الثلاثاء، 29 سبتمبر 2009

كل لحظة فى حياتى


إفتكرت جملة قالها عمر الشريف وهوا بعد العمر الطويل دا كله قال (( أنا بعيش اللحظة وبعيش عمرى كله مش بضيع ثانية لان اللحظة اللى هتعدى مش هترجع تانى يبقى ليه ازعل او اتعب نفسى ؟))
وطبعا انا ماشى بالمنطق دا لانى عايز اعيش كتير لحد مثلا ما ابقى 40 سنة :$
دى كانت امنيتى من كام سنة فعلا
ومازالت ..... نرجع لمرجوعنا :$
فكرت فى كلام عمر الشريف ولاحظت اهم الحاجات اللى بتطلع عين البنى ادمين
الشغل
ووجدت فى مصر تلات انواع من الشغل ...

القطاع العام والقطاع الخاص والصياعة

بسبب أخويا وبسبب مجال عملى انا هكتب وهتكلم فى الموضوع دا كمان مش بسبب عمر الشريف بس

لما تلاقى شخص مضطر يصحى كل يوم عشان يروح الشغل
يصحى فى نفس الميعاد
يروح الشغل ويقعد هناك مهما تكلف ولزم الأمر
ولو أتأخر نو بروبلم
كل دى حاجات بتأثر فى عمر البنى ادم وبتأثر فيه

نبتدى نقارن بهدوء بين التلاتة
العمل الحكومى
يعنى مثلا العمل الحكومى فى مصر كل مسؤل بحس إنه عايز يهين اللى تحت منه
هوا الموضوع دا ممتع يعنى بالنسبة له
لاحظت الموضوع دا كتير
وهل دى فعلا القيادة الناجحة ؟
يعنى لما تهزق الموظفين وتجرح مشاعرهم وتكرههم فى الشغل تبقى مبسوط وحاسس انك قائد همام
أفكار غبية جدا فى الإدارة والقيادة هنا فى المؤسسات والقطاعات العاملة فى مصر
الناس مش قادرة تفهم إن الموظف لو صحى بدرى ساعة بتبقى مرهقة عليه قد ايه
ومتعبة ازاى
حتى لو كان ظابط مش عسكرى
حتى لو كان غفير او طبيب او مهندس
هنا لا نستثنى أحد
لو راح بدرى وقابل اى مشكلة فى الطريق بيبقى عامل ازاى فى الشغل
انا قابلت موظفين كتير اوى لما كنت بقضى اى مصلحة سواء فى النقابات او التأمين أو الضرائب او الوحدات المحلية
بجد كان كل مرة بيطلع عينى
بس كنت بعامل الموظف بشكل يخليه يحترمنى ويكون كويس معايه حتى لو بيهزق بقيت الطابور
ودا اللى خلانى احب المصالح الحكومية
لكن مبحبش الشغل فيها وعشان كدا عمرى ما هشتغل فى اى عمل حكومى

العمل الخاص فى مصر
هنا بقى الطامة الكبرى والأكبر
هوا العمل الخاص
بيبقى صاحب المؤسسة بيفكر فى كل قرش بيدفعهولك (( طبعا مش كلهم ))
بيبقى عامل زى اللى عايز يمص دمك عشان ياخد حقه بالكامل
ودا انا جربته وبجد برده مش مجال مناسب للعمل من وجهة نظرى
وهنا بقى بيطلبوا كمية شهادات وخبرات ولو حتى هتشتغل فى محل كشرى صاحب المحل يبقى مبسوط انك شهادة عالية
يعنى فى مرة من المرات عقلى قالى لازم تنزل تشتغل
نزلت إشتغلت مع واحد نقاش هوا صديق ومعرفه ويبقى والد واحد صحبى
ولكن قررت انزل الشغل معاه
مش مهم التعب ولا الفلوس ولا المهم ان شغلى بيطلع لى قد كدا 300 مرة ولكن نزلت :D
لقيته بيتباهى بانى الصبى بتاعه شاب جامعى ومتعلم
والله بيتهيالى صاحب الشقة (( المليونير)) مكانش معاه علم ولا فكر قدى بس هى ارزاق

العمل الحر أو كما يطلق عليه أقربائى (( الصياعة )) إلى فترة قريبة طبعا
هنا بقى بيظهر العمل الحر والمشروعات الحرة
يعنى الواحد يعمل مشروع حر خاص بيه
مش مهم انته كام سنة
ولا المهم شهاداتك
المهم خبرتك وتقدر تعمل إيه تفيد بيه نفسك وتفيد بيه الغير
والحمد لله انا ماشى فى الطريق دا
شغال عالنت فاتح شركة خاصة بيه
انا المدير
والموظفين
والمبيعات
والدعم الفنى
والفراش
يعنى ببساطة أنا الكل فى الكل :)

سلطان زمانى

على راى فؤاد المهندس فى الفيلم بتاع عروسة من باريس
لما بتساله بتقوله المدرسة دى فيها كام مدرس
قالها انا فقط
وفيها كام عامل
انا فقط
وفيها كام طالب
:D
لحد هنا وكفاية اوى

