براجع كل البوستات اللى فايتانى دى

دمت بخير