عشان كدا ان شاء الله عن قريب فى خلال ست شهور بالكتير
هيكون ظهر للنور اول مقر للشركة المحترمة بتاعتى
واخدت اول شهادة من بين كل اللى شغالين فى مجال السيرفرات هكون اول واحد ياخدها
لانى مشفتش حد قبل كدا اخدها اساسا :$
غير طبعا حبايبى مهندسين TeData وهوا واحد بس
وبرده مجال عملى النت
يعنى لا هفتح كشك ولا هقف فى محل ولا هعمل شركة واقعد ابص فى ورق
هوا حتة لاب توب و usb modem
واشطة اوى
طبعا انا مسمى الموضوع دا صياعة ليه
مش انا اللى مسميه الصراحة
دا العائلة وبعض قرايبى
لانهم شايفينى شغال عالكمبيوتر والنت
وكل اللى يفهموه ان النت دا بتاع (( استغفر الله العظيم بس ))
ازاى بقى ابنهم يشتغل فى حاجة زى دى
محدش سكت ولا اقتنع غير لما لاقونى منتظم فى مواعيدى وفهمتهم انا بعمل ايه بالظبط
والحمد لله
مبقتش اسمها صياعة
اندرجت تحت (( العمل الحر ))


نكمل البوست بقى

هنا بقى هتكلم عن أكبر صدمة واجهتها من يوم ما دخلت نت
إمبارح يا جماعة خسرت صحبى
أعز صحابى
لانى اساسا مليش صحاب
فيعتبر صديقى الوحيد
خسرته لانه مش يستاهلنى
لان بعد سنتين من الشغل مع بعض ومن التعب ومن القرف اللى شفناه سوا فى البدايه
وبعد سنتين من وقوفى جمبه كل يوم فى السنتين دول
وتضحيتى لاى حاجة عشان خاطره
سواء بعلاقات مع ناس أو شغل أو فلوس أو سهر أو تعب او أى حاجة
باعنى بسهولة
بكل سهولة
لدرجة انى حسبت انه شخص تانى
وفجاة ظهر مبدأ
المصلحة فوق الذات
فجاة اكتشفت انه على مدار السنتين دول وقف جمبى لانه مصلحته معايه
وقف جمبى لانه ببساطة ان مكانش بيكسب فهوا مش بيخسر
بس لما مديره او صديق تانى قاله شاب فقرى دا وحش مش تعرفه تانى
فخلاص
شاب فقرى اصبح انسان وحش جدا
خلاص
معنديش كل أقوله
لكن لو من هنا هبعتله رساله

هقوله ((خلاص يا صاحبى متلزمنيش ))
وأرفع كمان شعار (( اللى ميقدرنيش ... ميلزمنيش ))ونقدر نسميها فلسفة البيع
بالرغم من انه كان الاستثناء الوحيد للموضوع دا
لانه ياما عمل زمان وانا تغاضيت عن اللى عمله بس خلاص دلوقتى

انتهى الكلام

شاب فقرى

هناك 99 تعليقًا:

بيطرية ومش بايدى يقول...

اووووووووووووووووول تحليق

فووووو
تك تك تش تش طاااااااااااخ
اى اى معلش يا جماعة
الطايرة وقعت عملت كراش جامد

بيطرية ومش بايدى يقول...

الاول والتانى
بس بقولك ايه
انا ناويها من الاول كده
عايزة شاى مظبوووووط
ماشى اما نشوف عمايل ايديك

شاب فقرى يقول...

هههههههههههههههه
منورة يا دكتورة


اول تعليق على مدار تلات بوستات

بجد حاجة جامدة اخر حاجة :$


كل سنة وانتى طيبة

ومنورة

ومستنييين بقيت ال ستين تعليق اللى اتفقنا عليهم :D

شاب مش فقرى حاليا

بيطرية ومش بايدى يقول...

انا هاروح اقرا
وارجع تاااااااااانى
اوكى
يا فقرى اشوفك
بعد الفااااااااااصل

شاب فقرى يقول...

ياااااااااااااه


شاى وبس


انتى تأمرى :)

هات يابنى كوبايه شاى حجم عائلى وكتر السكر والكحك والبسكوت ويارب متكونيش عاملة رجيم

عشان تدوقى عمايل ايديه

شاب مش فقرى حاليا

المدونة منورة كدا ليه يا ولاد :D

تحياتى

شاب فقرى يقول...

تروحى تقرى وتيجى بالف سلامة

بسرعة انا مستنى بقى

الله

مبحبش استنى اى حد اى وقت

بس هستنى وماله

فى الانتظار

والتعليقات الكتير دى هتدفعنى ضرايب كتير

VÖltaa يقول...

بص ياكبير
انت بتفكرنى بكلامى مع الناس
يعنى لسة فى اولى جامعة ونزلت اشتغلت فى بلد تانية مندوب مبيعات طبعا قطاع خاص
فى حين ان اصحابى كلهم كانو بيأنتخو فى بيوتهم

انا نفسى موووت اشتغل عالنت
بس مش لاقى حد ياخد بإيدى
انا اصلا مصمم جرافيك وليا شوية فى البرمجة
وكان قدامى اكتر من مرة اعمل تصميمات لشركات وبفلوس
بس مكنش معايا فيزا
وبصراحة خفت يتنصب عليا لأنى مش لاقى حد حواليا ياخد برجلى
ايه رأيك ياكبير
تكون انت مرشدى ومعلمى ومنقذى ؟ ^_^
فكر وانا معاااك

وبالنسبة لصاحبك
انت قلتها
ميلزمنيش
متحطش فى دماغك كتير

على فكرة عندى بوست هيعجبكك
ابقى ادخل شوفه


سلامى ليك ياصحبى

شاب فقرى يقول...

محمد

نورت المدونة

وانا تحت امرك :)

اسال وانا تحت امرك يا جميل

نورت المدونة

وهزورك

بس والله غايب غصب عنى بسبب ظروف الشغل :(

ونصيحتى انزل اشتغل واتعب وماله مش مهم
مش مهم الفلوس
المهم تشتغل وتشغل نفسك وتبقى حد انته نفسك تكونه
تبقى نفسك
تبقى راضى عن نفسك كل يوم قبل ما تنام :)

تحياتى يا جميل

بيطرية ومش بايدى يقول...

انتهى الكلام
صح والله يابنى والله كل واحد دلوقتى ماشى بمبدأ الضرايب
مصلحتك اولا
يعنى نفسى نفسى
وطظ ف الباقى يولعوا
انا بقى خسرت صاحبتى بس مؤقتا يعنى بعد موضوع كدع قعدنا 6 ايام مانكلمش بعض رجعنا تانى بس حسيت ان مكانها ف قلبى مش زى الاول خالص
حاسة انى مابفرحش اما اتكلم عنها
كنت زمااااااااان بتتباهى ان هى صاحبتى
بس دلوقتى فنيتو خلاص بح

بيطرية ومش بايدى يقول...

ايه ده لا لن اقبل بهذا
انا لسه ماخلصتش الاحتلال بتاعى

ايه ده فى مستعمر جديد
دخل

جهزوا العدة يا ردالة

بيطرية ومش بايدى يقول...

اطمن يا سيدى انا لا عاملة رجيم ولا غيره
يعنى هاكل هاكل
هات انت بس وشوف الماكنسة اللى هتشتغل

بيطرية ومش بايدى يقول...

المدونة
منووووووووووووورة بيكى ياقمر
والله العظيم سكر
ياخراشى ايه العثل ده يا ولاد

شاب فقرى يقول...

والله انا زعلان

وياما استحملت

لدرجة ان اخر مرة قال كلام

يخلينى انسى حتى العيش والملح اللى كان بينا واى حاجة كانت تربطنا

منورة

كملى الستين تعليق بقى

ايه رايك فى الشاى والكحك :$

بيطرية ومش بايدى يقول...

اما بقى بخصوص الشغل
فانا لسه مجربتش الشحططة ولا اخدت خبرة
بس من اللى انا بسمعه عن الشغل الحكومى كان زبالة وكنت فاكرة ان الخاص افضل راحة وفلوس جامدة واخر تمام
اما حد من قرايبى اشتغل ف الخاص شاف الذل بعينه والله يابنى
عارف الذل والشغل ماكنش له مواعيد ولا بريك ف النص
يعنى متواصل وهو يا عينى عليه يهرى نفسه ف الشغل وهو ماشاء الله عليه
ممتاز فيه وبرده مش عاجب
عارف انت النوعية دى
نوعية استغفر الله العظيم
بس احسن حاجة تبقى رئيس جمهورية نفسك
محدش يدخل يحتل بلدك
بس مدونتك انا اللى مسموح لى احتلها وبس
اتفقنا

بيطرية ومش بايدى يقول...

لا الشاى مظبوط تقيل تمام
ظبط الطاسة
بس الكحك بقى سكر البودرة اللى عليه ناقص شوية انتى بخيل ولا ايه ياشاب
طب اديله من السكر اللى انت فيه

ولا رش عليه شوية عسل

بيطرية ومش بايدى يقول...

ايه ياعم انت نمت ولا ايه
ولا انت شكلك روحت تجيب كحك غير القديم لقيت المحل قافل

شاب فقرى يقول...

احتلى وماله

احتلى اى حاجة تعجبك :)


بالنسبة للشغل فهوا منيل بنيلة

وعشان كدا هفتتح المقر لشركتى قريب اوى كمان ست شهور كأقصى تقدير

والله طالع عينى
ومشاكل وقرف

بس ممكن اعمل اللى انا عايزه لانها شركتى وبمزاجى :$

بالنسبة للقطاع الخاص فهوا احقر من كدا بكتير

على راى خالد ابو النجا اللى بكرهه فى فيلم عجميستا: كل صاحب شغل بيبقى عايز يمص دمى لاخر نقطة ولو طال ياخدها كمان هياخدها

وبالنسبة للشاى معلش

اصل مفيش شاى

فحطيت زيت خروع :D

بالنسبة للكحك انا مش هحط عليه سكر

انا همشى عليه ايدى بس كدا كفاية اوى وهيبقى زى العسل :)

ابو على يقول...

ههههههه
حد عايز عسل

اى حاجه بربع جنيه
هههههه

شاب فقرى يقول...

معلش سيبيه يحط تعليق

الراجل برده ياخد نصيبة

ههههههههههههههههههههههههههههههههههههههه


انتى المستعمرة الوحيدة حاليا

يلا نكمل استعمار

صحيح ليه مش نشرتى بوست الشخصيات اللى أثرت فى حياتك ؟؟؟

وعلى فكرة















احسن من على سهوة :D

الفاير فوكس كان بيهزر ومكنتش عارف ارد

:)

VÖltaa يقول...

بقولك ايه لو عايز عامل فى الشركة بتاعتك انا موجود
يعنى قهوجى ولا سفرجى

اى حاجة ها ؟

اصلى صراحة بكون نفسى علشان احقق حلمى

ترزى حريمى ^_^

شاب فقرى يقول...

ابو على اهلا وسهلا

ولكم بيك والنور ما شاء الله مظبط المدونة

هات لنا عسل معاك بقى :$


شاب فقرى

بيطرية ومش بايدى يقول...

على فكرة احسن من على سهوة
لا حلوة دى
ماشى ياعم النهاردة بالليل هانشرها
ويارب ما يتزهقش من رغى

شاب فقرى يقول...

متقلقش يا محمد

هنتكلم كتير واى حاجة اقدر اقدمها لك هقدمها لك

ان شاء الله حتى ابره وفتله


:P

تحياتى يا جميل

بيطرية ومش بايدى يقول...

وهاسيب ابو على بس عشان خاطرك انت وبس

واى حد تانى برده عشان عاملة خاطر لاحلى شاب مش فقرى خااااااالص

شاب فقرى يقول...

الدكتورة البيطرية

بجد مش هزهق

وهروح اقعدلك فى المدونة ولازم اخد اول تعليق

اهوه

انا قلت لك

اتصرفى بقى

بس انا اول تعليق :$

بيطرية ومش بايدى يقول...

ومين عمو الفاير فوكس
ده وكان بيقول ايه
وانت مش عارف ترد قولى قولى وشوف انا هاعمل فيه ايه

شاب فقرى يقول...

عادى مش مشكلة
يا بيطرية
اول زيارة لابو على ومنور المدونة :)

وان شاء الله تعجبك وتبقى زائر دائم فى الجمهورية الفقرية :$
وفعلا حاليا مش فقرى

بوجودك طبعا :D

تحياتى

ابو على يقول...

ههههه

انتو هاتتخانقو على التعليقات كمان

وبعدين فين الواجب بتاعى يا شاب
هههههههه

مش تعمل شاى ولا سحلب

اخص عليك

شاب فقرى يقول...

ابو على منور

والمشاريب هنا بالتعليقات

رد عالبوست ونجيبلك احلى كوباية شاى

والحمد لله الفاير فوكس ظبط

نكمل تعليقاتنا فى هدوء :$

ابو على يقول...

لا يا عم الحج مش عاعرف اقرى انا عنيا بتوجعنى
ههههههه

اقراه وقت تانى شكله موضوع طويل


ارجو انى مكنتش ازعجتك

VÖltaa يقول...

على فكرة ياجدعان
انا جعااان

مش معقول كده انا وابوعلى قاعدين من غير ورك فرخة ولا حتة كبدة

مفيش حسن ضيافة خالص ..ولا حسن الاسمر ^_^

ابو على يقول...

هههههههههه

ورك فرخه

ايوه قوله حاجه يا عم

دا بينزل المشاريب ع التعليقات

هههههه احنا بنتفرج على كاس اوربا ولا ايه

شاب فقرى يقول...

ابو على منور فى اى وقت :)


محمد

يااااااااااه بس كدا

يا حوووووووواااااااش

دا السفرجى هنا مش السياف متقلقش :D

تحياتى لتواجدكم

بيطرية ومش بايدى يقول...

اه كده بقيتوا شباب فى بعض
اطير انا بقى
سلام يا شاب
واول ما انزل البوست الجديد وهاحجز لك التعليق الاول

سلالالالالالالالالالالام

VÖltaa يقول...

لا لا لا

معندكوش هوسبيتاليتى هنا خالص

ياعواااد

خدنى على اقرب محل فول وطعمية

ابو على يقول...

ههههههههههههههههه


شاب فقرى

دكتوره خافت مننا مشيت

ههههههههه
متزعلش يا مان

شاب فقرى يقول...

ابو على


مفيش مشاكل

كلكم زوار للمدونة

بالنسبة لمدونتك انا كتبت لك تعليقات هناك

ليه مش اتوافق عليها وظهرت


لاء كدا انا زعلان :$


شاب فقرى

ابو على يقول...

يا باشا هما اتنين صح

انا طلعتهم للنور واللهى

يا سلام
هو انا هايبقى عندى احسن من شاب ومش فقرى ان شاء الله:d

ابقى قولى رايك ف كليباتى وخصوصا كليب iam alive

شاب فقرى يقول...

ان شاء الله

جارى التجوال فى المدونة

شاب فقرى جدا :D

بيطرية ومش بايدى يقول...

اه كده شكل ابو على هيخبط ف الحلل

ابو على اختى الحبيبة المحلوبة
فى ايه بقى هه؟؟ فى ايه ؟؟؟
الشوق للشوق الحش للحش بت يابت
ول ياول مع تحيات اخوك البيطرى

شاب فقرى يقول...

بيطرية مش فاهم حاجة ؟؟؟؟؟

فى ايه ؟؟؟

بيطرية ومش بايدى يقول...

مفيش حاجة ده انا بهزر
اصل ابوعلى دخل عندى وشاف تعليقك الاخير
فقال اه ياشاب يا خاين العيش والملح
طيب ماثى
وكان قايل قبليها بيطرية خافت فمشيت
فهزرت معاه شوية
بس عادى يعنى وف المعادى

سيبك انت بس الكحك تحفة
هههههههههههههه

بيطرية ومش بايدى يقول...

انا قاعدة لحد 60 انت وصبرك بقى

جالك الموت ياتارك الصلاة
هههههههههه

اه على فكرة رديت عليك عندى

ادخل وشوفه

بيطرية ومش بايدى يقول...

نمت ولا ايه
طااااااااايب
اهبل انا براحتى قصدى اعلق انا براحتى

لالالاللاللاللالاللاللاللالاللاللاللالاللاللا ترررررام تييييراااريم
لا ده انا بغنى

صوتشى حلو مش كده

عارفة عارفة من غير ما تقول
(وش مكسوف)

يا كزوفى يا كزوفى

شاب فقرى يقول...

ادينى سهران

الشغل بقى يا بيطرية

هعمل ايه

دعواتك

رايح هناك اهوه

شاب فقرى يقول...

اكيد حلو

منورة المدونة :)

بيطرية ومش بايدى يقول...

ربنا
معاااااااااااااااك
يارب وشغلك يطلع جميييييييل
ان شاء الله
وتكون احلى شركة باذن الله

انت اللى منور والله

ربنا يسهل لك كل صعب يااااااارب

well يقول...

معاك ويل صاحب شركة عطيل ..
شوف يا استاذى الفيلسوف ..البلد دى فعلا بتاعت شهادات ياراجل ده انا كنت رايح اشتغل مدخل بيانات سئلونى على الشهادات يعنى انا عاوز اقولك مش مهم الخبرة المهم الشهادات ...وبينى وبينك مفيش احسن من العمل الحر تصحى براحتك وتنام براحتك وممكن تعمل مصلحة كدة ..على فكرة انا بكرة رايح اعمل مصلحة هستلم 6 عربيات جامبو محملة بضايع وهوديهم لمخزن شركة .مندوب يعنى ..ادعيلى العملية تتم على خير متخفش العربيات دى مفهاش حشيش ...شوية لحوم مستوردة .
تحياتى

شاب فقرى يقول...

انا حرق دمى ابو على لما اتكلم عن المشمشية

لانى مبحبش حد يغلط فى راى حد

مبحبش حد يجبر الاخرين على رايه

حتى لو رايى غلط

مش من حقك تغلط

الله يسامحك يا ابو على

شاب فقرى يقول...

عزيزي well

انا والله تاعبنى موضوع الشهادات دا

بس اقدر عليه واقدر على اللى اكبر منه عشرين مرة

بس فى حاجة بحبها

ربنا يعينك يارب

وبعدين الحشيش مش ممنوعات:D

هههههههههههههه

متنساش تحجز لاخوك كام كيلو لحمة من العربيات دى :$
وهدعيلك متقلقش

شاب فقرى :$

بيطرية ومش بايدى يقول...

ايه ده
هانت التعليق ده 50

فاضل حاجة بسيطة ونكمل 60

يا مسهل يااااارب

ايديكو معانا ياردالة

هيلا هيلا صلى على النبى

عليه افضل الصلاة والسلام

بيطرية ومش بايدى يقول...

بص اول ما انزل البوست
الجديد
هاقولك وماتخفاش
هاحجز لك التعليق الاول

وقولتلك عمالة ليك مفاجأة

استناها بقى

سلامموووووووووووووووز

شاب فقرى يقول...

يا مسهل الحال يارب

بالانتظار

:)


يارب يسهل ويطلع البوست دا للنور

بس مش عارف ايه المفااجاة

بس مستنى اشوف

ياارب يا مسهل

Aиgel يقول...


يا صبااااح الورد

شاب فقري والله أنت فعلاً فقري

ايه الكلام الغريب ده

أنت طلعت كل اللي جواك
بس لازم تتمسك بحلمك عمر الشغل ع النت ما كان عيب

وعجبتني الشعار الأخير ده
(( اللى ميقدرنيش ... ميلزمنيش ))


صباحك ورد


Angel love

شاب فقرى يقول...

angel

نورتى المدونة

والشعار دا انا بستعمله من سنين

بس كان ليه استثناءات زى مثلا صاحبى او اعز صحابى او البنت اللى مرتبط بيها

انما دلوقتى لا إستثناءات


تحياتى

شاب فقرى

TWEETY يقول...

صباح الخير

ازيك يااعمو

هو انت ليه عامل مدونة اسمها شاب فقرى
بس الصورة دى ضحكتنى خالص

انا قريت الموضوع مش فهمت منه كتير

بس فى اخر حته
فكرتنى بماما لما بتقول حبى كل الناس ومش تكرهى حد

بس كانت مرة ابلة دموع زعلانة وسمعتها بتقول جملة كدا
من حبنا حبناه ومش عارفة ايه كدا هههههه مش فاكرة

بس انا كتبت حاجة تانية ابقى شوفها

شاب فقرى يقول...

TWEETY

منورة المدونة

ما شاء الله عليكى

هوا البوست بيتكلم عن ظروف العمل فى مصر

وبيتكلم عن الخيانة من اقرب الناس

وانا فعلا ماشى بالمبدأ اللى ذكرتيه

بس انا كنت بحافظ اوى عالناس ومش ببيعهم لاى سبب حتى لو بايعينى ودا كان مسبب لى مشكلة كبيرة

تحياتى
شاب فقرى :)

آه وكفى يقول...

ازيك يافقري دانته فقري بصحيح ياجدع
بقولك ايه انا جيت افهمك هنا قولت لمتجيش هناك بص
اللي مفهمتوش ايه الجملة دي
OnkOsh fe al2adiem
معناها أنكش في القديم يعني شوف اللي اتكتب زمان الارشيف يعني

ولا تقصد ارغب بمقبرة باتساع الكون لاواريها حزني فلا تمت انت من الحزن بل ابكي حتى تتجمد
لو دي اللي مش فاهمها فأحب اقولك ان مفيش هنا حاجة مفهومة ومفيش برضو حاجة تنفع تتشرح زي الفرمساوي كده بيتاخد على علته D:

ــــــــــــــــــــــــــــ

نيجي للبوست

ياما الواحد خد خوازيق ياما والله انا مرة وحده كانت صحبتي من ثانوي و من الكلية وقاطعتني او بمعنى ادق باعتني عشان كانت بتحب واد زي الزفت ومتقدملها واد زي الفل وساعدتها تطلع من الازمة و اتخطبت للي زي الفل وعرفت ان اللي كانت بتحبو زباله وحبت اللي زي الفل واقتنعت انها ملهاش غيرو في الدنيا هو صحابها وحبايبها وهو بابا وهو ماما وانور وجدي وليلى مراد ,, فقاطعتني .. ولا عزاء للسيدات

اما صاحبك فاللي يضايقك اقلعو من رجلك ولا يهمك طالما بتاع مصلحتو بلاش قرف وقلة ادب

اما المجال الحر فبشوف انه اصلح حاجة انشالله تبيع سجق

في حاجة مين قالك ان موظف الحكومة بيروح بدري ده معاده8 بيوصل 10 وعلى مايسلم على الفريندز بتوعو وياخد الفطاااار ويشرب الشاي تكون انته خمرت عالشباك ,, ومحدش في الحكومة بيترفد!

تحياتي يافقري

*البت المشمشية *حلوة بس شقية * يقول...

يخربيت دماغك

ده كلو بوست
ده انا انقطع نفسى
متبقاش تكتر كدة
انتا عارف بجد
انا نفسى اشتغل موت
بس النظرية هنا
بتختلف من ولد لبنت
وتعامل الاهل مع الموضوع

انى بنت
ولسه فى جامعه
مينفعش اعمل اللى ان اعيزاه
فكرت كتير اشتغل ع النت
واكسب فلوس
بس معرفتش الطريقة

*البت المشمشية *حلوة بس شقية * يقول...

سالتك سؤال فى مدونتى ياريت تجاوب عليه

*البت المشمشية *حلوة بس شقية * يقول...

نمت ولا ايه
عندك فيس بوك

شاب فقرى يقول...

معلش يا مشمشية كنت بتغدى

:$

مش بقولك فقرى

انا شغال عالنت من ايام ما خلصت ثانوى وانا شغال وبصرف على نفسى من النت :$

والحمد لله فى خلال كام شهر هفتتح شركتى الخاصة

:)

او بمعنى اصح هفتتح مقر لان الشركة موجودة فعلا :$

هرد حالاهناك

شاب فقرى

*البت المشمشية *حلوة بس شقية * يقول...

طيب ممكن تساعدنى وتقولى ازاى ممكن الواحد يكسب فلوس من النت

*البت المشمشية *حلوة بس شقية * يقول...

على فكرة
قريت التعليقات
وشكرا بجد جدا انك دافعت عنى

*البت المشمشية *حلوة بس شقية * يقول...

بتروح فين بس

شاب فقرى يقول...

بصى انا هحكى لك ببساطة وواحدة واحدة ومن الاول

دلوقتى النت دا بيعتمد بشكل اساسى على المعلومات وتقديم المعلومات

يعنى عالمواقع والمدونات زى اللى احنا بنعملها ومراكز الاخبار

لكن المواقع دى بتكسب منين ؟؟؟

من خلال الإعلانات اللى بتحطها

سواء لشركات مشهورة زى جوجل ادسينس (( ودى انا اشتغلت فيها سنتين ))
ودى هى تبع جوجل اللى عامل بلوجر وطبعا عبارة عن ان الواحد بيشترك فى جوجل فى قسم ادسينس وبيقدم موقعه (( مجانى او بفلوس ))
ولما الموقع بيتوافق عليه
بيسمحوا لك بوضع اعلانتهم فيه
طيب ليه جوجل بيدفع عشان يحط اعلاناته عندك ؟؟؟؟؟
ببساطة لان فى ناس بتدفع له عشان بيعمل كدا
يعنى اصحاب الشركات بيروحوا لجوجل يطلبوا انه يعملهم اعلانات فى محرك البحث وفى المواقع اللى فى العالم كله
لان مش معقول مثلا ابقى موقع تبع شركة صابون هعمل اعلانات لنفسى ازاى او موقع لابتوبات
مش معقول هروح احط فى كل موقع فى العالم وادفعله لوحده
فهنا بيروح لجوجل وبيدى له فلوس وجوجل بيجيب مواقع الناس اللى بتقدم زيك كدا مثلا وبيبتدى يحاسبهم اى حد يضغط على الاعلانات او يشوفها جوجل بيدفعلك لان دا موقعك اللى الاعلانات ظاهرة فيه
وبيحاسب الناس عن طريق ويسترن يونيون تحويل الاموال عبر العالم أو من خلال شيكات بيبعتها عالبيت
ايون عالبيت وقبل ما بيبعت الشيك او يبعت اى حاجة
بيبعت الاول جواب بياكد فيه عالعنوان والجواب دا بيكون اسمه البن كود لان بيبقى فى كود بيتحط فى جوجل بيأكتف حسابك
دى أول نقطة
تمام ؟؟؟

انا اشتغلت فى المجال دا فترة لحد ما وصلت انى كنت بعمل منه عشرة دولار يوميا وزهقت منه لانى دوما بحب حاجة جديدة واتخليت عنه لانى فقرى زى ما هوا واضح واشتغلت فى حاجة تانية

دخلت عالم ال it وعمل المواقع
يعنى ايه

يعنى دلوقتى انتى مثلا صممتى موقع عالجهاز عايزة الموقع دا ينتشر فى العالم كله ؟؟ بيتم ازاى ؟؟؟
طبعا مينفعش تخلى الناس تخش تشوف الموقع من جهازك لان جهازك هيهنج ويتحرق
عشان كدا المواقع دى بتتحط على اجهزة كمبيوتر بمواصفات خاصة الاجهزة دى بيكون اسمها سيرفرات او (( خوادم ))
الخادم دا طبعا البروسيسور اللى بيكون فيه بيعمل من بروسيسور جهازك اربعة او اتنين او تمانية والله اعلم
والرامات بتوصل لحد 32 جيجا رام وممكن تبقى جيجا واحدة
على حسب امكانيات كل سيرفر
انا بقى فين فى كل دا

انا صاحب السيرفر وانا الدعم الفنى للسيرفر
بمعنى انى ببيع مساحات للناس عالسيرفر عندى عشان تحط عليها مواقعها وكمان انا بحجز سيرفرات للناس من الشركات الكبيرة الموثوق فيها وبكون الدعم الفنى للسيرفر لانا لسيستم اللى السيرفر شغال عليه هوا لينوكس
وهوا السيستم اللى هاخد فيه شهادة قريب بعون الله
وكمان انا بعد ما بعمل الموقع
بيكون مثلا منتدى
انا بقى بكون المسؤل عن الصيانة والحماية وتركيب الهاكات (( ملفات بتقوم بوظيفة معينه )) او استايلات (( تصاميم حلوة للموقع )) او بعمله حماية زى ما قلت

يعنى من الاخر عبارة عن

Linux System Administrator
دا مدير خوادم ودعم فنى سيرفرات

وبرده دعم فنى مواقع
وكمان صاحب شركة استضافة عالنت
لسه مش مسجلة ولا مرخصة

غير كدا المجال بتاعى بقى فيه sales وناس شغاله فى السبورت
واغلب التعامل بتاعنا بيكون مع خليجيين وسعوديين لان هما اللى بيقدروا يدفعوا بسخاء وبرده هما اغلب الزباين

اى استفسار انا موجود وتحت امرك

ونورتى المدونة

شاب فقرى
:$

شاب فقرى يقول...

كنت بكتب التعليق الضخم دا

انا هنا :)

متاح


وكان لازم ادافع عنك :$

انتى اللى رجعتينى للتدوين


ودى حاجة مش تتنسى

شاب فقرى

*البت المشمشية *حلوة بس شقية * يقول...

ههههههههههههههه
ده كلو
اللى عايزة اعرفو
ازاى اكسب فلوس مثلا من خلال المدونة
وكدة
حاجة سهلة وبسيطة يعنى

وبيكسبو اد ايه بلمصر
مش بلدولار

شاب فقرى يقول...

انا لما كنت شغال فى الموضوع دا

بتاع الاعلانات كنت بتعب جامد

لانى كنت بعمل مواقع وبقعد اشهر فيها فى كل المنتديات وكان بييجى لى شيكات ب 250$

واحيانا ب 100بس

ومفيش اقل من 100

دا كل شهرين مثلا

وكنت بصرفهم فى تلات تيام بالظبط

ومش تسالينى ازاى

بشرط مكنتش بخرج من البيت :D

شاب فقرى

*البت المشمشية *حلوة بس شقية * يقول...

يعنى موضوع الاعلانات ع المدونة ده صعب صح

*البت المشمشية *حلوة بس شقية * يقول...

عندك فيس بؤ؟

شاب فقرى يقول...

اه وكفى

منور المدونة

والله بيشوف حاجات كتير من الصحاب ومش بيرضى يتكلم

ودا انا شفت منه كتير اوى واستحملت

والحمد لله انا بحب القطاع الحر

وشكرا لردك وسبحان الله انته من القلائل اللى قروا التدوينة للاخر

شاب فقرى

شاب فقرى يقول...

مشمشية

عندى فيس بؤ طبعا وعندى ايميل فى المدونة اهوه عاليمين فوق تحت المشنقة

افتحى الرئيسية وانتى تلاقيه

وكمان الفيس بؤ بسخصيتى الطبيعية وانا اسمى لو اتكتب فى جوجل هيطلع كل بياناتى

فبلاش الفيس بؤ :$

شاب فقرى

*البت المشمشية *حلوة بس شقية * يقول...

لاء ان امش عايزة الميل
لانى شايلة الياهو اساسا

انا عايزة الفيس بوك

شاب فقرى يقول...

ما انا مبدخلش ياهو برده

مش بحبه

والفيس بوك بشخصيتى وهيبقى صعب
؟؟

اشمعنا الفيس بوك ؟

*البت المشمشية *حلوة بس شقية * يقول...

لا ءعادى اكمن كلنا عليه طول النهار
مش بنفتح ياهو
بس اوك عادى ولا يهمك
دى حرية

شاب فقرى يقول...

اكتبى انتى الاكرنت بتاعك وانا هضيفك فىخلال دقيقتين

ولو مش ينفع تكتبى الاكونت هكتبلك الاكونت انا وهبقى امسح التعليق تانى

شاب فقرى

*البت المشمشية *حلوة بس شقية * يقول...
أزال المؤلف هذا التعليق.
*البت المشمشية *حلوة بس شقية * يقول...

روحت فين

شاب فقرى يقول...

قمت جبت اللاب توب

حاولت اضيف عادل معرفتش للاكونت بتاعى
فشوفت حد ضايفه

ودخلت عالاكونت بتاعه من اللاب

ودورت فى اصدقاء عادل

ولقيتك وضفتك

:)

تمام اوى كدا

شاب فقرى

*البت المشمشية *حلوة بس شقية * يقول...

اوك وصلت

شاب فقرى يقول...

تيت تيت تيت

متقوليش لحد بقى :$

لان زى ما قلت لك اسمى فى جوجل بيطلع كل حاجة عنى ودى مشكلة :(

لان شهرتى من شهرة شغلى :$


شاب فقرى :)

*البت المشمشية *حلوة بس شقية * يقول...

اة اوك
عشان كدة مكنتش عايز حد يعرف الفيس بوك صح

شاب فقرى يقول...

بالظبط

لانى عامل المدونة بعيد عن حياتى كلها

عن اى شغل وعن اى علاقات تانية

هنا ببقى انا

مش ببقى حد تانى

بيطرية ومش بايدى يقول...

يا شاب
انا هانزل البوست دلوقتى
ماشى

وهاحجز لك التعليق الاول

شاب فقرى يقول...

انا اساسا على باب المدونة
اول ما البوست ينزل هعرف :)

بالانتظار

♥نبع الغرام♥♪≈ يقول...

ممممممممممم
ما انت شغال اهو
وعندك تعليقات كتير انا فكرى لسه يعنى

ربنا يزيد ويبارك
انا من طرف اللمبى
بيطريه ومش بايدى ههههههههههه

اقعد بالعافيه

Yusuf يقول...

مهندسين تي اي داتا حبايب قلبك

زعلتني منك من أول زيارة

بص يامعلم انت بتعمل الصح
وبتستفيد من وقتك وكمان بتزود خبرتك
انا كان نفسي اعمل زيك بس للأسف اول ما بقعد علي اللاب توب بلاقي الوقت راح ف كلام فارغ


وبالنسبة لموضوع اللي كان مصاحبك عشان مصلحته

بجد مجرد التفكير ف الموضوع تضييع وقت

وطبعا مش محتاج اقولك تشكر بيطرية ومش بايدي ازاي


دي عاملالك دعاية ببلاش ودي اول مرة تحصل ف تاريخ البني ادمين

والسلام ختام

عاشق الجنة من الإخوان صلى على النبى يقول...

شةف والله أنا عن نفسي تعبت
بس هقول ايه
لا حول ولا قوة إلا بالله العلي العظيم
صلي علي النبي

طوبه فضه وطوبه دهب يقول...

lo el ansan dah lsa leh mkan falbak adelo frsa tany wrbna ykrmk fshoghlak w7yatk ya rab wykon f3lan 3ml 7or trda 3no wyrda 3no allah wrasolo

شاب فقرى يقول...

عاشقة الإحزان

نورتى المدونة

ويارب نشوفك دايما معانا

شاب فقرى

شاب فقرى يقول...

يوسف

نورت مدونتى

بجد سعيد بتعليقك وانته من القلائل اللى قروا البوست

:)


ودعواتك معانا

انا مش بحب فى تى داتا

غير مهندس واحد بعتبره اخويا

ربنا يحفظه ويكرمه يارب


شاب فقرى

شاب فقرى يقول...

عاشق الجنة

ربنا يحفظك ويهون عليك التعب بس تعبت من ايه ؟؟؟؟

شاب فقرى يقول...

طوبة فضة وطوبة دهب

نورت المدونة

هوا بياخد فرص من سنة ونص تقريبا

خلاص فرصه كلها خلصت

وشكرا لتعليقك ودعواتك وربنا يوفقك فى حياتك

تحياتى

شاب فقرى

ابو على يقول...

مش عارف اقولك ايه
بس انت كده تمام

شاب فقرى يقول...

تمام فى ايه يا ابو على ؟؟؟؟

آه وكفى يقول...

ليه هو انته عندك مبيقروهاش للاخر طيب بيفنحوها ليه اصلا

شاب فقرى يقول...

والله مش عارف

بس بقيت بحس انى لما بكتب بوست طويل

محدش بيقراه للاخر

ودى حاجة بقت بتزعلنى

بس بسكت

نورت يا اه وكفى

تحياتى واحترامى الكامل

شاب فقرى

r يقول...

يظهر بدأت افهم شويه شغلك
معلش انا سألت السؤال دا بدايه اول بوست علقت عليه

اذن انت صاحب عمل حر
وتحب الحريه

السؤال انت عايش فى مصر ازاى نفسى اعرف الصراحه؟

لانى جربت العمل الخاص والحكومى ايضا
لاقيت ما فيش احسن من قاعده البيت
بس مش على النت لان المجهود الذهنى والحركى فيه متعب عن حق